လါအီကူး ၂၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့နီၣ်ဂံၢ်(၃),လၢၢ်ဒိၣ်ကီၢ်ဆၣ်အပူၤ,ဖဲ မဟါလါအီကူး(၂၀)သီအနံၤန့ၣ်မ့ၢ်လၢသုးကီၣ်ကးပညိၣ်ခးလီၤဝဲ(၁၂၀)မမကျိဖးဒိၣ်(၄)ဖျၢၣ်ဆူ(မိခိး)သဝီပူၤအဃိလီၤတဲၥ်ပိၢ်ဖးထီၣ်အက့အခီဖျိးဘၣ်ဝဲ(မိခိး)သဝီတၢ်မၤလိကၠိတၢ်သူၣ်ထီၣ်အဂ့ၢ်လီၢ်ကဝီၤအပှၤဘၣ်မူဘၣ်ဒါစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးကီၣ်ကးခီၣ်သုးရ့ၣ်လၢအမ့ၢ်(ခလရ-၂၆၄)အံၤဖဲမုၢ်ဃ့ၢ်လီၤ(၁)နၣ်ရံၣ်ဘျဲၣ်အဆၢကတီၢ်တၢ်ဒုးတၢ်ယၤကဲထီၣ်အသးတအိၣ် ဘၣ်ဒီးခးလီၤနါစိၤကျိဖးဒိၣ်ဒ်အတၢ်ဘၣ်သးအိၣ်ဝဲအသိးခးလီၤဝဲအမဲၥ်ညါပၥ်ဝဲကမျၢၢ်စ့ၢ်ကီးဒ်ဒုၣ်ဒါအဃိခးလီၤဝဲကျိဖးဒိၣ်မုၢ်နၤမုၢ်ဆါကိးနံၤဒဲးအဂ့ၢ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒၣ်ဒ်အံၤန့ၣ်လီၤ.
"အဝဲသ့ၣ်ခးလီၤကျိဖးဒိၣ်ခီဒုတမ့ၢ်လၢတၢ်ဒုးတၢ်ယၤအိၣ်မးဒီးခးလီၤဝဲဘၣ်. ပကွၢ်က့ၤလၢၢ်ဒိၣ်ကီၢ်ဆၣ်ဟီၣ်ကဝီၤအပူၤထံကျိ(ပရဲ လိၥ်ကျိ)မုၢ်ထီၣ်မ့ၢ်ဂ့ၤ,မုၢ်နုၥ်မ့ၢ်ဂ့ၤဒူသဝီလၢအဝဲသ့ၣ်အဲၣ်ဒိးခးလီၤဝဲန့ၣ်ခးလီၤဝဲလီၤ. တခိးလၢတၢ်ဒုးတၢ်ယၤအိၣ်ထီၣ်ဝဲမးဒီးခးလီၤဝဲ ဘၣ်,တၢ်ဟူးတၢ်ဂဲၤအိၣ်ထီၣ်ဒီးခးဝဲဘၣ်. ဒီးပၥ်ဝဲဒၣ်ကမျၢၢ်ဒ်သိးဒီးဒုၣ်ဒါအသိးဒီးခးဝဲလီၤ. ခးဝဲကိးမုၢ်နံၤဒဲးဃၣ်ဃၣ်လီၤ. မုၢ်နၤခီ, မုၢ် ဆါခီတကွၢ်ဝဲဘၣ်." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးကီၣ်ကးခးလီၤကျိဖးဒိၣ်အံၤန့ၣ်လီၤတဲၥ်ပိၢ်ဖးထီၣ်ဝဲဖဲ(မိခိး)သဝီစံၥ်ပျီတဘ့ၣ်ပူၤအဃိဘၣ်ဟးဂီၤကွံၥ်ဝဲဘုသ့ၣ်တဖၣ်အသိးမ့ၢ်လၢကၠိအိၣ်အံၤဘူးဒီးစံၥ်ပျီအဃိအက့အခီဖျိးဘၣ်ဝဲကၠိတၢ်သူၣ်ထီၣ်အိၣ်ဝဲဘၣ်ဆၣ်မ့မ့ၢ်လၢပှၤကၠိဖိသ့ၣ်တဖၣ်တခီတၢ်ဘၣ်ဒိဘၣ်ထံးတအိၣ်ဘၣ်အဂ့ၢ်သ့ၣ်ညါဘၣ်လၢလီၢ်ကဝီၤအပှၤဘၣ်မူဘၣ်ဒါအအိၣ်န့ၣ်လီၤ
လၢန့ၣ်အမဲၥ်ညါကၠိအံၤစးထီၣ်ဖဲ(ခိဝံၣ်)တၢ်ဆါကဲထီၣ်အသးဒီးသုးဟံးန့ၢ်ဆူၣ်ကွံၥ်တၢ်စိတၢ်ကမီၤဝံၤအလီၢ်ခံတၢ်ပတုၥ်ကွံၥ်ဝဲဒီးဖဲန့ၣ်ဝံၤအလီၢ်ခံခီဖျိလၢဒူသဝီကမျၢၢ်သ့ၣ်တဖၣ်အတၢ်ထဲးဂံၢ်ထဲးဘါဒီးအတၢ်သူၣ်ထီၣ်က့ၤဝဲကၠိအံၤအဃိတနံၣ်အံၤအတီၢ်ပူၤန့ၣ်တၢ်က့ၤအိးထီၣ်ကဒါက့ၤဝဲဒီးလဲၤတရံးက့ၤဝဲအသးဒ်ကညီကူၣ်သ့ဆဲးလၤဝဲၤကျိၤအဖီလၥ်ကၠိတဖျၢၣ်အသိးအဂ့ၢ်လီၢ်ကဝီၤအပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးကၠိအံၤအိၣ်ဝဲဒၣ်စးထီၣ်လၢ (Grade one)တုၤ(Grade Six)ပှၤကၠိဖိနီၣ်ဂံၢ်အိၣ်ဝဲ(၂၀)ဂၤဘျဲၣ်တုၤ(၃၀)အခိၣ်အဃၢၤဒီး ကတီၢ်ခဲအံၤန့ၣ်တၢ်ဘၣ်စိၥ်ကတီၢ်ဃၥ်ကွံၥ်ဝဲတၢ်မၤလိကၠိအံၤန့ၣ်လီၤ. ကၠိဖိသ့ၣ်တဖၣ်ဒ်သိးအတၢ်မၤလိတကဲထီၣ်တၢ်တံၥ်တၥ်တ ဂ့ၤဒီးတၢ်မၤလိကၠိကလဲၤတရံးက့ၤသးအဂီၢ်ကၠိဖိမိၢ်ပၢ်ဒီးကၠိသရၣ်သရၣ်မုၣ်သ့ၣ်တဖၣ်ပၥ်ဖှိၣ်ရဲၣ်ကျဲၤန့ၢ်ဝဲအိၣ်အဂ့ၢ်ပဒိၣ်စီၤဝါမုၢ်စံးအါထီၣ်ဝဲဒၣ်န့ၣ်လီၤ.
"ကၠိခီဒုကတီၢ်ခဲအံၤပတုၥ်ဝဲဒၣ်မီၤနီၤ.ခဲခဲအံၤဒ်သိးကၠိကက့ၤစးထီၣ်အဂီၢ်ခီန့ၣ်ကၠိဖိမိၢ်ပၢ်,ကၠိသရၣ်သရၣ်မုၣ်ပၥ်ဖှိၣ်လိၥ်အသးဒီးရဲၣ်ကျဲၤန့ၢ်က့ၤဝဲဒၣ်အသီတသနၢၣ်မီၤနီၤ.ဒ်သိးကၠိအဝဲအံၤသုတကဲထီၣ်တၢ်ဘၣ်တံၥ်တၥ်တဂ့ၤဒီးကၠိဖိသ့ၣ်တဖၣ်အဂီၢ်သုတကဲထီၣ်တၢ်ဂ့ၢ်ကီလၢကၠိဖိသ့ၣ်တဖၣ်ကမၤလိတၢ်တဂ့ၤအဂီၢ်ဒုမိၢ်ပၢ်ဒီးကၠိသရၣ်ရဲၣ်ကျဲၤဝဲဒၣ်လီၤ. ဒ်သိးကၠိဖိသ့ၣ်တဖၣ်ကမၤလိ ဘၣ်တၢ်အဂီၢ်ဒုတၢ်ရဲၣ်တၢ်ကျဲၤအိၣ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တလါအံၤလါအီကူးအတီၢ်ပူၤအံၤလၢလၢၢ်ဒိၣ်ကီၢ်ဆၣ်ဟီၣ်ကဝီၤအပူၤမ့ၢ်လၢသုးကီၣ်ကးတကပၤခးလီၤကျိဖးဒိၣ်,ဟဲတ့ၢ်လီၤဒြိမ့ၣ်ပိၢ်အဃိဘၣ်ဟးဂီၤကွံၥ်ဝဲကၠိတၢ်သူၣ်ထီၣ်(၂)ဖျၢၣ်ဒီးသီခါဖၠၣ်တၢ်သူၣ်ထီၣ်(၁)ဖျၢၣ်အသိးကမျၢၢ်ဟံၣ်ဃီ,တၢ်သူၣ်အီၣ်ဖျးအီၣ်အလီၢ်ဘၣ်ဟးဂီၤကွံၥ်ဝဲအါအါဂီၢ်ဂီၢ်ဒီးကမျၢၢ်ဘုၣ်ဆၣ်ဖိကီၢ်ဖိသံဘၣ်ဒိအိၣ်ဝဲအဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်တၢ်ပၥ်ဖျါသ့ၣ်တဖၣ်ပူၤအသိးန့ၣ်လီၤ.
