လါယနူၤအါရံၤ ၁၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်ဒိၣ်စိကီၢ်ဆၣ်အပူၤ ဖဲမဟါအနံၤန့ၣ် သုးမီၤစိရိၤ အကဘီယူၤလဲၤတ့ၢ်လီၤဝဲမ့ၣ်ပိၢ်အဃိ ဘၣ်သံဝဲဖိသၣ်(၂)နံၣ်တဂၤဒီး ဘၣ်ဒိဘၣ်ထံးဝဲခဲလၢၥ် ၉ ဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါဝဲန့ၣ်လီၤ.
ဖဲမဟါလါယနူၤအါရံၤ ၁၀ သီ မုၢ်ဃ့ၢ်လီၤ ၁း၄၀ မံးနံးအဆၢကတီၢ် သုးမီၤစိရိၤအကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်လၢကမီၤသွ့ ဟီၣ်ကဝီၤ ခးဃုၥ်စ့ၢ်ကီးဝဲကျိအဃိ တၢ်သံတၢ်ဘၣ်ဒိဘၣ်ထံးဘၣ်ဟဲကဲထီၣ်ဝဲအါဒ်အံၤလီၤအဂ့ၢ်န့ၣ် စံးဝဲန့ၣ်လီၤ.
ကဘီယူၤမ့ၣ်ပိၢ်အဃိဖိသၣ်(၂)နံၣ်သံတဂၤအမဲၥ်ညါကမျၢၢ်ဘၣ်ဒိဘၣ်ထံး(၉)ဂၤန့ၣ်မ့ၢ်ဝဲ ပိၥ်မုၣ်(၈)ဂၤ,ပိၥ်ခွါ(၁)ဂၤ ဒီး လၢပှၤဘၣ်ဒိတဖၣ်အကျါပၣ်ဃုၥ် စ့ၢ်ကီးဝဲ ဖိသၣ်(၃)နံၣ်တဂၤအဂ့ၢ်န့ၣ် ဘျံးဒဝဲၢ်ကီၢ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ စံးဝဲန့ၣ်လီၤ.
“ပှၤသံပှၤဘၣ်ဒိဘၣ်ထံးတဖၣ်အံၤမ့ၢ်ဒၣ်ကမျၢၢ်လီၤ.အဘၣ်ဒိအကျါန့ၣ်ပၣ်ဃုၥ်ဒီးဖိသၣ်ပိၥ်မုၣ်(၃)နံၣ်တဂၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
သုးမီၤစိရိၤအံၤတၢ်ဒုးကဲထီၣ်တအိၣ်ဘၣ်ဘၣ်ဆၣ် ခီဖျိပညိၣ်ခးပနီၣ်ဝဲကမျၢၢ်ထံဖိကီၢ်ဖိလၢတဖီၣ်တၢ်စုကဝဲၤဘၣ်အံၤအဃိ လၢအတၢ်ဖံးတၢ်မၤအံၤအဖီခိၣ်ထီဒါပဲၥ်အၢပဲၥ်သီဝဲအဂ့ၢ်န့ၣ် ဘျံးဒဝဲၢ်ကီၢ်ရ့ၣ်စံးဝဲန့ၣ်လီၤ.
(သုးက့ ၄)ဟီၣ်ကဝီၤအမဲၥ်ညါဖဲအပူၤကွံၥ်လါယနူၤအါရံၤ ၈ သီ ဂီၤခီ ၁၀း၀၀ ဘျဲၣ်အခါန့ၣ်စ့ၢ်ကီး လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်အပူၤ သုးမီၤစိရိၤကဘီယူၤပညိၣ်လဲၤတ့ၢ်လီၤပီၣ်(၅၀၀)မ့ၣ်ပိၢ် ၂ ဖျၢၣ်ဆူ လ့ၤဒိ(လှေဒုံး)သဝီပူၤအဃိ ကမျၢၢ်ပိၥ်မုၣ် (၄၈ နံၣ် ဒီး ၇၉ နံၣ်)အဘၢၣ်စၢၤအံၤသံဝဲ ၃ ဂၤ ဒီး ဘၣ်ဒိစ့ၢ်ကီးဝဲဖိသၣ်ပိၥ်ခွါ(၁၂)နံၣ်တဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ် ပၥ်ဖျါ ဝဲန့ၣ်လီၤ.
တကးဒံးဘၣ်တဂီၤဃီတၢ်ကဲထီၣ်သးဖဲန့ၣ်ဝံၤဖဲမုၢ်ထူၣ် ၁၁း၃၀ မံးနံးအဆၢကတီၢ် ပယီၤသုးလၢအိၣ်ရွှ့ၣ်ဝၣ်(ရွှေဝါ) သုးရ့ၣ်အံၤ တဖၣ်ခးလီၤဝဲကျိဖးဒိၣ်ဆူ ကၠ့ၤခါကိ(ကြိမ်ခါးကုန်း)သဝီပူၤအဃိ သဝီဖိပိၥ်မုၣ်(၃၆)နံၣ်ဘၣ်ဒိဝဲအသိး ဖဲလါယ နူၤအါရံၤ ၆ သီအခါ စ့ၢ်ကီး ပယီၤသုးတဒူၣ်ဃီဝဲအံၤခးလီၤကျိဖးဒိၣ်ဆူ ယွၤသ့ၣ်သဝီပူၤအဃိ ဘၣ်သံဝဲ ကမျၢၢ်ပိၥ်ခွါ (၆၂) နံၣ်အံၤကဲထီၣ်ဒံး ဝဲန့ၣ်လီၤ.
ဒ်န့ၣ်အသိးစးထီၣ်ဖဲတလါအံၤထီၣ်န့ၣ်မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤလၢသုးမီၤစိရိၤမၤတၢ်ဃုထၢအကူၥ်-၂ လၢပၣ်ဃုၥ်ဝဲအံၤ သုးမီၤစိရိၤသူကဘီယူၤလဲၤခးလီၤတၢ်လၢဖၣ်ပူၣ်ဟီၣ်ကဝီၤဃုၥ်ဒီးဒူသဝီကမျၢၢ်အိၣ်ဆိးလီၢ်ကျဲ အိၣ်ဝဲ ကိးမုၢ်နံၤဒဲးန့ၣ်လီၤ.
သုးမီၤစိရိၤအံၤဟီၣ်ကဝီၤလၢအမၤတၢ်ဃုထၢန့ၢ်သ့ၣ်တဖၣ်မ့ၢ်ဒုးနဲၣ်ဖျါဝဲတၢ်မုၥ်တၢ်ခုၣ်အိၣ်ဘၣ်ဆၣ် လီၤဆီဒၣ်တၢ်မ့မ့ၢ်(KNU) ဟီၣ်ကဝီၤ ဒီး ကလုၥ်ဒူၣ်တၢ်ပၢၢ်ဆၢကရူၢ်ကရၢတၢ်ပၢဟီၣ်ကဝီၤပူၤခီန့ၣ် သူဝဲကဘီယူၤ,ကျိဖးဒိၣ်,ဒြိပညိၣ်ခးလီၤဝဲတၢ်လၢကမျၢၢ် အိၣ်ဆိးလီၢ်ကျဲအိၣ်ဝဲ တပယူၥ်ဃီအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
