လါယူၤလံ ၁၃ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ တၢ်ဒုးကဲထီၣ်တအိၣ်ပယီၤသုးခး လီၤကျိဖးဒိၣ်အဃိ ကမျၢၢ်သံဝဲ(၁)ဂၤဒီး ဟံၣ်ဟးဂီၤဝဲတဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်တလါအံၤလါယူၤထီၣ် ၅ သီ မုၢ်ထီၣ် ၁၁း၄၀ မံးနံးအဆၢကတီၢ်န့ၣ် ပယီၤသုးတြိၤ(၄၄)ဝဲၤလီၢ်ခိၣ်သ့ၣ်အံၤ ပညိၣ်ခးလီၤဝဲ (၁၂၀ မမ)ကျိဖးဒိၣ် ၄ ဖျၢၣ်ဆူဒူသဝီအပူၤန့ၣ်လီၤ.
ဒီးကျိဖးဒိၣ်လၢပယီၤသုးခးလီၤဝဲသ့ၣ်တဖၣ်အံၤလီၤတဲၥ်ပိၢ်ဖးထီၣ်ဝဲလၢတကွံပူၤကရူၢ် တကွံပူၤသဝီဃၢၤ ကျီးပူၤတၢ်ဖံးတၢ်အီၣ် မၤအီၣ်လီၢ်အဃိ (တဂေးချောင်းဖျား)သဝီဖိ စီၤစ့ၤကလါ(၄၄)နံၣ်လၢအဟဲမၤတၢ်မၤဖဲန့ၣ်တဂၤအံၤ ကျိဖးဒိၣ်အက့အခီဘၣ်ဝဲ အဟၢဖၢသံဝဲတဘျီဃီဖဲတၢ်ကဲထီၣ်သးန့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်လၢကျိဖးဒိၣ်အံၤအဃိ တကွံပူၤသဝီဖိ စီၤမိဒံ အဟံၣ်ခိၣ်ဘၣ်ဒိဘၣ်ထံးဖျိစ့ၢ်ကီးဝဲဒၣ်န့ၣ်လီၤ.
ကၠဲးထိၣ်ကီၢ်ဆၣ်ပူၤ ပယီၤသုးတြိၤဝဲၤလီၢ်ခိၣ်သ့ၣ်လၢအခးလီၤကျိဖးဒိၣ်အံၤအမဲၥ်ညါ ပယီၤသုးလၢအအိၣ်ဆီလီၤသးဖဲန့ၣ် သ့ၣ်တဖၣ် တၢ်ဒုးကဲထီၣ်အိၣ်ဂ့ၤ,တအိၣ်ဂ့ၤ ညီနုၢ်န့ၣ်ပညိၣ်ခးလီၤဝဲကျိဖးဒိၣ်ဆူ သဝီပူၤဒီးကမျၢၢ်တၢ်ဖံးအီၣ်မၤအီၣ်လီၢ်ကျဲ အိၣ်ဝဲခဲအံၤခဲအံၤန့ၣ်လီၤ.
ဒ်န့ၣ်အသိးခီဖျိလၢကျိဖးဒိၣ်အံၤဒီးကဘီယူၤအံၤအဃိစ့ၢ်ကီး လီၢ်ကဝီၤကမျၢၢ်သံဘၣ်ဒိဘၣ်ထံးဒီး ဟံၣ်,ကၠိ,သီခါဖၠၣ်တၢ်သူၣ်ထီၣ် ဟးဂီၤဘၣ်ဒိ ဘၣ်ထံးကဲထီၣ်အိၣ်ဝဲတလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