လါအီကူာ် ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ သုးကီၣ်ကးအဂၢၤကီၢ် သုး(ပြည်သူ့စစ်)လၢတၢ်ဒုးဖီၣ်အီၤကျိတဖၣ်ဖဲတလါအံၤလါအီကူာ်ထီၣ်ခံနွံဃၣ်ဃၣ်အခါန့ၣ် အ၀ဲသ့ၣ်က့ၤအးကဒါ ကျိဆူသုးကီၣ်ကးႇ(BGF)အအိၣ်ဒီး ဖဲန့ၣ်ၦၤက့ၤအးကျိလၢ(BGF)အိၣ်တဖၣ်အကျါပၣ်ဃုာ်အခိၣ်ဒိၣ်တနီၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ
အပူၤကွံာ်လါအီကူာ် ၁၀ ဒီး ၁၂ သီအနံၤ သုးကီၣ်ကးအဂၢၤကီၢ်သုးလၢအိၣ်ဖၣ်အၣ်ကီၢ်ဆၣ် KNLA သုးရ့ၣ်(၁) ဟီၣ်က၀ီၤပူၤ တဖၣ်ခီဖျိတအဲၣ်ဒိးအိၣ်လၢသုးမီၤစိရိၤတၢ်ပၢဆှၢရဲၣ်ကျဲၤဖီလာ်လၢၤဘၣ်အဃိလဲအးက့ၤအကျိလၢ သုးကီၣ်ကးအအိၣ်တနီၤဒီးတနီၤန့ၣ်လဲၤအး၀ဲလၢသုးခိးကီၢ်ဆၢ(BGF) သုးဟီၣ်က၀ီၤ(၂)အခိၣ် သုးခိၣ်ဒိၣ်စိ စီၤတ့ၤ၀့ အအိၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါစံးဘၣ်တ့ၢ်ဃာ်ခ့ၣ်အဲးစံၣ်-ကညီတၢ်ကစီၣ်ဖဲ လါအီကူာ် ၁၉ သီအနံၤ န့ၣ်လီၤႉ
ဖဲဂၢၤကီၢ်သုးက့ၤအးကဒါကျိဆူသုးကီၣ်ကးအအိၣ်ဘျီ၀ဲအံၤအခါန့ၣ် က့ၤအး၀ဲလၢဖၣ်အၣ်၀့ၢ်(၁၅၁)သုးကီၣ်ကး တၢ်လီၢ်(၆၀)ခိၣ်ႇလၢသုးခိးကီၢ်ဆၢ(BGF)သုးဟီၣ်က၀ီၤ(၂)အခိၣ်...
လါအီကူး ၂၁သီ, ၂၀၂၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်တၢ်ပၢဟီၣ်ကဝီၤ,ဝီၢ်ရ့ၣ်ကီၢ်ဆၣ်အပူၤဒ်သိးနိၣ်ခၠိနဲၣ်ဒီးလိးရှါသုးကီၣ်ကးအသုးကလၢၤသုတလီၤကွံၥ်တဂ့ၤအဂီၢ်,သုးကီၣ်ကးတကပၤအကဘီယူၤခးလီၤတၢ်အိၣ်ဝဲတပယူၥ်ဃီအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
စးထီၣ်ဖဲတလါအံၤလါအီကူး(၅)သီအနံၤအပူၤသုးကီၣ်ကးကဘီယူၤဆှၢထီၣ်ကျိချံပှၥ်သၣ်တၢ်ပီးတၢ်လီဒီးတၢ်အီၣ်တၢ်အီတဖၣ်ဝံၤအလီၢ်ခံသုးကီၣ်ကးလၢအိၣ်ဝဲကလံၣ်သုးကလၢၤတဖၣ်ခးလီၤကျိဖးဒိၣ်ဆူနိၣ်ခၠိနဲၣ်ဒီးလိးရှါတကပၤအိၣ်ဝဲတပယူၥ်ဃီအသိးကဘီယူၤသနါက့ခးလီၤစၢၤဝဲတၢ်အိၣ်ဝဲတပယူၥ်ဃီအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
ဒီးခီဖျိသုးကီၣ်ကးကဘီယူၤခးလီၤတၢ်တပယူၥ်ဃီအဃိ,ကမျၢၢ်လီၢ်ကဝီၤဖိတဖၣ်ဘၣ်ဃ့ၢ်အိၣ်ဆိးလၢသဝီခိၣ်ဃၢၤအိၣ်ဝဲဒီးဖဲလါယူၤ(၁၉)သီအနံၤန့ၣ်ဘၣ်ဟးဂီၤဝဲလိးရှါသီခါဖၠၣ်ဒီးဘျီၣ်ဒိၣ်တဖျၢၣ်အဂ့ၢ်,လိးရှါလီၢ်ကဝီၤဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ခးလီၤဝဲန့ၣ်တီတီဖဲလိးရှါသဝီပူၤလီၤ.ဘၣ်ဟးဂီၤဝဲသဝီပူၤသီခါဖၠၣ်ဒီးသဝီဘျီၣ်ဒိၣ်န့ၣ်လီၤ.မ့မ့ၢ်လၢဒူသဝီကမျၢၢ်တၢ်ဘၣ်ဒိဘၣ်ထံးဒုပတသ့ၣ်ညါလီၤတံၢ်ဘၣ်ဘၣ်မနုၤအဃိလဲၣ်န့ၣ်အခဲအံၤခီန့ၣ်သဝီပူၤပှၤလၢအိၣ်ဘူးဒီးပယီၤသုးကလၢၤဒီးလၢသဝီခၢၣ်သးကမျၢၢ်တဖၣ်န့ၣ်ပှၤစံၢ်လၢၥ်ဃၣ်ဃၣ်လံမီၤနီၤ.မ့မ့ၢ်ယၤဒုခီဖျိယအိၣ်ဘူၣ်ဒံးအဃိန့ၣ်ခဲအံၤယအိၣ်ဖဲသဝီကပၤလီၤမီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ဟီၣ်ကဝီၤအပူၤပယီၤသုးကလၢၤတဖၣ်အပူၤပယီၤသုးအိၣ်ဆိးဝဲဒီးတၢ်ပၢၢ်ဆၢသုးပၥ်ဖှိၣ်တကပၤနၥ်က့အတၢ်ပညိၣ်အိၣ်ဝဲလၢတၢ်ကဒုးလီၤပှီၢ်ကွံၥ်ဝဲသုးကီၣ်ကးအံၤအိၣ်ဝဲအဖီခိၣ်ဘၣ်အိၣ်ဝဲဒီးတၢ်ပလီၢ်ပဒီအသးအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
