လါယူၤလံ ၈သီ, ၂၀၂၆နံၣ်, ခ့ၣ်အဲးစံၣ်.
ပယီၤသုးကရူၢ်အံၤလၢကဟံးန့ၢ်က့ၤဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ရၤမတံဝ့ၢ်ကလံၤထံးတၢ်လီၢ်တၢ်ကျဲအဂီၢ်,လၢက့က့ၣ်ကိၥ်တဆီမၤအါထီၣ်ဝဲအဂံၢ်အဘါဆူ ဖလူ,မ့လဲၣ်ပၤလၢအကယၤဒီးစးထီၣ်လၢမဟါလါယူၤလံ(၇)သီတုၤလၢတနံၤအံၤလါယူၤလံ(၈)သီအနံၤအံၤန့ၣ်, ကျိဖးဒိၣ်ဒီးကဘီယူၤတၢ်ထီၣ်ဒုးတဖၣ်ဆူၣ်ဝဲတပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
သုးကရူၢ်အံၤလၢကဒိးန့ၢ်ဘၣ်ဝဲဖလူ,မ့လဲၣ်ပၣ်အဂီၢ်မၤဝဲသုးကျိၤပၥ်ဖှိၣ်တၢ်ဟူးတၢ်ဂဲၤအမဲၥ်ညါမၤသကိးဝဲတၢ်ဒီးသုးခိးကီၢ်ဆၢ(BGF),(DKBA)ထုးဖးသးကရူၢ်ကရၢတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
စးထီၣ်ဖဲမဟါလါယူၤလံ(၇)သီဟါခီအနံၤန့ၣ်လၢလ့က့ၣ်ကိၥ်တဆီလဲၤထီၣ်ဝဲဆူဖလူ,မ့လဲၣ်ပၤဒီးသုးသိလ့ၣ်တဖၣ်ဒီးအဂံၢ်အဘါကအိၣ်ဝဲလၢ(၅၀၀)ဃၣ်ဃၣ်ဒီးအဝဲသ့ၣ်တဖၣ်အံၤမ့ၢ်ဝဲသုးတြိၤ(တမ-၂၂),(တမ-၄၄),(စကခ-၁၃)စကခ(၁၉)ဃုၥ်ဒီးသုးခိးကီၢ်ဆၢ(BGF)သုးခိၣ်စီၤမိၢ်သိး,သုးခိၣ်ခၠံၣ်လိၤဒီး(DKBA)ထုးဖးသးဘိၤဘံၣ်,ဘိၤနဲၤလွ့ၤတီခိၣ်ရိၣ်မဲသုးကရူၢ်တဖၣ်ပၣ်ဃုၥ်ဝဲအဂ့ၢ်,သ့ၣ်ညါဘၣ်လၢပျီပူၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
ပျီပူၤသုးဂ့ၢ်ဝီ(KNLA)ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲလၢ“အသုဟဲထီၣ်တုၤလၢဖလူ,မ့လဲၣ်ပၤလံ,ဟဲထီၣ်ဝဲဒီတနၤမၤဝဲကျိၣ်ဖးဒိၣ်တၢ်ခးလီၤတၢ်ဒီတနၤတုၤလၢမုၢ်ဂီၤခီန့ၣ်လီၤ”အဂ့ၢ်စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လၢန့ၣ်အမဲၥ်ညါ,သုးကရူၢ်အံၤဆှၢထီၣ်ဝဲအဂံၢ်အဘါတပယူၥ်ဃီဒီးတုၤလၢမဟါမုၢ်နၤခီအနံၤန့ၣ်ဆှၢအါထီၣ်ဝဲအပှၤလၢလ့က့ၣ်ကိၥ်အဂၤ(၂၀၀)ဘျဲၣ်အိၣ်ဝဲအဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
တကးဒံးဘၣ်,သုးကရူၢ်အံၤမၤဝဲကဘီယူၤတၢ်ထီၣ်ဒုးအမဲၥ်ညါ,ရၤမတံဝ့ၢ် ခီၣ်သုးရ့ၣ်(ခလရ-၂၇၅)သုးကလၢၤဒီးကီးတရံးဝ့ၢ်သုးကရူၢ်တဖၣ်မၤဝဲတၢ်ခးလီၤစၢၤကျိဖးဒိၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တကီၢ်ခါခဲအံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးသုးကရူၢ်အဘၢၣ်စၢၤခံခီခံကပၤတၢ်ဖ့ၣ်ဆၢအိၣ်ဝဲဒၣ်ဒီးတၢ်ခးလိၥ်သးကဲထီၣ်ခဲအံၤဘူးဒီးကီၢ်ကၠီၣ်တဲၣ်ကီၢ်ဆၢအဃိကျိဖးဒိၣ်,ကျိချံ လီၤတဲၥ်ဝဲဒၣ်လၢ ကီၢ်ကၠီၣ်တဲၣ်ပူၤ, ဒူသဝီလၢအိၣ်ဘူးဖဲကီၢ်ဆၢတဖၣ်အိၣ်ဝဲန့ၣ်လီၤ.
လၢတၢ်န့ၣ်အဃိ,ကမျၢၢ်တဖၣ်ကဃ့ၢ်ထီၣ်အိၣ်လၢတၢ်ဘံၣ်တၢ်ဘၢအပူၤဒီးကဟးထီၣ်ဟးလီၤလၢတၢ်ပလီၢ်ပဒီသးအပူၤအဂ့ၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ဆီၣ်တခူစံးဝဲအိၣ်န့ၣ်လီၤ.
ခီဖျိလၢတၢ်ခးလိၥ်သးအဃိကျိချံဖျိးဝဲဒၣ်လၢကၠီၣ်တဲၣ်တကပၤဒီးဘၣ်ဝဲဒၣ်ကီၢ်ဆၢကမျၢၢ်ဟံၣ်(၃)ဖျၢၣ်အိၣ်ဝဲအသိး,အပူၤကွံၥ်လီၤတဲၥ်ပိၢ်ဖးဝဲလၢကမျၢၢ်တၢ်ဖံးအီၣ်မၤအီၣ်ကျီးပူၤအိၣ်ဝဲအဃိ,ခါဆူညါစုကဝဲၤမ့ၢ်လီၤတဲၥ်လၢကၠီၣ်တဲၣ်တကပၤန့ၣ်,ကၠီၣ်တဲၣ်ကီၢ်ဆၢတၢ်ဘံၣ်တၢ်ဘၢသုးခိးကီၢ်ဆၢတကပၤကခီၣ်ဆၢဝဲအိၣ်ဝဲအဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့ပၥ်ဖျါဝဲအသိးန့ၣ်လီၤ.
