လါမ့ၤ ၃၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤ ဖဲလါမ့ၤ ၂၈ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၃)ဂၤအကျါ ပၣ်ဃုာ်၀ဲဖိသၣ်(၁)ဂၤဒီးဟံၣ်ဟးဂီၤ၀ဲ(၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲဖဲလါမ့ၤ ၃၀ သီအခါ န့ၣ်လီၤႉ
ကြုၢ်တု၀့ၢ်ပယီၤသုးခီၣ်ချ့သုးရ့ၣ်(ခမရ–၅၄၆)ခးလီၤ(၁၂၀ မမ)ႇ(၁၅၀ မမ)ကျိဖးဒိၣ်ဆူ ကြုၢ်တု၀့ၢ်ကပၤအဃိ ကျိဖးဒိၣ်လီၤတဲာ်ပိၢ်ဖးထီၣ်လၢကီၣ်ကၤသ၀ီပူၤခံဖျၢၣ် ဖဲန့ၣ်ကီၣ်ကၤသ၀ီဖိဘၣ်ဒိ(၃)ဂၤဒီးဟံၣ်ဟးဂီၤ၀ဲ ၆ ဖျၢၣ် အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ထုးထီၣ်ပာ်ဖျါအပူၤပာ်ဖျါ၀ဲန့ၣ်လီၤႉ
ၦၤလၢအဘၣ်ဒိဘၣ်ထံးသ့ၣ်တဖၣ်န့ၢ်မ့ၢ်၀ဲကီၣ်ကၤသ၀ီဖိစီၤထ့ၤလ့အီၤ(၁၅)နံၣ်ႇနီၢ်အ့မၤထဲၣ်(၂၁)နံၣ်ဒီး ဒီၤသ့စွ့ၤ(၅၇)နံၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါခီဖျိကျိဖးဒိၣ်အံၤအဃိမ့ၣ်အူအီၣ်ကွံာ်၀ဲကီၣ်ကၤသ၀ီဖိစီၤထ့ၤလ့အီၤအဟံၣ်ပူၤတၢ်ဖိတၢ်လံၤတဖၣ်ဒီး မီၤဖိတံအဟံၣ်စ့ၢ်ကီးအခိၣ်ဒုးဟးဂီၤ၀ဲဒၣ်န့ၣ်လီၤႉလၢန့ၣ်အမဲာ်ညါစီၤအ့မိ၀့ႇအူကၠီၤသါႇအူတလူၣ်ကူၤအဟံၣ်ဒီးအူဖါကူအဟံၣ်သ့ၣ်တဖၣ်ဟးဂီၤ၀ဲစ့ၢ်ကီးအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါမ့ၤ ၂၅ သီအခါစ့ၢ်ကီး ကြုၢ်တုပယီၤသုးဒုးယၤပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ–၁၃) ဒုးယၤခိၣ်–၂ သီၤစ့ၤနဲၤအၦၤ ခးလီၤကျိဖးဒိၣ်လၢသ၀ီပူၤအဃိ ကြုၢ်တု၀့ၢ်ပူၤ ၦၤဖိသၣ်သံ၀ဲ(၁)ဂၤဒီး ဘၣ်ဒိဘၣ်ထံးတဂၤဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ဖဲတလါအံၤလါမ့ၤအတီၢ်ပူၤခီဖျိပယီၤသုးမၤကမၣ်ၦၤဂ့ၢ်၀ီခွဲးယာ်ဒီးခးလီၤကျိဖးဒိၣ်အဃိ ကြုၢ်တုကီၢ်ဆၣ် ကီၣ်ကၤသ၀ီပူၤ ကမျၢၢ်ဘၣ်ဒိ၀ဲ(၆)ဂၤဒီး ကမျၢၢ်အဟံၣ်အဃီဟးဂီၤကအိၣ်လၢအဖျၢၣ်(၁၀)ဃၣ်ဃၣ်ညါအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ် လီၤႉ
