ခ့ၣ်အဲးစံၣ် – KIC News

လါဒံၣ်စ့ဘၢၣ် ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် တကီၢ်ခါခဲအံၤခီဖျိတၢ်ဒုးဆူၣ်ထီၣ်ကဒါလၢကီးတရံး၀့ၢ်ကလံၤထံးဒူသ၀ီတဖၣ်အပူၤအဃိ လီၢ်က၀ီၤကမျၢၢ်တဖၣ်သုးအလီၢ်လဲၤစံၣ်အိၣ်၀ဲလၢကလံၤစိးသ၀ီတကပၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်လၢကီးတရံးကလံၤထံးကမျၢၢ်ၦၤဃ့ၢ်တၢ်ဒုးဖိအဒူသ၀ီပူၤဟဲအါထီၣ်အဃိကမျၢၢ်ၦၤဃ့ၢ်တၢ်ဒုးသ့ၣ်တဖၣ်အံၤသုးအလီၢ်လဲၤစံၣ်အိၣ်က့ၤ၀ဲလၢကီးတရံးကလံၤစိးသ၀ီတကပၤအဂ့ၢ်န့ၣ်ကမျၢၢ်ၦၤဃ့ၢ်တၢ်ဒုးဖိတဂၤစံး၀ဲဒ်အံၤန့ၣ်လီၤႉ “ကဘီယူၤဟဲတ့ၢ်လီၤမ့ၣ်ပိၢ်အဃိမုၢ်နၤခီမုၢ်ဆါခီပမံလၢဟံၣ်တဘူၣ်ဘၣ်န့ၣ်အသီယံၤထီၣ်လံမီၤနီၤႉကျဲတၢ်လဲၤတၢ်က့ၤနါက့ဆိကတီၢ်သးလၢာ်လံအဃိတၢ်အီၣ်တၢ်အီနါက့လၢၤထီၣ်လံႉခဲအံၤလၢတတၤကူသ၀ီႇကီးနွဲၣ်ႇယွၤသ့ၣ်ကိႇတီၤကၠါႇဒီးလၢအ့ရှါကျဲမုၢ်နုၤကီမူၣ်သ၀ီႇလဲၤစ့ႇစီၣ်ဟဲႇကၠီၤစှၤကိႇယီၣ်ကိာ်သ၀ီဖိတဖၣ်နါက့ကိးဖှိၣ်အဟံၣ်ဖိဃီဖိလဲၤစံၣ်အိၣ်၀ဲလၢထံဖိဆၣ်ႇနီၤတပွဲႇနဘူႇပၣ်တၣ်တကပၤန့ၣ်မီၤနီၤ” အဂ့ၢ်န့ၣ်ၦၤဃ့ၢ်တၢ်ဒုးဖိတဂၤဃီ၀ဲန့ၣ်စံးအါထီၣ်၀ဲလီၤႉ ခီဖျိပယီၤသုးနုာ်လီၤမၤတၢ်ထီၣ်ဒုးလၢကီးတရံးဟီၣ်က၀ီၤပူၤအဃိတၢ်ဒုးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးဖဲန့ၣ်တၢ်ဒုးအံၤရၤလီၤအသးကဲထီၣ်တုၤလၢကီးတရံး–ကၠဲးဒိကျဲဟီၣ်က၀ီၤ ဒူသ၀ီတဖၣ်အပူၤညါအဃိလီၢ်က၀ီၤကမျၢၢ်ၦၤဃ့ၢ်တၢ်ဒုးဖိတဖၣ်တအိၣ်တဖှိၣ်ဒိၣ်ဘၣ်အဖီခိၣ်အံၤတၢ်ကီတၢ်ခဲအိၣ်ထီၣ်လၢကလဲၤဆီၣ်ထွဲမၤစၢၤတၢ်အီၣ်တၢ်အီအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ၦၤလၢမၤစၢၤကမျၢၢ်ၦၤဃ့ၢ်တၢ်ဒုးဖိတဂၤစံး၀ဲ“တၢ်ဒုးကဲထီၣ်တုၤလၢ(ခွံတၢၣ်)‚(နွံတၢၣ်)‚ကီၣ်၀ါလဲသ၀ီလံႉလၢန့ၣ်တကပၤန့ၣ်ပယီၤသုး(၅၄၆)ႇ(၅၄၅)ဒီးကီးတရံးပယီၤသုး(၉၇)တဖၣ်ခးလီၤကျိဖးဒိၣ်အဃိသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ႉပပာ်ဖှိၣ်ၦၤဃ့ၢ်တၢ်ဒုးဖိအနီၣ်ဂံၢ်တန့ၢ်လၢၤဘၣ်ႉသ၀ီၦၤနီၣ်ဂံၢ်စရီအိၣ်ဘၣ်ဆၣ်လၢပကလဲၤဟ့ၣ်မၤစၢၤတၢ်အီၣ်တၢ်အီအဂီၢ်အ၀ဲသ့ၣ်လဲၤစံၣ်အိၣ်တၢ်လီၢ်န့ၣ်ပတသ့ၣ်ညါအဃိလၢပကထုးဖှိၣ်ၦၤကညီဒီးနီၤလီၤတၢ်အီၣ်တၢ်အီအဂီၢ်န့ၣ်ပကဘၣ်ဆဲးကျးဖးကီညါ”အဂ့ၢ်န့ၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤန့ၢ်တနံၣ်ဘျဲၣ်အတီၢ်ပူၤခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤဆူၣ်ထီၣ်ကွ့ၢ်ကွ့ၢ် အဃိစးထီၣ်လၢတၢ်ဒုးကဲထီၣ်၀ဲဒီး(KNLA)သုးပာ်ဖှိၣ်အံၤန့ၣ်ကီးတရံးကလံၤထံးဒူသ၀ီအဖျၢၣ်(၁၀)ဃၣ်ဃၣ်ကမျၢၢ်လၢအဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲအဂၤ(၅၀၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢစရီတၢ်မၤနီၣ်မၤဃါပူၤအသိးန့ၣ် လီၤႉ တနံၣ်အံၤ(၂၀၂၂)လါနိၣ်၀့ဘၢၣ်ဒီးလါဒံၣ်စ့ဘၢၣ်အတီၢ်ပူၤခီဖျိပယီၤသုးခးလီၤကျိဖးဒိၣ်ကိးမုၢ်နၤမုၢ်ဆါအဃိ လီၢ်က၀ီၤဒူသ၀ီကမျၢၢ်တဖၣ်ဘၣ်ဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒီးၦၤဃ့ၢ်မှံဟးဖျိးအနီၣ်ဂံၢ်စ့ၢ်ကီးအိၣ်ထီၣ်တုၤလၢအဂၤ(၁၀ႇ၀၀၀)ခိၣ်ဃၢၤလံအဂ့ၢ်န့ၣ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အကျါပၣ်ဃုာ်၀ဲၦၤသူၣ်က့သးၦၢ်ႇဖိဒံဖိသၣ်ႇၦၤမိၢ်ဒၢႇၦၤက့ၦၤကွဲၣ်သ့ၣ်တဖၣ်အဃိလၢၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီႇအိၣ််ဆိးလီၢ်ကျဲဒီးဆူၣ်ချ့တၢ်ကွၢ်အံးထီကွၢ်ထွဲကသံၣ်ကသီသ့ၣ်တဖၣ်အဂ့ၢ်န