လါယူၤလံ ၈ သီ, ၂၀၂၆ နံၣ်, ခ့ၣ်အဲးစံၣ်
စးထီၣ်ဖဲတဂီၤအံၤန့ၣ် လၢခံၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ရၤမတံဝ့ၢ်(မၠၣ်တဝံၣ်)ကလံၤထံးသဝီ တကပၤန့ၣ် တၢ်ဒုးကဲထီၣ်ဝဲလၢပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် အဘၢၣ်စၢၤ ဒိၣ်ဒိၣ်မုၢ်မုၢ် ဒီး ကျိချံတနီၤလီၤတဲၥ်ပိၢ်ဖးထီၣ်ဝဲလၢယိၤကီၢ်တကပၤအိၣ်ဝဲအဂ့ၢ်န့ၣ် ကၠီၣ်တဲၣ်တၢ်ကစီၣ် ထုးထီၣ် ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဒ်ကၠီၣ်တဲၣ်တၢ်ကစီၣ်ပူၤပၥ်ဖျါဝဲအသိးန့ၣ် စးထီၣ်ဖဲတနံၤလါယူၤလံ ၈ သီ မုၢ်ထူၣ်အဆၢကတီၢ်န့ၣ် လၢမ့လဲၣ်ပၤဒီးဖလူတကပၤ န့ၣ် ပယီၤသုးဒီး(KNLA)သုးပၥ်ဖှိၣ်တဖၣ်အံၤ ခံခီခံကပၤခးလိၥ်သးလၢကျိဒိၣ်,ကျိဖိဃုၥ်ဒီးဒြိသ့ၣ်တဖၣ်ဒီး လၢတၢ်ခးလိၥ်သးအပူၤ ကျိဒိၣ်,ကျိဆံးအချံတနီၤ လီၤတဲၥ်ဝဲလၢကီၢ်ကၠီၣ်တဲၣ် မဲၢ်ဆီးကီၢ်ဆၣ် မဲၢ်ကိၥ်က့သဝီတကပၤအဃိ ဘၣ်ဒိဘၣ်ထံးဝဲဟံၣ်အိၣ် အဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိတကီၢ်ခါခဲအံၤ လၢမ့လဲၣ်ပၤဒီးဖလူသဝီ သူမှဲကျိဝၢ်ခီ ကီၢ်ကၠီၣ်တဲၣ် မဲၢ်ကိၥ်က့တကပၤန့ၣ် ကၠီၣ်တဲၣ်သုးဟဲလီၤ မၤအါထီၣ်ဝဲ တၢ်ဘံၣ်တၢ်ဘၢ,ဟဲအိၣ်ခိးဝဲတၢ်ဒီးသုးသိလ့ၣ်တကးဒံးဘၣ်ဆီလီၤဃုၥ်ဝဲကျိဖးဒိၣ်သ့ၣ်တဖၣ်အိၣ်ဝဲအဂ့ၢ်န့ၣ် ကၠီၣ်တဲၣ်တၢ်ကစီၣ်ပူၤ ပၥ်ဖျါဝဲန့ၣ်လီၤ.
ပယီၤသုးအံၤလၢကထီၣ်ဒိၣ်စိက့ၤ ဖလူဒီးမ့လဲၣ်ပၤသဝီလၢအိၣ်ရၤမတံ(မၠၣ်ဝတံၣ်)ဝ့ၢ်ဃၢၤလၢခ့ၣ်အဲၣ်ယူၣ်ဒိၣ်စိဝဲအံၤအဂီၢ် ဖဲအပူၤကွံၥ်စှၤသီအခါ လၢဖၣ်အၣ်အံၤတဆီပယီၤသုးသိလ့ၣ်ဃုၥ်ဒီးသုးဂံၢ်ဘါလၢအကထိ ဟဲထီၣ်ဝဲအါအါဂီၢ်ဂီၢ်ဝံၤ နုၥ်လီၤဟံန့ၢ်အလီၢ်အကျဲလၢလ့က့ၣ်ကိၥ်ဟီၣ်ကဝီၤအပူၤအံၤန့ၣ်လီၤ.
