လါအီကူး ၂၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်ဟီၣ်ကဝီၤအပူၤ ပယီၤသုးလၢနုၥ်လီၤအိၣ်ဖဲ မစီၢ်(မဇော)ကရူၢ်ပူၤအံၤတဖၣ် တၢ်နုၥ်လီၤခးဝဲအဃိ မၤန့ၢ်ဝဲကျိ(၄)ခိၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲ ဖဲမဟါအံၤ န့ၣ်လီၤ.
ဖဲလါအီကူး ၂၄ သီ ဟါခီ ၂း၀၀ အဆၢကတီၢ်န့ၣ် ပယီၤသုးလၢနုၥ်လီၤအိၣ်ဖဲမစီၢ်(မဇော)ကရူၢ် တူၢ်ပၠီၣ်(တုံးဗျော)သဝီဃၢၤတဖၣ် အံၤ တၢ်ဘၣ်တၢ်နုၥ်လီၤခးအဝဲသ့ၣ်လၢဟီၣ်ကဝီၤ ကညီဒီကလုၥ်ဂၢၤသးကရၢ(KNDO) သုးရ့ၣ်-၇ သုးဒ့(၃)အပှၤအံၤန့ၣ်လီၤ.
ဒီးဖဲတၢ်နုၥ်လီၤခးဝဲပယီၤသုးဘျီဝဲအံၤန့ၣ် တၢ်မၤန့ၢ်ဝဲ MA(၁)ခိၣ်, MA-2 (၂)ခိၣ် ဒီး MA-11 (၁)ခိၣ်ဃုၥ်ဒီး ကျိချံကျိသၣ် သုးတၢ်ပီးတၢ်လီလၢအဂၤတနီၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဖဲအပူၤကွံၥ်လါမ့ၤ ၂၉ သီအနံၤန့ၣ်စ့ၢ်ကီး လၢၢ်ဖးဒိၣ်ပယီၤသုးကလၢၤလၢအအိၣ်ဆီလီၤသးဖဲ လၢၢ်မုၢ်လါကီၢ်ဆၣ် တနီသရံၣ်ကျိ ထံမိၢ်ပှၢ်နံၤလၢအန့ၢ်ဝဲအနံၣ်(၂၀)ဘျဲၣ်အံၤ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်မၤန့ၢ်ဝဲ ဒံးန့ၣ်လီၤ.
တကီၢ်ခါခဲအံၤဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤ လၢကထီၣ်ဒိၣ်စိက့ၤတၢ်လီၢ်တၢ်ကျဲလၢဘၣ်ဟ့ၣ်ဆှူဝဲတဖၣ်အံၤအဂီၢ် ပယီၤသုးကျိၤ ဟဲထီၣ်ဟူးဂဲၤဝဲဒီး ဟဲထီၣ်လၢကျဲအခါ ဖီၣ်ဒီးမၤသံကမျၢၢ်,ဒွဲၣ်အူအီၣ်ကမျၢၢ်အဟံၣ်အဃီ, ဟံဆူၣ်ဝဲကမျၢၢ်အတၢ်ဖိ တၢ်လံၤတကး ဒံးဘၣ် တုၤလၢခဲအံၤကမျၢၢ်လၢအဃ့ၢ်ထီၣ်တဖၣ်က့ၤဟံၣ်က့ၤဃီတဘူၣ်ဘၣ်ဟးအိၣ်ကဒုဒံးအသးအဖၢမုၢ် အိၣ်ဒံးဝဲ န့ၣ်လီၤ.
