လါယူၤ ၂၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၂) တီအူကီၢ်ရ့ၣ် လ့ၣ်သိၤလီၢ်က၀ီၤဟီၣ်က၀ီၤအပူၤ တလါအံၤလါယူၤအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲ ကၠီၣ်လိကၠံပယီၤသုးကလၢၤ (၃)ဘျီအဂ့ၢ်န့ၣ် (သုးက့ ၂) သုးရ့ၣ် ၅ ထုးထီၣ်ပာ်ဖျါ၀ဲဖဲလါယူၤ ၂၂ သီအနံၤန့ၣ်လီၤႉ
ဖဲအပူၤကွံာ်လါယူၤ ၄ သီႇ ၁၂ သီ ဒီး ၂၀ သီအနံၤန့ၣ် KNLA(သုးက့ ၂)ႇ (သုးက့ ၅)သုးပာ်ဖှိၣ်တဖၣ် နုာ်လီၤခး၀ဲ ပယီၤသုးကလၢၤအံၤအဃိ ပယီၤသုးသံကအိၣ်လၢအဂၤ(၁၀)ဃၣ်ဃၣ်ညါဒီးဘၣ်ဒိ၀ဲနးနးကျံၤကျံၤ (၃)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါဖဲတၢ်ဒုးကဲထီၣ်အတီၢ်ပူၤ(၇)မဲၤပယီၤသုးကလၢၤႇထိဘိၤကၠံပယီၤသုးကလၢၤႇလ့ၣ်သိၤ၀့ၢ် နီၣ်ဂံၢ်(၆၀၃) ပယီၤသုးကလၢၤသ့ၣ်တဖၣ်အံၤခးလီၤစၢၤကျိဖးဒိၣ်အသိး ဖဲလါယူၤ...
လါယူၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကီးတရံးကလံၤစိး နိၣ်က့ၣ်သ၀ီကရူၢ်အပူၤ ဖဲမဟါလါယူၤ ၂၂ သီ ဟါခီအဆၢကတီၢ် ဖီၣ်စုက၀ဲၤလၢတၢ်သ့ၣ်ညါအီၤတဒူၣ် ဟဲခးသံ၀ဲ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သ၀ီသီသ၀ီဘံၣ်ဘၢခိၣ် စီၤဖါပယီၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
သ၀ီသီသ၀ီဘံၣ်ဘၢခိၣ် စီၤဖါပယီၤအံၤ ခ့ၣ်အဲၣ်ယူၣ်(သုးက့ ၇)စုတီၤဖီလာ် (၁၀၁)သုးရ့ၣ် တီၣ်ထီၣ်အီၤလၢ သ၀ီဘံၣ်ဘၢခိၣ်ဒီးဖဲမဟါဟါခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ဟဲခးသံအီၤကဲထီၣ်၀ံၤလီၢ်ခံ ကညီဒီကလုာ်ပၢၤကီၢ်သုး(KNPF)ၦၤဘၣ်မူဘၣ်ဒါဟဲကသံသမိး၀ဲတၢ်အဂ့ၢ်န့ၣ် သ၀ီဖိတဖၣ် စံး၀ဲန့ၣ်လီၤႉ
အ၀ဲစံး၀ဲလၢ“ကဘၣ်ဖဲဟါခီ ၈ နၣ်ရံၣ်န့ၣ် ၦၤဟဲခးအီၤန့ၣ်(၄)ဂၤ ဟဲခးအီၤ(၄)ထံၣ်ႉၦၤလဲၤထီၣ်ခးအီၤလၢအဟံၣ်ပူၤလီၤႉ အကဲ၀ဲဒၣ်(သ၀ီသီ)သ၀ီ ဘံၣ်ဘၢခိၣ် စီၤဖါပယီၤမီၤနီၤႉ ခဲအံၤ(KNPF)ကညီပၢၤကီၢ်ဟဲသမံသမိးတၢ်ႉ ဖဲသ၀ီပူၤအံၤ(BGF)ႇ(PDF)ႇ(DKBA)ဒီး(KNU)ဖီၣ်စုက၀ဲၤကရူၢ်အိၣ်ခဲလၢာ်လီၤအဃိမ့ၢ်ဖဲလဲၣ်တဒူၣ်ခးသံ၀ဲလဲၣ်ဒုပတဲတဘၣ်ဘၣ်ႉၦၤသမံသမိးအဖၢမုၢ်လီၤ”အဂ့ၢ်န့ၣ်...
လါယူၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် သၣ်တီၣ်ကၠံကီၢ်ဆၣ် ဒူသ၀ီတဖၣ်အပူၤဒီးလ့ၣ်သိၤလီၢ်က၀ီၤတကပၤန့ၣ် တၢ်ဒုးကဲထီၣ်၀ဲဒီး ခီဖျိဟီၣ်က၀ီၤတၢ်အိၣ်သးတဂ့ၤဒံးဘၣ်အဃိၦၤဖိဒံဖိသၣ်လၢအဃ့ၢ်တၢ်ဒုးတဖၣ်ကထီၣ်ဘၣ်ကၠိအဂီၢ် လိၣ်ဘၣ်၀ဲဒၣ်တၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်လၢဖိဒံဖိသၣ်မိပါအအိၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိဟီၣ်က၀ီၤပူၤတၢ်အိၣ်သးတဂ့ၤဘၣ်အဃိသုးမီၤစိရိၤပဒိၣ်စုတီၤဖီလာ်တီၤဖုၣ်ကၠိႇ တီၤထီကၠိလၢအိၣ်လ့ၣ်သိၤလီၢ်က၀ီၤဒီးသၤမိတီၤႇတီပၠၤကလ့ႇတီပၠၤကၠံႇ စံၤပ့ၤကၠံႇသပၠ့ၤညိၣ်သ၀ီပူၤသ့ၣ်တဖၣ်အံၤ အါဒၣ်တက့ၢ်န့ၣ်တၢ်ကီတၢ်ခဲအိၣ်လၢကက့ၤအိးထီၣ်ကဒါကၠိအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါခီဖျိလီၢ်က၀ီမကမျၢၢ်သ့ၣ်တဖၣ်ဘၣ်ဟးဃ့ၢ်အဃိအ၀ဲသ့ၣ်တဖံးအီၣ်မၤအီၣ်ဘၣ်တၢ်ဂ့ၤဂ့ၤဘၣ်န့ၣ်လီၤႉ ၦၤကၠိဖိမိၢ်ပၢ်လၢအလဲၤဒုးထီၣ်အဒံၣ်အဖိကၠိလၢတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်စ့ၢ်ကီးလၢတၢ်သိၣ်လိမၤဒိးအဂီၢ်လိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်န့ၣ် သၤမိတီၤသ၀ီဖိ ကၠိဖိမိၢ်ပၢ်တဂၤ စံး၀ဲန့ၣ်လီၤႉ
အ၀ဲစံး၀ဲလၢ“မ့ထီၣ်ကၠိလၢကစၢ်သ၀ီန့ၣ်တၢ်လၢာ်ဘူၣ်လၢာ်စ့န့ၣ်မးပတသ့ၣ်ညါအါအါဘၣ်ႉခဲအံၤပဘၣ်ဟဲပာ်ပဒံၣ်ပဖိကၠိလၢၦၤသ၀ီအဃိပၢၢ်တုၤလၢနကလဲၤထုးထီၣ်လံာ်အုၣ်သးန့ၣ်လၢာ်ခဲလၢာ်လီၤႉခီဖျိပဘၣ်ဟးစံၣ်ပစ့တအိၣ်ဘၣ်အဃိမိၢ်ပၢ်လၢအအဲၣ်ဒိးဆှၢအဒံၣ်အဖိလၢကၠိတဖၣ်အါဒၣ်တက့ၢ်န့ၣ်တၢ်ကီတၢ်ခဲအိၣ်၀ဲလီၤႉအဃိဟံၣ်ဖိဃီဖိလၢအနးတဖၣ်န့ၣ်အဒံၣ်အဖိတထီၣ်ဘၣ်ကၠိဘၣ်”အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးပယီၤသုးတဖၣ်အိၣ်ဒံး၀ဲလၢ(သၤမိတီၤ)သ၀ီ ကမျၢၢ်အဟံၣ်ကရၢၢ်ပူၤတုၤလၢခဲအံၤဒီး ခီဖျိတၢ်ခးလိာ်သးကဲထီၣ်ကဒါလၢခံခီခံကပၤအဘၢၣ်စၢၤသ့၀ဲအဃိကမျၢၢ်တဖၣ်က့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ် ဖိသၣ်မိပါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
လၢန့ၣ်အမဲာ်ညါၦၤကၠိဖိလၢအလဲၤထီၣ်ကၠိလၢ၀့ၢ်လၢအဂၤသ၀ီလၢအဂၤတဖၣ်တနီၤန့ၣ် အ၀ဲသ့ၣ်မ့အိၣ်ဒီးက၀ီၤဒ့ႇ ပၢၤကီၢ်အလံာ်အုၣ်သးမးတၢ်တူၢ်လိာ်၀ဲအဂ့ၢ်န့ၣ် သၣ်တီၣ်၀့ၢ် ကမျၢၢ်ပိာ်မုၣ်တဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ၦၤဖိသၣ်တဖၣ်အံၤတထီၣ်ဘၣ်ကၠိန့ၢ်ဖးယံၤလံအဃိၦၤလၢအကျိၣ်အိၣ်စ့အိၣ်တဖၣ်န့ၣ်လဲၤဒုးထီၣ်အဖိကၠိလၢ(တီအူ)တကပၤန့ၣ်အိၣ်မီၤနီၤႉမ့မ့ၢ်ၦၤဖိသၣ်လၢအဘၣ်ထီၣ်တီၤဖုၣ်တဖၣ်ခီန့ၣ်လံာ်အုၣ်သးမ့အိၣ်န့ၣ်န့ၢ်မီၤနီၤႉ ကၠိတနီၤန့ၣ်တန့ၢ်ဘၣ်ႉကၠိတနီၤန့ၣ်က၀ီၤဒ့ႇပၢၤကီၢ်အလံာ်အုၣ်သးမ့အိၣ်မးနဆဲးလီၤဖိသၣ်မံၤန့ၢ်မီၤနီၤ”အဂ့ၢ်န့ၣ် စံး၀ဲန့ၣ် လီၤႉ
ဒ်န့ၣ်အသိးဖဲအပူၤကွံာ်လါအ့ဖြ့ၣ်အခါန့ၣ်သုးမီၤစိရိၤစုတီၤဖီလာ်ကီၢ်ရ့ၣ်ကူူၣ်သ့၀ဲၤဒၢးမၢၦၤက့ၤအိးထီၣ်ကဒါကၠိ ဘၣ်ဆၣ် ခီဖျိဒုးယၤတၢ်ဟူးတၢ်ဂဲၤအဃိတၢ်ကီတၢ်ခဲအိၣ်လၢကက့ၤအိးထီၣ်ကဒါကၠိအသိး တၢ်ကရၢကရိလီၤလီၤဆီဆီ လၢအကမၤစၢၤၦၤဖိဒံဖိသၣ်လၢအဃ့ၢ်တၢ်ဒုးလၢအကဘၣ်ထီၣ်ကၠိတဖၣ်အံၤစ့ၢ်ကီးတအိၣ်ဘၣ် အဂ့ၢ်န့ၣ်...
