လါအ့ၣ်ဖြ့ၣ် ၈သီႇ၂၀၂၄နံၣ်ႇ ခ့ၣ်အဲးစံၣ်ႇ
သုးကီၣ်ကးစိာ်ခီဆှၢ၀ဲရၤမတံ၀့ၢ်ပူၤပယီၤမုၢ်ကျိၤ၀ဲၤကွာ်စ့တၢး(BANK)အပူၤစ့တဖၣ်ဒီးနီၢ်တဂၤစ့တၢး(BANK)လၢအဂၤအပူၤစ့တဖၣ်လၢကလံၤကျိၤ((MNA)ကဘီယူၤလၢမဲဆီး၀့ၢ်တကပၤတဆီဆူ၀့ၢ်တကူၣ်အပူၤဖဲလါအ့ဖြ့ၣ်(၇)သီမုၢ်နၤခီအဆၢကတီၢ်အဂ့ၢ်ရၤမတံ၀့ၢ်စ့တၢး(BANK)ၦၤမၤတၢ်ဖိအဟံၣ်ဖိဃီဖိတဖၣ်မၤလီၤတံၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ
ဖဲအပူၤကွံာ်လါအ့ဖြ့ၣ်(၅)သီအနံၤန့ၣ်ကညီတၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်ထီၣ်ဒုးမၤန့ၢ်ကွံာ်၀ဲသုးကီၣ်ကးသ့ၣ်ဃးလီၤတီၢ်(သ့ၣ်ကါညံၤနီၤ)အဒုးယာ်သုးကလၢၤ၀ံၤအလီၢ်ခံလါအ့ဖြ့ၣ်(၆)သီအနံၤအပူၤကီၢ်ကၠီၣ်တဲၣ်ကီၢ်ပယီၤမီၢ်သီ၀ဲၤဒၢးလၢအိၣ်ဆီလီၤသးဖဲကၠီၣ်တဲၣ်၀့ၢ်ခိၣ်(ဘီကီး)၀့ၢ်ပူၤတဖျၢၣ်အံၤဆှၢဃီၤ၀ဲလံာ်တၢ်ဒုးသ့ၣ်ညါဆူကီၢ်ကၠီၣ်တဲၣ်ခိၣ််နၢ်တကပၤအအိၣ်လၢကဟ့ၣ်ခွဲးပျဲ၀ဲကီၢ်ပယီၤကဘီယူၤကဃ့ၢ်ဂ့ၢ်ဂီၢ်အူအဂ့ၢ်သ့ၣ်ညါဘၣ်န့ၣ်လီၤႉ
သုးကီၣ်ကးအံၤဆှၢဃီၤ၀ဲလံာ်လၢအကဘီယူၤMNAနီၢ်ဂံၢ်ATR 72-600အံၤကယူၤလ့ၢ်လိၤ၀ဲလၢမဲၢ်ဆီးဖဲလါအ့ဖြ့ၣ်(၇)သီအနံၤတုၤလၢလါအ့ဖြ့ၣ်(၉)သီအနံၤလၢ(၃)သီအတီၢ်ပူၤအိၣ်၀ဲဒီးသုးကီၣ်ကးအကဘီယူၤအံၤကစိာ်ခီဆှၢ၀ဲရၤမတံ၀့ၢ်ပူၤစ့တၢး(BANK)ပူၤစ့တဖၣ်ဒီး၀ဲၤကျိၤဘၣ်ထွဲခိၣ်နၢ်ၦၤမၤတၢ်ဖိဃုာ်ဒီးအဟံၣ်ဖိဃီဖိတဖၣ်အဂီၢ်မၢ၀ဲတၢ်အိၣ်ကတဲၤကတီၤထီၣ်အသးအဂ့ၢ်ရၤမတံ၀့ၢ်ပယီၤမုၢ်ကျိၤ၀ဲၤကွာ်စ့တၢးၦၤမၤတၢ်ဖိအဟံၣ်ဖိဃီဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲမဟါမုၢ်ဃ့ၢ်လီၤအဆၢကတီၢ်န့ၣ်စ့တၢးၦၤဘၣ်မူဘၣ်ဒါခိၣ်နၢ်တဖၣ်မၢစ့တၢးၦၤမၤတၢ်ဖိတဖၣ်ပာ်ဖှိၣ်ထီၣ်သးဒီးကိး၀ဲ၀့ၢ်ပူၤမုၢ်ကျိၤ၀ဲၤကွာ်သိလ့ၣ်ကစၢ်တဖၣ်ဒီးမၢ၀ဲလဲၤခီဃီၤဆူမဲၢ်ဆီး၀့ၢ်လၢတိၤနီၢ်ဂံၢ်(၂)တကပၤလၢတၢ်ကစိာ်ဆှၢ၀ဲလၢကဘီယူၤအဂီၢ်န့ၣ်လီၤႉမၢ၀ဲတၢ်ထုးထီၣ်ဆှၢဃီၤ၀ဲပယီၤမုၢ်ကျိၤ၀ဲၤကွာ်စ့တၢး(KBZ)ကၣ်ဘီဇဲၣ်ဃုာ်ဒီးနီၢ်တဂၤစ့တၢးတဖၣ်ဒီးစံး၀ဲလၢ၀ဲၤကျိၤဘၣ်ထွဲခိၣ်နၢ်ဒီးအဟံၣ်ဖိဃီဖိတဖၣ်လၢကဘၣ်လဲၤပိာ်၀ဲအခံအဃိမၢအိၣ်ကတဲာ်ကတီၤအသးမီၤနီၤႉမ့မ့ၢ်အလီၢ်အလၤအဂၤဒီးမုၢ်ဆ့ၣ်မုၢ်ဂီၤၦၤမၤတၢ်ဖိတဖၣ်ခီန့ၣ်တၢ်ရဲၣ်တၢ်ကျဲၤလၢကဘီယူၤကဟဲကိးအီၤတအိၣ်၀ဲဘၣ်အဂ့ၢ် “ စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
သုးကီၣ်ကးကဘီယူၤလၢအစီၢ်လီၤဖဲမဲၢ်ဆီးကဘီယူၤသန့လၢယံာ်၀ဲ(၁)နၣ်ရံၣ်ဘျဲၣ်ဃၣ်ဃၣ်တခိၣ်အံၤကၠီၣ်တဲၣ်တၢ်ကစီၣ်သန့တနီၤပာ်ဖျါ၀ဲလၢအတၢ်ဟဲကိးက့ၤအၦၤလၢအဂၤ(၆၀၀)ဘျဲၣ်လၢ(KNLA)တၢ်ပၢၢ်ဆၢသုးပာ်ဖှိၣ်ဖီၣ်ဃာ်၀ဲဒီး(KNLA)တၢ်ပၢၢ်ဆၢသုးပာ်ဖှိၣ်တပျၢ်က့ၤ၀ဲၦၤသ့ၣ်တဖၣ်အံၤဘၣ်အဃိကဘီယူၤအံၤဘၣ်က့ၤက့ၤ၀ဲလၢစုယၢ်ခီအိၣ်၀ဲဘၣ်ဆၣ်ခ့ၣ်အဲးစံၣ်ကညီတၢ်ကစီၣ်မၤလီၤတံၢ်တန့ၢ်၀ဲဒံးဘၣ်န့ၣ်လီၤႉ
လၢန့ၣ်အမဲာ်ညါတကီၢ်ခါခဲအံၤရၤမတံ၀့ၢ်ပူၤသုးကီၣ်ကးတၢ်မဲာ်ညါ၀ဲၤဒၢးႇကီၢ်ရ့ၣ်ႇကီၢ်ဆၣ်ႇပၢၤကီၢ်သုး၀ဲၤဒၢး(စရခ)၀ဲၤဒၢးႇပၢၤကီၢ်တၢ်ကစီၣ်ကရူၢ်ကရၢ၀ဲၤဒၢးတဖၣ်ဆီလီၤသးအိၣ်ဒံး၀ဲအဖၢမုၢ်အသိး၀့ၢ်ပူၤလီၢ်က၀ီၤဖိတဖၣ်အိၣ်ဆိးဟးထီၣ်ဟးလီၤအိၣ်ဒံး၀ဲအဖၢမုၢ်အဂ့ၢ်ရၤမတံ၀့ၢ်လီၢ်က၀ီၤဖိတဂၤစံး၀ဲန့ၣ်လီၤႉ
