လါအီကူး ၂၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤ လၢသၢသီအတီၢ်ပူၤ ခီဖျိလၢသုးမီၤစိရိၤအကျိဖးဒိၣ်တကးဒံးဘၣ် ဟးတ့ၢ်လီၤဝဲဒြိတဖၣ်ဆူဒူသဝီတၢ်ဖံးအီၣ်မၤအီၣ်လီၢ်ကျဲအဃိ ကမျၢၢ်ဘၣ်ဒိ(၂)ဂၤဒီး သီခါဖၠၣ်(၁)ဖျၢၣ်,ကၠိတၢ်သူၣ်ထီၣ်(၁)ဖျၢၣ် ဟးဂီၤဝဲအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဒ်ခ့ၣ်အဲၣ်ယူၣ်လံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် မူကီၢ်ဆၣ်ပူၤ ဖဲအပူၤကွံၥ်လါအီကူး ၂၁ သီ ဂီၤခီ ၈း၀၀ နၣ်ရံၣ်အဆၢကတီၢ်န့ၣ် ပယီၤသုးခီၣ်ချ့သုးရ့ၣ်(ခမရ-၆၀)လၢအိၣ်လဲၣ်ပးအံၤတဖၣ် လဲၤတ့ၢ်လီၤဝဲဒြိဆူပရဲစံၣ်သဝီပူၤအဃိ ကၠိတၢ်သူၣ်ထီၣ်ဟးဂီၤတဖျၢၣ် အမဲၥ်ညါ တနံၤဃီဖဲဟါခီ(၂း၃၀)အဆၢကတီၢ် ပယီၤသုးခးလီၤကျိဖးဒိၣ်(၃)ဖျၢၣ်ဆူညီၣ်ပ့ၣ်သၣ်(ညောင်ပင်သာ) သဝီပူၤအဃိ ဟံၣ်ဟးဂီၤ(၅)ဖျၢၣ်ဒီး သီခါဖၠၣ်ဟးဂီၤ(၁)ဖျၢၣ်န့ၣ်လီၤ.
ဒ်န့ၣ်အသိးမုၢ်ဆ့ၣ်ထီၣ်ဖဲလါအီကူး ၂၂ သီ ဂီၤခီ ၉ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ပယီၤသုးလၢအိၣ်ကွ့ခၠီဝး(ကွင်းချောင်း၀) အံၤတဖၣ် ခးလီၤဝဲဟီၣ်ဝ့ၣ်စၣ်ကျိချံ(၅)ဖျၢၣ်ဆူ ပရဲစံၣ်သဝီပူၤအဃိ ကျီၢ်ဘၣ်ဒိဝဲ(၁)ဒုအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ ဖဲလါအီကူး ၂၃ သီ မုၢ်ဃ့ၢ်လီၤ ၂း၀၀ နၣ်ရံၣ်ဘျဲၣ်အဆၢကတီၢ် လၢၢ်ဒိၣ်ကီၢ်ဆၣ်ပူၤ ပယီၤသုးခီၣ်သုးရ့ၣ် (ခလရ-၂၆၄)ခးလီၤဝဲကျိဖးဒိၣ်တဖျၢၣ်ဆူ အ့ပရ့း(အင်းပရစ်)သဝီပူၤအဃိ ဘၣ်ဒိဝဲသဝီဖိ မီၤမၠိဝ့ထိ(၄၂)နံၣ်အံၤန့ၣ်လီၤ.
တကးဒံးဘၣ်လၢ ဆီထံးကီၢ်ဆၣ်အပူၤစ့ၢ်ကီး တနံၤဃီဖဲလါအီကူး ၂၃ သီ မုၢ်ဃ့ၢ်လီၤ ၂း၀၀ နၣ်ရံၣ်ဃၣ်ဃၣ်အဆၢကတီၢ်အံၤ ပယီၤသုးခီၣ်ချ့သုးရ့ၣ်(ခမရ-၂၀)အံၤခးလီၤဝဲ(၁၂၀ မမ)ကျိဖးဒိၣ်ဆူ ထီလူၤခိၣ်သဝီပူၤအဃိ ကျိဖးဒိၣ်အက့အခီဘၣ်ဒိဘၣ်ထံးဝဲ နီၢ်အ့ဖြ့ၤဝါ(၃၉)နံၣ်အံၤအဂ့ၢ်န့ၣ် ခ့ၣ်အဲၣ်ယူၣ်စံးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်အပူၤ သုးဟံန့ၢ်တၢ်စိတၢ်ကမီၤဝံၤလီၢ်ခံဒီတကတီၢ် တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ပယီၤသုးအံၤခးလီၤဝဲ ကျိဖးဒိၣ်,သူဝဲကဘီယူၤလဲၤတ့ၢ်လီၤမ့ၣ်ပိၢ် တလီၢ်လီၢ်အဃိ ကမျၢၢ်သံဘၣ်ဒိဘၣ်ထံး,ဟံၣ်ဃီ,တၢ်ဘူၣ်တၢ်ဘါတၢ်သူၣ်ထီၣ် ဒီးကၠိ တဖၣ် ဟးဂီၤကဲထီၣ်ဝဲခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