လါယူၤ ၂၃ သီႇ ၂၀၂၃ နံၣ်ႇ ခ့ၣ်အဲးစံၣ်
လၢအ့ၣ်ယၣ်၀တံၣ် ညီၤတိကီၢ်ဆၣ်အပူၤ ဖဲအပူၤကွံာ်လါယူၤအခါ ကီၢ်ဆၣ် ကညီလံာ်လဲၢ်တၢ်ဆဲးတၢ်လၤကရၢ အနဲၣ်ရွဲၣ်သဃဲၤ စးမၠၣ်ကၠံ လၢပယီၤသုးဖီၣ်အီၤအံၤ တကီၢ်ခါခဲအံၤတၢ်စွဲတရါအီၤလၢတၢ်ဘျၢသဲစးအဆၢဖိ(၃)ခါ အဂ့ၢ်န့ၣ် သ့ၣ်ညါဘၣ်လၢၦၤဘူးဒီးအီၤတဖၣ်အအိၣ်န့ၣ်လီၤႉ
စးထီၣ်ဖဲတလါအံၤလါယူၤ ၉ သီတုၤလၢ ၁၁ သီန့ၣ် ပယီၤသုးလိာ်ကွီၢ်၀ဲ(ညီၤတိ)ကီၢ်ဆၣ်ပူၤ သးစၢ်တနီၤလၢအမ့ၢ် တၢ်ဒီသဒၢကမျၢၢ်သုးဒီးဖဲလါယူၤ ၁၀ သီအနံၤန့ၣ် ပယီၤသုးဖီၣ်၀ဲဒၣ်(စးမၠၣ်ကၠံ)အဟံၣ်ကပၤ ၦၤသးစၢ်တဂၤ ၀ံၤလီၢ်ခံ ဖီၣ်ကဒီး၀ဲစးမၠၣ်ကၠံဒီးတၢ်စွဲတရါအီၤလၢ(အကြမ်းဖက်)တၢ်ဘျၢသဲးစးအဆၢဖိ ၅၁(က), အဆၢဖိ ၅၂(ဂ) ဒီး အဆၢဖိ ၄၉(က)သ့ၣ်တဖၣ်အံၤအဂ့ၢ်န့ၣ် ၦၤလၢဘူးဒီးအီၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပယီၤသုးစွဲတရါအီၤလၢ(အကြမ်းဖက်)တၢ်ဘျၢသဲးစး(၃)ခါမီၤနီၤႉအ၀ဲန့ၣ်မ့ၢ်၀ဲဒၣ်ဖိၣ်သၣ်ခွါၦၢ်အအိၣ်လၢဟံၣ်တဂၤလီၤႉၦၤသးစၢ်လၢပယီၤသုးလိာ်ကွီၢ်အီၤလၢအကဲ(PDF)တဂၤန့ၣ်လဲၤမံလဲၤအီၣ်ဖဲစးမၠၣ်ကၠံအဟံၣ်န့ၣ်လီၤႉမ့၀ံၤဟံၣ်လၢၦၤဖီၣ်န့ၣ်ကျိတဖျၢၣ်န့ၣ်ႇဖဲၦၤတ့ထီၣ်တၢ်ပာ်ကျိလီၢ်အခါန့ၣ်အ၀ဲသ့ၣ်လဲၤတ့စၢၤ၀ဲဒံးႇအဃိၦၤစွဲတရါဃုာ်ဒီးအ၀ဲဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးပယီၤသုးဖီၣ်စးမၠၣ်ကၠံ၀ံၤလီၢ်ခံတဲ၀ဲလၢဖီၣ်ကမၣ်၀ဲလီၤဘၣ်ဆၣ်စးထီၣ်ဖဲန့ၣ်လီၢ်ခံန့ၣ်ပယီၤသုးတပျဲထံၣ်အ၀ဲဒီးၦၤနီတဂၤလၢၤဘၣ်ဒီးတၢ်စွဲတရါအီၤလၢ(အကြမ်းဖက်)တၢ်ဘျၢသဲးစးအဆၢဖိသ့ၣ်တဖၣ်ဒ်အံၤလီၤအဂ့ၢ်န့ၣ် ၦၤလၢအသ့ၣ်ညါလိာ်သးဒီးစးမၠၣ်ကၠံတဖၣ်အံၤစံး၀ဲဒၣ်န့ၣ်လီၤႉ
လၢညီၤတိကီၢ်ဆၣ်အပူၤပယီၤသုးလိာ်ဘၢလိာ်ကွီၢ်၀ဲဒၣ်သးစၢ်တဖၣ်လၢတၢ်ဒီသဒၢကမျၢၢ်သုး(PDF)အဃိ တုၤလၢတလါအံၤလါယူၤန့ၣ်ပယီၤသုးဖီၣ်၀ဲဒၣ်သးစၢ်ကအိၣ်အဂၤ(၂၀)ဃၣ်ဃၣ်လံန့ၣ်လီၤႉခီဖျိပယီၤသုးအံၤပံးကွံာ်ၦၤလၢအဖီၣ်၀ဲတဖၣ်န့ၣ်အဟံၣ်အဃီဒီးဆဲးလူၤဃုသမံသမိးတၢ်အဃိညီၤတိ၀့ၢ်ပူၤကမျၢၢ်တဖၣ်ဘၣ်အိၣ်လၢတၢ်ပျံၤတၢ်ဖုးပူၤအဂ့ၢ်န့ၣ်...
လါယူၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ ပယီၤသုးဒီးပၢၤကီၢ်သုးလၢ အဟဲက့ၤမၤ(CDM)တဖၣ်ဒီကလုာ်ဃူဖိး(NUG)ကမျၢၢ်ပၢပြးကရူၢ်(ပအဖ)ဟ့ၣ်လီၤဆီၣ်ထွဲမၤစၢၤ၀ဲစ့ကိးလါဒဲးအဂ့ၢ်န့ၣ် သ့ၣ်ညါဘၣ်လၢ နိၣ်တကီကမျၢၢ်ပၢပြး(ပအဖ)အအိၣ်န့ၣ်လီၤႉ
အပူၤကွံာ်လၢညါခါပယီၤသုးဒီးပၢၤကီၢ်သုး(၁၅)လၢအဟဲက့ၤမၤ(CDM)အံၤတကးဒံးဘၣ်အမဲာ်ညါ ပၢၤကီၢ်သုး(၇)ဂၤလၢအဟဲက့ၤမၤ(CDM)ဖဲလီၢ်ခံအံၤသ့ၣ်တဖၣ်စ့ၢ်ကီးတၢ်ဟ့ၣ်လီၤဆီၣ်ထွဲမၤစၢၤ၀ဲစ့အဂ့ၢ်န့ၣ် နိၣ်တကီကီၢ်ဆၣ်(ပအဖ)သိၣ်မှံၤတၢ်ရ့လိာ်မုာ်လိာ်မူဒါခိၣ် အူည့မ့ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အပူၤကွံာ်လၢညါလွံၢ်လါယဲၢ်လါအခါစ့ၢ်ကီးန့ၣ် NUG (ပြည်သူ့ရင်ခွင်)ကရူၢ် ဆီၣ်ထွဲမၤစၢၤ၀ဲၦၤ(CDM) ၁၅ ဂၤန့ၣ် ကိးလါဒဲးလီၤမီၤနီၤႉ တဂၤန့ၣ်မၤစၢၤ၀ဲ(၇)ကလးကၠးႉ မ့မ့ၢ်ပၢၤကီၢ်သုး(၇)ဂၤအံၤန့ၣ် ၦၤတီၣ်ထီၣ်စရီသီအဃိန့ၢ် ၀ဲဒၣ်အဆိကတၢၢ်တဘျီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ(ပြည်သူ့ရင်ခွင်)ကမံးတံာ်ကရူၢ်ဆီၣ်ထွဲမၤစၢၤ၀ဲပယီၤသုးလၢအဟဲက့ၤမၤ(CDM)တဖၣ်တကးဒံးဘၣ် အမဲာ်ညါဆီၣ်ထွဲမၤစၢၤဃုာ်၀ဲအဟံၣ်ဖိဃီဖိတဖၣ်အသိးလၢအ၀ဲသ့ၣ်ကအီၣ်ကအီအဂီၢ်စ့ၢ်ကီးခ့ၣ်အဲၣ်ယူၣ်ဒီးတၢ်ဒီသဒၢကမျၢၢ်သုးဆီၣ်ထွဲမၤစၢၤဃာ်၀ဲအိၣ်စ့ၢ်ကီးအဂ့ၢ်န့ၣ် အူည့မ့ စံးအါထီၣ်၀ဲန့ၣ်လီၤႉ
လၢနိၣ်တကီကီၢ်ဆၣ်အပူၤပယီၤသုးလၢအဟဲက့ၤမၤ(CDM)တဖၣ်မ့ၢ်၀ဲၦၤသုးဖိအပတီၢ်တုၤလၢသုးခိၣ်ဒိၣ်ဖိအပတီၢ်ညါအသိး မ့မ့ၢ်ပၢၤကီၢ်သုးခီန့ၣ်မ့ၢ်၀ဲဒၣ်ပၢၤကီၢ်သုးအပတီၢ်တုၤလၢပၢၤကီၢ်ခိၣ်–၂ အပတီၢ်ညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပယီၤသုးလၢအဟဲက့ၤနုာ်လီၤမၤ(CDM)တဖၣ်တၢ်တူၢ်လိာ်သဂၢၢ်လီၤအ၀ဲသ့ၣ်ဂ့ၤဂ့ၤလီၤဒီးလၢ အ၀ဲသ့ၣ်ကအီၣ်ကအီအဂီၢ်စ့ၢ်ကီးဘၣ်ကိၢ်ဘၣ်ဂီၤတအိၣ်တၢ်ရဲၣ်ကျဲၤန့ၢ်အ၀ဲသ့ၣ်ခဲလၢာ်အဂ့ၢ်န့ၣ် နိၣ်တကီကီၢ်ဆၣ် (ပအဖ)ကရူၢ် စံး၀ဲန့ၣ်လီၤႉ
လါယူၤ ၂၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကရ့ၣ်နံၣ်ကီၢ်စဲၣ် ဒံၤမီၣ်စိၤကီၢ်ဆၣ်ဒီးဖရူၤစိၤကီၢ်ဆၣ်အပူၤ ခီဖျိကမျၢၢ်ၦၤဃ့ၢ်မှံဟးဖျိးတဖၣ် တဒိးန့ၢ်ဘၣ် တၢ်အီၣ်တၢ်အီတၢ်ဆီၣ်ထွဲမၤစၢၤယံၤထီၣ်လံအဃိ တကီၢ်ခါခဲအံၤအ၀ဲသ့ၣ်လိၣ်ဘၣ်၀ဲတၢ်ဆီၣ်ထွဲမၤစၢၤ အဂ့ၢ်န့ၣ် ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
ကမျၢၢ်ၦၤဃ့ၢ်မှံဟးဖျိးလၢအိၣ်ကီၢ်ဆၣ်ဖဲန့ၣ်ပူၤတဖၣ်အ၀ဲသ့ၣ်ဒိးန့ၢ်ဘၣ်၀ဲဆူၣ်ချ့တၢ်အံးထွဲကွၢ်ထွဲအိၣ်၀ဲဘၣ်ဆၣ် အ၀ဲသ့ၣ်တဒိးန့ၢ်ဘၣ်တၢ်အီၣ်တၢ်အီဒီးတၢ်ခိၣ်ဒုးတဖၣ်အံၤကအိၣ်လၢ(၅)လါဃၣ်ဃၣ်လံအဃိတကီၢ်ခါခဲအံၤ တၢ်စူၤခါအကတီၢ်လိၣ်ဘၣ်၀ဲတၢ်အီၣ်တၢ်အီတၢ်ဆီၣ်ထွဲမၤစၢၤအဂ့ၢ်န့ၣ် ဒံၤမိၣ်စိၤကီၢ်ဆၣ် ပိာ်မုၣ်လၢအဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“မ့မ့ၢ်ကသံၣ်သရၣ်ဒုဟဲကွၢ်ထွဲၦၤဆူးၦၤဆါအိၣ်မီၤနီၤႉဘၣ်ဆၣ်တၢ်အီၣ်တၢ်အီဒီးတၢ်ဖိတၢ်လံၤလၢအဂၤတဟဲဘၣ်ကအိၣ်လၢ(၅)လါလံႉခဲအံၤတၢ်စူၤလီၤလံအဃိလၢဒဲအဂီၢ်တၢ်ခိၣ်ဒုး(တၤလပၣ်)လိၣ်၀ဲဒၣ်မီၤနီၤႉၦၤဟံၣ်ဖိဃီဖိလၢအနးတဖၣ်န့ၣ်ခီလိၣ်ဘၣ်၀ဲဒၣ်ဟုသးလီၤႉတၢ်မၤစၢၤတဟဲလၢၤဘၣ်အဃိဘၣ်အီၣ်လီၤစှၤက့ၤ၀ဲမ့ၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ကရ့ၣ်နံၣ်ကီၢ်စဲၣ်ပူၤကမျၢၢ်ၦၤဃ့ၢ်မှံဟးဖျိးတဖၣ်လၢတၢ်အီၣ်တၢ်အီအဂီၢ်န့ၣ်တၢ်ဆဲးကျိးအိၣ်၀ဲဒီးဂံၢ်ခီၣ်ထံးတၢ်ကရၢကရိႇ (ပုဂ္ဂလိ)တၢ်ကရၢကရိတဖၣ်အံၤထီဘိလီၤဒီးတချူးလၢၦၤဃ့ၢ်မှံဟးဖျိးအတၢ်အီၣ်တၢ်အီလီၤတူာ်ဒံးဘၣ်အခါန့ၣ်ကြၢးလၢတၢ်ကပာ်ဖျါထီၣ်စိ၀ဲအဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ် ၦၤနဲၣ်တၢ် ကိၤဘညါ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဘၣ်ဃးဒီးတၢ်အီၣ်တၢ်အီအံၤဂံၢ်ခီၣ်ထံးတၢ်ကရၢကရိႇ(ပုဂ္ဂလိ)တၢ်ကရၢကရိလၢအအိၣ်ဖဲအံၤတဖၣ် န့ၣ်တၢ်ဆဲးကျိးအိၣ်မၢ်မၢ်လီၤႉၦၤဃ့ၢ်မှံဟးဖျိးတဖၣ်စ့ၢ်ကီးအလီၢ်အိၣ်လၢအ၀ဲသ့ၣ်ကဘၣ်က့ၤကွၢ်ကဒါက့ၤမ့ၢ်အ၀ဲသ့ၣ်တၢ်အီၣ်တၢ်အီအိၣ်တ့ၢ်က့ၤၦဲၤနွံဂီၢ်လဲၣ်ဒ်န့ၣ်မီၤနီၤႉခီဖျိပဘၣ်ဃ့တၢ်မၤစၢၤလၢထံဂုၤကီၢ်ဂၤအအိၣ်ညါအဃိတမ့ၢ်နတီၣ်ထီၣ်ခဲအံၤအန့ၢ်ခဲအံၤဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢတၢ်ကလဲၤဆှၢတၢ်အီၣ်တၢ်အီတၢ်ဆီၣ်ထွဲမၤစၢၤလၢၦၤဃ့ၢ်မှံဟးဖျိးတဖၣ်အံၤအဂီၢ်န့ၣ်ခီဖျိပယီၤသုးပံးဃာ်၀ဲကျဲဒီး ပနံာ်တၢ်ဖိတၢ်ၦ့ၤအၦ့ၤစ့ၢ်ကီးဒိၣ်ထီၣ်အဃိကျိၣ်စ့လၢတၢ်မၤစၢၤ၀ဲတဖၣ်အံၤဒီးတၢ်ဖိတၢ်လံၤလၢနဘၣ်ၦ့ၤအီၤတဖၣ် အါအဃိကျိၣ်စ့တလၢတလီၣ်၀ဲဘၣ်အဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယာ်ကရူၢ် စံး၀ဲန့ၣ်လီၤႉ
တကီၢ်ခါခဲအံၤလၢကရ့ၣ်နံၣ်ကီၢ်စဲၣ်အပူၤတၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢကရူၢ်အဘၢၣ်စၢၤကိးမုၢ်နံၤဒဲးဒီးလၢဒံၤမီၣ်စိၤကီၢ်ဆၣ်ဒီးဖရူၤစိၤကီၢ်ဆၣ်အပူၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၁)ကလီၢ်ဘျဲၣ်လံဒီး ထဲကရ့ၣ်နံၣ်ကီၢ်စဲၣ်ဒီတဘ့ၣ်အပူၤန့ၣ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၂)ကလီၢ်ဘျဲၣ်ညါအဂ့ၢ်န့ၣ် တၢ်ကစီၣ်တၢ်မၤနီၣ်စရီ အသိး သ့ၣ်ညါဘၣ်န့ၣ်လီၤႉ
လါယူၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ခိၣ်နၢ်တဖၣ်တီခိၣ်ရိၣ်မဲ ကွဲးကါကူစါယါဘျါ ကလီန့ၢ်၀ဲ ဒူယီၢ်ကီၢ်ဆၣ်ပူၤကမျၢၢ်အမဲာ်ချံလၢတနွံအတီၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ
တၢ်ကွဲးကါကူစါယါဘျါန့ၢ်ကမျၢၢ်မဲာ်ချံဘျီအံၤမ့ၢ်၀ဲကညီဖီၣ်စုက၀ဲၤဃူဖိးကမံးတံာ်(UCKAG)အတၢ်ရဲၣ်တၢ်ကျဲၤဒီး ဘၣ်တၢ်တီခိၣ်ရိၣ်မဲဟံးထီၣ်ဖီၣ်ထီၣ်အီၤလၢဖၣ်အၣ်ကီၢ်ရ့ၣ်ခိၣ်နၢ်သ့ၣ်တဖၣ်န့ၣ်လီၤႉဒ်န့ၣ်အသိးတၢ်ကွဲးကါမဲာ်ချံတၢ်ရဲၣ်တၢ်ကျဲၤအံၤဘၣ်တၢ်စးထီၣ်မၤအီၤဖဲလါယူၤ ၁၄ သီတုၤလၢ ၂၀ သီ လၢတနွံအတီၢ်ပူၤအဂ့ၢ်န့ၣ် ဖၣ်အၣ်ကီၢ်ရ့ၣ် ကညီသးစၢ်ကရၢ(KYO)ၦၤဘၣ်မူဘၣ်ဒါလၢအနုာ်လီၤပၣ်ဃုာ်မၤစၢၤတၢ်လၢတၢ်ရဲၣ်တၢ်ကျဲၤပူၤအံၤတဂၤ စံး၀ဲဒ်အံၤ န့ၣ်လီၤႉ
