Home တၢ်ကစီၣ် ကၠီၣ်တဲၣ်ကနုၥ်လီၤကျဲၤဃူတၢ်လၢတၢ်ဘၢၣ်စၢၤအံၤဒုးသ့ၣ်ညါဝဲအိၣ်ဘၣ်ဆၣ် ပယီၤသုးကရူၢ်မ့တပတုၥ်တၢ်စုဆူၣ်ခီၣ်တကး ဘၣ်န့ၣ် လဲၤဆူညါတန့ၢ်ဝဲဘၣ်အဂ့ၢ် KNU ခီၣ်ဆၢကဒါဝဲ

ကၠီၣ်တဲၣ်ကနုၥ်လီၤကျဲၤဃူတၢ်လၢတၢ်ဘၢၣ်စၢၤအံၤဒုးသ့ၣ်ညါဝဲအိၣ်ဘၣ်ဆၣ် ပယီၤသုးကရူၢ်မ့တပတုၥ်တၢ်စုဆူၣ်ခီၣ်တကး ဘၣ်န့ၣ် လဲၤဆူညါတန့ၢ်ဝဲဘၣ်အဂ့ၢ် KNU ခီၣ်ဆၢကဒါဝဲ

14
0

လါနိၣ်ဝ့ဘၢၣ် ၁၄ သီ, ၂၀၂၆ နံၣ်, ခ့ၣ်အဲးစံၣ်

လၢကဃဲၣ်လီၤဘှါဆှဲတၢ်ဂ့ၢ်ကီလၢအကဲထီၣ်သးအံၤအဂီၢ် ကနုၥ်လီၤကျဲၤဃူမၤစၢၤလၢတၢ်ဘၢၣ်စၢၤတၢ်ဂ့ၢ်အံၤ ကီၢ်ကၠီၣ်တဲၣ်ထံဂုၤ ကီၢ်ဂၤဝဲၤကျိၤဒုးသ့ၣ်ညါဝဲမ့အိၣ်ဝဲဘၣ်ဆၣ် သုးမီၤစိရိၤတကပၤမ့တပတုၥ်တၢ်စုဆူၣ်ခီၣ်တကးလၢ ကမျၢၢ်ထံဖိကီၢ်ဖိအဖီခိၣ် ဘၣ် န့ၣ် တၢ်ထံၣ်လိၥ်တၢၣ်ပီၣ်တဲသကိးအံၤလဲၤဆူညါတန့ၢ်ဝဲဘၣ်အဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ကဒိၣ်စီၤကျၢၤစ့ ခီၣ်ဆၢ ကဒါဝဲန့ၣ်လီၤ.

ဖဲအပူၤကွံၥ်လါနိၣ်ဝ့ဘၢၣ် ၁၂ သီအနံၤန့ၣ် ကၠီၣ်တဲၣ်ထံဂုၤကီၢ်ဂၤကိတိၥ် မံးစထၢၣ် စံၤဟၤစဲၣ် လဲၤထံၣ်လိၥ်သးဒီး သုးမီၤစိရိၤကီၢ်ခိၣ် မ့အီၤလဲၤ, တၢ်ဒီတဒၢကိတိၥ် သုးခိၣ်ယၤပၠ့ၣ်, ထံဂုၤကီၢ်ဂၤကိတိၥ် အူတ့ၤမီၤစွ့ၤ သ့ၣ်တဖၣ်အံၤလၢ န့ၣ်ပၠံၣ်တီၣ် အံၤန့ၣ်လီၤ.

ဒီးလၢတၢ်ထံၣ်လိၥ်အိၣ်သကိးဘျီဝဲအံၤအပူၤ ဒ်သိးပယီၤသုးပဒိၣ်ဒီး KNU-ကညီဒီကလုၥ်စၢဖှိၣ်ကရၢ, ကရ့ၣ်နံၣ်ဒီကလုၥ်တၢ်လဲၤ ထီၣ်လဲၤထီပၣ်တံၣ်(KNPP)တဖၣ်အံၤ ကဃဲၣ်လီၤဘှါဆှဲဝဲတၢ်ဂ့ၢ်ကီတဖၣ်ဒီးထံၣ်လိၥ်တဲသကိးတၢ်ကန့ၢ်အဂီၢ် ကၠီၣ်တဲၣ်ကနုၥ် လီၤမၤစၢၤဝဲလၢတၢ်ဘၢၣ်စၢၤ ဒီး ဒ်န့ၣ်အသိးလၢတၢ်ထံၣ်လိၥ်သးအဂီၢ် ကပျၢ်လီၤဝဲခၢၣ်စးကရူၢ်အဂ့ၢ်န့ၣ် သုးမီၤစိရိၤတကပၤ အၢၣ် လီၤတူၢ်လိၥ်ဝဲဒၣ်န့ၣ်လီၤ.

