လါဖြ့ၣ် ၁၀သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ တီနီၢ်မုၢ်ထီၣ်ကီးတရံးကီၢ်ဆၣ် ဖဲမဟါမုၢ်ဃ့ၢ်လီၤ (၃)နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးလၢအအိၣ်လၢ(၃)ထၣ်ကွ့ၣ်တဖၣ်သိးထီၣ်(DKBA)ကူကၤလၢကဟဲက့ၤထီၣ်လၢသ့ၣ်ဘီဘိသုးကလၢၤအဂီၢ်(KNLA)ဒီးသုးပာ်ဖှိၣ်ခိးခးအ၀ဲသ့ၣ်ဖဲသ့ၣ်ဘီဘိသ၀ီမုၢ်နုာ် မီထၣ်တၢ်လီၢ်တတီၤဒီးကွံယာ်ပျၢ်တၢ်လီၢ်တတီၤအဃိပယီၤသုးသိလ့ၣ်(၃)ခိၣ်အကျါတခိၣ်န့ၣ်မ့ၣ်အူဟးဂီၤကွံာ်၀ဲဒၣ်အသိးတၢ်ခးလိာ်သးအကဆၢကတီၢ်ဘၣ်သံဃုာ်ဒီးကမျၢၢ်ဖိတဂၤအဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
သိလ့ၣ်သ့ၣ်တဖၣ်န့ၣ်မ့ၢ်၀ဲ(DKBA)အသိလ့ၣ်ဒီးပယီၤသုးသ့ၣ်တဖၣ်သိးထီၣ်၀ဲ(DKBA)ကူကၤဒ်သိးကဟဲက့ၤထီၣ်လၢသ့ၣ်ဘီဘိသုးကလၢၤအဂီၢ်အဂ့ၢ်ႇ ဒီးဖဲတၢ်ခးလိာ်သးအဆၢကတီၢ်ဘၣ်သံ၀ဲကမျၢၢ်လၢအဟဲက့ၤလၢအကျီးပူၤတဂၤအဂ့ၢ်လီၢ်က၀ီၤၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံးဘၣ်၀ဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
“ပယီၤသုးကူကၤထီၣ်(DKBA)ကူကၤႇဟဲက့ၤဒိး၀ဲ(DKBA)သိလ့ၣ်(၃)ခိၣ်အခါတၢ်ခိးခးအီၤလၢကျဲအဃိသိလ့ၣ်လၢအတီၣ်ကျိဖးဒိၣ်ချံႇစုကွံာ်မ့ၣ်ပိၢ်တခိၣ်န့ၣ်မ့ၣ်အူအီၣ်ဟးဂီၤကွံာ်န့ၣ်လီၤႉ တၢ်ခးလိာ်သးအခါဘၣ်သံဃုာ်ဒီးသ၀ီဖိလၢအအိၣ်လၢသူမွဲကျိ၀ၢ်(ကီၢ်ကၠီၣ်တဲၣ်)တကပၤတဂၤဘၣ်ဖဲအဟဲက့ၤလၢအကျီးအဆၢကတီၢ်န့ၣ်လီၤႉ”အဂ့ၢ်စံး၀ဲဒၣ်န့ၣ်လီၤႉ
တကတီၢ်ဃီသ၀ီဖိ၀ဲန့ၣ်န့ၣ်မ့ၢ်အဘၣ်ဒီးၦၤဖဲလဲၣ်တဖုကျိလဲၣ်န့ၣ်တၢ်တသ့ၣ်ညါဘၣ်ဒီးကမျၢၢ်ဖိ၀ဲအံၤသးနံၣ်ကအိၣ်၀ဲဒၣ်(၂၀)ဘျဲၣ်ဃၣ်ဃၣ်အဂ့ၢ်အ၀ဲတဲအါထီၣ်၀ဲဒၣ်စ့ၢ်ကီးန့ၣ်လီၤႉ
လၢန့ၣ်အမဲာ်ညါ (DKBA)သိၣ်လ့ၣ်(၃)ခိၣ်လၢပယီၤဒိး၀ဲန့ၣ်မ့ၢ်၀ဲ(Revo)တခိၣ်၊(Remax)တခိၣ်ဒီး(Probox)တခိၣ်ၦၤနီၣ်ဂံၢ်ကအိၣ်အဂၤ(၂၀)ဘျဲၣ်ဒီးမ့မ့ၢ်(Probox)သိလ့ၣ်ခီန့ၣ်တီၣ်၀ဲ ကျိဖးဒိၣ်ချံႇမ့ၣ်ပိၢ်ဒီးကျိချံၦာ်သၣ်အဃိအူအီၣ်ကွံာ်၀ဲဖဲတၢ်ကဲထီၣ်သးလီၢ်အသိး ဖဲတၢ်ကဲထီၣ်သးအလီၢ်န့ၣ်ပယီၤသုးသံတီၢ်တဂၤႇဘၣ်ဒိတၢ်ဖီၣ်ချုးန့ၢ်မူဒံးတဂၤႇက့ၤသံလၢအသုးကလၢၤ(၂)ဂၤအဂ့ၢ်သ့ၣ်ညါဘၣ်အသိးလၢ(KNLA)တၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်ဘၣ်အဂ့ၢ်သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
တကီၢ်ခါခဲအံၤလၢတၢ်ကဒုးလီၤၦီၢ်သုးမီၤစိရိၤသနူအဂီၢ်(KNLA)ဒီးသုးပာ်ဖှိၣ်သ့ၣ်တဖၣ်အိၣ်လၢတၢ်ဂဲၤလိာ်အသကွီၢ်ပူၤအဃိ ကညီဖီၣ်စုက၀ဲၤဃုာ်ဒီးၦၤဖီၣ်စုက၀ဲၤလၢအဂၤဖဲလဲၣ်တဖုဂ့ၤဂ့ၤမ့ၢ်တီၣ်ဆှၢႇမၤစၢၤပယီၤသုးန့ၣ် တၢ်ကလုၢ်လီၤလၢတၢ်ကဘၣ်ခးအီၤခဲလၢာ်လီၤအဂ့ၢ် သ့ၣ်ညါဘၣ်လၢကညီဖီၣ်စုက၀ဲၤကရူၢ်အၦၤဘၣ်မူဘၣ်ဒါအအိၣ်န့ၣ်လီၤႉ
လါအ့ဖြ့ၣ် ၁၀ သီႇ ၂၀၂၄ နံၣ်ႇ ခ့ၣ်အဲးစံၣ်
တလၢၤကီၢ်စဲၣ်(ကၠဲၣ်မယီၤ)ကီၢ်ဆၣ်(ဒမသၤ)သ၀ီအပူၤအံၤန့ၣ်စးထီၣ်ဖဲလါအ့ဖြ့ၣ်အတီၢ်ပူၤအံၤခီဖျိလၢသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်တပယူာ်ဃီအဃိကမျၢၢ်ဟံၣ်ဃီတၢ်သူၣ်ထီၣ်ဘၣ်အူအီၣ်ဟးဂီၤကဒီးကွံာ်၀ဲအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ
(ဒမသၤ)သ၀ီအပူၤအံၤန့ၣ်သုးကီၣ်ကးတကပၤခးလီၤကျိဖးဒိၣ်တကးဒံးဘၣ်အမဲာ်ညါသူ၀ဲကလံၤသုးႇ ထံသုးဒီးခးလီၤ၀ဲတၢ်တပယူာ်ဃီအဃိကမျၢၢ်လီၢ်က၀ီၤဖိအဟံၣ်အဃီသ့ၣ်တဖၣ်ဘၣ်အူအီၣ်ကဒီးကွံာ်၀ဲအဂ့ၢ်(ဒမသၤ)သ၀ီဖိတဂၤစံး၀ဲဒ်အံၤန့ၣ်လီၤႉ
“အ၀ဲသ့ၣ်ကဘီယူၤနါက့မ့ၢ်ဂ့ၤႇ သုးကဘီချံနါက့ဟဲခးလီၤတၢ်လီၤႉ ခးလီၤစ့ၢ်ကီးကျိဖးဒိၣ်တပယူာ်ဃီဘျီန့ၣ်ကမျၢၢ်လီၢ်က၀ီၤဖိအဟံၣ်အဃီဘၣ်အူအီၣ်ကဒီးကွံာ်၀ဲမီၤနီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဖဲပူၤကွံာ်မဟါအနံၤန့ၣ်သုးကီၣ်ကးအသုးခိၣ်ကျၢၢ်ခံ(စိ၀့)ဟဲ၀ဲလၢ(မီၣ်လမၠဲၣ်)၀့ၢ်အဆၢကတီၢ်တၢ်ပၢၢ်ဆၢသုးပာ်ဖှိၣ်သ့ၣ်တဖၣ်လဲၤတ့ၢ်လီၤမ့ၣ်ပိၢ်ဒီးဒြိ၀ံၤအလီၢ်ခံ(ဒမသၤ)သ၀ီဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤသ့ၣ်တဖၣ်အပူၤသုးကီၣ်ကးတကပၤဟဲတ့ၢ်လီၤမ့ၣ်ပိၢ်ဒီးကဘီယူၤဒ်အံၤလီၤအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ
လီၢ်က၀ီၤဖိတဂၤစံး၀ဲလၢ “ဖဲမဟါန့ၣ်သုးကီၣ်ကးအသုးခိၣ်ဟဲလၢမီၣ်လမၠဲၣ်န့ၣ်တၢ်ပၢၢ်ဆၢသုးပာ်ဖှိၣ်ကရူၢ်ဟဲဒုး၀ဲ ဒၣ်ဒီးဒြိမီၤနီၤႉ မ့ၢ်လၢသုးကီၣ်ကးတၢ်လဲၤဒုးအ၀ဲသ့ၣ်အဃိအ၀ဲသ့ၣ်ဟဲခးလီၤတၢ်ဒီးကဘီယူၤဒုးသုးႇ သုးကဘီချံလီၤႉ တုၤလၢတနံၤညါအံၤမုၢ်ဆါခီန့ၣ်ကဘီယူၤဟဲခးလီၤတၢ်အဖၢမုၢ်လီၤႉ ဟဲခးလီၤတၢ်န့ၣ်အိၣ်လၢအဘျီ(၁၀)လံ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဒ်န့ၣ်အသိးဖဲပူၤကွံာ်လါမးရှး(၂၇)သီအနံၤန့ၣ်စ့ၢ်ကီးပယီၤသုးကီၣ်ကးကဘီချံလၢအိၣ်(ကၠဲ)ထံကျိဟီၣ်က၀ီၤအပူၤအံၤခီဖျိခးလီၤကျိဖးဒိၣ်အဃိ(ဒမသၤ)သ၀ီအပူၤကမျၢၢ်ဟံၣ်အူအီၣ်ဟးဂီၤကွံာ်၀ဲ(၃၀၀)ဖျၢၣ်ဘျဲၣ်ဒံးအဂ့ၢ်သ၀ီဖိသ့ၣ်တဖၣ်စံး၀ဲန့ၣ်လီၤႉ
တကီၢ်ခါဟီၣ်ခိၣ်မဲာ်ဖံးခိၣ်တၢ်ဒုးအပူၤမ့ၢ်လၢသုးကီၣ်ကးသ့ၣ်တဖၣ်ဘၣ်ကွၢ်ဆၢမဲာ်ဘၣ်၀ဲတၢ်သံတၢ်ၦၢ်တၢ်ဘၣ်ဒိဘၣ်ထံးအိၣ်အါ၀ဲအဃိသုးကီၣ်ကးအံၤဘၣ်ပာ်ဂံၢ်ပာ်ဘါက့ၤ၀ဲလၢကလံၤကျါတၢ်ဟဲခးလီၤစၢၤတၢ်အသိးဒီးဖဲမဟါဟါခီ(၈)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီးသုးကီၣ်ကဘီယူၤဟဲတ့ၢ်လီၤမ့ၣ်ပိၢ်လၢ(ကြုၢ်တု)၀့ၢ်ဃၢၤ(ကီကၠဲၣ်)(မံၣ်ဂလိၣ်)သ၀ီအပူၤအဂ့ၢ်(ကြုၢ်တု)၀့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ
လါအ့ဖြ့ၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်
ဒ်သိးသုးမီၤစိရိၤကလီၤၦီၢ်ကွံာ်ဒီးတၢ်မၤနၢၤဖီတၢၣ်ကတုၤချ့ချ့အဂီၢ်ခါဆူညါပလိၣ်ဘၣ်၀ဲကီၢ်ပူၤကီၢ်ချၢကမျၢၢ်အတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်န့ၣ် (သုးက့ ၆) သုးက့ဘံၣ်ဘၢသုးကျိၤခိၣ် လၢအမ့ၢ်စ့ၢ်ကီး ကညီဒီကလုာ်တၢ်ထူၣ်ဖျဲး သုးမုၢ်ဒိၣ် (KNLA) Cobra သုးကျိၤခိၣ် သုးခိၣ် ဒးဘီ စံး၀ဲန့ၣ်လီၤႉ
ဒ်သိးပကပူၤဖျဲးထီၣ်လၢကုၢ်ပူၤဒီးပကန့ၢ်က့ၤပထံပကီၢ်ပတၢ်သဘျ့အဂီၢ်န့ၣ် မူဒါအိၣ်၀ဲဒၣ်လၢၦၤကိးဂၤဒဲးအစုပူၤဒီး ခါဆူညါပလိၣ်ဘၣ်စ့ၢ်ကီး၀ဲဒၣ်ကမျၢၢ်ထံဖိကီၢ်ဖိအတၢ်ဆီၣ်ထွဲမၤစၢၤတကးဒံးဘၣ်ဒ်န့ၣ်အသိးတၢ်မၤနၢၤလၢပမၤနၢၤအီၤသ့ၣ်တဖၣ်အံၤခီဖျိလၢကမျၢၢ်အတၢ်ဆီၣ်ထွဲမၤစၢၤၦၤအဃိလီၤအဂ့ၢ်န့ၣ် ပထံၣ်ဘၣ်လၢသုးခိၣ် ဒးဘီ စံးဘၣ်၀ဲဒၣ် (ယမ့ၢ်ကညီ)န့ၣ်လီၤႉ
“တၢ်ခဲလၢာ်တၢ်မၤနၢၤတၢ်ကန့ၢ်ကသ့အဂီၢ်ဒုမ့ၢ်ဒၣ်လၢကမျၢၢ်လီၤႉကမျၢၢ်တၢ်ကွၢ်ထွဲၦၤတၢ်ဆီၣ်ထွဲမၤစၢၤၦၤမ့တအိၣ်ဘၣ်န့ၣ်လၢပတၢ်ပညိၣ်အိၣ်အဖီတၢၣ်အသိးဒုကလဲၤအဂီၢ်န့ၣ်တၢ်ကီတၢ်ခဲအိၣ်ဒီဒူၣ်ႉအဃိပဘၣ်ပာ်ဂံၢ်ပာ်ဘါ၀ဲဒၣ်ကမျၢၢ်ဘၣ်ပာ်မိၢ်ပာ်ပၢ်လၢကမျၢၢ်လီၤႉခဲအံၤပလဲၤ၀ဲဒၣ်ဒုးယၤဂ့ၢ်၀ီတဆီဘၣ်တဆီပတၢ်မၤနၢၤအိၣ်သ့ၣ်တဖၣ်အံၤန့ၣ် ပမ့တဲန့ၣ်ခီဖျိလၢ ကမျၢၢ်လီၤႉကမျၢၢ်အတၢ်ဆီၣ်ထွဲမၤစၢၤၦၤအတၢ်နာ်အီၣ်ၦၤအဃိန့ၣ်ပလဲၤသ့က့ၤသ့ပမၤသ့အဃိန့ၣ် ပမ့က့ၤကွၢ် ကဒါ ပတၢ်ဟူးတၢ်ဂဲၤဒီးကမျၢၢ်တၢ်ဆီၣ်ထွဲန့ၣ်ပတၢ်ဟူးတၢ်ဂဲၤန့ၣ်လဲၤ၀ဲသးလၢအဂ့ၢ်အ၀ီမီၤနီၤႉ”အဂ့ၢ် န့ၣ် စံး၀ဲန့ၣ်လီၤႉ
တကးဒံးဘၣ်ခီဖျိလၢထံရူၢ်ကီၢ်သဲးတၢ်ပၢၢ်ဆၢသနူဒီးတၢ်ထံၣ်တဒ်သိးလိာ်သးဘၣ်အဃိထံၣ်ဘၣ်လၢကီၢ်ပူၤကီၢ်ချၢကမျၢၢ်တနီၤတဲအါလိာ်သးကဒဲကဒဲဒီးလၢတၢ်အံၤအဖီခိၣ်ဘၣ်ဒိပသူၣ်ပသးဒိၣ်မးအဂ့ၢ်န့ၣ် (Cobra)သုးကျိၤခိၣ် သုးခိၣ်ဒးဘီ စံးအါထီၣ်၀ဲဒၣ်န့ၣ်လီၤႉ
“တဘျီတခီၣ်ပအိၣ်လၢတၢ်ဒုးပျီပူၤပဒုးဒီးဒုၣ်ဒါထဲလဲၣ်ထဲလဲၣ်ဂ့ၤဘၣ်ဆၣ်ပတလီၤဘှံးဘၣ်ႉပဘၣ်ဟ့ၣ်လီၤပသးသမူ ယမ့ၢ်တဲန့ၣ်ယဘၣ်ဒိအိၣ်ယဲၢ်ဘျီလံပကသံအိၣ်အဘျီတစှၤလံဘၣ်ႇဘၣ်ဆၣ်ယသးသဟီၣ်တဘၣ်ဒိသးတဆံး နီတဘျီဘၣ်ႉတခီၣ်တဘျီယထံၣ်ဘၣ်လၢယၦၤကညီအ့ၣ်လိာ်သးလၢကီၢ်ပူၤကီၢ်ချၢလၢတၢ်ပၢၢ်ဆၢသနူအဃိတၢ်ထံၣ်တဒ်သိးဘၣ်တဲဆါလီၤသးတဲအါလိာ်သးတၢ်သ့ၣ်တဖၣ်န့ၣ်ဘၣ်ဒိပသူၣ်ပသးရးမးႉဘၣ်ဆၣ်ဘၣ်ဒိဒ်လဲၣ်ဂ့ၤဒ်လဲၣ်ဂ့ၤ န့ၣ်ပအၢၣ်လီၤပသးလၢကျဲတဘိအံၤပကပိာ်လၢအကတၢၢ်ပကမၤန့ၢ်ပထံပကီၢ်တၢ်သဘျ့လၢအန့ၢ်ပအၢၣ်လီၤသးတုၤလီၤတီၤလီၤ အဃိန့ၣ်ပလဲၤ၀ဲကျဲတုၤလၢအဆၢကတီၢ်၀ဲအံၤလီၤ”အဂ့ၢ်န့ၣ်...
