ခ့ၣ်အဲးစံၣ် – KIC News

လါယနူၤအါရံၤ ၁၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ ဆီထံးကီၢ်ဆၣ်အပူၤန့ၣ် ခီဖျိဘျၢၣ်ခိၣ်ကရူၢ် သ့ၣ်ခီသ၀ီဖိတဖၣ်ဘၣ်ယိၣ်၀ဲလၢသုးမီၤစိရိၤကဘီယူၤကဟဲတ့ၢ်လီၤမ့ၣ်ပိၢ်အဃိ တုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံး၀ဲဘၣ်ဒီးဘၣ်ဟးဃ့ၢ်အိၣ်ကမှံဒံး၀ဲအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ သ၀ီ၀ဲအံၤအပူၤန့ၣ်ဟံၣ်ခိၣ်အိၣ်၀ဲဒၣ်(၃၂)ဖျၢၣ်ႇၦၤကညီနီၣ်ဂံၢ်အိၣ်၀ဲ(၁၈၈)ဂၤဃၣ်ဃၣ်ဒီး ဖဲအပူၤကွံာ် လါယနူၤအါရံၤ(၇)သီအခါန့ၣ် ခီဖျိသုးမီၤစိရိၤကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲဖဲအပူၤကွံာ်လါယနူၤအါရံၤ(၈)သီအခါန့ၣ်လီၤႉ လီၢ်က၀ီၤကမျၢၢ်လၢအဘၣ်ဃ့ၢ်ထီၣ်သ့ၣ်တဖၣ်အံၤတုၤလၢခဲအံၤအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံး၀ဲဘၣ်ဒီး ဘၣ်ဟးစံၣ်အိၣ်ခူသူၣ်ဒံးအသးဖဲဒူသ၀ီတၢ်ခိၣ်တၢ်ဃၢၤအဖၢမုၢ်အသိးအ၀ဲသ့ၣ်အီၣ်အီအိၣ်ဆိးနါစိၤ၀ဲဒ်န့ၣ်လီၤ အဂ့ၢ်န့ၣ် ၦၤလၢဘူးဒီးၦၤလီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ကမျၢၢ်တဖၣ်အံၤဘၣ်ပာ်ခူသူၣ်ဃာ်အ၀ဲသ့ၣ်တၢ်အီၣ်တၢ်အီလၢၦၢ်ပူၤမီၤနီၤႉ လီလီစဲၤခဲအံၤဒုအ၀ဲသ့ၣ်အီၣ်အီ၀ဲဒီးတၢ်အီၣ်လၢအ၀ဲသ့ၣ်ပာ်ခူသူၣ်ဃာ်၀ဲတဖၣ်ဒ်န့ၣ်လီၤႉၦၤလၢကဆီၣ်ထွဲမၤစၢၤအ၀ဲသ့ၣ်တအိၣ်ဘၣ်မီၤနီၤႉယလဲၤကွၢ်န့ၣ်ၦၤတက့ၤအိၣ်လၢသ၀ီပူၤနီတဂၤဒံးဘၣ်ႉ၀ဲသ့ၣ်တဲ၀ဲလၢဘၣ်ယိၣ်ကဘီယူၤကဟဲခးလီၤတၢ်ကဒီးမီၤနီၤ”အဂ့ၢ်န့ၣ် စံးဘၣ်ခ့ၣ်အၣ်စံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ် ၂၀၂၂ လါဒံၣ်စ့ဘၢၣ် လၢတလါအတီၢ်ပူၤန့ၣ် ပယီၤသုးခးလီၤကျိဖးဒိၣ်ဆူခ့ၣ်အဲၣ်ယူၣ် သုးက့(၃) ချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤပူၤအဃိ လီၢ်က၀ီၤကမျၢၢ်ဖိသၣ်မုၢ်ဖိသံ၀ဲ(၁)ဂၤဒီးဘၣ်ဒိ၀ဲ(၃)ဂၤန့ၣ်လီၤႉ လၢန့ၣ်အမဲာ်ညါပယီၤသုးဒွဲၣ်အူအီၣ်ကွံာ်ကမျၢၢ်အဟံၣ်အဃီဒီးကျးတဖၣ်အိၣ်၀ဲအသိး သုးမီၤစိရိၤကဘီယူၤ ဟဲတ့ၢ်လီၤမ့ၣ်ပိၢ်(၈)ဖျၢၣ်အဂ့ၢ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ကပၤန့ၣ် ဖဲအပူၤကွံာ်စှၤသီအခါ ပယီၤသုးတီၢ်မၤဒၢၣ်၀ဲလီၢ်က၀ီၤသးစၢ်လၢအဟဲက့ၤစိာ်ကသံၣ်အံၤတဂၤဒီးဟံကွံာ်၀ဲကသံၣ်ကသီဒီးစ့သ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ သးစၢ်လၢပယီၤသုးတီၢ်မၤဒၢၣ်၀ဲတဂၤအံၤအိၣ်ဟဲက့ၤလၢကၠၤအ့စ့ၣ်ကၠံ၀့ၢ်ဟဲက့ၤစိာ်ဃုာ်၀ဲကသံၣ်ကသီဒီး ဖဲအတလၢထီၣ်၀့ၢ်ဟးထီၣ် သၢတၢၣ်သ၀ီခိၣ်ထိး ပယီၤသုးခီၣ်သုးရ့ၣ်(၂၈၃)တြဲၤအံၤန့ၣ် ပယီၤသုးသံမံသမိးထံၣ်၀ဲ ကသံၣ်ကသီတဖၣ်အဃိလိာ်ဘၢလိာ်ကွီၢ်အီၤလၢအဆီၣ်ထွဲမၤစၢၤတၢ်ပၢၢ်ဆၢကရူၢ်ဒီးတီၢ်မၤဒၢၣ်၀ဲအဂ့ၢ်န့ၣ် သးစၢ်လၢပယီၤသုးတီၣ်မၤဒၢၣ်အီၤတဂၤအံၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တလၢထီၣ်တြဲၤန့ၣ်အ၀ဲသ့ၣ်ကိးပတုာ်ၦၤႉအသမံသမိးပတၢ်ဘိၣ်လူလီၤ၀ဲႇထံၣ်ကသံၣ်ဘိၣ်ဘျီဒု