လါအီကူး ၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဒီၣ်ဖးခိၣ်ကီၢ်ဆၣ်အပူၤ အပူၤကွံၥ်သၢနွံဃၣ်ဃၣ်အခါ ပယီၤသုးကျိၤလၢဟဲထီၣ်တဖၣ်နုၥ်လီၤလၢသဝီပူၤဒွဲၣ်အူအီၣ်ကွံၥ်ဝဲသဝီဒီတဖျၢၣ်ပူၤဟံၣ်ခဲလၢၥ်ဃၣ်ဃၣ်အဂ့ၢ်န့ၣ် ကညီဂ့ၢ်ဝီခွဲးယၥ်ကရူၢ်(KHRG) ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
ဖဲအပူၤကွံၥ်လါယူၤလံ ၅ သီ ဂီၤခီအဆၢကတီၢ်န့ၣ် ပယီၤသုးဂံၢ်ဘါလၢကအိၣ်(၁၅၀)ဘျဲၣ်အံၤ နုၥ်လီၤဝဲဆူဒီၣ်ဖးခိၣ်ကီၢ်ဆၣ် ၀့ၤထူကရူၢ်ပူၤ သဝီတဖျၢၣ်အဃၢၤဝံၤ တၢ်ဒုးကဲထီၣ်ဝဲဒီးတၢ်ဒီသဒၢကမျၢၢ်သုး(PDF)န့ၣ်လီၤ.
တၢ်ဒုးကဲထီၣ်ဝံၤဖဲ ၁၀း၀၀ ဃၣ်ဃၣ်အဆၢကတီၢ်န့ၣ် ပယီၤသုးသ့ၣ်တဖၣ်အံၤနုၥ်လီၤဝဲလၢသဝီဘူးဖဲန့ၣ်တဖျၢၣ် အပူၤဝံၤ ဒွဲၣ်အူအီၣ်ကွံၥ်ဝဲသဝီဒီတဖျၢၣ်ပူၤဟံၣ်(၃၉)ဖျၢၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဒ်(KHRG)လံၥ်တၢ်ပၥ်ဖျါပူၤကမျၢၢ်စံးဝဲအသိးန့ၣ် ပယီၤသုးဒွဲၣ်အူအီၣ်ဟံၣ်(၃၉)ဖျၢၣ်အမဲၥ်ညါဒွဲၣ်အူပၣ်ဃုၥ်ဝဲ သိလ့ၣ်ယီၢ်(စဲးကၢး) ၂ ခိၣ် အဂ့ၢ်န့ၣ် လီၤ.
ဒ်န့ၣ်အသိးသဝီလၢပယီၤသုးနုၥ်လီၤဒွဲၣ်အူအီၣ်ဟံၣ်အံၤန့ၣ်ဟံၣ်ပၥ်ဖှိၣ်ခဲလၢၥ်အိၣ်ဝဲ(၄၃)ဖျၢၣ်ဒီး ပယီၤသုးဒွဲၣ်အူဟံၣ် ဘျီဝဲအံၤသဝီဒီတဖျၢၣ်အပူၤဟံၣ်လၢတအူအီၣ်အိၣ်တ့ၢ်က့ၤထဲ(၄)ဖျၢၣ်ဧိၤန့ၣ်လီၤ.
ခီဖျိလၢတၢ်ဒုးကဲထီၣ်ပယီၤသုးနုၥ်လီၤဒွဲၣ်အူအီၣ်သဝီဖိအဟံၣ်အဃီကဲထီၣ်ဒ်အံၤအဖီခိၣ် သဝီဖိတဖၣ်ပျံၤတၢ်ဖုးတၢ်ဃ့ၢ် ထီၣ်လဲၤအိၣ်က့ၤဝဲလၢမံၤခိၣ်ပှၢ်လၢ်ကျါန့ၣ်လီၤ.
ဒီးအဝဲသ့ၣ်အံၤဖဲအစံၣ်ထီၣ်အခါခီဖျိပယီၤသုးဒွဲၣ်အူအဟံၣ်အဃီအတၢ်ဖိတၢ်လံၤစ့ၢ်ကီးတအိၣ်နီတမံၤလၢၤဘၣ်အဃိ ခဲအံၤ သဂၢၢ်ဘၣ်ဝဲအိၣ်ဆိးလီၢ်ကျဲတၢ်ဂ့ၢ်ကီဒီးတၢ်အီၣ်တၢ်အီစ့ၢ်ကီးတအိၣ်ဘၣ်တကးဒံးဘၣ်ခဲအံၤ ခီဖျိတၢ်စူၤတပယူၥ်ဃီအဃိ သဂၢၢ်ဘၣ်ဝဲတၢ်လိၤကိၢ်(တိးကွ့)တၢ်ဆါသ့ၣ်တဖၣ်န့ၣ်လီၤ.
လၢတၢ်န့ၣ်အဃိလၢအဝဲသ့ၣ်အဂီၢ်လိၣ်ဘၣ်ဝဲဂ့ၢ်ဂီၢ်အူတၢ်ကူတၢ်သိး,တၢ်အီၣ်တၢ်အီဃုၥ်ဒီးတၢ်သူတၢ်စွဲလၢအဂၤသ့ၣ်တဖၣ် အဂ့ၢ်န့ၣ် (KHRG)စံးဝဲန့ၣ်လီၤ.
