လါယူၤ ၃သီႇ ၂၀၂၄နံၣ်ႇ ခ့ၣ်အဲးစံၣ်ႇ
ကဂဲၤလိာ်မၤတၢ်လၢ(ဗပနပေတေိိပ)ကီၢ်ခီဒိၣ်ႇကညီဖိတဖၣ်အဂ့ၢ်၀ီအဂီၢ်ႇ(KTLA)လီၢ်ခၢၣ်သး၀ဲၤလီၢ်ခိၣ်သ့ၣ်ႇ၀ဲၤဒၢးခိၣ်ႇသုးခိၣ်ဒိၣ်ဖိစီၤ၀ါန့ၢ်မူ(ကိး)စီၤအဲကလံးအံၤႇလဲၤပာ်ဖှိၣ်ထီၣ်သးဒီးသုးခိးကီၢ်ဆၢ(BGF)ဖဲအပူၤကွံာ်လါမ့ၤ(၁၅)သီအနံၤအဂ့ၢ်ႇသ့ၣ်ညါဘၣ်ဒ်အနီၢ်ကစၢ်ဒၣ်၀ဲစံး၀ဲအသိးန့ၣ်လီၤႉ
တၢ်ပၢၢ်ဆၢတၢ်ဖံးတၢ်မၤအပူၤႇကညီဖိတဖၣ်အတၢ်ဃူတၢ်ဖိးတအိၣ်၀ဲဘၣ်အဃိႇလၢတၢ်ကဂဲၤလိာ်မၤတၢ်လၢကညီဖိလၢအိၣ်ထံထၣ်စွ့တဖၣ်အဂီၢ်ႇလဲၤပာ်ဖှိၣ်မၤက့ၤ၀ဲတၢ်ဒီးသုးခိးကီၢ်ဆၢ(BGF)အံၤမ့ၢ်တၢ်ဃုထၢကျဲလၢအဂၤတမံၤအဂ့ၢ်ႇသုးခိၣ်ဒိၣ်ဖိစီၤ၀ါန့ၢ်မူစံးဘၣ်တ့ၢ်ခ့ၣ်အဲးစံၣ်ကညီတၢ်ကစီၣ်ဖဲမဟါလါယူၤ(၂)သီအနံၤဒ်အံၤန့ၣ်လီၤႉ
အ၀ဲစံး၀ဲလၢ“အခဲအံၤန့ၣ်ႇယက့ၤအိၣ်က့ၤလၢသုးခိးကီၢ်ဆၢ(္ဘွၠ)မီၤႉယက့ၤပာ်ဖှိၣ်မၤသကိးက့ၤတၢ်ဒီး(BGF)ခီန့ၣ်မ့ဘၣ်တဲန့ၣ်ႇခီဖျိယထံၣ်လၢတၢ်ပၢၢ်ဆၢတၢ်ဖံးတၢ်မၤအပူၤန့ၣ်ႇပၦၤကညီအံၤအတၢ်ဃူတၢ်ဖိးတအိၣ်၀ဲဘၣ်ႇ(KTLA)မ့ၢ်ဂ့ၤႇဃုာ်ဒီးပၦၤကညီတၢ်ကရၢကရိသ့ၣ်တဖၣ်န့ၣ်မ့ၢ်ဂ့ၤန့ၣ်ႇအိၣ်ဒီဒူၣ်လီၤဘၣ်ဆၣ်ပတၢ်ဃူတၢ်ဖိးတအိၣ်ဘၣ်ႇတၢ်ဃိသးန့ၣ်ယကွၢ်လၢပၦၤကညီကလုာ်အံၤအတၢ်ဃူတၢ်ဖိးတအိၣ်ဘၣ်အဖီခိၣ်န့ၣ်ႇလၢပကဘၣ်မၤအဂ့ၤကတၢၢ်ဒ်လဲၣ်န့ၣ်အိၣ်ဒၣ်ကဘၣ်ဃုကျဲအဂၤတမံၤလီၤမီၤႉအဃိဒီးလၢပၦၤကလုာ်ကညီလၢန့ၣ်အါတက့ၢ်အိၣ်လၢထံထၣ်စွ့န့ၣ်အဂီၢ်န့ၣ်ႇပကဘၣ်မၤတၢ်လၢအဂီၢ်စ့ၢ်ကီးမီၤႉတၢ်သ့ၣ်တဖၣ်အံၤန့ၣ်ယတဲသ့ထဲအံၤလီၤႉဘၣ်မနုၤလဲၣ်န့ၣ်ခီဖျိယတၢ်ဖံးတၢ်မၤအိၣ်တခါအဃိန့ၣ်လီၤႉဒီးယဟဲက့ၤတုၤဖဲအံၤန့ၣ်တံဒံၣ်ဒံၣ်တခီအ၀ဲတူၢ်လိာ်ယၤမုာ်နီၢ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါႇဘၣ်ဃးသုးခိၣ်ဒိၣ်ဖိစီၤ၀ါန့ၣ်မူအတၢ်လဲၤပာ်ဖှိၣ်မၤသကိးတၢ်ဒီး(BGF)အံၤန့ၣ်ႇအခီၣ်ထံးခီၣ်ဘိတၢ်တၢၣ်ပီၣ်တဲသကိးဒီးအီၤတအိၣ်၀ဲဘၣ်အသိးႇတသ့ၣ်ထွဲစ့ၢ်ကီး၀ဲဘၣ်အဂ့ၢ်ၦၤဒုးအိၣ်ထီၣ်(KTLA)ကီၢ်သူလ့ၤသုးမုၢ်ဒိၣ်သုးခိၣ်ကျၢၢ်စီၤနၢၤဒါမၠးစံးဘၣ်ခ့ၣ်အဲးစံၣ်ကညီတၢ်ကစီၣ်ဖဲတနံၤအံၤလါယူၤ(၃)သီအနံၤဒ်အံၤန့ၣ်လီၤႉ
အ၀ဲစံး၀ဲလၢ“စီၤအဲကလံး(ကိး)(ကီၤလၤ၀ါ)န့ၣ်ပတဲအီၤလၢနကဲၦၤထံထၣ်စွ့ဟဲထီၣ်လၢထံထၣ်စွ့တကပၤအဃိန့ၣ်မၤမ့ကၠးနးႇယတဲအီၤနအိၣ်လၢ(အီၤစံၣ်)နဟဲက့ၤအိၣ်လၢအံၤန့ၣ်တဘၣ်ဟးနါစိၤတဂ့ၤႉဒီးအ၀ဲန့ၣ်ကဲ၀ဲၦၤသးစၢ်ဖိအဃိန့ၣ်ပဟ့ၣ်ဂံၢ်ဟ့ၣ်ဘါအီၤႉပပာ်ဂံၢ်ပာ်ဘါအီၤပဆိကမိၣ်လၢကကဲထီၣ်ထံကီၢ်ခိၣ်နၢ်ခါဆူမဲာ်ညါႉအအံၤတဘျီလီၢ်ခံကတၢၢ်တတဲၦၤတၢ်နီတမံၤဘၣ်တထံၣ်ဃီလၢဃုထၢ၀ဲကျဲလၢန့ၣ်တဘိ၀ံၤက့ၤလီၤတတဲၦၤဘၣ်ႉလဲၤလၢန့ၣ်နါက့ပတသ့ၣ်ညါထွဲဘၣ်ႉအအံၤလဲၤတုၤလၢန့ၣ်လံဘျီပမၤဘၣ်ဧါႇအကစၢ်တၢ်ဃုထၢကျဲအဃိလဲၤဒၣ်၀ဲႇမ့ၢ်တၢ်ထိးဘၣ်အသးဒ်လဲၣ်ပတဲတဘၣ်ဘၣ်”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
တကီတီၢ်ဃီႇသုးခိၣ်ဒိၣ်ဖိစီၤ၀ါန့ၢ်မူလၢလဲၤပာ်ဖှိၣ်မၤတၢ်ဒီးသုးခိးကီၢ်ဆၢ(BGF)တဂၤအံၤန့ၣ်ႇအတၢ်ကစီၣ်ဟးထီၣ်၀ဲလၢႇလဲၤစိာ်ဃုာ်၀ဲဒီးစုက၀ဲၤကျိချံၦာ်သၣ်တဖၣ်အိၣ်၀ဲအါမးဘၣ်ဆၣ်အနီၢ်ကစၢ်တခီစံး၀ဲလၢတလဲၤစိာ်၀ဲစုက၀ဲၤနီတမံၤဘၣ်အဂ့ၢ်ႇသ့ၣ်ညါဘၣ်န့ၣ်လီၤႉ
