လါအီကူး ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ကီၢ်ဆၣ်ခံဘ့ၣ်အပူၤ ခီဖျိတၢ်စူၤထံဒိၣ်ထီၣ်ဒီး ကစၢၢ်ထံအီၣ် ဃီၤတၢ်အဃိ လီၢ်ကဝီၤကမျၢၢ်သံအိၣ်ထီၣ်တုၤလၢ ၁၃ ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါအီကူး ၇ သီ အနံၤ န့ၣ်လီၤ.
ဒီၣ်ဖးခိၣ်ဒီးထီတထူၣ်ကီၢ်ဆၣ်အပူၤ စးထီၣ်ဖဲလါယူၤလံလၢၥ်လါအီကူးထီၣ်အံၤန့ၣ် တၢ်စူၤထံဒိၣ်ထီၣ်,ကစၢၢ်ထံစ့ၢ်ကီးအီၣ်ဃီၤ ဟီၣ်ခိၣ်လၥ်ဝဲအဃိ ဖဲလါအီကူး ၅ သီ ဒီး ၆ သီအံၤ ကမျၢၢ်သံအိၣ်ထီၣ်တုၤလၢ(၁၃)ဂၤလံအသိး ကမျၢၢ်လၢဟီၣ်ခိၣ်လၥ်ဘၢအီၤ တဖၣ်စ့ၢ်ကီးတၢ်ဟးဃုအီၤတဘၣ်ခဲလၢၥ်ဒံးဘၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ဒီၣ်ဖးခိၣ်ကမျၢၢ်လၢအသံ(၁၃)အံၤမ့ၢ်ဝဲပှၤ ကဝီၤဒ့-၁, ကဝီၤဒ့-၂, ကဝီၤဒ့-၃, ခဝဲၤသဝီ, လ့ၣ်ပၠၤကလ့သဝီဖိကမျၢၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါခီဖျိလၢထံဒိၣ်ထီၣ်,ထံကစၢၢ်လီၤဟီၣ်ခိၣ်လၥ်အံၤအဃိ တိၤဟးဂီၤလီၤပှီၢ်ကွံၥ်ဝဲ(၃)ဘိဒီးသိလ့ၣ်ကျဲဃုၥ်ဒီး ကျဲလၢအဂၤ တဖၣ်ဟးဂီၤဝဲခဲလၢၥ်(၂၃)တီၤညါဒီး တကးဒံးဘၣ်ဟံၣ်ဃီတၢ်သူၣ်ထီၣ်,တၢ်ဖံးအီၣ်မၤအီၣ်လီၢ်ကျီး ကရၢၢ်ပူၤ တၢ်ထူၣ်တၢ်ဘိတဖၣ် ဟးဂီၤဝဲအါမးအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
တကးဒံးဘၣ်လၢဟီၣ်ခိၣ်လၥ်အံၤအဃိ ဒီၣ်ဖးခိၣ်ဝ့ၢ်ပူၤကမျၢၢ်အမဲၥ်ညါကမျၢၢ်လၢအိၣ်ခိခိၣ်ဒူသဝီအပူၤ တဖၣ်စ့ၢ်ကီး သဂၢၢ်ဘၣ်ဝဲထံဒိၣ်ထီၣ်ဟီၣ်ခိၣ်လၥ်အံၤအိၣ်ဝဲန့ၣ်လီၤ.
ဘၣ်ဆၣ်ဒူသဝီလၢဘၣ်ကွၢ်ဆၢၣ်မဲၥ်ထံၣ်ဒိၣ်ဃိၣ်ယွၤသ့ၣ်တဖၣ်အံၤတဖၣ်အကျါ လီၤဆီဒၣ်တၢ်ထံပူၤခံသဝီလၢဟံၣ်ခိၣ်ကအိၣ် (၃၀)ခိၣ်ဃၢၤအံၤ ခီဖျိထံလုၢ်ဘၢသဝီဒီတဖျၢၣ် ဒီးသဝီဖိစ့ၢ်ကီးဘၣ်သုးလီၢ်သုးကျဲအဃိလိၣ်ဘၣ်ဝဲတၢ်အီၣ်တၢ်အီ, တၢ်ခိၣ်ဒုး, ဟံၣ်တၢ်ပီးတၢ်လီသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်လံၥ်တၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ လီၢ်ကဝီၤပှၤဘၣ်မူဘၣ်ဒါတဂၤစံးဝဲလၢ “ထံဒိၣ်တဘျီအံၤလၢဒီၣ်ဖးခိၣ်(သၣ်တီၣ်)ဝ့ၢ်ပူၤဒီတဖျၢၣ်လီၤ. မ့ဝံၤကျဲ တဖၣ်နါက့ဟးဂီၤခဲလၢၥ်ဃၣ်ဃၣ်လီၤ.ကျဲတဖၣ်န့ၣ်ဟီၣ်ခိၣ်လၥ်ဘၢအဃိနဟးတသ့နီပူၤလၢၤဘၣ်.မ့ဝံၤတိၤနါက့ကၢ်.ဟီၣ်ခိၣ်လၥ်တၢ်ဟးဂူၥ်ဟးဂီၤဒုအါကတၢၢ်ဖဲဒီၣ်ဖးခိၣ်ဝ့ၢ်ပူၤအံၤလီၤ.မ့ဝံၤလၢထံပူၤခံတကပၤနါက့ထံဒိၣ်ကၢၢ်လၥ်သဝီဒီတဖျၢၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒီၣ်ဖးခိၣ်ကီၢ်ဆၣ်ပူၤအပူၤကွံၥ်နံၣ်တၢ်စူၤထံဒိၣ်အိၣ်ဘၣ်ဆၣ် ပှၤကညီတၢ်သံတၢ်ဘၣ်ဒိဘၣ်ထံး,တၢ်လီၤမၢ်,တၢ်ဟးဂူၥ်ဟးဂီၤ ကဲထီၣ်ဒ်အခဲအံၤတအိၣ်တ့ၢ်နီတဘျီဘၣ်ဒီး တစူၤအံၤခီဖျိလၢထံဒိၣ်ဃိၣ်ယွၤ,ကစၢၢ်ထံဆဲးလီၤဟီၣ်ခိၣ်လၥ်အံၤ အဃိဟံၣ်ဟးဂီၤ တစှၤန့ၢ်အဖျၢၣ်(၈၀)အဂ့ၢ်န့ၣ် ကမျၢၢ်လၢအိၣ်ဝ့ၢ်ပူၤတဖၣ်စံးဝဲအသိး သ့ၣ်ညါဘၣ်န့ၣ်လီၤ.
