လါမ့ၤ ၂၇သီ ၂၀၂၄နံၣ် ခ့ၣ်အဲၣ်စံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢႇ((Suan Pueng))ကီၢ်ရ့ၣ်(Ratchaburi)ကီၢ်ဆၣ်(ThamHin)ကညီဘၣ်ကီဘၣ်ခဲဒဲက၀ီၤအပူၤႇၦၤလီၢ်အိၣ်ကဒုဖိလၢက့ၤဆူဟံၣ်တဘူၣ်ဒံးဘၣ်တဖၣ်ႇကၠီၣ်တဲၣ်ခိၣ်နၢ်ၦၤဘၣ်မူဘၣ်ဒါကဟုကယာ်ပာ်အ၀ဲသ့ၣ်တစိၢ်တလီၢ်လၢဒဲက၀ီၤကပၤတၢ်လီၢ်တတီၤအဂ့ၢ်ႇဒဲက၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
သုးဟံန့ၢ်တၢ်စိကမီၤ၀ံၤအလီၢ်ခံဟီၣ်က၀ီၤအပူၤဒုးယၤတၢ်သဘံၣ်သဘူၣ်အဃိကညီကီၢ်စဲၣ်သုးက့(၄)လီၢ်အိၣ်ကဒုဖိလၢအလဲၤနုာ်လီၤအိၣ်ဆိး၀ဲလၢ(Tham Hin)ဒဲက၀ီၤပူၤသ့ၣ်တဖၣ်အံၤႇအပူၤကွံာ်လါမ့ၤ(၁၀)သီအနံၤအပူၤႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ရဲၣ်ကျဲၤ၀ဲလၢကက့ၤဆှၢ(က့ၤပာ်)က့ၤ၀ဲအ၀ဲသ့ၣ်တဖၣ်ဆူကညီကီၢ်စဲၣ်တကပၤအိၣ်၀ဲဘၣ်ဆၣ်ခီဖျိကက့ၤအိၣ်ဆိး၀ဲလၢကညီကီၢ်စဲၣ်တကပၤစ့ၢ်ကီးတၢ်ကီတၢ်ခဲအိၣ်၀ဲအဃိတၢ်ပာ်အိၣ်က့ၤအ၀ဲသ့ၣ်တဖၣ်ဖဲဒဲက၀ီၤကပၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
လီၢ်အိၣ်ကဒုဖိတဖၣ်အံၤႇခီဖျိကၠီၣ်တဲၣ်တဟ့ၣ်တၢ်ပျဲလၢကအိၣ်ဆိး၀ဲတပူၤဃီဒီးၦၤဒဲက၀ီၤဖိဘၣ်အဃိအပူၤကွံာ်တၢ်ရဲၣ်ကျဲၤန့ၣ်အ၀ဲသ့ၣ်တဖၣ်လၢကက့ၤအိၣ်ဆိးလၢကညီကီၢ်စဲၣ်ဘီယၢ်ခၣ်တၢ်လီၢ်အိၣ်၀ဲဘၣ်ဆၣ်ႇအ၀ဲသ့ၣ်တဖၣ်ကအိၣ်ဆိးဖံးမၤအီၣ်အီ၀ဲအဂီၢ်တၢ်ကီတၢ်ခဲအိၣ်ဒီးတၢ်ဘံၣ်တၢ်ဘၢလၢအ၀ဲသ့ၣ်တဖၣ်အဂီၢ်တအိၣ်၀ဲဘၣ်အဃိႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