လါနိၣ်ဝ့ဘၢၣ် ၂ သီ, ၂၀၂၆ နံၣ်, ခ့ၣ်အဲးစံၣ်
လၢကလဲၤထီၣ်လူၤက့ၤဖၣ်ပူၣ်ဒုးယၤသုးကလၢၤလၢအိၣ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤအံၤအဂီၢ် ပယီၤသုး ကျိၤအတၢ်ဟဲထီၣ်ဟူးဂဲၤလၢတၢ်ဆၢကတီၢ်(၆)လါအတီၢ်ပူၤ သံဘၣ်ဒိဘၣ်ထံး(၄၀၀)ဘျဲၣ်အကျါပၣ်ဃုၥ်ဝဲ သုးရ့ၣ်ခိၣ်ပတီၢ် သ့ၣ်တဖၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါနိၣ်ဝ့ဘၢၣ် ၁ သီအံၤန့ၣ်လီၤ.
သုးမီၤစိရိၤအံၤလၢကလဲၤထီၣ်လူၤက့ၤဖၣ်ပူၣ်ဒုးယၤသုးကလၢၤလၢ(KNLA)သုးပၥ်ဖှိၣ်ကဝီၤခးဝဲန့ၢ်လၢအနံၣ်အံၤဒီး သုးကလၢၤ အံၤသုတလီၤတဂ့ၤအဂီၢ် လၢကမၤမိၢ်ဝ့ၢ်အံၤတဆီ စးထီၣ်ဖဲအပူၤကွံၥ်လါမ့ၤ ၅ သီအနံၤန့ၣ်ပယီၤသုးကျိၤလၢ သုးနီၣ်ဂံၢ်ကအိၣ် ဝဲ(၂၀၀၀) ဃၣ်ဃၣ်အံၤ စးထီၣ်ဟဲထီၣ်သဖှိဟူးဂဲၤဝဲဒၣ်ဆူၣ်ဆူၣ်ကိၤကိၤဒီး တုၤဃီၤဝဲလၢလါအီးကထိဘၢၣ် ၃၁ သီလၢၥ်အံၤတစု တၢ်ဒုးကဲထီၣ် ဝဲလၢခံခီခံကပၤအဘၢၣ်စၢၤကိးမုၢ်နံၤဒဲးဃၣ်ဃၣ်န့ၣ်လီၤ.
ဒီးလၢသုးကျိၤအတၢ်ဟဲထီၣ်ဟူးဂဲၤ တၢ်ဒုးကဲထီၣ်(၆)လါအတီၢ်ပူၤအံၤန့ၣ် ပယီၤသုးသံဝဲခဲလၢၥ်(၂၀၈)ဂၤဒီး ဖဲန့ၣ်အကျါပၣ်ဃုၥ်ဝဲ သုးရ့ၣ်ခိၣ်(၁)ဂၤ, သုးဒ့ခိၣ်(၂)ဂၤအသိး ဘၣ်ဒိဘၣ်ထံးစ့ၢ်ကီးဝဲ(၂၃၂)ဂၤအကျါပၣ်ဃုၥ်ဝဲ သုးရ့ၣ်ခိၣ်(၁)ဂၤ, သုးရ့ၣ်ခိၣ်-၂ (၁)ဂၤ, သုးဒ့ခိၣ်(၄)ဂၤ, သုးဒ့ခိၣ်-၂ (၁)ဂၤ ဒီး သုးစကီၤဖိ(၁)ဂၤအဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢတၢ်ဒုးကဲထီၣ်ဒီတကတီၢ်အပူၤအံၤ (သုးက့ ၅)အပှၤမၤန့ၢ်ဝဲပယီၤသုးအကျိ(၃၅)ခိၣ်, ဒြိ(၅)ဘ့ၣ်ဒီး မၤဟးဂီၤကွံၥ်ဝဲ သိလ့ၣ်(၁၁)ခိၣ်အကျါပၣ်ဃုၥ်ဝဲ (၄)ဘ့သိလ့ၣ်,(၆)ဘ့သိလ့ၣ်,ဘဲးဟိ(Back Hoe)သိလ့ၣ်သ့ၣ်တဖၣ်န့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်ဝဲအသိးန့ၣ် ကမၤမိၢ်-ကတၢတံၥ်ကျဲအဘၢၣ်စၢၤ ပယီၤသုးကျိၤဟဲထီၣ်ဟူးဂဲၤဒီတကတီၢ်အံၤစ့ၢ်ကီး သုးဖိသီလၢအဘၣ်တၢ်ဖီၣ်ဆူၣ်အီၤလၢသုးပူၤအံၤတဖၣ်ဃ့ၢ်ပူၤဖျဲးထီၣ်သးအိၣ်အသိး တနီၤန့ၣ် ဟဲက့ၤပၥ်လီၤစုကဝဲၤလၢ (သုးက့ ၅)အိၣ်စ့ၢ်ကီး အိၣ်ဝဲအါမးန့ၣ်လီၤ.
