လါယူၤလံ,၁၇သီ,၂၀၂၆နံၣ် ခ့ၣ်အဲးစံၣ်
ခ့ၣ်အဲးယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်ပူၤ အံၤဖဲအပူၤကွံၥ်လါယူၤလံ,၁၃သီအနံၤန့ၣ် ခီဖျိလၢပယီၤသုးမီၤစိရိၤ ခးလီၤတၢ်လၢကဘီယူၤ(Y-12)အဃိ ကမျၢၢ်ဘၣ်သံ(၂)ဂၤအမဲၥ်ညါ တၢ်ဆါတၢ်ပှ့ၤကျး(၂)ဖျၢၣ်စ့ၢ်ကီး ဘၣ်ဟးဂီၤဝဲအဂ့ၢ် သ့ၣ်ညါဘၣ်ဒ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပၥ်ဖျါဝဲဒၣ်အသိးန့ၣ်လီၤ.’
ပယီၤသုးမီၤစိရိအံၤ တ့ၢ်လီၤဝဲမ့ၣ်ပိၢ်တစှၤန့ၢ် အဖျၢၣ်(၂၀)ဖဲ ဟံၣ်အူသဝီ, ရှဲဒ့သဝီဒီး မံယၢထါသဝီပူၤအံၤအဃိ မံယၢထါကမျၢၢ်လၢအမ့ၢ် နီၢ်ဘွ့ၣ်ဖီသးနံၣ်(၅၇)နံၣ် ဒီးနီၢ်လ့ဝါသးနံၣ်(၅၆)နံၣ်ခံဂၤအံၤဘၣ်သံဝဲဒၣ်အသိး တၢ်ဆါတၢ်ပှ့ၤကျး(၂)ဖျၢၣ်လၢ ဘၣ်ဟးဂီၤအကစၢ်မ့ၢ်ဝဲ စီၤဆၢမူဒီးစီၤလါမူသ့ၣ်တဖၣ်န့ၣ်လီၤ.
တကတီၢ်ဃီ တၢ်လီၢ်တၢ်ကျဲလၢ သုးမီၤစိရိၤကဘီယူၤတ့ၢ်လီၤဝဲမ့ၣ်ပိၢ်သ့ၣ်တဖၣ်အံၤ တမ့ၢ်တၢ်ဒုးကဲထီၣ်အလီၢ်ဘၣ်ဒီး မ့မ့ၢ်တခီမ့ၢ်ဒၣ်တၢ်ပညိၣ်တ့ၢ်လီၤမ့ၣ်ပိၢ်လိၤလိၤဆူ ကမျၢၢ်အိၣ်ဆိးတၢ်လီၢ်အဂ့ၢ် ခ့ၣ်အဲၣ်ယူၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ ခီဖျိပယီၤသုးမီၤစိရိၤအတၢ်ပညိၣ်ခးလီၤတၢ်လိၤလိၤဆူ ကမျၢၢ်အိၣ်ဆိးတၢ်လီၢ်ဒ်အံၤအဃိ လီၢ်ကဝီၤကမျၢၢ်တဖၣ်အိၣ်ဒီး တၢ်သူၣ်ပျံၤသးဖုးတၢ်ဘၣ်ယိၣ်ဘၣ်ဘှီန့ၣ်လီၤ.
လၢန့ၣ်အမဲၥ်ညါ ဖဲအပူၤကွံၥ်လါယူၤလံ(၆)အနံၤန့ၣ် မူကီၢ်ဆၣ်အပူၤ ခီဖျိလၢ ပယီၤသုးမီၤစိရိၤဟီၣ်လၥ်မ့ၣ်ပိၣ်အဃိ လီၢ်ကဝီၤကမျၢၢ်သးစၢ်(၂)ဂၤဘၣ်သံဝဲဒၣ်ကဲထီၣ်သးအိၣ်န့ၣ်လီၤ.ပယီၤသုးမီၤစိရိၤတၢ်ဒိးမ့ၣ်ပိၢ်ဒ်အံၤအဖီခိၣ်ကဲထီၣ်ဝဲတၢ်ကီတၢ်ခဲ,တၢ်ဘၣ်ယိၣ်ဘၣ်ဘှီလၢ ကမျၢၢ်သ့ၣ်တဖၣ်ကလဲၤက့ၤဖံးမၤအဂီၢ်ဒီး တၢ်ဘံၣ်တၢ်ဘၢစ့ၢ်ကီးတအိၣ်လၢကမျၢၢ်အဂီၢ်ဘၣ်အဂ့ၢ် န့ၣ်သ့ၣ်ညါဘၣ်န့ၣ်လီၤ
ဒ်န့ၣ်အသိး ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢ မူကီၢ်ဆၣ်,လၢၢ်ဒိၣ်ကီၢ်ဆၣ် ဒီး ဆီထံးကီၢ်ဆၣ်ဟီၣ်ကဝီၤအပူၤ တနံၣ်အံၤ (၂၀၂၆)လါယနူၤအါရံၤတုၤလါယူၤလၢ(၆)လါအတီၢ်ပူၤ ခီဖျိသုးမီၤစိရိၤအကျိဖးဒိၣ်,ကဘီယူၤဒီးဒြိအဃိ ကမျၢၢ်သံဝဲ(၇၃)ဂၤ ဒီး ကၠိ, တၢ်ဆါဟံၣ်,တၢ်ဘူၣ်တၢ်ဘါဃုၥ်ဒီးဟံၣ်တၢ်သူၣ်ထီၣ်ဟးဂီၤဝဲ(၂၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤ အသိး န့ၣ်လီၤ.