တကးဒံးဘၣ်ႇဘၣ်ဃးဒီးသုးခိၣ်ဒိၣ်ဖိစီၤ၀ါန့ၢ်မူအတၢ်လဲၤပာ်ဖှိၣ်သးဒီး(BGF)အံၤန့ၣ်အနီၢ်ကစၢ်ႇအဟံၣ်ဖိဃီဖိဃုာ်ဒီးၦၤသုးဖိ(၆)ဂၤပၣ်ဃုာ်၀ဲတပူၤဃီဒီးအီၤအမဲာ်ညါႇလဲၤစိာ်၀ဲဒီးစုက၀ဲၤတနီၤအဂ့ၢ်ႇ(ုဿူဗ)ကီၢ်သူလ့ၤသုးမုၢ်ဒိၣ်ထုးထီၣ်ဘိးဘၣ်ရၤလီၤ၀ဲလံာ်ဖဲတနံၤအံၤလါမ့ၤ(၃)သီအနံၤအိၣ်စ့ၢ်ကီး၀ဲန့ၣ်လီၤႉ
ဒ်န့ၣ်အသိးႇသုးခိၣ်ဒိၣ်ဖိစီၤ၀ါန့ၢ်မူအံၤဖဲအ၀ဲအိၣ်လၢမူဒါပူၤအဆၢကတီၢ်ဟးကွံာ်၀ဲလၢတၢ်ချၢလၢအနီၢ်ကစၢ်သးဒ်အံၤအဃိႇတၢ်ထုးထီၣ်ကွံာ်အီၤလၢကီၢ်သူလ့ၤသုးမုၢ်ဒိၣ်(KTLA)ပူၤလံအဂ့ၢ်ပာ်ဖျါထီၣ်၀ဲလၢလံာ်ဘိးဘၣ်ရၤလီၤအပူၤစ့ၢ်ကီးန့ၣ်လီၤႉ
လါမ့ၤ ၃၀သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢသုးက့(၆)ကီးတရံး၀့ၢ်ကမျၢၢ်လီၢ်အိၣ်ကဒုဖိလၢအဃ့ၢ်တၢ်ဒုးတဖၣ်အံၤဖဲအက့ၤဆူအဟံၣ်အဃီအတၢ်လီၢ်တၢ်ကျဲအဆၢကတီၢ်ယီၢ်ဘၣ်၀ဲမ့ၣ်ပိၢ်အိၣ်၀ဲအဂ့ၢ်ကီးတရံးလီၢ်က၀ီၤဖိတဖၣ်စံး၀ဲန့ၣ်လီၤႉ
သုးကီၣ်ကးက့ၤဒိၣ်စိဒိၣ်ကမီၤက့ၤ၀ဲကီးတရံး၀့ၢ်၀ံၤအလီၢ်ခံမၢ၀ဲကမျၢၢ်လီၢ်က၀ီၤဖိတဖၣ်က့ၤအိၣ်ဆိးက့ၤလၢအနီၢ်ကစၢ်တၢ်လီၢ်ကျဲပူၤဒီးဖဲလီၢ်က၀ီၤဖိတနီၤက့ၤအိၣ်ဆိးက့ၤလၢအနီၢ်ကစၢ်တၢ်လီၢ်တၢ်ကျဲအခါယီၢ်ဘၣ်၀ဲမ့ၣ်ပိၢ်အဂ့ၢ်ကီးတရံး၀့ၢ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“လီၢ်က၀ီၤဖိတဖၣ်ဘၣ်ဃ့ၢ်အိၣ်ကဒုအသးဖးယံာ်လံအဃိအဲၣ်ဒိးက့ၤအိၣ်၀ဲလၢအနီၢ်ကစၢ်တၢ်လီၢ်တၢ်ကျဲလံဒီးသုးကီၣ်ကးတကပၤတခီမၢ၀ဲၦၤကက့ၤအိၣ်အဃိၦၤအါဒံအါဂၤက့ၤအိၣ်၀ဲလီၤႉဒီးၦၤလၢအက့ၤအိၣ်သ့ၣ်တဖၣ်အကျါန့ၣ်ယီၢ်ဘၣ်၀ဲမ့ၣ်ပိၢ်အိၣ်၀ဲ”အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါအပူၤကွံာ်လါမ့ၤ(၂၈)သီအနံၤန့ၣ်ကီးတရံး၀့ၢ်က၀ီၤဒ့(၄)လီၢ်က၀ီၤဖိ(မၣ်ညိၣ်)အံၤဖဲအ၀ဲဟးထီၣ်လိလီၤ၀ဲတၢ်ကူတၢ်ကၤအဆၢကတီၢ်ယီၢ်ဘၣ်၀ဲမ့ၣ်ပိၣ်လၢ(ဘျီၣ်ဒိၣ်)အလီၢ်ခံတၢ်လီၢ်အပူၤအဃိအခီၣ်ခံကပၤလၢာ်ဘၣ်ဒိ၀ဲဒီးအခီၣ်တူာ်ကွံာ်၀ဲတကပၤအဂ့ၢ်၀့ၢ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
တကးဒံးဘၣ်သုးကီၣ်ကးအံၤက့ၤဒိၣ်စိဒိၣ်ကမီၤက့ၤ၀ဲကီးတရံး၀့ၢ်ပူၤ၀ံၤအလီၢ်ခံမၢဆူၣ်မၢစိး၀ဲကမျၢၢ်လီၢ်က၀ီၤဖိလၢအဃ့ၢ်အိၣ်ကဒုအသးတဖၣ်လၢကက့ၤအိၣ်ဆိးလၢ၀့ၢ်ပူၤအိၣ်၀ဲဘၣ်ဆၣ်မ့မ့ၢ်လၢကမျၢၢ်တၢ်ဘံၣ်တၢ်ဘၢအဂီၢ်တၢ်မၤရှဲလဲဟီၣ်က၀ီၤတဖၣ်တအိၣ်၀ဲဘၣ်အဃိကမျၢၢ်လီၢ်က၀ီၤဖိတဖၣ်ယီၢ်ဘၣ်၀ဲမ့ၢ်ပိၣ်ဒ်အံၤလီၤအဂ့ၢ်စံး၀ဲန့ၣ်လီၤႉ
တကတီၢ်ဃီသုးကီၣ်ကးအံၤတဆဲးဟ့ၣ်မၤစၢၤ၀ဲတၢ်အီၣ်တၢ်အီဆူကမျၢၢ်ၦၤဃ့ၢ်တၢ်ဒုးဖိလၢအိၣ်ဖၣ်အၣ်ကီၢ်ရ့ၣ်အပူၤတဖၣ်လၢၤဘၣ်ဒီးၦၤလၢဃ့ၢ်အိၣ်ကဒုသးလၢဖၣ်အၣ်ကီၢ်ရ့ၣ်အပူၤတဖၣ်အံၤမ့က့ၤအိၣ်လၢကီးတရံး၀့ၢ်ပူၤမၣ်ကဟ့ၣ်မၤစၢၤ၀ဲအဃိၦၤက့ၤအိၣ်ဆိးက့ၤထဲဂံၢ်ခီၣ်ထံးၦၤပတီၢ်မုၢ်ဖိတဖၣ်လီၤအဂ့ၢ်ကမျၢၢ်လီၢ်က၀ီၤဖိလၢအဃ့ၢ်အိၣ်ကဒုအသးလၢဖၣ်အၣ်ကီၢ်ရ့ၣ်ပူၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“မ့မ့ၢ်လၢဖၣ်အၣ်တကပၤန့ၣ်ခီဖိလျီၢ်အိၣ်ကဒုဖိအဂီၢ်တၢ်လီၢ်တၢ်ကျဲလီၤတံၢ်တအိၣ်ဘၣ်အဃိၦၤဃ့ၢ်အိၣ်ကဒုအသးတဖၣ်ဘၣ်ဃ့ၢ်အိၣ်၀ဲလၢသီခါဖၠၣ်မ့တမ့ၢ်လၢၦၤဟံၣ်ၦၤဃီလီၤႉအခဲအံၤန့ၣ်ၦၤမ့အိၣ်ဖဲအံၤန့ၣ်အ၀ဲသ့ၣ်တမၤစၢၤ၀ဲလၢၤဘၣ်တဲ၀ဲလၢၦၤမ့က့ၤအိၣ်လၢကီးတရံး၀့ၢ်ပူၤမၣ်ကမၤစၢၤ၀ဲၦၤလၢစ့အိၣ်တဖၣ်န့ၣ်ငါအိၣ်၀ဲဖဲဖၣ်အၣ်အပူၤဒီးက့ၤ၀ဲတစိၢ်တလီၢ်ဒ်န့ၣ်လီၤႉမ့မ့ၢ်ၦၤမၤအီၣ်မုၢ်ဆ့ၣ်မုၢ်ဂီၤၦၤပတီၢ်မုၢ်ဖိတဖၣ်ဒုက့ၤအိၣ်၀ဲအါ”အဂ့ၢ်စံး၀ဲန့ၣ်လီၤႉ
