လါအီကူး ၂၇သီ, ၂၀၂၄နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ခိၣ်နၢ်ဒိၣ်စိဒိၣ်ကမီၤတဖၣ်မၤဝဲ(၁၂၀)သီတၢ်ဖီၣ်တဖိးသဲးစးထံဂုၤကီၢ်ဂၤဖိအတၢ်တိၥ်ကျဲၤအပူၤ,ဖီၣ်န့ၣ်ဝဲပှၤကီၢ်ပယီၤထံဖိကီၢ်ဖိတဖၣ်အအါကတၢၢ်အဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီကရူၢ်ကရၢတဖၣ်စံးဝဲန့ၣ်လီၤ.
(၁၂၀)သီတၢ်ဖီၣ်တဖိးသဲစးထံဂုၤကီၢ်ဂၤဖိအတၢ်ကိၥ်ကျဲၤအံၤဘၣ်တၢ်စးထီၣ်အီၤဖဲအပူၤကွံၥ်လါယူၤ(၅)သီအနံၤဒီးတကီၢ်ခါခဲအံၤန့ၢ်ဝဲအသီ(၈၀)လံအဖီခိၣ်ဖဲအသီ(၈၀)အတီၢ်ပူၤအံၤန့ၣ်တၢ်ဖီၣ်န့ၢ်ဝဲထံဂုၤကီၢ်ဂၤတဖိးသဲးစးအဂၤ(၂၀၀၀၀၀)ခံကလီၢ်ဘျဲၣ်အကျါကီၢ်ပယီၤထံဖိကီၢ်ဖိပၣ်ဝဲ(၁၆၀၀၀၀)တကလီၢ်ဃုကလးအဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီတဖၣ်စံးဝဲန့ၣ်လီၤ. ဘၣ်ဃးဒီးကီၢ်ပယီၤဖိလၢတၢ်ဖီၣ်န့ၣ်အီၤတဖၣ်ဘၣ်အံၤဘၣ်တၢ်ဖီၣ်အီၤလၢတၢ်ဂ့ၢ်မနုၤသ့ၣ်တဖၣ်လဲၣ်ဒီးတကီၢ်ခါခဲအံၤတၢ်ရဲၣ်သဲကတီၤအီၤဒ်လဲၣ်အဂ့ၢ်န့ၣ်ပှၤဟူးဂဲၤလၢကီၢ်ပယီၤပှၤမၤတၢ်ဖိကမံးတံၥ်(JACBA)ပှၤနဲၣ်တၢ်အူမိကၠိစံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“အဝဲသ့ၣ်တဖၣ်န့ၣ်ဘၣ်တၢ်ဖီၣ်အီၤခီဖျိလၢတၢ်ဂ့ၢ်မနုၤလဲၣ်န့ၣ်ခီဖျိလၢအဝဲသ့ၣ်တဖၣ်အတၢ်ဂီၤလံၥ်အုၣ်သးတအိၣ်ဘၣ်,တၢ်ဂီၤလံၥ်လဲၢ်တလၢပှဲၤဘၣ်,တၢ်ဂီၤလံၥ်လဲၢ်ဒီးတၢ်မၤကစၢ်တဖၣ်တဘၣ်ဘျီးဘၣ်ဒါလိၥ်အသးဘၣ်အမဲၥ်ညါအဂၤတမံၤန့ၣ်အဝဲသ့ၣ်မၤဘၣ်ဝဲတၢ်မၤတၢ်မၤလၢကၠီၣ်တဲၣ်တဟ့ၣ်ခွဲးလၢထံဂုၤကီၢ်ဂၤဖိတဖၣ်မၤဝဲခွဲးယၥ်တအိၣ်ဘၣ်(၂၇)မံၤသ့ၣ်တဖၣ်န့ၣ်လီၤ.ဒီးတကီၢ်ခါခဲအံၤပှၤလၢတၢ်ဖီၣ်န့ၢ်အီၤတဖၣ်ဘၣ်တၢ်သမံသမိးအဖၢမုၢ်ဒီးတဒုးလီၤဒံးဝဲလၢဃိၥ်ပူၤကိးဂၤဒံးဘၣ်.ဒီးပှၤလၢတၢ်ဖီၣ်န့ၢ်ဝဲသ့ၣ်တဖၣ်အံၤတၢ်ဟံးထီၣ်အရ့အိၣ်ဝဲလၢအဂၤ(၇၀၀၀)လံဒီးပှၤလၢကဘၣ်တၢ်ဒုးလီၤအီၤလၢဃိၥ်ပူၤန့ၣ်ကအိၣ်ဝဲလၢအဂၤ(၁၀၀၀၀)တကလးဃၣ်ဃၣ်အဂ့ၢ်”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ကီၢ်ပယီၤဖိလၢတၢ်ဖီၣ်န့ၣ်ဝဲတဖၣ်အံၤ,အါတက့ၢ်ဘၣ်ဟ့ၣ်ဝဲစ့အီးလီးအါကတၢၢ်ဒီးစ့အီၣ်လီးတဖၣ်အံၤတၢ်ပၥ်ပနီၣ်ဝဲလၢလၢစ့ယိၤ(၅၀၀၀)ယဲၢ်ကထိဘးတုၤလၢ(၅၀၀၀၀)ယဲၢ်ကလးဘးဘၢၣ်စၢၤအိၣ်ဝဲအဂ့ၢ်,အူမိကၠိစံးအါထီၣ်ဝဲဒၣ်န့ၣ်လီၤ.
တကးဒံးဘၣ်,ပှၤလၢတၢ်ဖီၣ်အီၤဒီးဟ့ၣ်ဝဲစ့အီးလီးန့ၢ်သ့ၣ်တဖၣ်အံၤအတၢ်ဂ့ၢ်တၢ်ကျိၤဝံၤတဲၥ်ဝဲအိၣ်ဝဲဘၣ်ဆၣ်,မ့မ့ၢ်ပှၤလၢဟ့ၣ်အီၣ်လီးတန့ၢ်တသ့ဘၣ်တဖၣ်ဘၣ်တၢ်ဒုးဃၥ်အီၤအိၣ်ဝဲအမဲၥ်ညါ,ပှၤလၢအဘၣ်တၢ်ဒုးဃၥ်အီၤတဖၣ်အံၤန့ၣ်ဖဲအဟးထီၣ်ကွံၥ်လၢတၢ်ဒုးဃၥ်အဆၢကတီၢ်ဆဲးအိၣ်ဆိးဝဲလၢကၠီၣ်တဲၣ်အကီၢ်ပူၤတန့ၢ်လၢၤဘၣ်ဒီးကဘၣ်တၢ်နီဟးထီၣ်ကွံၥ်ဝဲအဝဲသ့ၣ်တဖၣ်လၢကၠီၣ်တဲၣ်ထံကီၢ်ပူၤ(၂)နံၣ်အိၣ်ဝဲအဂ့ၢ်,စံးစ့ၢ်ကီးဝဲဒၣ်န့ၣ်လီၤ.
တကတီၢ်ဃီ,သုးဟံန့ၢ်တၢ်စိကမီၤအလီၢ်ခံကီၢ်ပယီၤအပူၤဒုးယၤတၢ်သဘံၣ်သဘုၣ်,တၢ်ဖံးအီၣ်မၤအီၣ်ဃံးစ့ၤထီၣ်ဝဲဒီးသုးကီၣ်ကးကမျၢၢ်အတၢ်ဘၣ်ကဲသုးတဖၣ်အိၣ်ထီၣ်အဃိ,ထံလီၢ်ကီၢ်ပူၤကမျၢၢ်သးစၢ်တဖၣ်အံၤလဲၤနုၥ်ဝဲလၢကီၢ်ကၠီၣ်တဲၣ်အပူၤလၢအဖိးမံသဲစးဒီးတဖိးမံသဲစးကျဲအိၣ်ဝဲအသိး,အဝဲသ့ၣ်တဖၣ်အံၤဒ်သိးနုၥ်လီၤဝဲဆူကၠီၣ်တဲၣ်ပူၤကန့ၢ်အဂီၢ်ဘၣ်လဲၤပီၣ်လီၤဝဲအတၢ်စုလီၢ်ခီၣ်ခိၣ်တၢ်လၢအိၣ်ဒီးအီၤတဖၣ်ဒီးလၢကျဲတၢ်လၢၥ်ဘူၣ်လၢၤစ့ၤအဂီၢ်တနီၤဘၣ်တူၢ်လၢၥ်ဝဲလၢစ့ပယီၤဘူးထီၣ်လၢအကလီၢ်(၅၀)အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒီးတၢ်ဖီၣ်ဝဲတဖိးသဲစးထံဂုၤကီၢ်ဂၤဖိ(၁၂၀)သီအတၢ်တိၥ်ကျဲၤဖဲအသီ(၈၀)အတီၣ်ပူၤအံၤန့ၣ်,တၢ်ဖီၣ်သမံသမိးဆိဝဲဝံၤလၢအတၢ်ကမၣ်တဖၣ်အဖီခိၣ်တၢ်မၤဝဲတၢ်ဃ့စ့အီၣ်လီးသ့ၣ်တဖၣ်ဒီးတၢ်ဒုးဃၥ်အိၣ်ဝဲအသိး,တနီၤတၢ်ဆှၢက့ၤဝဲဆူကီၢ်ပယီၤအိၣ်ဝဲစ့ၢ်ကီးန့ၣ်လီၤ.