ကဟုကယာ်ဒုးအိၣ်က့ၤအ၀ဲသ့ၣ်ဖဲတၢ်လီၢ်လၢအဘူးဒီးဒဲက၀ီၤအဂ့ၢ်(KRC)နဲၣ်ရွဲၣ်သရၣ်စီၤပွဲၤစ့စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ဘၣ်ဃးတၢ်ကဆှၢက့ၤ၀ဲၦၤလၢအဟဲအိၣ်ကဒုသးအသီလၢဒဲက၀ီၤပူၤသ့ၣ်တဖၣ်ခီန့ၣ်ႇကၠီၣ်တဲၣ်ပဒိၣ်ပၦၢ်စံး၀ဲလၢၦၤသ့ၣ်တဖၣ်အံၤန့ၣ်အိၣ်ဆိး၀ဲလၢဒဲက၀ီၤအပူၤတပူၤဃီဒီးၦၤဒဲက၀ီၤဖိတဖၣ်န့ၣ်တသ့ဘၣ်ႇကဘၣ်အိၣ်လၢတၢ်ချၢလီၤအဃိန့ၣ်ႇအပူၤကွံာ်ပလဲၤကွၢ်န့ၣ်အ၀ဲသ့ၣ်တဖၣ်တၢ်လီၢ်တၢ်ကျဲလၢကအိၣ်ဆိး၀ဲလၢကညီကီၢ်စဲၣ်ဘီယၢ်ခၣ်တကပၤႇဒီးပကွၢ်၀ဲဟီၣ်က၀ီၤတၢ်အိၣ်သးဖဲန့ၣ်န့ၣ်ႇပထံၣ်လၢတၢ်ဘံၣ်တၢ်ဘၢတၢ်အိၣ်ဆိးဖံးအီၣ်မၤအီၣ်အဂီၢ်တၢ်ကီတၢ်ခဲအိၣ်စ့ၢ်ကီးလီၤအဃိပဟဲက့ၤပပာ်ဖျါထီၣ်ကတၢ်ဂ့ၢ်ဆူကီၠၣ်တဲၣ်ခိၣ်နၢ်သ့ၣ်တဖၣ်အအိၣ်ႇတဘျီကၠီၣ်တဲၣ်ပဒိၣ်လၢတၢ်ဖီခိၣ်တၢ်ဖီလာ်တဖၣ်ကတိၤသကိး၀ဲတၢ်၀ံၤဃုန့ၢ်၀ဲတၢ်လီၢ်လၢအ၀ဲသ့ၣ်တဖၣ်ကအိၣ်အဂီၢ်ခံတီၤလီၤႇအဆိကတၢၢ်တတီၤန့ၣ်စီၤစုၤ၀ဲဒီးဒဲက၀ီၤတစဲးအဃိန့ၣ်ကွၢ်က့ၤ၀ဲတၢ်လီၢ်လၢအဘူးဒီးဒဲက၀ီၤတတီၤဒီးကဟုကယာ်ဒုးအိၣ်က့ၤအ၀ဲသ့ၣ်တဖၣ်န့ၣ်လီၤႉ”အဂ့ၢ်စံး၀ဲန့ၣ်လီၤႉ
လၢန့ၣ်အမဲာ်ညါႇၦၤလီၢ်အိၣ်ကဒုတဖၣ်ကအိၣ်ဆိး၀ဲတစိၢ်တလီၢ်အဂီၢ်ႇတနွံအံၤလါမ့ၤအကတၢၢ်တနွံအပူၤႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ရဲၣ်ကျဲၤ၀ဲလၢကတ့ထီၣ်ဘှီထီၣ်အတၢ်အိၣ်တၢ်ဆိးလီၢ်ကျဲဟံၣ်အဖျၢၣ်(၇၀)တုၤအ၀ံၤအိၣ်၀ဲအဂ့ၢ်အ၀ဲစံးအါထီၣ်၀ဲန့ၣ်လီၤႉ
