မဲၢ်ဆီးဝ့ၢ်ပူၤတၢ်နုၥ်လီၤဖီၣ်ပှၤလၢ မၤန့ၢ် ပှၤ အနံၣ် ၁၀ခိၣ်ဂီၤလၢတဖိးသဲစး

လါယူၤလံ ၄သီ, ၂၀၂၆နံၣ်, ခ့ၣ်အဲးစံၣ်

ကီၢ်ကၠီၣ်တဲၣ် တး(ခ်)ကီၢ်ရ့ၣ် မဲၢ်ဆီးဝ့ၢ်ဟီၣ်ကဝီၤပူၤ ဘၣ်ဃးဒီး ပှၤလၢအထုးထီၣ်တ့န့ၢ်ဝဲ အနံၣ်(၁၀)ခိၣ်ဂီၤ (Zero Head Card)လၢအတဖိးဒီးသဲစးတၢ်ဘျၢ ဃုၥ်ဒီးပှၤလၢအဟးကူၣ်မၤကၤပှၤကညီတဖၣ် ဖဲတနံၤအံၤလါအီကူး, ၄သီ ဂီၤခီအဆၢကတီၢ် ကၠီၣ်တဲၣ်ပှၤဘၣ်မူဘၣ်ဒါ ပှၤဂံၢ်ဘါ (၁၃၀) ဂၤ စးထီၣ်မၤဝဲတၢ်သမံသမိးဒီး ဖီၣ်ဝဲအဂ့ၢ် သ့ၣ်ညါဘၣ်ဒ် ကၠီၣ်တဲၣ်ပှၤဘၣ်မူဘၣ်ဒါတဖၣ်ပၥ်ဖျါထီၣ်ဝဲဒၣ်အသိးန့ၣ်လီၤ.

ဘၣ်ဃးဒီးတၢ်သမံသမိးအပူၤ လံၥ်ဖီၣ်တၢ် (၁၃) ခါ ပှၤလၢတၢ်လိၣ်ဘၣ်အီၤ (၂) ခါ တဖၣ် ဘၣ်တၢ်ပညိၣ်ဒီးဖီၣ်ဝဲအဂ့ၢ်ဒီး မဲၢ်ဆီး Municipal (ထံၣ်စပါ) ရူ ဟံၣ်စရီခိၣ်ဂီၤဝဲၤကျိၤပှၤမၤတၢ်ဖိလီၢ်လံၤ(၁)ဂၤဒီး တကီၢ်ခါခဲအံၤ ပှၤမၤတၢ်ဖိ(၂) ဂၤဃုၥ်ဒီး ထံဂုၥ်ကီၢ်ဂၤ (၁၂) ဂၤပၣ်ဃုၥ်ဝဲအဂ့ၢ်ပၥ်ဖျါဝဲဒၣ်န့ၣ်လီၤ.

လၢန့ၣ်အမဲၥ်ညါ တၢ်မၤတၢ်သမံသမိးတဂီၤအံၤ ကၠီၣ်တဲၣ်ပဒိၣ်ပှၤမၤတၢ်ဖိ (၃) ဂၤအကျါတၢ်ဖီၣ်န့ၢ်အီၤ (၂) ဂၤဒီး အမံၤလၢ (ခဲၣ်) တဂၤန့ၣ် ဃ့ၢ်ပူၤဖျဲးသးလၢ ကီၢ်ပယီၤကီၢ်ဆၢ BGF တၢ်ပၢဟီၣ်ကဝီၤအဂ့ၢ်သ့ၣ်ညါဘၣ်န့ၣ်လီၤ.

ဒ်န့ၣ်အသိး ပှၤလၢဘၣ်တၢ်အိးထီၣ်တၢ်မူးတၢ်ရၢ်(၂)ဂၤန့ၣ်မ့ၢ်ဝဲ ပှၤလၢအုၣ်ကီၤန့ၢ်ပှၤအဂၤ လၢကမၤနံၣ်၁၀ခိၣ်ဂီၤ လၢအဝဲသ့ၣ်ဟံၣ်ခိၣ်စရီအပူၤဒီး ပှၤကီၢ်ပယီၤဖိလၢ အစိၥ်ဝဲခိၣ်ဂီၤအယီၤအဘျၣ် (၁၂) ဂၤစ့ၢ်ကီး ဖဲတၢ်သမံသမိ အစုတၢ်ပနီၣ်ခါဖျါထီၣ်ဝဲလၢအဝဲသ့ၣ်အိၣ်ဒီး ကီၢ်ပယီၤ(Passport) အဂ့ၢ်သ့ၣ်ညါဘၣ်န့ၣ်လီၤ.

