ပယီၤသုးလၢကလဲၤထီၣ်ဖၣ်ပူၣ်တဖၣ်ခးကမၣ်လိၥ်ကဒါသးကဒဲကဒဲ သံဘၣ်ဒိဘၣ်ထံးအိၣ်ဒီး ကဘီယူၤအဃိ ဟံၣ်ဃုၥ်ဒီးကၠိ ဟးဂီၤ(၁၃)ဖျၢၣ်

လါယူၤလံ ၁၇ သီ, ၂၀၂၆ နံၣ်, ခ့ၣ်အဲးစံၣ်

ပယီၤသုးကျိၤလၢအဂုၥ်ကျဲးစၢးလဲၤထီၣ်ဆူခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤအံၤတဖၣ် ဖဲမဟါကညီဒီကလုၥ် ဂၢၤသးကရၢ(KNDO)မုၢ်နံၤပှဲၤထီၣ် ၇၉ ဝီတဝီအနံၤန့ၣ် တၢ်ဒုးကဲထီၣ်ဝဲဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ်ဒိၣ်ဒိၣ်မုၢ်မုၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.

ပယီၤသုးလၢအတုၤအိၣ်ကတၢတံၥ်ကရူၢ်ပူၤ ဖါလိဖိသဝီဆၢလၥ် ဖယါကိ(ဘုရာကုန်း)အံၤတဖၣ် လၢကဆဲးလဲၤထီၣ်ဆူ ဖၣ်ပူၣ်အံၤ အဂီၢ် ဖဲအဝဲသ့ၣ်နီၤဖးလီၤသုးကျိၤ(၂)ဘိလဲၤထီၣ်ဝဲအခါ တၢ်ဒုးကဲထီၣ်ဝဲအဃိ ဖဲပယီၤသုးအံၤခးလီၤစၢၤဝဲကျိဖးဒိၣ်အခါ လီၤတဲၥ် ကဒါက့ၤလၢအဝဲသ့ၣ်ကစၢ်သုးကျိၤပူၤအဃိ သံဘၣ်ဒိဘၣ်ထံးဝဲအိၣ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ စံးဝဲန့ၣ်လီၤ.

“ဒုၣ်ဒါပယီၤသုးကျိၤဒုတိကျဲလဲးလိးလီၤ. ခဲအံၤနီၤဖးလီၤဝဲသုးကျိၤ(၂)ဘိ ကျဲမုၢ်မုၢ်နုၥ်တဘိဒီးမုၢ်ထီၣ်တဘိ. မ့မ့ၢ်လၢမုၢ်နုၥ်တဘိန့ၣ် ဖဲမဟါလါယူၤလံ ၁၆ န့ၣ်ဂုၥ်ကျဲးစၢးတိကျဲလဲးလိးလီၤ. မုၢ်နုၥ်တဘိန့ၣ်ကဟဲထီၣ်ပှၤထံၣ်စိအီၤဘျီတၢ်ဒုးကဲထီၣ်ဝဲလီၤ. တၢ်ဒုးကဲ ထီၣ်ဘျီအဝဲသ့ၣ်ခးလီၤစၢၤဝဲကျိဖးဒိၣ် လီၤဘၣ်ကဒါက့ၤလၢကဒဲကဒဲအပူၤဘျီသံဘၣ်ဒိဘၣ်ထံးအိၣ်. သံပှဲၤဂၤဘၣ်ဒိ ဘၣ်ထံး ပှဲၤဂၤခီတသ့ၣ်ညါလီၤတံၢ်ဘၣ်.ခီဖျိလၢအဝဲသ့ၣ်လူၤမၤဒၢၣ်ကမျၢၢ်အါတလၢအဃိတၢ်ဒဲးဘးအီၣ်ကဒါအဝဲသ့ၣ်.”အဂ့ၢ်န့ၣ် စံးဘၣ်ခ့ၣ်အဲးစံ-ကညီတၢ်ကစီၣ်န့ၣ်လီၤ.

