လါယူၤလံ, ၂၃သီ, ၂၀၂၆နံၣ် ခ့ၣ်အဲးစံၣ်
ကညီကီၢ်စဲၣ် ရမတံဝ့ၢ်ကလံၤထံး ကၠီးခဲးတၢ်လီၢ်ဟီၣ်ကဝီၤပူၤ ပှၤထံဂုၤကီၢ်ဂၤလၢမၤဝဲအီၣ်လဲတၢ်လံၣ်တၢ်လီ(ကၠါဖၠၣ်) အဂၤလၢအကထိတဖၣ်အံၤ ဖဲလါယူၤလံ, ၂၂သီအနံၤမုၢ်ဃ့ၢ်လီၤဆၢကတီၢ်န့ၣ် က့ၤသုးအသးဆူ တၢ်ဘၣ်ဘျုးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ် (DKBA) လီၢ်ခၢၣ်သးဟီၣ်ကဝီၤ ဖဲ (စိၣ်စံမၠဲၣ်) အဂ့ၢ်န့ၣ်သ့ၣ်ညါဘၣ်ဒ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တၢ်ကစီၣ်တဖၣ်ပၥ်ဖျါဝဲဒၣ်အသိးန့ၣ်လီၤ.
လၢရမတံကလံၤထံးတကပၤ သုးကရူၢ်မၤဝဲကလံၤကျါတၢ်ထီၣ်ဒုးဒိၣ်ဒိၣ်မုၢ်မုၢ်ဒီး လၢကၠီးခဲးဟီၣ်ကဝီၤပူၤစ့ၢ်ကီ ကဘီယူၤဟဲတ့ၢ်လီၤမ့ၣ်ပိၣ်ဝံၤအလီၢ်ခံ ပှၤထံဂုၥ်ကီၢ်ဂၤလၢအါတက့ၢ်ပၣ်ဃုၥ်ဝဲတရူးထံဖိကီၢ်ဖိလၢအပှၤ(ကၠါဖၠၣ်)တၢ်ဖံးတၢ်မၤတဖၣ် ဘၣ်တၢ်သုးကွံၥ်အလီၢ်အကျဲအဂ့ၢ်န့ၣ် လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဒ်လီၢ်အိၣ်ကမှံဖိလၢ ရမတံကလံၤထံး ကီၢ်ဆၢတနီၤစံးဝဲအသိး ဖဲလါယူၤလံ, (၂၃)သီအနံၤစ့ၢ်ကီး လၢကၠီးခဲးဟီၣ်ကဝီၤပူၤအံၤ သုးကရူၢ်တကပၤမၤကဒီးဝဲကလံၤကျါတၢ်ဒုးအဃိ တၢ်ဘၣ်ဒိဘၣ်ထံးဒီး တၢ်သံတၢ်ပှၢ်အိၣ်ဝဲဒၣ်န့ၣ်လီၤ. လၢတၢ်န့ၣ်အဃိ တနီၤနီၤဘၣ်ဃ့ၢ်အိၣ်ကဒုဝဲဒၣ်ဆူ ကၠီၣ်တဲၣ်တကပၤအဂ့ၢ် လီၢ်အိၣ်ကမှံတဖၣ်စံးဝဲဒၣ်န့ၣ်လီၤ.
ကၠီးခဲးဟီၣ်ကဝီၤလၢ အိၣ်ယံၤလိၥ်သးဒီး (စိၣ်စံမၠဲၣ်) (၁၆)ကံလိမံထၢၣ်ဃၣ်ဃၣ်အံၤ မ့ၢ်တၢ်လီၢ်တခါလၢ (DKBA) ပၢဝဲဒီး ခီဖျိလၢတၢ်လံၣ်တၢ်တလီ(ကၠါဖၠၣ်)တၢ်လဲၤတရံးသးအဃိ ဖဲအပူၤကွံၥ် လါအ့ဖြ့ၣ်အတီၢ်ပူၤန့ၣ် အမဲရကၤထံဂုၤကီၢ်ဂၤကိတိၥ်ဝဲၤကျိၤ ထုးထီၣ်ပၥ်ဖျါဝဲလၢ ပှၤလၢအမ့ၢ်ဟ့ၣ်တၢ်ကစီၣ်,တၢ်ဂ့ၢ်တၢ်ကျိၤ ဘၣ်ဃးတၢ်လံၣ်တၢ်လီ(ကၠါဖၠၣ်)အံၤ တၢ်ကဟ့ၣ်အီၤစ့ အိၣ်ဝဲဒၣ်န့ၣ်လီၤ.