အတဲၦၤလၢသုကလဲၤဆှၢန့ၢ်ကီၢ်သူလ့ၤကသံၣ်ဒၢးဧါႉပတဲအီၤတမ့ၢ်ဘၣ်ကသံၣ်သရၣ်မုၣ်အိၣ်လၢသ၀ီပူၤတဂၤမၢပဟဲက့ၤစိာ်န့ၢ်အီၤလီၤႉပတဲအီၤဒ်န့ၣ်နါက့တန့ၢ်ဘၣ်ႉအ၀ဲသ့ၣ်သမံသမိးၦၤႉမ့၀ံၤအထံးယၤဒီးကျိခံႇယခိၣ်သွံၣ်လီၤဒီးအက့ၤကိးသမံသမိးယၤလၢကျဲကပၤကျးပူၤမီၤနီၤႉအသမံသမိးယၤကအိၣ်(၁)နၣ်ရံၣ်ဃၣ်ဃၣ်၀ံၤပျၢ်လီၤက့ၤယၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လီၢ်က၀ီၤသးစၢ်လၢအဟဲက့ၤစိာ်န့ၢ်၀ဲကသံၣ်သရၣ်မုၣ်တဂၤအကသံၣ်အံၤပယီၤသုးတီၢ်မၤဒၢၣ်အီၤနးနးကလဲာ်တကးဒံးဘၣ်အမဲာ်ညါဟံးကွံာ်ကသံၣ်ကသီတနီၤဒီးစ့(၂၂၅ႇ၀၀၀)ကၠးညါအဂ့ၢ်န့ၣ် သးစၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးလၢအတီၣ်မၤဒၢၣ်သးစၢ်တဖၣ်အံၤန့ၣ်သုးဟံးန့ၢ်တၢ်စိတၢ်ကမီၤ၀ံၤအလီၢ်ခံမ့ၢ်ၦၤသ့ၣ်တဖၣ်လၢအဟဲနုာ်လီၤဟူးဂဲၤအိၣ်၀ဲလၢဟီၣ်က၀ီၤဖဲန့ၣ်အပူၤဒီးလၢကၠၤအ့စ့ၣ်ကၠံ၀့ၢ်ချၢတၢ်လီၢ်သ့ၣ်တဖၣ်န့ၣ်စ့ၢ်ကီးအ၀ဲသ့ၣ်ဆီလီၤ၀ဲတၢ်အိၣ်ခိးလီၢ်အိၣ်ခိးသမံသမိးကမျၢၢ်လၢအဟးထီၣ်က့ၤလီၤတဖၣ်ထီဘိလီၤအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ပယီၤသုးအတၢ်ဖံးတၢ်မၤဒ်အံၤအဖီခိၣ်န့ၣ်ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စံး၀ဲလၢ “ဖီၣ်စုက၀ဲၤတၢ်သဘံၣ်သဘုၣ်အဃိန့ၣ်ကမျၢၢ်သ့ၣ်တဖၣ်အတၢ်ဘံၣ်တၢ်ဘၢတအိၣ်ဘၣ်ႉနီၢ်ခိမ့ၢ်ဂ့ၤနီၢ်သးမ့ၢ်ဂ့ၤတၢ်လဲၤထီၣ်က့ၤလီၤသဘျ့တအိၣ်ဘၣ်ႉမ့၀ံၤဒီးလၢတၢ်ဒိးန့ၢ်ဘၣ်တၢ်ကူစါယါဘျါသ့ၣ်တဖၣ်အံၤတၢ်မၤဘၣ်ဒိအီၤမီၤနီၤႉၦၤစိာ်ကသံၣ်ကသီတဲ၀ဲလၢၦၤမၤစၢၤကီၢ်သူလ့ၤမၤဒၢၣ်၀ဲဒ်အံၤခီန့ၣ်တီတီအဲၣ်ဒိးမၤနၢၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဟီၣ်က၀ီၤဖဲန့ၣ်အပူၤဒူသ၀ီတဖၣ်ခီဖျိအိၣ်ယံၤ၀ဲဒီးတၢ်ဆါဟံၣ်ႇကသံၣ်ဒၢးအဃိလီၢ်က၀ီၤကမျၢၢ်တဖၣ်အါဒၣ်တက့ၢ်န့ၣ်လဲၤကူစါယါဘျါဟံးန့ၢ်အီၣ်ကသံၣ်လၢကသံၣ်သရၣ်/မုၣ်လၢအိၣ်သ၀ီပူၤတဖၣ်အအိၣ်လီၤအဃိ ကသံၣ်ကသီလၢတၢ်သူ၀ဲသ့ၣ်တဖၣ်အံၤတၢ်လဲၤထီၣ်ၦ့ၤအီၤလၢ၀့ၢ်ပူၤတၢ်ဆါကသံၣ်ကျးပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်လၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်လၢကညီကီၢ်စဲၣ်ဒူသ၀ီတဖၣ်အပူၤတၢ်ကးတံာ်ကွံာ်၀ဲတၢ်ဟ့ၣ်ကသံၣ်ဒၢးဒီးတၢ်ဆါဟံၣ်သ့ၣ်တဖၣ်န့ၣ်လီၤႉလၢဟီၣ်က၀ီၤတၢ်လီၢ်တနီၤအပူၤခီဖျိတၢ်ဒုးကဲထီၣ်တလီၢ်လီၢ်ဒီးပယီၤသုးအိၣ်ခိးဖီၣ်သမံသမိးတၢ်လၢကျဲပူၤအိၣ်အဃိလီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢကကူစါယါဘျါသးအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)တၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် လူၤသီကီၢ်ဆၣ်အပူၤန့ၣ် ဖဲမဟါလါယနူၤအါရံၤ ၁၂ သီ ဟါခီ ၂ နၣ်ရံၣ်အဆၢကတီၢ်န့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ ပ့က့ကရူၢ် လ့၀ါသ၀ီပူၤအဃိ ဘၣ်သံ၀ဲလီၢ်က၀ီၤသ၀ီဖိ(၅)ဂၤ အကျါပၣ်ဃုာ်၀ဲခရံာ်ဖိသရၣ်ဒိၣ်တဂၤဒီး ဘၣ်ဒိ၀ဲ(၇)ဂၤအဂ့ၢ်န့ၣ် ဟီၣ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ ဖဲမဟါမုၢ်ဃ့ၢ်လီၤ ၂ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ လ့၀ါသ၀ီဖီခိၣ်(၆)ဖျၢၣ်ဒီးလီၤတဲာ်ပိၢ်ဖးထီၣ်လၢတၢ်ဘါယွၤသရိာ်ဖီခိၣ်အဃိခဲးသလ့းသရၣ်ဒိၣ်ဒီးကမျၢၢ်ဘၣ်သံဘၣ်ဒိဘၣ်ထံး၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅) ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲ ၁၂ သီ မုၢ်ဃ့ၢ်လီၤ ၂ နၣ်ရံၣ်အခါန့ၣ် သုးမီၤစိရိၤကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်(၆)ဖျၢၣ် လၢလူၤသီကီၢ်ဆၣ်...

လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါယနူၤအါရံၤ ၁၁ သီအနံၤန့ၣ် (Ba Nyunt)Telegram Channel တီၣ်ထီၣ်ရၤလီၤတၢ်ကစီၣ်လၢ ကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲ တီနီၢ်ထံလီၤဆှူဒီးစ့ၣ်ဖူကစၢၢ်အဘၢၣ်စၢၤန့ၣ် (KNLA)ဒီး(PDF)တမျာ်၀ဲ(စွ့ၤလၣ်ယီၤ)သိလ့ၣ်တီၣ်ၦၤလဲၤတၢ်ဖိဒီးမၤပိၢ်ဖးထီၣ်ကျဲအံၤမ့ၢ်တၢ်ကစီၣ်လၢအကမၣ်လီၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ (Ba Nyunt) Telegram Channel ပာ်ဖျါ၀ဲလၢ (KNLA)ဒီး (PDF)တဖၣ်ကိးတီၢ်၀ဲသိလ့ၣ်တီၣ်ၦၤလဲၤတၢ်ဖိ၀ံၤ တမျာ်ဟံကွံာ်၀ဲၦၤထူၦၤစ့ႇလီတဲစိႇတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်တဖၣ်ဒီး မၤပိၢ်ဖးထီၣ်၀ဲကျဲမုၢ်ဖးဒိၣ်အံၤအဃိ သိလ့ၣ်အမဲာ်ထံကလၤဟးဂီၤ၀ဲ (၃) ဘ့ၣ်အသိးတီၣ်ဖျါထီၣ်ဃုာ်၀ဲ ကျဲဟးဂီၤတၢ်ဂီၤ (၂) ဘ့ၣ်ဒီးစွ့ၤလၣ်ယီၤသိလ့ၣ် တၢ်ဂီၤ (၃) ဘ့ၣ် န့ၣ်လီၤႉ တၢ်ပိၢ်ဖးကဲထီၣ်သးလၢမၠၣ်၀တံၣ်–ကီးတရံးအ့ရှါကျဲမုၢ်ခိၣ်အိၣ်၀ဲဘၣ်ဆၣ် ဘၣ်ဃးဒီးတၢ်တမျာ်တၢ်ဂ့ၢ်ကဲထီၣ်သးအံၤ တနၢ်ဟူ၀ဲဘၣ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲအသိး...

လါယနူၤအါရံၤ ၁၂ သီႇ ၂၀၂၃ သီႇ ခ့ၣ်အဲးစံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ်နီၣ်ဂံၢ်(၁)တိၤလၢတၢ်ကးတံၢ်ဃာ်အီၤယံၤ (၃)နံၣ်ဘျဲၣ်အံၤ ဖဲတနံၤအံၤလါယနူၤအါရံၤ ၁၂ သီ ဂီၤခီအဆၢကတီၢ်န့ၣ် တၢ်စးထီၣ်က့ၤအိးထီၣ်ကဒါ၀ဲလံဒီး ကတီၢ်ခဲအံၤၦၤဟးထီၣ်က့ၤလီၤလၢမဲၢ်ဆီး၀့ၢ်ပူၤတအိၣ်ဒံး၀ဲဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲတနံၤအံၤဂီၤခီ ၈း၃၀ ဃၣ်ဃၣ်အဆၢကတီၢ်န့ၣ် တၢ်မၤ၀ဲတၢ်အိးထီၣ်မၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ် နီၣ်ဂံၢ်(၁)တိၤမူးတၢ်ရဲၣ်တၢ်ကျဲၤဒီးမူးအိးထီၣ်ဘျီ၀ဲအံၤအပူၤန့ၣ်မဲၢ်ဆီးပၢပြးၦၤဘၣ်မူဘၣ်ဒါႇမၠၣ်၀တံၣ်သုးမီၤစိရိၤပၢပြးကရူၢ်ဒီးခံခီခံကပၤတၢ်မၤကစၢ်တနီၤဟဲထီၣ်အိးထီၣ်၀ဲန့ၣ်လီၤႉ “တိၤစးထီၣ်အိးထီၣ်ဖဲမဂီၤလီၤအဃိၦၤတဟးထီၣ်က့ၤလီၤနီတဂၤဒံးဘၣ်ႉမ့ၢ်သိလ့ၣ်လဲႇတၢ်ပျဲဒီးတၢ်သိၣ်တၢ်သီတဖၣ်အိၣ်ဒ်လဲၣ်န့ၣ်ပတသ့ၣ်ညါနီတမံၤဒံးဘၣ်ႉတိၤကပၤကျဲနါက့ပံးႇလၢက၀ီၤဒ့ပူၤနါက့သုးသိလ့ၣ်ပၢၤကီၢ်သိလ့ၣ်ဟးဆှၣ်တၢ်အဃိၦၤအိးထီၣ်တိၤန့ၣ်ၦၤတလဲၤနီတဂၤဘၣ်ႉအိၣ်ထဲအ၀ဲသ့ၣ်ကရူၢ်လီၤ” အဂ့ၢ်န့ၣ် ကမျၢၢ်လၢအိၣ်ဘူးဒီးနီၣ်ဂံၢ် (၁) တိၤတဂၤစံး၀ဲန့ၣ်လီၤႉ စးထီၣ်ဖဲအပူၤကွံာ်(၂၀၂၀)အခါ ခီဖျိခိ၀ံၣ်–၁၉ တၢ်ဆါဘၣ်ကူဘၣ်ဂာ်ရၤလီၤသးအဃိ တၢ်ကးတံၢ်ကွံာ်၀ဲမၠၣ်၀တံၣ်–မဲၢ်ဆီးတၢ်ရ့လိာ်မုာ်လိာ်နီၣ်ဂံၢ်(၁)တိၤအံၤန့ၢ်၀ဲ(၃)နံၣ်ဃၣ်ဃၣ်လံဒီး ဘၣ်ဆၣ်ဖဲတနံၣ်အံၤ(၂၀၂၃)လါယနူၤအါရံၤ ၁၂ သီအနံၤအံၤန့ၣ် ဘၣ်တၢ်က့ၤထီၣ်ကဒါတိၤအံၤလံဒီးတၢ်စးထီၣ်ပျဲဟးထီၣ်က့ၤလီၤကဒါ၀ဲလံန့ၣ်လီၤႉ တၢ်က့ၤအိးထီၣ်ကဒါတိၤခဲအံၤတၢ်ပာ်ပနီၣ်သိလ့ၣ်အဘူးအလဲႇတၢ်ဟးထီၣ်က့ၤလီၤႇသိလ့ၣ်ဒီးပနံာ်တၢ်ဖိတၢ်လံၤအတၢ်အိၣ်သးအိၣ်ဒ်လဲၣ်န့ၣ်တၢ်တသ့ၣ်ညါ၀ဲဒံးဘၣ်အဃိဘၣ်အိၣ်ခိးကွၢ်လၢၦၤဟးထီၣ်က့ၤလီၤတၢ်အိၣ်သးအဖီခိၣ်ဒံးအဂ့ၢ်န့ၣ် မၠၣ်၀တံၣ်–မဲၢ်ဆီး ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါတိၤလီၤက့ၤအိးထီၣ်ကဒါမ့မ့ၢ်တၢ်ခိးထၢတၢ်အဘူးအလဲလီၢ်တအိးထီၣ်ဒံးဘၣ်အဃိ နီဒိးလဲသိလ့ၣ်တဘူၣ်ဒံးဘၣ်ဒီးနၢ်ဟူလၢမဲၢ်ဆီး၀့ၢ်န့ၣ်ၦၤလဲၤထီၣ်န့ၢ်ထဲလၢသိလ့ၣ်အိၣ်ဒီးလံာ်လဲၢ်တဖၣ်လီၤအသိး တသ့ၣ်ညါဘၣ်တၢ်ဘူးတၢ်လဲဒီးတၢ်သိၣ်တၢ်သီတၢ်အိၣ်သးတဖၣ်ဒံးဘၣ်အဃိၦၤပနံာ်ကၤတၢ်ဖိႇၦၤမၤတၢ်ဖိလၢအလဲၤတူၢ်ငါတနံၤဂီၢ်သ့ၣ်တဖၣ်လဲၤထီၣ်လၢန့ၣ်တကပၤတဘူၣ်ဒံး၀ဲဘၣ်အဂ့ၢ်န့ၣ် မၠၣ်၀တံၣ်–မဲၢ်ဆီး ၦၤနီသိလ့ၣ်ဖိတဂၤစံး၀ဲအသိး သ့ၣ်ညါဘၣ်န့ၣ်လီၤႉ

လါယနူၤအါရံၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ပယီၤသုးတၢ်အိၣ်ခိးလီၢ်လၢအိၣ်ဆီလီၤသးဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ သ့ၣ်ဘီဘိ–ဂီၤလ့ၤကျဲဒီတကျိၤအံၤတဖၣ် ခီဖျိအိၣ်ခိးသမံသမိး၀ဲလီၢ်က၀ီၤကမျၢၢ်လၢအလဲၤက့ၤဖံးမၤဟးထီၣ်က့ၤလီၤတဖၣ်အဃိ တၢ်ကီတၢ်ခဲအိၣ်ထီၣ်လၢ အီၣ်အီအိၣ်ဆိးအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢဖလူ–ဂီၤလ့ၤကျဲမုၢ် သိထၣ်ကွ့ၣ်ႇကၠီၤ၀ါဘိႇမွ့ၤနကီၤႇမွ့ၤသိကီၤႇသဲဖၠူၤခၠီႇကၠီးခဲးႇသ့ၣ်ဘီဘိႇဘျၢၣ်ဒိၣ်ႇ အူကြ့ၣ်ထၣ်ႇဂီၤလ့ၤကျဲတကပၤန့ၣ်ခီဖျိပယီၤသုးဆီလီၤ၀ဲဒၣ်တၢ်အိၣ်ခိးလီၢ်အိၣ်ခိးသမံသမိးတၢ်အဃိ လီၢ်က၀ီၤကမျၢၢ်လၢအလဲၤက့ၤဖံးမၤဟးထီၣ်က့ၤလီၤသ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကမျၢၢ်လၢအဃ့ၢ်တၢ်ဒုးတဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်အိၣ်ခိးသမံသမိးသံဒိးသံကွၢ်တၢ်ဆူၣ်မးႉနမ့ဟဲက့ၤၦ့ၤတၢ်အီၣ်တၢ်အီန့ၣ်အ၀ဲသ့ၣ်ဃ့အီၣ်၀ဲႉ ဟုသးနါက့အ၀ဲသ့ၣ်တပျဲတီၣ်၀ဲအါအါဘၣ်ႉအ၀ဲသ့ၣ်တဲ၀ဲလၢကသ့ကွံာ်၀ဲဒ်န့ၣ်ႉနကလဲၤထီၣ်ၦ့ၤဟုသးလၢ၀့ၢ်ပူၤတတလီးခံတလီးဒ်န့ၣ်မးတသ့န့ၣ်ႉအ၀ဲသ့ၣ်မ့ထံၣ်သိဒီပိႇဟုသးဒီထၢၣ်န့ၣ်ကွၢ်၀ဲတဘၣ်အမဲာ်အါအါဘၣ်” အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိပယီၤသုးကျိၤတဖၣ်ဆီလီၤသုးကလၢၤႇဆီလီၤတြဲၤအိၣ်ခိးတၢ်လီၢ်ဒီးနုာ်လီၤမၤ၀ဲဒုးယၤတၢ်ဟူးဂဲၤလၢ မၠၣ်၀တံၣ်–ဂီၤလ့ၤကျဲအဃိ တုၤလၢတနံၣ်အံၤ(၂၀၂၃)လါယနူၤအါရံၤတနံၣ်ဘျဲၣ်အတီၢ်ပူၤအံၤန့ၣ် လီၢ်က၀ီၤပူၤဒူသ၀ီအဖျၢၣ်(၂၀)ဃၣ်ဃၣ်ကမျၢၢ်တဖၣ်တက့ၤဘၣ်လၢအဒူသ၀ီတၢ်လီၢ်တၢ်ကျဲဒံးဘၣ်န့ၣ်လီၤႉဒ်န့ၣ်အသိးခီဖျိပယီၤသုးအိၣ်ခိးသမံသမိးလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်အဃိကဲထီၣ်တၢ်ကီတၢ်ခဲလၢတၢ်လဲၤထီၣ်က့ၤလီၤဒီးတၢ်ဖံးအီၣ်မၤအီၣ်အဂ့ၢ်န့ၣ်လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “ပယီၤသုးတဖၣ်အံၤပလဲၤလၢကျီးပူၤႇဘ့ခ့ကျီးပူၤန့ၣ်ဟဲက့ၤဒီးသမံသမိးႇလဲၤခီဒၢးသမံသမိးအဃိ ခဲအံၤနအိၣ်လၢၦၤလီၢ်အိၣ်ကဒုလီၢ်နါက့တညီဘၣ်ႉနအိၣ်လၢနကဟံၣ်ကစၢ်ကျီးပူၤခီဒၢးတညီႉနကလဲၤထီၣ်က့ၤလီၤဒၢးတညီဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်(၂၀၂၂)နံၣ်အတီၢ်ပူၤအခါန့ၣ်ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤ ဒုးယၤတၢ်ဖ့ၣ်ဆၢကဲထီၣ်၀ဲဒီတနံၣ်ဃၣ်ဃၣ်ညါဒီး ကတီၢ်ခဲအံၤတၢ်ဒုးလီၤကယး၀ဲလံဘၣ်ဆၣ် ခံခီခံကပၤအဘၢၣ်စၢၤဒုးယၤတၢ်ဖ့ၣ်ဆၢႇဒုးယၤတၢ်ဟူးတၢ်ဂဲၤဆဲးကဲထီၣ်ဒံး၀ဲတုၤလၢခဲအံၤတစုန့ၣ်လီၤႉလၢတၢ်န့ၣ်အဃိတၢ်အိၣ်သးအံၤအိၣ်လၢတၢ်ဒုးက့ၤကဲထီၣ်ကဒါသ့ဒံး၀ဲအဂ့ၢ်န့ၣ်ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ တကီၢ်ခါအံၤလၢမၠၣ်၀တံၣ်–ဂီၤလ့ၤကျဲဒီတကျိၤ ဖလူလီၢ်က၀ီၤ မဲၢ်ထီးသလ့ႇမ့လဲၣ်ပၤႇပဟံၣ်ကျီးႇထံမဲး၀ါခံႇ အ့ၤကၠ့မၠဲၤသ၀ီတကပၤန့ၣ်လီၢ်က၀ီၤကမျၢၢ်ၦၤဃ့ၢ်တၢ်ဒုးဖိက့ၤအိၣ်လၢသ၀ီပူၤအိၣ်၀ဲတနီၤလံ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဆၣ်လၢလ့က့ၣ်ကိာ်၀့ၢ်သီ(က၀ီၤဒ့)ဃုာ်ဒီးသ့ၣ်ဘီဘိႇအူကြ့ၣ်ထၣ်သ၀ီတကပၤန့ၣ်လီၢ်က၀ီၤကမျၢၢ်က့ၤအိၣ်လၢသ၀ီပူၤတအိၣ်ဒံး၀ဲဘၣ်ဒီးခီဖျိပယီၤသုးအိၣ်ခိးသမံသမိးတၢ်အိၣ်ဒံးအဃိၦၤဟဲဆီၣ်ထွဲမၤစၢၤတၢ်အီၣ်တၢ်အီတအိၣ်၀ဲလၢၤဘၣ်အဖီခိၣ်တၢ်ကီတၢ်ခဲအိၣ်ထီၣ်လၢကမျၢၢ်ၦၤဃ့ၢ်တၢ်ဒုးဖိတဖၣ်အဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါယနူၤအါရံၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၄)ဟီၣ်က၀ီၤ ဘျံးဒ၀ဲၢ်ကီၢ်ရ့ၣ် လၢၢ်ဒိၣ်စိကီၢ်ဆၣ် ဒ၀ဲၢ်–ထံခံကျဲန့ၣ် ပယီၤဒွဲၣ်အူအီၣ်(၀ၣ်ကူၣ်)သ၀ီပူၤ ဟံၣ် ၁၅ ဖျၢၣ်ဒီး လီၢ်က၀ီၤကမျၢၢ်လၢအဃ့ၢ်ထီၣ်တဖၣ်တနီၤန့ၣ် တုၤလၢခဲအံၤဟဲက့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါယနူၤအါရံၤ ၈ သီအခါန့ၣ် ပယီၤသုးနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်ဖဲအ၀ဲသ့ၣ်ဟဲတုၤလၢ (၀ၣ်ကူၣ်)သ၀ီပူၤအဆၢကတီၢ် ဒွဲၣ်အူအီၣ်ဟံၣ်(၁၅)ဖျၢၣ်လၢအိၣ်ကျဲမုၢ်ကပၤအံၤအဃိ လီၢ်က၀ီၤသ၀ီဖိတဖၣ်ဃ့ၢ်ထီၣ်၀ဲသ၀ီဒီတဖျၢၣ်အဂ့ၢ်န့ၣ်လီၢ်က၀ီၤသ၀ီဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟဲတုၤလၢသ၀ီပူၤဘျီဟံၣ်လၢအိၣ်ကျဲကပၤတဖၣ်န့ၣ်ဒွဲၣ်အူအီၣ်၀ဲအဃိ သ၀ီဖိတဖၣ်ဘၣ်ဃ့ၢ်ထီၣ်ခဲလၢာ်လီၤႉ သ၀ီဖိတဖၣ်အ၀ဲသ့ၣ်စံၣ်န့ၣ်တၢ်လီၢ်တၢ်ကျဲတအိၣ်ဘၣ်အဃိ လဲၤစံၣ်၀ဲလၢန့ၣ်တဘျီလၢအံၤတဘျီဒ်န့ၣ်လီၤႉခဲအံၤပယီၤသုးလဲၤတလၢသ၀ီလံတအိၣ်လၢသ၀ီပူၤလၢၤဘၣ်နါက့သ၀ီဖိခီန့ၣ်ဘၣ်ယိၣ်၀ဲလၢပယီၤသုးကဟဲက့ၤကဒါမီၤနီၤႉသ၀ီဖိတနီၤန့ၣ်ဟဲက့ၤအိၣ်လၢသ၀ီပူၤအိၣ်ႉတနီၤန့ၣ်ဟဲက့ၤအိၣ်၀ဲတဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးသ့ၣ်တဖၣ်အံၤလၢကဟဲဆီတလဲသုးလၢထံခံအဂီၢ်အိၣ်ဟဲထီၣ်၀ဲလၢဒ၀ဲၢ်၀့ၢ်တဆီဒီး