လါယူၤလံ ၂၉သီ, ၂၀၂၅နံၣ်, ခ့ၣ်အဲးစံၣ်,
ကညီကလုၥ်ဒူခိၣ်နၢ်ခၢၣ်စးတဖၣ်အံၤတဒိးန့ၢ်ဘၣ်ဝဲလီၢ်ဆ့ၣ်နီၤလၢဘျီၣ်ဒိၣ်အပူၤဘၣ်အဖီခိၣ်မ့ၢ်တၢ်လီၤမဲၥ်ဆှးအဂ့ၢ်,ကီၢ်ပယီၤထံကီၢ်တၢ်ပၢဆှၢရဲၣ်ကျဲၤကမံးတံၥ်ကရၢဖိ(မါည့မီၣ်)စံးလီၤဝဲဒၣ်လၢအ့ယါဝတံၤကီၢ်ခီဒိၣ်ကၠိၤပၠီၤဝ့ၢ်လီၢ်ကဝီၤအတၢ်အိၣ်ဖှိၣ်ဘျီၣ်ပူၤဖဲတၢ်မၤလၤကပီၤကညီလါခူးကံၢ်စုမုၢ်နံၤအဆၢကတီၢ်န့ၣ်လီၤ.
အပူၤကွံၥ်မဟါလါယူၤလံ(၂၆)သီအနံၤတၢ်မၤလၤကပီၤဝဲကညီလါခူးကံၢ်စုမုၢ်နံၤအမူးအပူၤ,အ့ယၣ်ဝတံၣ်ကီၢ်ခီဒိၣ်အပူၤကညီကလုၥ်ဒူၣ်ဖိတဖၣ်အံၤအိၣ်ဝဲလၢအကလီၢ်(၅၀)ဘျဲၣ်ဘၣ်ဆၣ်,တၢ်အဲၣ်ပှၤကလုၥ်ဒီးတၢ်ပၥ်ဂံၢ်ပၥ်ဘါခိၣ်နၢ်တအိၣ်ဝဲဘၣ်အဃိတၢ်ဃုထၢတဖၣ်အပူၤကညီခိၣ်နၢ်ခၢၣ်စးတဖၣ်တဒိးန့ၢ်ဘၣ်ဝဲတၢ်လီၢ်တၢ်ကျဲလၢဘျီၣ်ဒိၣ်အပူၤဘၣ်အဖီခိၣ်မ့ၢ်တၢ်လီၤမဲၥ်ဆှးအဂ့ၢ်,(မါည့မီၣ်)စံးလီၤဝဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ.
အဝဲစံးဝဲလၢ“အ့ယါဝတံၣ်ကီၢ်ခီဒိၣ်အပူၤကညီကလုၥ်ဒူၣ်ဖိတဖၣ်အိၣ်ဆိးဝဲကအိၣ်လၢအကကွဲၢ်ညါန့ၣ်လီၤ.ပှၤကညီနီၢ်ဂံၢ်အိၣ်လၢတဝၥ်ဘျဲၣ်ညါဃၣ်ဃၣ်ညါဘၣ်ဆၣ်,အတၢ်အဲၣ်အပှၤကလုၥ်,တၢ်ပၥ်ဂံၢ်ပၥ်ဘါခိၣ်နၢ်,တၢ်ပၥ်ဒိၣ်ပၥ်ထီခိၣ်နၢ်အိၣ်ထဲလဲၣ်န့ၣ်,ပမၤတၢ်သမံသမိးဝံၤ(၃)ဘျီလံနါက့,ပှၤတဖၣ်အံၤတဖျိတၢ်ဒိးစဲးနီတဂၤဘၣ်.လၢတၢ်န့ၣ်အဃိန့ၣ်လၢတၢ်မၤဃုထၢအပူၤပပှၤကညီခိၣ်နၢ်ခၢၣ်စး,ကညီထံရုၢ်ကီၢ်သဲးပၣ်တံၣ်တဖၣ်နုၥ်လီၤဒိးဃုထၢဝဲအသးဘၣ်ဆၣ်,တဒိးန့ၢ်ဘၣ်လီၢ်ဆ့ၣ်နီၤလၢဘျီၣ်ဒိၣ်အပူၤဘၣ်တၢ်အံၤ,မ့ၢ်တၢ်လၢလီၤမဲၥ်ဆှးဒိၣ်မးတခါလီၤ”အဂ့ၢ်စံးလီၤဝဲဒၣ်န့ၣ်လီၤ.
