လါစဲးပထ့ဘၢၣ် ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ပလိၥ်ခံကရူၢ်လၢသုးမီၤစိရိၤအပှၤခးလီၤဝဲကျိဖးဒိၣ်တလီၢ်လီၢ်အံၤ ကျိဖးဒိၣ်အဃိ ရီဘၢၣ်ကျီးပူၤပှၤမၤတၢ်ဖိကမျၢၢ်သံကဒီးဝဲ(၁)ဂၤဒီး ဘၣ်ဒိဘၣ်ထံးဝဲနးနးကျံၤကျံၤ(၁)ဂၤအဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ် မူဘၣ်ဒါအအိၣ်န့ၣ်လီၤ.
ဖဲလါစဲးပထ့ဘၢၣ် ၂၂ သီ မုၢ်ထူၣ် ၁၁း၅၀ မံးနံးတုၤဃီၤဝဲဒၣ်လၢ ၁၂း၁၇ မံးနံးတစုန့ၣ် တၢ်ဒုးကဲထီၣ်တအိၣ် ပယီၤသုး(၄၄) သုးတြိၤဝဲၤလီၢ်ခိၣ်သ့ၣ်စုတီၤ ဖီလၥ်ခီၣ်ချ့သုးရ့ၣ် (ခမရ-၂၀၇) ဒီး (၃၁၀)အမျိၥ်သုးရ့ၣ်သ့ၣ်တဖၣ်အံၤ ခးလီၤကဒီးဝဲ(၁၂၀ မမ) ကျိဖးဒိၣ် (၁၂)ဖျၢၣ်ဆူ ပလိၥ်ခံကရူၢ်ပူၤ ကမျၢၢ်အိၣ်ဆိး,တၢ်ဖံးအီၣ်မၤအီၣ်လီၢ်ကျဲပူၤအံၤန့ၣ်လီၤ.
ပယီၤသုးအတၢ်ခးလီၤဝဲကျိဖးဒိၣ်ဘျီဝဲအံၤ လီၤတဲၥ်ပိၢ်ဖးထီၣ်ဝဲလၢပလိၥ်ခံကရူၢ်(ဇီးပြောင်း) ပလိၥ်ခံသဝီ-၄ အဃၢၤ, ကည့ၤအဲၤ (ကညင်အိုင်)သဝီဃၢၤဒီး ဝဲၣ်ဝိၤကစၢၢ်ပျံၤကွီၤ ကမျၢၢ်အတၢ်ဖံးအီၣ်မၤအီၣ်လီၢ်ကျီးပူၤသ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
ခီဖျိလၢကျိဖးဒိၣ်အံၤအဃိ အူသါစိ(၄၅)နံၣ်လၢအမ့ၢ်ဝဲရီဘၢၣ်ကျီးပှၤမၤတၢ်ဖိအံၤကျိဖးဒိၣ်အက့အခီဖျိးဘၣ်ဝဲအခိၣ်သၣ်ဃံ ခိၣ်နူၥ် ဖျိးထီၣ်သံဝဲဖဲတၢ်ကဲထီၣ်သးအလီၢ်န့ၣ်တဘျီဃီဒီး ဒ်န့ၣ်အသိး ဖးဒိၣ်ပျီသဝီဖိ ကယ့ၤကၠံ(၅၂)နံၣ်အံၤစ့ၢ်ကီး ကျိဖးဒိၣ် အက့အခီ ဖျိးဘၣ်ဝဲအခံကိၢ်အဃိ အခံကိၢ်အဖံးအညၣ်ဖျိးထီၣ်ဝဲနးနးကျံၤကျံၤအဂ့ၢ်န့ၣ် သ့ၣ်ညါဘၣ်လၢ တၢ်ဂီၤတၢ်မၤနီၣ်အပူၤ န့ၣ်လီၤ.
ပလိၥ်ခံသဝီလၢပယီၤသုးခးလီၤကျိဖးဒိၣ်ခဲအံၤန့ၣ်တမ့ၢ်အကဲထီၣ်သးတၢ်တဘျီအံၤဘၣ် မ့မ့ၢ်တခီစးထီၣ်ဖဲ(၂၀၂၁)သုးဟံန့ၢ်ဆူၣ် ထံကီၢ်တၢ်စိတၢ်ကမီၤဝံၤလီၢ်ခံန့ၣ် ဟီၣ်ကဝီၤပူၤဖဲန့ၣ် တၢ်ဒုးကဲထီၣ်တအိၣ်ဘၣ်ဘၣ်ဆၣ် ပယီၤသုးကလၢၤလၢအိၣ်ဘူးဖဲန့ၣ် တဖၣ်ခးလီၤဝဲကျိ ဖးဒိၣ်ကဲထီၣ်အိၣ်ဝဲတလီၢ်လီၢ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါအီကူး ၁၉ သီအခါန့ၣ်စ့ၢ်ကီး ပယီၤသုး(၃၁၀)အမျိၥ်သုးကလၢၤတဒူၣ်ဃီဝဲအံၤ ခးလီၤဝဲကျိဖးဒိၣ်ဆူ ပလိၥ်ခံကရူၢ် ပလိၥ်ခံသဝီ-၅ ပူၤအဃိ ဖိသၣ်(၅)နံၣ်တဂၤလၢအဂဲၤလိၥ်ကွဲဖျၢၣ်ထူဖဲဖျၢၣ်ထူပျီပူၤအံၤသံဝဲတဘျီဝဲဖဲတၢ်ကဲသးန့ၣ် ဒီး ဒ်န့ၣ်အသိးဖိသၣ်ဆံးဃုၥ်ဒီးပှၤလၢအလဲၤကွၢ်ဖျၢၣ်ထူတဖၣ်ဘၣ်ဒိဘၣ်ထံးဝဲနးနးကျံၤကျံၤ(၁၁)ဂၤကဲထီၣ်ဒံးဝဲဒၣ်န့ၣ်လီၤ.
သုးမီၤစိရိၤအံၤတပဲၥ်ဖးနီၤဖးလၢၤဝဲအဒုၣ်အဒါဒီးကမျၢၢ်လၢၤဘၣ်မ့မ့ၢ်တခီ ပၥ်ဝဲတၢ်ခးပနီၣ် သူဝဲဒၣ်ကဘီယူၤ,ကျိဖးဒိၣ် ပညိၣ်ခးလီၤဝဲတၢ်ဆူကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျီးပူၤအိၣ်ဝဲတပယူၥ်ဃီအဃိ လီၢ်ကဝီၤကမျၢၢ်သ့ၣ်တဖၣ်တုၤလၢခဲအံၤ ဘၣ်အိၣ်ဘၣ်လဲၤဘၣ်က့ၤ,ဘၣ်ဖံးအီၣ်မၤအီၣ်ဝဲဒၣ်တၢ်လၢတၢ်ပျံၤတၢ်ဖုး,တၢ်ဘၣ်ယိၣ်ဘၣ်ဘှီပူၤအဖၢမုၢ်ဒံးန့ၣ်လီၤ.