့ၣ်ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဒ်သိးခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒီးတလၢၤကီၢ်သီပၣ်တံၣ်(NMSP)အတၢ်ပာ်ဖှိၣ်မၤသကိးတၢ် အဂံၢ်ကဆူၣ်ထီၣ်အဂီၢ်ကညီဒီးတလၢၤသးစၢ်ကရူၢ်တဖၣ်ကဆီၣ်တခူထီၣ်သကိး၀ဲအဂ့ၢ်န့ၣ် ခံခီခံကပၤသးစၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ်ခံနွံတနွံတခါလၢ၀ီၢ်ရ့ၣ်ကီၢ်ဆၣ်အပူၤန့ၣ်ကီၢ်ဆၣ်ကညီသးစၢ်ကရၢဒီးတလၢၤကီၢ်စဲၣ်တလၢၤသးစၢ်ကရၢအံၤမၤ၀ဲတၢ်ထံၣ်လိာ်အိၣ်သကိးတခါဒီးဖဲန့ၣ်တၢၣ်ပီၣ်တဲသကိး၀ဲတၢ်ဂ့ၢ်အံၤလီၤအဂ့ၢ်န့ၣ် ၀ီၢ်ရ့ၣ်ကီၢ်ဆၣ်ကညီသးစၢ်ကရၢခိၣ် စီၤဖိခွါဒိၣ် စံး၀ဲန့ၣ်လီၤႉ အ၀ဲစံး၀ဲလၢ“တၢ်လၢတလၢၤဒီးကညီအံၤအပူၤကွံာ်လၢညါန့ၣ်မ့ၢ်၀ဲဒၣ်သိၣ်မှံၤလီၤႉဖဲကတီၢ်တၢ်ဒ့ၣ်စၢၤအံၤခီဖျိတၢ်ဂိာ်စုဂိာ်ခီၣ်တၢ်ခဲၣ်သူခဲၣ်ဂီၤအဃိတၢ်လီၤမုၢ်လီၤဖးအိၣ်ထီၣ်၀ဲလၢတလၢၤဒီးကညီသးစၢ်တဖၣ်အဘၢၣ်စၢၤမီၤနီၤႉအဃိဒ်သိးတၢ်ဂ့ၢ်ကီတဖၣ်ကဲထီၣ်သုတဒိၣ်ထီၣ်တဂ့ၤအဂီၢ်န့ၣ်ပ၀ဲဒၣ်ကဒဲကဒဲပထံၣ်လိာ်တၢၣ်ပီၣ်ပာ်ဖျါထီၣ်ပတၢ်ထံၣ်တၢ်ပာ်သးတဖၣ်မီၤနီၤႉတၢ်ဂ့ၢ်ခိၣ်တီလၢအလီၤဂာ်သ့ၣ်တဖၣ်န့ၣ်ပကပာ်ဖှိၣ်မၤသကိးအီၤႉဒီးလၢခံခီခံကပၤကရၢမိၢ်ၦၢ်တဖၣ်စ့ၢ်ကီးအတၢ်ပာ်ဖှိၣ်မၤသကိးတၢ်အဂံၢ်ကဆူၣ်ထီၣ်အဂီၢ်န့ၣ်ပကဆီၣ်တခူအ၀ဲသ့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲအပူၤကွံာ်လါဒံၣ်စ့ဘၢၣ် ၂၅ သီအနံၤန့ၣ်လီၤႉ တၢ်ထံၣ်လိာ်အိၣ်သကိးဘျီ၀ဲအံၤအပူၤတၢ်တၢၣ်ပီၣ်တဲသကိးဘၣ်ဃးတၢ်ထံၣ်တၢ်ပာ်သးလၢကတီၢ်တၢ်ဒ့ၣ်စၢၤထံရူၢ်ကီၢ်သဲးတၢ်အိၣ်သးအဂ့ၢ်အကျိၤတဖၣ်ဒီးခံခီခံကပၤတၢ်သးလီၤပလိာ်အိၣ်လၢကပာ်ဖှိၣ်မၤသကိးတၢ်တုၤလၢဖဲၣ်ဒရၢၣ်ကီၢ်စၢဖှိၣ်ခါဆူညါအတၢ်လဲၤကျဲတစုညါအဂ့ၢ်န့ၣ် သးစၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါအ၀ဲသ့ၣ်ကပာ်ဖှိၣ်ထီၣ်သးဟးဟ့ၣ်၀ဲသးစၢ်တၢ်ဟ့ၣ်ပီညါအံၤလၢတလၢၤဒီးကညီတၢ်ပၢဆှၢသဃဲၤဟီၣ်က၀ီၤတဖၣ်အပူၤဒီးတၢ်မ့ဆီၣ်ဘံၣ်ဆီၣ်ဘၢသးစၢ်အသနၢၣ်တဖၣ်န့ၣ်အ၀ဲသ့ၣ်ကပာ်ဖှိၣ်ထီဒါသကိး၀ဲန့ၣ်လီၤႉတကးဒံးဘၣ်လၢကသူၣ်ထီၣ်ဖဲၣ်ဒရၢၣ်ကီၢ်စၢဖှိၣ်ခါဆူညါအံၤန့ၣ်တလၢၤဒီးကညီသးစၢ်ခိၣ်နၢ်ခံခီခံကပၤအတၢ်သးလီၤပလိာ်အိၣ်လၢကမၤဂ့ၤထီၣ်သကိးကလုာ်ဒူၣ်သးစၢ်အနၢၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “ဒ်သိးတၢ်ရ့လိာ်မုာ်လိာ်လၢတလၢၤဒီးကညီသးစၢ်အဘၢၣ်စၢၤကဂ့ၤအိၣ်ဒိၣ်ထီၣ်အဂီၢ်န့ၣ်ပထံၣ်လိာ်အိၣ်သကိးမီၤနီၤႉပဟ့ၣ်ခီဟ့ၣ်နီၤလီၤသးပတၢ်ထံၣ်တၢ်ပာ်သးလၢကတီၢ်တၢ်ဒ့ၣ်စၢၤအံၤလီၤႉဒ်သိးပ၀ဲဒၣ်ကဒဲကဒဲတၢ်ဃူတၢ်ဖိးကအိၣ်ထီၣ်အါန့ၢ်အန့ၣ်အဂီၢ်ဒီးလၢသိၣ်မှံဂ့ၢ်၀ီတကပၤစ့ၢ်ကီးန့ၣ်ကဂၢၢ်ကျၢၤဒိၣ်ထီၣ်အဂီၢ်လီၤမီၤနီၤႉပတၢၣ်ပီၣ်တဲသကိးဘၣ်ဃးဂံၢ်ခီၣ်ထံးတၢ်သးလီၤပလိာ်တဖၣ်ႉပကဖီၣ်လိာ်စုပာ်ဖှိၣ်မၤသကိးတၢ်တုၤလၢတၢ်သူၣ်ထီၣ်ဖဲၣ်ဒရၢၣ်တစုလီၤ” အဂ့ၢ်န့ၣ် တလၢၤသးစၢ် နဲၤဘညါအီၤမိၤ စံး၀ဲန့ၣ်လီၤႉ လၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ဒူသ၀ီတနီၤအပူၤန့ၣ် တလၢၤကလုာ်ဒီးကညီကလုာ်တဖၣ်အိၣ်ဆိးဃါဃုာ်၀ဲတပူၤဃီဒီးအိၣ်၀ဲဒၣ်လၢတၢ်ပၢဆှၢသဃဲၤဟီၣ်က၀ီၤအပူၤန့ၣ်လီၤႉ စးထီၣ်ဖဲ(၁၉၈၈)နံၣ်လီၢ်ခံဘျီန့ၣ်ခီဖျိထံရူၢ်ကီၢ်သဲးတၢ်အိၣ်သးအဃိတလၢၤကီၢ်သီပၣ်တံၣ်ဒီး(KNU)အဘၢၣ်စၢၤတၢ်ခးလိာ်သးကဲထီၣ်၀ဲတလီၢ်လီၢ်၀ံၤအလီၢ်ခံဒ်သိးကလုာ်တၢ်ဖ့ၣ်စၢကလီၤစှၤ၀ဲလၢခံခီခံကပၤခိၣ်နၢ်တဖၣ်အဘၢၣ်စၢၤအဂီၢ်တၢ်ဒုးအိၣ်ထီၣ်၀ဲသိၣ်မှံၤကရူၢ်အံၤအဂ့ၢ်န့ၣ်သ့ၣ်ညါဘၣ်လၢခ့ၣ်အဲၣ်ယူၣ်ခိၣ်နၢ်တဖၣ်အအိၣ်န့ၣ်လီၤႉ