အ၀ဲစံး၀ဲလၢ “အခဲအံၤ(၂၇၅)ဒုအိၣ်ဘှ့ၣ်လံပတနၢ်ဟူတၢ်သီၣ်တၢ်သဲလၢၤဘၣ်ႉ၀့ၢ်ပူၤ(BGF)ဆှၣ်တၢ်၀း၀းလီၤႉဟးစိာ်၀ဲတၢ်စုက၀ဲၤဒီးလဲၤလၢအံၤလၢဘးမီၤနီၤႉ၀့ၢ်ပူၤက၀ီၤဒ့ဖိတဖၣ်ဒုဟးထီၣ်ဟးလီၤအိၣ်မီၤနီၤႉပလဲၤဟးလၢမဲၢ်ဆီးပူၤလၢတိၤနီၣ်ဂံၢ်(၁)တကပၤဒုန့ၣ်မီၤနီၤႉၦၤမၤတၢ်ဘူၣ်မၤတပွဲတၢ်အိၣ်ဒဒအဂ့ၢ်တဲပၠး၀ဲ၀့ၢ်ပူၤတၢ်အိၣ်သးတဖၣ်န့ၣ်လီၤႉ
ဒ်န့ၣ်အသိးႇတကီၢ်ခါခဲအံၤရၤမတံ၀့ၢ်ပူၤတၢ်အိၣ်သးဘှ့ၣ်ဘှီၣ်၀ဲဘၣ်ဆၣ်ဒ်တၢ်ကစီၣ်ရၤလီၤအသးလၢစိၤရှၢၣ်မံၤဒံၤယၢၣ်အဖီခိၣ်အသိးန့ၣ်ႇသုးကီၣ်ကးအံၤကိးထုးထီၣ်ကွံာ်၀ဲအ၀ဲၤကျိၤၦၤမၤတၢ်ဖိတဖၣ်ဒီးကဘီယူၤ၀ံၤအလီၢ်ခံတၢ်ကကးတံာ်ကွံာ်၀ဲနီၢ်ဂံၢ်(၁)တိၤအိၣ်၀ဲအမဲာ်ညါတၢ်ကဟဲတ့ၢ်လီၤ၀ဲမ့ၣ်ပိၢ်လၢ၀့ၢ်ပူၤတဖၣ်ရၤလီၤသးအိၣ်၀ဲအဂ့ၢ်ရၤမတံလီၢ်က၀ီၤဖိတဖၣ်စံး၀ဲန့ၣ်လီၤႉ
လါအ့ဖြ့ၣ် ၈ သီႇ ၂၀၂၄ နံၣ်ႇ ခ့ၣ်အဲးစံၣ်
ဖဲအပူၤကွံာ်လါအ့ဖြ့ၣ် ၄ သီအနံၤန့ၣ် လၢအမဲရကၤထံကီၢ်အပူၤ ဘီမုၢ်ဘံၣ်ဘၢကီၣ်ကးမၤ၀ဲတၢ်တၢၣ်ပီၣ်တဲသကိး ကီၢ်ပယီၤဂ့ၢ်၀ီဒီးလၢတၢ်တၢၣ်ပီၣ်တဲသကိးအပူၤန့ၣ် တၢ်ထီဒါ၀ဲတၢ်ဆါန့ၢ်ကဘီယူၤသိဆူသုးကီၣ်ကးအအိၣ်ဒီး လၢတၢ်အံၤအဖီခိၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဒီးဒီကလုာ်တၢ်ဃူတၢ်ဖိးကီၣ်ကး(NUCC) တူၢ်လိာ်သဂၢၢ်၀ဲဒၣ် န့ၣ်လီၤႉ
(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံအဆိကတၢၢ်တဘျီဖဲတၢ်မၤ၀ဲဒၣ်တၢ်တၢၣ်ပီၣ်တဲသကိးကီၢ်ပယီၤဂ့ၢ်၀ီ အခါန့ၣ် ဘံၣ်လၢကီၣ်ကးကရၢဖိထံကီၢ်(၄၇)ဘ့ၣ်တၢ်သးလီၤပလိာ်အိၣ်ထီၣ်၀ဲဒၣ်လၢကဒီၣ်တဲာ်ကွံာ် တၢ်ဆှၢန့ၢ်ကဘီယူၤသိဆူ သုးကီၣ်ကးအအိၣ်အံၤဒီးလၢတၢ်သ့ၣ်တဖၣ်အံၤအဖီခိၣ်န့ၣ်(KNU)ဒီး(NUCC)တူၢ်လိာ် သဂၢၢ်၀ဲဒၣ်န့ၣ်လီၤႉ
အပူၤကွံာ်တၢ်ဆါန့ၢ်ကဘီယူၤသိဆူသုးကီၣ်ကးအအိၣ်အံၤတဲ၀ဲလၢတမ့ၢ်တၢ်ဆါန့ၢ်ကျိချံၦာ်သၣ်ဘၣ်ဒီး ဘၣ်ဆၣ်ခဲအံၤ ဘံၣ်ဘၢကီၣ်ကးအနီၢ်ကစၢ်ဒၣ်၀ဲတတူၢ်လိာ်ထီဒါ၀ဲဒၣ်ဒီးတၢ်အံၤမ့ၢ်တၢ်လဲၤထီၣ်လဲၤထီလၢအဂ့ၤ အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပဒိၣ်စီၤကျၢၤစ့ စံး၀ဲလၢ“တၢ်တဘၣ်ဆါန့ၢ်သုးကီၣ်ကးအကဘီယူၤသိအံၤဘၣ်န့ၣ်မ့ၢ်တၢ်လၢအရ့ဒိၣ်တခါလီၤႉ ဘၣ်မနုၤအဃိလဲၣ်န့ၣ်သုးကီၣ်ကးအံၤပညိၣ်၀ဲဒၣ်ၦၤကမျၢၢ်ထံဖိကီၢ်ဖိလီၤႉအဃိလၢတၢ်သ့ၣ်တဖၣ်အံၤအဖီခိၣ်န့ၣ် အလီၢ်အိၣ်လၢထံဂုၤကီၢ်ဂၤတဖၣ်စ့ၢ်ကီးကဘၣ်တြီႇကဘၣ်ဟ့ၣ်၀ဲတၢ်ဆီၣ်သနံးလီၤႉဟီၣ်ခိၣ်ဒီဘ့ၣ်ဘီမုၢ်စၢဖှိၣ်ကရၢ အနီၢ်ကစၢ်ဒၣ်၀ဲထီဒါ၀ဲအံၤမ့ၢ်တၢ်လဲၤထီၣ်လဲၤထီလၢအဂ့ၤတခါလီၤ”အဂ့ၢ်န့ၣ် စံး၀ဲန့ၣ်လီၤႉ
လၢဘံၣ်ဘၢကီၣ်ကးအတၢ်ထီဒါအံၤအဖီခိၣ်န့ၣ်ဘၣ်ဃးတၢ်ကဆါန့ၢ်ကဘီယူၤသိဆူသုးကီၣ်ကးအအိၣ်တၢ်ဂ့ၢ်အံၤ ထံဂုၤကီၢ်ဂၤပဒိၣ်တဖၣ်အတၢ်လူၤပိာ်မၤထွဲ၀ဲအိၣ်ႇတအိၣ်န့ၣ်တၢ်တယးကွၢ်၀ဲကီဒီးဒ်န့ၣ်အသိးထံကီၢ်လၢအကွၢ်တၢ်လၢအ၀ဲသ့ၣ်မုၢ်ကျိိၤ၀ဲၤကွာ်အဂီၢ်ဒီးထံကီၢ်လၢအဟံးဃာ်ပၢၤဃာ်ၦၤဂ့ၢ်၀ီခွဲးယာ်ႇတၢ်မုာ်တၢ်ခုၣ်သ့ၣ်တဖၣ်အံၤ အတၢ်ထံၣ် ကလီၤဆီလိာ်အသးသ့၀ဲအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့...