ဒီးနိၣ်ခၠိနဲၣ်,လိးရှါသဝီတဖၣ်အပူၤတနံၣ်အံၤလါမးရှးအတီၢ်ပူၤတၢ်ဒုးက့ၤကဲထီၣ်ကဒီးဝဲလၢတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤဝံၤအလီၢ်ခံလီၢ်ကဝီၤဖိတဖၣ်ဘၣ်ဃ့ၢ်ထီၣ်ကွံၥ်ဝဲဒီးနိၣ်ခၠိနဲၣ်သဝီအပူၤဟံၣ်အဖျၢၣ်(၃၀)ဃၣ်ဃၣ်ဘၣ်ဟးဂီၤကွံၥ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တကးဒံးဘၣ်နိၣ်ခၠိနဲၣ်သဝီအပူၤသုးကီၣ်ကးအသုးကလၢၤအံၤအိၣ်ဝဲဖဲဃိၣ်သၢဖျၢၣ်သရိၥ်ဝါကျဲမုၢ်အဖီခိၣ်ဒီးမ့ၢ်ဝဲသုးကလၢၤတဖျၢၣ်လၢအရ့ဒိၣ်လၢသုးကီၣ်ကးတဖၣ်အဂီၢ်ဒီး,ပယီၤသုးကလၢၤအံၤတၢ်ပၢၢ်ဆၢသုးပၥ်ဖှိၣ်တဖၣ်နုၥ်လီၤခးဝဲအိၣ်ဝဲအသိးသုးကီၣ်ကးတကပၤစ့ၢ်ကီးဒ်သိးသုတဘၣ်ဟ့ၣ်ဃၣ်ကွံၥ်အသုးကလၢၤအံၤတဂ့ၤအဂီၢ်,မၤဝဲကဘီယူၤတၢ်ခးလီၤတၢ်တပယူၥ်ဃီလီၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တကတီၢ်ဃီ,လိးရှါသဝီအပူၤသုးကီၣ်ကးအသုးကလၢၤအံၤသနၥ်က့အပူၤကွံၥ်,မ့ၢ်ဝဲ(KNLA)သုးရ့ၣ်(၁၆)ဟီၣ်ကဝီၤတၢ်ဘံၣ်တၢ်ဘၢတၢ်လီၢ်တတီၤဒီးဖဲ(၂၀၂၁)နံၣ်အပူၤလၢဟီၣ်ကဝီၤတၢ်ဘံၣ်တၢ်ဘၢအဂီၢ်,သုးကီၣ်ကးတကပၤနုၥ်လီၤအိၣ်ဆိးဝဲဒီးတၢ်ခးလိၥ်သးကဲထီၣ်လၢခံခီခံကပၤအိၣ်ဝဲခဲအံၤခဲအံၤအဃိလီၢ်ကဝီၤဖိတဖၣ်တၢ်ဘံၣ်တၢ်ဘၢတအိၣ်ဝဲလၢၤဘၣ်ဒီးဘၣ်ဃ့ၢ်ပဒ့ၣ်ကွံၥ်ဝဲအသးအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ခီဖျိသုးကီၣ်ကးကဘီယူၤခးလီၤတၢ်တပယူၥ်ဃီအိၣ်ဝဲအဃိနိၣ်ခၠိနဲၣ်,လိးရှါသဝီလီၢ်ကဝီၤကမျၢၢ်တဖၣ်အမဲၥ်ညါ,ခိၣ်ဃၢၤဃီကျါ,ကၠီးဘလူဒီးပနီကျဲခံသဝီလီၢ်ကဝီၤဖိဘၣ်ဃ့ၢ်အိၣ်ကဒုအသးအိၣ်ဝဲအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
လါအီကူး ၂၀ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃), မူကီၢ်ဆၣ်ဒီးလၢၢ်ဒိၣ်ကီၢ်ဆၣ်ဟီၣ်ကဝီၤအပူၤပူၤကွံၥ်ဖဲ လါအီကူး(၁၄)သီတုၤ(၁၆)သီလၢသၢသီအတီၢ်ပူၤအံၤမ့ၢ်လၢပယီၤသုးကီၣ်ကးပညိၣ်ခးလီၤကျိဖးဒိၣ်ဒီးဟဲတ့ၢ်လီၤမ့ၣ်ပိၢ်ဒီးဒြိသ့ၣ်တဖၣ်အဃိကမျၢၢ်ဘၣ်ဒိ(၅)ဂၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲမဟါ(၁၉)သီအနံၤန့ၣ်လီၤ.
မူကီၢ်ဆၣ်အပူၤပယီၤသုးခီၣ်ချ့သုးရ့ၣ်လၢအမ့ၢ်(ခမရ-၄၃၉)ဒီးပယီၤသုးအပှၤလၢအိၣ်(အိဖၠဲၣ်)သုးကလၢၤ တဖၣ်မ့ၢ်လၢပညိၣ်ခးလီၤဝဲကျိဖးဒိၣ်ဒီးဟဲတ့ၢ်လီၤဒြိမ့ၣ်ပိၢ်အဃိလီၤတဲၥ်ပိၢ်ဖးထီၣ်ဝဲဖဲ(ဖယါလၣ်ဟါ)သဝီအပူၤဒီး(ကၠဲၣ်တဲၣ်ညီၤပ့ၤ)သဝီအပူၤအဃိဘၣ်ဒိဝဲပှၤသဝီဖိလၢအမ့ၢ်(ထဲၣ်လ့အူ,ခ့ၤခၠိၤလွ့ၤ,အူမၠ့ၣ်ထ့ဒီးဒီၤခ့ၤယံၤ)သ့ၣ်တဖၣ်အံၤအဂ့ၢ်တၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ.
လၢၢ်ဒိၣ်ကီၢ်ဆၣ်အပူၤန့ၣ်စ့ၢ်ကီးပယီၤသုးကီၣ်ကးခီၣ်ချ့သုးရ့ၣ်လၢအမ့ၢ်(ခမရ-၃၀၇)သ့ၣ်တဖၣ်အံၤခးလီၤဝဲ(၁၂၂)မမ ကျိဖးဒိၣ်ဆူ(အနါဘီ)သဝီပူၤအဃိဘၣ်ဒိကဒီးဝဲ(အူထ့နဲၤ)တဂၤအဂ့ၢ်သ့ၣ်ညါဘၣ်အသိးပှၤသဝီဖိလၢအဘၣ်ဒိ(၅)ဂၤသ့ၣ်တဖၣ်အံၤန့ၣ်အါဒၣ်တက့ၢ်မ့ၢ်ပှၤလၢအသးနံၣ်အိၣ်အနံၣ်(၅၀)ဆူအဖီခိၣ်သ့ၣ်တဖၣ်အဂ့ၢ်သ့ၣ်ညါဘၣ်ဒ်တၢ်ပၥ်ဖျါပူၤအသိးန့ၣ်လီၤ.
လၢန့ၣ်အမဲၥ်ညါလၢတၢ်(၃)သီအတီၢ်ပူၤပယီၤသုးကီၣ်ကးခးလီၤကျိဖးဒိၣ်,ဟဲ့တ့ၢ်လီၤဒြိမ့ၣ်ပိၢ်ဒ်အံၤအဖီခိၣ်ဘၣ်ဟးဂီၤကွံၥ်ဝဲကမျၢၢ်ဟံၣ်တၢ်သူၣ်ထီၣ်ဒီးဘၣ်သံဘၣ်ဒိဘၣ်ထံးကမျၢၢ်ဆၣ်ဖိကီၢ်ဖိအဂ့ၢ်ချၢၣ်လွံၢ်ထူၣ်ကီၢ်ရ့ၣ်အပှၤကတိၤတၢ်ပၢပဒိၣ်စီၤဟဲဂ့ၤစံးဝဲန့ၣ်လီၤ.
"ဖဲ(၁၄, ၁၅, ၁၆)သီအနံၤန့ၣ်ဒုၣ်ဒါ(ခလရ-၂၆၄)(ခမရ-၃၀၇)သ့ၣ်တဖၣ်ခးလီၤဝဲကျိဖးဒိၣ်မီၤနီၤ. မ့ၢ်ဘၣ်ကွၢ်က့ၤလၢတၢ် သၢသီအတီၢ်ပူၤန့ၣ်သုးကီၣ်ကးခးလီၤကျိဖးဒိၣ်(၁၂၂)မမခဲလၢၥ်န့ၣ်အိၣ်(၁၂)ဖျၢၣ်ဒီးဟဲတ့ၢ်လီၤဒြိမ့ၣ်ပိၢ်န့ၣ်အိၣ်ဝဲ(၁၈)ဖျၢၣ်ဒီး()ကျိဖးဒိၣ်န့ၣ်(၂)ဖျၢၣ်လီၤ. ဒီးဘၣ်ဒိဃုၥ်ဝဲဒၣ်ဒီးကမျၢၢ်ကျီၢ်,ပနၢ်ဆၣ်ဖိကီၢ်ဖိဒီးဟံၣ်ဃီသ့ၣ်တဖၣ်ဘၣ်ဟးဂီၤကွံၥ် ဝဲဒၣ်လီၤ" အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပှၤလီၢ်အိၣ်ကမှံဖိလၢဘၣ်ဃ့ၢ်အိၣ်ကဒုအသးသ့ၣ်တဖၣ်ခီန့ၣ်တုၤတကီၢ်ခါခဲအံၤက့ၤအိၣ်က့ၤဆိးလၢအဒူသဝီပူၤတဘူၣ်ဒံးဘၣ်အသိးတနီၤနီၤက့ၤအိၣ်က့ၤဆိးဝဲတသ့လၢၤဘၣ်ခီဖျိပယီၤသုးဒွဲၣ်အူဟးဂီၤကွံၥ်အဝဲသ့ၣ်အဟံၣ်အဃီအဂ့ၢ်ချၢၣ်ဆီထံးကီၢ်ဆၣ်အပှၤဘၣ်မူဘၣ်ဒါတဂၤစံးဝဲန့ၣ်လီၤ.
