(သုးက့ ၆) ယဲကိတၢ်ဒုးအပူၤ ပယီၤသုးကျိၤဟးဂီၤဒီတဘိအဂ့ၢ် KNLA တၢ်ပၢၢ်ဆၢကရူၢ်စံးဝဲ

လါယူၤလံ ၁၇ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံကီၢ်ဆၣ် မၠၣ်ဝတံၣ်ကလံၤထံးဟီၣ်ကဝီၤအပူၤ ပယီၤသုးကျိၤလၢဟဲထီၣ် ဟူးဂဲၤ တဖၣ်အံၤ ခီဖျိဘၣ်တၢ်ကဝီၤခးဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဃိ သုးကျိၤဟးဂီၤဝဲဒီတဘိဒီး တၢ်ဖီၣ်န့ၢ်သမူန့ၢ်ဝဲအိၣ်အဂ့ၢ်န့ၣ် တၢ်ပၢၢ်ဆၢသုးကရူၢ်တကပၤ စံးဝဲန့ၣ်လီၤ.

စးထီၣ်ဖဲလါယူၤလံတလါအံၤထီၣ်အခါန့ၣ် လၢကထီၣ်ဒိၣ်စိက့ၤဟီၣ်ကဝီၤထံဆၢကီၢ်ဆၢအဂီၢ်ပယီၤသုးဂံၢ်ဘါလၢကထိ ဟဲထီၣ်နုၥ်လီၤ ဟူးဂဲၤဝဲလၢလ့က့ၣ်ကိၥ်,ဖလူတကပၤဝံၤဒီး တၢ်ဒုးကဲထီၣ်ဝဲဒီးဟီၣ်ကဝီၤ(KNLA)သုးပၥ်ဖှိၣ် အဘၢၣ်စၢၤအိၣ်ဝဲ ကိးမုၢ်နံၤဒဲးဃၣ်ဃၣ်န့ၣ်လီၤ.

ဒ်န့ၣ်အသိးဖဲမဟါလါယူၤလံ ၁၆ သီအနံၤ ပယီၤသုးနီၤဖးလီၤဝဲသုးကျိၤ(၇)ကျိၤဟဲထီၣ်ဟူးဂဲၤဝဲဒီးသုးကျိၤအကျါ(၁)ဘိန့ၣ် ဖဲဟဲ ထီၣ်တလၢဝဲ(ဘုရၥးကုန်း)အခါ ဟီၣ်ကဝီၤ(KNLA)သုးပၥ်ဖှိၣ်ကဝီၤခးဖှိၣ်အဝဲသ့ၣ်ဒီးဖဲန့ၣ်သံတၢ်ဘၣ်ဒိဘၣ်ထံးအမဲၥ်ညါ တနီၤန့ၣ် ဃ့ၢ်ထီၣ်တၢ်ဖီၣ်ချုးဝဲအိၣ်အဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤ န့ၣ်လီၤ.

အဝဲစံးဝဲလၢ“အဝဲသ့ၣ်န့ၣ်လၢကဟဲထီၣ်ဆူကနဲတၢ်လီၢ်အဂီၢ် ဖဲအဟဲထီၣ်တလၢ(ရဲကုန်း)အခါန့ၣ် ပပှၤကဝီၤခးတံၢ်ဝဲအဃိ သုးကျိၤ ဒီတကျိၤဟးဂီၤဝဲလီၤ.ပှၤလၢ အသံညါန့ၣ်သံ,လၢဃ့ၢ်ညါန့ၣ်ဃ့ၢ်,လၢဖီၣ်မူန့ၢ်ညါန့ၣ်ဖီၣ်န့ၢ်လီၤ.ခဲအံၤပယီၤသုးန့ၣ်ဆီလီၤသး ဟူးဂဲၤအိၣ်ဝဲဖဲ(ရဲကုန်း)ဆၢခိၣ်န့ၣ်လီၤ. ခဲအံၤပခိးကွၢ်ဟုၣ်ကွၢ်စုၣ်အဝဲသ့ၣ်လီၤ. မ့ၢ်အဝဲသ့ၣ်ကဆဲးမၤဝဲဒ်လဲၣ်,မ့ၢ်အဝဲသ့ၣ် ကဂဲၤ ပှၤဒ်လဲၣ်ပအိၣ်ခိးကွၢ်ထီဘိလီၤ” အဂ့ၢ်န့ၣ် စံးဝဲန့ၣ်လီၤ.