လါဒံၣ်စ့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါဒံၣ်စ့ဘၢၣ် ၂၇ သီ မုၢ်ထူၣ်အဆၢကတီၢ်န့ၣ် လၢကီးတရံး၀့ၢ် ကီးနွဲၣ်က၀ီအပူၤ ပယီၤသုးဒွဲၣ်အူအီၣ်သ၀ီဖိအဟံၣ်အဃီတစှၤန့ၢ်(၃)ဖျၢၣ်ညါဘၣ်အဂ့ၢ်န့ၣ်လီၢ်က၀ီၤကမျၢၢ်လၢအထံၣ်တၢ်ကဲထီၣ်သးဒီးအမဲာ်တဖၣ်အံၤစံး၀ဲန့ၣ်လီၤႉ ဖဲမဟါလါဒံၣ်စ့ဘၢၣ် ၂၇ သီအနံၤန့ၣ် ပယီၤသုးလၢအဟဲထီၣ်ဆူကီးတရံး၀့ၢ်ကပၤ(ကီးနွဲၣ်)သ၀ီပူၤတဖၣ်အံၤဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ံၤအလီၢ်ခံပယီၤသုးဒွဲၣ်အူအီၣ်၀ဲလီၢ်က၀ီၤသ၀ီဖိတဖၣ်အဟံၣ်အဃီအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲ“လီလီစဲၤခဲအံၤပထံၣ်မ့ၣ်အူအီၣ်ၦၤဟံၣ်(၃)ဖျၢၣ်ႉပတဟးကွၢ်ဘၣ်သ၀ီဒီတဖျၢၣ်ဒံးဘၣ်ႉမ့ၢ်တၢ်လီၢ်လၢအဂၤအိၣ်စ့ၢ်ဧါတသ့ၣ်ညါဘၣ်ႉလၢသ၀ီပူၤဒုပတထံၣ်ပယီၤသုးလၢၤဘၣ်ႉအဒွဲၣ်အူအီၣ်ၦၤဟံၣ်၀ံၤဘျီအဟးထီၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ဒုးကဲထီၣ်ဖဲမဟါအခါန့ၣ်ခီဖျိပယီၤသုးအံၤခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်တပယူာ်ဃီအဃိသ၀ီပူၤဟံၣ်ဃီတၢ်သူၣ်ထီၣ်ဒီးတၢ်ဖံးအီၣ်မၤအီၣ်လီၢ်ကျဲဟးဂီၤ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကီးနွဲၣ်သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲ“တၢ်ဖံးတၢ်မၤႇတၢ်လၢပပၢဘၣ်တအိၣ်နီတမံၤဘၣ်ႉကျိဖးဒိၣ်လီၤတဲာ်လၢသ၀ီပူၤထီဘိလီၤႉဘၣ်၀ဲဒၣ်ၦၤဟံၣ်ဒီးဆၣ်ဖိကီၢ်ဖိဒီဒူၣ်ညါႉမ့ၢ်အဘၣ်မတဂၤအတၢ်လဲၣ်ဒုတသ့ၣ်ညါဘၣ်ႉပနၢ်ဟူလၢပယီၤသုးဒွဲၣ်အူအီၣ်ၦၤဟံၣ်လၢသ၀ီပူၤမီၤနီၤႉလၢတၢ်တအိၣ်ဘၣ်အပူၤအံၤဟံၣ်ဃီမ့ဟးဂီၤဒုမ့ၢ်ပကဘၣ်ဖံးအီၣ်မၤအီၣ်အိၣ်မူက့ၤဒ်လဲၣ်မးတသ့ၣ်ညါလၢၤဘၣ်”အဂ့ၢ်န့ၣ်စံး၀ဲန့ၣ်လီၤႉ ဖဲမဟါလါဒံၣ်စ့ဘၢၣ် ၂၇ သီအနံၤ လၢကီးတရံး၀့ၢ်ကပၤ(မီမၣ်)သ၀ီသီဒီးကီးနွဲၣ်သ၀ီတကပၤန့ၣ် တၢ်ဒုးဆူၣ်ထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်တကးဒံးဘၣ်ကဘီယူၤစ့ၢ်ကီးဟဲခးလီၤတၢ်ဒီတနံၤကျၢၤညါအဃိကီးနွဲၣ်သ၀ီပူၤဟံၣ်ဃီတၢ်သူၣ်ထီၣ်ဟးဂီၤ၀ဲအါမးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

လါဒံၣ်စ့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါဒံၣ်စ့ဘၢၣ် ၂၅ သီအနံၤန့ၣ် လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ (ဘၣ်ဒိၤယါ)ဘၣ်ကီဘၣ်ခဲဒဲက၀ီၤ က၀ီၤဒ့(D)အပူၤန့ၣ် ခီဖျိမ့ၣ်အူအီၣ်ကဲထီၣ်သးအဃိ ဟံၣ်ဟးဂီၤ(၃၂)ဖျၢၣ်ဒီးက၀ီၤဒ့ဖိအဂၤ(၁၀၀)ဘျဲၣ် လီၤဘၣ်တၢ်ကီတၢ်ခဲအဂ့ၢ်န့ၣ်ဒဲက၀ီၤခိၣ်စံး၀ဲန့ၣ်လီၤႉ မ့ၣ်အူအီၣ်ဟံၣ်(၃၂)ဖျၢၣ်အကျါ(၂၁)ဖျၢၣ်န့ၣ်မ့ၣ်အူအီၣ်ဟးဂီၤလီၤဘျဲး၀ဲခဲလၢာ်ညါအသိး မ့မ့ၢ်ဟံၣ်လၢအဂၤ(၁၁)ဖျၢၣ်ခီန့ၣ်အူအီၣ်ထဲအခိၣ်ဒုးဒီးအဒုၣ်အဒါတနီၤလီၤဘၣ်ဆၣ် လၢအ၀ဲသ့ၣ်ကက့ၤဘှီဂ့ၤထီၣ်က့ၤအဟံၣ်ခိၣ်ဒုးတဖၣ်အဂီၢ်န့ၣ်လိၣ်ဘၣ်၀ဲဒၣ်သ့ၣ်လၣ်ဒီး၀ၣ်သ့ၣ်တဖၣ်အဂ့ၢ်န့ၣ် ဘၣ်ဒိၤယါဒဲက၀ီၤခိၣ် စီၤထူဟၤ စံး၀ဲန့ၣ်လီၤႉ အ၀ဲစံး၀ဲလၢ“မ့ၣ်အူအီၣ်တၢ်န့ၣ်ဘၣ်လၢမုၢ်ထူၣ်ခါမီၤနီၤႉတၢ်တနံၤန့ၣ်မ့ၢ်စ့ၢ်ကီးခရံာ်အိၣ်ဖျဲၣ်မုၢ်နံၤအဃိၦၤလဲၤလၢသရိာ်ခဲလၢာ်လီၤႉကိၢ်ညၢ်လၢၦၤဘၣ်ဒိဘၣ်ထံးတအိၣ်ဘၣ်မီၤနီၤႉဟံၣ်အဖျၢၣ်(၂၀)န့ၣ်တၢ်တအိၣ်တီၢ်နီတမံၤလၢၤဘၣ်ဟးဂီၤခဲလၢာ်လီၤႉမ့မ့ၢ်အ၀ဲ(၁၁)ဖျၢၣ်ခီန့ၣ်မ့ၣ်အူအီၣ်ဘၣ်ကူဘၣ်ဂာ်ဒ်န့ၣ်လီၤအဃိအခိၣ်ဒုးအူအီၣ်၀ဲတစဲးလီၤမီၤနီၤႉသ့ၣ်၀ၣ်တၢ်မၤစၢၤဟဲမ့တုၤဒုၦၤအိၣ်ဖဲဒဲက၀ီၤပူၤတဖၣ်ပာ်ဖှိၣ်ထီၣ်သးသူၣ်ထီၣ်စၢၤကဒါ၀ဲခံသီသၢသီတစိၢ်ဖိန့ၣ်၀ံၤလီၤ”အဂ့ၢ်န့ၣ်ဒဲက၀ီၤခိၣ် စီၤထူဟၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဘၣ်ဒိၤယါဒဲက၀ီၤဖိလၢမ့ၣ်အူအီၣ်ကွံာ်အဟံၣ်အဃီသ့ၣ်တဖၣ်အံၤလၢကက့ၤသူၣ်ထီၣ်ဘှီထီၣ်က့ၤအဟံၣ်အဃီအဂီၢ်န့ၣ်ၦၤအိၣ်လၢဒဲက၀ီၤပူၤတဖၣ်ပာ်ဖှိၣ်မၤစၢၤသကိး၀ဲတကးဒံးဘၣ်ၦၤဂ့ၢ်၀ီတၢ်ကရၢကရိဒီးကၠီၣ်တဲၣ်ၦၤဘၣ်မူဘၣ်ဒါတဖၣ်စ့ၢ်ကီးမၤစၢၤဆီၣ်ထွဲ၀ဲအဂ့ၢ်န့ၣ် ဘၣ်ဒိၤယါဒဲက၀ီၤခိၣ် စံးအါထီၣ်၀ဲန့ၣ်လီၤႉ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ဘၣ်ကီဘၣ်ခဲက၀ီၤတဖၣ်အပူၤ ဟံၣ်ဃီတၢ်သူၣ်ထီၣ်တဖၣ်အါဒၣ်တက့ၢ်န့ၣ် တၢ်သူၣ်ထီၣ်ဘှီထီၣ်အီၤလၢသ့ၣ်၀ၣ်ႇသ့ၣ်လၣ်သ့ၣ်တဖၣ်န့ၣ်လီၤႉတၢ်ကိၢ်ခါမ့တုၤဃီၤလံန့ၣ်ဘၣ်ဒိၤယါဒဲက၀ီၤတကးဒံးဘၣ်အမဲာ်ညါကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီတကျိၤဘၣ်ကီဘၣ်ခဲဒဲက၀ီၤတဖၣ်အပူၤန့ၣ် မ့ၣ်အူအီၣ်ကဲထီၣ်အသးအိၣ်၀ဲတလီၢ်လီၢ်န့ၣ်လီၤႉ ကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီတကျိၤန့ၣ် ကီၢ်ပယီၤဘၣ်ကီဘၣ်ခဲဒဲက၀ီၤအိၣ်၀ဲ(၉)ဖျၢၣ်အကျါ ဘၣ်ဒိၤယါဒဲက၀ီၤအံၤမ့ၢ်ဒဲက၀ီၤတဖျၢၣ်လၢၦၤနီၣ်ဂံၢ်အိၣ်စှၤကတၢၢ်လီၤဒီးၦၤနီၣ်ဂံၢ်အိၣ်၀ဲခဲလၢာ်အဂၤ(၂၀၀၀)ဘျဲၣ်လီၤအဂ့ၢ်န့ၣ် ၂၀၂၂ နံၣ် (The Border Consortium-TBC)ထုးထီၣ်ပာ်ဖျါစရီအသိးသ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၂၇ သီ ဂီၤခီ ၇း၃၀ ဃၣ်ဃၣ်အဆကတီၢ် လၢကီးတရံး၀့ၢ်ကပၤ(မီမၣ်)သ၀ီသီအပူၤ ခီဖျိပယီၤသုးခး၀ဲလီၢ်က၀ီၤသ၀ီဖိလၢအဟးဃုအီၣ်ညၣ်တဂၤအဃိသ၀ီဖိ၀ဲန့ၣ်ဘၣ်ဒိ၀ဲအဂ့ၢ်န့ၣ် လီၢ်က၀ီၤဖိတဖၣ် စံး၀ဲန့ၣ်လီၤႉ လၢကီတရံးတဆီပယီၤသုးလၢအဟဲထီၣ်ဆူမီမးသ၀ီသီပူၤတဖၣ်ဖဲအဘၣ်သဂၢၢ်လိာ်သးဒီးသ၀ီဖိလၢအဟးဃုအီၣ်ညၣ်တဂၤအံၤလၢသ၀ီချၢတၢ်လီၢ်တတီၤအခါခး၀ဲဒၣ်သ၀ီဖိအံၤလီၤအဂ့ၢ်န့ၣ် လီၢ်က၀ီၤသ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ “ပယီၤသုးဟဲထီၣ်န့ၣ်ၦၤတသ့ၣ်ညါနီတဂၤဘၣ်ႉဖဲန့ၣ်အ၀ဲသ့ၣ်ထံၣ်၀ဲၦၤဟးဃုအီၣ်ညၣ်ဖိတဂၤဘျီအခး၀ဲလီၤမီၤနီၤႉခး၀ဲန့ၣ်အထံၣ်ဖးအါညါႉဘၣ်၀ဲဒၣ်သ၀ီဖိတဂၤန့ၣ်အစုဘျီအဃ့ၢ်ထီၣ်န့ၣ်ႉခဲအံၤၦၤလဲၤဆှၢအီၤလၢတၢ်ဆါဟံၣ်လံ” အဂ့ၢ်န့ၣ် သ၀ီဖိတဂၤဃီ၀ဲန့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးခးသ၀ီဖိကဲထီၣ်သး၀ံၤအလီၢ်ခံပယီၤသုးလၢအဟဲထီၣ်တဖၣ်အံၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်ထီၣ်ဒိၣ်ဒိၣ်မုၢ်မုၢ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ “တၢ်ဒုးကဲထီၣ်ဒိၣ်ဒိၣ်မုၢ်မုၢ်လၢယွၤသ့ၣ်သ၀ီဒီးကီးနွဲၣ်သ၀ီတကပၤန့ၣ်မီၤနီၤႉတုၤလၢခဲအံၤခးအဖၢမုၢ်လီၤႉ ခးကျိဖးဒိၣ်တပယူာ်ဃီ” အဂ့ၢ်န့ၣ်ကီးတရံးကလံၤထံးလီၢ်က၀ီၤကမျၢၢ်တဂၤစံး၀ဲန့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံဖဲမုၢ်ဘူးကထူၣ် ၁၁ နၣ်ရံၣ်ဘျဲၣ်အဆၢကတီၢ်န့ၣ် သုးမီၤစိရိၤအကဘီယူၤတစှၤန့ၢ်(၃)ဘ့ၣ်ဟဲတ့ၢ်လီၤစၢၤမ့ၣ်ပိၢ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ကီးတရံး၀့ၢ်ခိၣ်၀့ၢ်ဃၢၤဒူသ၀ီတၢ်လီၢ်တဖၣ်စးထီၣ်လါဒံၣ်စ့ဘၢၣ် ၁၆ သီတုၤလၢခဲအံၤတစု ပယီၤသုးဒီးတၢ်ပၢၢ်ဆၢကရူၢ်အဘၢၣ်စၢၤတၢ်ဒုးဆူၣ်ထီၣ်၀ဲဒီးခီဖျိပယီၤသုခးလီၤကျိဖးဒိၣ်ႇကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်သံ(၃)ဂၤအကျါပၣ်ဃုာ်သီခါတပါဒီးဘၣ်ဒိဘၣ်ထံး၀ဲ(၁၇)ဂၤလံအဂ့ၢ်န့ၣ် တၢ်မၤနီၣ်မၤဃါစရီအသိး သ့ၣ်ညါဘၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်ႇကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤကမျၢၢ်အဟံၣ်အဃီဟးဂူာ်ဟးဂီၤ၀ဲဒီးဆၣ်ဖိကီၢ်ဖိလၢတၢ်ဘုၣ်၀ဲလၢဟံၣ်သ့ၣ်တဖၣ်စ့ၢ်ကီးသံဘၣ်ဒိဘၣ်ထံးအိၣ်၀ဲအသိး လီၢ်က၀ီၤကမျၢၢ်လၢအကထိဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ

လါဒံၣ်စ့ဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါဒံၣ်စ့ဘၢၣ် ၂၆ သီ မုၢ်ထူၣ် ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢ ကီးတရံး၀့ၢ်ကပၤ(စွ့ၤကၠဲၣ်မ့)သီခါဖၠၣ်ဖီခိၣ်အဃိသီခါသံ၀ဲတပါဒီးတပွဲႇအူစ့ႇသီခါပျဲၢ်ဘၣ်ဒိ၀ဲ(၄)ဂၤအဂ့ၢ်န့ၣ်သီခါဒီးသီခါတကၢ်မုၣ်/ခွါတဖၣ်စံး၀ဲန့ၣ်လီၤႉ စွ့ၤကၠဲၣ်မ့သီခါဖၠၣ် သီခါတပါစံး၀ဲ“ဘၣ်ဖဲမုၢ်ထူၣ်ပအီၣ်စိ(ဆမွ်း)၀ံၤပသ့ကွံာ်ခူၣ်အခါန့ၣ် ကျိဖးဒိၣ်လီၤတဲာ်ပိၢ်ဖးထီၣ်(၂)ဖျၢၣ်ႉအူစ့ယူၤကွံာ်တပါဒီးအဘၣ်ဒိ(၂)ပါမီၤနီၤႉတပွဲတပါနါက့ဘၣ်၀ဲဒၣ်အခီၣ်ကံၣ်ဒုၣ်ႉမ့မ့ၢ်လၢသီခါပျဲၢ်(ေကျာင်းသား)ခီန့ၣ်ဘၣ်၀ဲဒၣ်အချၢဃံမီၤနီၤႉသံဘၣ်ဒိဘၣ်ထံးခဲလၢာ်န့ၣ်(၅)ဂၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သီခါဒီးသီခီပျဲၢ်လၢအဘၣ်ဒိဘၣ်ထံးတဖၣ်အံၤတၢ်လဲၤဆှၢကူစါယါဘျါအ၀ဲသ့ၣ်ဆူကီးတရံးတၢ်ဆါဟံၣ်ဒီး မ့မ့ၢ်သီခါပျဲၢ်တဂၤဒီးသီခါတပါလၢအဘၣ်ဒိနးနးကျံၤကျံၤအံၤခီန့ၣ်တၢ်ဆှၢအ၀ဲသ့ၣ်ဆူဖၣ်အၣ်တၢ်ဆါဟံၣ်အဂ့ၢ်န့ၣ် သီခါအကတကၢ်မုၣ်/ခွါတဖၣ်စံး၀ဲန့ၣ်လီၤႉ “လၢကီးတရံးတၢ်ဆါဟံၣ်န့ၣ်(အူစ့)တပါကူစါယါဘျါအသးဖဲန့ၣ်ဒီးခဲအံၤအဟဲက့ၤအိၣ်လၢ(ထါပ့ၤကိ)အတကၢ်အဟံၣ်မီၤနီၤႉအ၀ဲကဘၣ်လဲၤထၢနုာ်လီၤကသံၣ်ကိးမုၢ်နံၤဒဲးလီၤႉမ့မ့ၢ်တပွဲဖိလၢဘၣ်အခီၣ်ကံၣ်ဒုၣ်တဂၤခီန့ၣ်အဘၣ်နးတစဲးအဃိၦၤဆှၢအီၤလၢဖၣ်အၣ်တၢ်ဆါဟံၣ်ႉသီခါပျဲၢ်အနံၣ်တဆံဘျဲၣ်တဂၤခီန့ၣ်ဘၣ်၀ဲအချၢဃံအဃိတၢ်ဘၣ်ယိၣ်အိၣ်တစဲးႇအဘၣ်ကသါ၀ဲဒၣ်အီးကစံၣ်ကၠံၣ်မီၤနီၤႉအ၀ဲနါက့ဘၣ်ဆှၢလၢဖၣ်အၣ်တၢ်ဆါဟံၣ်လီၤႉခဲအံၤလၢသီခါဖၠၣ်န့ၣ်(အူစ့) တအိၣ်လၢၤဘၣ်” အဂ့ၢ်န့ၣ်သီခါအတကၢ်တဂၤစံး၀ဲန့ၣ်လီၤႉ ကီးတရံး၀့ၢ်ခိၣ်၀့ၢ်ဃၢၤဒူသ၀ီတၢ်လီၢ်သ့ၣ်တဖၣ်စးထီၣ်လါဒံၣ်စ့ဘၢၣ် ၁၆ သီတုၤလၢလါဒံၣ်စ့ဘၢၣ် ၂၆ သီန့ၣ် ပယီၤသုးဒီးတၢ်ပၢၢ်ဆၢကရူၢ်သုးပာ်ဖှိၣ်အဘၢၣ်စၢၤတၢ်ဒုးကဲထီၣ်အတီၢ်ပူၤကမျၢၢ်သံ(၃)ဂၤအကျါပၣ်ဃုာ်သီခါတပါဒီးဘၣ်ဒိ၀ဲ(၁၆)ဂၤအသိးဟံၣ်ဆၣ်ဖိကီၢ်ဖိဒီးဟံၣ်ဃီတၢ်သူၣ်ထီၣ်တဖၣ်ဟးဂီၤ၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤ ခီဖျိမ့ၣ်အူတဟဲလၢၤဘၣ်ယံၤထီၣ်လံအဃိ ကမျၢၢ်သ့ၣ်တဖၣ်ကဖီအီၣ်တ့ၤအီၣ်တၢ်အဂီၢ်ဘၣ်သူက့ၤ၀ဲသွဲၣ်လးအဃိကတီၢ်ခဲအံၤသွဲၣ်လးအၦ့ၤထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢမၠၣ်၀တံၣ်ကီၢ်ဆၣ်အပူၤစးထီၣ်ဖဲလါဒံၣ်စ့ဘၢၣ် ၁၆ သီတုၤလၢလါဒံၣ်စ့ဘၢၣ် ၂၄ သီန့ၣ် မ့ၣ်အူဟးဂီၤဒံး၀ဲဒီး လၢတၢ်ဖီအီၣ်တ့ၤအီၣ်မ့ၣ်အူအလီၢ်အံၤတၢ်က့ၤသူကဒါ၀ဲလၢ(ကဲးစ်)ဒီးသွဲၣ်လးတဖၣ်အဃိ သွဲၣ်လးအၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ်စံး၀ဲန့ၣ်လီၤႉ မၠၣ်၀တံၣ်ကီၢ်ဆၣ်အပူၤတချုးလၢမ့ၣ်အူဟးဂီၤကဲထီၣ်သးဒံးဘၣ်အခါသွဲၣ်လးတထၢၣ်အၦ့ၤအိၣ်ထဲ(၄၅၀၀)ကၠးလီၤဒီးဘၣ်ဆၣ်ခဲအံၤတထၢၣ်န့ၣ်အၦ့ၤထီၣ်တုၤလၢ(၆၅၀၀)‚(၇၀၀၀)ကၠးညါလံအဃိတၢ်ကီတၢ်ခဲအိၣ်ထီၣ်လၢတၢ်ဖီအီၣ်တ့ၤအီၣ်အဂ့ၢ်န့ၣ်ၦၤဆါအီၣ်ခီနီဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သိအီၣ်ႇပသဲသၣ်အၦ့ၤထီၣ်မ့၀ံၤသွဲၣ်လးစ့ၢ်ကီးအၦ့ၤထီၣ်အဃိခဲအံၤဆါတၢ်တန့ၢ်အါအါလၢၤဘၣ်ႉမ့ၢ်ကဘၣ်မၤအီၣ်မၤအီက့ၤမတၤလဲၣ်မးတသ့ၣ််ညါလၢၤဘၣ်ႉစးထီၣ်လၢမ့ၣ်အူဟးဂီၤကဲထီၣ်သးအလီၢ်ခံန့ၣ် ကျးတနီၤတက့ၤအိးထီၣ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးဟံးန့ၢ်တၢ်စိၤတၢ်ကမီၤ၀ံၤအလီၢ်ခံၦၤဟဲစိာ်ဆါသွဲၣ်လးလၢမၠၣ်၀တံၣ်၀့ၢ်ပူၤတဖၣ်နါက့စ့ၢ်ကီး ခီဖျိသိၦ့ၤထီၣ်ဒီးတၢ်ဒုးတၢ်ယၤကဲထီၣ်ကျဲတၢ်ဘံၣ်တၢ်ဘၢတအိၣ်လၢၤဘၣ်အဃိ အ၀ဲသ့ၣ်တဟဲဆှၢဘၣ်သွဲၣ်လးဒ်လၢညါအသိးလၢၤဘၣ်အဂ့ၢ်န့ၣ် (ကိၤခ့ၤအူ)လၢအဆါသွဲၣ်လးတဂၤ စံး၀ဲဒ်အံၤန့ၣ်လီၤႉ “ၦၤမၤသွဲၣ်လးဖိတဖၣ်ဟဲဆှၢသွဲၣ်လးလၢ၀့ၢ်ပူၤတအိၣ်ဒ်အပူၤကွံာ်လၢညါခါအသိးလၢၤဘၣ်ႉ ကျးတနီၤန့ၣ်သွဲၣ်လးတအိၣ်လၢၤဘၣ်ႉအိၣ်တ့ၢ်က့ၤလၢအကစၢ်ကသူ၀ဲအဂီၢ်လီၤဒီးလၢကဆါအဂီၢ်န့ၣ်လၢၤလံ” အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၁၆ သီ မုၢ်နၤခီအဆၢကတီၢ် ခီဖျိတၢ်လဲၤမၤပိၢ်ဖးထီၣ်(၂၃၀KV§၆၆KV)သ့ၣ်ကါညံၣ်နီၣ် တၢ်ဟ့ၣ်မ့ၣ်အူလီၢ်အခီၣ်ထံးလၢကဘီယူၤ(ဒြိ)အဃိမ့ၣ်အူအီၣ်ဟးဂီၤကွံာ်၀ဲဒီးတကီၢ်ခါခဲအံၤတၢ်တက့ၤဘှီဂ့ၤထီၣ်၀ဲဒံးဘၣ်အသိးမၠၣ်၀တံၣ်ဃုာ်ဒီးကီၢ်ဆၣ်(၄)ဘ့ၣ်က၀ီၤဒ့ဒူသ၀ီတဖၣ်တုၤလၢခဲအံၤမ့ၣ်အူတဟဲဒံး၀ဲဘၣ်န့ၣ်လီၤႉ

လါဒံၣ်စ့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ် ကီးတရံး၀့ၢ်ပူၤ ပယီၤသုးဒီးတၢ်ပၢၢ်ဆၢကရူၢ်အဘၢၣ်စၢၤတၢ်ဒုးကဲထီၣ်အကတီၢ် ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲခးလီၤတၢ်အဃိကမျၢၢ်သံဘၣ်ဒိဘၣ်ထံးအါမးအဂ့ၢ်န့ၣ် ကမျၢၢ်လၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ စှၤသီအတီၢ်ပူၤလၢကီးတရံး၀့ၢ်ကပၤ(ကီးနွဲၣ်)သ၀ီတကပၤန့ၣ်တၢ်ဒုးဆူၣ်ထီၣ်၀ဲဒီးဖဲမဟါအနံၤစ့ၢ်ကီးတၢ်ဒုးဆဲးကဲထီၣ်လၢကီးတရံး၀့ၢ်(က၀ီၤဒ့ ၇)အခါပယီၤသုးခးလီၤကျိဖးဒိၣ်တကးဒံးဘၣ်အမဲာ်ညါ ကဘီယူၤစ့ၢ်ကီးဟဲခးလီၤတၢ်တပယူာ်ဃီအဃိ ၀့ၢ်ပူၤကမျၢၢ်သံဘၣ်ဒိဘၣ်ထံး၀ဲအါမးအဂ့ၢ်န့ၣ် ကီးတရံးကမျၢၢ်တဂၤစံး၀ဲဒ်အံၤန့ၣ်လီၤႉ “အပူၤကွံာ်လၢညါခါန့ၣ်တၢ်ဒုးကဲထီၣ်လၢ၀့ၢ်ချၢလီၤႉမ့မ့ၢ်ပယီၤသုးဒုခးလီၤကျိဖးဒိၣ်တပယူာ်ဃီလီၤႉဖဲမဟါန့ၣ်တၢ်ဒုးကဲထီၣ်ကဒီးလၢ (က၀ီၤဒ့ ၇) အဃိပယီၤသုးခးလီၤကျိဖးဒိၣ်ပနၢ်ဟူလၢအဘၣ်ကမျၢၢ် (၉) ဂၤႇအသံကွံာ် (၁) ဂၤမီၤနီၤႉ ဖဲဂီၤခီန့ၣ်လၢကီးနွဲၣ်သ၀ီအ့ရှါကျဲတကပၤန့ၣ်နါက့ဘၣ်ဒီးကျိဖးဒိၣ်သံတဂၤဒံး” sအဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိတၢ်ဒုးကဲထီၣ်အဃိကီးတရံး၀့ၢ်ခိၣ်၀့ၢ်ဃၢၤသ၀ီတဖၣ်အပူၤကမျၢၢ်သံဘၣ်ဒိဘၣ်ထံးအါမးဒီးခီဖျိတၢ်ဒုးတၢ်ယၤအဃိကမျၢၢ်လၢအဃ့ၢ်မှံဟးဖျိးတဖၣ်အံၤစ့ၢ်ကီးကတီၢ်ခဲအံၤလိၣ်ဘၣ်၀ဲဒၣ်တၢ်ကူတၢ်ကၤဒီးတၢ်အီၣ်တၢ်အီသ့ၣ်တဖၣ်အဂ့ၢ်န့ၣ်ကမျၢၢ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ကမျၢၢ်ၦၤဃ့ၢ်မှံဟးဖျိးတဂၤစံး၀ဲ“တၢ်ဒုးကဲထီၣ်တပယူာ်ဃီလီၤႉကမျၢၢ်လၢအိၣ်၀့ၢ်ပူၤ၀့ၢ်ချၢတဖၣ်နါက့ဘၣ်ဒိဘၣ်ထံးအိၣ်ဒီဒူၣ်ညါႉၦၤအိၣ်လၢသ၀ီပူၤတဘူၣ်လၢၤဘၣ်ႉၦၤလဲၤစံၣ်အိၣ်လၢၦၢ်ပူၤတဖၣ်နါက့တၢ်ချံၣ်ဒိၣ်မးႉတၢ်အီၣ်တၢ်အီနါက့တအိၣ်လၢၤဘၣ်ၦ့ၤအီၣ်ဒၢးတန့ၢ်ဘၣ်ႉတၢ်လိၣ်အခိၣ်သ့ၣ်န့ၣ်မ့ၢ်၀ဲတၢ်အီၣ်တၢ်အီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၁၆ သီအခါ တၢ်နုာ်လီၤခး၀ဲကီးတရံးပယီၤသုးခီၣ်ချ့သုးရ့ၣ်(ခလရ–၂၃၀)ႇ(၂၃၁)အံၤဒီး ဖဲန့ၣ်တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်န့ၣ်လီၤႉတၢ်ဒုးကဲထီၣ်ဘျီ၀ဲၤအံၤခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိကတီၢ်ခဲအံၤကမျၢၢ်သံ၀ဲ(၂)ဂၤဒီးဘၣ်ဒိ၀ဲ(၁၂)ဂၤလံအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ဖဲမဟါဂီၤခီအဆၢကတီၢ် လၢကီးတရံးကီၢ်ဆၣ် ကီးနွဲၣ်သ၀ီကပၤန့ၣ် တၢ်ဒုးကဲထီၣ်၀ဲလၢကညီဒီကလုာ်တၢ် ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤအဃိ ပယီၤသုးသံအါအါဂီၢ်ဂီၢ်အကျါ ပၣ်ဃုာ်၀ဲသုးခိၣ်စိအဂ့ၢ်န့ၣ်ဒီကလုာ်ဃူဖိး(NUG)ကလံၤထံးတၢ်ဘိးဘၣ်ရၤလီၤကရူၢ်ထုးထီၣ်ပာ်ဖျါ၀ဲန့ၣ်လီၤႉ

လါဒံၣ်စ့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ်အပူၤ ပယီၤသုးတြီၢ်တံၢ်ဃာ်တၢ်ကလဲၤဆှၢဆ့ကၤကလၢၤဆူလီၢ်က၀ီၤကမျၢၢ် လၢအိၣ်ခိခိၣ်ဒူသ၀ီတၢ်လီၢ်တဖၣ် အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ပယီၤသုးအံၤဒ်သိးၦၤလဲၤဟ့ၣ်တၢ်ဆီၣ်ထွဲမၤစၢၤဆူကမျၢၢ်ၦၤဃ့ၢ်မှံဟးဖျိးဒီးဟီၣ်က၀ီၤတၢ်ဒီသဒၢကရူၢ်အအိၣ်သုတသ့တဂ့ၤအဂီၢ်န့ၣ်ဖဲအပူၤကွံာ်လါအခါအ၀ဲသ့ၣ်တပျဲၦၤစိာ်ထီၣ်စိာ်လီၤဟုသးတၢ်အီၣ်ဃ့တဖၣ်လၢၤဘၣ်ဒီး တကီၢ်ခါခဲအံၤတၢ်ဂိၢ်ခါအဆၢကတီၢ် တပျဲၦၤလဲၤဆှၢဆ့ကၤကလၢၤဘၣ်အဂ့ၢ်န့ၣ် ၦၤပနံာ်ကၤတၢ်ဖိတဂၤစံး၀ဲဒ်အံၤ န့ၣ်လီၤႉ “အပူၤကွံာ်န့ၣ်အ၀ဲသ့ၣ်တပျဲစိာ်ဟုသးဘၣ်ႉအမ့ထံၣ်နဟဲက့ၤန့ၣ်ဃ့အီၣ်လိး၀ဲႉပဘၣ်ဟ့ၣ်လီၤစ့တုၤလၢအကလီၢ်ညါႉခဲအံၤဘျီမ့ထံၣ်ဆ့ကၤကလၢၤန့ၣ်တပျဲစိာ်၀ဲလၢၤဘၣ်ႉအ၀ဲသ့ၣ်အတၢ်ပညိၣ်ခီန့ၣ်ဒ်သိးကမျၢၢ်ၦၤဃ့ၢ်မှံဟးဖျိးတဖၣ်သုတဒိးန့ၢ်ဘၣ်ဆ့ကၤကလၢၤတဂ့ၤအဂီၢ်လီၤမီၤနီၤ” vအဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးအံၤတပျဲၦၤစိာ်တၢ်အီၣ်တၢ်အီဒီးဆ့ကၤကလၢၤတဖၣ်လၢၤဘၣ်အဃိကမျၢၢ်ၦၤဃ့ၢ်မှံဟးဖျိးလၢအိၣ်ဟီၣ်က၀ီၤဖဲန့ၣ်အပူၤတဖၣ်တၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတကူတလၢ၀ဲလၢၤဘၣ်အမဲာ်ညါ တူၢ်ဘၣ်ခီၣ်ဘၣ်စ့ၢ်ကီး၀ဲတၢ်ချံၣ်ဒိၣ်မးအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲအပူၤကွံာ်လါဒံၣ်စ့ဘၢၣ် ၁၅ သီအနံၤန့ၣ် ပယီၤသုးကျိၤနုာ်လီၤလၢမုၢ်ထီၣ်ခိခိၣ်ဒူသ၀ီတဖၣ်အပူၤဒီးက့ၤစိာ်ကွံာ်တၢ်အီၣ်တၢ်အီလၢအိၣ်သ၀ီပူၤတဖၣ်အဃိ ကမျၢၢ်ၦၤဃ့ၢ်မှံဟးဖျိးတဖၣ်အံၤတၢ်ကီတၢ်ခဲအိၣ်ထီၣ်လၢကအီၣ်ကအီ၀ဲအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ “ပယီၤသုးမ့ဟဲလၢမုၢ်ထီၣ်ခိခိၣ်ဒူသ၀ီအပူၤန့ၣ်အ၀ဲသ့ၣ်ဘၣ်ဃ့ၢ်ထီၣ်သုးလီၢ်သုးကျဲလၢအဂၤလီၤႉအပူၤကွံာ်တချုးလါဒံၣ်စ့ဘၢၣ် ၅ သီအခါန့ၣ် အ၀ဲသ့ၣ်အတၢ်အီၣ်တၢ်အီအိၣ်တ့ၢ်(တလါ)ဘျဲၣ်အဂီၢ်ဒံးမီၤနီၤႉဖဲလါဒံၣ်စ့ဘၢၣ် ၅ သီအခါပယီၤသုးနုာ်လီၤလၢသ၀ီပူၤက့ၤစိာ်ကွံာ်တၢ်အီၣ်တၢ်အီခဲလၢာ်အဃိခဲအံၤၦၤဃ့ၢ်မှံဟးဖျိးတဖၣ်အဂီၢ် တၢ်ကီတၢ်ခဲအိၣ်ထီၣ်လၢကအီၣ်ကအီအဂီၢ်မီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤလၢဒ၀ဲၢ်၀့ၢ်ပူၤဒီးဒူသ၀ီတဖၣ်အပူၤန့ၣ်တၢ်ဒီသဒၢကမျၢၢ်သုး(PDF)ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်အဂ့ၢ်န့ၣ် ဟီၣ်က၀ီၤဂံၢ်ခီၣ်ထံးတၢ်ကစီၣ်တဖၣ်ပာ်ဖျါ၀ဲအသိးသ့ၣ်ညါဘၣ်လီၤႉ