ဖဲအ၀ဲသ့ၣ်ဟဲတုၤဖဲ(၀ၣ်ကူၣ်)သ၀ီအဆၢကတီၢ်န့ၣ်ဒွဲၣ်အူအီၣ်ကွံာ်သ၀ီဖိအဟံၣ်ဒ်အံၤလီၤအဂ့ၢ်န့ၣ် (ခ့ၣ်အဲၣ်ယူၣ်)ဘျံးဒ၀ဲၢ်ကီၢ်ဆၣ်(ကွဲၤကလုၢ်)ပာ်ဖျါ၀ဲန့ၣ်လီၤႉ လီၢ်က၀ီၤသ၀ီဖိလၢအဂၤတဂၤစ့ၢ်ကီးစံး၀ဲ“ပယီၤသုးဟဲတုၤလၢသ၀ီပူၤအခါန့ၣ်ဘၣ်လၢပစံၣ်ထီၣ်လံအဃိပတထံၣ်ဘၣ်ႉတနီၤန့ၣ်ၦၤတဲလၢဖဲအ၀ဲသ့ၣ်ဟဲတုၤဖဲ(၀ၣ်ကူၣ်)သ၀ီန့ၣ်ဟဲထီၣ်ဒီးအခီၣ်လီၤႉလၢအ၀ဲသ့ၣ်လီၢ်ခံန့ၣ်သိလ့ၣ်ပၣ်မီၤနီၤႉဟံၣ်လၢအိၣ်ကျဲကပၤတဖၣ်န့ၣ်အဒွဲၣ်အူအီၣ်ကွံာ်၀ဲႇတၢ်ဖိတၢ်လံၤနါက့အမၤဟးဂီၤ၀ဲစ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ (၀ၣ်ကူၣ်) သ၀ီပူၤအံၤအါဒၣ်တက့ၢ်န့ၣ်ကညီဖိတဖၣ်အိၣ်ဆိး၀ဲဒီးသ၀ီပူၤအံၤဟံၣ်ခိၣ်အိၣ်၀ဲအဖျၢၣ် (၂၀၀) ဃၣ်ဃၣ်ဒီးကတီၢ်ခဲအံၤၦၤနီၣ်ဂံၢ်အဂၤ (၂၀၀၀) ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဒ်(Southern Monitor)လၢအဃုသ့ၣ်ညါအိၣ်ခိးကွၢ်သုးမီၤစိရိၤအတၢ်မၤကမၣ်ၦၤဂ့ၢ်၀ီခွဲးယာ်တၢ်အိၣ်သးအံၤ ထုးထီၣ်ပာ်ဖျါ၀ဲအသိးန့ၣ် စးထီၣ်ဖဲအပူၤကွံာ်(၂၀၂၁)လါစဲးပထ့ဘၢၣ်တုၤလၢ(၂၀၂၂)လါဒံၣ်စ့ဘၢၣ်န့ၣ် ပယီၤသုးဒွဲၣ်အူအီၣ်ကမျၢၢ်အဟံၣ်လၢတနီသရံၣ်ကီၢ်ခီဒိၣ်အပူၤအိၣ်၀ဲခဲလၢာ်(၁၈၈)ဖျၢၣ်ညါန့ၣ်လီၤႉ

လါယနူၤအါရံၤ ၁၁ သီႇ ၂၀၂၃ သီႇ ခ့ၣ်အဲးစံၣ် ဒ်သိးကဒိးန့ၢ်ဘၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ဒီးတၢ်တုၤသိးထဲသိးအဂီၢ်န့ၣ်ကပာ်ဖှိၣ်မၤသကိးတၢ်ဒီးကလုာ်ဒူၣ်သိၣ််မှံၤသးစၢ်သ့ၣ်တဖၣ်အဂ့ၢ်န့ၣ် (KYO)ကရၢခိၣ် စီၤလၢၢ်နၢၤ စံးလီၤ၀ဲဖဲလီၢ်ခၢၣ်သးကညီသးစၢ်ကရၢခီကရဲး ၆ ၀ီတ၀ီ တၢ်အိၣ်ဖှိၣ်ပူၤန့ၣ်လီၤႉ ကလုာ်ဒူၣ်ခဲလၢာ်အိၣ်ဆိး၀ဲတပူၤဃီလၢကီၢ်ပယီၤပူၤအံၤအဃိလၢတၢ်ထီဒါသုးမီၤစိိရိၤဒီးကီၢ်ပယီၤဂ့ၢ်၀ီအပူၤန့ၣ် ကလုာ်ဒူၣ်သးစၢ်တဖၣ်ခဲလၢာ်အသနၢၣ်အံၤမ့ၢ်တၢ်လၢအရ့ဒိၣ်၀ဲတခါအဃိအလီၢ်အိၣ်လၢပကဘၣ်ဖီၣ်လိာ်စုပာ်ဖှိၣ်မၤသကိးတၢ်ဒီးကလုာ်ဒူၣ်သးစၢ်တဖၣ်အဂ့ၢ်န့ၣ်(KYO)လီၢ်ခၢၣ်သး ၦၤပၢၤလီၢ်ဆ့ၣ်နီၤ စီၤလၢၢ်နၢၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပ၀ဲဒၣ်သူၣ်ဘီၣ်သးစၢ်တဖၣ်အံၤလၢကလုာ်အဂီၢ်ဒီးတၢ်တုၤသိးထဲသိးအဂီၢ်န့ၣ်တဘၣ်မ့ၢ်ထဲလၢပဟူးဂဲၤဖံးမၤတၢ်လၢပကစၢ်ကလုာ်အဂီၢ်တခါဘၣ်ဒီးအလီၢ်အိၣ်၀ဲလၢပကဘၣ်ဆိမိၣ်မၤသကိးတၢ်ဒီးကလုာ်ဒူၣ်လၢအဂၤတဖၣ်လီၤႉတၢ်အဃိန့ၣ်ဒ်သိးပကဒိးန့ၢ်ဘၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်လၢစဲၤနီၢ်အဂီၢ်န့ၣ် ပ၀ဲကညီသးစၢ်သ့ၣ်တဖၣ်အံၤ ပကဘၣ်ပာ်ဖှိၣ်မၤသကိးတၢ်ဒီးကလုာ်ဒူၣ်သူၣ်ဘီၣ်သးစၢ်လၢအဂၤတဖၣ်လီၤ”အဂ့ၢ်န့ၣ်စံး၀ဲန့ၣ်လီၤႉ ဖဲတလါအံၤလါယနူၤအါရံၤ ၃ သီတုၤလၢ ၇ သီအနံၤန့ၣ် လၢခ့ၣ်အဲၣ်ယူၣ်–ကညီဒီကလုုာ်စၢဖှိၣ်ကရၢ တၢ်ပၢဟီၣ်က၀ီၤတၢ်လီၢ်တတီၤအပူၤန့ၣ် တၢ်မၤ၀ဲ(၆)၀ီတ၀ီ KYO လီၢ်ခၢၣ်သးကညီသးစၢ်ခီကရဲး တၢ်ဃုထၢဒီးဖဲန့ၣ်တၢ်ဃုထၢထီၣ်၀ဲလီၢ်ခၢၣ်သးပၢဆှၢတၢ်ကမံးတံာ်(၁၁)ဂၤဒ်အမ့ၢ် တကီၢ်ခါၦၤပၢၤလီၢ်ဆ့ၣ်နီၤ စီၤလၢၢ်နၢၤႇၦၤပၢၤလီၢ်ဆ့ၣ်နီၤ–၂ စီၤဆၢခုၣ်ကီၢ်ႇ နဲၣ်ရွဲၣ် စီၤကိဒါႇ နဲၣ်ရွဲၣ်သဃဲၤ(၁)နီၢ်ဂ့ၤဆၣ်မူဒီး နဲၣ်ရွဲၣ်သဃဲၤ–၂ စီၤအဲၣ်ထံကီၢ် သ့ၣ်တဖၣ်န့ၣ်လီၤႉ လီၢ်ခၢၣ်သးကညီသးစၢ်ကရၢ(KYO)ခီကရဲးတၢ်အိၣ်ဖှိၣ်ဘျီ၀ဲအံၤအပူၤန့ၣ်ခ့ၣ်အဲၣ်ယူၣ်တၢ်ပၢဟီၣ်က၀ီၤကညီသူၣ်ဘီၣ်သးစၢ်ႇကီၢ်ပယီၤဒီတဘ့ၣ်ပူၤကညီသးစၢ်ဒီးကီၢ်ကၠီၣ်တဲၣ်ပူၤကညီသးစၢ်တဖၣ်ဃုာ်ဒီးကညီသးစၢ်ခၢၣ်စးခဲလၢာ်အဂၤ(၆၀)ဃၣ်ဃၣ်ဟဲထီၣ်၀ဲန့ၣ်လီၤႉ ကမံးတံာ်အသီလၢတၢ်ဃုထၢထီၣ်အီၤလၢလီၢ်ခၢၣ်သးကညီသးစၢ်ကရၢခီကရဲး(၆)၀ီတ၀ီအပူၤအံၤသ့ၣ်တဖၣ် ကဘၣ်ဟူးဂဲၤဖံးမၤတၢ်လၢကညီကလုာ်အဂီၢ်တကးဒံးဘၣ်ယနာ်လၢကပာ်ဖှိၣ်မၤသကိးတၢ်ဒီးကလုာ်ဒူၣ်သိၣ်မှံၤသးစၢ်လၢအဂၤတဖၣ်လီၤအဂ့ၢ်န့ၣ်(ဖၣ်အၣ်ကီၢ်ရ့ၣ်)တန့ဆါကီၢ်ဆၣ်သးစၢ်လၢအဟဲထီၣ်ခီကရဲးတဂၤ စံး၀ဲဒ်အံၤန့ၣ်လီၤႉ “(EC)ကရူၢ်လၢပဃုထၢထီၣ်အီၤတဖၣ်အံၤလၢယၤတဂၤန့ၣ်ယအဲၣ်ဒိးလၢတဘၣ်မ့ၢ်ကမၤတၢ်လၢကညီကလုာ်အဂီၢ်တခါလီၤဘၣ်ဒီးယနာ်လၢကလုာ်ဒူၣ်ဒီပုၢ်၀ဲၢ်လၢအိၣ်ကီၢ်ပယီၤပူၤတဖၣ်ခဲလၢာ်ကဂုာ်ကျဲးစၢးဟူးဂဲၤမၤ၀ဲလၢာ်လၢာ်ဆ့ဆ့လီၤ”...

လါယနူၤအါရံၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲတလါအံၤလါယနူၤအါရံၤထီၣ်တၢတနွံအခါ ပယီၤသုးလၢနုာ်လီၤဟူးဂဲၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤပူၤ ၆ ဂၤ ဟဲက့ၤစံၣ်ဖျိးထီၣ်လၢ ကညီဒီလုာ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ် အဂ့ၢ်န့ၣ် ခ့ၣ်အဲၣ်ယူၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ ကီကီးထၣ်ပယီၤသုးကလၢၤခီၣ်ချ့သုးရ့ၣ်(ခမရ–၄၀၄)သုးကျိၤ–၂ လၢအိၣ်(သုးက့ ၅)ဟီၣ်က၀ီၤ ဃိၣ်လိာ်ကျိကၢၢ်နံၤ အၦၤသုးဖိ ၆ ဂၤအံၤ ခီဖျိတူၢ်၀ဲခီၣ်၀ဲတၢ်ဆီၣ်တံၢ်မၤနၢၤတၢ်မၢဆူၣ်မၢစိးလၢသုးပူၤတကဲလၢၤဘၣ် အဃိဖဲအပူၤကွံာ်စှၤသီအခါဘၣ်ဟဲစံၣ်ဖျိးထီၣ်၀ဲဒ်အံၤလီၤအဂ့ၢ်န့ၣ်ပယီၤသုးဖိတဖၣ်အံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးဖိလၢအဟဲက့ၤစံၣ်ဖျိးထီၣ်အကျါတဂၤလၢအမ့ၢ်ကၠီၤမ့အူစံး၀ဲ“ပကစံၣ်ဖျိးန့ၣ်ပကူၣ်ထီၣ်ဃာ်ယံၤလံႇပတအဲၣ်ဒိးဖီၣ်ကျိလၢၤဘၣ်ႉပသးဟ့သုးမုၢ်ဒိၣ်ဒိၣ်မးလီၤႉပသုးကျိၤခိၣ်န့ၣ်အသူၣ်လီသးကွံ၀ဲအလီၢ်လၤမီၤနီၤႉအ၀ဲကွၢ်တၢ်လၢအလီၢ်လၤအဂီၢ်လီၤႉၦၤသုးဖိဘၣ်တၢ်တမံၤဂ့ၤတမံၤဂ့ၤန့ၣ်အတကနၣ်ဃုာ်၀ဲဘၣ်ႉမၤလၢအကစၢ်သးလီၤႉအဃိန့ၣ်ပတဲသကိးလိာ်သးဘျီပစံၣ်ဖျိးထီၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးဖိ ၆ ဂၤ လၢအဟဲစံၣ်ဖျိးထီၣ်ဆူ(KNLA)အအိၣ်တဖၣ်အံၤ တဟဲက့ၤစိာ်ဃုာ်၀ဲကျိချံၦာ်သၣ်နီတမံၤဘၣ်ဒီး