ခီဖျိကၠီၣ်တဲၣ်ခိၣ်နၢ်ဆှၢက့ၤဝဲကီၢ်ပယီၤဖိသ့ၣ်တဖၣ်အိၣ်ဝဲအဃိပှၤလၢအက့ၤကဒါက့ၤဆူကီၢ်ပယီၤအပူၤတဖၣ်အံၤဒ်(၂၀၂၄)နံၣ်လါအ့ဖြ့ၣ်အပူၤ,သုးကီၣ်ကးဘိးဘၣ်ရၤလီၤဝဲကမျၢၢ်တၢ်ဘၣ်ကဲသုးအိၣ်ဝဲအဖီခိၣ်,အဝဲသ့ၣ်တဖၣ်က့ၤဘျးစဲဝဲဒီးကမျၢၢ်တၢ်ဘၣ်ကဲသုးအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒ်န့ၣ်အသိး,တလါအံၤလါအီကူးအပူၤခီဖျိကီၢ်ကၠီၣ်တဲၣ်ပဒိၣ်ဆှၢက့ၤဝဲကီၢ်ပယီၤပှၤဃိၥ်ဖိအဂၤ(၈၀၀)ဆူကီၢ်ဆၢတၢ်လီၢ်တဖၣ်အပူၤအဃိ,ပှၤဃိၥ်ဖိသ့ၣ်တဖၣ်အံၤဘၣ်လဲၤကဲဝဲသုးကီၣ်ကးကမျၢၢ်တၢ်ဘၣ်ကဲသုးအိၣ်ဝဲအဖီခိၣ်ကၠီၣ်တဲၣ်ပဒိၣ်အတၢ်မၤအံၤကဲထီၣ်ဝဲတၢ်မၤဆီၣ်ထွဲသုးကီၣ်ကးလၢတဘၣ်လီၢ်ဘၣ်ကျဲဘၣ်အဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
လါအီကူး ၂၆သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ဃိၣ်သၢဖျၢၣ်-သရိၥ်ဝါကျဲမုၢ်အဖီခိၣ်နိၣ်ခၠိနဲၣ်သုးကီၣ်ကးပယီၤသုးကလၢၤခိၣ်ဃၢၤတၢ်လီၢ်တဖၣ်အပူၤတၢ်ဒုးဆူၣ်ထီၣ်ဝဲလၢတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤအဃိ,ပယီၤသုးအပှၤတနီၤဃ့ၢ်ဖျိးထီၣ်ကွံၥ်ဝဲလၢအသုးကလၢၤအပူၤအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တနံၤအံၤလါအီကူး(၂၆)သီအနံၤအပူၤပယီၤသုးအပှၤဃ့ၢ်ဖျိးထီၣ်ကွံၥ်ဝဲ(၃)ဂၤဒီးအဝဲသ့ၣ်တဖၣ်အံၤစုကဝဲၤတပၣ်ဃုၥ်ဝဲဘၣ်ဒီးဖဲမဟါလါအီကူး(၂၅)သီဟါခီအနံၤစ့ၢ်ကီး,ကဘီယူၤခးလီၤတၢ်လၢသုးကလၢၤခိၣ်ဃၢၤတၢ်လီၢ်တဖၣ်အပူၤအဃိကမျၢၢ်ဟံၣ်ဒီးတၢ်သူၣ်ထီၣ်တဖၣ်ဘၣ်ဟးဂီၤအါထီၣ်ကွံၥ်ဝဲကွ့ၢ်ကွ့ၢ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“တဂီၤညါအံၤနိၣ်ခၠိနဲၣ်ပယီၤသုးကလၢၤန့ၣ်ပယီၤသုးအပှၤ(၃)ဂၤဃ့ၢ်ဖျိးထီၣ်ကွံၥ်ဝဲန့ၣ်လီၤ.အဝဲသ့ၣ်တဖၣ်အကျိတပၣ်ဃုၥ်ဝဲဘၣ်.မ့မ့ၢ်လၢမဟါတနံၤဟါခီဒုကဘီယူၤ(Y12)ဟဲခးလီၤတၢ်လၢနိၣ်ခၠိနဲၣ်သဝီခိၣ်ဃၢၤတၢ်လီၢ်တၢ်ကျဲတဖၣ်အပူၤအဃိန့ၣ်ကမျၢၢ်ဟံၣ်သ့ၣ်တဖၣ်ဘၣ်ဟးဂီၤအါထီၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ဟီၣ်ကဝီၤအပူၤဟီၣ်ခိၣ်အမဲၥ်ဖံးခိၣ်တကပၤ,ကညီတၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်ခိးခးကးတံၥ်ဝဲအဖီခိၣ်,ပယီၤသုးတဖၣ်အံၤတူၢ်ဝဲတန့ၢ်ဘၣ်အဃိဃ့ၢ်ထီၣ်ကွံၥ်ဒ်အံၤအိၣ်ဝဲတနီၤဒီးပယီၤသုးလၢအဃ့ၢ်ဖျိးထီၣ်ကွံၥ်တဖၣ်အံၤမ့ၢ်လဲၤဃ့ၢ်ထီၣ်က့ၤဝဲဆူတၢ်လီၢ်ဖဲလဲၣ်အဂ့ၢ်န့ၣ်,တၢ်မၤလီၤအီၤတန့ၢ်ဒံးဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တကတီၢ်ဃီ,နိၣ်ခၠိနဲၣ်သုးကီၣ်ကးဒုးယၤအသုးကလၢၤအံၤမ့ၢ်ဝဲဒုးယၤသုးကလၢၤအရ့ဒိၣ်တဖျၢၣ်လၢအိၣ်ဆီလီၤအသးဖဲဃိၣ်သၢဖျၢၣ်ဒီးသရိၥ်ဝါအကျဲမုၢ်အဖီခိၣ်အဃိသုးကီၣ်ကးအံၤဒ်သိးအသုးကလၢၤသုးတလီၤကွံၥ်တဂ့ၤအဂီၢ်,စးထီၣ်ဖဲလါအီကူးအဆိကတၢၢ်တနွံအပူၤ,လၢကလံၤကျါတၢ်ဒုးတကပၤသုးကီၣ်ကးသူကဘီယူၤခးစၢၤလီၤတၢ်အိၣ်ဝဲတပယူၥ်ဃီအဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
ဒ်န့ၣ်အသိး,ခီဖျိသုးကီၣ်ကးသူကဘီယူၤခးလီၤတၢ်ဒီး,ခးလီၤစိစ့ၢ်ကီးကျိဖးဒိၣ်လၢတၢ်လီၢ်အဂၤအိၣ်စ့ၢ်ကီးဝဲအဃိကမျၢၢ်ဟံၣ်ဃီဒီးတၢ်သူၣ်ထီၣ်တဖၣ်ဘၣ်ဟးဂီၤအါထီၣ်ဝဲအသိး,လီၢ်ကဝီၤကမျၢၢ်တဖၣ်စ့ၢ်ကီးဘၣ်ဃ့ၢ်အိၣ်ကဒုအသးလၢခိၣ်ဃၢၤတၢ်ဘံၣ်တၢ်ဘၢအလီၢ်တဖၣ်အပူၤအါထီၣ်ဝဲအမဲၥ်ညါ,ဘၣ်အိၣ်ဆိးဝဲလၢတၢ်ပလီၢ်ပဒီအသးအပူၤလီၤအဂ့ၢ်,နိၣ်ခၠိနဲၣ်သဝီခိၣ်ဃၢၤလီၢ်ကဝီၤဖိတဖၣ်စံးဝဲန့ၣ်လီၤ.