လါအ့ဖြ့ၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်
စးထီၣ်ဖဲမဟါလါအ့ဖြ့ၣ် ၉ သီ ဟါခီအဆၢကတီၢ်န့ၣ် လၢကညီကီၢ်စဲၣ် ကီးတရံးကီၢ်ဆၣ် မၠၣ်၀တံၣ်၀့ၢ်ပူၤ တၢ်ဒုးဆူၣ်ထီၣ်၀ဲဒၣ်လၢတၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤဒိၣ်ဒိၣ်မုၢ်မုၢ်အဃိ တကီၢ်ခါခဲအံၤၦၤကမျၢၢ်တဖၣ် သုးလီၢ်ကျဲဟးစံၣ်အိၣ်လၢတၢ်လီၢ်ပူၤဖျဲးအလီၢ်ဟဲအါထီၣ်၀ဲဒၣ်ရုၢ်ရုၢ်အဂ့ၢ်န့ၣ် ၀့ၢ်ပူၤကမျၢၢ်တဖၣ်စံး၀ဲန့ၣ်လီၤႉ
ဖဲမဟါဟါခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ(PDF)သုးပာ်ဖှိၣ်နုာ်လီၤခး၀ဲဒၣ် မၠၣ်၀တံၣ် ပယီၤသုးခီၣ်သုးရ့ၣ်(ခလရ-၂၇၅)တၢ်လီၢ်ဒီးဖဲန့ၣ်ခီဖျိသုးမီၤစိရိၤအကဘီယူၤဟဲက့ၤခးလီၤတၢ်လၢ (၂၇၅)တၢ်လီၢ်အခိၣ်အဃၢၤ၀း၀းတရံးဒီတနၤကျၢၤတုၤလၢမုၢ်ဆ့ၣ်ထီၣ်ခဲအံၤတစုအဃိၦၤကမျၢၢ်လၢအိၣ်၀့ၢ်တဖၣ် သုးလီၢ်သုးကျဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃးတၢ်ကဲထီၣ်သးလၢမၠၣ်၀တံၣ်၀့ၢ်ပူၤဂ့ၢ်အံၤန့ၣ် ၦၤကမျၢၢ်လၢအိၣ်ဖဲန့ၣ်တဂၤ စံး၀ဲလၢ “ခဲအံၤကဘီယူၤ ဟဲခးလီၤ တၢ်၀း၀းလီၤတဲမးတဘၣ်လၢၤဘၣ်ႉစးထီၣ်လၢဖဲမဟါမုၢ်ဃ့ၢ်လီၤ၀ံၤန့ၣ်တကတၢၢ်နီတထံၣ်လၢၤဘၣ်ခးလီၤ ဒီတနၤကျၢၤ လီၤႉခဲအံၤအ၀ဲသ့ၣ်ဒြိဒီးကဘီယူၤသီၣ်လဲးကူၣ်လီၤႉကွံာ်လီၤလဲးလိးတးတးဖိတဖျၢၣ်ခံဖျၢၣ်တးတးဖိတဖျၢၣ်ခံဖျၢၣ်ကၠုးလီၤလဲးလိးလီၤႉလၢတံအိၣ်အံၤဒုၦၤစံၣ်လၢာ်ကၠီပျီအိၣ်တ့ၢ်က့ၤဟံၣ်တဖျၢၣ်ပိာ်ခွါတဂၤဒ်န့ၣ်လီၤႉလဲၤထီၣ်စံၣ်လၢမဲၢ်ဆီးတနီၤႇက့ၤလီၤစံၣ်ကဒါလၢလာ်တနီၤႉတဂီၤညါအံၤၦၤစံၣ်အါဒိၣ်ထီၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤ န့ၣ်လီၤႉ
လၢန့ၣ်အမဲာ်ညါတကီၢ်ခါခဲအံၤခီဖျိတၢ်ဒုးတၢ်ယၤဆူၣ်ထီၣ်ႇပယီၤကဘီယူၤဟဲခးလီၤတၢ်တပယူာ်ဃီအဃိ ၦၤကမျၢၢ်လၢအိၣ်မၠၣ်၀တံၣ်ပူၤတဖၣ်ပျံၤတၢ်ဖုးတၢ်စံၣ်ထီၣ်ကအိၣ်လၢသၢပူခံပူလံဒီးဒ်န့ၣ်အသိး(ခလရ-၂၇၅)လၢ တၢ်ပၢၢ်ဆၢသုးကရူၢ်လဲၤခး၀ဲအံၤန့ၣ်တၢ်တမၤန့ၢ်၀ဲဒံးဘၣ်အဂ့ၢ်န့ၣ် ကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ် လီၤႉ
မၠၣ်၀တံၣ်၀့ၢ်ပူၤဖဲမဟါန့ၣ်ခီဖျိတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ႇ ခးလီၤဒြိႇကဘီယူၤစ့ၢ်ကီးဟဲခးလီၤတၢ်အဃိမ့ၣ်အူအီၣ်တၢ်ခုၣ်ထီၣ်ကဲထီၣ်သးလၢက၀ီၤဒ့တၢ်လီၢ်အါတီၤအပူၤ အဂ့ၢ်န့ၣ်...