လါအ့ဖြ့ၣ် ၇သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇရၤမတံ၀့ၢ်အပူၤႇတၢ်ဒုးတၢ်ယၤဆူၣ်၀ဲလၢကညီတၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်ဒီးသုးကီၣ်ကးအဘၢၣ်စၢၤအဃိသုးကီၣ်ကးမၤတဲာ်ကွံာ်လီတဲစိ(PhoneLine)တၢ်ဆဲးကျိးအကျိၤဒီး(;(Internet Line)အကျိၤတဖၣ်လၢရၤမတံ၀့ၢ်ပူၤအဂ့ၢ်ရၤမတံလီၢ်က၀ီၤဖိတဖၣ်စံး၀ဲန့ၣ်လီၤႉ
အပူၤကွံာ်လါအ့ဖြ့ၣ်(၅)သီအနံၤတၢ်ဒုးဆူၣ်၀ဲလၢခံခီခံကပၤအဘၢၣ်စၢၤ၀ံၤအလီၢ်ခံသုးကီၣ်ကးစးထီၣ်ပံးကွံာ်၀ဲလီတဲစိဒီးအ့ထၢၣ်နဲၣ်အကျိၤဖဲမဟါလါအ့ဖြ့ၣ်(၆)သီဂီၤခီအနံၤအခါဒီးတုၤလၢခဲအံၤဆဲးပံးဒံး၀ဲအဖၢမုၢ်လီၤအဂ့ၢ်ရၤမတံလီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ “လီတဲစိအလဲမတၤလဲပံးအသးလၢာ်လံႇပံးတၢ်အံၤန့ၣ်န့ၢ်ဖးယံာ်လံစးထီၣ်လၢမဟါဂီၤခီအခါလံႇအခဲအံၤအ၀ဲသ့ၣ်စးထီၣ်ပံးတၢ်အံၤန့ၣ််တမ့ၢ်ထဲရၤမတံ၀့ၢ်အပူၤဘၣ်ႇပံး၀ဲလၢကညီကီၢ်စဲၣ်အပူၤန့ၣ်တုၤလၢဖၣ်အၣ်သ့ၣ်မတၤသ့ၣ်တကပၤညါပၣ်ခဲလၢာ်လီၤႉဖဲမဂီၤန့ၣ်ယအိးထီၣ်ကွၢ်ပယီၤ(SIMCard)ဒံးအိးထီၣ်တန့ၢ်ဒံးဘၣ်ႇစးထီၣ်လၢမဟါန့ၣ်ပံး၀ဲခဲလၢာ်လီၤမီၤနီၤႉခဲအံၤပကိးလိာ်သးတန့ၢ်ဘၣ်အဃိန့ၣ်ၦၤလၢသ့ၣ်ညါလိာ်သးဟံၣ်တဖၣ်န့ၣ်တၢ်လိၣ်မ့အိၣ်လဲၤ၀ဲတုၤလၢဟံၣ်ဒဒအဂ့ၢ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါႇသုးကီၣ်ကးပံးကွံာ်လီတဲစိ(Internet) အကျိၤအဃိရၤမတံ၀့ၢ်ပူၤကမျၢၢ်လီၢ်က၀ီၤဖိလၢအိၣ်ဘူးဒီးကၠီၣ်တဲၣ်ကီၢ်ဆၢတနီၤသူ၀ဲယိၤကီၢ်(SIMCard)န့ၢ်ဘၣ်ဆၣ်(Internet)တဂ့ၤဒ်သိးလၢအပူၤကွံာ်ဘၣ်အိၣ်၀ဲအသိးတနီၤဟးဃုၦ့ၤသူက့ၤ၀ဲယိၤကီၢ်(SIMCard)တန့ၢ်လၢၤဘၣ်အိၣ်၀ဲအဂ့ၢ်လီၢ်က၀ီၤဖိလၢအသီတဂၤစံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ “ဖဲရၤမတံ၀့ၢ်ပူၤအံၤန့ၣ်ၦၤတနီၤသူ၀ဲလၢယိၤကီၢ်(Datc)အကးအိၣ်မီၤနီၤႉပယီၤအကးတန့ၢ်အဃိၦၤဃုၦ့ၤသူက့ၤလၢ(Datc)ကးမီၤႉအခဲအံၤၦၤၦ့ၤသူအါအဃိၦၤဟးဃုၦ့ၤမးတဘၣ်လၢၤဘၣ်ႉတၢ်လီၢ်တနီၤဒု(အလဲ)တဂ့ၤအါအါဘၣ်လဲထီၣ်ဖဲတတၢၣ်ခံတၢၣ်ဖိလီၤ’’အဂ့ၢ်စံး၀ဲဒၣ်န့ၣ်လီၤႉ
တကးဒံးဘၣ်ႇတကီၢ်ခါခဲအံၤခီဖျိကဘီယူၤဟဲတ့ၢ်လီၤမ့ၣ်ပိၢ်ဒီးမ့ၣ်အူအီၣ်ကွံာ်၀ဲလီတဲစိအကျိၤတဖၣ်အိၣ်၀ဲအဃိရၤမတံ၀့ၢ်ပူၤ(Mytel)(MPT)အကျိၤတဖၣ်တဲာ်ကွံာ်၀ဲဒီးလီၢ်က၀ီၤဖိတနီၤဘၣ်သူက့ၤ၀ဲလၢ(WIFI)အိၣ်၀ဲအဂ့ၢ်သ့ၣ်ညါဘၣ်ဒ်လီၢ်က၀ီၤဖိတဖၣ်စံး၀ဲအသိးန့ၣ်လီၤႉ
တကတီၢ်ဃီႇတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်၀ဲသုးကီၣ်ကး(သ့ၣ်ကါညံၤနီ)သုးကလၢၤ၀ံၤအလီၢ်ခံသုးကီၣ်ကးအၦၤခီၣ်ချ့သုးရ့ၣ်(ခလရ-၂၇၅)လၢအိၣ်ဆီလီၤအသးဖဲရၤမတံ၀့ၢ်ဃၢၤတဖၣ်အံၤတကီၢ်ခါအံၤအိၣ်ဘှ့ၣ်အိၣ်ဘှီၣ်၀ဲလံအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
လါအ့ဖြ့ၣ် ၆သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇရၤမတံ၀့ၢ်သ့ၣ်ဃးလီၤတီၢ်(သ့ၣ်ကါညီၤနီၤ)ဒုးယၤသုးကလၢၤတၢ်လီၢ်အပူၤပယီၤသုးခိၣ်နၢ်ဃုာ်ဒီးအၦၤဟံၣ်ဖိဃီဖိအဂၤ(၆၀၀)ဘျဲၣ်တူၢ်ဃၣ်သးပာ်က့ၤ၀ဲစုက၀ဲၤအဂ့ၢ်ခ့ၣ်အဲၣ်ယူၣ်ဘိးဘၣ်ရၤထုးထီၣ်ပာ်ဖျါ၀ဲဖဲတနံၤအံၤလါအ့ဖြ့ၣ်(၆)သီအနံၤန့ၣ်လီၤႉ
သ့ၣ်ဃးလီၤတီၢ်(သ့ၣ်ကါညံၤနီၣ်)သုးကီၣ်ကးဒုးယာ်သုးကလၢၤအံၤႇကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပာ်ဖှိၣ်ထီၣ်ဒုးမၤန့ၢ်ကွံာ်၀ဲဖဲမဟါလါအ့ဖြ့ၣ်(၅)သီမုၢ်ဃ့ၢ်လီၤ(၁)နၣ်ရံၣ်အဆၢကတီၢ်ဒီးသုးကလၢၤအပူၤသုးကီၣ်ကးခိၣ်နၢ်ဃုာ်ဒီးအဟံၣ်ဖိဃီဖိအဂၤ(၆၀၀)ဘျဲၣ်အံၤပာ်လီၤစုက၀ဲၤဟ့ၣ်ဃၣ်ကွံာ်၀ဲအသးအဂ့ၢ်ခ့ၣ်အဲၣ်ယူၣ်လံာ်ပာ်ဖျါအပူၤပာ်ဖျါ၀ဲန့ၣ်လီၤႉ
သုးကီၣ်ကးအၦၤ(၆၀၀)ဘျဲၣ်အကျါအံၤပၣ်ဃုာ်၀ဲသုးခိၣ်သုးနၢ်(၆၇)ဂၤဒီးသုးဖိ(၄၁၀)ပၢၤကီၢ်မုၣ်(၅၉)ဂၤဃုာ်ဒီးအဟံၣ်ဖိဃီဖိ(၈၁)ဂၤဒီးပာ်ဖှိၣ်ခဲလၢာ်အိၣ်၀ဲ(၆၁၇)ဂၤအဂ့ၢ်ခ့ၣ်အဲၣ်ယူၣ်ပာ်ဖျါစ့ၢ်ကီး၀ဲန့ၣ်လီၤႉ
