လါအီကူး ၅ သီ, ၂၀၂၆ နံၣ်, ခ့ၣ်အဲးစံၣ်
ကညီစၢၤသွဲၣ်သီခိၣ်နၢ်ဒီးခ့ခါဆၢကတီၢ်သးစၢ်ခိၣ်နၢ်တဖၣ် ကသ့ပၥ်ဖှိၣ်မၤသကိးတၢ်လၢခါဆူညါပှၤကလုၥ်တၢ်ဖံးတၢ်မၤတၢ်လဲၤ ထီၣ်လဲၤထီအဂီၢ် (Karen Intergenerational Leadership Conference – KILC) စိၤအါစိၤကညီခိၣ်နၢ်တၢ်ကူၣ်လိၥ် အိၣ်ဖှိၣ်လၢတၢ်ကဆဲးမၤဝဲ(၃)ဝီတဝီအံၤန့ၣ် တၢ်စးထီၣ်ကိးဒီးပတံထီၣ်မံၤသ့ဝဲလံ အဂ့ၢ်န့ၣ် ကရူၢ်အံၤထုးထီၣ် ဒုးသ့ၣ်ညါလီၤဝဲ ဖဲလါအီကူး ၃ သီအံၤ န့ၣ်လီၤ.
(Karen Intergenerational Leadership Conference – KILC)စိၤအါစိၤကညီခိၣ်နၢ်တၢ်ကူၣ်လိၥ်အိၣ်ဖှိၣ်လၢတၢ်ကမၤဝဲ တဘျီအံၤ အတၢ်တိၤထူအခိၣ်တီလၢအမ့ၢ် ခီဂၥ်တိၤ-သူၣ်ထီၣ်သကိးကီၢ်သူလ့ၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကဟဲတၢ်ထံၣ်လိၥ်အိၣ်ဖှိၣ်ဘျီဝဲအံၤအပူၤ ကညီသူၣ်ဘီၣ်သးစၢ်လၢအိၣ်တၢ်လီၢ်တပူၤဂ့ၤတပူၤဂ့ၤ မ့အဲၣ်ဒိးဟဲထီၣ်ပၣ်ဃုၥ်ပၣ် ဂီၢ်န့ၣ် စးထီၣ်ဖဲတလါအံၤလါအီကူးထီၣ် ၃ သီအံၤ ပတံထီၣ်မံၤသ့ဝဲလံဒီး လံၥ်ပတံထီၣ်မံၤအံၤတၢ်ကဆိကတီၢ်ကွံၥ်အီၤဖဲ ၃၁ သီ လါအီးကူးလၢၥ်အံၤအဂ့ၢ်န့ၣ် သ့ၣ်ညါဘၣ်လၢကရူၢ်အတၢ်ထုးထီၣ်ဘိးဘၣ်သ့ၣ်ညါအပူၤန့ၣ်လီၤ.
ဒ်န့ၣ်အသိး(KILC)စိၤအါစိၤကညီခိၣ်နၢ်တၢ်ကူၣ်လိၥ်အိၣ်ဖှိၣ်လၢအပူၤကွံၥ်နံၣ်တၢ်မၤဝဲဖဲကီၢ်သူလ့ၤဟီၣ်ကဝီၤအပူၤအံၤ တနံၣ်အံၤစ့ၢ်ကီးတၢ်ကရဲၣ်ကျဲၤမၤအီၤဖဲ ခ့ၣ်အဲၣ်ယူၣ် ကီၢ်သူလ့ၤဟီၣ်ကဝီၤပူၤဒီး တၢ်ကမၤဝဲဖဲလါစဲးပထ့ဘၢၣ်အတီၢ်ပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
(KILC)စိၤအါစိၤကညီခိၣ်နၢ်တၢ်ကူၣ်လိၥ်အိၣ်ဖှိၣ်ဖးဒိၣ်လၢခ့ၣ်အဲၣ်ယူၣ် တီခိၣ်ရိၣ်မဲမၤဝဲအံၤန့ၣ် ဒ်သိးကညီသူၣ်ဘီၣ်သးစၢ်ဒီး ခိၣ်နၢ်သီသ့ၣ်တဖၣ်အတၢ်ဆဲးကျိးကဂ့ၤထီၣ်, စၢၤသွဲၣ်သီခိၣ်နၢ်သီဒီးကတီၢ်ခါခိၣ်နၢ်တဖၣ်ကဟ့ၣ်ခီဟ့ၣ်နီၤလိၥ်သးအတၢ်လဲၤ ခီဖျိ,အတၢ်သ့တၢ်ဘၣ်ဒီးကသ့ပၥ်ဖှိၣ်မၤသကိးတၢ်လၢပှၤကလုၥ်တၢ်ဖံးတၢ်မၤတၢ်လဲၤထီၣ်လဲၤထီအဂီၢ် ဘၣ်တၢ်ဒုးအိၣ်ထီၣ်ရဲၣ်ကျဲၤ မၤဝဲ တၢ်အိၣ်ဖှိၣ်အံၤ န့ၣ်လီၤ.
အပူၤကွံၥ်တၢ်အိၣ်ဖှိၣ်အဆိတတၢၢ်တဘျီအခါန့ၣ် ဘၣ်တၢ်မၤတ့ၢ်အီၤဖဲအပူၤကွံၥ်(၂၀၂၄)လါမ့ၤအခါဒီး (၂)ဝီတဝီအခါန့ၣ် ဘၣ်တၢ်မၤတ့ၢ်ဝဲဖဲ(၂၀၂၅)လါနိၣ်ဝ့ဘၢၣ် ၈ သီတုၤ ၁၀ သီလၢသၢသီအတီၢ်ပူၤန့ၣ်လီၤ.
ဒီးလၢတၢ်မၤတ့ၢ်ဝဲတၢ်အိၣ်ဖှိၣ်အခါန့ၣ်စ့ၢ်ကီး ခ့ၣ်အဲၣ်ယူၣ် လီၢ်ခၢၣ်သးခိၣ်နၢ်, ကညီဂံၢ်ခီၣ်ထံး/ပှၤတဝၢတၢ်ကရၢကရိ ဒီး ကီၢ်ပူၤ ကီၢ်ချၢထံဆၢကီၢ်ဆၢကညီသူၣ်ဘီၣ်သးစၢ် ပှၤနီၣ်ဂံၢ်တစှၤန့ၢ်(၁၀၀)ဃၣ်ဃၣ် လဲၤထီၣ်ပၣ်ဃုၥ်ပၣ်ဂီၢ် တၢၣ်ပီၣ်တဲသကိး, ဟ့ၣ်ခီ ဟ့ၣ်နီၤလီၤအဝဲသ့ၣ်အတၢ်ထံၣ်, တၢ်သ့တၢ်ဘၣ်,တၢ်လဲၤခီဖျိဒီး ခါဆူညါကီၢ်သူလ့ၤတၢ်ဖံးတၢ်မၤအတၢ်ဒိၣ်ထီၣ်လဲၤထီၣ် လဲၤထီ အဂ့ၢ်သ့ၣ်တဖၣ်န့ၣ်လီၤ.
ဒ်န့ၣ်အသိးလၢကဟဲလါစဲးပထ့ဘၢၣ်(၃)ဝီတဝီတၢ်အိၣ်ဖှိၣ်အံၤအပူၤန့ၣ် လၢပှၤကလုၥ်ခါဆူညါတၢ်ဖံးတၢ်မၤအဂီၢ် ဒ်သိးပှၤအါဂၤ ကသ့ပၥ်ဖှိၣ်ဖီၣ်လိၥ်စုမၤသကိးတၢ်အဂံၢ်ကဆူၣ်ထီၣ်အဂီၢ် ကတၢၣ်ပီၣ်တဲသကိးဟ့ၣ်ခီဟ့ၣ်နီၤလီၤဝဲ တၢ်သ့တၢ်ဘၣ်, တၢ်လဲၤခီဖျိ ဒီးတၢ်ကက့ၤပဲၥ်ထံနီၤဖးက့ၤတၢ်ဂ့ၢ်တၢ်ကျိၤ သ့ၣ်တဖၣ်အဂ့ၢ်န့ၣ် ကရူၢ်အံၤစံးဝဲန့ၣ်လီၤ.
ညီနုၢ်ကိးဘျီဒဲး(KILC)တၢ်အိၣ်ဖှိၣ်လၢ အအိၣ်ဒီးတၢ်ပၥ်ပနီၣ်ပှၤနီၣ်ဂံၢ်စရီအံၤန့ၣ် ဒီးလၢ(၃)ဝီတဝီအံၤစ့ၢ်ကီး ပှၤသူၣ်ဘီၣ်သးစၢ် လၢအဟဲထီၣ် ပၣ်ဃုၥ်ပၣ်ဂီၢ်လၢတၢ်အိၣ်ဖှိၣ်အံၤတဖၣ် ကဘၣ်မ့ၢ်သးစၢ်(၂၀)နံၣ်ဆူဖီခိၣ်,ကဘၣ်အိၣ်ဒီးတၢ်သ့တၢ်ဘၣ်တခါခါ, ကဘၣ်အိၣ်ဒီးတၢ်လဲၤခီဖျိလၢတၢ်ဖံးတၢ်မၤပူၤ, သးလၢအအဲၣ်ဒိးပၣ်ဃုၥ်မၤသကိးတၢ်လၢ ကညီတၢ်ပၢၢ်ဆၢဒီး ကီၢ်သူလ့ၤတၢ်ဖံး တၢ်မၤအပူၤတကးဒံးဘၣ် အစှၤကတၢၢ်ကဘၣ်မ့ၢ်ပှၤလၢအသ့ၣ်ညါဝဲကညီတၢ်ပၢၢ်ဆၢအတၢ်လဲၤခီဖျိတၢ်အိၣ်သးအဂ့ၢ်အကျိၤဒီး ကဘၣ်ထီၣ်ဝဲတၢ်အိၣ်ဖှိၣ်လၢတၢ်သူၣ်ဆူၣ်သးဂဲၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
