လါယူၤ ၁၄ သီ, ၂၀၂၆ နံၣ်, ခ့ၣ်အဲးစံၣ်
လၢကီၢ်သူလ့ၤဟီၣ်ကဝီၤအပူၤ ဒ်သိးတၢ်မၤလံၣ်မၤလီ,တၢ်မၤဆါမၤပယွဲဒီး တရူးကလုၥ်အတၢ်ဒိၣ်စိသုကဟဲနုၥ်လီၤအိၣ်တဂ့ၤ အဂီၢ်န့ၣ် မူဒါအိၣ်ဝဲလၢကညီဖိခဲလၢၥ်ကဟံသကိးမူဒါ တြီဆၢမၤလီၤမၢ်သကိးအီၤတဲၥ်တဲၥ်ဖျုဖျုအဂ့ၢ်န့ၣ် ကညီပိၥ်မုၣ်ကရၢ (KWO)ထုးထီၣ်လံၥ်ဆီၣ်တခူထီၣ်ဝဲဖဲတနံၤအံၤကီၢ်သူလ့ၤမုၢ်နံၤဆၢက့ၤအပူၤန့ၣ်လီၤ.
ကီၢ်သူလ့ၤမုၢ်နံၤလၢ ကီၢ်ခိၣ်စီၤဘးအူကၠံဃုၥ်ဒီးကညီတၢ်ပၢၢ်ခိၣ်နၢ်တဖၣ်ဘိးဘၣ်ရၤလီၤတ့ၢ်ဝဲဖဲအပူၤကွံၥ်(၁၉၄၉)နံၣ် လါယူၤ ၁၄ သီ အံၤန့ၣ် တနံၤအံၤပှဲၤထီၣ်ဝဲ(၇၇)ဝီတဝီလံန့ၣ်န့ၣ်လီၤ. လၢကီၢ်သူလ့ၤမုၢ်နံၤဆၢက့ၤပှဲၤထီၣ်(၇၇)ဝီတဝီအဖီခိၣ်အံၤန့ၣ် လီၢ်ခၢၣ်သး ကညီပိၥ်မုၣ်ကရၢ(KWO) ထုးထီၣ်ဝဲလံၥ်တၢ်ဆၢဂ့ၤဆၢဝါတဘ့ၣ်ဆူကညီဖိခဲလၢၥ်အဂီၢ်အံၤန့ၣ်လီၤ.
ဒ်(KWO)အလံၥ်တၢ်ပၥ်ဖျါပူၤအသိးန့ၣ် မံၤကီၢ်သူလ့ၤမ့ၢ်ဝဲမံၤလုၢ်ဒိၣ်ပှ့ၤဒိၣ်လၢမိၢ်ပၢ်ဖံဖုဟ့ၣ်န့ၢ်သါပှၤအိၣ်ဒီးအခီပညီ, တၢ်မုၢ်လၢ် ကွၢ်စိလၢကီၢ်အံၤကပူၤဖျဲးဝဲဒီးတၢ်အၢတၢ်သီ,တၢ်သံၣ်သူမီၤကျၤအသိးအလီၢ်အိၣ်သပှၢ်ကတၢၢ်လၢပကဘၣ်သူၣ်ထီၣ်က့ၤကီၢ်သူလ့ၤလၢအလၢပှဲၤဝဲဒီးတၢ်တီတၢ်လိၤ,တၢ်စီတၢ်ဆှံ ပူၤဖျဲးဒီးတၢ်အၢတၢ်သီတဖၣ်အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးကီၢ်သူလ့ၤအံၤမ့ၢ်ဝဲမံၤတဖျၢၣ်လၢအဘၣ်ဃးဒီးဟီၣ်ခိၣ်ကပံၥ်,တၢ်အိၣ်တၢ်ဆိးလီၢ်ကျဲတကးဒံးဘၣ် ဒ်ပမ့ၢ်ကညီတက လုၥ်အသိး ပအိၣ်ဒီးတၢ်စံၣ်ညီၣ်ပၢလီၤသးဒၣ်ပဝဲဒီးကီၢ်ရ့ၣ်/သုးက့(၇)ဘ့ၣ်လၢကညီဖိအိၣ်ဆိးဝဲအံၤန့ၣ် မ့ၢ်ဝဲကညီဖိအဟီၣ်ခိၣ်တၢ် လီၢ်တၢ်ကျဲ,တၢ်န့ၢ်သါအဂ့ၢ်န့ၣ် (KWO)စံးစ့ၢ်ကီးဝဲန့ၣ်လီၤ.
တကးဒံးဘၣ်ကီၢ်သူလ့ၤဟီၣ်ကဝီၤအံၤဘၣ်တၢ်ပၢြပးတီခိၣ်ရိၣ်မဲအီၤလၢ(ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ)ဘၣ်ဆၣ် တမ့ၢ် အအိၣ်ထဲကညီကလုၥ်တဒူၣ်ဧိၤဘၣ်ဒီးမ့မ့ၢ်တခီကလုၥ်ဒူၣ်လၢအဂၤတဖၣ်အိၣ်ဆိးဝဲအါမးန့ၣ်လီၤ.လၢတၢ်န့ၣ်အဃိဒ်သိးကလုၥ်ဒူၣ်တဖၣ်အံၤကပလၢၢ်ဘၣ်ဝဲလၢအအိၣ်ဒီးတၢ်ခွဲးတၢ်ယၥ်,တၢ်တုၤသိးထဲသိးအဂီၢ်တၢ်ဒုးအိၣ်ထီၣ်ဝဲကီၢ်သူလ့ၤတၢ်တၢၣ်ပီၣ်တၢၣ်ပီကီၣ်ကး(KCC-Kawthoolei Consultative Council)အံၤဒီးလၢတၢ်ပၢတၢ်ြပးအဂီၢ်စ့ၢ်ကီးတၢ်ဒုးအိၣ်ထီၣ်ဝဲကီၢ်သူလ့ၤတၢ်ပၢ တၢ်ြပးကီၣ် ကး (KGC-Kawthoolei Goverming Council)အံၤန့ၣ်လီၤ.