တကးဒံးဘၣ်လၢတၢ်ထီၣ်မၤန့ၢ်၀ဲပယီၤသုး(သ့ၣ်ကါညံၤနီၣ်)အသုးကလၢၤဘျီ၀ဲအံၤန့ၣ်တၢ်ပၢၢ်ဆၢသုးပာ်ဖှိၣ်မၤန့ၢ်ဃုာ်၀ဲစုက၀ဲၤဒ်အမ့ၢ်ကျိဖိကျိဖးဒိၣ်(၁၂၂မၣ်မၣ်(၂)ခိၣ်(၁၂၀)(၂)ခိၣ်အိၣ်၀ဲအသိးမၤန့ၢ်စ့ၢ်ကီး၀ဲကျိချံၦာ်သးလၢအဂၤတဖၣ်အိၣ်၀ဲအါမးအဂ့ၢ်ပာ်ဖျါ၀ဲလၢလံာ်ပာ်ဖျါအပူၤန့ၣ်လီၤႉ
တကတီၢ်ဃီႇခီဖျိမုၢ်ထီၣ်ကလံၤထံးသုးကီၣ်ကးအဒုးယာ်ဂ့ၢ်၀ီပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(သ့ၣ်ကါညံၤနီၣ်)သ့ၣ်ဃးလီၤတီၢ်သုးကလၢၤအံၤအိၣ်ဆီလီၤအသးအဃိမၤဘၣ်ဒိဘၣ်ထံး၀ဲကညီကလုာ်ဒူၣ်ဃုာ်ဒီးကလုာ်ဒူၣ်ဖိလၢအိၣ်ဖဲဟီၣ်က၀ီၤတဖၣ်အံၤအမုၢ်ကျိၤ၀ဲၤကွာ်တၢ်ဖံးအီၣ်မၤအီၣ်ႇတၢ်ကူၣ်ဘၣ်ကူၣ်သ့ႇဒီးၦၤတ၀ၢတၢ်ရ့လိာ်မုာ်လိာ်တဖၣ်အဃိကညီဒီကလုာ်တၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပာ်ဖှိၣ်ထီၣ်ဒုးန့ၢ်ကွံာ်၀ဲအဂ့ၢ်ပာ်ဖျါ၀ဲန့ၣ်လီၤႉ
ဒ်န့ၣ်အသိးႇသုးကီၣ်ကးအ(သ့ၣ်ကါညံၤနီၣ်)သုးကလၢၤအံၤႇအိၣ်ဆီလီၤ၀ဲအသးဖဲ(၁၉၈၆)နံၣ်အခါလံၤလံၤဒီးခီဖျိသုးကလၢၤအံၤအိၣ်၀ဲအဃိမၤဘၣ်ဒိ၀ဲလုၢ်လၢ်ထူသနူတၢ်ဆဲးတၢ်လၤသ့ၣ်တဖၣ်အမဲာ်ညါလီၢ်က၀ီၤဖိတဖၣ်ဘၣ်အိၣ်ဆိး၀ဲလၢတၢ်ပျံၤတၢ်ဖုးအပူၤဒီးတဒိးန့ၢ်ဘၣ်၀ဲတၢ်အိၣ်မူတၢ်အိၣ်တၢ်ဆိးတၢ်ဘံၣ်တၢ်ဘၢဘၣ်အဂ့ၢ်ပာ်ဖျါ၀ဲဒၣ်န့ၣ်လီၤႉ
လါအ့ဖြ့ၣ် ၆သီႇ ၂၀၂၄နံၣ်ႇခ့ၣ်အဲးစံၣ်ႇ
ကီးတရံး၀့ၢ်အဃၢၤႇသုးကီၣ်ကးအၦၤသုးဖိလၢအိၣ်ဆီလီၤအသးဖဲလဲၤ၀ၣ်သုးကလၢၤတဖၣ်ဒီၣ်တဲာ်ဒွဲၣ်အူအီၣ်ကွံာ်၀ဲကမျၢၢ်လီၢ်က၀ီၤဖိအရီဘၢၣ်ထူၣ်(ကီၣ်)ထူၣ်လၢအဘူးဒီးအ၀ဲသ့ၣ်သုးကလၢၤတဖၣ်အဂ့ၢ်လီၢ်က၀ီၤဖိလၢတၢ်ဒွဲၣ်အူအီၣ်ကွံာ်အရီဘၢၣ်ထူၣ်တဖၣ်စံး၀ဲန့ၣ်လီၤႉ
ဖဲအပူၤကွံာ်လါမးရှးဘူးကလၢာ်အတီၢ်ပူၤသုးကီၣ်ကးလၢအိၣ်ဖဲအသုးကလၢၤသ့ၣ်တဖၣ်အံၤဒုးသ့ၣ်ညါဆဲးကျိးဆဲးကျၢ၀ဲရီဘၢၣ်(ကီၣ်)ကျီးကစၢ်တဖၣ်တၢ်ဂ့ၢ်တၢ်ကျိၤတအိၣ်နီတမံၤဘၣ်ဒီးသူ၀ဲစဲးကျီသ့ၣ်ဒီးဒွဲၣ်အူအီၣ်ကွံာ်၀ဲကမျၢၢ်လီၢ်က၀ီၤဖိတဖၣ်အရီဘၢၣ်ထူၣ်အဂ့ၢ်ယ့ၤလဲၤကိလီၢ်က၀ီၤဖိလၢအဘၣ်တၢ်ဒွဲၣ်အူအီၣ်ကွံာ်အရီဘၢၣ်ထူၣ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“မ့ၣ်အူအီၣ်တၢ်န့ၣ်စးထီၣ်ဟဲလီၤလၢအ၀ဲသ့ၣ်သုကလၢၤတၢ်လီၢ်လီၤႇ ပကလဲၤမၤပံာ်ကွံာ်မ့ၣ်အူတဘျီအ၀ဲသ့ၣ်ခးစိၦၤဒီးကျိအဃိန့ၣ်ဒ်သိးမ့ၣ်အူသုတဟဲတုၤလၢပအိၣ်ဒီးအူအီၣ်ကွံာ်ပဟံၣ်သ့ၣ်တဖၣ်ဘၣ်အဂီၢ်ပဘၣ်လဲၤဟံန့ၣ်စဲးထုးထီၣ်ထံလၢၦၢ်ပူၤဒီးမၤလီၤကယာ်ဆိမ့ၣ်အူမီၤႉအ၀ဲသ့ၣ်န့ၣ်ဒွဲၣ်အူအီၣ်ကွံာ်ရီဘၢၣ်အထူၣ်မးတကးဘၣ်ကျီတဲၣ်မၤဟးဂီၤ၀ဲစ့ၢ်ကီးမီၤႉအခဲအံၤပတယာ်ကွၢ်န့ၣ်တၢ်မၤဟးဂီၤပရီဘၢၣ်ထူၣ်န့ၣ်အိၣ်လံလၢအထူၣ်(၅၀၀)ဃၣ်ဃၣ်လံ”အဂ့ၢ်စံး၀ဲန့ၣ်လီၤႉ
တၢ်လီၢ်ဖဲသုးကီၣ်ကးအသုးကလၢၤအိၣ်ဆိးခိၣ်ဃၢၤန့ၣ်လီၢ်က၀ီၤဖိရီဘၢၣ်ကျီးကစၢ်တဖၣ်အိၣ်၀ဲ(၁၇)ဂၤဃၣ်ဃၣ်ဒီးရီဘၢၣ်ထူၣ်ခဲလၢာ်အိၣ်၀ဲ(၃၀၀၀၀)ဃၣ်ဃၣ်အံၤသုးကီၣ်ကးဒွဲၣ်အူအီၣ်ကွံာ်၀ဲအိၣ်လၢအထူၣ်(၁၀၀၀)လံအသိးမၤဟးဂီၤကျီတဲာ်ကွံာ်၀ဲဒီးစဲးအိၣ်၀ဲလၢအထူၣ်(၅၀၀)ဘျဲၣ်လံအဂ့ၢ်အ၀ဲစံးအါထီၣ်ကဒီး၀ဲဒၣ်န့ၣ်လီၤႉ
သုးကီၣ်ကးဒွဲၣ်အူအီၣ်ကျီတဲာ်၀ဲရီဘၢၣ်သ့ၣ်တဖၣ်ဒ်အံၤအဖီခိၣ်န့ၣ်လၢအ၀ဲသ့ၣ်တၢ်ဘံၣ်တၢ်အဂီၢ်မၤပျီမၤဆှဲ၀ဲအသုးကလၢၤတၢ်လီၢ်ဒ်သိးတၢ်ပၢၢ်ဆၢသုးပာ်ဖှိၣ်ကရူၢ်တဖၣ်ပာ်ခူသူၣ်သးထီၣ်ခး၀ဲအ၀ဲသ့ၣ်တန့ၢ်ညီညီတဂ့ၤအဂီၢ်အဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
ဘၣ်ဆၣ်သနာ်က့လီၢ်က၀ီၤဖိလၢတၢ်ဒွဲၣ်အူမၤဟးဂီၤကွံာ်အကျီးသ့ၣ်တဖၣ်အံၤတဒိးန့ၢ်ဘၣ်၀ဲတၢ်ဟ့ၣ်စ့အီၣ်လီးနီတမံၤဘၣ်အမဲာ်ညါရီဘၢၣ်ထူၣ်လၢတၢ်ကျီတဲာ်မၤဟးဂီၤကွံာ်၀ဲတဖၣ်အံၤသုးကီၣ်ကးမၢ၀ဲလီၢ်က၀ီၤဖိတဖၣ်လၢကလဲၤမၤပျီဟံကွံာ်၀ဲလၢ(၂)သီအတီၢ်ပူၤအိၣ်၀ဲအဂ့ၢ်လဲၣ်၀ၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်မ့တကျီတဲၣ်ပရီဘၢၣ်ထူၣ်ဘၣ်နါက့မ့ၣ်အူမ့လဲၤတုၤလၢပရီဘၢၣ်ကျီပူၤန့ၣ်ရီဘၢၣ်ထူၣ်သံလၢာ်လီၤႉမ့ၣ်အူမ့အီၣ်န့ၣ်ရီဘၢၣ်ထူၣ်တဖၣ်န့ၣ်အသိလၢာ်တဘျီသံလီၤႉအခဲအံၤတဟ့ၣ်ၦၤစ့အီၣ်လီးနီတမံၤဘၣ်ႉတဲ၀ဲလၢမ့အဲၣ်ဒိးန့ၢ်က့ၤတၢ်ထူၣ်န့ၣ်မၢ၀ဲပလဲၤထုးန့ၢ်က့ၤလၢ(၂)သီအတီၢ်ပူၤမီၤ”အဂ့ၢ်စံးဘၣ်ခ့ၣ်အဲးစံၣ်တၢ်ကစီၣ်န့ၣ်လီၤႉ
