လါယနူၤအါရံၤ ၄သီ, ၂၀၂၅နံၣ်, ခ့ၣ်အဲးစံၣ်,
တနံၣ်အံၤ(၂၀၂၆)နံၣ်ဟီၣ်ခိၣ်ဒီဖျၢၣ်ကညီမုၣ်ဂ့ၤဆဲးလၤ,ခွါဂ့ၤဆဲးလၤ Miss and Mister Global Karen
တၢ်ပြၢအပူၤ,နီၢ်ယွၤဟ့ၣ်စ့ဒီးစီၤ((Marsha)ဒိးန့ၢ်ဘၣ်ဝဲတၢ်မၤနၢၤအဂ့ၢ်,သ့ၣ်ညါဘၣ်ဒ်တၢ်ပြၢအတၢ်ဘိးဘၣ်ရၤလီၤအသိးန့ၣ်လီၤ.
တနံၣ်အံၤတၢ်ြပၢအပူၤကီၢ်ကၠီၣ်တဲၣ်ကညီကီၢ်စဲၣ်ကီၢ်ဆၢသူၣ်ဘီၣ်သးစၢ်,ကညီဘၣ်ကီဘၣ်ခဲဒဲကဝီၤသူၣ်ဘီၣ်သးစၢ်တဖၣ်အမဲၥ်ညါ,ထံချၢကီၢ်ချၢကညီသူၣ်ဘီၣ်သးစၢ်ဒီးကီၢ်ပူၤကညီသးစၢ်တဖၣ်နုၥ်လီၤသတြီၤဒိးပြၢဝဲဒၣ်အသးအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
ဒီးမုၣ်ဂ့ၤဆဲးလၤပှၤနုၥ်လီၤဒိးပြၢသးပိၥ်မုၣ်တဖၣ်အကျါဒိးန့ၢ်ဘၣ်ဝဲ(Miss)ပှၤမၤနၢၤတၢ်အတၢ်လၤကပီၤလၢအူးပၠၣ်ကညီဘၣ်ကီဘၣ်ခဲဒဲကဝီၤခၢၣ်စးအဖီခိၣ်,နီၢ်ယွၤဟ့ၣ်စ့စံးဝဲဒ်အံၤန့ၣ်လီၤ.
“ယတၢ်မုၢ်လၢ်အိၣ်လၢ(မီၣ်ဒၢၤ)တကပၤဒုဒီဒူၣ်ညါ,စးထီၣ်လၢယနီၢ်ဆံးဆံးခါလံၤလံၤလီၤယသးစဲ,ဘၣ်ဆၣ်ယဘၣ်အိၣ်လၢဒဲကဝီၤအပူၤအဃိယဆိမိၣ်တၢ်ခွဲးတၢ်ယၥ်တအိၣ်လၢၤဘၣ်.နါက့ယထံၣ်န့ၢ်တၢ်ခွဲးတၢ်ယၥ်ဒ်အံၤလံအဃိ,ခါဆူညါယကမၤတုၤလၢလဲၤထီၣ်လဲၤထီအါန့ၢ်ဒံးအလီၢ်”အဂ့ၢ်စံးဝဲဒၣ်န့ၣ်လီၤ.