ဒ်န့ၣ်အသိးကီးတရံး၀့ၢ်ပူၤသုးကီၣ်ကးစံး၀ဲလၢအစုတီၤဖီလာ်ပဒိၣ်ကၠိတဖၣ်အံၤကက့ၤအိးထီၣ်ကဒါက့ၤ၀ဲလီၤအိၣ်၀ဲဘၣ်ဆၣ်တကီၢ်ခါခဲအံၤမၤဖျါထီၣ်၀ဲအမိၢ်လံၤမိၢ်ၦၢ်တအိၣ်၀ဲဒံးဘၣ်အဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
လါမ့ၤ ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ သုးကီၣ်ကးအဒုးယၤ သုးကလၢၤဃုာ်ဒီးသုးကလၢၤလၢအရ့ဒိၣ်လၢအိၣ်တ့ၢ်ဒံးလၢဖၣ်ပူၣ်၀့ၢ်ပူၤသ့ၣ်တဖၣ်အံၤ (KNLA)သုးပာ်ဖှိၣ် ဆဲးတြီတံာ်ဃာ်၀ဲတပယူာ်ဃီအဂ့ၢ်န့ၣ် (သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤႉ
ဖၣ်ပူၣ်၀့ၢ်ပူၤတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်၀ဲသုးကီၣ်ကးအသုးကဖိႇသုးကလၢၤဖးဒိၣ်အဖျၢၣ်(၂၀)ဃၣ်ဃၣ်ဒီး သုးရ့ၣ်(၂)ရ့ၣ်အသိး သုးကလၢၤလၢအအိၣ်တ့ၢ်တဖၣ်အကျါခီၣ်ချ့သုးရ့ၣ်(ခမရ-၃၄၀)ႇ(ခလရ-၃၄၁)ဒီး ဒုးယၤသုးကလၢၤလၢအရ့ဒိၣ်လၢသုးကီၣ်ကးအဂီၢ်သ့ၣ်တဖၣ်အံၤ တၢ်ပၢၢ်ဆၢသုးကရူၢ်ဆဲးတြီတံာ်ဃာ်၀ဲအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ခဲအံၤပယီၤသုးကလၢၤန့ၣ်အိၣ်တ့ၢ်ဒံးအဖျၢၣ်(၁၀)ဘျဲၣ်ဒံးႉအ၀ဲသ့ၣ်အတၢ်ဟူးတၢ်ဂဲၤခီန့ၣ် လၢဖၣ်ပူၣ် ၀့ၢ်ခိၣ်၀့ၢ်ဃၢၤန့ၣ်ဟဲခးလီၤတၢ်ဒီးကဘီယူၤႉပယီၤသုးကလၢၤလၢအအိၣ်တ့ၢ်ဒံးတဖၣ်န့ၣ်ပဒီၣ်တဲာ်ဃာ်အ၀ဲသ့ၣ်တၢ်အီၣ်ကျိၤႉသုးကလၢၤလၢပမၤန့ၢ်ဃာ်တဖၣ်န့ၣ်ပယီၤသုးအံၤဂုာ်ကျဲးစၢးက့ၤဟံကဒါ၀ဲဘၣ်ဆၣ်မ့ၢ်လၢပဒီၣ်တဲာ်ဃာ်အ၀ဲသ့ၣ်လၢပျီပူၤအဃိလၢအ၀ဲသ့ၣ်ကက့ၤန့ၢ်ကဒါအဂီၢ်န့ၣ်ကီခဲ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ စးထီၣ်တလါအံၤလါမ့ၤ ၁ သီတုၤလၢ ၁၅ သီ တၢ်ဒုးကဲထီၣ်လၢ ခံခီခံကပၤအဘၢၣ်စၢၤခဲလၢာ်အိၣ်၀ဲ(၄၆)ဘျီဒီး သုးကီၣ်ကးတကပၤသံ၀ဲဒၣ်(၁၇)ဂၤႇ ဘၣ်ဒိ၀ဲဒၣ်(၇)ဂၤအဂ့ၢ်န့ၣ် ခ့ၣ်အဲၣ်ယူၣ်...
လါမ့ၤ ၂၉သီ ၂၀၂၄နံၣ် ခ့ၣ်အဲးစံၣ်
တနီသရံးကီၢ်ခီဒိၣ်ဘျံးဒ၀ဲၢ်ကီၢ်ရ့ၣ်ဘျံး၀့ၢ်က၀ီၤဒ့တဖၣ်အပူၤသုးကီၣ်ကးဟးဆှၢ၀ဲကမျၢၢ်တၢ်ဘၣ်ကဲသုး(၃)ဖုတဖုလံာ်တၢ်ကိးဒီးက၀ီၤဒ့တဘ့ၣ်န့ၣ်ဆှၢ၀ဲက၀ီၤဒ့ဖိ(၃)ဂၤမျးကယၤစုာ်စုာ်အိၣ်၀ဲအဂ့ၢ်ဘျံးဒ၀ဲၢ်ကီၢ်ရ့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
၀့ၢ်ပူၤက၀ီၤဒ့ဖိတဖၣ်အံၤလါမ့ၤအလီၢ်ခံကတၢၢ်တနွံအတီၢ်ပူၤသုးကီၣ်ကးအစုတီၤဖီလာ်က၀ီၤဒ့ခိၣ်နၢ်ဒီးသုးကီၣ်ကးကရူၢ်ကရၢတဖၣ်ဟးဆှၢ၀ဲတၢ်ဘၣ်ကဲသုးအလံာ်တၢ်ကိးအိၣ်၀ဲအဂ့ၢ်က၀ီၤဒ့ဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တနွံညါအံၤအတီၢ်ပူၤန့ၣ်ဟးထၢ၀ဲၦၤသၢဖုတဖုတဖၣ်န့ၣ်လီၤႉက၀ီၤဒ့တဘ့ၣ်န့ၣ်(၃)ဂၤလၢညါအပူၤကွံာ်တဲ၀ဲလၢၦၤဘၣ်ဖီၣ်တၢ်ဖးကိးဘျီဒဲးဖဲအဟဲကိးၦၤကလဲၤကဲသုးတဖၣ်အခါန့ၣ်ဟးဆှၢ၀ဲလံာ်ၦၤမံၤၦၤသၣ်လီၤတံၢ်လီၤဆဲးလီၤႉတဘၣ်လိၣ်ဘုးတၢ်ဖးလၢၤဘၣ်”အဂ့ၢ်စံးဘၣ်ခ့ၣ်အဲးစံးကညီတၢ်ကစီၣ်န့ၣ်လီၤႉ
တၢ်ဟးဆှၢ၀ဲလံာ်ကိးတၢ်ဘၣ်လဲၤကဲသုးအံၤသုးကီၣ်ကးဟးဆှၢ၀ဲလၢကယၣ်ပၠ့ၤႇစရံၣ်ႇတလဲမၣ်ႇကၠဲးစါပၠ့ၤက၀ီၤဒ့ဃုာ်ဒီးက၀ီၤဒ့လၢအိၣ်တ့ၢ်သ့ၣ်တဖၣ်အပူၤအိၣ်၀ဲအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