တကီၢ်ခါခဲအံၤရီဘၢၣ်ကျီးကစၢ်လၢတၢ်မၤဟးဂီၤကွံာ်အရီဘၢၣ်တဖၣ်အိၣ်၀ဲ(၄)ဂၤလံဒီးရီဘၢၣ်ထူၣ်လၢအိၣ်တ့ၢ်တဖၣ်စ့ၢ်ကီးသုးကီၣ်ကးကရှဲလဲမၤဟးဂီၤကွံာ်၀ဲအိၣ်၀ဲအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ
တကတီၢ်ဃီခီဖျိတၢ်ဒုးတၢ်ယၤအဃိရီဘၢၣ်ကျီးကစၢ်တနီၤဘၣ်ဃ့ၢ်အိၣ်ကဒု၀ဲအသးအသိးတနီၤအဟံၣ်အူအီၣ်ကွံာ်၀ဲအိၣ်အမဲာ်ညါတကီၢ်ခါခဲအံၤစ့ၢ်ကီးတၢ်ဒွဲၣ်အူကျီတဲာ်ကွံာ်၀ဲအရီဘၢၣ်ကျီးတဖၣ်အိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ
ကီးတရံးလဲၣ်၀ၣ်သုးကီၣ်ကးအသုးကလၢၤအပူၤသုးကီၣ်ကးအသုးတြိၤ(၂၂)အစုတီၤဖီလာ်အၦၤဒီးဒုးယာ်ဂ့ၢ်၀ီပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်-စကခ(၁၂)စုတီၤဖီလာ်သုးဖိတဖၣ်ပာ်ဖှိၣ်သးအိၣ်ဆိး၀ဲဒီးပယီၤသုးတဖၣ်အံၤမ့ၢ်၀ဲကရူၢ်ကရၢလၢခးလီၤကျိဖးဒိၣ်ဆူကမျၢၢ်အိၣ်ဆိးဒူသ၀ီတဖၣ်အပူၤအဂ့ၢ်သ့ၣ်ညါဘၣ်န့ၣ်လီၤႉ
လါအ့ဖြ့ၣ် ၅ သီႇ ၂၀၂၄ နံၣ်ႇ ခ့ၣ်အဲးစံၣ်
မ့တုၤဃီၤလၢကၠိပံးတၢ်ကိၢ်ခါလါမးရှးဒီးလါအ့ဖြ့ၣ်အဆၢကတီၢ်လံန့ၣ် လၢၦၤကၠိဖိ ဖိဒံဖိသၣ်ဒီး သူၣ်ဘီၣ်သးစၢ် သ့ၣ်တဖၣ်အဂီၢ် ကီၢ်ပူၤကီၢ်ချၢႇထံဆၢကီၢ်ဆၢ လီၢ်က၀ီၤၦၤဘၣ်မူဘၣ်ဒါကၠိၦၤဘၣ်မူဘၣ်ဒါတဖၣ် ညီနုၢ်န့ၣ် အိးထီၣ်န့ၢ်၀ဲ တၢ်ကိၢ်ခါတၢ်မၤလိအံၤလၢတၢ်လီၢ်သကုၤဆးဒးအပူၤန့ၣ်လီၤႉ
ဒ်န့ၣ်အသိးလၢၦၤအိးထီၣ်တၢ်ကိၢ်ခါတၢ်မၤလိတဖၣ်အကျါအံၤန့ၣ်ခီကီၢ်ဆၣ်သူလ့ၤကၠိအံၤစ့ၢ်ကီးတီခိၣ်ရိၣ်မဲအိးထီၣ်၀ဲဒၣ်တၢ်ကိၢ်ခါတၢ်မၤလိလၢၦၤဖိဒံဖိသၣ် သ့ၣ်တဖၣ် အဂီၢ်အိၣ်၀ဲကိးမုၢ်နံၣ်ဒဲးန့ၣ်လီၤႉ
မုၢ်ဆ့ၣ်ထီၣ်တချုးလၢတၢ်မၤလိစးထီၣ်ဒံးဘၣ်အခါန့ၣ် လၢဂီၤခီ ၈း၀၀ နၣ်ရံၣ်န့ၣ် ပထံၣ်ဘၣ်လၢဖိဒံဖိသၣ် ၦၤကၠိဖိသူၣ်ဘီၣ်သးစၢ်တဖၣ်ဟဲထုးဖှိၣ်အသးလၢ(hall)ခါအပူၤဒီးဖိဒံဖိသၣ်တဖၣ်အံၤ ဖဲအ၀ဲသ့ၣ်ထံၣ်လိာ်သး တဂၤဒီးတဂၤအခါန့ၣ်တဲသကိးတၢ်ၦဲၤဒီးတၢ်နံၤတၢ်အ့တၢ်သူၣ်ဖှံသးညီန့ၣ်လီၤႉ
ဖဲၦၤကၠိဖိႇဖိဒံဖိသၣ်သူၣ်ဘီၣ်သးစၢ်တဖၣ်ထုးဖှိၣ်သးလၢာ်(၈း၃၀)ဘၣ်လံန့ၣ်ဒၢလွဲဖိသီၣ်ထီၣ်၀ဲကျ့ကျ့ကျ့လံဘျီန့ၣ် ဖိဒံဖိသၣ်တဖၣ်တဂၤလၢတၢ်ပာ်လီၤန့ၢ်ဃာ်အလီၢ်ဒၣ်၀ဲန့ၣ်အ၀ဲသ့ၣ်ဟဲက့ၤဆ့ၣ်နီၤဖှိၣ်၀ဲဒၣ်တဂၤအကရူၢ်ဒၣ်၀ဲလၢအလီၢ်န့ၣ်လီၤႉ
ဒီတနံၤအတီၢ်ပူၤတချုးလၢကရူၢ်တဖၣ်က့ၤလၢအကစၢ်လီၢ်ကျဲဒံးဘၣ်ဖဲ(၈း၃၀)အဆၢကတီၢ် ဖိဒံဖိသၣ်ႇ ၦၤကၠိဖိသ့ၣ်တဖၣ်ထုးဖှိၣ်လၢ(hall)ဒၢးပူၤလၢာ်လံတဘျီန့ၣ်သရၣ်၊မုၣ်တဖၣ်စးထီၣ်၀ဲဂီၤခီတၢ်ဘါဒီးတၢ်ဘါအဆၢကတီၢ်နကနၢ်ဟူဘၣ်ဃုာ်၀ဲဒီးကစၢ်ယွၤအတၢ်သူၣ်၀ံၣ်သးဆၢလၢအမုာ်တဖၣ်န့ၣ်လီၤႉ
ကိးမုၢ်နံၤဒဲးဂီၤခီတၢ်ဘါ၀ံၤလီၢ်ခံ(၉း၀၀)ဘျီန့ၣ်ၦၤကၠိဖိႇဖိဒံဖိသၣ်သ့ၣ်တဖၣ်အံၤနီၤဖးလီၤသးက့ၤကဒါ၀ဲလၢတဂၤ လၢ အကစၢ်လီၢ်ကစၢ်ကျဲဒီးတၢ်စးထီၣ်မၤလိက့ၤ၀ဲတၢ်ဖံးလိမၤဒိးလၢတၢ်ပာ်လီၤဃာ်၀ဲသ့ၣ်တဖၣ်အံၤန့ၣ်လီၤႉ
ဖိဒံဖိသၣ်လၢအဟဲထီၣ်တၢ်မၤလိသ့ၣ်တဖၣ်အံၤပထံၣ်ဘၣ်လၢအမဲာ်သၣ်န့ၣ်ၦဲၤ၀ဲဒီးတၢ်သူၣ်ဆူၣ်သးဂဲၤတၢ်သူၣ်ဖှံသးညီန့ၣ်လီၤႉလၢတၢ်န့ၣ်အဃိဘၣ်ဃးတၢ်အိးထီၣ်တၢ်ကိၢ်ခါတၢ်မၤလိဘျီ၀ဲအံၤအတၢ်ပညိၣ်မ့ၢ်မနုၤလဲၣ်န့ၣ်ပလဲၤထံၣ် လိာ်သံကွၢ်၀ဲတၢ်မၤလိဘျီ၀ဲအံၤၦၤဘၣ်မူဘၣ်ဒါတဂၤလၢအမ့ၢ် သရၣ်မုၣ် တီနီၢ်ဖီ ဒီးအ၀ဲစံးဘၣ်ၦၤဒ်အံၤန့ၣ်လီၤႉ
“ပအိးထီၣ်တၢ်ကိၢ်ခါတၢ်မၤလိအံၤဒ်သိးဖိသၣ်တဖၣ်ကၠိပံးအဆၢကတီၢ်န့ၣ်အ၀ဲသ့ၣ်သုတအိၣ်ခီလီလီတဂ့ၤအဂီၢ်မီၤႉဒ်သိးအ၀ဲသ့ၣ်ကမၤလိဘၣ်၀ဲတၢ်တခါခါမ့၀ံၤဖိသၣ်လၢအဆံးတဖၣ်န့ၣ်ဒ်သိးကအိၣ်ဒီးတၢ်ရ့လိာ်မုာ်လိာ်လၢကဒဲကဒဲအဘၢၣ်စၢၤႉဘျီဒုပအဲၣ်ဒိးလၢအ၀ဲသ့ၣ်ကသ့၀ဲတၢ်သ့တၤလၣ်လၢအမ့ၢ်တၢ်ဒ့တၢ်အူမီၤနီၤႉတနီၤနီၤန့ၣ်အ၀ဲသ့ၣ်ဒ့ပာ်တယီသ့ၣ်တဖၣ်သ့အဃိဖဲတၢ်ကိၢ်ခါတၢ်မၤလိအဆၢကတီၢ်န့ၣ်ဒ်သိးအ၀ဲသ့ၣ်ကသ့အါထီၣ်ဘၣ်၀ဲအဂီၢ်လီၤမီၤနီၤ”...