လါအ့ဖြ့ၣ် ၉ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ်ဟီၣ်က၀ီၤအပူၤခီဖျီစုက၀ဲၤတၢ်သဘံၣ်သဘုၣ်ကဲထီၣ်လၢပယီၤသုးကီၣ် ကးဒီးလီၢ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်ဒီးသုးကီၣ်ကးကဘီယူၤဟဲတ့ၢ်လီၤမ့ၣ်ပိၢ်ႇ ခးလီၤကျိဖးဒိၣ်အဃိ ကမျၢၢ်လၢဘၣ်ဃ့ၢ်မှံဟးဖျိသ့ၣ်တဖၣ်လၢကအိၣ်ကဆိးႇ ကအီၣ်ကအီအဂီၢ်ဒီးကဒီသဒၢတၢ်ဆူးတၢ်ဆါအဂီၢ်လိၣ်ဘၣ် ၀ဲတၢ်ဆီၣ်ထွဲမၤစၢၤအဂ့ၢ်မုၢ်တြီၤကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
စးထီၣ်လၢလါမးရှး(၁၉)သီအနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်နုာ်လီၤဒီၣ်တဲာ်ကွံာ်၀ဲသုးကီၣ်ကးတၢ်လဲၤတၢ်က့ၤကျဲအဖီခိၣ်သုးကီၣ်ကးတကပၤဟဲခးလီၤတၢ်ဒီးကဘီယူၤႇ ဟဲတ့ၢ်လီၤဒြိမ့ၣ် ပိၢ်တပယူာ်ဃီအဃိကမျၢၢ်သ့ၣ်တဖၣ်ဘၣ်ပျံၤဘၣ်ဖုးတၢ်ဒီးဘၣ်ဃ့ၢ်အိၣ်ကဒုးအသးလၢတၢ်လီၢ်အဂၤအဂ့ၢ်သ့ၣ်ညါဘၣ်န့ၣ်လီၤႉ
တကီၢ်ခါခဲအံၤကမျၢၢ်လီၢ်က၀ီၤဖိလၢဘၣ်ဃ့ၢ်မှံဟးဖျိးသ့ၣ်တဖၣ်အံၤန့ၣ်လၢအ၀ဲသ့ၣ်ကအိၣ်ကဆိးအဂီၢ်ဒီးကအီၣ်ကအီအဂီၢ်လိၣ်ဘၣ်၀ဲတၢ်မၤစၢၤအသိးမ့ၢ်လၢဘၣ်အိၣ်ဘၣ်ဆိးလၢခိခိၣ်ၦၢ်လၢ်ကျါအဃိလိၣ်ဘၣ်၀ဲကသံၣ်ကသီလၢကဒီသဒၢအသးလၢတၢ်ဆူးတၢ်ဆါအဂီၢ်အဂ့ၢ်မုၢ်တြီၢ်ကီၢ်ရ့ၣ်အၦၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံး၀ဲဒ်အံၤန့ၣ်လီၤႉ
“တၢ်လိၣ်အကါဒိၣ်ကတၢၢ်န့ၣ်မ့ၢ်တၢ်အီၣ်မိၢ်ၦၢ်မီၤနီၤႉ ခီဖျိဆၢကတီၢ်တၢ်အိၣ်သးခဲအံၤန့ၣ်ဘၣ်လၢတၢ်ကိၢ်ဃ့အဃိလၢ ကဃုအီၣ်တၢ်ဒိးတၢ်လၣ်အဂီၢ်နး၀ဲဒိၣ်မးလီၤႉ မ့မ့ၢ်လၢခံခါတခါန့ၣ်လၢကအိၣ်ကဆိးအဂီၢ်တၢ်အခိၣ်ဒုးကလိၣ်၀ဲလီၤႉ ဒီးသၢခါတခါန့ၣ်လၢတၢ်အိၣ်သးခဲအံၤအဖီခိၣ်ခီဒုၦၤဘၣ်ဃ့ၢ်လၢၦၢ်ပူၤဒ်အံၤအဃိတၢ်ဃူးတၢ်ဃၢ်အ့ၣ်ႇ ပစိာ်အ့ၣ်၀ဲဒီး တဘျီဘျီတၢ်အီၣ်တၢ်အီၣ်တဘၣ်ဂီၢ်ဘၣ်ဒွါဘၣ်အဃိန့ၣ်ဒုကသံၣ်ကသီစ့ၢ်ကီးလိၣ်ဘၣ်၀ဲန့ၣ်လီၤႉ လိၣ်ဘၣ်၀ဲတၢ်သ့ၣ် တဖၣ်အံၤန့ၣ်မ့ၢ်တၢ်လၢအကါဒိၣ်မီၤနီၤႉ မ့ၢ်၀ံၤန့ၣ်ၦၤလၢဘၣ်ဃ့ၢ်ဟးပျဲၤသးလၢတၢ်ဒုးတၢ်ယၤသ့ၣ်တဖၣ်တနီၤနီၤန့ၣ်စိာ် ဃုာ်တၢ်တန့ၢ်နီၤတမံၤဘၣ်ႉ တၢ်ကူတၢ်ကၤတအိၣ်လၢလိၤဘၣ်နးဒိၣ်မးလီၤႉ အဃိန့ၣ်တၢ်ကူတၢ်ကၤမ့ၢ်ဂ့ၤႇ ယၣ်လုး မ့ၢ်ဂ့ၤန့ၣ်မ့ၢ်တၢ်လၢအလိၣ်၀ဲန့ၣ်လီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါမုၢ်တြီၢ်ကီၢ်ရ့ၣ်ဟီၣ်က၀ီၤအပူၤကမျၢၢ်လၢဘၣ်ဃ့ၢ်မှံဟးဖျိးတၢ်ဒုးတၢ်ယာ်န့ၣ်အိၣ်၀ဲသၢကလုာ်လၢအမ့ၢ် ကမျၢၢ်လၢအိၣ်ဖၣ်ပူၣ်၀့ၢ်တၢ်ဒုးပျီပူၤလၢလဲၤတသ့က့ၤတသ့တကလုာ်ႇ ဖၣ်ပူၣ်၀့ၢ်ခိၣ်ဃၢၤဒူသ၀ီကရူၢ်လၢကဘီယူၤ ဟဲခးလီၤတၢ်ကမျၢၢ်ဘၣ်ဃ့ၢ်ထီၣ်တကလုာ်ဒီးသ၀ီလၢအိၣ်စီစုယံာ်ဒီးဖၣ်ပူၣ်၀့ၢ်လၢကမျၢၢ်ဘၣ်ပျံၤကဘီယူၤဟးဆှၣ်န့ၣ်တကလုာ် ခဲလၢာ်သၢကလုာ်အဂ့ၢ်သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖၣ်ပူၣ်၀့ၢ်ပူၤကမျၢၢ်လၢလဲၤတသ့က့ၤတသ့သ့ၣ်တဖၣ်န့ၣ်ၦၤနီၣ်ဂံၢ်အိၣ်၀ဲ(၃၀၀၀)ဂၤဃၣ်ဃၣ်ဒီးဒူသ၀ီကရူၢ်(၄)ဘ့ၣ်လၢအိၣ်ဖၣ်ပူၣ်၀့ၢ်ခိၣ်၀့ၢ်ဃၢၤလၢအိၣ်ဒူသ၀ီပူၤတဘူၣ်သ့ၣ်တဖၣ်ၦၤနီၣ်ဂံၢ်ခဲလၢာ်အိၣ်၀ဲ(၁၃၀၀၀)ဂၤဃၣ်ဃၣ်ဒီးဒူသ၀ီလၢအိၣ်စီစုာ်ယံာ်ထီၣ်ကမျၢၢ်ဘၣ်ပျံၤကဘီယူၤဟးဆှၣ်တၢ်စ့ၢ်ကီးၦၤနီၣ်ဂံၢ်အိၣ်၀ဲအါမးအဂ့ၢ်သုးခိၣ်ဒိၣ်ဂီၢ်ဂ့ၢ်စီၤ ကျၢၤဒိၣ်စံးအါထီၣ်၀ဲအသိးသ့ၣ်ညါဘၣ်န့ၣ်လီၤႉ
လါအ့ဖြ့ၣ် ၉သီႇ ၂၀၂၄ နံၣ်ႇ ခ့ၣ်အဲးစံၣ်
သုးခိးကီၢ်ဆၢ(BGF)လၢအပျိာ်လဲက့ၤသးဆူ(KNA)ကညီဒီလုာ်သုးမုၢ်ဒိၣ်သ့ၣ်တဖၣ်ဖဲအပူၤကွံာ်လါအ့ဖြ့ၣ်(၈)သီအနံၤန့ၣ်အ၀ဲသ့ၣ်စးထီၣ်ထီထီၣ်၀ဲအဖံဘၣ်ခိၣ်တၢ်ပနီၣ်လၢအမ့ၢ်( KNA)လံအဂ့ၢ်သ့ၣ်ညါဘၣ်လၢၦၤလၢဘူးဒီး( KNA)အအိၣ်န့ၣ်လီၤႉ