လၢန့ၣ်အမဲာ်ညါႇၦၤလၢအဘၣ်တၢ်ကိးအီၤသ့ၣ်တဖၣ်အံၤမ့တအဲၣ်ဒိးလဲၤကဲ၀ဲသုးဘၣ်န့ၣ်သုးကီၣ်ကးဃ့အီၣ်လီးအ၀ဲသ့ၣ်တဖၣ်လၢစ့ပယီၤအကလီၢ်(၂၀)တုၤလၢအကလီၢ်(၅၀)အိၣ်၀ဲအဂ့ၢ်၀့ၢ်ပူၤလီၢ်က၀ီၤဖိတဖၣ်စံး၀ဲန့ၣ်လီၤႉ
ခီဖျိသုးကီၣ်ကးမၢဆူၣ်၀ဲကမျၢၢ်သးစၢ်တဖၣ်လၢကဘၣ်လဲၤကဲသုးဒ်အံၤအဃိပယီၤၦၤမၤတၢ်လၢၦၤဂ့ၢ်၀ီကရူၢ်ကရၢဒီးတၢ်ဃုထံၣ်သ့ၣ်ညါတၢ်သဘံၣ်ကရူၢ်ကရၢ(BACS)အတၢ်မၤနီၣ်မၤဃါအပူၤပာ်ဖျါ၀ဲလၢတၢ်ဘၣ်လဲၤကဲသုး(၁)တဖုအကျါကီၢ်ပယီၤဒီတဘ့ၣ်အပူၤသးစၢ်အဂၤ(၄၃၀၀)ဘၣ်တၢ်ထၢဖှိၣ် ၀ဲဒီးဆှၢ၀ဲဆူသုးတၢ်မၤလိကၠိ(၁၅)ဖျၢၣ်အပူၤအိၣ်၀ဲအဂ့ၢ်ပာ်ဖျါ၀ဲန့ၣ်လီၤႉ
ဒ်န့ၣ်အသိးၦၤလၢအဘၣ်လဲၤကဲ၀ဲသုးတဖၣ်အံၤအကျါတနီသရံးကီၢ်ခီဒိၣ်ၦၤအဆိကတၢၢ်တဖုဒီးခံဖုတဖုခဲလၢာ်ပာ်ဖှိၣ်အိၣ်၀ဲအဂၤ(၅၀၀)ဘျဲၣ်လံအသိးတကီၢ်ခါခဲအံၤလၢပလီၣ်၀့ၢ်အပူၤစ့ၢ်ကီးသုးကီၣ်ကးဟ့ၣ်၀ဲပတီၢ်ထီသုးတၢ်သိၣ်လိ(တတက-၁၂)အဖၢမုၢ်အိၣ်၀ဲ အဂ့ၢ်သ့ၣ်ညါဘၣ်ဒ်(BACS)အတၢ်ထုးထီၣ်ပာ်ဖျါအသိးန့ၣ်လီၤႉ
လါမ့ၤ ၂၉ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ၂၀၂၁ သုးဟံးန့ၢ် တၢ်စိတၢ်ကမီၤ၀ံၤလီၢ်ခံ လီၢ်က၀ီၤၦၤသူၣ်ဘီၣ်သးစၢ်သူကသံၣ်မူၤဘှီးဟဲအါထီၣ်ဒိၣ်န့ၢ်အပူၤကွံာ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိကီၢ်ပူၤတၢ်အိၣ်သးတဂၢၢ်တကျၢၤႇလၢတၢ်ဂ့ၢ်အကလုာ်ကလုာ်အဖီခိၣ်အံၤ ကၠိတဖၣ်တအိးထီၣ်လၢၤႇတကးဒံးဘၣ်တၢ်ဖံးတၢ်မၤစ့ၢ်ကီးလီၤစှၤအဃိ ၦၤသူၣ်ဘီၣ်သးစၢ်သူကသံၣ်မူၤဘှီး ဘၣ်ဟဲအါထီၣ်ဒ်အံၤလီၤအဂ့ၢ်န့ၣ် ကၠဲးထိၣ်ကီၢ်ဆၣ် ကမျၢၢ်လၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤႉ
“ၦၤသူကသံၣ်မူၤဘှီးအမျးကယၤဟဲအါထီၣ်ဖးအါညါႉ ဖိဒံဖိသၣ်ခီအါလၢကၠိတထီၣ်ဘၣ်ႇမ့၀ံၤမၤအီၣ်တၢ်ဖံးတၢ်မၤ ဒၢးတအိၣ်ဘၣ်ဘျီထိးဖှိၣ်လီၤခိၣ်အီကသံၣ်ႇအီဘဲထံလၣ်(ဘိန်းစာရွက်),အီ(WY)ကသံၣ်ႇအီညါဖီ ကဲထီၣ်က့ၤလၢ တၢ်မၤတခါမီၤႉသုးမီၤစိရိၤအၦၤရၤလီၤကသံၣ်တဖၣ်န့ၣ်အ၀ဲသ့ၣ်ၦ့ၤအီ၀ဲတဖျၢၣ်န့ၣ်(၁၅၀၀),(၂၀၀၀)ကၠးအိၣ်စ့ၢ်ႉမ့မ့ၢ်လၢဘဲထံလၣ်တဖၣ်န့ၣ်တဘ့ၣ်(၂၀၀)ကၠးချီအီၣ်၀ဲႉတၢ်လၢဘဲထံလၣ်အချီတဖၣ်အ၀ဲသ့ၣ်အီန့ၣ်အခိၣ်နူာ်တမၤတၢ် လၢၤႇ တနီၣ်ဖံးနီၣ်မၤတၢ်လၢၤဘၣ်ႉကီၢ်ဆၣ်လၢအဂၤဒုပတသ့ၣ်ညါဘၣ်ႉမ့ကၠဲးထိၣ်ကီၢ်ဆၣ်ပူၤဒုၦၤဖိဒံဖိသၣ်လီၤထွံလီၤယွၤလၢတၢ်မူၤတၢ်ဘှီးအဃိအံၤအိၣ်တပူလံ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါၦၤလၢအသူကသံၣ်မူၤဘှီးႇဆါကသံၣ်ဘှီးသ့ၣ်တဖၣ်န့ၣ်တၢ်ဖီၣ်အ၀ဲသ့ၣ်မ့ချုးန့ၣ်လီၢ်က၀ီၤၦၤဘၣ်မူဘၣ်ဒါဟံးထီၣ်ဖီၣ်ထီၣ်အရ့ဟ့ၣ်တၢ်ကမၣ်ဒီးမ့မ့ၢ်ၦၤလၢကသံၣ်မူၤဘှီးစွဲအီၤတဖၣ်န့ၣ်တၢ်လဲၤဆှၢကူစါအီၤလၢတၢ်ဆါဟံၣ် စ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
“လၢအီႇချုးလၢစုလိၤသ့ၣ်တဖၣ်န့ၣ်ၦၤဖီၣ်အီၤၦၤဒုးဃာ်အီၤလၢတၢ်ဒုးဃာ်လီၢ်ႉ မ့၀ံၤအ၀ဲသ့ၣ်မ့ဘှီလီၤက့ၤသး မးၦၤပျၢ် လီၤက့ၤအီၤဒ်န့ၣ်ႉမ့မ့ၢ်ၦၤလၢတအီၣ်ဘၣ်အိၣ်တကဲဘၣ်တဖၣ်န့ၣ်ၦၤဘှီဆှၢအီၤလၢတၢ်ဟံၣ်မးကိညၢ်လီၤႉ ပၢပြးၦၤဘၣ်မူ ဘၣ်ဒါမၤဒ်န့ၣ်ဘျီအမိအပါသးခု၀ဲဒီဒူၣ်ညါႉမ့တမ့ၢ်ဘၣ်ဘၣ်ဒံၣ်ဖိန့ၣ်သူအီၣ်တန့ၢ်လၢၤဘၣ်ႇ မၢအီၣ်စ့ၢ်ကီးတန့ၢ်လၢၤဘၣ် ”အဂ့ၢ်န့ၣ်...