“ဘၣ်ဃးကၠီၣ်တဲၣ်ကနုၥ်လီၤကျဲၤဃူတၢ်လၢတၢ်ဘၢၣ်စၢၤအံၤန့ၣ် ကၠီၣ်တဲၣ်ထံဂုၤကီၢ်ဂၤဝဲၤကျိၤဒုးသ့ၣ်ညါပှၤအိၣ်လီၤ. ဘၣ်ဃးတၢ် တခါအံၤပကတဲအီၤလီၤလီၤဆီဆီဒုတအိၣ်ဘၣ်. ပထံပကီၢ်အံၤလိၣ်ဘၣ်ဝဲဒၣ်တၢ်မုၥ်တၢ်ခုၣ်,တၢ်ဂၢၢ်တၢ်ကျၢၤအနီၢ်ကီၢ်လီၤန့ၣ် ပသမၢအီၤ အလီၢ်တအိၣ်ဘၣ်မီၤနီၤ. ဘၣ်ဆၣ်လၢတၢ်တဲသကိးအပူၤတၢ်ပၥ်သူၣ်ပၥ်သးတၢ်သးအိၣ် မ့အိၣ်စဲၤနီၢ်ဒု တၢ်ထံၣ်လိၥ် အိၣ်သကိးအံၤကမ့ၢ်တၢ်လၢအဂ့ၤဒီး ဘၣ်ဆၣ်အတၢ်ပၥ်သူၣ်ပၥ်သးမ့အိၣ်ဒံးဒၣ်လၢညါလီၢ်လီၢ်ဒု တၢ်ထံၣ်လိၥ်အိၣ်သကိးဝဲအံၤ တမ့ၢ်လၢအသုးသးတသ့လၢၤဘၣ်”အဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ် ခ့ၣ်အဲးစံၣ် -ကညီတၢ်ကစီၣ် န့ၣ်လီၤ.

လၢန့ၣ်အမဲၥ်ညါတချုးတၢ်ထံၣ်လိၥ်အိၣ်သကိးအံၤဒံးဘၣ်န့ၣ် ဟီၣ်ကဝီၤအပူၤ အဆိကတၢၢ်အလီၢ်အိၣ်လၢ သုးမီၤစိရိၤကဘၣ် ပတုၥ်ကွံၥ်ဝဲ ကဘီယူၤ,ကျိဖးဒိၣ်တၢ်ထီၣ်ဒုး,တၢ်မၤသံမၤဝီလၢအပညိၣ်ဝဲကမျၢၢ်ထံဖိကီၢ်ဖိအံၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.

ဒ်န့ၣ်အသိးတၢ်ထံၣ်လိၥ်အိၣ်သကိးအံၤ ကဘၣ်မ့ၢ်တၢ်ထံၣ်လိၥ်သးလၢ(SCEF)အပတီၢ်မး ဘှါဆှဲဝဲထံလီၢ်ကီၢ်ပူၤတၢ်ဂ့ၢ်ကီကန့ၢ်ဝဲဒီး တၢ်ဂ့ၢ်အရ့ဒိၣ်(၅)ထံၣ်လၢအပၣ်ဃုၥ်ဝဲသုးမီၤစိရိၤအတၢ်မၤထီဒါပှၤဟီၣ်ခိၣ်ဖိခွဲးယၥ်ဒီး ပှၤဂ့ၢ်ဝီတၢ်ဆီၣ်ထွဲမၤစၢၤအံၤအလီၢ်အိၣ် လၢတၢ်ကဘၣ်တဲသကိးဝဲဘျဲးဘျဲးဘျီးဘျီးအဂ့ၢ်န့ၣ် ပဒိၣ်စီၤကျၢၤစ့ စံးအါထီၣ်ဝဲဒၣ်န့ၣ်လီၤ.

