လါမးရှး ၃၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ် တီနီၢ်မုၢ်ထီၣ်ဟီၣ်ကဝီၤန့ၣ် ဘၣ်တၢ်အိးထီၣ်ဝဲရၤမတံကီၢ်ဆၣ်အသီတဘ့ၣ် ဒီး ကီၢ်ဆၣ်ခိၣ်န့ၣ်ဘၣ်တၢ်ပၥ်ထီၣ်ဝဲပဒိၣ်စီၤဖၣ်ထယါဒီး ကီၢ်ဆၣ်ခိၣ်-၂ န့ၣ် ဘၣ်တၢ်ပၥ်ထီၣ်ဝဲ သုးခိၣ်ဒိၣ်ဂီၢ်ဂ့ၢ် စီၤကိၤကိၤ(ကိး) စီၤဒးဘီ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဖဲလါမးရှး ၂၈ သီအနံၤန့ၣ်လီၤ.
ရၤမတံကီၢ်ဆၣ်လၢတၢ်ဒုးအိၣ်ထီၣ်ဝဲခဲအံၤန့ၣ်အိၣ်ဝဲလၢတီနီၢ်မုၢ်ထီၣ်ဟီၣ်ကဝီၤအပူၤအံၤ တၢ်ပၥ်ပနီၣ်ဝဲဒူသဝီကရူၢ်ဒ်အမ့ၢ် နိၣ်ဖိကရူၢ်, မၠၣ်ဝတံၣ်ကရူၢ်,ဖလူကရူၢ်, သ့ၣ်ဘီဘိကရူၢ်,ဆိၣ်စံမၠဲၣ်ကရူၢ်,မီခံကရူၢ်ဒီး ခၠူးကလံကရူၢ်သ့ၣ်တဖၣ်အံၤဒီး ဘၣ်တၢ်စးထီၣ်သူၣ် ထီၣ်ဝဲတၢ်ပၢတၢ်ြပးလံန့ၣ်လီၤ.
ခီကရဲးတၢ်အိၣ်ဖှိၣ်လၢဘၣ်တၢ်မၤဝဲအဆိကတၢၢ်တဘျီအံၤဘၣ်တၢ်စးထီၣ်မၤဝဲဖဲအပူၤကွံၥ်လါမးရှး ၂၃ သီ တုၤ ၂၅ သီလၢသၢသီ အတီၢ်ပူၤဒီး ဘၣ်တၢ်ဃုထၢထီၣ်ဝဲထီဘိကမံးတံၥ်ပှၤမၤတၢ်ဖိသ့ၣ်တဖၣ်န့ၣ်လီၤ.
လၢခီကရဲးဘျီဝဲအံၤအပူၤခၢၣ်စးလၢအဒိးဃုထၢသးအိၣ်ဝဲ(၁၅၉)ဂၤဒီး ဖဲန့ၣ်တၢ်က့ၤဃုထၢထီၣ်က့ၤဝဲ ကီၢ်ဆၣ်ထီဘိကမံးတံၥ်ဖိ(၃၁)ဂၤ န့ၣ်လီၤ.
ဖဲန့ၣ်ဝံၤတၢ်က့ၤဃုထၢထီၣ်က့ၤဝဲဒိၣ်(၄)ဒိၣ်လၢအမ့ၢ် ရၤမတံကီၢ်ဆၣ်ခိၣ်န့ၣ် ပဒိၣ်စီၤဖၣ်ထယါ, ကီၢ်ဆၣ်ခိၣ်-၂ န့ၣ် သုးခိၣ်ဒိၣ်ဂီၢ်ဂ့ၢ် စီၤကိၤကိၤ(ကိး)စီၤဒးဘီ, ကီၢ်ဆၣ်နဲၣ်ရွဲၣ် ပဒိၣ်စီၤဟဲခုၣ်, ကီၢ်ဆၣ်နဲၣ်ရွဲၣ်သဃဲၤ ပဒိၣ်နီၢ်အဲၣ်ထူစ့ ဒီးစံၣ်ညီၣ်ကွီၢ်ခိၣ် ပဒိၣ်စီၤအဲၣ်ကီၢ်သီ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတၢ်ဃုထၢပၥ်ထီၣ်စ့ၢ်ကီးဝဲၤကျိၤခိၣ်လၢအမ့ၢ် ကညီဆူၣ်ချ့မၤစၢၤဝဲၤကျိၤ,ကီၢ်သူလ့ၤစံၥ်ပှဲၤသူၣ်ဖျးဝဲၤကျိၤ, ကီၢ်သူလ့ၤ သ့ၣ်ပှၢ်ဝဲၤကျိၤ,ခိသွဲကျိၣ်စ့ဝဲၤကျိၤ,ဝံစိၥ်တီဆှၢဒီးတၢ်ဆဲးကျိးကျဲဝဲၤကျိၤ,ကီၢ်သူလ့ၤဘုၣ်ဖီၣ်မၤညၣ်ဝဲၤကျိၤဒီး ကညီဒီကလုၥ်ပၢၤကီၢ်သုး (KNPF)တဖၣ်အံၤအဝဲကျိၤခိၣ်ဒၣ်ဝဲစုၥ်စုၥ်တၢ်ဃုထၢထီၣ်ဝဲန့ၣ်လီၤ.