လါမ့ၤ ၂၈သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဒူပျာ်ယာ်ကီၢ်ရ့ၣ်ကီးတရံးကီၢ်ဆၣ်အပူၤဒ်သိးကမျၢၢ်လီၢ်က၀ီၤဖိတဖၣ်ကအိၣ်ဒီးတၢ်ဒီသဒၢအသးလၢမ့ၣ်ပိၣ်တၢ်လီၤဘၣ်ယိာ်အဂီၢ်ကညီကီၢ်စဲၣ်ကီၢ်ပူၤၦၤမၤစၢၤၦၤလီၢ်အိၣ်ကမှံဖိကမံတံာ်(CIDKP)ဟ့ၣ်၀ဲမ့ၣ်ပိၣ်တၢ်သ့ၣ်ညါနၢ်ပၢၢ်တၢ်မၤလိဖဲအပူၤကွံာ်လါမ့ၤ(၂၅)သီတုၤလၢလါမ့ၤ(၂၇)သီလၢ(၃)သီအတီၢ်ပူၤအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
တကီၢ်ခါခဲအံၤဒုးယၤတၢ်သဘံၣ်သဘုၣ်အိၣ်ဒံး၀ဲအဆၢကတီၢ်ဒ်သိးလီၢ်က၀ီၤဖိတဖၣ်ကဃ့ၢ်ပဒ့ၣ်အသးလၢမ့ၣ်ပိၣ်တၢ်လီၤဘၣ်ယိာ်ကသ့အဂီၢ်တၢ်ဟ့ၣ်၀ဲမ့ၣ်ပိၣ်တၢ်မၤလိအံၤလီၤအဂ့ၢ်ၦၤဟ့ၣ်တၢ်သိၣ်လိသရၣ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်သဘံၣ်သဘုၣ်ကဲထီၣ်တၢ်လီၢ်သ့ၣ်တဖၣ်အပူၤကမျၢၢ်တဖၣ်ကဘၣ်ပလီၢ်အသးလၢမ့ၣ်ပိၢ်တၢ်လီၤဘၣ်ယိာ်အဒိၣ်ကတၢၢ်လီၤႉအဃိန့ၣ်ဒ်သိးကမျၢၢ်တဖၣ်ကပူၤဖျဲးလၢမ့ၣ်ပိၣ်တၢ်လီၤဘၣ်ယိာ်အံၤအဂီၢ်ပဟ့ၣ်၀ဲတၢ်မၤလိတၢ်သ့ၣ်ညါနၢ်ပၢၢ်လီၤႉတၢ်လၢပသ့ၣ်ညါန့ၣ်ပကြၢးဟ့ၣ်ခီဟ့ၣ်နီၤဆူၦၤဂၤ”အဂ့ၢ်စံး၀ဲန့ၣ်လီၤႉ
ဒ်န့ၣ်အသိးႇဒူသ၀ီတဖၣ်အပူၤတၢ်ခးလိာ်သးကဲထီၣ်ခဲအံၤခဲအံၤအိၣ်၀ဲဒီးစုက၀ဲၤလၢတပိၢ်ဖးထီၣ်ဒံးဘၣ်တဖၣ်အိၣ်တ့ၢ်ဒံး၀ဲအါအါဂီၢ်ဂီၢ်အဃိလီၢ်က၀ီၤကမျၢၢ်တဖၣ်ကသ့ၣ်ညါနၢ်ပၢၢ်ဆိ၀ဲမ့ၣ်ပိၣ်တၢ်လီၤဘၣ်ယိာ်ဒီးကဟ့ၣ်ခီဟ့ၣ်နီၤစ့ၢ်ကီး၀ဲၦၤလၢအခိၣ်အဃၢၤကသ့အဂီၢ်တၢ်ဟ့ၣ်၀ဲတၢ်မၤလိအံၤလီၤအဂ့ၢ်စံးအါထီၣ်၀ဲန့ၣ်လီၤႉ
ဒီးလၢတၢ်ဟ့ၣ်၀ဲမ့ၣ်ပိၣ်တၢ်သိၣ်လိအံၤန့ၣ်ကီၢ်ရ့ၣ်ပတီၢ်(CIDKP)ဒီးကီၢ်ဆၣ်ပတီၢ်(CIDKP)ပာ်ဖှိၣ်ထီၣ်အသးဒီးဟ့ၣ်၀ဲမ့ၣ်ပိၢ်တၢ်သ့ၣ်ညါနၢ်ပၢၢ်ဆူကီးတရံးဟီၣ်က၀ီၤဒူသ၀ီ(၁၅)ဖျၢၣ်ခၢၣ်စးလီၢ်က၀ီၤဖိတဖၣ်ဒီးဒ်သိးၦၤထီၣ်တၢ်သိၣ်သိဖိတဖၣ်အံၤကက့ၤဟ့ၣ်ခီဟ့ၣ်နီၤက့ၤ၀ဲဆူၦၤလၢအဘူးဒီးအီၤတဆီဘၣ်တဆီစ့ၢ်ကီးအဂ့ၢ်သ့ၣ်ညါဘၣ်လၢၦၤလဲၤထီၣ်တၢ်မၤလိဖိတဖၣ်အအိၣ်န့ၣ်လီၤႉ
တကတီၢ်ဃီတကီၢ်ခါခဲအံၤကီးတရံးလီၢ်က၀ီၤဖိတဖၣ်အဖီခိၣ်သုးကီၣ်ကးက့ၤဒိၣ်စိဒိၣ်ကမီၤ၀ဲတၢ်လၢဟီၣ်က၀ီၤအပူၤအိၣ်၀ဲဒီးခံခီခံကပၤဒုးယၤတၢ်ဖ့ၣ်ဆၢအိၣ်၀ဲအဖၢမုၢ်အဃိတၢ်ဒုးတၢ်ယၤကဲထီၣ်၀ဲသ့ဒံးအဃိလီၢ်က၀ီၤဖိတဖၣ်က့ၤဆူဟံၣ်တဘူၣ်ဒံးဘၣ်ဒီးဘၣ်အိၣ်ကဒု၀ဲအသးအိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ
လါမ့ၤ ၂၈ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ်ႇ ဘုသိၣ်ကီၢ်ဆၣ်ဟီၣ်က၀ီၤအပူၤတလါအံၤလါမ့ၤ(၂၀)သီအ လီၢ်ခံပယီၤသုးကီၣ်ကးအသုးကလၢၤ(၄)ဖျၢၣ်ထုးကွံာ်အသးဒီးဂုၤက့ၤ၀ဲအခံဆူ(ခီပူၣ်)သုးကလၢၤပူၤအဂ့ၢ်မုၢ်တြီၢ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ
စးထီၣ်ဖဲတလါအံၤလါမ့ၤ(၂၀)သီအလီၢ်ခံပယီၤသုးကလၢၤလၢအထုးကွံာ်အသးဒီးဂုၤက့ၤ၀ဲအခံဆူ(ခီပူၣ်)သုးကလၢၤအပူၤသ့ၣ်တဖၣ်န့ၣ်မ့ၢ်၀ဲ(ကဟံကၠိ)(လၢၢ်တိ)(ကၠီၣ်ညဲၣ်-၀ၣ်လူ)(မီဖိကၠိ)သုးကလၢၤသ့ၣ်တဖၣ် အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးကီၣ်ကးသုးကလၢၤထုးကွံာ်အသးသ့ၣ်တဖၣ်အံၤန့ၣ်သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံး၀ဲလၢ “လၢ(ကဟံကၠိ)(၀ၣ်လူၢ်)(တၢ်ဘူၣ်ကၠိ)(လၢၢ်တိ)(မီဖိကၠိ)သုးကလၢၤသ့ၣ်တဖၣ်အံၤဂုၤက့ၤအခံအထုးကွံာ်အသးမီၤနီၤႉ အ၀ဲသ့ၣ်ထုးကွံာ်အသးဘျီန့ၣ်အ၀ဲသ့ၣ်က့ၤထုးဖှိၣ်က့ၤအသးဖဲ(ခီပူၣ်)သုးကလၢၤအပူၤဖဲလါတ ဘ့ၣ်အံၤလီၤႉ မ့မ့ၢ်လၢမုၢ်နံၤမုၢ်သီခီန့ၣ်တၢ်တသ့ၣ်ညါလီၤတံၢ်ဘၣ်ဘၣ်ဆၣ်သနာ်က့န့ၣ်အ၀ဲသ့ၣ်ထုးကွံာ်အ သးဖဲလါတဘ့ၣ်အံၤအသီ(၂၀)ဆူအလီၢ်ခံလီၤမီၤနီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပယီၤသုးကီၣ်ကး(ခီပူၣ်)သုးကလၢၤအံၤအိၣ်သူၣ်လီၤအသးလၢဖၣ်ပူၣ်၀့ၢ်မုၢ်ထီၣ်ဘုသိၣ်ကီၢ်ဆၣ်ခီပူၣ်ကရူၢ်အပူၤဒီးလၢန့ၣ်အမဲာ်ညါပယီၤသုးကလၢၤ(၄)ဖျၢၣ်လၢအဟဲက့ၤလီၤတုၤဖဲခီပူၣ်သုးကလၢၤအပူၤသ့ၣ်တဖၣ်အံၤၦၤနီၣ်ဂံၢ်ခဲလၢာ်ပာ်ဖှိၣ်ကအိၣ်၀ဲလၢ(၂၀၀)ဂၤခိၣ်ဃၢၤဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါပယီၤသုးအသုးကလၢၤလၢအဟဲက့ၤပာ်ဖှိၣ်အသးဖဲခီပူၣ်သုးကလၢၤအပူၤသ့ၣ်တဖၣ်အံၤခီဖျိလၢအ၀ဲသ့ၣ်အိၣ်ဒီးတၢ်ဘၣ်ယိၣ်ဘၣ်ဘှီဒီးအၦၤနီၣ်ဂံၢ်စှၤ၀ဲဒၣ်အဖီခိၣ်ဟဲက့ၤထုးဖှိၣ်အသးဒ်အံၤလီၤအသိးမ့ၢ်လၢတၢ်ထီၣ်န့ၢ်၀ဲဖူၣ်ပူၣ်သုးကလၢၤဒ်အံၤအဖီခိၣ်အ၀ဲသ့ၣ်ဟဲက့ၤပာ်ဖှိၣ်ထီၣ်အသးအံၤန့ၣ်ဘၣ်သ့ၣ်သ့ၣ်အတၢ်ပညိၣ်အိၣ်၀ဲလၢကက့ၤလူၤထီၣ်က့ၤဖၣ်ပူၣ်၀့ၢ်အဂ့ၢ်သုးခိၣ်ဒိၣ်ဂီၢ်ဂ့ၢ်ကျၢၤဒိၣ်စံးအါထီၣ်၀ဲန့ၣ်လီၤႉ
