ခီဖျိတၢ်မၤဟးဂီၤလၢၢ်ဒိၣ်၀့ၢ်ဒီးနၣ်သၤကွ့၀့ၢ်ဘၢၣ်စၢၤတိၤအဃိတၢ်စူၤခါအတီၢ်ပူၤကမျၢၢ်ဟးထီၣ်က့ၤလီၤကီခဲထီၣ်၀ဲ

လါယူၤ ၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်အပူၤ တၢ်မၤဟးဂီၤလၢၢ်ဒိၣ်၀့ၢ်ဒီး နၣ်သၤကွံ၀့ၢ်ဘၢၣ်စၢၤ တိၤသ့ၣ်တဖၣ်၀ံၤလီၢ်ခံန့ၣ် တၢ်စူၤခါအတီၢ်ပူၤ လီၢ်က၀ီၤကမျၢၢ်ဟးထီၣ်က့ၤလီၤကီခဲထီၣ်၀ဲ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

လၢၢ်ဒိၣ်၀့ၢ်–နၣ်သၤကွ့ႇ တီအူ–ဖၣ်အၣ် တိၤသ့ၣ်တဖၣ်အံၤဃုာ်ဒီးတိၤလၢအလဲၤဆူ၀့ၢ်လၢအဂၤသ့ၣ်တဖၣ်စ့ၢ်ကီး တၢ်မၤဟးဂီၤ၀ဲခဲလၢာ်အသိး ခီဖျိတၢ်ဒုးကဲထီၣ်ကိးမုၢ်နံၤဒဲးအဃိ တၢ်စူၤခါအတီၢ်ပူၤအံၤ လီၢ်က၀ီၤကမျၢၢ်ဟးထီၣ်က့ၤလီၤ ကီခဲထီၣ်၀ဲအသိး တၢ်ကီတၢ်ခဲအိၣ်ထီၣ်လၢကဒိးန့ၢ်ဘၣ်တၢ်အီၣ်တၢ်အီစ့ၢ်ကီး အဂ့ၢ်န့ၣ် လၢၢ်ဒိၣ်ကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ

အ၀ဲစံး၀ဲလၢ“နကဟးထီၣ်လၢသိလ့ၣ်န့ၣ်တညီလၢၤဘၣ်တိၤန့ၣ်ဟးဂီၤလၢၤလံမီၤႉနဟးထီၣ်ဟးလီၤတသ့လ့ၤတက့ၤလၢၤဘၣ်ႉနကလဲၤၦ့ၤအီၣ်ၦ့ၤအီလၢတၢ်လီၢ်အဂၤႇနကကူၣ်လဲၤမၤတၢ်လၢတၢ်လီၢ်အဂၤန့ၣ်တညီလၢၤဘၣ်မီၤႉမ့မ့ၢ်တၢ်ဒုးတၢ်ယၤန့ၣ်အိၣ်ကိးမုၢ်နံၤဒဲးလီၤႉခဲအံၤနးတခါလၢတၢ်စူၤခါမ့ဟဲထီၣ်လၢၦၤဆူးၦၤဆါအဂီၢ်ဒုနကလဲၤလၢတီအူလၢ၀့ၢ်တကူၣ်န့ၣ်တညီလၢၤဘၣ်ႉတၢ်ကီတၢ်ခဲကအိၣ်ထီၣ်လၢၦၤဆူးၦၤဆါအဂီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်သိးပယီၤသုးကျိၤဟုတဟဲနုာ်လီၤမၤဒုးယၤတၢ်ဟူးတၢ်ဂဲၤလၢဟီၣ်က၀ီၤပူၤတဂ့ၤအဂီၢ်န့ၣ်လီၢ်က၀ီၤဖီၣ်စုက၀ဲၤကရူၢ်မၤဟးဂီၤကွံာ်၀ဲတိၤသ့ၣ်တဖၣ်အံၤဒီးခီဖျိတိၤဟးဂီၤဒီးတၢ်ဒုးကဲထီၣ်ကိးမုၢ်နံၤဒဲးအဃိလၢဟီၣ်က၀ီၤပူၤတၢ်ဖိတၢ်လံၤတၢ်အီၣ်တၢ်အီအၦ့ၤထီၣ်၀ဲကွ့ၢ်ကွ့ၢ်အဂ့ၢ်န့ၣ် လၢၢ်ဒိၣ်၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ

လၢၢ်ဒိၣ်၀့ၢ်ပူၤကမျၢၢ်လၢအဂၤတဂၤစ့ၢ်ကီးစံး၀ဲလၢ“ပဟးထီၣ်က့ၤလီၤတညီလၢၤဘၣ်အဃိတၢ်လုၢ်တၢ်ၦ့ၤဒုခဲအံၤအထီၣ်သၢဆးလွံၢ်ဆးညါႉခဲအံၤၦၤလဲၤဒီးဆဲးကဲးသ့ဒံးႉတနီၤန့ၣ်အ၀ဲသ့ၣ်လဲၤၦ့ၤတၢ်ဒီးဆဲးကဲးလဲၤ၀ဲလၢတၢ်ပျံၤတၢ်ဖုးအပူၤန့ၣ်ႉမ့၀ံၤဟဲက့ၤဆါဒိၣ်ထီၣ်တၢ်ၦ့ၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်န့ၣ်အသိးလၢလၢၢ်ဒိၣ်ကီၢ်ဆၣ်အပူၤခီဖျိတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဃိ လီၢ်က၀ီၤကမျၢၢ်ၦၤဃ့ၢ်မှံဟးဖျိး အနီၣ်ဂံၢ်ကအိၣ်လၢအကထိညါလံဒီးတၢ်စူၤခါအတီၢ်ပူၤအံၤစ့ၢ်ကီးတၢ်ကီတၢ်ခဲအိၣ်ထီၣ်လၢတၢ်အိၣ်တၢ်ဆိးလီၢ်ကျဲဒီးတၢ်အီၣ်တၢ်အီတကပၤအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ် အအိၣ်န့ၣ်လီၤႉ