လါအီးကထိဘၢၣ် ၁၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးဒြိ,ကျိဖးဒိၣ်ဒီး Jet fighter /Y-12 ကဘီယူၤလဲၤခးလီၤဝဲတၢ်လၢဒူသဝီ,ကမျၢၢ်ပှၤအိၣ်ကမှံလီၢ် ခံသီတပယူၥ်ဃီအဖီခိၣ် ကမျၢၢ်ဃုၥ်ဒီးဖိသၣ်သံ ကဒီးဝဲ(၈)ဂၤ , ဘၣ်ဒိဘၣ်ထံးဝဲ(၉)ဂၤဒီး ကမျၢၢ်ဟံၣ်ဟးဂီၤတစှၤန့ၢ်(၁၃)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါ အအိၣ်န့ၣ် လီၤ.
တၢ်ကဲထီၣ်သးန့ၣ်ဖဲလါအီးကထိဘၢၣ် ၁၂ သီ မုၢ်ထူၣ် ၁၁း၅၀ မံးအဆၢကတီၢ် တၢ်ဒုးကဲထီၣ်တအိၣ် ပယီၤသုး(၄၄)ခီၣ်ချ့ အသုးဝဲၤလီၢ်ခိၣ်သ့ၣ်အံၤ ပျၢ်ထီၣ်ဝဲဒြိတဘ့ၣ်လဲၤတ့ၢ်လီၤဝဲမ့ၣ်ပိၢ်လၢတကွံပူၤ(ငှက်ပျောတော)ကရူၢ် စံကိ(ဇီးကုန်း)သဝီပူၤဒီး ဖဲန့ၣ် ဟံၣ်ဟးဂီၤဝဲ တဖျၢၣ်န့ၣ်လီၤ.
တနံၤဃီတၢ်ကဲထီၣ်သးဖဲန့ၣ်ဝံၤ မုၢ်ဃ့ၢ်လီၤ ၂း၅၀ အဆၢကတီၢ် ပယီၤသုးတဒူၣ်ဃီဝဲအံၤပျၢ်ထီၣ်ကဒီးဒြိ(၂)ဘ့ၣ် လဲၤတ့ၢ်လီၤ ကဒီးဝဲလၢ တကွံပူၤသဝီပူၤအဃိ ကမျၢၢ်အူမ့စီၣ်(၄၃)နံၣ်,အမါဒီၤစၤဒၤ(၄၃)နံၣ်ဒီးအပုၢ်ခွါ မီၤစွဲစ့ၤဖၠိ(၂၁)နံၣ် သၢဂၤအံၤ သံဝဲ ဖဲတၢ်ကဲထီၣ်သးအလီၢ်န့ၣ်တဘျီဃီန့ၣ်လီၤ.
လၢန့ၣ်အမဲၥ်ညါ ပယီၤသုးအတၢ်လဲၤတ့ၢ်လီၤဘျီဝဲအံၤ အူခၠ့ၣ်သဲအီၤ(၄၃)နံၣ်အံၤအခီၣ်ဘၣ်ဒိဝဲနးနးအဖီခိၣ်ဘၣ်ဒီၣ်တဲၥ်ကွံၥ်ဝဲ အခီၣ်တကပၤဒီး ကျး(၁)ဖျၢၣ်,သိလ့ၣ်(၁)ခိၣ်ဘၣ်ဒိဘၣ်ထံးဟးဂူၥ်ဟးဂီၤဝဲ အဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တကွံပူၤကရူၢ် တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်မဟါလါအီးကထိဘၢၣ် ၁၃ သီ ဂီၤခီ ၅း၀၂ တုၤဃီၤဝဲလၢ ၅း၅၇ မံးနံး အဆၢကတီၢ်န့ၣ် သုးမီၤစိရိၤအ(Jet fighter)ကဘီယူၤခံဘ့ၣ် တ့ၢ်လီၤဝဲပီၣ်(၃၀၀)မ့ၣ်ပိၢ်(၄)ဖျၢၣ်ဒီး(Y-12)ကဘီယူၤတဘ့ၣ် ခးလီၤဝဲစ့ၢ်ကီးဝဲ(၁၂၀ မမ)အချံ(၂၉)ဖျၢၣ်ဆူလၢဆီသုးခံ(ကျောက်ဖျာ)ကရူၢ် ဆီသုးခံသဝီအခိၣ်အဃၢၤအံၤန့ၣ်လီၤ.