လၢတၢ်ဒုးဘျီဝဲန့ၣ်အပူၤ မဟါဒ်တၢ်ပၥ်ဖျါထီၣ်ဝဲလၢ(social media)ပူၤအသိးန့ၣ် (KNLA)ဖီၣ်န့ၢ်ဝဲပယီၤသုးဖိ(၄)ဂၤဃုၥ်ဒီး စုကဝဲၤ ကျိချံပှၥ်သၣ်သ့ၣ် တဖၣ်ဒီး ပှၤသ့ၣ်တဖၣ်အံၤ အသးနံၣ်ကအိၣ်ဒံးထဲ(၂၀)ခိၣ်ဃၢၤမ့ၢ်ဝဲသူၣ်ဘီၣ်သးစၢ်တဖၣ်အဃိ ပှၤသ့ၣ်တဖၣ်အံၤဘၣ်သ့ၣ်သ့ၣ်ကမ့ၢ်ဝဲ သုးဖိသီအဂ့ၢ်န့ၣ် တၢ်ပဲၥ်ထံနီၤဖးစံးဝဲန့ၣ်လီၤ.

အပူၤကွံၥ်တၢ်ဒုးကဲထီၣ်အကတီၢ် ပယီၤသုးပျၢ်ထီၣ်ဝဲဒြိ,ခးလီၤကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်မ့အိၣ်ဘၣ်ဆၣ် တနံၤအံၤ ခီဖျိတၢ်စူၤတပယူၥ်ဃီအဃိ တုၤလၢမုၢ်ထူၣ်တစုပယီၤသုးတကပၤပျၢ်ထီၣ်ဒြိ,ကဘီယူၤမ့တအိၣ်ဒံးဘၣ်သနါက့ လၢသုးကလၢၤ တၢ်လီၢ်အံၤတဆီခးလီၤဝဲကျိဖးဒိၣ်လၢတၢ်ပၢၢ်ဆၢသုးကရူၢ်ဟူးဂဲၤလီၢ်အိၣ်ဝဲအဂ့ၢ်န့ၣ် သ့ၣ်ညါဘၣ် န့ၣ်လီၤ.

“ပမ့ကွၢ်ဖဲတဂီၤအံၤတၢ်အိၣ်သးဒုအိၣ်ဒၣ်လၢအခးစိလီၤကျိဖးဒိၣ်လီၤ.တၢ်စူၤအါအဃိအ(Y-12)ကဘီယူၤ,အဒြိတဖၣ် တထီၣ် ဒံးဘၣ်. သနါက့ပအိၣ်လၢတၢ်ပလီၢ်ထီဘိလီၤ.ခဲအံၤအအိၣ်ဖဲ(ရဲကုန်း)ဆၢခိၣ်န့ၣ်ဒီး အဝဲသ့ၣ်န့ၣ်ဟူးဂဲၤဝဲမ့န့ၢ်တခါန့ၣ်ဟံန့ၢ်ဝဲတၢ်လီၢ် တခါလီၤ.” အဂ့ၢ်န့ၣ် တၢ်ပၢၢ်ဆၢကရူၢ်အပှၤတဂၤဃီဝဲန့ၣ် စံးဝဲအသိး သ့ၣ်ညါဘၣ်န့ၣ်လီၤ.

သုးမီၤစိရိၤအံၤလၢကဟဲထီၣ်ဒိၣ်စိက့ၤ(သုးက့ ၆)ထံဆၢကီၢ်ဆၢဟီၣ်ကဝီၤ သုးကလၢၤတၢ်လီၢ်လၢအဝဲသ့ၣ်ဘၣ်ဟ့ၣ်ဆှူဝဲသ့ၣ် တဖၣ်အံၤအဂီၢ် ကမျၢၢ်သူၣ်ဘီၣ်သးစၢ်လၢအဖီၣ်ဝဲသ့ၣ်တဖၣ်အံၤဆှၢထီၣ်ဝဲဆူတၢ်မဲၥ်ညါတၢ်ဒုးဆူၣ်အလီၢ်ဒီး တုၤလၢခဲအံၤ ဟီၣ်ကဝီၤပယီၤသုးဟူးဂဲၤအခိၣ်အဃၢၤန့ၣ် ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤအဂ့ၢ်န့ၣ် သ့ၣ်ညါဘၣ် န့ၣ်လီၤ.