တကီၢ်ခါပယီၤသုးကျိၤလၢအဟဲထီၣ်တဖၣ်အံၤ မ့ဟဲထီၣ်တုၤဝဲဒၣ်လၢဒွဲၣ်လိကီၢ်ဆၣ် ကတၢတံၥ်ကရူၢ် ထံကဆီမဲဟီၣ်ကဝီၤပူၤ တၢ်ဆၢကတီၢ်ထီၣ်ဘးလၢ(၁)လါဘျဲၣ်လံဘၣ်ဆၣ် ဆဲးထီၣ်ဆူညါတန့ၢ်တၢ်ဒုးဆဲးကဲထီၣ်ဝဲဒီးဟီၣ်ကဝီၤကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA)သုးပၥ်ဖှိၣ်အံၤအဖၢမုၢ်တုၤလၢခဲအံၤန့ၣ်လီၤ.
ဒီးပယီၤသုးကျိၤသ့ၣ်တဖၣ်အံၤခီဖျိဘၣ်ကွၢ်ဆၢၣ်မဲၥ်ဝဲတၢ်သံတၢ်ဘၣ်ဒိဘၣ်ထံးအါအါဂီၢ်ဂီၢ်ဆှူဝဲတၢ်ဒုးအံၤအဖီခိၣ် ဟဲထီၣ်လၢကျဲ ဒီတကျိၤန့ၣ် သူဝဲကျိဖးဒိၣ်,ဒြိဒီးကဘီယူၤအါအါဂီၢ်ဂီၢ် လဲၤခးလီၤဝဲတၢ်လၢကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျဲဒိၣ်ဒိၣ်မုၢ်မုၢ်ကိး မုၢ်နံၤဒဲးဃၣ် ဃၣ်တုၤလၢခဲအံၤတစုအဂ့ၢ်န့ၣ် သ့ၣ်ညါဘၣ်န့ၣ်လီၤ.
ခီဖျိလၢသုးမီၤစိရိၤတၢ်ထီၣ်ဒုးသ့ၣ်တဖၣ်အံၤအဃိ ကမျၢၢ်ဟံၣ်(၄၅၈)ဖျၢၣ်, ကၠိတီၤဒၢးတၢ်သူၣ်ထီၣ်(၃)ဖျၢၣ်, သီခါဖၠၣ်ဒီးတၢ်ဘါယွၤ သရိၥ်(၉)ဖျၢၣ်လီၤပှီၢ်ဟးဂူၥ်ဟးဂီၤဘၣ်ဒိဘၣ်ထံးဝဲဒၣ်အသိး တုၤလၢခဲအံၤကၠိ(၂၀)ဖျၢၣ်တၢ်အိးထီၣ်ဝဲတသ့လၢၤဘၣ်ဒီး ဘုသိၣ် ကီၢ်ဆၣ်ပူၤ သဝီ(၃၁)ဖျၢၣ်, ဒွဲၣ်လိကီၢ်ဆၣ်ပူၤ သဝီ(၃၁)ဖျၢၣ်ဒီး လူၤသီကီၢ်ဆၣ်ပူၤ သဝီ(၅)ဖျၢၣ် ပၥ်ဖှိၣ်ခဲလၢၥ်သဝီ (၆၇)ဖျၢၣ် ကမျၢၢ်တဖၣ်ဘၣ်ဃ့ၢ်ထီၣ်ဝဲန့ၣ်လီၤ.