ဒ်တၢ်အိၣ်ဖှိၣ်တၢ်ဆၢတဲာ်အသိး( KNA )အံၤတၢ်တူၢ်လိာ်အီၤလံဒီးဖဲမဟါတနံၤန့ၣ်တၢ်စးထီၣ်ထီထီၣ်၀ဲဖံဘၣ်ခိၣ်တၢ်ပနီၣ်လံအဂ့ၢ် ၦၤလၢဘူးဒီး( KNA)လၢအမ့ၢ်(KNLA)သုး၀ဲၤလီၢ်ခိၣ်သ့ၣ်ၦၤဘၣ်မူဘၣ်ဒါစီၤကီၢ်လါရှံစံးဘၣ်၀ဲ ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ဘၣ်ဃးဒီး(KNA)အံၤတၢ်အိၣ်ဖှိၣ်ဆၢတဲာ်အီၤ၀ံၤလံန့ၣ်လီၤႉတၢ်ဆၢတဲာ်၀ဲအံၤတၢ်တမၤဟးဂီၤအီၤလၢၤဘၣ်ႉတၢ်ကလုၢ်လီၤလၢတၢ်ကဘၣ်မၤ(KNA)အံၤအိၣ်ထီၣ်ဘးလၢအလါလံဘၣ်ဆၣ်သနာ်က့ဖဲလါထီၣ်(၈)အနံၤန့ၣ် ယနၢ်ဟူလၢယတံၤသကိး ပဒီပုၢ်၀ဲၢ်သုးခိၣ်တ့ၤ၀့ အ၀ဲတဲယၤလၢဘၣ်ဃးလၢဖံဘၣ်ခိၣ်တၢ်ပနီၣ်န့ၣ်ပစးထီၣ်ထီထီၣ်အီၤလံန့ၣ်လီၤႉဘၣ်ဃးတၢ်ဂ့ၢ်၀ဲအံၤန့ၣ်ၦၤအါဂၤမ့ၢ်နၢ်ဟူဒီးကသူၣ်ခုသးခုသူၣ်မုာ်သးမုာ်န့ၣ်လီၤႉဘၣ်မနုာ်အဃိလဲၣ်န့ၣ် တၢ်သ့ၣ်တဖၣ်အံၤထံဖိကီၢ်ဖိသ့ၣ်တဖၣ် အိၣ်ခိးကွၢ်လၢ်၀ဲယံၤတ့ၢ်လံန့ၣ်လီၤႉဘၣ်ဃးလၢတၢ်တဲဖျါထီၣ်တၢ်၀ဲအံၤန့ၣ်စးထီၣ်ဖဲမဟါကၢာ်ဒီးကလဲၤ၀ဲဆူညါကွ့ၢ်ကွ့ၢ်တပတီၢ်ဘၣ်တပတီၢ်(Step By Step)န့ၣ်လီၤႉ”အဂ့ၢ်စံး၀ဲဒၣ်န့ၣ်လီၤႉ
( KNA)ကညီဒီကလုာ်သုးမုၢ်ဒိၣ်အံၤအိၣ်ဒီးအကျဲသနူတၢ်သိၣ်တၢ်သီတၢ်ဘျၢ(၅)ထံၣ်လၢအမ့ၢ် ကညီဒီကလုာ်ကဒိးန့ၢ်ဘၣ်တၢ်ခွဲးတၢ်ယာ်တုၤသိးထဲသိးႇကညီဒီကလုာ်ကအိၣ်ဘၣ်မုာ်မုာ်ခုၣ်ခုၣ်ႇကညီဒီကလုာ်အမူအဒါန့ၣ်ကညီကလုာ်ဒၣ်၀ဲကဒုးအိၣ်ထီၣ်ႇကဒီသဒၢဂၢၤက့ၤ ကလုာ်၊လံာ်လဲၢ်တၢ်ဘူၣ်တၢ်ဘါႇကအိၣ်ဆၢထၢၣ်၀ဲဒ်ကီၢ်စဲၣ်တဘ့ၣ်လၢအအိၣ်လၢကီၢ်စၢဖှိၣ်လၢအမ့ၢ်ကီၢ်ပယီၤအပူၤလၢအအိၣ်ဒီးကညီကလုာ်ဒူၣ်ခဲလၢာ်တၢ်တုၤသိးထဲသိးဒီးကဖီၣ်လိာ်စုဒီးကီၢ်စၢဖှိၣ် တၢ်ဂ့ၢ်သ့ၣ်တဖၣ်ပၣ်ဃုာ်၀ဲဒၣ်န့ၣ်လီၤႉ
ကညီဒီကလုာ်သုးမုၢ်ဒိၣ်( KNA)လၢအမ့ၢ်တ့ၢ်(BGF)အံၤဖဲအပူၤကွံာ်လါယနူၤအါရ့ၤ၁၃သီအနံၤန့ၣ်ထုးဖးကွံာ်၀ဲအသးဒီးပယီၤသုးအဂ့ၢ်တီၣ်ထီၣ်၀ဲဒၣ်လံာ်လၢပယီၤသုးအအိၣ်န့ၣ်လီၤႉဒီး(KNA)အံၤအိၣ်၀ဲဒီးသုးဟီၣ်က၀ီၤနီၢ်ဂံၢ်(၄)ဘ့ၣ်ဒီးသုးဟီၣ်က၀ီၤနီၢ်ဂံၢ်(၁)န့ၣ်ဟံးန့ၢ်၀ဲဟီၣ်၀ီၤလၢမၠဲၣ်ကၠံငူၣ်ႇ သုးဟီၣ်က၀ီၤ(၂)လူၢ်ပျဲၢ်ႇတန့ခၠါႇသုးဟီၣ်က၀ီၤနီၢ်ဂံၢ်(၃)တီနီၢ်မုၢ်ထီၣ်ရၤမတံသူမွဲနံၤႇဒီးသုးဟီၣ်က၀ီၤနီၣ်ဂံၢ်(၄)တခီလၢကၠဲးဒိဒီးကၠးအ့ဆ့ၣ်ကၠံတကပၤ ဒီး( KNA )အသုးရ့ၣ်ခဲလၢာ်အိၣ်၀ဲ(၂၈)ရ့ၣ်အဂ့ၢ်သ့ၣ်ညါဘၣ်န့ၣ်လီၤႉ
လါအ့ဖြ့ၣ် ၉သီႇ ၂၀၂၄ နံၣ်ႇ ခ့ၣ်အဲးစံၣ်
ဘီမုၢ်စၢဖှိၣ်ကရၢၦၤဂ့ၢ်၀ီကီၣ်ကးထံကီၢ်ကရူၢ်ဖိတဖၣ်အၢၣ်လီၤတူၢ်လိာ်သကိး၀ဲလၢတၢ်တဘၣ်ဆါန့ၢ်ပယီၤသုးအကဘီယူၤသိလၢၤဘၣ်အဂ့ၢ်ဆၢတဲာ်လီၤ၀ဲဖဲအပူၤကွံာ်လါအ့ဖြ့ၣ်၄သီအနံၤဖဲအ၀ဲသ့ၣ်မၤ၀ဲတၢ်အိၣ်ဖှိၣ်ဘၣ်ဃးကီၢ်ပယီၤအဆၢကတီၢ်အဂ့ၢ်သ့ၣ်ညါဘၣ်န့ၣ်လီၤႉ
“တၢ်မ့ၢ်နာ်လၢပယီၤသုးကီၣ်ကးအံၤ သူ၀ဲဒၣ်ကဘီယူၤသိဒ်သိးကမၤထီဒါက့ၤအၦၤထံဖိကီၢ်ဖိ ၦၤအဂ့ၢ်၀ီခွဲးယာ်အအဂီၢ်န့ၣ်တၢ်တဘၣ်ဆါန့ၣ်အ၀ဲသ့ၣ်ကဘီယူၤသိလၢၤဘၣ်”တၢ်ဆှၢနုာ်၀ဲန့ၣ် န့ၣ်တရူးဃုာ်ဒီးဘီမုၢ်စၢဖှိၣ်ကရၢၦၤဂ့ၢ်၀ီကီၣ်ကးထံကီၢ်ကရူၢ်ဖိခဲလၢာ်၄၇ဘ့ၣ်အၢၣ်လီၤတူၢ်လိာ်သကိး၀ဲဒၣ်န့ၣ်လီၤႉ
ဘီမုၢ်ဆၢဖှိၣ်ကရၢၦၤဂ့ၢ်၀ီကီၣ်ကးအတၢ်ဆၢတဲာ်၀ဲအံၤမ့ၢ်တၢ်လၢအဂ့ၤဒီးအကါဒိၣ်၀ဲတခါအသိးလၢတၢ်ဆၢတဲာ်သ့ၣ်တဖၣ်အံၤမိၢ်လံၤမိၢ်ၦၢ်ကဖျါအါထီၣ်အဂီၢ် အ၀ဲသ့ၣ်ကဆဲးဂဲၤလိာ်၀ဲဒၣ်အဂ့ၢ် ( Burma Campaign UK )အၦၤနဲၣ်တၢ်သရၣ်မုၣ်နၣ်စိၣ်ယါဖါ စံးဘၣ်၀ဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“လၢအပူၤကွံာ်(၂)နံၣ်အခါလံၤလံၤပဟူးဂဲၤဒ်သိး