"ပှၤလၢဟဲအိၣ်ကဒုသ့ၣ်တဖၣ်န့ၣ်က့ၤအိၣ်လၢအဒူသဝီတဘူၣ်ဒံးဘၣ်မီၤနီၤ. ခဲခဲအံၤဒူသဝီဟီၣ်ကဝီၤအပူၤသ့ၣ်တဖၣ် န့ၣ်တၢ်ခးလိၥ်သးအိၣ်ကိးနံၤဒဲးအဃိန့ၣ်ပှၤက့ၤလၢဟံၣ်အဃီအတၢ်လီၢ်တၢ်ကျဲတဘူၣ်ဒံးဘၣ်. ဘၣ်အိၣ်ကဒုအသးဖဲ အအိၣ်ကဒုညီနုၢ်အလီၢ်လီၤ. ဒ်န့ၣ်အသိးလၢ(ဘစိၣ်မၠီ)သဝီပူၤန့ၣ်ပှၤဟံၣ်ဃီတအိၣ်လၢၤဘၣ်ပယီၤသုးဒွဲၣ်အူအီၣ်ကွံၥ်ဝဲ မီၤနီၤ. အဃိန့ၣ်ပှၤသဝီဖိသ့ၣ်တဖၣ်က့ၤဝဲတဘူၣ်,က့ၤဝဲတသ့လၢၤဘၣ်. ဘၣ်အိၣ်ကဒုလၢအဝဲသ့ၣ်အိၣ်ကဒုအလီၢ် လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးဖဲပူၤကွံၥ်လါအီကူး(၁၃)သီအနံၤန့ၣ်ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤခီဖျိလၢပယီၤသုးကီၣ်ကးခီၣ်သုးရ့ၣ်လၢအမ့ၢ်(ခလရ-၂၆၄)သုးရ့ၣ်ဟဲတ့ၢ်လီၤဒြိမ့ၣ်ပိၢ်ဖဲ(ထံပူၤလူၢ်)သဝီပူၤအဃိဘၣ်ဟးဂီၤကွံၥ်ဝဲတၢ် မၤလိကၠိတဖျၢၣ်ဒီးတၢ်ဆါဟံၣ်တဖျၢၣ်အဂ့ၢ်လၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤစးထီၣ်ဖဲတနံၣ်အံၤ(၂၀၂၄)နံၣ်လါယနူၤအါရံၤတုၤလါယူၤအတီၢ်ပူၤအံၤန့ၣ်သုးကီၣ်ကးတကပၤခးလီၤကျိဖးဒိၣ်ခဲလၢၥ်အိၣ်ဝဲ(၁၂၄၉)ဘျီ,ဟဲတ့ၢ်လီၤဒြိမ့ၣ်ပိၢ်အိၣ်ဝဲ(၁၀၆)ဘျီဒီးမ့မ့ၢ်လၢကမျၢၢ်ထံဖိကီၢ်ဖိတခီဘၣ်သံဝဲ(၁၃၄)ဂၤ,ဘၣ်ဒိဝဲခဲလၢၥ်(၄၃၉)ဂၤအဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါတ့ၢ်ဃၥ်ဝဲဖဲလါယူၤလံအတီၢ်ပူၤန့ၣ်လီၤ.
လါအီကူး ၂၀သီ, ၂၀၂၄နံၣ်, ခ့ၣ်အဲးစံၣ်,
ကီၢ်ပယီၤကမျၢၢ်ထံဖိကီၢ်ဖိပှၤဘၣ်ကီဘၣ်ခဲဖိတဖၣ်ကဒိးန့ၢ်ဘၣ်တၢ်ဒိသူၣ်ဒိသးတၢ်တိစၢၤမၤစၢၤအဂီၢ်,အပူၤကွံၥ်လါအီကူး(၁၉)သီအနံၤအပူၤ,တၢ်ဒိသူၣ်ဒိသးတၢ်တိစၢၤမၤစၢၤဘီမုၢ်စၢဖှိၣ်ကရၢ(UNOCHA)ပှၤဘၣ်မူဘၣ်ဒါထံၣ်လိၥ်ဝဲအသးဒီးသုးကီၣ်ကးလၢတၢ်မၤစၢၤပှၤဂ့ၢ်ဝီတၢ်လိၣ်ဘၣ်အဂီၢ်အဂ့ၢ်,သုးကီၣ်ကးအတၢ်ကစီၣ်သန့တဖၣ်ပၥ်ဖျါဝဲန့ၣ်လီၤ.
လါအီကူး(၁၉)သီအနံၤလၢအလီၤဘၣ်ဝဲ ဟီၣ်ခိၣ်ဒီဘ့ၣ်ပှၤဂ့ၢ်ဝီတၢ်လိၣ်ဘၣ်မုၢ်နံၤအသိးန့ၣ် (UNOCHA) ဟဲထံၣ်လိၥ်ဝဲသးဒီးသုးကီၣ်ကး ကတိၤတၢၣ်ပီၣ်တဲသကိးဝဲ တၢ်ဂ့ၢ်ဒ်အမ့ၢ် တဖုဒီးတဖုအဘၢၣ်စၢၤကဒိးန့ၢ်ဘၣ်တၢ်ဆဲးလီၤမံၤလၢ တၢ်ဘၣ်သးအလံၥ်ဃံးဃၥ်ပူၤလၢအစိအချ့အဂ့ၢ်, ကမၤစၢၤဝဲဒၣ်(UNOCHA) ကီၢ်ချၢပှၤမၤတၢ်ဖိလၢကနုၥ်လီၤကီၢ်ပယီၤပူၤအ(Visa)ဒီး,လၢ(UNOCHA)ဟ့ၣ်မၤစၢၤကီၢ်ပှၤဂ့ၢ်ဝီတၢ်လိၣ်ဘၣ်ကန့ၢ်အဂီၢ်တၢၣ်ပီၣ်တဲသကိးဝဲအသိးတၢ်ကရၢကရိလၢတမ့ၢ်တဘၣ်ဃးပဒိၣ်သ့ၣ်တဖၣ်ကဒိးန့ၢ်ဘၣ်လံၥ်အုၣ်သးတၢ်ဂ့ၢ်စ့ၢ်ကီးတၢၣ်ပီၣ်တဲသကိးဝဲဒၣ်အဂ့ၢ် သုးကီၣ်ကးပၢတၢ်ကစီၣ်သန့ (Myanmar Alin)ပၥ်ဖျါဝဲဒၣ်ဖဲတနံၤအံၤလါအီးကူးအသီ(၂၀)အနံၤအံၤန့ၣ်လီၤ.
ဘၣ်ဃးဒီး(UNOCHA)အတၢ်ထံၣ်လိၥ်တၢၣ်ပီၣ်တဲသကိးဝဲတၢ်ဒီးသုးကီၣ်ကးအံၤန့ၣ်တၢ်ဒုးသ့ၣ်ညါထွဲဝဲအဝဲသ့ၣ်တဖၣ်အိၣ်ဝဲဘၣ်ဆၣ်လၢကတၢၣ်ပီၣ်တဲသကိးတၢ်ဂ့ၢ်တၢ်ကျိၤတဖၣ်တၢ်ဒုးသ့ၣ်ညါလီၤတံၢ်တအဂ့ၢ်ပှၤမၤစၢၤပှၤလီၢ်အိၣ်ကမှံဖိကမံးတံၥ်(CIDKP)မူဒါခိၣ်(၂)စီၤခဲလ့ၣ်ပဲၥ်ထံနီၤဖးစံးဝဲဒ်အံၤန့ၣ်လီၤ.
အဝဲစံးဝဲလၢ“(UNOCHA)အဝဲသ့ၣ်ကလဲၤတဲအိၣ်သကိးတၢ်ဒီးသုးကီၣ်ကးန့ၣ်ဒုဒုးသ့ၣ်ညါဆိပှၤအိၣ်ဝဲလီၤ.ဘၣ်ဆၣ်ဒ်ပယီၤတၢ်ကစီၣ်ပၥ်ဖျါဝဲအသိးလၢတၢ်ကတၢၣ်ပီၣ်ဝဲတၢ်ကမၤတၢ်ဆဲးလီၤစုမုၢ်ကျၢၢ်ကန့ၢ်ချ့ချ့အဂီၢ်တၢ်ဂ့ၢ်တၢ်ကျိၤသ့ၣ်တဖၣ်န့ၣ်ဒုတတဲပှၤခဲလၢၥ်ခဲဆ့ဘၣ်အဃိပတသ့ၣ်ညါထွဲဘၣ်.တမံၤဂ့ၤတမၠိဂ့ၤတၢ်တိစၢၤမၤစၢၤအံၤမ့ၢ်လဲၤခီဖျိလၢသုးကီၣ်ကးဒုကကဲထီၣ်အသးကီဝဲအသိး,မ့ကဲထီၣ်နါက့တမ့ၢ်ကကဲထီၣ်အသးလၢအဂ့ၤဘၣ်.သုးမီၤစိရိၤအံၤအကွၢ်ထွဲလီၤအကစၢ်သးမၣ်တသ့န့ၣ်ကလဲၤကွၢ်ထွဲကမျၢၢ်ပှၤဘၣ်ကီဘၣ်ခဲဖိကသ့ဒ်လဲၣ်.လၢတၢ်န့ၣ်အဃိန့ၣ်ယနီၢ်တဂၤဆိကမိၣ်လၢကကဲထီၣ်အသးညီညီတသ့ဘၣ်.မ့မ့ၢ်လၢတၢ်ဘၣ်ယိၣ်လၢကမျၢၢ်လီၢ်အိၣ်ကဒုဖိတဖၣ်အဂီၢ်ခီန့ၣ်ခဲအံၤယတဲတသ့ဒံးဘၣ်”အဂ့ၢ်စံးဝဲန့ၣ်လီၤ.