လါအီကူာ် ၂၅ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ပူၤ တနံၤဃီအတီၢ်ပူၤပယီၤသုးပညိၣ်ခးလီၤကျိဖးဒိၣ်အဖျၢၣ်(၂၀) ဃၣ်ဃၣ်ဆူလီၢ်က၀ီၤဒူသ၀ီပူၤအဃိ ဘၣ်သံ၀ဲကမျၢၢ် ၁ ဂၤ အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ
ဖဲမဟါလါအီကူာ် ၂၄ သီ ဂီၤခီ ၇း၀၀ အဆၢကတီၢ် သုးကီၣ်ကးအမျိာ်သုး(၃၁၀)သုးရ့ၣ်လၢအိၣ်သ့ၣ်စ့ၣ်ယးအံၤ တၢ်ပၢၢ်ဆၢသုးပာ်ဖှိၣ်ကရူၢ်ကွံာ်စိအ၀ဲသ့ၣ်လၢ(၆၀ မမ)ကျိဖးဒိၣ်၀ံၤတကတီၢ်ဃီ ဖဲဂီၤခီ ၁၀း၂၀ အဆၢကတီၢ်န့ၣ် ပယီၤသုး၀ဲန့ၣ်က့ၤခးလီၤကဒါကျိဖးဒိၣ်တစှၤန့ၢ်အဖျၢၣ်(၂၀)ဃၣ်ဃၣ်လီၤတဲာ်ပိၢ်ဖးထီၣ်၀ဲလၢ၀ါဒၣ်ကွ့သ၀ီႇအခဲၤႇ သိခွၣ်ႇယ့ၤကၠီၤသ၀ီသ့ၣ်တဖၣ်အံၤအခိၣ်အဃၢၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ခီဖျိကျိဖးဒိၣ်အံၤအဃိ ဘၣ်သံ၀ဲ၀ါဒၣ်ကွ့သ၀ီဖိ ကိၤခၠါမ့ၣ်အီၤ အံၤဒီး တကးဒံးဘၣ်လၢန့ၣ်အမဲာ်ညါ ၦၤကမျၢၢ်အတၢ်ထူၣ်တၢ်ဘိလၢအိၣ်သ၀ီချၢသ့ၣ်တဖၣ်စ့ၢ်ကီးဘၣ်ဒိဘၣ်ထံးဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ် န့ၣ်လီၤႉ
ကၠဲးထိၣ်ကီၢ်ဆၣ်ပူၤ အပူၤကွံာ်လါယူၤလံတလါအတီၢ်ပူၤ...
လါအီကူး ၂၃ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢတီအူကီၢ်ရ့ၣ်သုးက့နီၣ်ဂံၢ်(၂)ထီတထူၣ်ကီၢ်ဆၣ်မုၢ်ထီၣ်ဟီၣ်ကဝီၤအပူၤဖဲပူၤကွံၥ်လါအီ ကူး(၂၁)သီအနံၤန့ၣ်ဒူသဝီလၢအိၣ်တီအူ-ထီတထူၣ်ကျဲမုၢ်လီၢ်လံၤတကပၤသ့ၣ်တဖၣ်သုးကီၣ်ကးဖီၣ်ဝဲပှၤသးစၢ်ပိၥ်ခွါ လၢအလ့ၣ်လိၤလ့ၣ်ထီၣ်ကအိၣ်ဝဲ(၅၀)ဃၣ်ဃၣ်အဂ့ၢ်လီၢ်ကဝီၤဖိသ့ၣ်တဖၣ်စံးဝဲန့ၣ်လီၤ.
ထီတထူၣ်ကီၢ်ဆၣ်ဟီၣ်ကဝီၤအပူၤတၢ်လီၢ်လၢအမ့ၢ်ထီတထူၣ်,ယ့ကၠီ,ကယ့ၤနံၤကိ,စွ့ၤစ့တၢ်လီၢ်သ့ၣ်တဖၣ်အပူၤပှၤပိၥ်ခွါသူၣ်ဘီၣ်သးစၢ်လၢလ့ၣ်လိၤလ့ၣ်ထီၣ်ဖဲထီတထူၣ်-တီအူကျဲမုၢ်လီၢ်လံၤအဖီခိၣ်သ့ၣ်တဖၣ်တနံၤဃီအတီၢ်ပူၤပယီၤသုး ကီၣ်ကးဖီၣ်ဝဲပှၤအဂၤ(၅၀)လၢတၢ်ဂ့ၢ်တအိၣ်နီတမံၤဘၣ်အဂ့ၢ်သ့ၣ်ညါဘၣ်လၢလီၢ်ကဝီၤဖိသ့ၣ်တဖၣ်အအိၣ်န့ၣ်လီၤ.
လီၢ်ကဝီၤပှၤပိၥ်မုၣ်လၢအထံၣ်ဘၣ်ဝဲတဂၤစံးဝဲလၢ"အမ့ၢ်လီၤအဝဲသ့ၣ်ဟးဖီၣ်ဝဲပှၤလၢသိလ့ၣ်ကျဲမုၢ်အဖီခိၣ်စ့ၢ်ကီးမီၤနီၤ. ပှၤကမျၢၢ်သ့ၣ်တဖၣ်န့ၣ်ဟးထီၣ်ဟးလီၤလၢကျဲမုၢ်ဖီခိၣ်ဒီးမၢပတုၥ်ဝဲဝံၤဖီၣ်ဝဲလီၤ. ဖဲန့ၣ်အကျါန့ၣ်(စွ့ၤစ့)သဝီဖိလၢအလဲၤ မၤတဖၣ်ပၥ်ဃုၥ်ဝဲမီၤနီၤ. မ့မ့ၢ်လၢ(စွ့ၤစ့)တကပၤန့ၣ်နၢ်ဟူလၢဟဲထီၣ်တွံၢ်ဝဲတုၤလၢဟံၣ်ပူၤညါ. ပှၤခဲလၢၥ်န့ၣ်မ့ၢ်ဝဲပှၤပိၥ် ခွါသ့ၣ်တဖၣ်လီၤ." အဂ့ၢ်စံးဝဲန့ၣ်လီၤ.
ထီတထူၣ်ကီၢ်ဆၣ်ဟီၣ်ကဝီၤအပူၤအံၤလၢအပူၤကွံၥ်အခါလံၤလံၤသုးကီၣ်ကးအတၢ်သမံသမိးတြဲၤသ့ၣ်တဖၣ်သမံသမိးတၢ်ဒီးဖီၣ်ဝဲပှၤကမျၢၢ်သ့ၣ်တဖၣ်အိၣ်ဝဲဘၣ်ဆၣ်ဖဲစှၤသီအတီၢ်ပူၤအံၤန့ၣ်ဖီၣ်န့ၢ်ဆူၣ်ဝဲပှၤကမျၢၢ်လၢတၢ်ဘၣ်ကဲသုးအံၤဟဲအါထီၣ်ဝဲအမဲၥ်ညါနုၥ်လီၤဖီၣ်ဝဲပှၤကညီတုၤလၢဟံၣ်ပူၤဃီပူၤအဂ့ၢ်လီၢ်ကဝီၤဂံၢ်ခီၣ်ထံးတၢ်ကစီၣ်တနီၤစံးဝဲန့ၣ်လီၤ.
"သဝီပူၤပှၤသဝီဖိသ့ၣ်တဖၣ်န့ၣ်လဲၤဃုထူလၢ(စွ့ၤစ့)တကပၤ, မၤဘၣ်ဝဲတသီလီၤမီၤနီၤ. လၢခံတနံၤန့ၣ်ဘၣ်လဲၤဃ့ၢ် အိၣ်ကဒုလၢပှၢ်ပူၤမီၤနီၤ. တုၤလီၤလၢမုၢ်နၤခီမးတၢ်မၤကစၢ်ဟဲက့ၤဃုက့ၤမးဟဲက့ၤတုၤလၢတၢ်မၤကစၢ်ဟံၣ်မီၤနီၤ. တၢ်မၤကစၢ်ဝဲန့ၣ်အဟံၣ်မဲၥ်ညါပှၤမၤတၢ်ဖိ(၅)ဂၤနါက့ပှၤဖီၣ်တၢ်အကျါန့ၣ်ပၥ်ဃုၥ်ဝဲလီၤ. တဲဝဲလၢတၢ်ဖီၣ်ဝဲပီၣ် တၥ်မီၤနီၤ." အဂ့ၢ်ပှၤလီၢ်ကဝီၤဖိလၢအသီတဂၤစံးဝဲဒၣ်န့ၣ်လီၤ.
