လါအီကူး ၆ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤလၢပှၤနီၣ်ဂံၢ်အါကတၢၢ်ဒီး တၢ်ဖီၣ်န့ၢ်ဝဲကသံၣ်မူၤဘှီးတလီၢ်လီၢ်အံၤန့ၣ် ဖဲလါအီကူးထီၣ် ၄ သီအနံၤန့ၣ် တၢ်ဖီၣ်န့ၢ်ကဒီးဝဲ WY ကသံၣ်မူၤဘှီး(၃၀၈)ဖျၢၣ်လၢသးစၢ်ပိၥ်ခွါ တဂၤအအိၣ် အဂ့ၢ်န့ၣ် သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
သးစၢ်ပိၥ်ခွါလၢတၢ်ဖီၣ်န့ၢ်ဝဲဒီးကသံၣ်မူၤဘှီးအဖျၢၣ်(၃၀၀)ဘျဲၣ်တဂၤအံၤ အမံၤမ့ၢ်ဝဲ Ja Mar Din အသးနံၣ်အိၣ်ဝဲ(၃၄)နံၣ် ဒီး အိၣ်ဝဲဒၣ်လၢ(Zone-C C4) ကဝီၤဒ့အပူၤဒီး ကဘၣ်ဖဲမုၢ်နၤခီ ၁၀း၀၀ အဆၢကတီၢ်န့ၣ် ကၠီၣ်တဲၣ်ပှၤဘၣ်မူဘၣ်ဒါဒီး ဒဲကဝီၤဘံၣ်ဘၢ ဒိးန့ၢ်တၢ်ကစီၣ် အဃိဘၣ်တၢ်နုၥ်လီၤဖီၣ်အီၤန့ၣ်လီၤ.
တကီၢ်ခါခဲအံၤဒ်ကၠီၣ်တဲၣ်တၢ်သိၣ်တၢ်သီအိၣ်ဝဲအသိး လၢတၢ်ကဟံထီၣ်ဖီၣ်ထီၣ်ဂ့ၢ်ဝီအဂီၢ် ဖဲမဟါလါအီကူး ၅ သီအနံၤန့ၣ် ကၠီၣ်တဲၣ်ပှၤဘၣ်မူဘၣ်ဒါက့ၤကိးအီၤလံအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
(C4)ကဝီၤဒ့လၢတၢ်ဖီၣ်န့ၢ်ဝဲသးစၢ်ပိၥ်ခွါတဂၤအံၤဒီးကသံၣ်မူၤဘှီးအံၤန့ၣ် တချုးတၢ်ကဲထီၣ်သးအံၤဒံးဘၣ်အပူၤကွံၥ်လါအီကူး ထီၣ် ၂ သီ အနံၤန့ၣ်စ့ၢ်ကီး ကၠီၣ်တဲၣ်ပှၤဘၣ်မူဘၣ်ဒါဖီၣ်ချုးန့ၢ်ဒံးဝဲ ကသံၣ်မူၤဘှီး(၁၄၇)ဖျၢၣ်အံၤလၢသးစၢ်ပိၥ်မုၣ်အနံၣ်(၂၀) တဂၤ အအိၣ်ဒံးန့ၣ်လီၤ.
မဲၢ်လးဘၣ်ကီဘၣ်ခဲဒဲကဝီၤအပူၤ ဒ်ဒဲကဝီၤပှၤဘၣ်မူဘၣ်ဒါစံးဝဲအသိးန့ၣ် စးထီၣ်ဖဲတနံၣ်အံၤ(၂၀၂၆) ဒီးခဲအံၤတဘျီန့ၣ် တၢ်ဖီၣ်န့ၢ်ဝဲကသံၣ်မူၤဘှီးအိၣ်လံဝဲ(၃)ဘျီလံ န့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤ(၉)ဘ့ၣ်အကျါ မဲၢ်လးဒဲကဝီၤအံၤပှၤနီၣ်ဂံၢ်အိၣ်ဝဲအါကတၢၢ်ဒီး တၢ်ဖီၣ်န့ၢ်ဝဲ ပှၤသူကသံၣ်မူၤဘှီး, ပှၤရၤလီၤဆါကသံၣ်မူၤဘှီးဖိအိၣ်ဝဲတလီၢ်လီၢ်ဒီး ဒ်န့ၣ်အသိးပှၤသူကသံၣ်မူၤဘှီး,ပှၤရၤလီၤဆါ ကသံၣ်မူၤ ဘှီးသ့ၣ်တဖၣ်အံၤအါဒၣ်တက့ၢ်မ့ၢ်ဝဲသူၣ်ဘီၣ်သးစၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