အ၀ဲစံး၀ဲလၢ“တၢ်ကွဲးကါန့ၢ်ၦၤမဲာ်ချံဘျီ၀ဲအံၤမ့ၢ်၀ဲဒၣ်(ဖၣ်အၣ်ကီၢ်ရ့ၣ်)ခိၣ်နၢ်တဖၣ်တီခိၣ်ရိၣ်မဲ၀ဲမီၤနီၤႉ စးထီၣ်မၤ၀ဲတလါအံၤလါယူၤ ၁၄ သီတုၤလၢအသီ ၂၀ မီၤနီၤႉ တၢ်ဟးကွဲးကါန့ၢ်ကမျၢၢ်မဲာ်ချံအံၤမ့ၢ်၀ဲဒၣ်(UCKAG) အတၢ်ရဲၣ်တၢ်ကျဲၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ကွဲးကါကလီန့ၢ်ကမျၢၢ်အမဲာ်ချံတၢ်ရဲၣ်တၢ်ကျဲၤအံၤဘၣ်တၢ်မၤအီၤလၢဖၣ်အၣ်ကီၢ်ရ့ၣ် ဒူယီၢ်ကီၢ်ဆၣ် နီၤသၤယၤသ၀ီပူၤဒီး ကမျၢၢ်အိၣ်ကီၢ်ဆၣ်ပူၤတဖၣ်ဟဲကွဲးကါအမဲာ်ချံအိၣ်၀ဲအါမးန့ၣ်လီၤႉ
ဘၣ်ဃးတၢ်ကွဲးကါမဲာ်ညါချံဘျီ၀ဲအံၤတနွံအတီၢ်ပူၤတၢ်ကွဲးကါန့ၢ်၀ဲၦဲၤဂၤလဲၣ်ခီန့ၣ်တသ့ၣ်ညါလီၤတံၢ်ဒံးဘၣ်အဂ့ၢ်န့ၣ် သးစၢ်ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
“ပသ့ၣ်ညါန့ၣ်ၦၤဟဲမၤမဲာ်ချံကအိၣ်အဂၤ(၄၀၀)ဘျဲၣ်ညါႉၦၤဟဲမၤအဂၤ(၄၀၀)ဘျဲၣ်အကျါတနီၤန့ၣ်ဘၣ်ကွဲးကါအမဲာ်ချံအိၣ်ႉတနီၤန့ၣ်ဘၣ်ဒိးမဲာ်ကးအိၣ်စ့ၢ်ႉၦၤဟဲဒိးပၠးသးအိၣ်ဒီဒူၣ်ညါႉခဲအံၤတ၀ံၤဒံးဘၣ်အဃိၦၤဟဲမၤမဲာ်ချံအနီၣ်ဂံၢ်ကအိၣ်ဆံးအါလဲၣ်န့ၣ်ပတသ့ၣ်ညါလီၤတံၢ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ
ဖဲတၢ်အိးထီၣ်တၢ်ကွဲးကါမဲာ်ချံမူးတၢ်ရဲၣ်တၢ်ကျဲၤအပူၤန့ၣ်(ခ့ၣ်အဲၣ်ယူၣ်)ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့ႇ (သုးက့...
လါယူၤ ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတလၢၤကီၢ်စဲၣ် ၀ီၢ်ရ့ၣ်ဒီးသရိာ်၀ါဘၢၣ်စၢၤ မီၣ်လမၠဲၣ်–၀ီၢ်ရ့ၣ်–ဒ၀ဲၢ် ပၠံၣ်ထီၣ်ဆူၣ်ကျဲန့ၣ် စးထီၣ်ဖဲလါယူၤ ၁၈ သီအနံၤ န့ၣ် တၢ်ပၢၢ်ဆၢသုးပာ်ဖှိၣ်မၤ၀ဲဟီၣ်က၀ီၤတၢ်ဒိၣ်စိအခါ ဖီၣ်န့ၢ်၀ဲၦၤလၢအဘၣ်ထွဲလိာ်သးဒီးပယီၤသုး ၄ ဂၤ အဂ့ၢ်န့ၣ် ဒုးယၤလီၤဆီကရူၢ်(SOF)ထုးထီၣ်ပာ်ဖျါ၀ဲဖဲလါယူၤ ၂၀ သီအနံၤန့ၣ်လီၤႉ
ကျဲမုၢ်ဖီခိၣ်၀ဲန့ၣ်အ၀ဲသ့ၣ်အိၣ်ခိးသမံသမိးကွၢ်ဟုၣ်၀ဲပယီၤသုးအတၢ်ဟူးတၢ်ဂဲၤဒီးဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ႇဒုးယၤလီၤဆီကရူၢ်(SOF)ႇတၢ်ဒီသဒၢကမျၢၢ်သုး(PDF)သုးပာ်ဖှိၣ်တဖၣ်အံၤအိၣ်ခိးဟံတၢ်ဘံၣ်တၢ်ဘၢသမံသမိးသိလ့ၣ်အခါဖီၣ်ချုး၀ဲဒ်အံၤလီၤအဂ့ၢ်န့ၣ် ဒုးယၤလီၤဆီကရူၢ်(SOF)အၦၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပယီၤသုးလၢတၢ်ဖီၣ်န့ၢ်၀ဲတဖၣ်န့ၣ်(သုးရ့ၣ် ၂၇)ကဆဲးဖီၣ်ထီၣ်၀ဲလီၤမီၤနီၤႉ ပမၤဟီၣ်က၀ီၤတၢ်ဒိၣ်စိဒု ဖဲ၀ီၢ်ရ့ၣ်ဒီးသရိာ်၀ါဘၢၣ်စၢၤအံၤလီၤႉပယီၤသုးခးလီၤကျိဖးဒိၣ်ဘၣ်ဆၣ် တၢ်ပၢၢ်ဆၢကရူၢ် တကပၤဒုတၢ်ဘၣ်ဒိဘၣ်ထံး တအိၣ်နီတမံၤဘၣ်ႉကျိဖးဒိၣ်လီၤတဲာ်လၢသ၀ီပူၤႇလၢသ၀ီကပၤအိၣ်၀ဲ”အဂ့ၢ်န့ၣ် စံး၀ဲဒၣ်န့ၣ်လီၤႉ
ဖဲတၢ်ပၢၢ်ဆၢသုးပာ်ဖှိၣ်ကရူၢ်မၤ၀ဲဟီၣ်က၀ီၤတၢ်ဒိၣ်စိဖဲ(ပၠံၣ်ထီၣ်ဆူၣ်)ကျဲမုၢ်ဖီခိၣ်အခါ ဖဲလါယူၤ ၂၀ သီ မုၢ်ထူၣ် ၁၁း၃၀ အဆၢကတီၢ် ခီဖျိပယီၤသုးကျိဖးဒိၣ်သုးရ့ၣ်(၃၁၇)ခးလီၤ(၈၁ မမ)ကျိဖးဒိၣ်ဆူသ၀ီဃၢၤအဃိ...
လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ပယီၤသုးတၢ်သမံသမိးတြဲၤလီၢ်တဖၣ် အိၣ်ခိးသမံသမိးလီၢ်က၀ီၤကမျၢၢ် လၢအဟးထီၣ်က့ၤလီၤတဖၣ်ဒီးတကးဒံးအမဲာ်ညါအ၀ဲသ့ၣ်ထၢစ့ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ
သ၀ီလၢအိၣ်ကၠၤအ့စ့ၣ်ကၠံ၀့ၢ်ခိၣ်ဃၢၤကမျၢၢ်တဖၣ်ဖဲအ၀ဲသ့ၣ်လဲၤၦ့ၤတၢ်ဖိတၢ်လံၤလၢ၀့ၢ်ပူၤအခါန့ၣ် ပယီၤသုးဃ့အီၣ်စ့ဒိးသန့ၤထီၣ်သးလၢတၢ်ဖိတၢ်လံၤအါစှၤအဖီခိၣ်ဒီးခံပ့ၣ်ပၣ်သိစဲးတြီၢ်အကၣ်လၣ်(၅၀)ခံဖျၢၣ်န့ၣ် ဃ့၀ဲတုၤလၢ(၁၅၀၀၀)ကၠးညါအဂ့ၢ်န့ၣ် ကၠၤအ့စ့ၣ်ကၠံ၀့ၢ်ပူၤ ကမျၢၢ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“သိစဲးခံပ့ၣ်ပၣ်န့ၣ်အ၀ဲသ့ၣ်ဃ့၀ဲတကလးဘျဲၣ်ညါႉမ့မ့ၢ်ၦၤမဲာ်သီနါသီန့ၣ်အ၀ဲသ့ၣ်ဃ့အီၣ်၀ဲဆူၣ်မးႉ လၢက၀ီၤဒ့(၁)သွံၣ်ဃူဖိးမဲာ်ညါ တၢ်သမံသမိးတြဲၤန့ၣ်ရးဒိၣ်ကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လီၢ်က၀ီၤကမျၢၢ်လၢအဟးထီၣ်က့ၤလီၤလဲၤက့ၤဖံးမၤတၢ်လၢ၀့ၢ်ပူၤတဖၣ်အံၤမုၢ်ဆါခီန့ၣ်ပယီၤသုးသမံသမိးဃ့အီၣ်၀ဲစ့ဒီး ဒ်န့ၣ်အသိးလၢမုၢ်နၤခီန့ၣ်အ၀ဲသ့ၣ်ခးလီၤကျိဖးဒိၣ်ကိးမုၢ်နၤဒဲးအဃိလီၢ်က၀ီၤကမျၢၢ်တဖၣ်ဘၣ်ဟးထီၣ်က့ၤလီၤအိၣ်လၢတၢ်ပလီၢ်ပဒီပူၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လၢန့ၣ်အမဲာ်ညါကျဲလၢအနုာ်လီၤလၢကၠၤအ့စ့ၣ်ကၠံ၀့ၢ်ပူၤတဖၣ်တနီၤန့ၣ်ပယီၤသုးမၤဟးဂီၤ၀ဲဒီး အ၀ဲသ့ၣ်အိၣ်ခိးသမံသမိးဃ့အီၣ်စ့တကးဒံးဘၣ်အမဲာ်ညါခးလီၤကျိဖးဒိၣ်ဆူသ၀ီခိၣ်သ၀ီဃၢၤအဂ့ၢ်န့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ်(ပအဖ)သိၣ်မှံၤ တၢ်ရ့လိာ်မုာ်လိာ်မူဒါခိၣ် အူည့မ့ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“လၢနကနုာ်လီၤနိၣ်တကီ(က၀ီၤဒ့ ၆)ကျဲန့ၣ်ဒ်သိးသိလ့ၣ်နုာ်လီၤသုတန့ၢ်တဂ့ၤအဂီၢ်န့ၣ် အ၀ဲသ့ၣ်မၤဟးဂီၤဃာ်ကျဲခဲလၢာ်လီၤႉအိးထီၣ်၀ဲဒၣ်ကျဲတဘိလီၤႉမ့မ့ၢ်ကျဲတဘိန့ၣ်အတပံး၀ဲဒံးဘၣ်ႉအ၀ဲသ့ၣ်ဆီလီၤတြဲၤအိၣ်ခိးသမံသမိးတၢ်ဃ့အီၣ်စ့မီၤနီၤႉကွၢ်၀ဲမ့လီၤဆီန့ၣ်သမံသမိးပၢၢ်တုၤၦၤလီတဲစိညါႉအ၀ဲသ့ၣ်ခးလီၤကျိဖးဒိၣ်ကိးမုၢ်နၤဒဲးလီၤႉအ၀ဲသ့ၣ်ခးလီၤကျိဖးဒိၣ်အဃိၦၤသ၀ီဖိတဖၣ်ဘၣ်မံဖုးမံဖုးႉတနီၤန့ၣ်ၦၤစံၣ်နုာ်လီၤမံလၢတၢ်ပူၤႉတနီၤန့ၣ်အ၀ဲသ့ၣ်ဟးစံၣ်မံလၢတၢ်လီၢ်အဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တကီၢ်ခါခဲအံၤစ့ၢ်ကီးလၢဟီၣ်က၀ီၤအပူၤခီဖျိစုက၀ဲၤတၢ်သဘံၣ်သဘုၣ်အဃိပနံာ်တၢ်ဖိတၢ်လံၤအၦ့ၤဒိၣ်ထီၣ်၀ဲကွ့ၢ်ကွ့ၢ်ဒီးခီဖျိကၠၤအ့စ့ၣ်ကၠံ၀့ၢ်ပယီၤသုးတဖၣ်အံၤထၢအီၣ်စ့လၢကမျၢၢ်ထံဖိကီၢ်ဖိအအိၣ်ဒ်အံၤအဃိဟီၣ်က၀ီၤဖဲန့ၣ်အပူၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ်အပူၤ တၢ်စူၤခါအကတီၢ် ခီဖျိၦၤဃ့ၢ်မှံဟးဖျိးသ့ၣ်တဖၣ်အီဘၣ်ထံ တကဆှီဘၣ်အဃိ ၦၤဖိဒံဖိသၣ်တဖၣ်တၢ်ဟၢဖၢလူတၢ်ဆါကဲထီၣ်သးအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဖၣ်စံး၀ဲန့ၣ်လီၤႉ