ဒ်န့ၣ်အသိး,ဘၣ်ဃးဒီးပှၤဂ့ၢ်ဝီတၢ်လိၣ်ဘၣ်အဂီၢ်အံၤန့ၣ်,ဒီကလုၥ်တၢ်ဃူတၢ်ဖိးပဒိၣ်(NUG)ဃ့ထီၣ်ဝဲထံဂုၤကီၢ်ဂၤကရူၢ်ကရၢတဖၣ်လၢကထံၣ်လိၥ်တၢၣ်ပီၣ်လိၥ်သးဒီး(NUG)ဃုၥ်ဒီးကရူၢ်ကရၢလၢအဘၣ်ထွဲတဖၣ်အိၣ်ဝဲဒၣ်န့ၣ်လီၤ.
တကတီၢ်ဃီ,ပှၤဂ့ၢ်ဝီတၢ်လိၣ်ဘၣ်အဂီၢ်တၢ်ထံၣ်လိၥ်တၢၣ်ပီၣ်ဘျီဝဲအံၤန့ၣ်,(UNOCHA)အခိၣ်နၢ်ဒိၣ်ထီ(Mr.SajjadMohammadSajid),ကတီၢ်ဘၢၣ်စၢၤတၢ်ဒိသူၣ်ဒိသးတၢ်တိစၢၤမၤစၢၤဘီမုၢ်စၢဖှိၣ်ကရၢပှၤမၤဖိးမံတၢ်မူဒါခိၣ်(Mr.MarcoluigiCorsi)ဒီးသုးကီၣ်ကးတၢ်တိစၢၤမၤစၢၤပှၤတဝၢဂ့ၢ်ဝီပှၤဘၣ်မူဘၣ်ဒါဒီးတၢ်ဆီလီၤပၥ်လီၤက့ၤလီၢ်အိၣ်လီၢ်ဆိးကိတိၥ်ဝဲၤကျိၤခိၣ်ပှၤဘၣ်မူဘၣ်ဒါတဖၣ်ထံၣ်လိၥ်ကတိၤတၢၣ်ပီၣ်သကိးဝဲလၢ(န့ၣ်ပၠ့ၣ်ဒီၣ်)တၢ်လီၢ်အပူၤအဂ့ၢ်,သ့ၣ်ညါဘၣ်န့ၣ်လီၤ.
လါအီကူာ် ၂၀ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကီၢ်ကၠီၣ်တဲၣ် ဘီကီး၀့ၢ်ပူၤ ဖဲလါအီကူာ် ၁၆ သီအနံၤန့ၣ် ကညီပိာ်မုၣ်သးစၢ်(၁၉)နံၣ်လၢအမၤတၢ်လၢ ဟံၣ်တၢ်မၤ တဂၤဖဲအ၀ဲမၤကဆှဲကဆှီဟံၣ်အခါ လၢတၢ်တပာ်သူၣ်ပာ်သးအပူၤလီၤတဲာ်၀ဲဒၣ်လၢဟံၣ်ခံကထြၢ ဖီခိၣ်ဒီးသံ၀ဲဒၣ် အဂ့ၢ်န့ၣ် အဘူးအတံၢ်တဂၤ စံး၀ဲန့ၣ်လီၤႉ
ကညီမုၣ်သးစၢ်လၢအလီၤတဲာ်သံလၢဟံၣ်ဖီခိၣ်တဂၤအံၤအမံၤ၀ဲဒၣ်လၢနီၢ်မၤအူႇအိၣ်၀ဲဒၣ်လၢကီးတရံးကီၢ်ဆၣ် ကီး၀ၣ်လဲၤသ၀ီဒီး လဲၤမၤတၢ်လၢဘီးကီးအိၣ်ဒီး(ဖးစပိး)လံာ်လဲၢ်လၢအဖိးသဲစးမၤဟံၣ်တၢ်မၤအိၣ်တနံၣ်ဘျဲၣ်လံ န့ၣ်လီၤႉ ၦၤလၢအမၤတၢ်ဒီးအီၤတပူၤဃီတဖၣ်စံး၀ဲလၢတၢ်တနံၤန့ၣ်ဖဲအ၀ဲမၤကဆှဲကဆှီတၢ်လၢဟံၣ်ခံကထြၢဖီၣ်ခိၣ်ထွါကဆှီ၀ဲဒၣ်ယွၤ(မဲၤထံကလၤ)အခါအခီၣ်တပျာ်ဒီးလီၤတဲာ်သံ၀ဲဒၣ်အဂ့ၢ်န့ၣ် အဘူးအတံၢ်တဖၣ်စံး၀ဲန့ၣ်လီၤႉ
ဘၣ်ဃးကညီမုၣ်တဂၤအံၤသံတၢ်ဂ့ၢ်အံၤ တၢ်မၤကစၢ်ပျၢ်လီၤအခၢၣ်စးဟဲဟ့ၣ်၀ဲတၢ်လၢၤဘူၣ်လၢၤစ့လၢ ထီၣ်တၢ်ဆါဟံၣ်ဒီး ကကုၢ်ထီၣ်က့ၤၦၤသံစိၣ်အဂီၢ်အိၣ်၀ဲအသိး ဘၣ်အိၣ်ခိးစ့အီၣ်လိးလၢတၢ်မၤကစၢ်ကဟ့ၣ်၀ဲအံၤ အဂ့ၢ်န့ၣ် နီၢ်မၤအူအမုငါ နီၢ်မုမုၣ် စံး၀ဲဒၣ်ဒ်အံၤန့ၣ်လီၤႉ
အ၀ဲစံး၀ဲလၢ“မ့မ့ၢ်လၢကကုၢ်ထီၣ်ကွံာ်ၦၤသံစိၣ်အဂီၢ်ဒုသ့ၣ်ခိၣ်အၦၤဟဲဟ့ၣ်စ့မၤစၢၤအိၣ်မီၤႉ မ့မ့ၢ်လၢသ့ၣ်ခိၣ်ကစၢ် ဒုတဟဲဘၣ်ႉအ၀ဲသ့ၣ်တဲ၀ဲခီန့ၣ်တဘၣ်ကိၢ်နီမံၤတဂ့ၤႇကမၤဟ့ၣ်၀ဲခဲလၢာ်လီၤႉသ့ၣ်ခိၣ်န့ၣ်အမံၤဖးဒိၣ်တဂၤညါအဃိ တမၤဟးဂီၤအမံၤဘၣ်တဲ၀ဲဒ်န့ၣ်ႉတၢ်မၢၤဘၣ်အိၣ်ခိးတသီခံသီမီၤနီၤႉလီလီစဲၤခဲအံၤမ့ၢ်ကဟ့ၣ်၀ဲသးသမူစ့အီၣ်လိးဆံးအါလဲၣ်န့ၣ်တသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ကီၢ်ကၠီၣ်တဲၣ်ပူၤ ၦၤမၤတၢ်ဖိတဂၤဂ့ၤတဂၤဂ့ၤလၢအမၤတၢ်လၢအအိၣ်ဒီးလံာ်လဲၢ်လၢအဖိးသဲစးလၢလၢၦဲၤၦဲၤန့ၣ် အ၀ဲသ့ၣ်မ့သံလၢတၢ်ဖံးတၢ်မၤလီၢ်န့ၣ်တၢ်သိၣ်တၢ်သီအိၣ်လၢတၢ်မၤကစၢ်ဘၣ်ဟ့ၣ်၀ဲစ့အီၣ်လိးလၢအ၀ဲသ့ၣ်ဂီၢ် (၁၅)ကလီၢ်...
