လါစဲးပထ့ဘၢၣ် ၂ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါစဲးပထ့ဘၢၣ်ထီၣ် ၁ သီအနံၤန့ၣ် သုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ် လၢကရ့ၣ်နဲၣ်ကီၢ်စဲၣ် မီၤခၠံဝ့ၢ် တၢ်ခူၣ်စၢၢ်ထး လီၢ်အဃၢၤ ကၠီၣ်ကၠါ(ကျောက်ကြား)ကဝီၤဒ့ပူၤအဃိ ဃုၥ်ဒီးဖိသၣ်သံခဲလၢၥ်(၆)ဂၤဒီး ဘၣ်ဒိဘၣ်ထံးဝဲ(၉)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါကဘၣ်ဖဲဟါခီ ၄း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ်(jet fighter)ကဘီယူၤလဲၤတ့ၢ်လီၤဝဲ မ့ၣ်ပိၢ်လၢဖါဆီကီၢ်ဆၣ်(ဖားဆောင်း)ကမျၢၢ်အိၣ်ဆိးလီၢ်အဃိ တၢ်သံတၢ်ဘၣ်ဒိဘၣ်ထံးဘၣ်ဟဲအိၣ်ထီၣ်ဝဲအါဒ်အံၤလီၤအဂ့ၢ်န့ၣ် ကမျၢၢ်တဖၣ်စံးဝဲန့ၣ်လီၤ.
“တၢ်လီၢ်လၢကဘီယူၤဟဲခးလီၤတၢ်ခဲအံၤန့ၣ်အကဲထီၣ်ဝဲပှၤဖံးအီၣ်မၤအီၣ်တၢ်လီၢ်လီၤ. ပှၤဖီၣ်စုကဝဲၤကရူၢ်တအိၣ်နီဒူၣ်ဘၣ်. ပှၤသံအကျါန့ၣ်ပၣ်ဃုၥ်ဖိသၣ်. အသံခဲလၢၥ်န့ၣ်(၆)ဂၤဒီးဘၣ်ဒိခဲလၢၥ်န့ၣ်(၉)ဂၤ.မ့ဝံၤဟံၣ်စ့ၢ်ကီးဟးဂီၤတနီၤ”အဂ့ၢ်န့ၣ် မီၤခၠံကမျၢၢ် တဂၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤလီၢ်ကဝီၤကမျၢၢ်ဃုၥ်ဒီးဖိဒံဖိသၣ်လၢအဘၣ်ဒိဘၣ်ထံးသ့ၣ်တဖၣ်အံၤ တၢ်လဲၤဆှၢကူစါယါဘျါအဝဲသ့ၣ်လၢ တၢ်ဆါဟံၣ်လၢအဘူးဖဲန့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်ဘၣ်ဃးသုးမီၤစိရိၤအတၢ်ပညိၣ်လဲၤခးလီၤတၢ်ဒီးကမျၢၢ်သံဘၣ်ဒိဘၣ်ထံးအံၤ မ့ၢ်တၢ်ပညိၣ်ဝဲကမျၢၢ်လိၤလိၤအဂ့ၢ်န့ၣ် ထံၣ်ဘၣ်လၢကရ့ၣ်နံၣ်ဂ့ၢ်ဝီခွဲးယၥ်ကရူၢ်(KnHRG)ဒီးကရ့ၣ်နံၣ်ကတီၢ်ဘၢၣ်စၢၤပၢးပြးကီၣ်ကး(IEC)စံးဘၣ်ဝဲတၢ်ကစီၣ်သန့တဖၣ် အိၣ်ဝဲန့ၣ်လီၤ.
မီၤခၠံဟီၣ်ကဝီၤတၢ်လီၢ်လၢကရ့ၣ်နံၣ်တၢ်ပၢၢ်ဆၢသုးကရူၢ်ဒိၣ်စိဝဲအံၤန့ၣ် တၢ်ခူၣ်စၢၢ်ထးလၢအိၣ်ဖဲဟီၣ်ကဝီၤပူၤဖဲန့ၣ်တဖၣ် ဃုၥ်ဒီးဒူသဝီတဖၣ်အပူၤ အပူၤကွံၥ်သုးမီၤစိရိၤအံၤညီနုၢ်ပညိၣ်လဲၤခးလီၤဝဲတၢ်ဒီးကဘီယူၤကဲထီၣ်အိၣ်ဝဲတလီၢ်လီၢ်န့ၣ်လီၤ.
အဃိဖဲအပူၤကွံၥ် ၂၀၂၅ လါအီကူးအခါန့ၣ်စ့ၢ်ကီး ခီဖျိလၢကဘီယူၤအတၢ်လဲၤခးလီၤတၢ်လၢ မီၤခၠံ,လိၤခါလိၤ(လိုခါးလို)သဝီ တၢ်ဆါဟံၣ်ဒီး ပှၤအိၣ်ဖှိၣ်ရိၣ်ဖှိၣ်အါအလီၢ်အံၤအဃိ ဖဲန့ၣ်ကမျၢၢ်သံအဂၤ(၂၀)ဒီးဘၣ်ဒိဘၣ်ထံးတစှၤန့ၢ်(၆)ဂၤ ကဲထီၣ် တ့ၢ်ဒံးဝဲ ဒၣ်န့ၣ်လီၤ.
