လါနိၣ်ဝ့ဘၢၣ် ၉ သီ, ၂၀၂၆ နံၣ်, ခ့ၣ်အဲးစံၣ်
ဘုလိၥ်ကျိ ပှၤမၤထူလီၢ်လၢအိၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ၣ်ကီၢ်ဆၣ်အပူၤအံၤ ဖဲမဟါအနံၤ ကဘီယူၤလဲၤခးလီၤတၢ်လၢအဃိ ပှၤနီ(ဘဲးဖိ)သိလ့ၣ်ကစၢ်တဂၤဒီး ပှၤမၤထူဖိဘၣ်ဒိဘၣ်ထံး(၆)ဂၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ် ဖိအအိၣ်န့ၣ်လီၤ.
ဖဲမဟါလါနိၣ်ဝ့ဘၢၣ် ၈ သီ မုၢ်ဘူးကထူၣ်ခိၣ်ဃၢၤအဆၢကတီၢ်န့ၣ် သုးမီၤစိရိၤကဘီယူၤတဘ့ၣ် လဲၤတ့ၢ်လီၤဝဲမ့ၣ်ပိၢ်လၢ အံစူၢ်ခံကရူၢ်ပူၤ ပဒၤဒီၤ(ပဒါဒေါင်),ဝၣ်ကတဲၥ်သဝီပှၤမၤထူလီၢ်သ့ၣ်တဖၣ်အံၤအဃိ ပှၤမၤထူဖိလၢ အိၣ်ဖဲန့ၣ်သ့ၣ်တဖၣ် သံဘၣ် ဒိဘၣ်ထံးဘၣ်ဟဲကဲထီၣ်ဝဲဒ်အံၤန့ၣ်လီၤ.
လီၢ်ကဝီၤကမျၢၢ်တဂၤစံးဝဲလၢ “ဖဲမဟါန့ၣ်ကဘီယူၤလဲၤခးလီၤတၢ်လၢပဒၤဒီၤ ပှၤမၤထူလီၢ်တကပၤန့ၣ်. တၢ်လီၢ်ဖဲန့ၣ်တဖၣ်န့ၣ် ပှၤမၤထူလီၢ်အိၣ်အါမးလီၤ. ကဘီယူၤလဲၤခးလီၤတၢ်ဖဲမဟါအခါန့ၣ်ပှၤနီ(ဘဲးဖိ)သိလ့ၣ်ဖိန့ၣ်သံတဂၤ. မ့မ့ၢ်ပှၤလၢ အဘၣ်ဒိ ဘၣ်ထံးတဖၣ်ခီန့ၣ်မ့ၢ်ဝဲပှၤကမျၢၢ် ပှၤမၤတၢ်ဖိဖဲန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
တကးဒံးဘၣ်ပယီၤသုးကဘီယူၤလဲၤခးလီၤတၢ်ဖဲဘုလိၥ်ကျိပှၤမၤထူလီၢ်ဖဲန့ၣ်ဝံၤ တကတီၢ်ဃီက့ၤခးလီၤကဒီးဝဲတၢ်လၢကၠဲးထိၣ်ကီၢ်ဆၣ် ဆီသုးခံကရူၢ်ဒူသဝီလၢဒုးယၤတၢ်သဘံၣ်သဘုၣ်ကဲထီၣ် ဝဲအံၤအပူၤဒံးအဂ့ၢ်န့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤ စံးဝဲအသိး သ့ၣ်ညါဘၣ်န့ၣ်လီၤ.
ဘၣ်ဃးကဘီယူၤလဲၤခးလီၤတၢ်ဘျီဝဲအံၤ တၢ်သံတၢ်ဘၣ်ဒိဘၣ်ထံးအမဲၥ်ညါ တၢ်ဟးဂူၥ်ဟးဂီၤတၢ်အိၣ်သးလၢအဂၤတဖၣ်ခီန့ၣ် ပခ့ၣ်အဲးစံၣ်-ကညီတၢ်ကစီၣ် လူၤဆဲးကျိးမၤလီၤတံၢ်ဝဲအဖၢမုၢ်န့ၣ်လီၤ.
အံစူၢ်ခံကရူၢ်ပူၤ ဒူသဝီ ဘုလိၥ်ကျိပူၤပှၤမၤထူလီၢ်လၢကဘီယူၤဟဲခးလီၤတၢ်ဖဲမဟါအံၤန့ၣ် ဖဲအပူၤကွံၥ်တနံၣ်အံၤ ၂၀၂၆ လါယူၤ ၂၂ သီ, ၂၃ သီ, ၂၄ သီအခါန့ၣ်စ့ၢ်ကီး အံစူၢ်ခံကရူၢ်ဃုၥ်ဒီးမဲးပြ့ခံကရူၢ်,ပံၣ်တံၣ်ကရူၢ်,စွ့ၣ်လီအ့ကရူၢ်ပူၤ ဘုလိၥ်ကျိဒီတကျိၤန့ၣ် ပယီၤသုးကဘီယူၤလဲၤတ့ၢ်လီၤဒံးဝဲမ့ၣ်ပိၢ်အါအါဂီၢ်ဂီၢ်ဒံးန့ၣ်လီၤ.
ဒီးဖဲကဘီယူၤလဲၤခးလီၤတၢ်ဘျီဝဲန့ၣ် လီၢ်ကဝီၤကမျၢၢ်ပှၤမၤထူဖိသံဘၣ်ဒိဘၣ်ထံးတစှၤန့ၢ်ဝဲ(၆)ဂၤကဲထီၣ်ဒံးဝဲအမဲၥ်ညါ ပှၤမၤတၢ်ဖိတၢ်သူၣ်ထီၣ်လီၢ်ဃုၥ်ဒီးစဲးဖီကဟၣ်တၢ်ပီးတၢ်လီလၢတၢ်သူဝဲဖဲတၢ်မၤအပူၤန့ၣ်သ့ၣ်တဖၣ် ဟးဂီၤဘၣ်ဒိဘၣ်ထံးဝဲအါမး ကဲထီၣ်ဒံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးတ့ၢ်ဝဲအသိးန့ၣ် တၢ်မၤထူလီၢ်လၢအိၣ်ဖဲန့ၣ်သ့ၣ်တဖၣ် အပူၤကွံၥ်တၢ်အခိအသွဲသ့ၣ်တဖၣ် ဘၣ်ဟ့ၣ်ဝဲ လီၢ်ကဝီၤ ခ့ၣ်အဲၣ်ယူၣ် ဒီး ပယီၤသုးမ့အိၣ်ဝဲခံကပၤလၢၥ်ဘၣ်ဆၣ် စးထီၣ်လၢသုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် ဟီၣ်ကဝီၤ ဖဲန့ၣ်အပူၤ ဒိၣ်စိဝဲတန့ၢ်လၢၤဘၣ်အဃိ တၢ်ခိတၢ်သွဲတဖၣ်ပယီၤသုးတဒိးန့ၢ်ဘၣ်ဝဲလၢလၢပှဲၤပှဲၤလၢၤဘၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