ဒ်တၢ်သမံသမိး ပှၤလၢတၢ်ဖီၣ်အီၤတဖၣ်စံးဝဲအသိး အဝဲသ့ၣ်ထုးထီၣ်န့ၢ်ဝဲအနံၣ်(၁၀)ခိၣ်ဂီၤ လၢတဖိးသဲစးတၢ်ဘျၢအံၤ ပှၤနီၣ်ဂံၢ်အိၣ်လၢ (၇၀၀) ဘျဲၣ်ဃၣ်ဃၣ်အသိး ပှၤတဂၤန့ၣ်ဃ့ဝဲစ့ယိၤအိၣ်လၢ (၄၀,၀၀၀)ဘး တုၤ (၁၀၀,၀၀၀)ဘး အဂ့ၢ် သ့ၣ်ညါဘၣ်န့ၣ်လီၤ.

တကီၢ်ခါခဲအံၤ မဲၢ်ဆီးဝ့ၢ်ဟီၣ်ကဝီၤပူၤ အနံၣ်(၁၀)ခိၣ်ဂီၤလၢဘၣ်တၢ်မၤအီၤဖဲ ၂၀၂၃နံၣ်ဆူအလီၢ်ခံ တဖၣ်အါတက့ၢ်န့ၣ် ဘၣ်တၢ်တြူၥ်သံကွံၥ်အီၤအဂ့ၢ် သ့ၣ်ညါဘၣ်န့ၣ်လီၤ.

ဖဲတနံၤအံၤကီၢ်ကၠီၣ်တဲၣ်ပှၤဘၣ်မူဘၣ်ဒါမၤဝဲဒၣ် တၢ်ကတိၤရှဲလဲတၢ်ဒီးတၢ်ကစီၣ်အဆၢကတီၢ် စံးဝဲဒၣ်လၢ လၢတၢ်ကထီဒါဝဲဒၣ် တၢ်အီၣ်ကဘျံးကဘျၣ်ကျိၣ်စ့လၢ တၢ်မၤန့ၢ် ပှၤအနံၣ်(၁၀)ခိၣ်ဂီၤအဖီခိၣ်အဂီၢ် ကဟးသမံသမိးဃံးထီၣ်ဝဲဒၣ် ကီၢ်ဆၢ တၢ်ထုးထီၣ်န့ၣ် ပှၤခိၣ်ဂီၤဝဲၤဒၢးသ့ၣ်တဖၣ်အဂ့ၢ် စံးဝဲဒၣ်န့ၣ်လီၤ.

ဒ်န့ၣ်အသိး တနံၤအံၤ ဘၣ်ဃးဒီးတၢ်သမံသမိးအံၤ တး(ခ်) ကီၢ်ရ့ၣ်ပၢၤကီၢ်ခိၣ်ခံ (သထီဖိၣ်ယီထီ) တီခိၣ်ရိၣ်မဲဒီးမၤဝဲဒီး မဲၢ်ဆီးဝ့ၢ်ပၢၤကီၢ်တဖၣ်, တး(ခ်) ကီၢ်ရ့ၣ် တၢ်ခီထံခီကီၢ်ပှၤဘၣ်မူဘၣ်ဒါတဖၣ်, ပှၤဂ့ၢ်ဝီတၢ်ပၢဆှၢရဲၣ်ကျဲၤဝဲၤကျိၤ, တၢ်ဃုထံၣ်သ့ၣ်ညါတၢ်လီၤဆီဝဲၤကျိၤ (DSI), တၢ်ဒုးထီဒါတၢ်မၤလၢတတီတတြၢ်ခီၣ်မၢၣ်ရှၢၣ်, တၢ်ထီဒါတၢ်အီၣ်ကဘျံးကဘျၣ်ကျိၣ်စ့ရူ ပှၤဘၣ်မူဘၣ်ဒါ တဖၣ်ပၣ်ဃုၥ်ဝဲအဂ့ၢ်သ့ၣ်ညါဘၣ်န့ၣ်လီၤ.