လါအ့ဖြ့ၣ် ၄ သီႇ ၂၀၂၄ နံၣ်ႇ ခ့ၣ်အဲးစံၣ်
ကညီကီၢ်စဲၣ်-ကီးတရံး၀့ၢ်ဟီၣ်က၀ီၤအပူၤဖဲတနံၤအံၤဂီၤခီ(၈)နၣ်ရံၣ်ဃၣ်ဃၣ်အဆၢကတီၢ်ကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်တဖၣ်နုာ်လီၤဟူးဂဲၤခး၀ဲပယီၤသုးကီၣ်ကးခီၣ်သုးရ့ၣ်(၉၇)သုးကလၢၤအဂ့ၢ်သ့ၣ်ညါလၢဂံၢ်ခီၣ်ထံးသုးဂ့ၢ်၀ီတၢ်ကစီၣ်အအိၣ်န့ၣ်လီၤႉ
လၢတၢ်လဲၤထီၣ်ခး၀ဲကီးတရံးသုးကီၣ်ကးခီၣ်သုးရ့ၣ်(ခလရ-၉၇)သုးကလၢၤဘျီ၀ဲအံၤန့ၣ်သုးကီၣ်ကးတ ကပၤသံတၢ်ဘၣ်ဒိဘၣ်ထံးအိၣ်၀ဲအသိးတၢ်ဖီၣ်ချုးန့ၢ်၀ဲအိၣ်၀ဲအဂ့ၢ်တၢ်ပၢၢ်ဆၢသုးဖိလၢအိၣ်တၢ်မဲာ်ညါတဂၤစံး၀ဲဒ်အံန့ၣ်လီၤႉ
“ဖဲတနံၤအံၤဂီၤခီအဆၢကတီၢ်န့ၣ်တၢ်လဲၤထီၣ်ခး၀ဲ(၉၇)သုးကလၢၤအံၤန့ၣ်သုးကီၣ်ကးတကပၤသံဘၣ် ဒိဘၣ်ထံးအိၣ်၀ဲမီၤနီၤႉ နၣ်ဟူဘၣ်လၢတၢ်ဖီၣ်မူန့ၢ်၀ဲစ့ၢ်ကီးအိၣ်၀ဲလီၤႉ တသ့ၣ်ညါလီၤတံၢ်လီၤဆဲးဒံးဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်နၣ်လီၤႉ
ဒ်န့ၣ်အသိးခီဖျိတၢ်လဲၤထီၣ်ခး၀ဲသုးကီၣ်ကးအစုတီၤဖီလာ်ခီၣ်သုးရ့ၣ်(ခလရ-၉၇)သုးကလၢၤ၀ဲအံၤ အဖီခိၣ်သုးကီၣ်ကးတကပၤခးလီၤကဒါက့ၤ၀ဲကျိဖးဒိၣ်တပယူာ်ဃီအဃိဘၣ်အူအီၣ်ဟးဂီၤကဒီးကွံာ်၀ဲကီးတရံးက၀ီၤဒ့နီၣ်ဂံၢ်(၂)(၀့ကၠံ)ၦၤဃ့ၢ်မှံဟးဖျိးသ့ၣ်တဖၣ်အဟံၣ်အဃီသ့ၣ်တဖၣ်အဂ့ၢ်ကီၣ်တရံးလီၢ်က၀ီၤဖိတဂၤစံး၀ဲန့ၣ်လီၤႉ
၀့ၢ်လီၢ်က၀ီၤဖိလၢဘၣ်ဃ့ၢ်တဂၤစံး၀ဲလၢ “တၢ်လဲၤခး၀ဲ(၉၇)သုးကလၢၤန့ၣ်အ၀ဲသ့ၣ်ခးလီၤကဒါက့ၤ၀ဲကျိဖးဒိၣ်တ ပယူာ်ဃီလီၤႉ မ့ၢ်လၢကျိဖးဒိၣ်လီၤတဲာ်ပိၢ်ဖးထီၣ်အဃိလၢ(၀့ကၠံ)တကပၤဟံၣ်အူအီၣ်၀ဲမီၤနီၤႉ ၦၤကညီတအိၣ်ဘၣ်အဃိၦၤကမၤပတုၤ၀ဲမ့ၣ်အူစ့ၢ်ကီးတအိၣ်ဘၣ်ႉ ပ၀ဲနါက့ပလဲၤတဘူးဘၣ်ႉ ဘၣ်ကွၢ်စိလၢအယံာ်လီၤမီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ကီးတရံး၀့ၢ်ဟီၣ်က၀ီၤအပူၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ၀ဲတၢ်ပၢၢ်ဆၢသုးပာ်ဖှိၣ်ကရူၢ်သ့ၣ်တဖၣ်နုာ်လီၤခး၀ဲပယီၤသုးကီၣ်ကးတၢ်လီၢ်တၢ်ကျဲသ့ၣ်တဖၣ်အံၤအိၣ်၀ဲခဲအံၤခဲအံၤအသိးဖဲလၢတၢ်မ့ၢ်လဲၤခးအ၀ဲသ့ၣ်တဘျီလၢ်လၢ်န့ၣ်သုးကီၣ်ကးတကပၤပညိၣ်ခးလီၤကဒါက့ၤ၀ဲကျိဖးဒိၣ်လိၤလိၤဆူ၀့ၢ်ပူၤအဃိဘၣ်အူအီၣ်ဟးဂီၤကွံာ်၀ဲၦၤဃ့ၢ်မှံဟးဖျိးအဟံၣ်အဃီအိၣ်၀ဲခဲအံၤခဲအံၤအဂ့ၢ်တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ
ဖဲတနံၣ်အံၤလါယနူၤအါရံၤ(၁)သီအခါလံၤလံၤခံခီခံကပၤတၢ်ဒုးသဟီၣ်ဆူၣ်၀ဲဒၣ်လၢကီးတရံး၀့ၢ်ဟီၣ်က၀ီၤအပူၤတုၤလၢခဲအံၤတစုအဃိဘၣ်အူအီၣ်ဟးဂီၤကွံာ်၀ဲကီးတရံး၀့ၢ်ဟီၣ်က၀ီၤက၀ီၤဒ့(၇)ဘ့ၣ်အပူၤက မျၢၢ်ဟံၣ်ဃီ(၃၀၀)ဖျၢၣ်ဃၣ်ဃၣ်လံအသိးတကီၢ်ခါခဲအံၤ၀့ၢ်အံၤကဲထီၣ်ဒ်၀့ၢ်ဟးဂီၤတဖျၢၣ်အသိးအဂ့ၢ်လီၢ်က၀ီၤဖိသ့ၣ်တဖၣ်စံး၀ဲန့ၣ်လီၤႉ
လါအ့ဖြ့ၣ် ၄သီႇ ၂၀၂၄နံၣ်ႇ ခ့ၣ်အဲးစံၣ်ႇ
လၢတၢ်မၤလီၤၦီၢ်ကွံာ်သုးကီၣ်ကးသနူဒီးကသူၣ်ထီၣ်က့ၤကီၢ်သူလ့ၤအဂီၢ်ႇကညီပိာ်မုၣ်ပိာ်မၢၤကိးဂၤဒဲးကပၣ်ဃုာ်မၤသကိးတၢ်တပူၤဃီဒီးကဆၢထၢၣ်ကဲထီၣ်ခၢၣ်စးလၢကညီတၢ်ပၢတၢ်ပြးအပူၤအဂ့ၢ်ႇ(KWO)ကညီပိာ်ကရၢဆီၣ်တခူစံး၀ဲဖဲတလါအံၤလါအ့ဖြ့ၣ်(၅)သီႇလၢကလီၤဘၣ်၀ဲကညီပိာ်မုၣ်ကရၢမုၢ်နံၤဆဲးဆၢၦဲထီၣ်(၃၉)၀ီတ၀ီလံာ်ဟ့ၣ်ယုၢ်အပူၤန့ၣ်လီၤႉ