ထံဂုၤကီၢ်ဂၤဒီးခီပနံၣ်သ့ၣ်တဖၣ်ကပတုာ်ကွံာ်တၢ်ဆါတၢ်ၦ့ၤတၢ်ဘျၢလီၤကဘီယူၤသိလၢကီၢ်ပယီၤသုးမုၢ်ဒိၣ်အစုပူၤန့ၣ်လီၤႉဘၣ်မနုာ်အဃိလဲၣ်န့ၣ် ကဘီယူၤလၢပယီၤသုးမုၣ်ဒိၣ်ပၢဘၣ်သ့ၣ်တဖၣ်န့ၣ်အသိမ့ၢ်တအိၣ်ဘၣ်န့ၣ်အယူၤထီၣ်တသ့ဘၣ်ႉ အယူၤထီၣ်မ့ၢ်တသ့ဘၣ််န့ၣ် ကလဲၤတ့ၢ်လီၤမ့ၣ်ပိၢ်ႇကလဲၤခးလီၤတၢ်လၢကလုာ်ဒူၣ်ကမျၢၢ်တၢ်အိၣ်တၢ်ဆိးလီၢ်တသ့ဘၣ်ႉအဃိန့ၣ်ကဘီယူၤသိသုတလဲၤတုၤဃီၤဆူပယီၤသုးမုၢ်ဒိၣ်အစုပူၤဘၣ်အဂီၢ်န့ၣ်မ့ၢ်တၢ်လၢအရ့ဒိၣ်နီၢ်မးန့ၣ်လီၤႉ အဃိန့ၣ်ဘီမုၢ်စၢဖှိၣ်ကရၢအတၢ်ဆၢတဲာ်၀ဲအံၤမ့ၢ်တၢ်လၢအရ့ဒိၣ်ဒီးအကါဒိၣ်တခါန့ၣ်လီၤႉဒ်သိးတၢ်ဆၢတဲာ်သ့ၣ်တဖၣ်အံၤအမိၢ်လံၤမိၢ်ၦၢ်ကဖျါအါထီၣ်အဂီၢ်ပကဆဲးဂဲၤလိာ်ဒံးအီၤန့ၣ်လီၤႉ”အဂ့ၢ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါ ဘီမုၢ်စၢဖှိၣ်ကရၢၦၤဂ့ၢ်၀ီကီၣ်ကးတၢ်ဆၢတဲာ်ဘျီ၀ဲအံၤဂ့ၤဘၣ်ဆၣ်လၢကဆီၣ်သနံာ်၀ဲပယီၤသုးကီၣ်ကးအဂီၢ်သဲးစးတၢ်ဘျၢတအိၣ်နီတမံၤဘၣ်အဃိ ခါလၢကဟဲဆူညါတပတီၢ်မုၢ်လၢ်၀ဲလၢ ဘီမုၢ်စၢဖှိၣ်ကရၢဘံၣ်ဘၢကီၣ်ကးကမၤတၢ်ဆၢတဲာ်လၢပယီၤသုးကီၣ်ကးအဖီခိၣ်အဂ့ၢ်သရၣ်မုၣ်နၣ်စိၣ်ယါဖါတဲအါထီၣ်၀ဲဒၣ်စ့ၢ်ကီးန့ၣ်လီၤႉ
ဒ်န့ၣ်အသိးဖဲတနံၤဃီလါအ့ဖြ့ၣ်(၄)သီအနံၤန့ၣ် ဘီမုၢ်စၢဖှိၣ်ကရၢ ဘံၣ်ဘၢကီၣ်ကးစ့ၢ်ကီးမၤ၀ဲတၢ်အိၣ်ဖှိၣ်ဘၣ်ဃးကီၢ်ပယီၤအဂ့ၢ်ဘၣ်ဆၣ်ထံကီၢ်လၢအတဲဖျါထီၣ်ဘၣ်ဃး တၢ်ကြၢးပတုာ်ကွံာ်ကဘီယူၤသိလၢကလဲၤဆူပယီၤသုးမုၢ်ဒိၣ်အစုပူၤန့ၣ်အိၣ်ဒၣ်ထံကီၢ်ခံဘ့ၣ်လၢအမ့ၢ် ကီၢ်အမဲရကၤဒီးကီၢ်မီလ်ထၣ်ခံဘ့ၣ်လီၤအဂ့ၢ်သ့ၣ်ညါဘၣ်န့ၣ်လီၤႉ
လါအ့ဖြ့ၣ် ၉ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကီၢ်ဆၣ်ခံဘ့ၣ်အပူၤ သုးကီၣ်ကးထုးထီၣ် တၢ်ကဘၣ်ကဲသုးတၢ်ဘျၢ၀ံၤလီၢ်ခံ ၦၤသူၣ်ဘီၣ်သးစၢ်ဟဲစံၣ်အိၣ်ကဒုသးအိၣ်၀ဲခဲလၢာ်(၂၀၀)ဘျဲၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲဒၣ်န့ၣ်လီၤႉ
သုးကီၣ်ကးထုးထီၣ်တၢ်ကဘၣ်ကဲသုးတၢ်ဘျၢ၀ံၤလီၢ်ခံလၢဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ဒီးသထူၣ်ကီၢ်ဆၣ် ကီၢ်ဆၣ်(၂)ဘ့ၣ်အံၤအပူၤန့ၣ် ၦၤသးစၢ်ဟဲအိၣ်ကဒုသးအနီၣ်ဂံၢ်အိၣ်၀ဲ(၃၀၀)ဃၣ်ဃၣ်လံဒီးဘၣ်ဆၣ်မ့မ့ၢ် ကီၢ်ရ့ၣ် ဒီတဘ့ၣ်အပူၤၦၤစးစၢ်ဟဲအိၣ်ကဒုသးအနီၣ်ဂံၢ်ခီန့ၣ်ခီဖျိတၢ်သမံသမိး၀ဲတ၀ံၤတတဲာ်ဒံးဘၣ်အဃိ အနီၣ်ဂံၢ်နီၣ်ဒွး လီၤတံၢ်လီၤဆဲးန့ၣ်တသ့ၣ်ဒံးဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ
“အခဲအံၤန့ၣ်ပဟးထၢစရီအဖၢမုၢ်လီၤတ၀ံၤတတဲာ်ဒံးဘၣ်ႉအနီၣ်ဂံၢ်နီၣ်ဒွးခဲလၢာ်ဒုပတသ့ၣ်ညါလီၤတံၢ်လီၤဆဲးခဲ လၢာ်ဒံးဘၣ်ႉမ့မ့ၢ်လၢကၠဲးထိၣ်ကီၢ်ဆၣ်န့ၣ်ဟဲထီၣ်၀ဲဒၣ်အိၣ်(၁၇၅)ဂၤခဲအံၤကအိၣ်လၢ(၂၀၀)ဖီခိၣ်လံႉတၢ်မၢၤလၢ သထူၣ်ကီၢ်ဆၣ်ခီန့ၣ်အိၣ်၀ဲဒၣ်(၃၈)ဂၤခဲအံၤကအိၣ်လၢ(၅၀)ဃၣ်ဃၣ်လံမီၤႉမ့မ့ၢ်လၢကၠဲးထိၣ်ကီၢ်ဆၣ်တကပၤန့ၣ် (BPLA)ဟဲဆ့ၣ်နီၤအိၣ်ဖဲန့ၣ်တခါႉအဃိန့ၣ်ပနၢ်ဟူလၢအ၀ဲသ့ၣ်ဆဲးကျိး၀ဲဒီးပာ်ဖှိၣ်ဃာ်၀ဲဖဲန့ၣ်ဘျီဆှၢထီၣ်၀ဲဆူ (သုးက့ ၅)တကပၤန့ၣ်အိၣ်တဘျုးလၢအကယၤညါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဖဲအပူၤကွံာ်လါဖ့ၤဘြူၤအါရံၤအခါန့ၣ်လၢကီၢ်ပယီၤဒီတဘ့ၣ်အပူၤသုးကီၣ်ကးထုးထီၣ်တၢ်ကဘၣ်ကဲသုးသဲစးဒီး ခီဖျိလၢတၢ်ဂ့ၢ်အံၤအဃိသူၣ်ဘီၣ်သးစၢ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီလၢကဘၣ်ကဲသုးအဃိတနီၤန့ၣ်အ၀ဲသ့ၣ် ဟးထီၣ်၀ဲဒၣ်လၢထံဂုၤကီၢ်ဂၤအိၣ်၀ဲအသိးတနီၤန့ၣ်လဲၤနုာ်လီၤအိၣ်ကဒုသးလၢကလုာ်ဒူၣ်ဖီၣ်စုက၀ဲၤတၢ်လီၢ်စ့ၢ်ကီး အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကီၢ်ခါခဲအံၤၦၤသးစၢ်လၢအဟဲအိၣ်ကဒုသးဖဲဒူသထူၣ်ကီၢ်ရ့ၣ် ကီၢ်ဆၣ်(၂)ဘ့ၣ်အံၤအပူၤတဖၣ်...