လါဒံၣ်စ့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် ဒ်သိးပတၢ်ဂဲၤလိာ်ကတုၤထီၣ်ထီၣ်ဘးဆူပတၢ်ပညိၣ်ဖီတၢၣ်အဂီၢ်န့ၣ်ပ၀ဲကညီဖိတၢ်ကရၢကရိခဲလၢာ်ႇတၢ်ဘူၣ်တၢ်ဘါကရူၢ်ကရၢဒီးတၢ်ပၢၢ်ဆၢအတၢ်ကရၢကရိခဲလၢာ်ပကဘၣ်ပာ်ဖှိၣ်မၤသကိးတၢ်လၢနီၣ်တယၢ်တဘ့ၣ်ဃီအဖီလာ်ဒီးလၢပတၢ်ပညိၣ်ကွၢ်စိတမံၤဃီအဖီခိၣ်အဂ့ၢ်န့ၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤပၢၤလီၢ်ဆ့ၣ်နီၤ စီၤမူၤတူစ့ဖိ ဆီၣ်တခူထီၣ်၀ဲန့ၣ်လီၤႉ ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤ စံး၀ဲလၢ“ကညီဖိလၢအိၣ်တၢ်လီၢ်တတီၤဂ့ၤတတီၤဂ့ၤႇကညီဖိအတၢ်ကရၢကရိခဲလၢာ်ႇ တၢ်ဘူၣ်တၢ်ဘါအကရူၢ်ကရၢခဲလၢာ်ဒီးကညီၦၤပၢၢ်ဆၢတၢ်ဖိအတၢ်ကရၢကရိခဲလၢာ်ပကဘၣ်ပာ်ဖှိၣ်မၤသကိးတၢ်န့ၣ်လီၤႉလၢနီၣ်တယၢ်တဘ့ၣ်ဃီအဖီလာ်လၢတၢ်ပညိၣ်ကွၢ်စိဒီးလၢတၢ်ဂဲၤလိာ်တမံၤဃီအဂီၢ်န့ၣ်ပကဘၣ်ဖီၣ်လိာ်စုဒီးမၤသကိးတၢ်န့ၣ်လီၤ”အဂ့ၢ်န့ၣ်ဟ့ၣ်သဆၣ်ထီၣ်၀ဲန့ၣ်လီၤႉ လၢန့ၣ်အမဲာ်ညါဖဲပကွၢ်ကဒါက့ၤပတၢ်လဲၤခီဖျိဒီးပတၢ်ဂဲၤလိာ်တဖၣ်န့ၣ်ပထံၣ်ဘၣ်လၢပတၢ်ဂဲၤလိာ်အပူၤပတၢ်ဂံၢ်စၢ်ဘါစၢ်အိၣ်၀ဲအါမးဒီးလၢပတၢ်ဂံၢ်စၢ်ဘါစၢ်ခဲလၢာ်အကျါပထံၣ်ဘၣ်လၢပတၢ်ဃူတၢ်ဖိးဒီးတၢ်လီၤမုၢ်လီၤဖးလၢပတၢ်ဂဲၤလိာ်အပူၤန့ၣ်မ့ၢ်ပတၢ်ဂံၢ်စၢ်ဘါစၢ်အဒိၣ်ကတၢၢ်ဒီးသနာ်က့ပတ့ၢ်စၢ်လီၤပဂံၢ်ပာ်ဘါတသ့လ့ၤတက့ၤဘၣ်ႇမ့မ့ၢ်တခီပကဘၣ်ဂဲၤလိာ်အီၤဆူၣ်န့ၢ်အါန့ၢ်ဒီးဂ့ၤဒိၣ်န့ၢ်ဒံးအလီၢ်အဂ့ၢ်န့ၣ်(KNU)ၦၤပၢၤလီၢ်ဆ့ၣ်နီၤဟ့ၣ်သဆၣ်ထီၣ်၀ဲန့ၣ်လီၤႉ ခ့ၣ်အဲၣ်ယူၣ်လီၢ်ခၢၣ်သးကမံးတံာ် ပဒိၣ်စီၤသမ့ၤထိစ့ၢ်ကီးစံး၀ဲ“ပစံးလၢတၢ်အိၣ်ဃူတၢ်ဖိးန့ၣ်အညီဒိၣ်မးလီၤႉ နမၤအီၤအနီၢ်ကီၢ်န့ၣ်တၢ်လီၤမုၢ်ပြံပြါကဲထီၣ်တပယူာ်ဃီလီၤႉအရ့ဒိၣ်ကတၢၢ်တၢ်ဆၢတဲာ်လၢၦၤအါဂၤဘၣ်သူၣ်ဘၣ်သးသးလီၤပလိာ်၀ဲတဖၣ်န့ၣ်ၦၤတူၢ်လိာ်ဘၣ်သး၀ဲအိၣ်စှၤဘၣ်ဆၣ်ဒ်ဒံၣ်မိၣ်ခြ့ၣ်စံၣ်တၢ်ဖံးတၢ်မၤအသိးန့ၣ်တၢ်ဆၢတဲာ်လၢၦၤအါဂၤဘၣ်သူဘၣ်သးသးလီၤပိာ်၀ဲတဖၣ်န့ၣ်ၦၤကဘၣ်လူၤပိာ်မၤထွဲ၀ဲမီၤနီၤႉ ဘၣ်မနုၤအဃိၦၤတူၢ်လိာ်ဘၣ်သး၀ဲစှၤလဲၣ်တၢ်သ့ၣ်တဖၣ်အံၤအလီၢ်အိၣ်လၢပကဘၣ်ကွၢ်ဆိကမိၣ်နီၤဖးက့ၤအီၤမီၤနီၤႉမ့အိၣ်ဒ်န့ၣ်မးပစံးလၢတၢ်ဃူတၢ်ဖိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်အလီၢ်အိၣ်အသိးပကဘၣ်ဂဲၤလိာ်သကိးပ၀ဲဒီးဖီၣ်လိာ်စုမၤသကိးတၢ်ဒီးကယဲၢ်ကရူၢ်ကရၢႇတၢ်ကရၢကရိဒီးၦၤကလုာ်ခဲလၢာ်လၢအဂဲၤလိာ်ထီဒါ၀ဲသုးမီၤစိရိၤဒီးမီၤစိရိၤတမံၤလၢ်လၢ်လၢကလီၤမၢ်ကွံာ်၀ဲအဂီၢ်အဂ့ၢ်န့ၣ်(KNU)ၦၤပၢၤလီၢ်ဆ့ၣ်နီၤသုးခိၣ်ကျၢၢ်ဒိၣ်စိ စီၤမူၤတူစ့ဖိ စံးလီၤ၀ဲလၢနံၣ်ထီၣ်သီအလံာ်ဟ့ၣ်အပူၤန့ၣ်လီၤႉ ဒ်န့ၣ်အသိးကညီဒီကလုာ်တၢ်ထူၣ်ဖျဲးးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ်ခံ သုးခိၣ်ကျၢၢ်စိ စီၤဘီကၠီၤဟဲ နံၣ်ထီၣ်သီအလံာ်ဟ့ၣ်ပူၤစ့ၢ်ကီးစံး၀ဲဒ်သိးပကပူၤဖျဲးထီၣ်လၢတၢ်ဆီၣ်တံၢ်မၤနၢၤႇတၢ်ကိၢ်တၢ်ဂီၤႇတၢ်မၤအၢမၤသီသ့ၣ်တဖၣ်အဂီၢ်န့ၣ်မ့ၢ်ပ၀ဲဒၣ်ကိးဂၤဒဲးအမူအဒါဒီးႇခါဆူညါဖိလံၤစၢၤသွဲၣ်သီတဖၣ်ကအိၣ်ဘၣ်က့ၤ၀ဲဒီးတၢ်မုာ်တၢ်ခုၣ်အဂီၢ်စိၤဆၢကတီၢ်ခဲအံၤပ၀ဲသ့ၣ်တဖၣ်န့ၣ်ပကဘၣ်ဂုာ်ကျဲးစၢးတၢ်သၦၢ်ၦၢ်လီၤအဂ့ၢ်န့ၣ်ဟ့ၣ်သဆၣ်ထီၣ်၀ဲန့ၣ်လီၤႉ ကညီနံၣ်(၂၇၆၂)နံၣ်လၢအလီၤဘၣ်ဖဲမဟါသလ့ၤလါထီၣ် ၁ သီအနံၤအံၤ ခီဖျိခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီအဃိ ဟီၣ်က၀ီၤလၢတၢ်ဒုးကဲထီၣ်အလီၢ်တဖၣ်အါဒၣ်တက့ၢ်န့ၣ်တၢ်တမၤဘၣ်၀ဲကညီနံၣ်ထီၣ်သီအံၤဘၣ်အသိးတၢ်လီၢ်တနီၤတၢ်ဒုးကဲထီၣ်တအိၣ်၀ဲဘၣ်ဆၣ်ခီဖျိလၢတၢ်ဘံၣ်တၢ်ဘၢအဃိတၢ်တမၤဘၣ်၀ဲကညီနံၣ်ထီၣ်သီမူးတၢ်ရဲၣ်တၢ်ကျဲၤဘၣ်စ့ၢ်ကီးအိၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