ခီဖျိလၢသုးကီၣ်ကးတကပၤဟူးဂဲၤဖီၣ်ဝဲတၢ်လၢကီၢ်ဆၣ်ဟီၣ်ကဝီၤအပူၤဟဲအါထီၣ်ဝဲအဖီခိၣ်လီၢ်ကဝီၤပှၤသးစၢ်သ့ၣ်တဖၣ်ဟးထီၣ်ဟးလီၤဝဲတဘူၣ်လၢၤဘၣ်အသိးဘၣ်အိၣ်ဘၣ်ဆိးလၢတၢ်ပလီၢ်ပဒီသးပူၤအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးတီအူဝ့ၢ်ဟီၣ်ကဝီၤအပူၤလၢဒူသဝီတနီၤအပူၤသ့ၣ်တဖၣ်သုးကီၣ်ကးဒီးသုးကီၣ်ကးဖီလၥ်သဝီသးပှၢ်သ့ၣ်တဖၣ်ပၥ်ဖှိၣ်ထီၣ်အသးဒီးဟူးဂဲၤဟးဖီၣ်ဝဲတၢ်ဟဲအါထီၣ်န့ၢ်ဒံးပူၤကွံၥ်အခါဒ်အံၤအဖီခိၣ်လီၢ်ကဝီၤပှၤသးစၢ်ဖိသ့ၣ်တဖၣ်တလဲၤက့ၤအိၣ်ဆိးဘၣ်လၢတၢ်သဘျ့အပူၤဘၣ်အဂ့ၢ်ကီၢ်ပူၤဂံၢ်ခီၣ်ထံးတၢ်ကစီၣ်တနီၤပၥ်ဖျါဝဲန့ၣ်လီၤ.
လါအီကူာ် ၂၃ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇) လူၢ်ပျဲၢ်ကီၢ်ဆၣ်ႇတၢ်ကြဲၢ်ႇဒူယီၢ်ႇတန့ခၠါဒီးထံၤလိၤကီၢ်ဆၣ် ဒူသ၀ီသ့ၣ်တဖၣ် အပူၤ တၢ်ၦ့ၤသူ(WY)ကသံၣ်မူၤဘှီးန့ၢ်ညီညီကဒၣ်ဒီးအၦ့ၤစ့ၢ်ကီးတဒိၣ်၀ဲဒၣ်ဘၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကီၢ်ပယီၤပူၤတကီၢ်ခါခဲအံၤစ့ပယီၤအၦ့ၤလီၤ၀ဲဒၣ်တပယူာ်ဃီဒီးဒ်န့ၣ်အသိးစဲးဖီကဟၣ်အသိႇသိအီၣ်ဒီးဂံၢ်ခီၣ်ထံး တၢ်အီၣ်တၢ်အီတဖၣ်အၦ့ၤထီၣ်၀ဲဒၣ်ဘၣ်ဆၣ်မ့မ့ၢ်လၢ(WY)ကသံၣ်မူၤဘှီးအံၤတဖျၢၣ်န့ၣ်အၦ့ၤအိၣ်ဒၣ်ထဲ(၅၀၀)ကၠး တုၤလၢ(၁၀၀၀)ကၠးလီၤဒီးတၢ်ဟးၦ့ၤအီၤစ့ၢ်ကီးန့ၢ်၀ဲဒၣ်ညီညီကဒၣ်န့ၣ်လီၤႉ
တကးဒံးဘၣ်လၢန့ၣ်အမဲာ်ညါၦၤလၢအရၤလီၤဆါကသံၣ်မူၤဘှီးသ့ၣ်တဖၣ်အံၤန့ၣ်ခီဖျိအ၀ဲသ့ၣ်တၢ်ဘၣ်ထွဲအိၣ်ဒီး လီၢ်က၀ီၤဖီၣ်စုက၀ဲၤကရူၢ်ကရၢတနီၤအဃိလီၢ်က၀ီၤကမျၢၢ်တဖၣ်ကလဲၤတၢၣ်၀ဲအဂီၢ်လဲၤတၢၣ်၀ဲတဘူၣ်ဘၣ် အဂ့ၢ်န့ၣ် တၢ်ကြဲၢ်လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
“ခဲအံၤကသံၣ်ကသ့ၣ်တခါအံၤၦၤဆါအီၤဒ်သိးတၢ်ဖိတၢ်လံၤလၢအဖိးသဲစးတခါလီၤႉအ၀ဲသ့ၣ်ဆါ၀ဲန့ၣ်ၦၤသ့ၣ်ညါခဲလၢာ်လီၤႉတၢ်ကရူၢ်ကရၢတဒူၣ်မးတလဲၤဖီၣ်၀ဲဘၣ်ႉမ့၀ံၤအ၀ဲသ့ၣ်န့ၣ်မ့ၢ်၀ဲဒၣ်ကရူၢ်ကရၢအၦၤအဃိမတၤတဂၤမး လဲၤတၢၣ် ၀ဲတဘူၣ်ဘၣ်ႉနဘၣ်ပျံၤလၢအ၀ဲသ့ၣ်ကက့ၤမၤကဒါနၤတမံၤမံၤဒ်န့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
ဘၣ်ဃးဒီးကသံၣ်မူၤဘှီးတၢ်ဂ့ၢ်အံၤဆၢမုၢ်လၢ်လၢတၢ်ကဟးဟ့ၣ်၀ဲတၢ်သ့ၣ်ညါနၢ်ပၢၢ်ဒီးတၢ်ကဟံထီၣ်ဖီၣ်ထီၣ် အရ့တုၤလီၤတီၤ လီၤအဂ့ၢ်န့ၣ် ဖၣ်အၣ်၀့ၢ်ပူၤ လီၢ်က၀ီၤပိာ်မုၣ်တဂၤ စံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အဆိကတၢၢ်ၦၤလၢအသူကသံၣ်မူၤဘှီးတဖၣ်န့ၣ်တၢ်ကဟးဟ့ၣ်တၢ်သ့ၣ်ညါနၢ်ပၢၢ်ႇ ကဟ့ၣ်ပလီၢ်၀ဲ ဘၣ်ဃးကသံၣ်မူၤဘှီးတၢ်လီၤဘၣ်ယိၣ်ႇအိၣ်ဒီးတၢ်သိၣ်တၢ်သီအဂ့ၢ်အကျိၤတဖၣ်မီၤနီၤႉပဘၣ်ယိၣ်လၢ အ၀ဲသ့ၣ်န့ၣ် ကသးပ့ၤနီၣ်က့ၤအတၢ်အိၣ်မူဒီးကလီၤထွံလီၤဘျၢလၢကသံၣ်မူၤဘှီးအကျါမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
(WY)ကသံၣ်မူၤဘှီးအံၤခီဖျိတၢ်ၦ့ၤသူအီၤန့ၢ်ညီညီကဒၣ်အဃိလီၢ်က၀ီၤကမျၢၢ်တဖၣ်တနီၤန့ၣ်ဘၣ်ယိၣ်၀ဲလၢအဟံၣ်ဖိဃီဖိ ကသူ၀ဲဒၣ်ကသံၣ်မူၤဘှီးအံၤဒီးတကးဒံးဘၣ်ဘၣ်ယိၣ်စ့ၢ်ကီး၀ဲလၢအလုၢ်လၢ်သကဲးပ၀းကဟးဂီၤ၀ဲဒၣ်အဂ့ၢ်န့ၣ် လီၢ်က၀ီၤ ကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ
ဖၣ်အၣ်ကီၢ်ရ့ၣ်ပူၤ ဘၣ်ဃးကသံၣ်မူၤဘှီးဒီးတၢ်တၤကျိၣ်တၤစ့တၢ်ဖံးတၢ်မၤသ့ၣ်တဖၣ်အံၤ လၢတၢ်ကဟံထီၣ်ဖီၣ် ထီၣ်အရ့တုၤလီၤတီၤလီၤအဂီၢ်န့ၣ်...