လါအ့ဖြ့ၣ်ႇ ၈သီႇ ၂၀၂၄နံၣ်ႇ ခ့ၣ်အဲးစံၣ်
ကညီကီၢ်စဲၣ် သ့ၣ်ဃးလီၤတီၢ်(သ့ၣ်ကါညံၣ်နီၣ်)ပယီၤဒုးယာ်သုးကလၢၤလီၤ၀ံၤအလီၢ်ခံ ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢရၤမတံ၀့ၢ် ၀့ၢ်ပူၤကမျၢၢ်သ့ၣ်တဖၣ်ဘၣ်ယိၣ်၀ဲလၢတၢ်ဒုးမ့ၢ်ကဲထီၣ်လၢ၀့ၢ်ပူၤဒီးပယီၤသုးကဟဲခးလီၤတၢ်ဒီးကဘီယူၤအဃိလီၢ်က၀ီၤကမျၢၢ်တနီၤစးထီၣ်ဃ့ၢ်ပဒ့ၣ်သးလံအဂ့ၢ် သ့ၣ်ညါဘၣ်လၢလီၢ်က၀ီၤတၢ်ပၢၢ်ဆၢသုးပာ်ဖှိၣ်ၦၤဘၣ်မူဘၣ်ဒါအအိၣ်န့ၣ်လီၤႉ
ရၤမတံ၀့ၢ်ခိၣ်ထိးန့ၣ်အိၣ်ဒံးပယီၤသုးခီၣ်သုးရ့ၣ်၂၇၅သုးကလၢၤတဖျၢၣ်ဒံးအဃိတၢ်ဒုးမ့ၢ်ကဲထီၣ်န့ၣ်ကမျၢၢ်သ့ၣ်တဖၣ်ပျံၤ၀ဲဒၣ်ပယီၤသုးကီၣ်ကးအကဘီယူၤအဖီခိၣ်ဃ့ၢ်ပဒ့ၣ်သးလီၤအဂ့ၢ် တၢ်ပၢၢ်ဆၢသုးပာ်ဖှိၣ်အၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အခဲအံၤန့ၣ်ပယီၤသုးခီၣ်သုးရ့ၣ်၂၇၅အအိၣ်တ့ၢ်ဒံးအဃိန့ၣ်ပကမၤလၢအဂ့ၤကတၢၢ်လီၤႉလၢပ၀ဲတၢ်ပၢၢ်ဆၢသုးပာ်ဖှိၣ်တကပၤန့ၣ်ဒ်သိးကမျၢၢ်တၢ်ဘၣ်ဒိဘၣ်ထံးသုတအိၣ်တဂ့ၤအဂီၢ်ပဂၢၤဃာ်ကမျၢၢ်လၢအဂ့ၤကတၢၢ်န့ၣ်လီၤႉဘၣ်ဆၣ်ပယီၤသုးကီၣ်ကးတကပၤ တၢ်ဒုးမ့ၢ်ကဲထီၣ်န့ၣ်သူ၀ဲဒၣ်ကဘီယူၤအဃိကမျၢၢ်သ့ၣ်တဖၣ်ပျံၤ၀ဲဒၣ်ပယီၤသုးကဘီယူၤအဃိသတးန့ၣ်ဟးထီၣ်ဃ့ၢ်ပဒ့ၣ်သးအိၣ်လံတနီၤအသိးအိၣ်တ့ၢ်လၢ၀့ၢ်ပူၤအိၣ်တနီၤန့ၣ်လီၤႉ”အဂ့ၢ်စံး၀ဲန့ၣ်လီၤႉ
ရၤမတံ၀့ၢ်ပူၤၦၤကမျၢၢ်လၢဃ့ၢ်ပဒ့ၣ်သးသ့ၣ်တဖၣ်အံၤ ၦၤလၢသ၀ီအိၣ်သ့ၣ်တဖၣ်က့ၤကဒါက့ၤဆူနီၢ်ကစၢ်ဒူသ၀ီအိၣ်တနီၤအသိးဟဲဃ့ၢ်နုာ်၀ဲဒၣ်ဆူကီၢ်ကၠီၣ်တဲၣ်၀့ၢ်မဲၢ်ဆီးတကပၤအိၣ်၀ဲတနီၤအဂ့ၢ်သ့ၣ်ညါဘၣ်အသိးလီၤဆီဒၣ်တၢ်ကမျၢၢ်လၢအအိၣ်ဘူးဒီးပၢၤကီၢ်သုး၀ဲၤလီၢ်ဒီးသုးကီၣ်ကး၀ဲၤကျိၤအရူသ့ၣ်တဖၣ်ဃ့ၢ်ပဒ့ၣ်သးလၢၤဃၣ်ဃၣ်လံအဂ့ၢ်သ့ၣ်ညါဘၣ်ဒ်ရၤမတံလီၢ်က၀ီၤစံး၀ဲဒၣ်အသိးန့ၣ်လီၤႉ
လၢန့ၣ်အမဲာ်ညါ သုးကီၣ်ကးဖီလာ်၀ဲၤကျိၤၦၤမၤတၢ်ဖိလၢအအိၣ်ဖဲရၤမတံ၀့ၢ်ပူၤခဲလၢာ်သ့ၣ်တဖၣ်တၢ်ပၢၢ်ဆၢသုးပာ်ဖှိၣ်တကပၤဟ့ၣ်အ၀ဲသ့ၣ်တဖၣ်ခွဲးတၢ်ယာ်(၅)သီလၢကဟးထီၣ်ကွံာ်လၢမူဒါတၢ်ဖံးတၢ်မၤဒီးအခဲအံၤအ၀ဲသ့ၣ်တၢ်ခွဲးတၢ်ယာ်အိၣ်တ့ၢ်ဒံး(၂)သီလၢကဟးထီၣ်ဒံးအဂ့ၢ်လီၢ်က၀ီၤတၢ်ပၢၢ်ဆၢၦၤဘၣ်မူဘၣ်ဒါ၀ဲစံးစ့ၢ်ကီးန့ၣ်လီၤႉ
လၢတၢ်န့ၣ်အဃိ သုးကီၣ်ကးအထံဂုၤကီၢ်ဂၤမီၢ်သီကွဲးထီၣ်လံာ်ဆူကီၢ်ကၠီၣ်တဲၣ်အအိၣ်ဒီးဃ့ထီၣ်၀ဲလၢကီၢ်ကၠီတဲၣ်ကပျဲအ၀ဲသ့ၣ်ကဘီယူၤစီၢ်လီၤဖဲမဲၢ်ဆီးကဘီယူၤပျီစးထီၣ်လၢလါအ့ဖြ့ၣ် (၇)သီတုၤ(၉)သီလၢ(၃)အတီၢ်ပူၤဒ်သိးကစိာ်ဆှၢ၀ဲၦၤလဲၤတၢ်ဖိအိၣ်၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ
လါအ့ဖြ့ၣ် ၈ သီႇ ၂၀၂၄ နံၣ်ႇ ခ့ၣ်အဲးစံၣ်
ဖဲပူၤကွံာ်လါအ့ဖြ့ၣ်(၂)သီအနံၤန့ၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢမုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)သုးက့ ခိၣ်လီၢ်လံၤသုးခိၣ်ကျၢၢ်ဖိစီၤမုၢ်ဟဲလၢလဲၤပူၤကွံာ်ဟီၣ်ခိၣ်ႇ ဖဲလါအ့ဖြ့ၣ်(၅)သီအနံၤန့ၣ်ဘၣ်တၢ်ပာ်လီၤက့ၤ၀ဲအသွၣ်ခိၣ် ဖဲ(အူရ့ၣ်ထၣ်)သ၀ီအပူၤ၀ံၤ၀ဲလံအဂ့ၢ်သ့ၣ်ညါဘၣ်န့ၣ်လီၤႉ