ဒ်န့ၣ်အသိးဖၣ်ပူၣ်၀့ၢ်မုၢ်နုာ်တကပၤန့ၣ်စ့ၢ်ကီးပယီၤသုးကီၣ်ကးအသုးကလၢၤလၢအမ့ၢ်ခီၣ်ချ့သုးရ့ၣ်(၃၄၀)(၃၄၁)ဒီးသုးယၤသုးကလၢၤသ့ၣ်တဖၣ်အိၣ်ဒံး၀ဲအသိးတကီၢ်ခါခဲအံၤပယီၤသုးကီၣ်ကးသုးကလၢၤသ့ၣ်တဖၣ်န့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့နီၣ်ဂံၢ်(၅)တကပၤက၀ီၤတံၢ်ဃာ်ဒီးဒီၣ်တဲာ်ကွံာ်၀ဲသုးကီၣ်ကးတၢ်လဲၤတၢ်က့ၤအဂ့ၢ်သ့ၣ်ညါဘၣ်လၢမုၢ် တြီၢ်ကီၢ်ရ့ၣ်ၦၤဘၣ်မူဘၣ်ဒါအအိၣ်န့ၣ်လီၤႉ
လါမ့ၤ ၂၈ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် တီနီၢ်မုၢ်ထီၣ်ဟီၣ်က၀ီၤ မၠၣ်၀တံၣ်ကလံၤအပူၤ လီၢ်က၀ီၤကမျၢၢ်ၦၤဃ့ၢ်တၢ်ဒုးဖိလၢအဟဲစံၣ်အိၣ် ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ သ့ၣ်ဘီဘိသ၀ီပူၤသ့ၣ်တဖၣ် တကီၢ်ခါခဲအံၤလါလၢဟဲလၢအ၀ဲသ့ၣ်အဂီၢ် လိၣ်ဘၣ်၀ဲဒၣ် ဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် လီၢ်အိၣ်ကဒု ၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤႉ
ၦၤလီၢ်အိၣ်ကမှံဖိလၢဟဲအိၣ်သ့ၣ်ဘီဘိသ၀ီပူၤသ့ၣ်တဖၣ်အံၤခါလၢကဟဲအဂီၢ်လိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ် တၢ်အီလၢအမ့ၢ်ဟုသးအံၤဒီးဒ်န့ၣ်အသိးလီၢ်ခံအံၤတၢ်မၤစၢၤဟဲလီၤစှၤ၀ဲဘၣ်ဆၣ်ၦၤဘၣ်မူဘၣ်ဒါလၢတၢ်ဖီခိၣ်တဖၣ် ဟးလူၤဃု၀ဲကျဲအိၣ်အဂ့ၢ်န့ၣ် သ့ၣ်ဘီဘိသ၀ီသးၦၢ် စီၤလါဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
“တၢ်မၤစၢၤတဟဲလၢၤအါအါဘၣ်ႉမ့မ့ၢ်လၢတၢ်အီၣ်ဒုတလါခံလါအံၤမ့ဟဲဒုဂ့ၤမီၤႉအခိၣ်သ့ၣ်န့ၣ်တၢ်အီၣ်တၢ်အီလီၤႉ အဂုၤအဂၤမ့တန့ၢ်ဘၣ်နါက့မ့န့ၢ်ထဲဟုသးပတီၢ်န့ၣ်ဘၣ်လံႉခဲအံၤပဃုတၢ်မၤစၢၤတဘၣ်လၢၤစ့ၢ်ဘၣ်ႉဘၣ်မနုၤဃိလဲၣ်တၢ်ကဲထီၣ်သးန့ၣ်အတီၤအါဘျီၦၤဘၣ်လဲၤဆီၣ်ထွဲမၤစၢၤလၢအရ့ဒိၣ်အိၣ်စ့ၢ်ႉၦၤဆီၣ်ထွဲမၤစၢၤတၢ်တဖၣ်အံၤနါက့အ၀ဲသ့ၣ်မၤစၢၤတၢ်အနံၣ်အါထီၣ်ဘျီပအါနၣ်ဘၣ်အ၀ဲသ့ၣ်စ့ၢ်ႉအဃိပဃ့က့ၤတၢ်မၤစၢၤတဘူၣ်လၢၤစ့ၢ်ဘၣ်ႉတၢ်ဆီၣ်ထွဲ မၤစၢၤမ့တဟဲ ဘၣ်ဒုၦၤသ့ၣ်တဖၣ်အံၤဘၣ်ဟးတူၢ်ငါဘၣ်ဟးၦ့ၤအီၣ်၀ဲဒ်န့ၣ်ႉနါက့ကမံးတံာ်လၢတၢ်ဖီခိၣ်တဖၣ်န့ၣ်လူၤဃု၀ဲကျဲစ့ၢ်မီၤႉမ့ၢ်အကန့ၢ်ဧါႇတန့ၢ်ဧါဒုပတသ့ၣ်ညါစ့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါအ့ဖြ့ၣ်အခါန့ၣ် လၢၦၤလီၢ်အိၣ်ကမှံဖိသ့ၣ်တဖၣ်အံၤအဂီၢ်တၢ်ဟဲဆီၣ်ထွဲမၤစၢၤ၀ဲ တၢ်ခိၣ်ဒုး(တၤလပၣ်)အိၣ်၀ဲဒီးဒ်န့ၣ်အသိးကီၢ်ပူၤကညီၦၤလီၢ်အိၣ်ကမှံကမံးတံာ်(CIDKP)စ့ၢ်ကီးဟဲဟ့ၣ်လီၤဆီၣ်ထွဲ မၤစၢၤ၀ဲဒၣ်ကျိၣ်စ့အိၣ်၀ဲအဂ့ၢ်န့ၣ် သ့ၣ်ဘီဘိသ၀ီသးၦၢ် တံလါဒိၣ် စံးအါထီၣ်၀ဲန့ၣ်လီၤႉ
“လၢတၢ်စူၤလီၤအဂီၢ်ဒုဖဲမဟါတလါန့ၣ်ၦၤဟဲမၤစၢၤလၢတၢ်ခိၣ်ဒုးဒုအိၣ်ႉပနီၤလီၤကိးဂၤဒဲးတဂၤတဘ့ၣ်တဂၤတဘ့ၣ် ပြးလီၤႉလၢၦၤလီၢ်အိၣ်ကဒုဖိအဂီၢ်ဖဲအပူၤကွံာ်မဟါကၢၤတလါန့ၣ်နါက့(CIDKP)ဟဲဟ့ၣ်လီၤမၤစၢၤ၀ဲဒၣ်လၢစ့ပယီၤ တဂၤန့ၣ်(၃၀၀၀၀)မီၤနီၤႉမ့ၢ်အိၣ်ယဲၢ်ဂၤဒီးန့ၣ်၀ဲတကလီၢ်ဘျဲၣ်န့ၣ်ႉတၢ်တခါအံၤၦၤဟဲဟ့ၣ်လၢတၢ်အီၣ်ၦ့ၤကဘၣ်က့ၤၦ့ၤအီၣ်ကဒါက့ၤတၢ်မီၤနီၤႉအ၀ဲသ့ၣ်မ့တၦ့ၤအီၣ်ဘၣ်ခီဒုပမၤတဘၣ်စ့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ
တကးဒံးဘၣ်လၢန့ၣ်အမဲာ်ညါလၢကီးတရံး၀့ၢ်ဃၢၤစးထီၣ်ဖဲတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးသုးကီၣ်ကးအၦၤ (အီၤစ့ၤယၣ်)သုးကျိၤအဘၢၣ်စၢၤအခါန့ၣ်ပယီၤသုးခးလီၤကျိဖးဒိၣ်အဃိ နိၣ်ဖိႇထံမူထၣ်ႇမဲၢ်ကနဲသ၀ီဖိ...