ဒ်န့ၣ်အသိး တၢ်လံၣ်တၢ်လီ(ကၠါဖၠၣ်)ဃုၥ်ဒီး ခီကီၢ် တၢ်မၤကမၣ်ကွီၢ်မ့ၣ် ဒ်အံၤတဖၣ် အမဲရကၤလီၢ်ခၢၣ်သးတၢ်သမံသမိးကရူၢ် (FBI) ဒီးကၠီၣ်တဲၣ်ပဒိၣ်ပှၢ် ဘၣ်မူဘၣ်ဒါတဖၣ် စီၣ်မဲၥ်စီၣ်နါဝဲလၢတၢ်ဂ့ၢ်ဝဲအံၤဒီး မၤဝဲတၢ်ထံၣ်လိၥ်တဲသကိးအိၣ်အဂ့ၢ် သ့ၣ်ညါဘၣ်ဒ် ကၠီၣ်တဲၣ်တၢ်ကစီၣ်တနီၤပၥ်ဖျါဝဲအသိးန့ၣ်လီၤ.
တကီၢ်ခါခဲအံၤ ကၠီးခဲးဟီၣ်ကဝီၤပှၤမၤ(ကၠါဖၠၣ်)တၢ်လံၣ်တၢ်လီတဖၣ် ဘၣ်ဃးဒီးအတၢ်သုးလီၢ်သုးကျဲအံၤန့ၣ် ဒ် (BBC) တၢ်ကစီၣ်အပူၤပၥ်ဖျါထီၣ်ဝဲဒၣ် ဖဲလါယူၤလံ,၂၂သီအနံၤအသိးန့ၣ် ကၠီးခဲးသဝီပူၤ(ကၠါဖၠၣ်)တၢ်လံၣ်တၢ်လီတၢ်မၤတဖၣ် တချုးလၢ လါယူၤလံ, ၂၈သီအနံၤန့ၣ် ကဘၣ်ဟးထီၣ်ဝဲအဂ့ၢ်န့ၣ် (DKBA) ထုးထီၣ်တၢ်ကလုၢ်အိၣ်ဝဲဒၣ်န့ၣ်လီၤ.
ဘၣ်ဃးဒီး ကၠီးခဲးဟီၣ်ကဝီၤပူၤ ကဘီယူၤတၢ်တ့ၢ်လီၤမ့ၣ်ပိၣ်အဃိ တၢ်ဘၣ်ဒိဘၣ်ထံး,တၢ်သံတၢ်ပှၢ်အိၣ်ဝဲအဂ့ၢ်ဒီး တၢ်လံၣ်တၢ်လီ(ကၠါဖၠၣ်) တၢ်သုးလီၢ်သုးကျဲ တၢ်နဲၣ်လီၤတၢ်ကလုၢ်အဂ့ၢ်အံၤန့ၣ် ခ့ၣ်အဲၣ်စံၣ်-ကညီတၢ်ကစီၣ် ဆဲးကျိးသံကွၢ်ဝဲဒီး (DKBA) ပှၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်ဒံးဘၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ် လါယူၤလံ, (၉) သီအနံၤန့ၣ် သုးကရူၢ်ဒီး (DKBA) ခိၣ်နၢ်ဒိၣ်ထီတဖၣ် မၤတၢ်ထံၣ်လိၥ်သးလၢ (န့ၣ်ပၠံၣ်တီၣ်)အိၣ်ဝဲန့ၣ်လီၤ.
လၢတၢ်အိၣ်ဖှိၣ်ဘျီဝဲအံၤ သုးကရူၢ်တကပၤစံးဘၣ် (DKBA) လၢ ဘၣ်ဃးဒီး(ကၠါဖၠၣ်)တၢ်ဖံးတၢ်မၤန့ၣ် သုတပၣ်ဃုၥ်တဂ့ၤအဂ့ၢ်, ဂီၤလ့ၤ, ကၠီးခဲးဒီး ဃိၣ်သၢဖျၢၣ်ကဘၣ်ပူၤဖျဲးဒီး (ကၠါဖၠၣ်)တၢ်ဖံးတၢ်မၤအဂီၢ်ကဘၣ်ရဲၣ်ကျဲၤဝဲအဂ့ၢ်, ကညီကီၢ်စဲၣ် တၢ်ဒုးတၢ်ယၤတဖၣ်အပူၤ ကဘၣ်ပၥ်ဖှိၣ်မၤသကိးတၢ်အဂ့ၢ် သုးကရူၢ်တၢ်ကစီၣ်သန့တကပၤ ပၥ်ဖျါထီၣ်ဝဲဒၣ်အိၣ်န့ၣ်လီၤ.