(၂၀၂၆)နံၣ် Miss and Mister Global Karen တၢ်ပြၢအံၤ, တၢ်စးထီၣ်ကိးတ့ၢ်ဝဲကညီသူၣ်ဘီၣ်သးစၢ်လၢအသးစၢၢ်ဆၢတၢ်တဖၣ်စးထီၣ်လၢ(၂၀၂၅)နံၣ်လါနိၣ်ဝ့ဘၢၣ်အခါလံၤလံၤဒီးတၢ်ဟ့ၣ်ဝဲ(Camp- training)ဝံၤအလီၢ်ခံလၢတၢ်နုၥ်လီၤသတြီၤဒိးပြၢသးအတၢ်ရဲၣ်တၢ်ကျဲၤအဂီၢ်တၢ်မၤက့ၤဝဲဖဲမဟါယနူၤအါရံၤ(၃)သီအနံၤလၢကီၢ်ကၠီၣ်တဲၣ်ဝ့ၢ်မဲၢ်ဆီး(Robinson)အပူၤအဂ့ၢ်,သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ,တၢ်ပြၢအံၤတၢ်မၤဝဲအီၤပှဲၤထီၣ်သၢဝီလံဒီးတၢ်ဒုးအိၣ်ထီၣ်ဝဲအတၢ်ပညိၣ်မ့ၢ်ဝဲဒ်လဲၣ်အဂ့ၢ်န့ၣ်,ပှၤဒုးအိၣ်ထီၣ်တၢ်ပြၢမုၣ်ဂ့ၤဆဲးလၤလီၢ်လံၤ(Miss)နီၢ်စ့ဖီစံးဝဲဒ်အံၤန့ၣ်လီၤ.
“ပဒုးအိၣ်ထီၣ်တၢ်ပြၢအံၤခီဒုန့ၣ်မ့ၢ်ဒၣ်ဒ်သိးပကဂၢၤဃၥ်ပၢၤဃၥ်က့ၤပတၢ်ဆဲးတၢ်လၤအဂီၢ်,ပကွဲမုၥ်ဘၣ်သူၣ်စၢ်သးဘီၣ်လၢအိၣ်ယံၤအိၣ်ဘူးကထံၣ်လိၥ်ရ့လိၥ်မုၣ်လိၥ်သးန့ၣ်လီၤ.ဒီးပထံၣ်စ့ၢ်ကီးလၢတၢ်တမံၤလၢပကြၢးမၤအီၤလၢပပှၤကလုၥ်ကညီသူၣ်ဘီၣ်သးစၢ်အကျါ,အဃိဆူမဲၥ်ညါပကဒုးအိၣ်ထီၣ်တၢ်ဒုးနဲၣ်ဖျါတဖၣ်အိၣ်ဒံးဝဲအဃိပစးထီၣ်မၤဆိလၢတၢ်ရဲၣ်တၢ်ကျဲၤဝဲအံၤလီၤ”အဂ့ၢ်စံးဝဲဒၣ်န့ၣ်လီၤ.
တနံၣ်အံၤတၢ်ပြၢအပူၤကညီသးစၢ်မုၣ်ခွါလၢအသးစဲမုၣ်ဂ့ၤဆဲးလၤ,ခွါဂ့ၤဆဲးလၤတဖၣ်ပၥ်ဖှိၣ်သးခဲလၢၥ်အိၣ်ဝဲ(၂၄)ဂၤအဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,အပူၤကွံၥ်(၂၀၂၅)နံၣ်တၢ်ပြၢအပူၤတၢ်မၤဝဲတ့ၢ်ဝဲတၢ်ပြၢဖဲ(Robinson)ပူၤအသိး,ကညီသးစၢ်မုၣ်ခွါနုၥ်လီၤဒိးပြၢသးအိၣ်စ့ၢ်ကီးဝဲ(၂၄)ဂၤအမဲၥ်ညါ,စံၣ်ညီၣ်ကွီၢ်တဖၣ်မ့ၢ်စ့ၢ်ကီးဝဲထံဆၢကီၢ်ဆၢကညီတၢ်ဃံတၢ်လၤကစၢ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,မဟိတနံၣ်တၢ်ပြၢအပူၤမဲၢ်ဆီးခၢၣ်စး(Namsai Saisiri)ဒိးန့ၢ်ဘၣ်ဝဲမုၣ်ဂ့ၤဆဲးလၤတၢ်မၤနၢၤတၢ်လၤကပီၤဒီးခီကီၢ်ဆၣ်သူလ့ၤကၠိခၢၣ်စး(Saw Thay Moo)ဒိးန့ၢ်ဘၣ်ဝဲခွါဂ့ၤဆဲးလၤတၢ်လၤကပီၤတၢ်မၤနၢၤအဂ့ၢ်,သ့ၣ်ညါဘၣ်န့ၣ်လီၤ.