လါအီကူာ် ၂၃ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အ့ကဘိၤသ၀ီဃၢၤ တၢ်ခိးခးပယီၤသုးသိလ့ၣ်လၢကျဲပူၤ ကဲထီၣ်၀ံၤလီၢ်ခံတကီၢ်ခါခဲအံၤအ၀ဲသ့ၣ်မၤအါထီၣ်သုးဂံၢ်ဘါအါအါဂီၢ်ဂီၢ်ဒီးခးတပျုာ်တပျီာ်ကျိဖးဒိၣ်တပယူာ်ဃီ အဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ
ဖဲလါအီကူာ် ၂၀ သီအနံၤ လၢဖွ့ဖူကၢ်ကရူၢ် အ့ၤကဘိၤသ၀ီဃၢၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ခိးခးပယီၤသုးသိလ့ၣ်လၢအဟဲထီၣ်(၂)ခိၣ်ဒီး ဖဲန့ၣ်ပယီၤသုးသံ(၂)ဂၤႇသိလ့ၣ်အူအီၣ်တခိၣ်န့ၣ်လီၤႉ တၢ်ကဲထီၣ်သးဖဲန့ၣ် ၀ံၤတနံၤဃီပယီၤသုးအံၤမၤအါထီၣ်ရၤလီၤအသုးဂံၢ်ဘါလၢတၢ်ကဲထီၣ်သးလီၢ်အခိၣ်အဃၢၤဒီး ခးလီၤ၀ဲကျိဖးဒိၣ် တပယူာ်ဃီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအိၣ်ဖဲန့ၣ်တဂၤ စံး၀ဲန့ၣ်လီၤႉ
အ၀ဲစံး၀ဲလၢ“ဖဲၦၤခိးခးအ၀ဲသ့ၣ်သိလ့ၣ်၀ံၤဘျီန့ၣ်ပယီၤသုးန့ၣ်ဟဲထီၣ်လီၤႉအ၀ဲသ့ၣ်ရၤလီၤအၦၤဖဲကါကျဲကပၤန့ၣ်ဒီတကျိၤလီၤႉဟဲမၤအါထီၣ်အၦၤကအိၣ်လၢ(၈၀)ဖီခိၣ်ညါႉဖဲၦၤခးအသိလ့ၣ်တနံၤန့ၣ်ပယီၤသုးခးလီၤကျိဖးဒိၣ်အဖျၢၣ်ဒုနဂံၢ်မးတလၢၤတကၠီလၢၤဘၣ်ႉခဲအံၤနါက့ခး၀ဲဒံးႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပယီၤသုးလၢအဟဲမၤအါထီၣ်အဂံၢ်ဘါသ့ၣ်တဖၣ်န့ၣ်မ့ၢ်၀ဲပယီၤသုးခီၣ်သုးရ့ၣ်(ခလရ-၂), ခီၣ်ချ့သုးရ့ၣ်(ခမရ-၂၀၇), (၉၆)သုးပာ်ဖှိၣ်သ့ၣ်တဖၣ်ဒီးတကီၢ်ခါခဲအံၤအ၀ဲသ့ၣ်ဟူးဂဲၤအိၣ်ခူသူၣ်သးလၢကျဲမုၢ်ကပၤႇ ဘၣ်ယိၣ်လၢတၢ်ပၢၢ်ဆၢ ကရူၢ် ကလဲၤခးအ၀ဲသ့ၣ်အဃိ ပယီၤသုးကလၢၤလၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ခးလီၤစၢၤ၀ဲကျိဖးဒိၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
ဒ်လီၢ်ခံကတၢၢ်တၢ်အိၣ်သးအသိးန့ၣ်ကျိဖးဒိၣ်အဃိၦၤကမျၢၢ်သံဘၣ်ဒိဘၣ်ထံးတအိၣ်ဒံးဘၣ်ဒီးပယီၤသုးအံၤခီဖျိ...
လါအီကူး ၂၃ သီ, ၂၀၂၄ နံၣ်, ခ့ၣ်အဲးစံၣ်
ကညီကီၢ်စဲၣ်-ဒူသထူၣ်ကီၢ်ရ့ၣ်ကၠဲးထိၣ်ကီၢ်ဆၣ်,(လဲလၢကူ)ကရူၢ်အပူၤဖဲပူၤကွံၥ်လါအီကူး(၂၁)သီဂီၤခီအဆၢကတီၢ်မ့ၢ်လၢပယီၤ သုးကီၣ်ကးနုၥ်လီၤခးဝဲတၢ်ဖဲ(လဲၢ်ပၠၣ်)သဝီအဃၢၤဟံၣ်တဖျၢၣ်ပူၤအဃိဘၣ်သံဝဲ(DVB)တၢ်ကစီၣ်သန့အပှၤမၤတၢ်ကစီၣ်ဖိ(Citizen Journalist-CJ)လၢအမ့ၢ်(ကိဝ့ထိၣ်အူ)တဂၤဒီး(Freelance)ပှၤမၤတၢ်ကစီၣ်ဖိလၢအမ့ၢ်(ကိထဲၣ်မၠဲၣ်သူ)ခံဂၤသ့ၣ်တဖၣ် အံၤအဂ့ၢ်သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ်ဘူးဒီးအဝဲသ့ၣ်န့ၣ်လီၤ.
ဖဲ(၂၁)သီအနံၤန့ၣ်တၢ်ပၢၢ်ဆၢသုးဖိ(၃)ဂၤလၢဟဲတုၤအိၣ်ဝဲဖဲ(လဲၢ်ပၠၣ်)သဝီ(ကိထဲၣ်မၠဲၣ်)အဟံၣ်ကရၢၢ်အပူၤအဆၢကတီၢ်န့ၣ်မ့ၢ်လၢပယီၤသုးကီၣ်ကးတကပၤဟဲနုၥ်လီၤခးဝဲဒၣ်ဒ်အံၤအဖီခိၣ်ဘၣ်သံဝဲတလၢၤကီၢ်စဲၣ်ဂံၢ်ခီၣ်ထံးတၢ်ကစီၣ်ဖိလၢအမ့ၢ်(ကိဝ့ထိၣ်အူ)ဒီး(ကိထဲၣ်မၠဲၣ်သူ)သ့ၣ်တဖၣ်ဃုၥ်ဒီး(ကၠဲးထိၣ်)တၢ်ပၢၢ်ဆၢသုးပၥ်ဖှိၣ်ကရူၢ်အပှၤ(၂)ဂၤ,ခဲလၢၥ်(၄)ဂၤအဂ့ၢ်သ့ၣ်ညါဘၣ်န့ၣ်လီၤ.
"တၢ်နုၥ်လီၤကဝီၤတံၢ်ခးဝဲဖဲ(ထဲၣ်မၠဲၣ်)အဟံၣ်ကရၢၢ်အပူၤန့ၣ်တၢ်ပၢၢ်ဆၢသုးကရူၢ်အပှၤပူၤဖျဲးကွံၥ်ဝဲတဂၤမီၤနီၤ. ပှၤလၢသံအစိၣ်သ့ၣ် တဖၣ်န့ၣ်ဒုတၢ်တက့ၤန့ၢ်ဘၣ်ဘၣ်. ပှၤအစိၣ်ဟဲတုၤဝဲလၢကၠဲးထိၣ်တၢ်ဆါဟံၣ်န့ၣ်(၂)စိၣ်လီၤ." အဂ့ၢ်ပှၤလၢအဘူးဒီးတၢ်ကစီၣ်ဖိ(ကိ ထဲၣ်မၠဲၣ်သူ)တဂၤစံးဝဲဒၣ်န့ၣ်လီၤ.
ဖဲတၢ်နုၥ်လီၤခးဝဲတၢ်အတီၢ်ပူၤန့ၣ်(ကိဝ့ထိၣ်အူ)ဒီးတၢ်ပၢၢ်ဆၢသုးဖိတဂၤဘၣ်ဒိသံကွံၥ်ဝဲဖဲန့ၣ်တဘျီဃီဒီးမ့မ့ၢ်လၢ(ကိထဲၣ်မၠဲၣ်သူၤ)ဒီးတၢ်ပၢၢ်ဆၢသုးဖိလၢအအိၣ်တ့ၢ်တဂၤခီန့ၣ်ပယီၤသုးကီၣ်ကးက့ၤဖီၣ်ကိးဝဲဝံၤအလီၢ်ခံမၤသံကွံၥ်ဝဲဒၣ်အဂ့ၢ်သ့ၣ်ညါဘၣ်အသိးပှၤ(၄)ဂၤအံၤအစိၣ်န့ၣ်တၢ်တဟ့ၣ်လီၤက့ၤဝဲဆူအဟံၣ်ဖိဃီဖိအအိၣ်ဘၣ်ဒီးဒွဲၣ်အူထီၣ်က့ၤဝဲအဂ့ၢ်သ့ၣ်ညါဘၣ်လၢလီၢ်ကဝီၤဂံၢ်ခီၣ်ထံး တၢ်ကစီၣ်သ့ၣ်တဖၣ်အအိၣ်န့ၣ်လီၤ.
