ဒူသထူၣ်ကီၢ်ရ့ၣ် ကီၢ်ဆၣ်(၂)ဘ့ၣ်တလါအတီၢ်ပူၤ သုးမီၤစိရိၤတၢ်မၤထီဒါပှၤဂ့ၢ်ဝီခွဲးယၥ်အဃိ ကမျၢၢ်သံဘၣ်ဒိ(၇)ဂၤ, ဟံၣ်ဃုၥ်ဒီး ကၠိဟးဂီၤ(၅၀)ဃၣ်ဃၣ်

လါအီးကထိဘၢၣ် ၆ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ဒီး ကၠဲးထိၣ်ကီၢ်ဆၣ်ဟီၣ်ကဝီၤအပူၤ လါစဲး ပထ့ဘၢၣ် ၁ သီတုၤ ၃၀ သီ လၢတလါအတီၢ်ပူၤ ခီဖျိလၢသုးမီၤစိရိၤအကျိဖးဒိၣ်,ဒြိဒီးကဘီယူၤတၢ်ထီၣ်ဒုးအံၤအဃိ ကမျၢၢ်သံ ဘၣ်ဒိဘၣ်ထံး(၇)ဂၤဒီး ဟံၣ်ဃုၥ်ဒီးကၠိတၢ်သူၣ်ထီၣ်ဟးဂီၤအဖျၢၣ်(၅၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တၢ်မၤနီၣ်စရီ အပူၤန့ၣ်လီၤ.

ဒ်ကီၢ်ရ့ၣ်တၢ်မၤနီၣ်စရီပူၤအိၣ်တဲအသိးန့ၣ် လၢတၢ်ဒီတလါအတီၢ်ပူၤအံၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်ဝဲ(၁၀)ဘျီဒီး ပယီၤသုးတကပၤသံ(၁)ဂၤ,ဘၣ်ဒိဘၣ်ထံး(၃)ဂၤန့ၣ်လီၤ.

ဒီးလၢတၢ်ဒုးကဲထီၣ်သ့ၣ်တဖၣ်အံၤအကျါ ဘံလ့ကီၢ်ဆၣ်ပူၤ သုးတြိၤ(၄၄)စုတီၤဖီလၥ် လ့က့ၣ်သုးကလၢၤ ခီၣ်သုးရ့ၣ်(ခလရ-၈), တးပီသုးကလၢၤ ခီၣ်ချ့သုးရ့ၣ်(ခမရ-၉)ဃုၥ်ဒီး သထူၣ်ကီၢ်ဆၣ်ပူၤ ပနွဲၢ်ကျါသုးကလၢၤသ့ၣ်တဖၣ်အံၤ ဘၣ်တၢ်လဲၤခးအဝဲသ့ၣ်လၢ ဟီၣ်ကဝီၤ(KNLA) သုးရ့ၣ်-၂ ဒီး (KNDO) သုးရ့ၣ်-၂ သုးပၥ်ဖှိၣ်သ့ၣ်တဖၣ်အံၤတစှၤန့ၢ်(၆)ဘျီညါဘၣ်န့ၣ်လီၤ.

ပျီပူၤတၢ်ဒုးကဲထီၣ်အမဲၥ်ညါ ကၠဲးထိၣ်ကီၢ်ဆၣ်,ဘံလ့ကီၢ်ဆၣ်အပူၤ သုးမီၤစိရိၤလဲၤခးလီၤတၢ်ဒီးကဘီယူၤ(၉)ဘျီ, ဒြိ(၂)ဘျီ ဒီး ပယီၤသုးခးလီၤစ့ၢ်ကီးဝဲကျိဖးဒိၣ်(၁၃)ဘျီဆူကမျၢၢ်ဒူသဝီတၢ်ဖံးအီၣ်မၤအီၣ်လီၢ်ကျဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ခီဖျိလၢကျိဖးဒိၣ်,ဒြိဒီးကဘီယူၤအံၤအဃိ ကမျၢၢ်သံဝဲ(၂)ဂၤ,ဘၣ်ဒိၣ်ဘၣ်ထံး(၅)ဂၤဒီးလၢန့ၣ်အမဲၥ်ညါဟံၣ်(၄၀)ဖျၢၣ်, ကၠိတီၤဒၢး (၅)ဖျၢၣ်,ကျးဆါတၢ်(၂)ဖျၢၣ်ဃုၥ်ဒီးသိလ့ၣ်ယီၢ်,သိလ့ၣ်,တၢ်သူၣ်တၢ်ဖျးတၢ်မုၢ်တၢ်ဘိတဖၣ်ဟးဂီၤဘၣ်ဒိဘၣ်ထံးဝဲ ဒၣ်န့ၣ်လီၤ.

ဒ်န့ၣ်အသိး ခီဖျိလၢ ဒြိအံၤအဃိစ့ၢ်ကီး ဟီၣ်ကဝီၤတၢ်ဒီသဒၢကမျၢၢ်သုး(PDF)ဘၣ်ဒိစ့ၢ်ကီးဝဲ(၂)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီအပူၤ န့ၣ်လီၤ.

ဒူသထူၣ်ကီၢ်ရ့ၣ်ဟီၣ်ကဝီၤ ဖဲအပူၤကွံၥ်လါအီကူးတလါအတီၢ်ပူၤန့ၣ်စ့ၢ်ကီး ခီဖျိလၢပယီၤသုးကျိဖးဒိၣ်အဃိ ဖိသၣ်(၅)နံၣ်ဃုၥ်ဒီးကမျၢၢ်သံဘၣ်ဒိ ဘၣ်ထံးတစှၤန့ၢ်(၁၄)ဂၤကဲထီၣ်ဒံးဝဲန့ၣ်လီၤ.

တကီၢ်ခါခဲအံၤဟီၣ်ကဝီၤဖဲန့ၣ်လီၤဆီဒၣ်တၢ်ကၠဲးထိၣ်ကီၢ်ဆၣ်အပူၤ စးထီၣ်ဖဲလါစဲးပထ့ဘၢၣ် ၂၁ သီအနံၤန့ၣ် သုးကလၢၤလၢ အိၣ်ဆီလီၤသးဟီၣ်ကဝီၤပူၤဖဲန့ၣ်လၢအခးလီၤကျိဖးဒိၣ်တလီၢ်လီၢ်အံၤဃုၥ်ဒီးကဘီယူၤတဖၣ်အံၤလဲၤတ့ၢ်လီၤဝဲမ့ၣ်ပိၢ်ဟဲအါထီၣ်ဝဲဒီး ခးလီၤဝဲကျိဖးဒိၣ်ကိးမုၢ်နံၤဒဲးတုၤလၢခဲအံၤတစုန့ၣ်လီၤ.

ဒီးခီဖျိလၢကျိဖးဒိၣ်ဒီးကဘီယူၤအတၢ်လီၤဘၣ်ယိၣ်အံၤအဃိ သဝီကရူၢ်တစှၤန့ၢ်(၄)ကရူၢ်ပူၤ ကမျၢၢ်ပှၤသဝီဖိတဖၣ် ဘၣ်ဃ့ၢ်ထီၣ် ဟးအိၣ်ဝဲဒၣ်လၢတၢ်ဘံၣ်တၢ်ဘၢလီၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.