တကးဒံးဘၣ်ႇလၢတၢ်သူၣ်ထီၣ်ဘှီထီၣ်တၢ်အိၣ်တၢ်ဆိးလီၢ်ကျဲတၢ်လၢာ်ဘူၣ်လၢာ်စ့ၤဒီးတၢ်ဟ့ၣ်နီၤလီၤတၢ်အီၣ်မိၢ်ၦၢ်အဂီၢ်(TBC)ဆီၣ်ထွဲမၤစၢၤ၀ဲကၠီၣ်တဲၣ်ၦၤဘၣ်မူဘၣ်ဒါတဖၣ်စ့ၢ်ကီးမၤစၢၤ၀ဲအ၀ဲသ့ၣ်တဖၣ်လၢၦၤဂ့ၢ်၀ီတကပၤစ့ၢ်ကီးအဂ့ၢ်
သရၣ်စီၤပွဲၤစ့စံးစ့ၢ်ကီး၀ဲဒၣ်န့ၣ်လီၤႉ
ဒီးၦၤၦၤလီၢ်အိၣ်ကဒုဖိတဖၣ်အံၤႇဖဲတနံၣ်အံၤ(၂၀၂၄)နံၣ်အပူၤလဲၤဃ့ၢ်နုာ်အိၣ်ကဒု၀ဲအသးလၢဒဲက၀ီၤဖိအကျါဒီးအပူၤကွံာ်လါမ့ၤအတီၢ်ပူၤအနီၢ်ဂံၢ်နီၢ်ဒွးအိၣ်၀ဲ(၆၁၀)ဂၤဘၣ်ဆၣ်ႇခီဖျိတနီၤဟးထီၣ်ကွံာ်၀ဲလၢဒဲက၀ီၤအချၢဒီးလဲၤကွံာ်၀ဲဆူတၢ်လီၢ်အဂၤအဃိႇတကီၢ်ခါခဲအံၤအနီၣ်ဂံၢ်နီၣ်ဒွးအိၣ်တ့ၢ်က့ၤ၀ဲ(၄၂၀)ဃၣ်ဃၣ်အဂ့ၢ်ႇဒဲက၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တကတီၢ်ဃီႇၦၤလီၢ်အိၣ်ကဒုဖိလၢအဟဲနုာ်အိၣ်ကဒုအသးဖဲ(Tham Hin)ဒဲက၀ီၤအပူၤတဖၣ်အံၤႇဒိးန့ၢ်ဘၣ်၀ဲတၢ်ကဟုကယာ်တၢ်အိၣ်တၢ်ဆိးလီၢ်ကျဲတစိၢ်တလီၢ်လံဘၣ်ဆၣ်ခီဖျိဒဲက၀ီၤအပူၤတၢ်တတူၢ်လိာ်၀ဲၦၤဘၣ်ကီဘၣ်ခဲအသီတၢ်သိၣ်တၢ်သီတၢ်ဘျၢအိၣ်၀ဲအဃိဘၣ်ယိာ်စ့ၢ်ကီး၀ဲတၢ်လၢဒဲက၀ီၤအဂၤတဖၣ်အပူၤၦၤလီၢ်အိၣ်ကဒုဖိတဖၣ်အဂီၢ််အဂ့ၢ်ဒဲက၀ီၤၦၤဘၣ်မူဘၣ်ဒါတဖၣ်စ့ၢ်စ့ၢ်ကီး၀ဲန့ၣ်လီၤႉ
ဒ်န့ၣ်အသိးႇလီၢ်အိၣ်ကမှံဖိလၢအဟဲအိၣ်ဆိးဖဲ(Tham Hin)ဒဲက၀ီၤသ့ၣ်တဖၣ်အံၤႇၦၤဘၣ်မူဘၣ်ဒါတဖၣ်အဲၣ်ဒိး၀ဲလၢကဒိးန့ၢ်ဘၣ်တၢ်ခွဲးတၢ်ယာ်တၢ်ဆီၣ်ထွဲမၤစၢၤဒ်သိးၦၤဒဲက၀ီၤဖိလၢအိၣ်ဆိးတ့ၢ်လၢနံၣ်လၢအယံာ်သ့ၣ်တဖၣ်လီၤအဂ့ၢ်သရၣ်စီၤပွဲၤစ့စံးစ့ၢ်ကီး၀ဲန့ၣ်လီၤႉ