လါမ့ၤ ၂၇သီ ၂၀၂၄နံၣ် ခ့ၣ်အဲၣ်စံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢႇ((Suan Pueng))ကီၢ်ရ့ၣ်(Ratchaburi)ကီၢ်ဆၣ်(ThamHin)ကညီဘၣ်ကီဘၣ်ခဲဒဲက၀ီၤအပူၤႇၦၤလီၢ်အိၣ်ကဒုဖိလၢက့ၤဆူဟံၣ်တဘူၣ်ဒံးဘၣ်တဖၣ်ႇကၠီၣ်တဲၣ်ခိၣ်နၢ်ၦၤဘၣ်မူဘၣ်ဒါကဟုကယာ်ပာ်အ၀ဲသ့ၣ်တစိၢ်တလီၢ်လၢဒဲက၀ီၤကပၤတၢ်လီၢ်တတီၤအဂ့ၢ်ႇဒဲက၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
သုးဟံန့ၢ်တၢ်စိကမီၤ၀ံၤအလီၢ်ခံဟီၣ်က၀ီၤအပူၤဒုးယၤတၢ်သဘံၣ်သဘူၣ်အဃိကညီကီၢ်စဲၣ်သုးက့(၄)လီၢ်အိၣ်ကဒုဖိလၢအလဲၤနုာ်လီၤအိၣ်ဆိး၀ဲလၢ(Tham Hin)ဒဲက၀ီၤပူၤသ့ၣ်တဖၣ်အံၤႇအပူၤကွံာ်လါမ့ၤ(၁၀)သီအနံၤအပူၤႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ရဲၣ်ကျဲၤ၀ဲလၢကက့ၤဆှၢ(က့ၤပာ်)က့ၤ၀ဲအ၀ဲသ့ၣ်တဖၣ်ဆူကညီကီၢ်စဲၣ်တကပၤအိၣ်၀ဲဘၣ်ဆၣ်ခီဖျိကက့ၤအိၣ်ဆိး၀ဲလၢကညီကီၢ်စဲၣ်တကပၤစ့ၢ်ကီးတၢ်ကီတၢ်ခဲအိၣ်၀ဲအဃိတၢ်ပာ်အိၣ်က့ၤအ၀ဲသ့ၣ်တဖၣ်ဖဲဒဲက၀ီၤကပၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
လီၢ်အိၣ်ကဒုဖိတဖၣ်အံၤႇခီဖျိကၠီၣ်တဲၣ်တဟ့ၣ်တၢ်ပျဲလၢကအိၣ်ဆိး၀ဲတပူၤဃီဒီးၦၤဒဲက၀ီၤဖိဘၣ်အဃိအပူၤကွံာ်တၢ်ရဲၣ်ကျဲၤန့ၣ်အ၀ဲသ့ၣ်တဖၣ်လၢကက့ၤအိၣ်ဆိးလၢကညီကီၢ်စဲၣ်ဘီယၢ်ခၣ်တၢ်လီၢ်အိၣ်၀ဲဘၣ်ဆၣ်ႇအ၀ဲသ့ၣ်တဖၣ်ကအိၣ်ဆိးဖံးမၤအီၣ်အီ၀ဲအဂီၢ်တၢ်ကီတၢ်ခဲအိၣ်ဒီးတၢ်ဘံၣ်တၢ်ဘၢလၢအ၀ဲသ့ၣ်တဖၣ်အဂီၢ်တအိၣ်၀ဲဘၣ်အဃိႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ကဟုကယာ်ဒုးအိၣ်က့ၤအ၀ဲသ့ၣ်ဖဲတၢ်လီၢ်လၢအဘူးဒီးဒဲက၀ီၤအဂ့ၢ်(KRC)နဲၣ်ရွဲၣ်သရၣ်စီၤပွဲၤစ့စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ဘၣ်ဃးတၢ်ကဆှၢက့ၤ၀ဲၦၤလၢအဟဲအိၣ်ကဒုသးအသီလၢဒဲက၀ီၤပူၤသ့ၣ်တဖၣ်ခီန့ၣ်ႇကၠီၣ်တဲၣ်ပဒိၣ်ပၦၢ်စံး၀ဲလၢၦၤသ့ၣ်တဖၣ်အံၤန့ၣ်အိၣ်ဆိး၀ဲလၢဒဲက၀ီၤအပူၤတပူၤဃီဒီးၦၤဒဲက၀ီၤဖိတဖၣ်န့ၣ်တသ့ဘၣ်ႇကဘၣ်အိၣ်လၢတၢ်ချၢလီၤအဃိန့ၣ်ႇအပူၤကွံာ်ပလဲၤကွၢ်န့ၣ်အ၀ဲသ့ၣ်တဖၣ်တၢ်လီၢ်တၢ်ကျဲလၢကအိၣ်ဆိး၀ဲလၢကညီကီၢ်စဲၣ်ဘီယၢ်ခၣ်တကပၤႇဒီးပကွၢ်၀ဲဟီၣ်က၀ီၤတၢ်အိၣ်သးဖဲန့ၣ်န့ၣ်ႇပထံၣ်လၢတၢ်ဘံၣ်တၢ်ဘၢတၢ်အိၣ်ဆိးဖံးအီၣ်မၤအီၣ်အဂီၢ်တၢ်ကီတၢ်ခဲအိၣ်စ့ၢ်ကီးလီၤအဃိပဟဲက့ၤပပာ်ဖျါထီၣ်ကတၢ်ဂ့ၢ်ဆူကီၠၣ်တဲၣ်ခိၣ်နၢ်သ့ၣ်တဖၣ်အအိၣ်ႇတဘျီကၠီၣ်တဲၣ်ပဒိၣ်လၢတၢ်ဖီခိၣ်တၢ်ဖီလာ်တဖၣ်ကတိၤသကိး၀ဲတၢ်၀ံၤဃုန့ၢ်၀ဲတၢ်လီၢ်လၢအ၀ဲသ့ၣ်တဖၣ်ကအိၣ်အဂီၢ်ခံတီၤလီၤႇအဆိကတၢၢ်တတီၤန့ၣ်စီၤစုၤ၀ဲဒီးဒဲက၀ီၤတစဲးအဃိန့ၣ်ကွၢ်က့ၤ၀ဲတၢ်လီၢ်လၢအဘူးဒီးဒဲက၀ီၤတတီၤဒီးကဟုကယာ်ဒုးအိၣ်က့ၤအ၀ဲသ့ၣ်တဖၣ်န့ၣ်လီၤႉ”အဂ့ၢ်စံး၀ဲန့ၣ်လီၤႉ
လၢန့ၣ်အမဲာ်ညါႇၦၤလီၢ်အိၣ်ကဒုတဖၣ်ကအိၣ်ဆိး၀ဲတစိၢ်တလီၢ်အဂီၢ်ႇတနွံအံၤလါမ့ၤအကတၢၢ်တနွံအပူၤႇကၠီၣ်တဲၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်ရဲၣ်ကျဲၤ၀ဲလၢကတ့ထီၣ်ဘှီထီၣ်အတၢ်အိၣ်တၢ်ဆိးလီၢ်ကျဲဟံၣ်အဖျၢၣ်(၇၀)တုၤအ၀ံၤအိၣ်၀ဲအဂ့ၢ်အ၀ဲစံးအါထီၣ်၀ဲန့ၣ်လီၤႉ
တကးဒံးဘၣ်ႇလၢတၢ်သူၣ်ထီၣ်ဘှီထီၣ်တၢ်အိၣ်တၢ်ဆိးလီၢ်ကျဲတၢ်လၢာ်ဘူၣ်လၢာ်စ့ၤဒီးတၢ်ဟ့ၣ်နီၤလီၤတၢ်အီၣ်မိၢ်ၦၢ်အဂီၢ်(TBC)ဆီၣ်ထွဲမၤစၢၤ၀ဲကၠီၣ်တဲၣ်ၦၤဘၣ်မူဘၣ်ဒါတဖၣ်စ့ၢ်ကီးမၤစၢၤ၀ဲအ၀ဲသ့ၣ်တဖၣ်လၢၦၤဂ့ၢ်၀ီတကပၤစ့ၢ်ကီးအဂ့ၢ်
သရၣ်စီၤပွဲၤစ့စံးစ့ၢ်ကီး၀ဲဒၣ်န့ၣ်လီၤႉ