(၂၀၁၀)နံၣ်ဒီး(၂၀၁၅)နံၣ်တၢ်ဃုထၢအပူၤကညီခိၣ်နၢ်ခၢၣ်စးတဖၣ်အံၤနုၥ်လီၤဒိးဃုထၢဝဲအသးအိၣ်ဝဲဘၣ်ဆၣ်ထီၣ်ဝဲလၢထံရုၢ်ကီၢ်သဲးအပျဲၢ်စီၢ်ခိၣ်တန့ၢ်ဘၣ်အဃိဒ်ကလုၥ်ဒူၣ်တဒူၣ်အသိးအနီၢ်ကစၢ်ဒၣ်ဝဲတူၢ်တန့ၢ်ခီၣ်တကဲဝဲဘၣ်အဂ့ၢ်,(မါည့မီၣ်)ကတိၤပၥ်ဖျါလီၤဝဲဒၣ်စ့ၢ်ကီးန့ၣ်လီၤ.
လၢတၢ်န့ၣ်အဃိ,(၂၀၂၀)နံၣ်အပူၤဟးထီၣ်ကွံၥ်ဝဲလၢ(KNU)တၢ်ဖံးတၢ်မၤအပူၤဒီးလၢ(သုးကီၣ်ကးထံကီၢ်ခိၣ်နၢ်)တဖၣ်အတၢ်ဟ့ၣ်ကူၣ်ဟ့ၣ်ဖးအဖီခိၣ်နုၥ်လီၤဒိးဃုထၢဝဲအသးလၢအ့ယၣ်ဝတံၣ်ကီၢ်ခီဒိၣ်,ပါတနီၤကီၢ်ဆၣ်ကမျၢၢ်ဘျီၣ်ဒိၣ်အခၢၣ်စး,ကညီကမျၢၢ်ပၣ်တံၣ်(KPP)ကရၢအဂ့ၢ်,အနီၢ်ကစၢ်စံးစ့ၢ်ကီးဝဲဒၣ်န့ၣ်လီၤ.
ဒီးအတၢ်နုၥ်လီၤဒိးဃုထၢသးအံၤ,ဒ်အလီၢ်အိၣ်ဝဲအသိးအနီၢ်ကစၢ်အိၣ်ဆိးဟီၣ်ကဝီၤအပူၤကညီကလုၥ်ဒူၣ်ဖိတဖၣ်တူၢ်လိၥ်ဆီၣ်ထွဲဝဲအီၤအိၣ်ဝဲဘၣ်ဆၣ်,တၢ်ဃုထၢဘျီဝဲန့ၣ်မ့ၢ်တ့ၢ်ဝဲတၢ်ဃုထၢလၢအတီတတြၢ်ဘၣ်အဃိတမၤနၢၤဝဲတၢ်ဘၣ်အဂ့ၢ်,(မါည့မီၣ်)ကတိၤပၥ်ဖျါအါထီၣ်ဝဲဒၣ်စ့ၢ်ကီးန့ၣ်လီၤ.
(မါည့မီၣ်)အံၤအပူၤကွံၥ်မ့ၢ်တ့ၢ်ဝဲခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,လီၢ်ခၢၣ်သးကမံးတံၥ်ဖိလီၢ်လံၤတဂၤမၤတ့ၢ်ဝဲတၢ်ယံၤလၢအနံၣ်(၅၀)ဃၣ်ဃၣ်အိၣ်ဝဲအဂ့ၢ်,အနီၢ်ကစၢ်စံးလီၤဝဲဒၣ်လၢတၢ်မၤလၤကပီၤကညီလါခူးကံၢ်စုအတၢ်ရဲၣ်တၢ်ကျဲၤအပူၤန့ၣ်လီၤ.
ဒ်န့ၣ်အသိး,(၂၀၂၁)နံၣ်သုးဟံးန့ၢ်တၢ်စိကမီၤအလီၢ်ခံသုးကီၣ်ကးအခိၣ်မ့အီၣ်လဲၤတီၣ်ထီၣ်ဝဲအီၤလၢထံကီၢ်တၢ်ပၢဆှၢရဲၣ်ကျဲၤကမံးတံၥ်ကရၢဖိအကျါတဂၤအသိးန့ၣ်လီၤ.