(DVB)တၢ်ကစီၣ်သန့တကပၤစ့ၢ်ကီးဘၣ်ထွဲဒီး(ကိဝ့ထိၣ်အူ),(ထဲၣ်မၠဲၣ်သူ)သံတၢ်ဂ့ၢ်အံၤန့ၣ်ဒ်တၢ်ကစီၣ်ဖိသ့ၣ်တဖၣ်အသိးဒ်သိးကမၤန့ၢ်ဘၣ်တၢ်ကစီၣ်လၢအလီၤတံၢ်လီၤဆဲးဒီးအမ့ၢ်အတီအဂီၢ်လၢမူဒါအိၣ်ဝဲအဖီခိၣ်မ့ၢ်ဝဲတၢ်ဟူးဂဲၤရ့လိၥ်ဟံန့ၢ်ဝဲတၢ်ကစီၣ်လီၤဒီးလၢတၢ်ခးသံအဝဲသ့ၣ်တၢ်အိၣ်သးအံၤပူၤန့ၣ်တမ့ၢ်ပှၤလၢအစိၥ်စုကဝဲၤဘၣ်အဂ့ၢ်တၢ်ကစီၣ်အပူၤပၥ်ဖျါဝဲန့ၣ်လီၤ.
"ကိဝ့ထိၣ်အူန့ၣ်မ့ၢ်ပှၤမၤတၢ်လၢပျီပူၤတဂၤဒီးမ့ၢ်ဝဲတၢ်ကစီၣ်ဖိအဂ့ၤတဂၤလၢထုးထီၣ်တၢ်ကစီၣ်,လူၤတၢ်ကစီၣ်လၢအလီၤတံၢ်လီၤဆဲးတဂၤလီၤ. မ့မ့ၢ်လၢ(ကိထဲၣ်မၠဲၣ်အူ)နါက့န့ၣ်ဖဲပှၤထီဒါပၥ်ဖျါထီၣ်သးအခါန့ၣ်အဝဲဒိတၢ်ဂီၤမူတၢ်ကစီၣ်အဃိတၢ်ခးဘၣ်အီၤလၢကျိ ဒီးတၢ်ဖီၣ်အီၤဝံၤဘၣ်လီၤလၢဃိၥ်ပူၤမီၤနီၤ. ဖဲဟဲက့ၤဟးထီၣ်လၢဃိၥ်ပူၤဝံၤန့ၣ်ဆဲးမၤကဒီးတၢ်ကစီၣ်တၢ်မၤလီၤ. ပှၤသးစၢ်ဒ်သိးအ ဝဲသ့ၣ်တဖၣ်န့ၣ်ဘၣ်တၢ်မၤသံဒ်အံၤန့ၣ်မ့ၢ်ဝဲတၢ်လီၤမၢ်ဖးဒိၣ်တခါညါလီၤ." အဂ့ၢ်တၢ်ကစီၣ်ဖိလၢအမၤသကိးဘၣ်တၢ်ဒီးအဝဲသ့ၣ်တ ဂၤစံးဝဲန့ၣ်လီၤ.
ဒ်သုးကီၣ်ကးအတၢ်ရၤလီၤတၢ်ကစီၣ်သ့ၣ်တဖၣ်ပၥ်ဖျါဝဲလၢတၢ်ပၢၢ်ဆၢသုးပၥ်ဖှိၣ်ဟဲတုၤအိၣ်တၢ်အလီၢ်တၢ်ကစီၣ်အသိးဘၣ်တၢ်နုၥ်လီၤခးဝဲဒီးဖီၣ်ဝဲအဖီခိၣ်ဘၣ်သံကွံၥ်ဝဲ(၄)ဂၤဒီးဃ့ၢ်ပူၤဖျဲးထီၣ်အသး(၇)ဂၤအဂ့ၢ်တၢ်ကွဲးပၥ်ဖျါထီၣ်ဝဲဒၣ်န့ၣ်လီၤ.
(ကိဝ့ထိၣ်အူ)သးနံၣ်(၂၆)နံၣ်တဂၤအံၤဖဲသုးဟံးန့ၢ်တၢ်စိတၢ်ကမီၤဝံၤအလီၢ်ခံမ့ၢ်လၢထီဒါပၥ်ဖျါထီၣ်သးအဃိတၢ်ထုးထီၣ်တၢ်ကလုၢ်လၢ(ကွီၢ်-၅၀၅)ဒီးဘၣ်အိၣ်ကဒုအသးလၢဟံၣ်ပူၤဖးယံၥ်ဖးထၢအဖီခိၣ်အဝဲထီၣ်ဝဲတၢ်ကစီၣ်တၢ်သိၣ်လိသ့ၣ်တဖၣ်ဒီးအိၣ်ဆၢထၢၣ် မၤက့ၤတၢ်မၤဒ်တၢ်ကစီၣ်ဖိတဂၤအသိးန့ၣ်လီၤ.
ဒ်န့ၣ်အသိး(ကိထဲၣ်မၠဲၣ်)လၢအသးနံၣ်အိၣ်(၂၈)နံၣ်အံၤဖဲ(၂၀၂၁)နံၣ်လါမးၡးအတီၢ်ပူၤတၢ်ထီဒါသုးမီၤစိရိၣ်ဒီးတၢ်ပၥ်ဖျါထီၣ်သးအကျါဖဲအဝဲလူၤတၢ်ကစီၣ်ဒိတၢ်ဂီၤမူအတီၢ်ပူၤသုးကီၣ်ကးခးအီၤဒီးဖီၣ်ဝဲအီၤဝံၤတၢ်ပၥ်လီၤအီၤလၢဃိၥ်ပူၤတဂၤန့ၣ်လီၤ. ဖဲအဝဲဟဲက့ၤဟး ထီၣ်ကဒါက့ၤအလီၢ်ခံအဝဲဆဲးမၤဒံးဝဲတၢ်ကစီၣ်ဒ်(Freelance)တဂၤအသိးအဂ့ၢ်သ့ၣ်ညါဘၣ်လၢပှၤအိၣ်ဘူးဒီးအီၤအအိၣ်န့ၣ်လီၤ.
ကီၢ်ပယီၤအပူၤစးထီၣ်လၢသုးမီၤစိရိၣ်ဟံန့ၢ်ဆူၣ်ကွံၥ်တၢ်စိတၢ်ကမီၤဝံၤအလီၢ်ခံတၢ်ကစီၣ်(Media)သ့ၣ်တဖၣ်တၢ်ပံးကွံၥ်ဝဲဒီးတၢ်ဆီၣ်တံၢ်မၤနၢၤပှၤမၤတၢ်ကစီၣ်ဖိလၢကျဲအဘိဘိအသိးလၢဃိၥ်သ့ၣ်တဖၣ်ပူၤတၢ်ကစီၣ်ဖိသ့ၣ်တဖၣ်လၢအတဟဲက့ၤထူၣ်ဖျဲးထီၣ်သ့ၣ်တဖၣ်အိၣ်ဒံးဝဲ(၅၀)ဂၤအဂ့ၢ်ကီၢ်ပယီၤတၢ်ကစီၣ်သဘျ့ကီၣ်ကး(IPCM)ထုးထီၣ်ပၥ်ဖျါဝဲန့ၣ်လီၤ.
လါအီကူး ၂၂ သီ, ၂၀၂၄ နံၣ်, ခ့ၣ်အဲးစံၣ်
ယိၤဒိၣ်ကီၢ်စဲၣ်ကလံၤစိးဟီၣ်ကဝီၤ(တအီ)ဒီကလုၥ်တၢ်ထူၣ်ဖျဲးသုးမုၢ်ဒိၣ်(TNLA)ထီၣ်ဒိၣ်စိန့ၢ်ဝဲတၢ်လီၢ်တၢ်ကျဲသ့ၣ်တဖၣ်အပူၤခီဖျိလၢသုးကီၣ်ကးတကပၤဟဲက့ၤခးလီၤဝဲတၢ်ဒီးကဘီယူၤအဃိပှၤလီၢ်အိၣ်ကမှံဖိသ့ၣ်တဖၣ်အနီၣ်ဂံၢ်အိၣ်ထီၣ်တုၤလၢတကလီၢ်ဘျဲၣ်လံအဂ့ၢ်ယိၤဒိၣ်ပှၤဂ့ၢ်ဝီခွဲးယၥ်ဂံၢ်ခီၣ်ထံးကရၢ(SHRF)အပှၤဘၣ်မူဘၣ်ဒါ(ယ့လယဲၣ်ဟၢၤ)စံးဝဲဒၣ်န့ၣ်လီၤ.