ဒီးၦၤၦၤလီၢ်အိၣ်ကဒုဖိတဖၣ်အံၤႇဖဲတနံၣ်အံၤ(၂၀၂၄)နံၣ်အပူၤလဲၤဃ့ၢ်နုာ်အိၣ်ကဒု၀ဲအသးလၢဒဲက၀ီၤဖိအကျါဒီးအပူၤကွံာ်လါမ့ၤအတီၢ်ပူၤအနီၢ်ဂံၢ်နီၢ်ဒွးအိၣ်၀ဲ(၆၁၀)ဂၤဘၣ်ဆၣ်ႇခီဖျိတနီၤဟးထီၣ်ကွံာ်၀ဲလၢဒဲက၀ီၤအချၢဒီးလဲၤကွံာ်၀ဲဆူတၢ်လီၢ်အဂၤအဃိႇတကီၢ်ခါခဲအံၤအနီၣ်ဂံၢ်နီၣ်ဒွးအိၣ်တ့ၢ်က့ၤ၀ဲ(၄၂၀)ဃၣ်ဃၣ်အဂ့ၢ်ႇဒဲက၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
တကတီၢ်ဃီႇၦၤလီၢ်အိၣ်ကဒုဖိလၢအဟဲနုာ်အိၣ်ကဒုအသးဖဲ(Tham Hin)ဒဲက၀ီၤအပူၤတဖၣ်အံၤႇဒိးန့ၢ်ဘၣ်၀ဲတၢ်ကဟုကယာ်တၢ်အိၣ်တၢ်ဆိးလီၢ်ကျဲတစိၢ်တလီၢ်လံဘၣ်ဆၣ်ခီဖျိဒဲက၀ီၤအပူၤတၢ်တတူၢ်လိာ်၀ဲၦၤဘၣ်ကီဘၣ်ခဲအသီတၢ်သိၣ်တၢ်သီတၢ်ဘျၢအိၣ်၀ဲအဃိဘၣ်ယိာ်စ့ၢ်ကီး၀ဲတၢ်လၢဒဲက၀ီၤအဂၤတဖၣ်အပူၤၦၤလီၢ်အိၣ်ကဒုဖိတဖၣ်အဂီၢ််အဂ့ၢ်ဒဲက၀ီၤၦၤဘၣ်မူဘၣ်ဒါတဖၣ်စ့ၢ်စ့ၢ်ကီး၀ဲန့ၣ်လီၤႉ
ဒ်န့ၣ်အသိးႇလီၢ်အိၣ်ကမှံဖိလၢအဟဲအိၣ်ဆိးဖဲ(Tham Hin)ဒဲက၀ီၤသ့ၣ်တဖၣ်အံၤႇၦၤဘၣ်မူဘၣ်ဒါတဖၣ်အဲၣ်ဒိး၀ဲလၢကဒိးန့ၢ်ဘၣ်တၢ်ခွဲးတၢ်ယာ်တၢ်ဆီၣ်ထွဲမၤစၢၤဒ်သိးၦၤဒဲက၀ီၤဖိလၢအိၣ်ဆိးတ့ၢ်လၢနံၣ်လၢအယံာ်သ့ၣ်တဖၣ်လီၤအဂ့ၢ်သရၣ်စီၤပွဲၤစ့စံးစ့ၢ်ကီး၀ဲန့ၣ်လီၤႉ
လါမ့ၤ ၂၇ သီႇ ၂၀၂၄ နံၣ်ႇ ခ့ၣ်အဲးစံၣ်
ခီဖျိတၢ်စူၤဟဲအါထီၣ်အဃိ မၠၣ်၀တံၣ်-ထိၣ်ကီၤကိကစၢၢ်ကျဲအံၤဟးဂီၤ၀ဲဒၣ်ဒီး ပနံာ်တၢ်ကူၣ်လဲၤမၤကၤဒီးသိလ့ၣ်လၢ ဆှၢလ့ၢ်လိၤၦၤလဲၤတၢ်က့ၤတၢ်ဖိသ့ၣ်တဖၣ် တၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤတကပၤအဂ့ၢ်န့ၣ် ၦၤနီသိလ့ၣ်ဖိလၢအလ့ၢ်ထီၣ်လ့ၢ်လိၤဖဲမၠၣ်၀တံၣ်-ဖၣ်အၣ်ကျဲအံၤတဂၤ စံး၀ဲန့ၣ်လီၤႉ
ထိၣ်ကီၤကိကျဲအံၤန့ၣ်မ့ၢ်၀ဲဒၣ်ဟီၣ်ခိၣ်ကမူၣ်ကျဲလီၤဒီး ကျဲအံၤဖဲတၢ်ကိၢ်ခါအဆၢကတီၢ်စ့ၢ်ကီးဟီၣ်ခိၣ်ကမူၣ် ထီၣ်၀ဲဒၣ်အါမးဒီးဒ်န့ၣ်အသိးတကီၢ်ခါခဲအံၤခီဖျိတၢ်စူၤဟီၣ်ခိၣ်ကပံာ်ထီၣ်ကျဲဟးဂီၤ၀ဲဒၣ်အဃိ အါဒၣ်တက့ၢ် ဟးထီၣ်လ့ၢ်လိၤသ့၀ဲဒၣ်ထဲသိလ့ၣ်လၢအပၣ်အိၣ်(၄)ပၣ်သ့ၣ်တဖၣ်လီၤအဂ့ၢ်န့ၣ် ၦၤနီသိလ့ၣ်ဖိတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
“လၢတၢ်ကိၢ်ခါန့ၣ်ဟီၣ်ခိၣ်ကမူၣ်အိၣ်ဘၣ်ဆၣ်နဟးထီၣ်က့ၤလီၤမုုာ်ဒံးႉခဲအံၤဘၣ်လၢတၢ်စူၤခါတၢ်စူၤဘျီကျဲပူၤန့ၣ် အိၣ်ထဲကပံာ်ႇမ့၀ံၤသိလ့ၣ်နါက့လီၤဘျၢႉသိလ့ၣ်(၁၂)ပၣ်နါက့လီၤတကျၢၢ်လီၤႉဟီၣ်ခိၣ်ကျဲအဃိတၢ်မ့စူၤန့ၣ် ကပံာ်လဲလဲလီၤတဘၣ်ဂီၢ်နီတစဲးဘၣ်ႉသိလ့ၣ်အါအဃိကျဲနါက့ပံာ်အိၣ်စ့ၢ်ႉလၢမုၢ်နၤခီနါက့တၢ်စူၤအဃိသိလ့ၣ် တခိၣ်မး လဲၤလီၤတသ့ဘၣ်ႉသိလ့ၣ်လၢအဆှၢၦၤလဲၤတၢ်က့ၤတၢ်ဖိနါက့ဘၣ်မံလၢကျဲပူၤႉမၤဘၣ်၀ဲလဲၣ်လၢဟံၣ်ဖိဃီဖိအဂီၢ်န့ၣ်ဘၣ်ဟ့ၣ်လီၤသးဘၣ်နီ၀ဲသိလ့ၣ်န့ၣ်”အဂ့ၢ်န့ၣ် စံး၀ဲန့ၣ်လီၤႉ
ဖဲကီးတရံး-မၠၣ်၀တံၣ်အ့ရှါကျဲဟးထီၣ်က့ၤလီၤတန့ၢ်လၢၤဘၣ်၀ံၤလီၢ်ခံန့ၣ် သိလ့ၣ်တီၣ်ပနံာ်တၢ်ဖိတၢ်လံၤအံၤဒီး သိလ့ၣ်လၢအဆှၢလ့ၢ်လိၤၦၤလဲၤတၢ်က့ၤတၢ်ဖိသ့ၣ်တဖၣ်အံၤ လ့ၢ်ထီၣ်လ့ၢ်လိၤက့ၤ၀ဲဒၣ်လၢထိၣ်ကီၤကိကျဲဒီး ကၠဲၣ်အူၣ်တီၤ ကျဲတကပၤန့ၣ်လီၤႉဒ်န့ၣ်အသိးကျဲသ့ၣ်တဖၣ်အံၤစ့ၢ်ကီးဘၣ်ဖဲတၢ်တ့၀ဲအကတီၢ်ဒီးခဲအံၤခီဖျိ ကျဲဟးဂီၤအဃိ ပနံာ်တၢ်ဖိ တၢ်လံၤလၢတၢ်ဆှၢထီၣ်ဆှၢလီၤ၀ဲသ့ၣ်တဖၣ်တံာ်တာ်၀ဲဒၣ်လၢကျဲပူၤ တကးဒံးဘၣ် တၢ်လဲၤတၢ်က့ၤစ့ၢ်ကီး တံာ်တာ်၀ဲဒၣ် အဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိတဖၣ်အအိၣ်န့ၣ်လီၤႉ
လၢန့ၣ်အမဲာ်ညါခီဖျိကျဲသ့ၣ်တဖၣ်အံၤဟးဂီၤအဃိ လၢၦၤကူၣ်လဲၤမၤကၤတၢ်ဖိဒီးလီၢ်က၀ီၤၦၤကမျၢၢ်အဂီၢ် တၢ်ဘၣ်ဒိဘၣ်ထံးဟဲအိၣ်ထီၣ်၀ဲဒၣ်လၢတၢ်ဖံးအီၣ်မၤအီၣ်တၢ်ဃုအီၣ်ဃၤအီၣ်ႇလၢဆူၣ်ချ့ဂ့ၢ်၀ီႇၦၤဂ့ၢ်၀ီတကပၤဒီး...