ကသူၣ်ထီၣ်က့ၤကီၢ်သူလ့ၤထံကီၢ်အဂီၢ်ႇကတီၢ်ခဲအံၤအရ့ဒိၣ်၀ဲလၢကညီပိာ်မုၣ်တဖၣ်ကပၣ်ဃုာ်မၤသကိးတၢ်အဃိကွဲမုာ်၀ဲကညီပိာ်မုၣ်တဖၣ်ခဲလၢာ်လၢကနုာ်လီၤပၣ်ဃုာ်လၢလၢထံရူၢ်ကီၢ်သဲးတၢ်ဖံးတၢ်မၤပူၤအဂ့ၢ် (KWO)ကညီပိာ်မုၣ်ကရၢအၦၤနဲၣ်တၢ်သရၣ်မုၣ်နီၢ်ကညီဖီစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပအဲၣ်ဒိးကွဲမုာ်၀ဲဒၣ်ကညီပိာ်မုၣ်ကိးဂၤဒဲးလၢဆၢကတီၢ်နၣ်ရံၣ်၀ဲအံၤန့ၣ်မ့ၢ်တၢ်လၢအရ့ဒိၣ်ႇလၢတၢ်က့ၤသူၣ်ထီၣ်ကဒါက့ၤကီၢ်သူလ့ၤမ့ၢ်ဂံၤတၢ်ဒုးလီၤၦီၢ်ကွံာ်သုးမီၤစိရိၤအတၢ်ဖံးတၢ်မၤအဖီခိၣ်မ့ၢ်ဂ့ၤန့ၣ်ပအဲၣ်ဒိးကွဲမုာ်၀ဲကညီပိာ်မုၣ်တဖၣ်ကိးဂၤဒဲးလၢကနုာ်လီၤပၣ်ဃုာ်၀ဲဒၣ်လၢထံရူၢ်ကီၢ်သဲးအပူၤႇလၢတၢ်ဆီတလဲကအိၣ်ထီၣ်၀ဲအံၤန့ၣ်ပကပၣ်ဃုာ်မၤသကိးတၢ်ဃူဃူႇဘၣ်မနုၤအဃိလဲၣ်န့ၣ်ပ၀ဲပဃ့ထီၣ်၀ဲလၢ(၃၀)မျးကယၤပိာ်မုၣ်တၢ်ပၣ်ဃုာ်မၤသကိးတၢ်န့ၣ််ႇတမ့ၢ်ထဲကညီပိာ်မုၣ်ကရၢကဘၣ်ပၣ်ဘၣ်မ့ၢ်၀ဲလၢကညီပိာ်မုၣ်တဖၣ်ခဲလၢာ်အမူအဒါအိၣ်လၢကဘၣ်ပၣ်ဃုာ်ပၣ်ဂီၢ်လီၤမီၤႉဒီးလီၤဆီဒၣ်တၢ်ခဲခဲအံၤန့ၣ်ႇတၢ်ကဒုးအိၣ်ထီၣ်၀ဲဒၣ်တၢ်ဘၢၣ်စၢၤပဒိၣ်တဖၣ်လၢကညီကီၢ်စဲၣ်ပူၤမ့ၢ်ဂ့ၤလၢကီၢ်သူလ့ၤအကိပူၤမ့ၢ်ဂ့ၤအဃိန့ၣ်ပအဲၣ်ဒိးလၢကညီပိာ်မုၣ်တဖၣ်န့ၣ်ကပၣ်ဃုာ်ပၣ်ဂီၢ်၀ဲလၢထံရူၢ်ကီၢ်သဲးအကိပူၤႉ”အဂ့ၢ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါကညီပိာ်မုၣ်ကရၢအံၤနာ်၀ဲလၢပိာ်မုၣ်တဖၣ်အိၣ်ဒီးတၢ်ခွဲးတၢ်ယာ်လၢတၢ်ကဲထီၣ်ခၢၣ်စးဆူထံရူၢ်ကီၢ်သဲးၦၤတ၀ၢအပူၤအသိးနာ်၀ဲလၢၦၤတ၀ၢခဲလၢာ်အတၢ်အိၣ်သးကဂ့ၤဒိၣ်ထီၣ်၀ဲလၢပိာ်မုၣ်တဖၣ်အတၢ်ဟူးတၢ်ဂဲၤတၢ်ပၣ်ဃုာ်ပၣ်ဂီၢ်လၢတၢ်တုၤသိးထဲသိးဒီးပိာ်ခွါဒီးတၢ်မၤတၢ်ဆၢတဲာ်တၢ်တဖၣ်အပူၤအဂ့ၢ်ပာ်ဖျါ၀ဲလၢလံာ်ဟ့ၣ်ယုၢ်အပူၤန့ၣ်လီၤႉ
တကးဒံးဘၣ်အပူၤကွံာ်(၃)နံၣ်အတီၢ်ပူၤကညီပိာ်မုၣ်ကရၢမၤစၢၤ၀ဲဂ့ၢ်ဂီၢ်အူၦၤလီၢ်အိၣ်ကမှံဖိဒီးၦၤဘၣ်ဃ့ၢ်တၢ်ဒုးတၢ်ယၤဂီၢ်မုၢ်ဂီၢ်ပၤအိၣ်၀ဲအသိးတနံၣ်အံၤလၢတၢ်မၤလၤကပီၤ၀ဲကညီပိာ်မုၣ်ကရၢ(၃၉)၀ီတ၀ီအမုၢ်နံၤဆဲးဆၢအပူၤႇအၢၣ်လီၤ၀ဲအသးလၢကဟ့ၣ်လီၤသးမၤတၢ်ဒ်ကညီပိာ်မုၣ်ကရၢတၢ်ပာ်လုၢ်ပာ်ၦၤ့ဒီးတၢ်သိၣ်တၢ်သီအခိၣ်သ့ၣ်ဒ်အမ့ၢ်တၢ်ထဲသိးတုၤသိးႇတၢ်ဟ့ၣ်စိဟ့ၣ်ကမီၤသ့ၣ်တဖၣ်ဒီးနာ်၀ဲလၢကညီပိာ်မုၣ်ကိးဂၤကဟဲစိာ်န့ၢ်တၢ်ဆီတလဲအဂ့ၤလၢၦၤတ၀ၢအဂီၢ်အဂ့ၢ်ပာ်ဖျါ၀ဲလံာ်ဟ့ၣ်ယုၢ်အပူၤစ့ၢ်ကီးန့ၣ်လီၤႉ
တကတီၢ်ဃီႇတနံၣ်အံၤလၢတၢ်မၤလၤကပီၤ၀ဲကညီပိာ်မုၣ်ကရၢမုၢ်နံၤအပူၤတၢ်တၤတၢ်တဖၣ်အိၣ်၀ဲ၀းတရံးအသိးဒီးကီၢ်သူလ့ၤအပူၤကမျၢၢ်ဘၣ်တူၢ်ဘၣ်တၢ်နးတၢ်ဖှီၣ်အိၣ်၀ဲအဖီခိၣ်တၢ်သအုးသၦီၤမ့ၢ်အိၣ်၀ဲဒိၣ်ဒိၣ်မုၢ်မုၢ်ဒၣ်လဲာ်ဘၣ်ဆၣ်ကညီပိာ်မုၣ်ကရၢဖီၣ်လိာ်စုမၤသကိးတၢ်ဒီးလီၢ်က၀ီၤကရူၢ်ကရၢလၢတၢ်မၤစၢၤလိာ်သးယၢ်ခီယၢ်ခီအဂ့ၢ်ပာ်ဖျါ၀ဲစ့ၢ်ကီးန့ၣ်လီၤႉ
ကညီပိာ်မုၣ်ကရၢအံၤဘၣ်တၢ်ဒုးအိၣ်ထီၣ်အီၤ၀ဲ(၁၉၄၉)နံၣ်ဒီးခီဖျိတၢ်အိၣ်သးတဂၢၤတကျၢၤဘၣ်အဃိတၢ်ဟူးတၢ်ဂဲၤတဖၣ်လီၤပအၣ်ကွံာ်၀ဲ၀ံၤအလီၢ်ခံဖဲ(၁၉၈၅)နံၣ်အပူၤန့ၣ်တၢ်က့ၤဒုးမူထီၣ်ကဒါက့ၤ၀ဲအသီတဘျီန့ၣ်လီၤႉ
ဒ်န့ၣ်အသိးႇစးထီၣ်လၢတၢ်ဒုးအိၣ်ထီၣ်ကညီပိာ်မုၣ်ကရၢအံၤအခါလံၤလံၤန့ၣ်ႇကညီပိာ်မုၣ်ကရၢအံၤဟူးဂဲၤ၀ဲလၢတၢ်ဆီၣ်ထွဲမၤစၢၤတၢ်ခွဲးတၢ်ယာ်ႇတၢ်အိၣ်မုာ်ဆိးပၢၤႇတၢ်မၤတၢ်လၢကညီပိာ်မုၣ်ကရၢအသုးသ့ၣ်လၤကပီၤအဂီၢ်တၢ်ကတိၤန့ၣ်ခဲးတၢ်လၢမုၣ်ခွါတၢ်ထဲသိးတုၤသိးဒီးမၤစၢၤ၀ဲတၢ်လၢ၀ဲၤကျိၤလွံၢ်ဘိအဖီလာ်ဒ်အမ့ၢ်တၢ်ကရၢကရိတၢ်ဟ့ၣ်တၢ်သ့ၣ်ညါနၢ်ပၢၢ်တၢ်ကူၣ်ဘၣ်ကူၣ်သ့တၢ်အိၣ်ဆူၣ်အိၣ်ချ့ဒီးၦၤဂ့ၢ်၀ီတဖၣ်အိၣ်၀ဲအသိးကညီပိာ်မုၣ်ကရၢခိၣ်နၢ်ဃုာ်ဒီးၦၤမၤတၢ်ဖိအဂၤ(၁၀၀၀)ဘျဲၣ်အံၤမၤတၢ်ၦဲၤဆၢၦဲၤကတီၢ်လၢကမၤဂ့ၤထီၣ်တၢ်ဘၣ်ဘျူးဘၣ်ဖှိၣ်လၢၦၤတ၀ၢတဖၣ်အတၢ်အိၣ်မူအဂီၢ်ဒီးဆိကမိၣ်၀ဲထဲလၢၦၤတ၀ၢတၢ်အိၣ်မုာ်အိၣ်ပၢၤလၢအသးပူၤထီဘိလီၤအဂ့ၢ်ပာ်ဖျါ၀ဲလၢလံာ်ဟ့ၣ်ယုၢ်အပူၤန့ၣ်လီၤႉ
လါအ့ဖြ့ၣ် ၄ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကီးတရံးကီၢ်ဆၣ် မၠၣ်၀တံၣ်၀့ၢ်ပူၤ ဖဲမဟါလါအ့ဖြ့ၣ် ၃ သီ မုၢ်နၤခီအဆၢကတီၢ်န့ၣ် တၢ်ဟဲတ့ၢ်လီၤ၀ဲဒြိမ့ၣ်ပိၢ်လၢပယီၤသုး(ခလရ-၂၇၅)သုးရ့ၣ်တၢ်လီၢ်၀ံၤ ကဘီယူၤဟဲခးလီၤကဒါတၢ်အဂ့ၢ်န့ၣ် မၠၣ်၀တံၣ်ကမျၢၢ်တဖၣ် စံး၀ဲန့ၣ်လီၤႉ
ဖဲမဟါမုၢ်နၤခီအဆၢကတီၢ်န့ၣ် ပယီၤသုး(ခလရ-၂၇၅)သုးရ့ၣ်လၢအိၣ်မၠၣ်၀တံၣ်၀့ၢ်ပူၤအံၤ တၢ်ဟဲတ့ၢ်လီၤ၀ဲဒြိမ့ၣ်ပိၢ် ကအိၣ်လၢခံဖျၢၣ်သၢဖျၢၣ်ညါဒီး ဖဲန့ၣ်၀ံၤလီၢ်ခံပယီၤသုးကဘီယူၤဟဲခးလီၤကဒါတၢ်လၢ တၢ်ကူၣ်လဲၤမၤကၤလီၢ် (ကုန်သွယ်ရေးဇုန်)တၢ်လီၢ်အလီၢ်ခံအခိၣ်အဃၢၤအဂ့ၢ်န့ၣ် မၠၣ်၀တံၣ်ကမျၢၢ်လၢတအဲၣ်ဒိး ပာ်ဖျါအမံၤတဂၤ စံး၀ဲန့ၣ်လီၤႉ
အ၀ဲစံး၀ဲလၢ“ဖဲမဟါ(၂၇၅)သုးရ့ၣ်တၢ်လီၢ်န့ၣ်ၦၤဟဲကွံာ်လီၤဒြိမ့ၣ်ပိၢ်ကအိၣ်လၢခံဖျၢၣ်သၢဖျၢၣ်ညါႉၦၤတၢ်ပၢၢ်ဆၢဟဲခးအ၀ဲသ့ၣ်၀ံၤဘျီကဘီယူၤဟဲခးလီၤက့ၤတၢ်လၢ(ကုန်သွယ်ရေးဇုန်)အခိၣ်အဃၢၤလီၢ်ခံဖဲန့ၣ်တဲ၀ဲႉၦၤတဲကဘီယူၤဟဲခးလီၤတၢ်ဒီတနၤကျၢၤညါႉဖဲမဟါကဘီယူၤဟဲခးလီၤတၢ်န့ၣ်ကဆိမိၣ်၀ဲလၢၦၤတၢ်ချၢတကျးန့ၣ်ကအိၣ်လၢ တၢ်ချၢတကပၤႇ လၢ၀့ၢ်ပူၤန့ၣ်တအိၣ်ဘၣ်ဒ်န့ၣ်ဧါသၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ(၂၇၅)သုးရ့ၣ်လၢတၢ်ဟဲခး၀ဲအံၤခီဖျိအိၣ်ဘူးကးတံၢ်ဒီးမၠၣ်၀တံၣ်အဃိတကီၢ်ခါခဲအံၤ ၦၤကမျၢၢ်လၢအိၣ်၀့ၢ်ပူၤတဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် မၠၣ်၀တံၣ်ကမျၢၢ်တဂၤဃီ၀ဲန့ၣ် စံးအါထီၣ်၀ဲဒ်အံၤ န့ၣ်လီၤႉ
“၂၇၅ န့ၣ်ၦၤကခးအီၤန့ၣ် ၦၤမၠၣ်၀တံၣ်ဖိဘၣ်ကိၢ်တၢ်ဒိၣ်မးလီၤႉဘၣ်မနုၤအဃိလဲၣ်န့ၣ်တၢ်လၢ(၂၇၅)န့ၣ်အိၣ်ဘူးဒီး မၠၣ်၀တံၣ်ဘူးထီးတံၢ်လီၤမီၤနီၤႉပယီၤသုးရ့ၣ်တဘ့ၣ်အံၤအိၣ်တီတီဖဲမၠၣ်၀တံၣ်ဒီး(ကုန်သွယ်ရေးဇုန်)အခၢၣ်သးဒ်န့ၣ် မီၤ”အဂ့ၢ်န့ၣ် စံး၀ဲန့ၣ်လီၤႉ
ဘၣ်ဃးတၢ်လဲၤတ့ၢ်လီၤဒြိမ့ၣ်ပိၢ်လၢ(၂၇၅)သုးရ့ၣ်တၢ်လီၢ်အံၤမ့ၢ်ကရူၢ်ဖဲတဒူၣ်လဲၤတ့ၢ်လီၤ၀ဲဒၣ်လဲၣ်န့ၣ် ပခ့ၣ်အဲးစံၣ်-ကညီတၢ်ကစီၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်ဒီးဒ်သိးကသ့ၣ်ဘၣ်တၢ်ဂ့ၢ်အံၤလီၤတံၢ်...
လါအ့ဖြ့ၣ် ၄ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ကပၤ ပယီၤသုးလၢအကဟဲထီၣ်(စစ်ကူ)လၢ သ့ၣ်ကါညံၣ်နီၣ်တဖၣ်အံၤ ခီဖျိတၢ်ခိးအ၀ဲသ့ၣ်လၢကျဲပူၤအဃိ လၢ(၁၀)သီအတီၢ်ပူၤ သံ၀ဲဒၣ်(၂၀)ဂၤဒီး ဘၣ်ဒိဘၣ်ထံး ၀ဲဒၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါအ့ဖြ့ၣ် ၂ သီအနံၤန့ၣ်လီၤႉ
ပယီၤသုးအံၤလၢကဟဲထီၣ်မၤန့ၢ်ကဒါက့ၤမၠၣ်၀တံၣ် သ့ၣ်ကါညံၣ်နီၣ်(၃၅၅)သုးကလၢၤလၢတၢ်ပၢၢ်ဆၢသုးပာ်ဖှိၣ် ထီၣ်မၤန့ၢ်၀ဲအံၤအဂီၢ်န့ၣ် စးထီၣ်လါမးရှး ၁၅ သီ တုၤလၢ ၂၅ သီ လၢ(၁၀)သီအတီၢ်ပူၤ ခီဖျိပယီၤသုးလၢ အဟဲထီၣ်(စစ်ကူ)တဖၣ်အံၤ (KNLA)တၢ်ပၢၢ်ဆၢသုးပာ်ဖှိၣ်ခိးခးအ၀ဲသ့ၣ်လၢကျဲပူၤတၢ်ဒ့ၣ်စၢၤအဃိ ပယီၤသုးသံ ဘၣ်ဒိဘၣ်ထံးကဲထီၣ်အသးအါအါဂီၢ်ဂီၢ်ဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ
ဒ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲအသိးန့ၣ် ပယီၤသုးလၢအဟဲထီၣ်(စစ်ကူ)လၢတၢ်ပၢၢ်ဆၢသုးကရူၢ်ခိးခး၀ဲ သ့ၣ်တဖၣ်အံၤန့ၣ်မ့ၢ်၀ဲ(ခလရ-၉၇)သုးရ့ၣ်ႇ(ခမရ-၁၀၂),(၁၁၈),(၅၄၆)ဒီး(၃၅၆)သုးရ့ၣ်အၦၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢ(၁၀)သီအတီၢ်ပူၤဖဲတၢ်ဒုးကဲထီၣ်လၢခံခီခံကပၤအဘၢၣ်စၢၤအခါခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိကမျၢၢ်သံ(၁)ဂၤႇဘၣ်ဒိ၀ဲဒၣ်(၃)ဂၤဒီးၦၤကမျၢၢ်အဟံၣ်အဃီဟးဂူာ်ဟးဂီၤအိၣ်၀ဲဒၣ်တနီၤအဂ့ၢ်န့ၣ် လံာ်တၢ်ပာ်ဖျါ...