လၢန့ၣ်အမဲၥ်ညါတနံၤဃီဖဲတၢ်ဒုးကဲထီၣ် မုၢ်ဃ့ၢ်လီၤ ၁း၃၀ နၣ်ရံၣ်တုၤဃီၤလၢ ၃း၀၀ နၣ်ရံၣ်တစု ကဘီယူၤတ့ၢ်လီၤဝဲ မ့ၣ်ပိၢ်(၄) ဖျၢၣ် လၢထံသဘျုၣ်ထၣ်ကရူၢ် ထံလီၤသံးထၣ်သဝီပူၤအဃိ ကမျၢၢ်ဟံၣ်(၁၂)ဖျၢၣ်ဒီးကၠိ(၁)ဖျၢၣ် လီၤပှီၢ်ဟးဂူၥ်ဟးဂီၤဝဲ အမဲၥ်ညါ ထိး(၁)ဒု,မဲးတဲးလဲး(၂)ဒု,ကျီၢ်(၁)ဒုဒီးဆီသံစ့ၢ်ကီးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဃးကဘီယူၤဟဲခးလီၤကဒီးတၢ် တၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤတၢ်ဂ့ၢ်အံၤန့ၣ် ပဒိၣ်စီၤထိၣ်ရီၤဘ့ၤ စံးဝဲလၢ “ဖဲမဟါ ၁၆ သီ စးထီၣ်ဖဲ ၁ နၣ်ရံၣ်တုၤလၢ ၃ နၣ်ရံၣ်ဃၣ်ဃၣ်န့ၣ် ကဘီယူၤဟဲခးလီၤတၢ်ဖဲထံလီၤသံးထၣ်သဝီတၢ်ခိၣ်တၢ်ဃၢၤန့ၣ်. ပှၤဟံၣ်ပှၤဃီမ့ဝံၤကၠိစ့ၢ်ကီးဟးဂီၤဝဲ” အဂ့ၢ်န့ၣ် ပဒိၣ်စီၤထိၣ်ရီဘ့ၤ စံးအါထီၣ်ဝဲန့ၣ်လီၤ

(သုးက့ ၅)ဟီၣ်ကဝီၤပူၤ ပယီၤသုးအံၤလၢကထီၣ်မၤအါထီၣ်သုးဂံၢ်ဘါလၢအသုးကလၢၤအိၣ်တ့ၢ်တဖၣ်ပူၤအဂီၢ် စးထီၣ်လၢ အဝဲသ့ၣ် ဟဲထီၣ်ဟူးဂဲၤတုၤလၢခဲအံၤခးလီၤဝဲကျိဖးဒိၣ်,ခးလီၤတၢ်ဒီးကဘီယူၤတပယူၥ်ဃီအဃိ ကမျၢၢ်ဘၣ်ဒိဘၣ်ထံး, ဟံၣ်တၢ် သူၣ်ထီၣ်,ဆၣ်ဖိကီၢ်ဖိသံ,ဘၣ်ဒိဘၣ်ထံးကဲထီၣ်အိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ.

ဒ်န့ၣ်အသိးခီဖျိလၢပယီၤသုးကျိၤအတၢ်ဟဲထီၣ်ဟူးဂဲၤအံၤအဃိ ဒူသဝီကမျၢၢ်လၢအိၣ်ဖဲကမၤမိၢ်-ဖၣ်ပူၣ်အဘၢၣ်စၢၤအံၤတဖၣ် စ့ၢ်ကီး တုၤလၢခဲအံၤဃ့ၢ်ထီၣ်တၢ်ဆၢကတီၢ်ထီၣ်ဘးလၢ(၂)လါဘျဲၣ်လံဘၣ်ဆၣ် က့ၤဟံၣ်က့ၤဃီတဘူၣ်ဘၣ်ဟးအိၣ်ဒံးဝဲလၢ တၢ်ဘံတၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

တကီၢ်ခါခဲအံၤပယီၤသုးသ့ၣ်တဖၣ်အံၤထီၣ်ဆူညါတန့ၢ် အိၣ်ဒံးဝဲဖဲကတၢတံၥ်ကရူၢ် ဖါလိဖိသဝီဆၢလၥ် ဖယါကိ(ဘုးရားကုန်း) တၢ်လီၢ်ဒံးလီၤဒီး ဒုးယၤတၢ်ဖ့ၣ်စၢစ့ၢ်ကီးဆဲးကဲထီၣ်ဒံးဝဲလၢခံခီခံကပၤအဘၢစၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.