လါအီကူး ၁၉ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်သုးက့(၄)ဟီၣ်ကဝီၤအပူၤ စးထီၣ်လၢလါယနူၤအါရံၤတုၤလါယူၤလၢနံၣ်တဝၥ်အ တီၢ်ပူၤအံၤ တၢ်ဒုးတၢ်ယၤကဲထီၣ်ဝဲလၢပယီၤသုးကီၣ်ကးဒီးကညီဒီကလုၥ်သုးမုၢ်ဒိၣ်ဃုၥ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အ ဘၢၣ်စၢၤခဲလၢၥ်အိၣ်(၆၂)ဘျီ ပယီၤသုးကီၣ်ကးတကပၤသံ(၁၅၁)ဂၤအဂ့ၢ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
ခီဖျိလၢခံခီခံကပၤတၢ်ဒုးကဲထီၣ်ဝဲ(၆၂)ဘျီလၢ(၆)လါအတီၢ်ပူၤဒ်အံၤအဖီခိၣ်ပယီၤသုးကီၣ်ကးတကပၤသံ(၁၅၁)ဂၤဘၣ်ဒိ(၂၁၂)ဂၤတကးဒံးဘၣ်ပယီၤသုးအပှၤသ့ၣ်တဖၣ်ပၥ်လီၤတၢ်စုၤကဝဲခဲလၢၥ်အိၣ်(၁၃၈)ဂၤဒီးပယီၤသုးအံၤဟူးဂဲၤဟဲခးလီၤတၢ်ဒီးကဘီယူၤအိၣ်ဝဲ(၅၁)ဘျီစ့ၢ်ကီးအဂ့ၢ်သ့ၣ်ညါဘၣ်အသိးမ့မ့ၢ်လၢကညီဒီကလုၥ်သုးမုၢ်ဒိၣ်သုးက့နီၣ်ဂံၢ်(၄)တကပၤခီန့ၣ်တၢ်သံတၢ်ဘၣ်ဒိတၢ်တပၥ်ဖျါဘၣ်အဂ့ၢ်ဒ်တၢ်ပၥ်ဖျါပူၤအသိးသ့ၣ်ညါန့ၣ်လီၤ.
လၢန့ၣ်အမဲၥ်ညါစးထီၣ်လၢ(၂၀၂၁)နံၣ်သုးမီၤစိရိၤဟံးန့ၢ်ဆူၣ်ကွံၥ်ထံကီၢ်တၢ်စိတၢ်ကမီၤဝံၤအလီၢ်ခံဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤပယီၤသုးကီၣ်ကးအသုးကလၢၤသ့ၣ်တဖၣ်တၢ်ထီၣ်မၤန့ၢ်ကွံၥ်ဝဲခဲလၢၥ်(၅)ဖျၢၣ်ဒီးပယီၤသုးကလၢၤဘၣ်ဟးထီၣ်ကွံၥ်ခဲလၢၥ်အိၣ်ဝဲ(၂၁)ဖျၢၣ်စ့ၢ်ကီးအဂ့ၢ်သ့ၣ်ညါဘၣ်န့ၣ်လီၤ.
ကတီၢ်အံၤမ့ၢ်လၢသုးကီၣ်ကးတကပၤမၤဆူၣ်ထီၣ်ဝဲတၢ်ဟူးတၢ်ဂဲၤအဃိကမျၢၢ်ပှၤလီၢ်ကဝီၤဖိသ့ၣ်တဖၣ်ဘၣ်ပျံၤဘၣ်ဖုးတၢ်ဒီးဘၣ်ဃ့ၢ်အိၣ်ကဒုအသးလၢတၢ်အိၣ်ကဒုအလီၢ်အမဲၥ်ညါတကတီၢ်ဃီမ့ၢ်လၢဘၣ်စံၣ်ဘၣ်ဃ့ၢ်ဒ်အံၤအဖီခိၣ်လၢအဝဲသ့ၣ်အဂီၢ်လိၣ်ဘၣ်ဝဲတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်ကီၢ်ဆၣ်ပှၤဘၣ်မူဘၣ်ဒါလၢအိၣ်တၢ်မဲၥ်ညါတဂၤစံးဝဲဒ်အံၤန့ၣ်လီၤ.
"ကတီၢ်အံၤမ့ၢ်လၢသုးကီၣ်ကးမၤဆူၣ်ထီၣ်ဝဲတၢ်ဟူးတၢ်ဂဲၤလၢတနီသရံၣ်ကီၢ်ဆၣ်အပူၤလၢ(ဝၣ်ယဲး)ဟီၣ်ကဝီၤအပူၤမ့ၢ်ဂ့ၤ, (တကဲး) ဟီၣ်ကဝီၤအပူၤမ့ၢ်ဂ့ၤအဃိဒီးတုၤလၢကမျၢၢ်သ့ၣ်တဖၣ်န့ၥ်ဘၣ်အိၣ်ဒီးတၢ်ပျံၤတၢ်ဖုးအဃိန့ၣ်ဘၣ်ဃ့ၢ်ပဒ့ၣ်ပဒီအသးမီၤနီၤ. အဃိန့ၣ် တၢ်လၢအပိၥ်ထွဲထီၣ်အခံန့ၣ်မ့ၢ်ဝဲတၢ်စူၤအဃိတၢ်အခိၣ်ဒုတကူတလၢဘၣ်, ခံမံၤတမံၤလိၣ်ဘၣ်ဝဲတၢ်အီၣ်မိၢ်ပှၢ်, ဒီးကသံၣ်ကသီ သ့ၣ်တဖၣ်မီၤနီၤ. ပှၤဘၣ်မူဘၣ်ဒါတဖၣ်ကျဲးစၢၤဝဲလၢပပှၤကလုၥ်သ့ၣ်တဖၣ်ကတူၢ်ဘၣ်တၢ်ကလီၤစှၤဝဲအဂီၢ် လီၤ." အဂ့ၢ်န့ၣ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တနီသရံၣ်ကီၢ်ဆၣ်တလါအံၤလါအီကူးအတီၢ်ပူၤပယီၤသုးကီၣ်ကးတကပၤဟူးဂဲၤဟဲခးလီၤတၢ်ဒီးကဘီယူၤအိၣ်ဝဲ(၈)ဘျီ,ခးလီၤနါစိၤကျိဖးဒိၣ်,ဟဲထီၣ်စိၥ်ဆှၢန့ၢ်ဝဲအပှၤတၢ်အီၣ်တၢ်အီ,ပယီၤသုးလၢမ့ၢ်သုးခီၣ်သုးရ့ၣ်(၄၃၁)ဒီး(၂၈၀)သ့ၣ်တဖၣ်ဟဲမၤအါထီၣ်အသုးဂံၢ်ဘါဒ်အံၤအဖီခိၣ်ဘၣ်ဟးဂီၤကွံၥ်ဝဲဒၣ်ကီၢ်ဆၣ်ဘျီၣ်ရိဖှိၣ်တဖျၢၣ်,ကီၢ်ဆၣ်ဝဲၤဒၢးတဖျၢၣ်ဒီး(လၢၢ်တမၣ်)သဝီသီခါဖၠၣ်တဖျၢၣ်အမဲၥ်ညါကမျၢၢ်ဘၣ်ဒိဘၣ်ထံး,ဟံၣ်ဃီတၢ်သူၣ်ထီၣ်ဘၣ်ဟးဂူၥ်ဟးဂီၤအိၣ်ဝဲအဂ့ၢ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ
ဒ်န့ၣ်အသိးဖဲပူၤကွံၥ်လါယူၤလံ(၂၉)သီအနံၤအခါန့ၣ်စ့ၢ်ကီးကညီဒီကလုၥ်ဂၢၤသးကရၢသုးရ့ၣ်(၇),သုးဒ့(၅)အပှၤသ့ၣ်တဖၣ်က့ၤဒိၣ်စိကဒါက့ၤဝဲဒီးမၤဝဲတၢ်ၡဲလဲက့ၤဝဲဟီၣ်ကဝီၤလၢပယီၤသုးဒီးပၠံၣ်သူၣ်စ့ၣ်သ့ၣ်တဖၣ်အိၣ်ဆီလီၤအသးဖဲလၢၢ်မုၢ်လါကီၢ်ဆၣ်,ပလီကိသဝီပူၤအဂ့ၢ်ကညီဒီကလုၥ်ဂၢၤသးကရၢသုးရ့ၣ်သုးရ့ၣ်(၇),သုးဒ့(၅)အသုးဒ့ခိၣ်စံးတ့ၢ်ဝဲဒၣ်န့ၣ်လီၤ.
