လါယနူၤအါရံၤ ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိ(၂၀၂၂)တနံၣ်အတီၢ်ပူၤန့ၣ်ကမျၢၢ်သံ၀ဲ(၄၁)ဂၤအဂ့ၢ်န့ၣ်ခ့ၣ်အဲၣ်ယူၣ်(သုးက့ ၅)မုၢ်တြီၢ်ကီၢ်ရ့ၣ်ထုးထီၣ်ပာ်ဖျါ၀ဲဖဲလါယနူၤအါရံၤ ၆ သီအခါန့ၣ်လီၤႉ
(၂၀၂၂) တနံၣ်အတီၢ်ပူၤ သုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ် (သုးက့ ၅) ဟီၣ်က၀ီၤပူၤအိၣ်၀ဲ (၃၅) ဘျီဒီးတ့ၢ်လီၤ၀ဲမ့ၣ်ပိၢ်ချံအိၣ် (၁၂၀) ဖျၢၣ်ဃၣ်ဃၣ်ညါအသိးပယီၤသုးခးလီၤကျိဖးဒိၣ်ဆူသ၀ီပူၤအိၣ်၀ဲ (၂၀၀၁) ဖျၢၣ်ညါအဃိလီၢ်က၀ီၤကမျၢၢ်သံ (၄၁) ဂၤဒီးဘၣ်ဒိ၀ဲ (၉၉) ဂၤအဂ့ၢ်န့ၣ် (သုးက့ ၅) လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်အဟံၣ်အဃီဟးဂီၤကွံာ်၀ဲ(၉၄)ဖျၢၣ်ဒီး မ့ၣ်အူအီၣ်၀ဲတၢ်ဘါယွၤသရိာ်(၂)ဖျၢၣ်ႇကမျၢၢ်အဘုဖီအဖျၢၣ်(၁၀)တကးဒံးဘၣ်အမဲာ်ညါတၢ်ဘၣ်ဒိတၢ်ထံးဟးဂူာ်ဟးဂီၤလၢအဂၤအိၣ်၀ဲအါမးအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဖဲအပူၤကွံာ်လါဘူးကလၢၤအခါန့ၣ်ပယီၤသုးအတၢ်ဟူးတၢ်ဂဲၤလီၤစှၤ၀ဲလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤပျီပူၤဒီး ပထံၣ်ဘၣ်လၢအ၀ဲသ့ၣ်သူအါက့ၤ၀ဲလၢကဘီယူၤတကးဒံးဘၣ်သုးမီၤစိရိၤစုတီၤဖီလာ်သုးခိးကီၢ်ဆၢ(BGF)သုးကလၢၤအံၤခးလီၤ၀ဲကျိဖးဒိၣ်ဆူဒူသ၀ီပူၤတပယူာ်ဃီအဂ့ၢ်န့ၣ်ခ့ၣ်အဲၣ်ယူၣ်(သုးက့ ၅)ၦၤကတိၤတၢ်ပၢ ပဒိၣ်မါမါ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အပူၤကွံာ်မဟိတနံၣ်န့ၣ်ပယီၤသုးဟူးဂဲၤ၀ဲဒီးကဘီယူၤႉပထံၣ်ဘၣ်လၢအ၀ဲသ့ၣ်ခးလီၤတၢ်ဒီးကဘီယူၤဟဲအါထီၣ်လီၤႉဖဲနံၣ်ဘူးကလၢၤန့ၣ်ပထံၣ်ဘၣ်လၢအါဒၣ်တက့ၢ်န့ၣ်အ၀ဲသ့ၣ်ဟဲခးလီၤတၢ်ဒီးကဘီယူၤလီၤႉလီၤဆီဒၣ်တၢ်အ၀ဲသ့ၣ်ဟဲခးလီၤတၢ်လၢကၠိႇတၢ်ဆါဟံၣ်ႇတၢ်ဟ့ၣ်ကသံၣ်ဒၢးႇကမျၢၢ်အိၣ်ဆိးလီၢ်ကျဲတဖၣ်အပူၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ(၂၀၂၂)တနံၣ်အတီၢ်ပူၤပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်- KNLA(သုးက့ ၅)အဘၢၣ်စၢၤတၢ်ဒုးကဲထီၣ်၀ဲ(၂ႇ၇၃၇)ဘျီဒီးတၢ်ဒုးကဲထီၣ်ဘျီ၀ဲအပူၤန့ၣ် ပယီၤသုးႇ(BGF)တကပၤ သံ၀ဲ(၁၃၀၇)ဂၤႇ ဘၣ်ဒိ၀ဲ(၉၇၂)ဂၤအဂ့ၢ်န့ၣ် (သုးက့ ၅)နံၣ်ကတၢၢ်လံာ်တၢ်ပာ်ဖျါ စရီပူၤအသိးသ့ၣ်ညါဘၣ်န့်ၣလီၤႉ
(သုးက့ ၅) ဟီၣ်က၀ီၤတၢ်ဒုးကဲထီၣ်လၢတနံၣ်အတီၢ်ပူၤအံၤန့ၣ် မ့မ့ၢ်ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်ခဲလၢာ် (၅၀) ဂၤဒီးဘၣ်ဒိ၀ဲ (၁၈၀) ဂၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ဒ်န့ၣ်အသိးအပူၤကွံာ်(၂၀၂၁)နံၣ်အတီၢ်ပူၤစ့ၢ်ကီးလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤန့ၣ် တၢ်ဒုးကဲထီၣ်၀ဲ(၂ႇ၆၉၆)ဘျီအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါတ့ၢ်ဃာ်၀ဲအိၣ်န့ၣ်လီၤႉ
လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤန့ၣ်သုးက့အိၣ်၀ဲ(၇)ဘ့ၣ်အကျါလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ အပူၤကွံာ်(၂၀၂၁)တနံၣ်အတီၢ်ပူၤတၢ်ဒုးကဲထီၣ်၀ဲအဘျီ(၃၀၀၀)ဘျဲၣ်ဒီးပယီၤသုးခးလီၤကျိဖးဒိၣ်အဃိကမျၢၢ်ဘၣ်သံ၀ဲ(၃၁)ဂၤဒီးဘၣ်ဒိ၀ဲ(၈၆)ဂၤအဂ့ၢ်န့ၣ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