ဒ်န့ၣ်အသိးခီဖျိလၢကျိဖးဒိၣ်,ဒြိဒီးကဘီယူၤအတၢ်ဟးခးလီၤတၢ်အံၤအဃိစ့ၢ်ကီး လီၢ်ကဝီၤကမျၢၢ်သံဝဲ(၇)ဂၤဒီး ဘၣ်ဒိဘၣ်ထံးဝဲ (၄၇)ဂၤ တကးဒံးဘၣ်ကျီးပူၤတၢ်ထူၣ်တၢ်ဘိ,ကျီၢ်,ပနၢ်ဒီးစဲးဖီကဟၣ်တၢ်ဖိတၢ်လံၤတဖၣ်ဟးဂီၤဘၣ်ဒိဘၣ်ထံးစ့ၢ်ကီးဝဲအါမး အဂ့ၢ်န့ၣ် မုၢ်တြီၢ်ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါခီဖျိလၢသုးမီၤစိရိၤအတၢ်ဟဲထီၣ်ဟူးဂဲၤလၢတၢ်(၆)လါအတီၢ်ပူၤအံၤ ဟီၣ်ကဝီၤဖဲန့ၣ်အပူၤ ကရူၢ်(၁၉)ဘ့ၣ်လၢအမ့ၢ် ကတၢတံးကရူၢ်,ထံသဘျုၣ်ထၣ်,လ့ဖိထၣ်,ဒ့ဝါ,ကၠီပါ,မဲးမှဲ,မဲးပြံး,ထံသဒီၣ်ထၣ်, မးထီ, မဲးကျီ, ကလီၤထၣ်, မဲးခူၣ်,နါကိၢ်ခံ,ခီပူး,မဲးသူၣ်,ပၥ်ဟဲ,ဘုအါဒၢ,ဘီသ့ၣ်ထၣ်ကရူၢ် ဒီး ဃဲပၤကရူၢ်ပူၤကမျၢၢ်ဘၣ်ဃ့ၢ်မှံ ဟးဖျိးအနီၣ်ဂံၢ် အိၣ်ထီၣ်တုၤလၢ(၅၄,၅၂၁)ဂၤလံအဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိတကီၢ်ခါခဲအံၤ လီၢ်ကဝီၤကမျၢၢ်အဃ့ၢ်ထီၣ်သ့ၣ်တဖၣ်တုၤလၢခဲအံၤတက့ၤဘၣ်လၢအဟံၣ်အဃီဒံးဘၣ်ဒီး ဘၣ်ကွၢ်ဆၢၣ်မဲၥ်ဝဲတၢ်လုၢ်အီၣ်နီၢ်ခိသးသမူတၢ်ဂ့ၢ်ကီအံၤအါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်န့ၣ်အသိးဖဲလၢကမျၢၢ်ဘၣ်ဃ့ၢ်မှံဟးဖျိးသဂၢၢ်ဘၣ်တၢ်ကီတၢ်ခဲအကတီၢ်အံၤ လီၢ်ခံကတၢၢ်ဖဲအပူၤကွံၥ်လါအီးကထိဘၢၣ် ၃၁ သီ ဟါခီအခါ သုးမီၤစိရိၤကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဟီၤစီၤကီၢ်ရ့ၣ် မဲၢ်စရံယါကီၢ်ဆၣ် သီလဲၥ်ထၣ် ဃိၣ်လိၥ်ကျိဝၢ်ခီ မဲၥ်ရၥ်ထၣ်(welcome to kawthoolei)တၢ်လီၢ်အံၤအဖီခိၣ် ကမျၢၢ်လၢအိၣ်ဘူးဖဲန့ၣ် ဒီတကျိၤ ဘၣ်အိၣ်ဝဲဒီးတၢ်ဘၣ်ယိဘၣ်ဘှီန့ၣ်လီၤ.