ကမျၢၢ်ၦၤဃ့ၢ်မှံဟးဖျိးလၢအိၣ်တနီသရံၣ်ကီၢ်ဆၣ်ပူၤတဖၣ်အါဒၣ်တက့ၢ်န့ၣ်သူအီ၀ဲဒၣ်ထံလၢထံကျိပူၤႇထံကစၢၢ်လီၤဒီး တၢ်စူၤခါအတီၢ်ပူၤခီဖျိထံတကဆှီဘၣ်အဃိၦၤဖိသၣ်(၅)နံၣ်ဒီးအနံၣ်တဆံဘျဲၣ်တဖၣ်အါဒၣ်တက့ၢ်န့ၣ်ဘၣ်၀ဲဒၣ်တၢ်ဟၢဖၢလူတၢ်ဆါအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တနံၣ်အံၤတၢ်စူၤစဲၤခံအဃိထံတဂ့ၤအါအါဘၣ်မီၤနီၤႉအ၀ဲသ့ၣ်အီဘၣ်ထံအံၤအဃိၦၤဖိသၣ်တဖၣ် အါဒၣ်တက့ၢ်န့ၣ်အ၀ဲသ့ၣ်ဟၢဖၢလူမီၤနီၤႉအဃိစှၤသီအတီၢ်ပူၤအံၤတၢ်ဟၢဖၢလူတၢ်ဆါကဲထီၣ်သးဟဲအါထီၣ်၀ဲႉမ့၀ံၤပၢၢ်တုၤလၢအဂံၢ်အဘါလီၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးတလါအံၤလါယူၤထီၣ်တၢတနွံအခါန့ၣ်လၢၦၤလီၢ်အိၣ်ကမှံလီၢ်ဖဲန့ၣ်တဖၣ်ၦၤဘၣ်တိးကွ့တၢ်ညၣ်ဂိၢ်တၢ်ဆါအိၣ်၀ဲအဂၤ(၃၀၀)ဘျဲၣ်ညါဒီးတကီၢ်ခါခဲအံၤအ၀ဲသ့ၣ်အီဘၣ်ထံတကဆှီ၀ဲဘၣ်အသိးခီဖျိတဒိးန့ၢ်ဘၣ်ကသံၣ်ကသီတၢ်ဆီၣ်ထွဲမၤစၢၤကူကူလၢလၢဘၣ်အဃိ တကီၢ်ခါခဲအံၤကသံၣ်ကသီလီၤတူာ်လီၤကၤထီၣ်၀ဲလံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
အ၀ဲစံး၀ဲလၢ“လၢအံၤတကပၤန့ၣ်ကသံၣ်ကသီတၢ်ဆီၣ်ထွဲမၤစၢၤတအိၣ်ဘၣ်အဃိတၢ်ကီတၢ်ခဲအိၣ်မီၤနီၤႉဖဲအအိၣ်န့ၣ်ပကူစါယါဘျါအီၤဒ်န့ၣ်လီၤႉခဲအံၤတၢ်ညၣ်ဂိၢ်တၢ်ဆါႇတၢ်ဟၢဖၢလူတၢ်ဆါကဲထီၣ်သးအိၣ်မီၤနီၤႉကဲထီၣ်တုၤလၢၦၤသံဒုတအိၣ်ဒံးဘၣ်ႉတၢ်ဆါကဲထီၣ်တနံၣ်ဒီးတနံၣ်န့ၣ်တဒ်သိးလိာ်သးဘၣ်ႉတၢ်စူၤနါက့စဲၤခံအဃိတနံၣ်အံၤနးဒိၣ်၀ဲန့ၣ်ႉမ့၀ံၤတၢ်အီၣ်တၢ်အီစ့ၢ်ကီးလီၤတူာ်လီၤကၤထီၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဟီၣ်က၀ီၤဖဲန့ၣ်အပူၤခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီဒီးကသံၣ်ကသီသ့ၣ်တဖၣ်အဃိ လၢၦၤဃ့ၢ်မှံဟးဖျိးသ့ၣ်တဖၣ်အံၤအဂီၢ်တၢ်အီၣ်တၢ်အီဒီးကသံၣ်ကသီလီၤတူာ်လီၤကၤထီၣ်၀ဲဒ်အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
လၢတနီသရံၣ်ကီၢ်ဆၣ်အပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၈၀၀၀)ဘျဲၣ်ညါဒီးတလါအံၤလါယူၤထီၣ်တၢတနွံအခါန့ၣ်လၢကီၢ်ဆၣ်၀ဲန့ၣ်အပူၤခီဖျိတၢ်ဒုးဆဲးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးတဖၣ်အဘၢၣ်စၢၤအဃိ ၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒီးပယီၤသုးစ့ၢ်ကီးမၤအါထီၣ်သုးဂံၢ်ဘါအဂ့ၢ်န့ၣ် ဟီၣ်က၀ီၤတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