“လၢပအိၣ်တကပၤန့ၣ်ကြၢးပထံၣ်လိၥ်သးလၢ(SCEF)အတပတီၢ်မီၤ အန့ၣ်မးထံလီၢ်ကီၢ်ပူၤဒီတခါတၢ်ဂ့ၢ်ကီသ့ၣ်တဖၣ်န့ၣ် ပက ဘှါဆှဲလီၤသကိးန့ၣ်ကန့ၢ်ဝဲလဲၢ်လဲၢ်ထီထီမီၤနီၤ. ဖဲတၢ်ထံၣ်လိၥ်အိၣ်သကိးပူၤန့ၣ်တၢ်လၢပ(SCEF)ကတီၤဃၥ်ဝဲတၢ်ဂ့ၢ်အိၣ်(၅)ထံၣ်. တၢတခါန့ၣ် သုးမီၤစိရိၤကဘၣ်မၤလီၤမၢ်ကွံၥ်တၢ်မၤအၢမၤသီကမျၢၢ်ထံဖိကီၢ်ဖိတၢ်ဖံးတၢ်မၤတဖၣ်, မ့ဝံၤခံခါတခါန့ၣ်ကမျၢၢ်လၢ ဘၣ်ကီဘၣ်ခဲဘၣ်ဃ့ၢ်မှံဟးဖျိးတဖၣ်အံၤ တၢ်ကဘၣ်ဟ့ၣ်အီၤပှၤဂ့ၢ်ဝီတၢ်တိစၢၤမၤစၢၤတၢ်ရဲၣ်တၢ်ကျဲၤန့ၣ်အလိၣ်ဝဲသပှၢ်ကတၢၢ်န့ၣ် ကြၢးလၢတၢ်ကဘၣ်စံးကတိၤအီၤမီၤနီၤ. တၢ်ဂ့ၢ်ခံခါအံၤမ့ၢ်တၢ်အကါဒိၣ်ကိၢ်ကိၢ်လၢၤလၢၤလၢတၢ်ကဘၣ်မၤအီၤန့ၣ် ပအဲၣ်ဒိးဒုးသ့ၣ် ညါ ဒ်အံၤလီၤ”အဂ့ၢ်န့ၣ် စံးဝဲန့ၣ်လီၤ.

လၢကီၢ်ကၠီၣ်တဲၣ်ထံဂုၤကီၢ်ဂၤကိတိၥ်ဒီးသုးမီၤစိရိၤအတၢ်ထံၣ်လိၥ်သးဘျီဝဲအံၤအပူၤန့ၣ် KNU, KNPP ဒီးပယီၤသုးပဒိၣ် အဘၢၣ် စၢၤတၢ်ဂ့ၢ်အမဲၥ်ညါ လၢအၣ်စံၣ်ယၣ်ထံကီၢ်ခိၣ်နၢ်တၢ်အိၣ်ဖှိၣ်အပူၤ ဒ်သိးသုးမီၤစိရိၤနုၥ်လီၤပၣ်ဃုၥ်ကဒါက့ၤဝဲကန့ၢ်အဂီၢ် ထံၣ်ဘၣ် လၢ ကၠီၣ်တဲၣ်တကပၤဟ့ၣ်ကူၣ်ဟ့ၣ်ဖးဝဲလၢကဘၣ်ဆဲးမၤဝဲလၢကျဲဒ်လဲၣ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဆၣ်သုးမီၤစိရိၤကရူၢ်လၢအတူၢ်လိၥ်ဝဲကၠီၣ်တဲၣ်တၢ်နုၥ်လီၤကျဲၤဃူလၢအမၤထီဒါတ့ၢ်ဝဲပှၤဂ့ၢ်ဝီခွဲးယၥ်လၢကီၢ်ပယီၤပူၤန့ၢ်ဝဲ(၅)နံၣ်ဘျဲၣ်အံၤန့ၣ် တနံၤဃီဖဲလါနိၣ်ဝ့ဘၢၣ် ၁၂ သီ တၢ်ထံၣ်လိၥ်သးအခါန့ၣ်စ့ၢ်ကီး လၢခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်အပူၤ ပယီၤသုး ခးလီၤဒံးကျိဖးဒိၣ်အဃိ ကမျၢၢ်ဟံၣ်ဟးဂီၤဝဲ(၅)ဖျၢၣ်ဒံးန့ၣ်လီၤ.

ဒ်န့ၣ်အသိးခ့ၣ်အဲၣ်ယူၣ်,(KNPP)ဒီးပယီၤသုးမီၤစိရိၤကရူၢ်အဘၢၣ်စၢၤတၢ်ဂ့ၢ်ကီလၢ ကၠီၣ်တဲၣ်ကနုၥ်လီၤမၤစၢၤဝဲလၢတၢ်ဘၢၣ်စၢၤ အံၤ မ့ၢ်ကရူၢ်လၢတတူၢ်လိၥ်ဝဲသုးမီၤစိရိၤလၢအဟံန့ၢ်ဆူၣ်ထံကီၢ်တၢ်စိတၢ်ကမီၤအံၤဘၣ်ဒီး ဒုးပၢၢ်ဆၢထီဒါဝဲတၢ်ဆၢကတီၢ်ထီၣ် ဘးဝဲလၢ(၆)နံၣ်ခိၣ်ဃၢၤလံန့ၣ်လီၤ.