လါအီကူာ် ၁၉ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤပူၤ အပူၤကွံာ်တနွံဃၣ်ဃၣ်အခါ ဂၢၤကီၢ်သုးလၢသုးကီၣ်ကးဟ့ၣ်လီၤဖီၣ်၀ဲကျိတၢ်စုက၀ဲၤတဖၣ်က့ၤအးကဒါက့ၤကျိဆူသုးကီၣ်ကးဒီး(BGF)အအိၣ် ခဲလၢာ် လံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ဖၣ်အၣ်ကီၢ်ဆၣ်ပူၤ သုးကီၣ်ကးအၦၤဂၢၤကီၢ်သုးလၢအိၣ်(KNLA)သုးရ့ၣ်(၁)ဟီၣ်က၀ီၤအပူၤတဖၣ် ခီဖျိတအဲၣ်ဒိး အိၣ်လၢ သုးမီၤစိရိၤတၢ်တီခိၣ်ရိၣ်မဲဖီလာ်လၢၤဘၣ်အဃိ ဖဲလါအီကူာ် ၁၀ သီအနံၤန့ၣ် လဲၤအးကဒါက့ၤကျိ(၆၀)ခိၣ် ဆူ သုးကီၣ်ကးအအိၣ်ဖဲဖၣ်အၣ်၀့ၢ်နီၣ်ဂံၢ်(၁၅၁)ပယီၤသုးတၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
တကတီၢ်ဃီမၤကဒီးဖဲလါအီကူာ် ၁၂ သီအနံၤ သုးကီၣ်ကးအဂၢၤကီၢ်သုးလဲၤအးကဒီးကျိ(၁၁)ခိၣ်ဆူ သုးခိးကီၢ်ဆၢ (BGF)သုးဟီၣ်က၀ီၤ(၂)အခိၣ် သုးခိၣ်စီၤတ့၀့အအိၣ်ဒီးဒ်န့ၣ်အသိးကယဲၢ်မ့ၢ်သုးကီၣ်ကးအဂၢၤကီၢ်သုးလၢအိၣ်ဖဲန့ၣ်သ့ၣ် တဖၣ်လဲၤအးက့ၤကျိခဲလၢာ်လံအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ
အ၀ဲစံး၀ဲလၢ“ဖဲအသီ(၁၀)အနံၤန့ၣ်အ၀ဲသ့ၣ်လဲၤအးက့ၤကျိလၢဖၣ်အၣ်၀့ၢ်(၁၅၁)သုးကလၢၤန့ၣ်ႉ...
လါအီကူး ၁၉သီ, ၂၀၂၄နံၣ်, ခ့ၣ်အဲးစံၣ်
ကညီကီၢ်စဲၣ်အပူၤ,တၢ်ကဒိးလဲစ့အဂီၢ်,တကီၢ်ခါခဲအံၤနီၢ်တဂၤတၢ်ဒိးလဲစ့(ပုဂ္ဂလိကဘဏ်)ဒီး(အွန်လိုင်းဘဏ်)သ့ၣ်တဖၣ်တၢ်သူက့ၤအီၤကီခဲထီၣ်ဝဲအဃိ,တၢ်ဘၣ်မၤဝဲတၢ်စိၥ်ခီဆှၢကျိၣ်စ့တဖၣ်ဒီးမၤက့ၤတၢ်ဒိးလဲကျိၣ်စ့အကျိၤအကွၥ်အသီအိၣ်ထီၣ်ဝဲအဂ့ၢ်,ရၤမတံဝ့ၢ်လီၢ်ကဝီၤဖိလၢအမၤတၢ်ဒိးလဲစ့တၢ်ဖံးတၢ်မၤဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ဒူသဝီလၢ(ဘဏ်)တအိၣ်ဘၣ်တၢ်လီၢ်သ့ၣ်တဖၣ်အပူၤန့ၣ်,တၢ်ဘၣ်စိၥ်ခီဆှၢဝဲကျိၣ်စ့သ့ၣ်တဖၣ်ဝံၤဘၣ်ဟ့ၣ်လီၤပှၤဒိးလဲစ့ကစၢ်တဖၣ်ဝံၤမၣ်တၢ်ဘၣ်မၤက့ၤဝဲတၢ်ဒိးလဲစ့န့ၣ်လီၤ.ပှၤအိၣ်လၢကၠီၣ်တဲၣ်တဖၣ်န့ၣ်ဆှၢလီၤန့ၢ်ဝဲအဟံၣ်ဖိဃီဖိလၢစ့ယိၤဒီးပှၤလၢအိၣ်ကီၢ်ပယီၤဖံးမၤတၢ်ဒိးလဲစ့တဖၣ်ခဲအံၤမၤဝဲတၢ်ဒိးလဲတဘူၣ်လၢၤဘၣ်အဃိ,လီၤဂၥ်လၢကဲထီၣ်က့ၤဝဲလၢတၢ်ဘၣ်ဆါကျိၣ်စ့,ပှ့ၤကျိၣ်စ့လံန့ၣ်လီၤ.ပှၤမ့က့ၤစိၥ်ဝဲကျိၣ်စ့သ့ၣ်တဖၣ်ဆူသဝီတဆီမၣ်ဒိးန့ၢ်ဘၣ်ဝဲတၢ်ဆှၢတၢ်အဘူးအလဲသ့ၣ်တဖၣ်လီၤ.ဒီးတၢ်ဒိးလဲစ့တၢ်မၤအံၤမ့မၤဝဲဒ်အံၤမၣ်ဆဲးမၤဝဲသ့လီၤအဂ့ၢ်”ရၤမတံလီၢ်ကဝီၤဖိလၢအမၤတၢ်ဒိးလဲစ့တဂၤစံးဝဲန့ၣ်လီၤ.
လၢန့ၣ်အမဲၥ်ညါ,တၢ်မၤဝဲတၢ်စိၥ်ခီဆှၢစ့တၢ်မၤအံၤန့ၣ်,ပှၤလၢအစိၥ်ဆှၢစ့တဂၤအံၤမ့ၢ်ဆှၢဝဲစ့ပယီၤတကလီၢ်န့ၣ်ဒိးန့ၢ်ဘၣ်ဝဲတၢ်စိၥ်ဆှၢခီတၢ်အဘူးအလဲ(၁၀၀၀)ကၠးလၢစ့ကစၢ်လၢအလဲၤဟံန့ၣ်ဝဲတတဂၤန့ၣ်အအိၣ်,အိၣ်ဝဲဒီးဖဲက့ၤစိၥ်ကဒီးဝဲဆူသဝီအပူၤပှၤဒိးလဲစ့ကစၢ်တဖၣ်အအိၣ်အခါဒိးန့ၢ်ဘၣ်ဝဲတၢ်လဲၤတၢ်က့ၤအဘူးအလဲလၢစ့ပယီၤတလီၢ်န့ၣ်(၂၀၀၀၀ ကၠးမ့တမ့ၢ် ၃၀၀၀)ကၠးအဘၢၣ်စၢၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,သၣ်မညၣ်သဝီပှၤဒိးလဲစ့ဖိတဂၤစံးဝဲလၢ“အခဲအံၤကထုးထီၣ်န့ၢ်ပှၤစ့တဘျီဃီတန့ၢ်လၢၤဘၣ်.ဘၣ်လဲၤဟံလၢဝ့ၢ်ပူၤဝံၣ်မၣ်ဘၣ်က့ၤဟ့ၣ်လီၤက့ၤလၢသဝီန့ၣ်လီၤ.ဒ်သိးလၢညါအပူၤကွံၥ်ပှၤဟဲပၠးပှၤစ့စလ့ၣ်ဝံၤပထုးထီၣ်န့ၢ်အဝဲသ့ၣ်တဘျီဃီတန့ၢ်လၢၤဘၣ်.ပကဟ့ၣ်အဝဲသ့ၣ်စ့နီၢ်န့ၣ်တအိၣ်လၢၤဘၣ်”အဂ့ၢ်စံးဝဲန့ၣ်လီၤ.
ဒ်န့ၣ်အသိး,ကီၢ်ဆၣ်ဟီၣ်ကဝီၤသဝီတဖၣ်အပူၤတၢ်ကထုးထီၣ်ဒိးလဲဝဲစ့လၢ()သ့ၣ်တဖၣ်တဘျီဃီတန့ၢ်ဝဲလၢၤဘၣ်ဒီးဘၣ်ကွၢ်ဝဲလၢစ့နီၢ်အိၣ်တ့ၢ်အဖီခိၣ်ဒိးလဲဝဲဒီးလၢတၢ်ကီတၢ်ခဲအကလုၥ်ကလုၥ်အဖီခိၣ်(အိၤလဲ)ပှၤဒိးလဲစ့ခၢၣ်စးတဖၣ်တတူၢ်လိၥ်ဝဲမၤဝဲတၢ်ဒိးလဲစ့လၢၤဘၣ်အိၣ်ဝဲအဂ့ၢ်,သ့ၣ်ညါဘၣ်လၢလီၢ်ကဝီၤဖိဒီးပှၤဒိးလဲစ့ဖိတဖၣ်အအိၣ်န့ၣ်လီၤ.