လၢန့ၣ်အမဲၥ်ညါပှၤလၢအိၣ်လၢကီၢ်သူလ့ၤအပူၤတဖၣ် မ့ၢ်တအဲၣ်ဒိးနုၥ်လီၤပၥ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်ဘၣ်တဖၣ်ခီန့ၣ် ဒ်သိးအဝဲသ့ၣ်ကပၥ်ဖှိၣ်မၤသကိးတၢ်လၢအလီၢ်အကျဲသနၢၣ်ဒၣ်ဝဲကသ့အဂီၢ် လၢအဝဲသ့ၣ်အဂီၢ် ဘၣ်တၢ်ဒုးအိၣ်စ့ၢ်ကီးဝဲ(KCC)ဒီး (KGC)ဃုၥ်ဒီးဝဲၤကျိၤ(၇)ဘိအိၣ်ဝဲဒၣ်န့ၣ်လီၤ.
လၢတၢ်န့ၣ်အဃိကီၢ်သူလ့ၤလၢပအိၣ်ဆိးလၢအပူၤအံၤအမံၤသုတဘၣ်အၢဘၣ်သီ,ကပူၤဖျဲးဒီး တၢ်လံၣ်တၢ်လီ,တၢ်မၤလံၣ်မၤလီ, တၢ်မၤဆါ မၤပယွဲဒီး တရူးကလုၥ်အတၢ်ဒိၣ်စိသုတဟဲနုၥ်လီၤအိၣ်တဂ့ၤအဂီၢ်န့ၣ် မူဒါအိၣ်လၢကညီဖိခဲလၢၥ်အဟံသကိးမူဒါတြီဆၢ မၤလီၤမၢ် သကိးတၢ်အၢတၢ်သီတဖၣ်အံၤတဲၥ်တဲၥ်ဖျုဖျုအဂ့ၢ်န့ၣ် (KWO)ဆီၣ်တခူထီၣ် ဝဲန့ၣ်လီၤ.
ကီၢ်သူလ့ၤဟီၣ်ကဝီၤအပူၤလီၤဆီဒၣ်တၢ်ဒူပျၥ်ယၥ်ကီၢ်ရ့ၣ်(သုးက့ ၆)ဒီးဖၣ်အၣ်ကီၢ်ရ့ၣ်(သုးက့ ၇)တၢ်ပၢထံဆၢကီၢ်ဆၢ ဟီၣ်ကဝီၤ လၢ ခ့ၣ်အဲၣ်ယူၣ်စုတီၤဖီလၥ်ကရူၢ်ကရၢအမဲၥ်ညါ သုးမီၤစိရိၤစုတီၤဖီလၥ်ကညီဖီၣ်စုကဝဲၤကရူၢ်လၢအမ့ၢ် (DKBA),(BGF),(KNA) အိၣ်ဆိးဝဲလၢအပူၤအံၤ စးထီၣ်ဖဲ ၂၀၂၁ လီၢ်ခံ အံၤ ကၠါဖၠၣ်တၢ်ဖံးတၢ်မၤလၢအလံၣ်အီၣ်လီအီၣ်ဝဲပှၤကျိၣ်ပှၤစ့လၢ(အီၤလါ)ပူၤအံၤ ထံဂုၤကီၢ်ဂၤဖီၣ်ဃံးဝဲဘၣ်ဆၣ် ရၤလီၤအသး တုၤလၢခဲအံၤတလီၤမၢ်ဝဲဒံးဘၣ်န့ၣ်လီၤ.
ဒီးလၢ(ကၠါဖၠၣ်)တၢ်ဖံးတၢ်မၤအအၢအသီလၢအရၤလီၤသးသ့ၣ်တဖၣ်အံၤအဃိ ဒ်သိးကီၢ်သူလ့ၤမံၤသုတလီၤမၢ်တဂ့ၤအဂီၢ်စ့ၢ်ကီး လၢတၢ်ဒီ သဒၢမ့ၢ်ဂ့ၤ,တၢ်ပၢတၢ်ြပးမ့ၢ်ဂ့ၤဒီးထံရူၢ်ကီၢ်သဲးဂ့ၢ်ဝီ တကပၤမ့ၢ်ဂ့ၤ မူဒါအိၣ်လၢပဝဲကညီဖိကိးဂၤဒဲးကဟံထီၣ်ဖီၣ် ထီၣ် သကိး မူဒါလၢ ပလီၢ်သနၢၣ်ဒၣ်ဝဲအဂ့ၢ်န့ၣ် (KWO)ကညီပိၥ်မုၣ်ကရၢ ဆီၣ်တခူထီၣ်စ့ၢ်ကီးဝဲန့ၣ်လီၤ.
