လါမးရှး ၃၀သီ, ၂၀၂၆နံၣ်, ခ့ၣ်အဲးစံၣ်,
မဟါလါမးရှး(၂၉)သီဂီၤခီအနံၤအပူၤတၢ်ဖီၣ်န့ၢ်ဝဲကသံၣ်မူၤဘှီး(၂,၈၀၀၀၀)လၢကၣ်ခၠးနၣ်ဘူၤရံၤ,ထီဖၤဖိၤ,ထၣ်ခနိၤသဝီဟီၣ်ကဝီၤအပူၤအလီၢ်ခံ,တနံၤအံၤလါမးရှး(၃၀)အနံၤဂီၤခီအပူၤကၠီၣ်တဲၣ်တကပၤမၤဃံးထီၣ်ဝဲဃိၣ်သၢဖျၢၣ်(ကၠိတြဲၤ)(ကျောင်းဂိတ်)ကမျၢၢ်တၢ်ဟးထီၣ်က့ၤလီၤအဂ့ၢ်,သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်(ကၠိတြဲၤ)တၢ်ဟးထီၣ်က့ၤလီၤကျဲအံၤ,အါတက့ၢ်ကမျၢၢ်လီၢ်ကဝီၤဖိတဖၣ်သူဝဲလၢထံကီၢ်ခံဘ့ၣ်အဘၢၣ်စၢၤတၢ်ဟးထီၣ်က့ၤလီၤဒီးတၢ်ဖံးအီၣ်မၤအီၣ်အဂီၢ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ဒီးတၢ်ဖီၣ်န့ၢ်ကသံၣ်မူၤဘှီးအလီၢ်ခံ,ကၠီၣ်တဲၣ်တကပၤမၤဃံးထီၣ်ဝဲကမျၢၢ်တၢ်ဟးလ့ၢ်လိၤဒီးတၢ်စိၥ်တၢ်ဘိၣ်တၢ်စၢၤတဖၣ်အဂ့ၢ်,ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်(DKBA)တီနီၢ်မုၢ်နုၤဒုးယၤဟီၣ်ကဝီၤနီၣ်ဂံၢ်(၂)အဒုးယၤခိၣ်သုးခိၣ်ဒိၣ်စိစီၤAOne စံးဘၣ်ခ့ၣ်အဲၣ်စံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပှၤဖီၣ်ချူးတၢ်လၢထၣ်ခနိၤန့ၣ်ဖျါဒ်ပှၤစိၥ်ထီၣ်ခီဝဲဖဲကျဲအဝဲန့ၣ်အဃိ,ဒ်အသုနၢ်ပၢၢ်ဝဲအသိးကျဲတဘိန့ၣ်ခီအိၣ်ဒၣ်ကမျၢၢ်လ့ၢ်ထီၣ်က့ၤလီၤလီၤအဃိခဲအံၤမၤထီၣ်ဝဲပျံၤထးဒီးမၤဃံးထီၣ်ဝဲကမျၢၢ်တၢ်စိၥ်တၢ်ဘိၣ်တၢ်စၢၤန့ၣ်လီၤ.တပံးကွံၥ်ဝဲဒၣ်ဘၣ်.ကျဲန့ၣ်လၢညါနါက့ပှၤလ့ၢ်လိၤဒ်န့ၣ်လီၤ.တြီၢ်ဒၣ်ပှၤနီၢ်တဂၤလီၤ.”အဂ့ၢ်စံးဝဲဒၣ်န့ၣ်လီၤ.
ကၠီၣ်တဲၣ်တကပၤမၤဃံးထီၣ်ဝဲကမျၢၢ်တၢ်ဟးထီၣ်က့ၤလီၤဒ်အံၤအဃိ,တကီၢ်ခါခဲအံၤကဲထီၣ်တၢ်ကီတၢ်ခဲအဂ့ၢ်,လီၢ်ကဝီၤကမျၢၢ်ပိၥ်မုၣ်တဂၤစံးဒ်အံၤန့ၣ်လီၤ.
အဝဲစံးဝဲလၢ“တၢ်ကဲထီၣ်သးဒ်အံၤတဘျီတဂီၤအံၤပှၤကလဲၤထီၣ်လၢယိၤကီၢ်တကပၤတဖၣ်လဲၤဝဲတန့ၢ်ဘၣ်.ကလဲၤဖံးလဲၤမၤ,ပှ့ၤအီၣ်ပှ့ၤအီတၢ်တဖၣ်န့ၢ်နါက့လဲၤတန့ၢ်ဘၣ်.ကဲထီၣ်တၢ်တံတၥ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ,ဃိၣ်သၢဖျၢၣ်ဝ့ၢ်(ကၠိတြဲၤ)ကျဲတၢ်ဟးထီၣ်က့ၤကျဲအံၤ,ဘၣ်တၢ်သ့ၣ်ညါဝဲလၢတၢ်စိၥ်ခူသူၣ်ဒီးဆါဟုၣ်ဝဲကသံၣ်ကသီ,တၢ်ဖိတၢ်လံၤလၢတဖိးသဲးစးဒီးတၢ်တြီတံၥ်ဃၥ်ဝဲဒၣ်တဖၣ်အဂ့ၢ်,လီၢ်ကဝီၤဖိတနီၤစံးဝဲန့ၣ်လီၤ.
ဒ်န့ၣ်အသိး,ကၣ်ခၠါနၣ်ဘူၤရံၤ-ဃိၣ်သၢဖျၢၣ်ဝ့ၢ်ကီၢ်ဆၢဟီၣ်ကဝီၤအပူၤခီဖျိတၢ်ဖီၣ်န့ၢ်ဝဲကသံၣ်မူၤဘှီးအါအါဂီၢ်ဂီၢ်ဒ်အံၤအဃိကၠီၣ်တဲၣ်တကပၤကမၤဂ့ၤထီၣ်ဝဲကီၢ်ဆၢတြဲၤဒီးတၢ်အိၣ်ခိးတၢ်ဘံၣ်တၢ်ဘၢတဖၣ်အိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်စ့ၢ်ကီးန့ၣ်လီၤ.