ပယီၤသုးနီၣ်ဂံၢ်လၢအကထိလၢအဟဲထီၣ်အကျါပၣ်ဃုၥ်ဝဲ ပယီၤအသုးတြိၤ(၂၂),သုးတြိၤ(၄၄) (BGF)သုးခိၣ်စီၤမိၣ်သိၤ, သုးခိၣ် စီၤခၠ့ၣ်လိၤ အပှၤ ဒီး ဘူးဒးကညီသုးမုၢ်ဒိၣ်(DKBA)အပှၤပၣ်ဃုၥ်ဝဲအါအါဂီၢ်ဂီၢ်အဂ့ၢ်န့ၣ် (KNLA)တၢ်ပၢၢ်ဆၢသုးကရူၢ်တကပၤ စံးဝဲအသိး သ့ၣ်ညါဘၣ်န့ၣ်လီၤ.
ဖဲန့ၣ်ဝံၤလီၢ်ခံစးထီၣ်ဖဲမဟါလါယူၤလံ ၇ သီ တၢ်ခံးလီၤကဘၣ်ဖဲ(၉)နၣ်ရံၣ်ခိၣ်ဃၢၤအခါန့ၣ် လၢမ့လဲၣ်ပၤဒီးဖလူသဝီတကပၤန့ၣ် ကျိဖးဒိၣ်အကလုၢ်သီၣ်ထီၣ်ဝဲတပယူၥ်ဃီဒီးတနၤတုၤဃီၤဝဲလၢတနံၤအံၤလါယူၤလံ ၈ သီမုၢ်ဆ့ၣ်ထီၣ်အံၤဒီး ကျိသီအကလုၢ်သ့ၣ် တဖၣ် အံၤစ့ၢ်ကီးအက လုၢနၢ်ဟူတုၤလၢမဲၢ်ဆီးဝ့ၢ်ပူၤညါန့ၣ်လီၤ.
ဘၣ်ဃးပယီၤသုးပၥ်ဖှိၣ်အတၢ်ဟဲထီၣ်ဘျီဝဲအံၤန့ၣ် ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲ (KNLA) တၢ်ပၢၢ်ဆၢကရူၢ် ပှၤဘၣ်မူဘၣ်ဒါလၢအိၣ်ဘူးဖဲတၢ်ဒုးကဲထီၣ်အလီၢ်န့ၣ်တဂၤစံးဝဲလၢ “ပယီၤသုးအံၤဒ်သိးကမၤန့ၢ်ဝဲဖလူ,မ့လဲၣ်ပၤအဂီၢ်န့ၣ် ဂုၥ်ကျဲးစၢးဝဲသပှၢ်ကတၢၢ်လီၤ.အခဲအံၤပှၤကညီလၢအခိၣ်နူၥ်တအိၣ်ဘၣ်တဖၣ်န့ၣ် ပိၥ်ထီၣ်ဝဲပယီၤသုးအခံ ဘၣ်သးဟဲထီၣ်ခးပှၤ. မ့မ့ၢ်ဝဲဒၣ်ဒုရှဲရှဲလီၤ ပှၤမ့ဖီၣ်လိၥ်သးစုဒီးဒုၣ်ဒါ ဟဲထီၣ်ခးပှၤဒုမ့ၢ်ဒၣ်ပဒၣ်ပဒါလီၤ. ”အဂ့ၢ်န့ၣ်စံးဝဲန့ၣ်လီၤ.
တကီၢ်ခါခဲအံၤလ့က့ၣ်ကိၥ်အမဲၥ်ညါပယီၤသုးသ့ၣ်တဖၣ်အံၤလၢမၠၣ်ဝတံၣ်ပူၤ,ဝ့ၢ်ချၢတၢ်လီၢ်သ့ၣ်တဖၣ်န့ၣ် ပယီၤသုးနုၥ်လီၤ ဟံန့ၢ်လီၢ်ကျဲဝးဝးတရံးအဂ့ၢ်န့ၣ် သ့ၣ်ညါဘၣ်လၢပှၤလၢဘူးဒီး(BGF)တကပၤအအိၣ်န့ၣ်လီၤ.