"လၢယိၤဒိၣ်ကီၢ်စဲၣ်ကလံၤစိးတကပၤန့ၣ်ပှၤလၢဘၣ်ဃ့ၢ်တၢ်ဒုးတၢ်ယၤအိၣ်တုၤလၢတကလီၢ်ဘျဲၣ်လံမီၤနီၤ. ပှၤလီၢ်ကဝီၤဖိအါဒၣ် တက့ၢ်န့ၣ်က့ၤလၢအဟံၣ်တဘူၣ်ဒံးဘၣ်. မ့ၢ်လၢဟီၣ်လၥ်မ့ၣ်ပိၢ်အိၣ်ဝဲအဃိမီၤနီၤ. ပှၤဟီၣ်ခိၣ်ဖိအတၢ်ခွဲးတၢ်ယၥ်သ့ၣ်တဖၣ်န့ၣ်ဘၣ် တၢ်မၤထီဒါအီၤလၢကျဲအါဘိလီၤမီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲပူၤကွံၥ်လါအီကူး(၁၈)သီအနံၤလၢ(သံပီ)ဝ့ၢ်အပူၤခီဖျိသုးကီၣ်ကးအကဘီယူၤဟဲတ့ၢ်လီၤဝဲမ့ၣ်ပိၢ်ဖဲပယီၤသုးခီၣ်သုးရ့ၣ်(ခလရ-၂၃)တၢ်လီၢ်အဃၢၤဖဲ(နါမိၤ)ကဝီၤဒ့ပူၤအဃိဘၣ်သံဝဲပှၤလီၢ်ကဝီၤဖိ(၂)ဂၤအဂ့ၢ်(TNLA)ထုးထီၣ်ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါဖဲပူၤကွံၥ်လါအီကူး(၁၆)သီအနံၤန့ၣ်စ့ၢ်ကီးမ့ၢ်လၢသုးကီၣ်ကးဟဲတ့ၢ်လီၤမ့ၣ်ပိၢ်ဖဲ(သံပီ)ကီၢ်ဆၣ်,(နၢလၢၤ)တၢ်လီၢ်ပူၤအဃိဘၣ်ဒိဝဲလီၢ်ကဝီၤပိၥ်မုၣ်တဂၤအသိးဘၣ်ဟးဂီၤကွံၥ်ဝဲကမျၢၢ်ဟံၣ်ခံဖျၢၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး(တအီ)သုးမုၢ်ဒိၣ်(TNLA)ဒိၣ်စိဃၥ်ဝဲ(သံပီ)ဝ့ၢ်အံၤအပူၤစးထီၣ်လၢလါအီကူး(၁)သီအနံၤတုၤ(၁၉)သီအနံၤအတီၢ်ပူၤအံၤမ့ၢ်လၢပယီၤသုးကီၣ်ကးပညိၣ်ပၥ်ပနီၣ်ဟဲခးလီၤဝဲတၢ်ဒ်အံၤအဖီခိၣ်ကမျၢၢ်ပှၤလီၢ်ကဝီၤဖိဘၣ်သံဝဲခဲလၢၥ်(၁၄)ဂၤအသိးဘၣ်ဒိဝဲခဲလၢၥ်အိၣ်(၄၂)ဂၤအဂ့ၢ်(TNLA)ထုးထီၣ်ပၥ်ဖျါဝဲန့ၣ်လီၤ.
လါအီကူး ၂၂သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၅)မုၢ်တြီၢ်ကီၢ်ရ့ၣ်အပူၤ,သုးကီၣ်ကးကဘီယူၤခးလီၤတၢ်အဃိ,တၢ်ဘံၣ်တၢ်ဘၢတအိၣ်ဝဲလၢလီၢ်အိၣ်ကမှံဖိတဖၣ်အဂီၢ်ဘၣ်အဂ့ၢ်,မုၢ်တြီၢ်ကီၢ်ရ့ၣ်ပှၤတဝၢတၢ်ပၢဆှၢရဲၣ်ကျဲၤတၢ်အပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကီၢ်ခါခဲအံၤမုၢ်တြီၢ်ကီၢ်ရ့ၣ်ဟီၣ်ကဝီၤတဖၣ်အပူၤ,သုးကီၣ်ကးကဘီယူၤဟးခးလီၤဝဲတၢ်အဖီခိၣ်ကမျၢၢ်လီၢ်အိၣ်ကမှံဖိတဖၣ်အဂီၢ်တၢ်ဘံၣ်တၢ်ဘၢတအိၣ်ဝဲဘၣ်ဒီးအဝဲသ့ၣ်တဖၣ်အံၤဘၣ်အိၣ်ဝဲလၢပှၢ်ပူၤအဃိသဂၢၢ်ဘၣ်ဝဲတၢ်အီၣ်တၢ်အီတၢ်အိၣ်တၢ်ဆိးတၢ်ဂ့ၢ်ကီတဖၣ်အိၣ်ဝဲအဂ့ၢ်,မုၢ်တြီၢ်တၢ်ပၢဆှၢရဲၣ်ကျဲၤပှၤတဝၢတၢ်ဂုၤထီၣ်ပသီထီၣ်ကမံးတံၥ်ခိၣ်ပဒိၣ်စီၤညိၣ်ဝ့ပၥ်ဖျါဝဲလၢမုၢ်တြီၢ်ကီၢ်ရ့ၣ်တၢ်ဘိးဘၣ်ရၤလီၤအပူၤဒ်အံၤန့ၣ်လီၤ.
အဝဲစံးဝဲလၢ“အခဲအံၤကဘီယူၤဟးလူၤခးလီၤတၢ်ပူၤတီၤပူၤတီၤအိၣ်ဝဲအဖီခိၣ်,ကမျၢၢ်ဃ့ၢ်အိၣ်ကဒုတဖၣ်အံၤအိၣ်နါက့ဘၣ်အိၣ်ဝဲလၢတၢ်ပလီၢ်အပူၤအဃိအဝဲသ့ၣ်တဖၣ်လိၣ်ဝဲတၢ်ဘံၣ်တၢ်ဘၢန့ၣ်လီၤ.ဒီးခဲအံၤခီဖျိကဲထီၣ်ဝဲပှၤလီၢ်အိၣ်ကမှံဖိအဃိဘၣ်အိၣ်လၢခ့ပူၤပှၤပူၤဒုတဒ်သိးဝဲလၢအိၣ်ဆိးဝဲလၢဒူပူၤသဝီအပူၤဘၣ်အဃိအဝဲသ့ၣ်တဖၣ်အဂီၢ်တၢ်အိၣ်ဆိးလီၢ်ကျဲတဘၣ်လီၢ်ဘၣ်စးဘၣ်အိၣ်ဝဲလီၤ.ဒီးလၢတၢ်ကီတၢ်ခဲတဖၣ်အဖီခိၣ်န့ၣ်တၢ်အိၣ်တၢ်ဆိးတၢ်ဂ့ၢ်ကီအံၤမ့ၢ်တၢ်လၢအဝဲသ့ၣ်တဖၣ်သဂၢၢ်ဘၣ်ဝဲအသိး,အတၢ်လိၣ်ဘၣ်နီၢ်နီၢ်ဒုမ့ၢ်ဝဲတၢ်အီၣ်မိၢ်ပှၢ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,မုၢ်တြီၢ်ကီၢ်ရ့ၣ်အပူၤလီၢ်အိၣ်ကမှံဖိသ့ၣ်တဖၣ်အံၤ,တၢ်နီၤဖးအီၤအပတီၢ်(၃)ကလုၥ်ဒီးတၢ်(၃)ကလုၥ်အံၤမ့ၢ်ဝဲ(၁)လီၢ်အိၣ်ကမှံဖိလၢအမ့ၢ်ဝဲကမျၢၢ်လီၢ်ကဝီၤဖိလၢတၢ်ကဲထီၣ်သးဒီးအီၤကိၤကိၤလၢၤလၢၤဂ့ၢ်ဂီၢ်အူတဖၣ်
(၂)လီၢ်အိၣ်ကမှံကမျၢၢ်လီၢ်ကဝီၤဖိလၢအမ့ၢ်ဝဲပှၤလၢအတူၢ်ဘၣ်ဃုၥ်တၢ်လၢအအိၣ်ဘူးဒီးတၢ်ကဲထီၣ်သးအလီၢ်တဖၣ်
(၃)လီၢ်အိၣ်ကမှံဖိလၢအမ့ၢ်ဝဲ,ဒူသဝီကမျၢၢ်လီၢ်ကဝီၤဖိလၢအိၣ်ဆိးလၢဒုၣ်ဒါဟးထီၣ်ဟးလီၤဟီၣ်ကဝီၤအပူၤတဖၣ်အဂ့ၢ်,အဝဲစံးအါထီၣ်ဝဲန့ၣ်လီၤ.
