လါယူၤလံ ၂၂သီ, ၂၀၂၅နံၣ်, ခ့ၣ်အဲးစံၣ်.
ဖဲအပူၤကွံၥ်လါယူၤလံ ၂သီအနံၤန့ၣ် သုးခိၣ်အဲၣ်ခွံ(ကိး)ကီၤလၤဖိ တီခိၣ်ရိၣ်မဲ KTLAကီၢ်သူလ့ၤသုးမုၢ်ဒိၣ် ဆၣ်ကဆီသုးတြိၤ ထုးထီဝဲဒၣ်လံၥ်တၢ်ဒုးသ့ၣ်ညါတဘ့ၣ်လၢ တၢ်မ့ၢ်လ့ၢ်လိၤဖဲ စးထီၣ်လၢ (လအီၣ်)တုၤဆူဝ့ၢ်တၢ်အဲၣ်န့ၣ်တၢ်ကဘၣ်ဒုးသ့ၣ်ညါအဝဲသ့ၣ်ဒီးတၢ်မ့ၢ်တဒုးသ့ၣ်ညါအဝဲသ့ၣ်ဘၣ်န့ၣ် KTLA တဟံးန့ၢ်ဘူဒါလ့ၤတက့ၤ ဘၣ်အဂ့ၢ် ထုးထီၣ်ဝဲဒၣ်လံၥ်ဒုးသ့ၣ်ညါဝံၤအလီၢ်ခံ ဖဲလါယူၤလံ(၂၀)သီအနံၤ,ဂီၤခီ(၁၁)နၣ်ရံၣ်အဆၢကတီၢ်န့ၣ် စးထီၣ်ခးဝဲ KNLAကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဖဲဝ့ၢ်တၢ်အဲၣ်ဒီးထံခံကျဲအဂ့ၢ် သ့ၣ်ညါဘၣ်လၢ သုးက့(၄)အပှၤဘၣ်မူဘၣ်ဒါအအိၣ်န့ၣ်လီၤ.
ခီဖျိလၢ KTLAလၢအဘၣ်တၢ်တီခိၣ်ရိၣ်မဲအီၤလၢသုးခိၣ်အဲၣ်ခွံ(ကိး)ကီၤလၤဖိ ခိးခးဝဲဒၣ် KNLA ဒ်အံၤအဖီခိၣ် KNLA သုးက့(၄)သုးဖိဘၣ်သံဝဲတဂၤအဂ့ၢ် KNLAသုးက့(၄)အသုးက့ခိၣ် သုးခိၣ်ကျၢၢ်ဖိ စီၤဖိလ့စံးဘၣ်ဝဲဒၣ် ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“အိၣ်ဒ်သိးမၤညီနုၢ်ဝဲအသိးလီၤ.အိၣ်ဟဲခီးခးခူသူၣ်နၤဝံၤက့ၤဃ့ၢ်လၢယိၤကီၢ်ပူၤလီၤ.သနၥ်က့တမ့ၢ် KTLA ခဲလၢၥ်ဘၣ်.အိၣ်ဒၣ်ကီၤလၤဖိ(ကိး)သုးခိၣ်အဲၣ်ခွံတဒူၣ်န့ၣ်လီၤ.KLTA လၢအဂၤန့ၣ်တမၤတၢ်ဒ်န့ၣ်ဘၣ်.ဝ့ၢ်တၢ်အဲၣ်ထံခံကျဲန့ၣ် ပယီၤတအိၣ်နီတဂၤဘၣ်.အိၣ်ဒၣ်ပလ့ၢ်လိၤလီၤ.ထုးထီၣ်ဝဲလံၥ်ဝဲန့ၣ်လၢကခးပယီၤဘၣ်ဆၣ်ပယီၤလ့ၢ်လိၤတအိၣ်ဘၣ်အဃိန့ၣ်အဝဲသ့ၣ်ခးပှၤလီၤ.အဲၣ်ဒိးထုးထီၣ်ဝဲအလံၥ်ခီပညီဒ်န့ၣ်လီၤ.