လါအီကူး ၁၈သီ, ၂၀၂၄နံၣ်, ခ့ၣ်အဲးစံၣ်,
ကီၢ်ပယီၤပှၤမၤတၢ်ဖိတဖၣ်ပၥ်ဖျါထီၣ်အသးဃ့ထီၣ်ဝဲလၢတၢ်ကက့ၤအိးထီၣ်က့ၤကီၢ်ကၠီၣ်တဲၣ်ကီၢ်ပယီၤကီၢ်ဆၢ,ဃိၣ်သၢဖျၢၣ်ဝ့ၢ်ကီၢ်ဆၢြတဲၤဝံၤအလီၢ်ခံ,ကၠီၣ်တဲၣ်ပှၤဘၣ်မူဘၣ်ဒါဒီးကီၢ်ပယီၤပှၤဘၣ်မူဘၣ်ဒါတဖၣ်တၢၣ်ပီၣ်သကိးဝဲတၢ်ဒီးတြဲၤလၢတၢ်ကးတံၥ်ကွံၥ်ဃၥ်ဝဲယံၥ်ထီၣ်လၢ(၂)လါဃၣ်ဃၣ်အံၤ,တၢ်ဟ့ၣ်တၢ်ပျဲလၢကမျၢၢ်တဖၣ်ကလ့ၢ်ထီၣ်လ့ၢ်လိၤက့ၤဝဲဖဲ တနံၤအံၤလါအီကူး(၁၈)သီအနံၤအပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. ဖဲအပူၤကွံၥ်လါယူၤ(၁၇)သီအနံၤအပူၤ,ဃိၣ်သၢဖျၢၣ်ဝ့ၢ်ကၠီၣ်တဲၣ်ပှၤဘၣ်မူဘၣ်ဒါဒီးကီၢ်ပယီၤပှၤဘၣ်မူဘၣ်ဒါတဖၣ်ကးတံၥ်ကွံၥ်ဝဲကျဲတၢ်ဟးထီၣ်က့ၤလီၤအဖီခိၣ်,တၢ်တီဆှၢပနံၥ်တၢ်ဖိတၢ်လံၤအတၢ်လဲၤနုၥ်ဒီးကမျၢၢ်တၢ်လ့ၢ်ထီၣ်လ့ၢ်လိၤဖံးအီၣ်မၤအီၣ်တဘၣ်ဘှီးဘၣ်ဒါဘၣ်အဃိ,ကီၢ်ပယီၤပှၤမၤတၢ်ဖိတဖၣ်မၤဝဲတၢ်ပၥ်ဖျါထီၣ်အတၢ်ဘၣ်သးဖဲလါအီကူး(၁၅)သီဒီး(၁၆)သီအနံၤန့ၣ်လီၤ.
ခီဖျိကမျၢၢ်ပှၤမၤတၢ်ဖိတဖၣ်ပၥ်ဖျါထီၣ်တၢ်ဘၣ်သးတၢ်ဂ့ၢ်ခိၣ်တီ(၃)ထံၣ်အဃိခိၣ်နၢ်ခံခီခံကပၤတၢၣ်ပီၣ်တဲသကိးက့ၤဝဲတၢ်အိၣ်ဝဲဒီးတနံၤအံၤတၢ်ပျဲဟးထီၣ်က့ၤလီၤဝဲပှၤမၤတၢ်ဖိတဖၣ်လံဘၣ်ဆၣ်,မ့မ့ၢ်သိလ့ၣ်တဖၣ်တခီလ့ၤတက့ၤလ့ၢ်ထီၣ်လ့ၢ်လိၤဝဲတန့ၢ်ဒံးဘၣ်အဂ့ၢ်,ဃိၣ်သၢဖျၢၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ကမျၢၢ်သ့ၣ်တဖၣ်န့ၣ်ပၥ်ဖျါထီၣ်ဝဲအတၢ်ဘၣ်သး(၃)ထံၣ်န့ၣ်လီၤ.ဒီးတၢ်သ့ၣ်တဖၣ်န့ၣ်မ့ၢ်ဝဲ(၁)ပှၤမၤတၢ်ဖိတဖၣ်န့ၣ်အဲၣ်ဒိးဝဲလၢကီၢ်ပယီၤအပူၤတၢ်မုၣ်တၢ်ခုၣ်ကအိၣ်(၂)ကမၤအီၣ်မၤအီဘၣ်ဝဲတၢ်ဘၣ်ဂ့ၢ်ဘၣ်ဝီဘၣ်လီၢ်ဘၣ်စး(၃)အဲၣ်ဒိးဝဲလၢထံကီၢ်ခံဘ့ၣ်အဘၢၣ်စၢၤတၢ်ဟးထီၣ်က့ၤလီၤဒီးဟီၣ်ကဝီၤတၢ်အိၣ်သးတဖၣ်ကအိၣ်ဒီးတၢ်မုၥ်တၢ်ခုၣ်တၢ်ဘၣ်ဘှီးဘၣ်ဒါသ့ၣ်တဖၣ်န့ၣ်လီၤ.လၢတၢ်န့ၣ်အဃိန့ၣ်ခိၣ်နၢ်တဖၣ်ကတိၤတၢၣ်ပီၣ်သကိးတၢ်ဝံၤတနံၤအံတၢ်ပျဲလ့ၢ်ထီၣ်လ့ၢ်လိၤပှၤမၤတၢ်ဖိသ့ၣ်တဖၣ်လံဘၣ်ဆၣ်,သိလ့ၣ်ဖိဆံးသိလ့ၣ်ဖးဒိၣ်တဖၣ်ဒုလ့ၤတက့ၤလ့ၢ်လိၤဝဲတန့ၢ်ဒံးဘၣ်န့ၣ်လီၤ.ဒီးပှၤကညီလၢအလ့ၢ်လိၤပှ့ၤအီၣ်ပှ့ၤအီတၢ်တဖၣ်နါက့န့ၣ်စိၥ်ဝဲတၢ်ဖိတၢ်လံၤန့ၢ်ထဲအနီၢ်ကစၢ်လိၤစှၤကိးမံၤလီၤ.”အဂ့ၢ်စံးဝဲန့ၣ်လီၤ.
လၢန့ၣ်အမဲၣ်ညါ,ဘၣ်ဃးဒီးကီၢ်ဆၢတြဲၤအံၤန့ၣ်အပူၤကွံၥ်တၢ်ဟ့ၣ်လ့ၢ်ထီၣ်လ့ၢ်လိၤဝဲထဲကီၢ်ပယီၤကၠိဖိလၢအလဲၤထီၣ်ကၠိဆူကီၢ်ကၠီၣ်တဲၣ်အပူၤဒီးတြဲၤခိၣ်ဃၢၤပှၤမၤတၢ်ဖိသ့ၣ်တဖၣ်လီၤအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
တကတၢ်ဃီ,ကညီကီၢ်စဲၣ်နိၣ်တကီကီၢ်ဆၣ်,ဃိၣ်သၢဖျၢၣ်ဝ့ၢ်တၢ်လီၢ်တဖၣ်အပူၤအံၤမ့ၢ်ဝဲဒံၣ်မိၤကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ဟူးဂဲၤတၢ်လီၢ်,ဒီးလၢကီၢ်ကၠီၣ်တဲၣ်ဆၣ်ခလဲၣ်ဘူရံၤကီၢ်ဆၣ်ကီၢ်ဆၢတၢ်ဆှၢပနံၣ်တၢ်ကၤတြဲၤတၢ်လီၢ်တဖၣ်အပူၤစ့ၢ်ကီးအပူၤကွံၥ်(DKBA)ဒီးကၠီၣ်တဲၣ်ပှၤခိးကီၢ်ဆၢပှၤဘၣ်မူဘၣ်ဒါတဖၣ်တဲအါဂ့ၢ်လိၥ်သးဘၣ်ဃးဒီးတၢ်ဘှီထီၣ်ကျဲကဲထီၣ်တ့ၢ်ဝဲအသးအဃိ,ကီၢ်ပယီၤတကပၤစးထီၣ်ကးတံၥ်ဆိကျဲဝံၤအလီၢ်ခံကၠီၣ်တဲၣ်တကပၤစ့ၢ်ကီးက့ၤကးတံၥ်ကဒီးဝဲဒၣ်ကျဲကဲထီၣ်အသးန့ၣ်လီၤ.
လၢတၢ်န့ၣ်အဃိ,ခီဖျိတၢ်ကးတံၥ်ကွံၥ်ဝဲကီၢ်ဆၢြတဲၤဒ်အံၤအဖီခိၣ်တၢ်ဂ့ၢ်ကီအိၣ်ထီၣ်က့ၤဝဲလၢကမျၢၢ်ကတၢ်ဖံးအီၣ်မၤအီၣ်,ကဟးထီၣ်ဟးက့ၤလီၤအမဲၥ်ညါ,ဃိၣ်သၢဖျၢၣ်ဝ့ၢ်ပူၤစ့ၢ်ကီးကၠီၣ်တဲၣ်ပနံၣ်တၢ်ကၤလၢတၢ်ဆှၢလီၤဝဲဆူကီၢ်ပယီၤတကပၤလီၤတူၥ်ကွံၥ်ဝဲအဃိ,တၢ်တီဆှၢခူသူၣ်က့ၤဝဲတၢ်ဖိတၢ်လံၤလၢတဖိးသဲစးကျဲအိၣ်ဝဲအဖီခိၣ်,သုးကီၣ်ကးတကပၤဖီၣ်ဝဲသိလ့ၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်လၢကီၢ်ဆၢပှၤမၤကၤတၢ်ဖိတဖၣ်အအိၣ်န့ၣ်လီၤ.