တကတီၢ်ဃီ,လီၢ်အိၣ်ကမှံဖိလၢအမ့ၢ်ဝဲပှၤ(၃)တပတီၢ်တကလုၥ်အံၤအနီၢ်ကစၢ်ဆီၣ်ထွဲလိၥ်သးတိစၢၤမၤစၢၤလိၥ်အသးအတၢ်ရဲၣ်တၢ်ကျဲၤအဖီခိၣ်အိၣ်ဆိးဖံးမၤအီၣ်အီဝဲသ့ဒံးဝဲဘၣ်ဆၣ်,မ့မ့ၢ်လၢလီၢ်အိၣ်ကမှံဖိ(၁)ဒီး(၂)အပတီၢ်အံၤန့ၣ်ဘၣ်ဒိးသန့ၤဝဲအသးလၢပှၤတဝၢခိၣ်နၢ်ဘၣ်မူဘၣ်ဒါတဖၣ်ဘၣ်ဒီးတၢ်ဘၣ်ကနၣ်ထွဲကွၢ်ထွဲအဝဲသ့ၣ်တဖၣ်လၢတၢ်အီၣ်မိၢ်ပှၢ်ဒီးတၢ်အိၣ်တၢ်ဆိးသ့ၣ်တဖၣ်ဃုၥ်ဒီးတၢ်အိၣ်ဆူၣ်အိၣ်ချ့တၢ်ကူၣ်ဘၣ်ကူၣ်သ့တၢ်လိၣ်ဘၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်ဒ်မုၢ်တြီၢ်ကီၢ်ရ့ၣ်ပှၤတဝၢခိၣ်နၢ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
တကးဒံးဘၣ်,လၢတၢ်ဆီၣ်ထွဲမၤစၢၤဝဲလီၢ်အိၣ်ကမှံဖိတဖၣ်အံၤန့ၣ်လီၢ်ကဝီၤပှၤတဝၢပှၤဘၣ်မူဘၣ်ဒါတဖၣ်ဖီၣ်လိၥ်စုမၤသကိးတၢ်ဒီးပှၤမၤစၢၤပှၤလီၢ်အိၣ်ကမှံဖိကမံတံၥ်(CIDKP)ဃုၥ်ဒီးကညီပိၥ်မုၣ်ကရၢ(KWO)သ့ၣ်တဖၣ်အိၣ်ဝဲအသိး,ဒ်သိးလီၢ်အိၣ်ကမှံသူၣ်စၢ်သးဘီၣ်ဒီးဖိဒံဖိသၣ်တဖၣ်ကဒိးန့ၢ်ဘၣ်တၢ်ကူၣ်ဘၣ်ကူၣ်သ့ဒီးထီၣ်ဘၣ်ဝဲကၠိအဂီၢ်န့ၣ်,ကညီကူၣ်သ့ဆဲးလၤဝဲၤကျိၤ(KECD)ဟူးဂဲၤဝဲလၢသူၣ်ထီၣ်န့ၢ်ဝဲတၢ်မၤလိလီၢ်လၢပှၢ်ပူၤအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,ကညီပှၤတၢ်ဝၢတၢ်ကရၢကရိလၢအမၤစၢၤဝဲလီၢ်အိၣ်ကမှံသ့ၣ်တဖၣ်အံၤတၢ်စူၤခါအဆၢကတီၢ်,ကျဲတၢ်ဟးထီၣ်က့ၤလီၤတၢ်ကီတၢ်ခဲအိၣ်ဝဲအဖီခိၣ်သဂၢၣ်ဘၣ်ဝဲဝံစိၥ်တီဆှၢတၢ်အတၢ်ဂ့ၢ်ကီတဖၣ်အိၣ်ဝဲအဂ့ၢ်,ပှၤတဝၢခိၣ်နၢ်တဖၣ်စံးဝဲဒၣ်န့ၣ်လီၤ.
မုၢ်တြီၢ်ကီၢ်ရ့ၣ်အပူၤအံၤစးထီၣ်ဖဲ(၂၀၂၁)နံၣ်လါဖ့ၤဘြူၤအါရံၤသုးဟံန့ၢ်တၢ်စိကမီၤအလီၢ်ခံတုၤလၢ(၂၀၂၄)နံၣ်လါယူၤလံအပူၤလီၢ်အိၣ်ကမှံဖိအနီၢ်ဂံၢ်နီၢ်ဒွးအိၣ်ဝဲဘူးထီၣ်လၢ(၉၀၀၀၀)ကလးဃၣ်ဃၣ်အဂ့ၢ်ခ့ၣ်အဲၣ်ယူၣ်အတၢ်မၤနီၣ်မၤဃါအိၣ်စ့ၢ်ကီးဝဲဒၣ်န့ၣ်လီၤ.
လါအီကူာ် ၂၂ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ် ဖွ့ဖူကၢ်ကရူၢ်အပူၤ ပယီၤသုးသိလ့ၣ်လၢအဟဲထီၣ်(၂)ခိၣ် ခီဖျိ(KNLA) တၢ်ပၢၢ်ဆၢသုးပာ်ဖှိၣ်ကရူၢ် ခိးခးအ၀ဲသ့ၣ်လၢကျဲအဃိ သံ၀ဲဒၣ်(၂)ဂၤဒီးသိလ့ၣ်အူအီၣ်၀ဲဒၣ်တခိၣ် အဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲန့ၣ်လီၤႉ
ကၠဲးထိၣ်ကီၢ်ဆၣ် ဖွ့ဖူကၢ်ကရူၢ် အ့ၤကဘိၤသ၀ီဃၢၤ ဖဲလါအီကူာ် ၂၀ သီ မုၢ်ထူၣ် ၁၂ နၣ်ရံၣ်အဆၢကတီၢ် ပယီၤသုးသိလ့ၣ်(၂)ခိၣ်လၢအဟဲထီၣ်အံၤခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃) သုးပာ်ဖှိၣ် ခိးခး၀ဲလၢကျဲအဃိသိလ့ၣ်အူအီၣ်ဒီးပယီၤသုးသံကဲထီၣ်သးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ
“တၢ်န့ၣ်အ၀ဲသ့ၣ်အိၣ်ဟဲလၢပကိတကပၤမီၤနီၤႉတၢ်ပၢၢ်ဆၢသုးကရူၢ်လဲၤခိးခး၀ဲသိလ့ၣ်ႉသိလ့ၣ်လၢတၢ်မဲာ်ညါ တခိၣ်န့ၣ် ဘၣ်လၢအခံဘျီနီစံၣ်ထီၣ်၀ဲႉလၢအ၀ဲခိၣ်ခီန့ၣ်အူအီၣ်မီၤနီၤႉအအူအီၣ်တခိၣ်န့ၣ်အခိၣ်ပံးခံပံးခဲလၢာ်လီၤႉမ့ၢ်အတီၣ်မနုၤလဲၣ်တသ့ၣ်ညါဘၣ်ႉခီဖျိမ့ၣ်အူအီၣ်အဃိၦၤနီသိလ့ၣ်ဖိတဂၤဒီးၦၤအိၣ်လၢအကပၤတဂၤန့ၣ်သံတ့ၢ်ဃုာ်ဖဲ သိလ့ၣ်ပူၤန့ၣ်လီၤႉ ၦၤသံခံဂၤန့ၣ်ပယီၤသုးလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ
တၢ်ခိးခးပယီၤသုးသိလ့ၣ်ကဲထီၣ်၀ံၤလီၢ်ခံတကီၢ်ခါခဲအံၤ ပယီၤသုးဟဲမၤအါထီၣ်အနီၣ်ဂံၢ်လၢဟီၣ်က၀ီၤအပူၤဖဲန့ၣ်...