တကးဒံးဘၣ်တကတီၢ်ဃီဖဲန့ၣ်(၃၁၀)အမျိၥ်သုးရ့ၣ်ဒီး ခီၣ်ချ့သုးရ့ၣ်(ခမရ-၂၀၇)အံၤ ခးလီၤဝဲ(၁၂၂ မမ)ကျိဖးဒိၣ် ,ပျၢ်ထီၣ်ဝဲ ဒြိ(၅)ဘ့ၣ် လဲၤတ့ၢ်လီၤဝဲမ့ၣ်ပိၢ်အံၤလၢဆီသုးခံသဝီဃၢၤအံၤအဃိ ကမျၢၢ်ပှၤလီၢ်အိၣ်ကမှံဒဲအူအီၣ် ဟးဂီၤဘၣ်ဒိဘၣ်ထံးဝဲ(၃)ဖျၢၣ် ဒီး ဒ်န့ၣ်အသိး မၤကဒီးဖဲဟါခီ ၄း၁၀ မံးနံးအဆၢကတီၢ်န့ၣ် (၄၄) သုးတြိၤဝဲၤလီၢ်ခိၣ်သ့ၣ်အံၤ ခးလီၤကဒီးဝဲ(၁၂၀ မမ)ကျိဖးဒိၣ် (၄)ဖျၢၣ် အံၤလၢ တကွံပူၤကရူၢ် စံကိ(ဇီးကုန်း)သဝီအခိၣ်အဃၢၤ ဒံးန့ၣ်လီၤ.
တကွံပူၤကရူၢ်ဒီးဆီသုးခံကရူၢ်အံၤ စးထီၣ်ဖဲလါစဲးပထ့ဘၢၣ် ၂၀ သီလီၢ်ခံန့ၣ် ပယီၤသုးသူဝဲကျိဖးဒိၣ်,ဒြိ,ကဘီယူၤ လဲၤခး လီၤဝဲ တၢ်လၢဒူသဝီကမျၢၢ်အိၣ်ဆိးလီၢ်ကျဲ,တၢ်ဖံးအီၣ်မၤအီၣ်လီၢ်အိၣ်ဝဲကိးမုၢ်နံၤဒဲးဃၣ်ဃၣ်တုၤလၢခဲအံၤဒီး ဒ်န့ၣ်အသိးခီဖျိ လၢတၢ်ဟူးတၢ်ဂဲၤသ့ၣ်တဖၣ်အံၤအဃိကမျၢၢ်သံဘၣ်ဒိဘၣ်ထံးကဲထီၣ်အမဲၥ်ညါ ကမျၢၢ်ဘၣ်သုးလီၢ်သုးကျဲ ဃ့ၢ်ထီၣ်ဝဲအါအါဂီၢ်ဂီၢ် စ့ၢ်ကီးန့ၣ်လီၤ.
လါအီးကထိဘၢၣ် ၁၂ သီ တကွံပူၤကမျၢၢ်သံ(၃)ဂၤကဲထီၣ်သးဖဲန့ၣ်ဝံၤ ဖဲမဟါလါအီးကထိဘၢၣ် ၁၃ သီ ဟါခီ ၇း၀၀ အဆၢ ကတီၢ်န့ၣ် တၢ်ဒုးကဲထီၣ်တအိၣ် သုးမီၤစိရိၤကဘီယူၤလဲၤတ့ၢ်လီၤကဒီးဝဲ ပီၣ်(၅၀၀)မ့ၣ်ပိၢ်လၢအံလူၢ်ကရူၢ် အံလူၢ်သဝီပူၤအဃိ လီၢ်ကဝီၤကဝီၤကမျၢၢ်ပိၥ်ခွါ(၂)ဂၤ,ပိၥ်မုၣ်(၂)ဂၤဒီးဖိသၣ်(၁၃)နံၣ်တဂၤ ပၥ်ဖှိၣ်ခဲလၢၥ်(၅)ဂၤသံဝဲဒၣ်ဖဲတၢ်ကဲထီသးအလီၢ်န့ၣ်ဒီး တကးဒံးဘၣ်ဘၣ်ဒိဘၣ်ထံးစ့ၢ်ကီးဝဲ(၈)ဂၤအဂ့ၢ်န့ၣ် သဝီပှၤဘၣ်မူဘၣ်ဒါ စံးဝဲန့ၣ်လီၤ.