သုးခိၣ်ကျၢၢ်ဖိဖုမုၢ်ဟဲအံၤဖဲအ၀ဲဃ့အိၣ်ဘှံးက့ၤလၢသုးက့ခိၣ်မူဒါအပူၤ၀ံၤအလီၢ်ခံခီဖျိလၢမှံၤတုၤၦၢ်တီၤသးၦၢ်တၢ်ဆါအဃိစူးကွံာ်အသးဒီးဖဲအ၀ဲအိၣ်ဘှံးလၢသုးက့ၤခိၣ်မူဒါ၀ံၤအလီၢ်ခံဟံန့ၢ်က့ၤ၀ဲမူဒါဒ်ကီၢ်ရ့ၣ်သုးက့ၦၤဟ့ၣ်ကူၣ်ဟ့ၣ်ဖးတၢ်တဂၤအသိးအဂ့ၢ်မုၢ်တြီၢ်ကီၢ်ရ့ၣ်ၦၤကတိၤတၢ်ပၢသုးခိၣ်ဒိၣ်ဂီၢ်ဂ့ၤစီၤကျၢၤဒိၣ်စံး၀ဲဒ်အံၤနၣ်လီၤႉ
“ဖဲအ၀ဲစူးကွံာ်အသးအကတီၢ်န့ၣ်တမ့ၢ်လၢသုးက့ခိၣ်လၢၤဘၣ်မီၤနီၤႉ မ့ၢ်လၢမှံၤတုၤၦၢ်တီၤသးၦၢ်ထီၣ်လံအဃိအ၀ဲဃ့အိၣ်ဘှံး၀ဲမီၤနီၤႉ တၢ်ပျဲဒုးအိၣ်ဘှံး၀ဲလၢသုးက့ခိၣ်အလီၢ်လီၤႉ ဖဲသုးခိၣ်ကျၢၢ်ဖိစီၤမုၢ်ဟဲအိၣ်ဘှံး၀ဲလၢသုးက့ခိၣ်မူဒါ၀ံၤအလီၢ်ခံန့ၣ်အ၀ဲဟံန့ၢ်က့ၤမူဒါဒ်သုးက့ၦၤဟ့ၣ်ကူၣ်ဟ့ၣ်ဖးတၢ်ႇ ကီၢ်ရ့ၣ်ၦၤဟ့ၣ်ကူၣ်ဟ့ၣ်ဖးတၢ်တဂၤလီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
သုးခိၣ်ကျၢၢ်ဖိစီၤမုၢ်ဟဲအံၤဖဲ(၁၉၆၉)နံၣ်အဆၢကတီၢ်အ၀ဲစးထီၣ်နုာ်လီၤကဲထီၣ်ဘၣ်၀ဲကီၢ်သူလ့ၤသုးဖိတဂၤအသိးဒီးသုးခိၣ်ကျၢၢ်ဖိစီၤမုၢ်ဟဲအံၤဖဲအ၀ဲဟူးဂဲၤဟ့ၣ်လီၤသးလၢကညီဒီကလုာ်တၢ်ပၢၢ်ဆၢပူၤဒီတကတီၢ်မူဒါဒီးလီၢ်လၤလၢအဟံးထီၣ်ဖီၣ်ထီၣ်တ့ၢ်၀ဲသ့ၣ်တဖၣ်အိၣ်ဖျါ၀ဲဒ်လာ်အသိးန့ၣ်လီၤႉ
မူဒါဒီးလီၢ်လၤလၢသုးခိၣ်ကျၢၢ်ဖိစီၤမုၢ်ဟဲဟံးထီၣ်ဖီၣ်ထီၣ်တ့ၢ်၀ဲဒ်အမ့ၢ်
စးထီၣ်ဖဲ(၁၉၇၄)တုၤ(၁၉၇၆)နံၣ်ဟံထီၣ်ဖီၣ်ထီၣ်၀ဲဒ်အမ့ၢ်သုးစကီၤပြံႇ သုးယဲၤခိၣ်ခံ
(၁၉၇၆)နံၣ်တုၤလၢ(၁၉၇၇)နံၣ်ဒ်အမ့ၢ်သုးစကီၤဖိႇ သုးယဲၤခိၣ်
(၁၉၇၇)နံၣ်တုၤ(၁၉၇၉)နံၣ်န့ၣ်သုးစကီၤႇ သုးဆှ့ၣ်ခိၣ်ခံ
(၁၉၇၉)နံၣ်အတီၢ်ပူၤဒ်သုးခိၣ်ဂီၢ်ဂ့ၤႇ သုးဒ့ခိၣ် ၂
(၁၉၇၉)နံၣ်တုၤ(၁၉၈၀)နံၣ်အတီၢ်ပူၤန့ၣ်ဒ်အမ့ၢ်သုးခိၣ်စိႇ သုးဒ့ခိၣ်
(၁၉၈၀)နံၣ်(၁၉၉၇)နံၣ်န့ၣ်သုးခိၣ်ဒိၣ်ဖိႇ သုးရ့ၣ်ခိၣ် ၂
(၁၉၉၇)တုၤ(၂၀၀၇)နံၣ်ဒ်သုးခိၣ်ဒိၣ်ဂီၢ်ဂ့ၢ်ႇ သုးရ့ၣ်ခိၣ်
(၂၀၀၇)နံၣ်တုၤလၢ(၂၀၁၂)နံၣ်ဒ်အမ့ၢ်သုးခိၣ်ဒိၣ်စိႇ သုးက့ဒုးယၤခိၣ်တဂၤဒီး
ဖဲ(၂၀၁၂)နံၣ်တုၤ(၂၀၂၁)နံၣ်အတီၢ်ပူၤန့ၣ်သုးခိၣ်ကျၢၢ်ဖိဖုမုၢ်ဟဲဟံးထီၣ်ဖီၣ်ထီၣ်တ့ၢ်၀ဲဒ်သုးခိၣ်ကျၢၢ်ဖိႇ သုးက့ခိၣ်တဂၤအသိးန့ၣ်လီၤႉ
လၢန့ၣ်အမဲာ်ညါသုးခိၣ်ကျၢၢ်ဖိစီၤမုၢ်ဟဲအံၤဘၣ်ထွဲဒီးအနီၢ်ကစၢ်တၢ်လဲၤခီဖျိအဂ့ၢ်အကျိၤသ့ၣ်တဖၣ်န့ၣ်အ၀ဲကွဲးထုးထီၣ်တ့ၢ်ဃာ်၀ဲလံာ်တဘ့ၣ်လၢအခိၣ်တီမ့ၢ် “အနံၣ်(၅၁)တၢ်လဲၤခီဖျိဃုုာ်ဒီး(DKBA)ဟဲကဲထီၣ်” အဂ့ၢ်ဒီးလံာ်၀ဲအံၤ န့ၣ်ဘၣ်တၢ်ထုးထီၣ်အီၤဖဲ(၂၀၂၁) နံၣ်အနံၤန့ၣ်လီၤႉ
သုးခိၣ်ကျၢၢ်ဖိစီၤမုၢ်ဟဲအံၤန့ၣ်မ့ၢ်ၦၤလၢအိၣ်ဖျဲၣ်ထီၣ်ဒီးဒိၣ်ထီၣ်၀ဲဒၣ်ဖဲမုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်က၀ီၤ(ထၢၣ်ညၣ်ဒၢ)သ၀ီအပူၤဒီးသုးခိၣ်ကျၢၢ်ဖိဖုစီၤမုၢ်ဟဲအံၤဖဲအ၀ဲဃ့အိၣ်ဘှံးလၢအတၢ်ဖံးတၢ်မၤမူဒါအပူၤ၀ံၤအလီၢ်ခံခီဖျိသးၦၢ်တၢ်ဆါအဃိဘၣ်စူးကွံာ်၀ဲအသးဒီးပာ်လီၤတဲာ်တ့ၢ်၀ဲအဖိမုၢ်ဖိခွါ(၇)ဂၤဒီးအမါဖံနီၢ်ဘံၣ်ထူသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအ၀ဲစူးကွံာ်၀ဲအသးအဆၢကတီၢ်အသးနံၣ်အိၣ်၀ဲဒၣ်(၇၃)နံၣ်ဒီး သုးက့နီၣ်ဂံၢ်(၅)သုးက့ခိၣ်လီၢ်လံၤသုးခိၣ် ကျၢၢ်ဖိဖုစီၤမုၢ်ဟဲအံၤအတၢ်ဟ့ၣ်လီၤသးလၢကညီတၢ်ပၢၢ်ဆၢအတၢ်ဂဲၤလိာ်အဂီၢ်ထီၣ်ဘးလၢ(၅၀)နံၣ်ဘျဲၣ်ဃၣ်ဃၣ်လံအဂ့ၢ်သ့ၣ်ညါဘၣ်န့ၣ်လီၤႉ