ၦၤသ့ၣ်တဖၣ်အံၤန့ၣ်မ့ၢ်၀ဲအီၤကၠီၤလ့(၂၃)နံၣ်ႇန့ၤလ့အီၣ်(၂၀)နံၣ်ႇကၠီၤမ့အူ(၂၈)နံၣ်ႇပၠ့ၣ်ဖၠိအီၣ်(၁၉)နံၣ်ႇအီၤမိသူၤ(၂၃)နံၣ်ဒီးလၣ်၀့(၂၃)နံၣ်သ့ၣ်တဖၣ်န့ၣ်လီၤႉ ကီကီးထၣ်ပယီၤသုးကလၢၤအံၤသုးဂံၢ်ဘါကအိၣ်၀ဲအဂၤ(၄၀)ဘျဲၣ်ဒီးသုးဖိလၢတၢ်ဖီလာ်တဖၣ်အါဒၣ်တက့ၢ်န့ၣ်တအဲၣ်ဒိးဆဲးဖီၣ်၀ဲကျိလၢၤဘၣ်အသိးၦၤစံၣ်ဖျိးထီၣ်လၢသုးပူၤအိၣ်၀ဲအါမးလံအဂ့ၢ်န့ၣ် ပယီၤသုးဖိလၢအဟဲက့ၤစံၣ်ဖျိးထီၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ “ပသုးရ့ၣ်အသုးရ့ၣ်ခိၣ်နါက့တဂ့ၤဘၣ်ႉသုးကျိၤခိၣ်နါက့တဂ့ၤစ့ၢ်ကီးဘၣ်ႉတချုးလၢပစံၣ်ဖျိးထီၣ်ဒံးဘၣ်အခါန့ၣ်ၦၤစံၣ်ဖျိးထီၣ်အိၣ်ဃာ်လံမီၤနီၤႉလၢပသုးရ့ၣ်ပူၤန့ၣ်ဃုာ်ဒီးပ၀ဲသ့ၣ်တဖၣ်အံၤန့ၣ်ၦၤစံၣ်ဖျိးထီၣ်အိၣ်အဂၤ (၃၀) ဘျဲၣ် လံႉမ့ဆဲးလဲၤသးဒ်အံၤဒုအမျးကယၤ (၁၀၀) န့ၣ်သုးရ့ၣ်ကဟးဂီၤဒုကအိၣ်အမျးကယၤ (၈၀) ညါ”...

လါယနူၤအါရံၤ ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိ(၂၀၂၂)တနံၣ်အတီၢ်ပူၤန့ၣ်ကမျၢၢ်သံ၀ဲ(၄၁)ဂၤအဂ့ၢ်န့ၣ်ခ့ၣ်အဲၣ်ယူၣ်(သုးက့ ၅)မုၢ်တြီၢ်ကီၢ်ရ့ၣ်ထုးထီၣ်ပာ်ဖျါ၀ဲဖဲလါယနူၤအါရံၤ ၆ သီအခါန့ၣ်လီၤႉ (၂၀၂၂) တနံၣ်အတီၢ်ပူၤ သုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ် (သုးက့ ၅) ဟီၣ်က၀ီၤပူၤအိၣ်၀ဲ (၃၅) ဘျီဒီးတ့ၢ်လီၤ၀ဲမ့ၣ်ပိၢ်ချံအိၣ် (၁၂၀) ဖျၢၣ်ဃၣ်ဃၣ်ညါအသိးပယီၤသုးခးလီၤကျိဖးဒိၣ်ဆူသ၀ီပူၤအိၣ်၀ဲ (၂၀၀၁) ဖျၢၣ်ညါအဃိလီၢ်က၀ီၤကမျၢၢ်သံ (၄၁) ဂၤဒီးဘၣ်ဒိ၀ဲ (၉၉) ဂၤအဂ့ၢ်န့ၣ် (သုးက့ ၅) လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်အဟံၣ်အဃီဟးဂီၤကွံာ်၀ဲ(၉၄)ဖျၢၣ်ဒီး မ့ၣ်အူအီၣ်၀ဲတၢ်ဘါယွၤသရိာ်(၂)ဖျၢၣ်ႇကမျၢၢ်အဘုဖီအဖျၢၣ်(၁၀)တကးဒံးဘၣ်အမဲာ်ညါတၢ်ဘၣ်ဒိတၢ်ထံးဟးဂူာ်ဟးဂီၤလၢအဂၤအိၣ်၀ဲအါမးအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါဘူးကလၢၤအခါန့ၣ်ပယီၤသုးအတၢ်ဟူးတၢ်ဂဲၤလီၤစှၤ၀ဲလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤပျီပူၤဒီး ပထံၣ်ဘၣ်လၢအ၀ဲသ့ၣ်သူအါက့ၤ၀ဲလၢကဘီယူၤတကးဒံးဘၣ်သုးမီၤစိရိၤစုတီၤဖီလာ်သုးခိးကီၢ်ဆၢ(BGF)သုးကလၢၤအံၤခးလီၤ၀ဲကျိဖးဒိၣ်ဆူဒူသ၀ီပူၤတပယူာ်ဃီအဂ့ၢ်န့ၣ်ခ့ၣ်အဲၣ်ယူၣ်(သုးက့ ၅)ၦၤကတိၤတၢ်ပၢ ပဒိၣ်မါမါ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အပူၤကွံာ်မဟိတနံၣ်န့ၣ်ပယီၤသုးဟူးဂဲၤ၀ဲဒီးကဘီယူၤႉပထံၣ်ဘၣ်လၢအ၀ဲသ့ၣ်ခးလီၤတၢ်ဒီးကဘီယူၤဟဲအါထီၣ်လီၤႉဖဲနံၣ်ဘူးကလၢၤန့ၣ်ပထံၣ်ဘၣ်လၢအါဒၣ်တက့ၢ်န့ၣ်အ၀ဲသ့ၣ်ဟဲခးလီၤတၢ်ဒီးကဘီယူၤလီၤႉလီၤဆီဒၣ်တၢ်အ၀ဲသ့ၣ်ဟဲခးလီၤတၢ်လၢကၠိႇတၢ်ဆါဟံၣ်ႇတၢ်ဟ့ၣ်ကသံၣ်ဒၢးႇကမျၢၢ်အိၣ်ဆိးလီၢ်ကျဲတဖၣ်အပူၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(၂၀၂၂)တနံၣ်အတီၢ်ပူၤပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်- KNLA(သုးက့...