ဒီးကမျၢၢ်လၢအဘၣ်ဒိဘၣ်ထံး(၈)အံၤစ့ၢ်ကီးတၢ်ဘၣ်ယိၣ်အိၣ်အကျါမ့မ့ၢ်ဖိသၣ်(၁၃)နံၣ်ပိၥ်ခွါဖိတဂၤအံၤ ခီဖျိအခီၣ်ဘၣ်ဒိဘၣ်ထံးနး အဃိ ဘၣ်တၢ်ဒီၣ်တူၥ်ကွံၥ်အခီၣ်တကပၤအသိး ကဘီယူၤအတၢ်ဟဲခးလီၤတၢ်ဘျီဝဲအံၤ ဟံၣ်သ့ၣ်ပၣ်,ဟံၣ်တၢးလီၤပှီၢ်ဟးဂီၤဂူၥ် ဟးဂီၤဝဲအဖျၢၣ်(၁၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးကဘီယူၤဟဲခးလီၤတၢ်လၢအံလူၢ်သဝီပူၤဘျီဝဲအံၤန့ၣ် သဝီပှၤဘၣ်မူဘၣ်ဒါတဂၤစံးဝဲလၢ“အခးလီၤဝဲလၢအံလူၢ်သဝီပူၤလီၤ. ပှၤသံန့ၣ်(၅)ဂၤ,ဘၣ်ဒိန့ၣ်(၈)ဂၤ.အခးလီၤဝဲလၢသဝီပူၤလိၤလိၤဘျီသံဝဲန့ၣ်.အသံအကျါန့ၣ်ပၣ်ဃုၥ်ဖိသၣ်(၁၃)နံၣ်တဂၤ, လၢအဂၤ (၄)ဂၤန့ၣ်အနီၢ်ဒိၣ်လီၤ.အဘၣ်ဒိတဖၣ်အကျါန့ၣ်မ့မ့ၢ်ပှၤဖိသၣ်တဂၤန့ၣ်တၢ်ဖၠးတဲၥ်အခီၣ်လံ.တၢ်ဒုးကဲထီၣ်တအိၣ်နီမံၤဘၣ် ဟဲခးလီၤတၢ်ဒ်အံၤတယးမးတဘၣ်ဘၣ်.ပှၤဟံၣ်န့ၣ်ဟးဂီၤ(၁၂)ဖျၢၣ်ညါ.အခးလီၤတၢ်န့ၣ်ဘၣ်တရဲၤဝဲတစှၤဘၣ်.ဖဲမုကၢးခးလီၤကဒီး ဝဲခံဖျၢၣ်လံ.တၢ်မၢၤတဘၣ်လၢသဝီပူၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
တကီၢ်ခါခဲအံၤခီဖျိလၢသုးမီၤစိရိၤကဘီယူၤအတၢ်လဲၤခးလီၤတၢ် တၢ်သံတၢ်ဘၣ်ဒိဘၣ်ထံးကဲထီၣ်အါအါဂီၢ်ဂီၢ်ဒ်အံၤအဖီခိၣ် အံလူၢ်သဝီဖိကမျၢၢ်သ့ၣ်တဖၣ်ဃ့ၢ်ထီၣ်ဝဲဒၣ်ခဲလၢၥ်ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကဒိၣ်စိက့ၤဟီၣ်ကဝီၤအံၤအဂီၢ် သုးကျိၤအတၢ်ဟဲထီၣ်ဟူးဂဲၤမ့တအိၣ်ဘၣ်ဘၣ်ဆၣ် ဒူသဝီတၢ်လီၢ်လၢသုးမီၤစိရိၤကဘီယူၤ လဲၤခးလီၤတၢ်,ခးလီၤကျိဖးဒိၣ်ဒီးတ့ၢ်လီၤဒြိသ့ၣ်တဖၣ် အံၤန့ၣ် တၢ်ဒုးကဲထီၣ်တအိၣ်, မ့ၢ်တၢ်တၢ်ခးပနီၣ်ဝဲ ကမျၢၢ်ထံဖိကီၢ်ဖိ လိၤလိၤအဃိ သဝီသ့ၣ်တဖၣ်အံၤကမျၢၢ်ဃုၥ်ဒီး ဒူသဝီလၢအိၣ်ဘူးဖဲန့ၣ်တဖၣ်ပျံၤတၢ်အိၣ်ဒီးတၢ်ဘၣ်ယိၣ် ဃ့ၢ်ထီၣ်ဝဲအါအါမး အဂ့ၢ်န့ၣ် ဒူသဝီပှၤဘၣ်မူဘၣ်ဒါစံးဝဲဒၣ်န့ၣ်လီၤ.