တကးဒံးဘၣ်တၢ်ကရၢကရိထီၣ်ဒီးတၢ်ဟ့ၣ်လီၤဝဲစံၣ်ညီၣ်ပီတ့ကမံးတံၥ် ,ထံရူၢ်ကီၢ်သဲးဒီးရိၣ်ဖှိၣ်ကမံးတံၥ်အမူအဒါဒီး ဒ်န့ၣ်အသိး တၢ်မၤ ကမံးတံၥ်လၢအိၣ်ဖဲထံရူၢ်ကီၢ်သဲးဒီးရိၣ်ဖှိၣ်ကမံးတံၥ်တၢ်တီခိၣ်ရိၣ်မဲအဖီလၥ်သ့ၣ်တဖၣ်န့ၣ်မ့ၢ်ဝဲ ထံရူၢ်ကီၢ်သဲးတၢ်မၤကတံးတံၥ်, တၢ်ဟ့ၣ်တၢ်သ့ၣ်ညါဒီးရိၣ်ဖှိၣ်ဃူဖိးတၢ်မၤကတံးတံၥ်,တၢ်ဃုထံၣ်သ့ၣ်ညါတၢ်မၤကမံးတံၥ်,တၢ်မၤနီၣ်ဒီးတၢ်ပၥ်ကီၤတၢ်မၤကတံးတံၥ်,ဒီး တၢ်ရ့လိၥ်ဆဲးကျိးကမျၢၢ်ဒီးတၢ်ဘိးဘၣ်ရၤလီၤတၢ်မၤကတံးတံၥ်,ကညီပိၥ်မုၣ်ကရၢ(K.W.O), ကညီသးစၢ်ကရၢ(K.Y.O), ကီၢ်သူလ့ၤပှၤမၤ တၢ်ဖိကရၢစၢဖှိၣ်(F.T.U.K) သ့ၣ်တဖၣ်န့ၣ်လီၤ.
ဒူပျၥ်ယၥ်ကီၢ်ရ့ၣ်ပူၤအပူၤကွံၥ်ကီၢ်ဆၣ်အိၣ်ဝဲ(၄)ဘ့ၣ်လၢအမ့ၢ်ဝီၢ်ရ့ၣ်ကီၢ်ဆၣ်,နိၣ်တကီကီၢ်ဆၣ်,ကြုၢ်တုကီၢ်ဆၣ်ဒီးကီးတရံးကီၢ်ဆၣ် လီၤဘၣ်ဆၣ် စးထီၣ်ဖဲလါမးရှး ၂၈ သီအံၤဘၣ်တၢ်က့ၤဒုးအိၣ်ထီၣ်ကဒါဝဲရၤမတံကီၢ်ဆၣ်တဘ့ၣ်အဃိ ခဲအံၤကီၢ်ဆၣ်ခဲလၢၥ်အိၣ်ဝဲ (၅)ဘ့ၣ်လံန့ၣ်လီၤ.
ပဒိၣ်စီၤဖၣ်ထယါလၢအကဲထီၣ်ကဒါရၤမတံကီၢ်ဆၣ်ခိၣ်ခဲအံၤန့ၣ်တချုးတၢ်ဃုထၢထီၣ်အီၤဒံးဘၣ်အခါမ့ၢ်တ့ၢ်ဝဲကီးတရံးကီၢ်ဆၣ်ခိၣ် တဂၤဒီး ခဲအံၤတၢ်ဃုထၢထီၣ်က့ၤအီၤလၢရၤမတံကီၢ်ဆၣ်ခိၣ်ဘၣ်ဆၣ် လၢအလီၢ်ကီးတရံးကီၢ်ဆၣ်ခိၣ်န့ၣ်ဘၣ်တၢ်ဃုထၢထီၣ်က့ၤ ဝဲမတဂၤလဲၣ်န့ၣ် ခ့ၣ်အဲၣ်ယူၣ် ဘိးဘၣ်ရၤလီၤဝဲတအိၣ်ဒံးဘၣ်န့ၣ်လီၤ.