အဝဲသ့ၣ်အိၣ်ဖဲန့ၣ်သနၥ်က့တမ့ၢ်လၢအတြီဆၢပယီၤကန့ၢ်ဘၣ်အဃိန့ၣ် ဒ်သိးပယီၤဟဲလီၤသုတန့ၢ်တဂ့ၤအဂီၢ်န့ၣ်ပလဲၤဆီလီၤပပှၤဒီးလၢကလဲၤတြီဆၢပယီၤလၢဝ့ၢ်တၢ်အဲၣ်အဂီၢ်စ့ၢ်ကီးပဘၣ်သူဝဲကျဲတဘိအံၤန့ၣ်လီၤ.ဖဲတၢ်ကဲထီၣ်သးဘျီဝဲန့ၣ် န့ၣ်ပပှၤသံတဂၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ခီဖျိလၢအဝဲသ့ၣ်ဟဲခီးခးခူသူၣ်လီၤအဃိတၢ်ခးလိၥ်သးကဲထီၣ်ယံၤယံၤထၢထၢတအိၣ်ဘၣ်အဂ့ၢ်,ဒီးသုးခိၣ်အဲၣ်ခွံ(ကိး)ကီၤလၤဖိတီခိၣ်ရိၣ်မဲ KTLA တၢ်ဟူးတၢ်ဂဲၤဝဲအံၤန့ၣ် ကဲထီၣ်ဝဲဒၣ်တၢ်တံၥ်တၥ်လၢသုးက့(၄)အဂီၢ်လၢတၢ်ကခါထီၣ်ခီၣ်ဆူညါတပတီၢ်အသိးလၢခိၣ်နၢ်သိၣ်ဒူသ့ၣ်တဖၣ်အဂီၢ်စ့ၢ်ကီးတၢ်ဘံၣ်တၢ်ဘၢဘၣ်ဒိစ့ၢ်ကီးဝဲအဂ့ၢ် သုးခိၣ်ကျၢၢ်ဖိစီၤဖိလ့တဲအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်သုးက့(၄)အပှၤဘၣ်မူဘၣ်ဒါစံးဝဲဒၣ်အသိးန့ၣ် ခ့ၣ်အဲယူၣ် သုးက့(၄)ဟီၣ်ကဝီၤပူၤ KTLA အိၣ်ဆီလီၤဝဲသး(၃)ဖု, လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်အဲဖိတဖု,အိၣ်လၢပ့ၤလီခံ,သုးခိၣ်ထးဆဲးတဖု,အိၣ်လၢမိဒီၣ်တကပၤဒီးသုးခိၣ်အဲၣ်ခွံသ့ၣ်တဖၣ်ဒီး ထဲ KTLA လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်အဲၣ်ခွံ(ကိး)ကီၤလၤဖိတဒူၣ် လီၤဟဲခးဝဲဒၣ် KNLAသုးက့(၄)အဂ့ၢ် သ့ၣ်ညါဘၣ်လၢသုးက့(၄)အပှၤဘၣ်မူါဒါအအိၣ်န့ၣ်လီၤ.
တကီၢ်ခါခဲအံၤန့ၣ် ပယီၤသုးသ့ၣ်တဖၣ်လၢကထီၣ်ဒိၣ်စိက့ၤဝဲထံခံကီၢ်ဆၢဒီးဝ့ၢ်တၢ်အဲၣ်ထံခံကျဲမုၢ်ဖးဒိၣ်အဂီၢ် အိၣ်ကတဲၥ်ကတီၤပၥ်ဖှိၣ်ထီၣ်ဂံၢ်ဘါဖဲဝ့ၢ်တၢ်အဲၣ်,သုးကျိၤတဘိပှၤကညီနီၣ်ဂံၢ်ကအိၣ်(၂၀၀)ဘျဲၣ်အဂ့ၢ် သ့ၣ်ညါဘၣ်ဒ်သုးက့(၄)အပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ.
