ခ့ၣ်အဲးစံၣ် – KIC News

လါဒံၣ်စ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ်အပူၤခီဖျိပသဲဂီၤအၦ့ၤထီၣ်တစဲးဘၣ်တစဲးအဃိ တၢ်အိၣ်သးအိၣ်ထီၣ်တုၤလၢ ထံဖိကီၢ်ဖိကမျၢၢ်တဖၣ်ၦ့ၤအီၣ်၀ဲတန့ၢ်လၢၤဘၣ် အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါယူၤထီၣ်သီအခါန့ၣ်ပသဲဂီၤတပီၢ်န့ၣ်အၦ့ၤအိၣ်၀ဲ(၁၀၀၀)ဘျဲၣ်လီၤဘၣ်ဆၣ် ကတီၢ်ခဲအံၤတပီၢ်န့ၣ်အၦ့ၤထီၣ်တုၤလၢ(၄၀၀၀)ဘျဲၣ်လံအဃိကမျၢၢ်တဖၣ်ၦ့ၤအီၣ်၀ဲတန့ၢ်လၢၤဘၣ်အဂ့ၢ်န့ၣ် ဖၣ်အၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “လၢသ၀ီပူၤအံၤပသဲဂီၤတပီၢ်န့ၣ်အၦ့ၤထီၣ်တုၤလၢ (၄၅၀၀) ကၠးလံႉၦၤၦ့ၤအီၣ်တန့ၢ်လၢၤဘၣ်ႉပသဲသၣ်န့ၣ်တကဲကသူဘၣ်မီၤနီၤႉၦၤၦ့ၤအီၣ်က့ၤတၢ်လၢအဂၤလီၤႉတနီၤန့ၣ်အဖီအီၣ်တၢ်အခါတထၢနုာ်လီၤပသဲသၣ်လၢၤဘၣ်ႉလၢသ၀ီအံၤအါဒၣ်တက့ၢ်ၦၤၦ့ၤအီၣ်က့ၤပသဲဂီၤတမၢၦ့ၤခံမၢၦ့ၤဒ်န့ၣ်လီၤ” အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိပသဲဂီၤအၦ့ၤထီၣ်အဃိကမျၢၢ်တဖၣ်ၦ့ၤအီၣ်၀ဲတန့ၢ်လၢၤဘၣ်ဒီးၦၤလၢအိးထီၣ်ဆါကျးဖးဒိၣ်တဖၣ်စ့ၢ်ကီးဆါ၀ဲပသဲဂီၤတန့ၢ်အါအါလၢၤဘၣ်အဂ့ၢ်န့ၣ်ၦၤအိးထီၣ်ကျးဖးဒိၣ်လၢကီးတရံး၀့ၢ်ပူၤတဖၣ်စံး၀ဲန့ၣ်လီၤႉ ကီးတရံး၀့ၢ် ကျးဖးဒိၣ်ကစၢ်တဂၤစံး၀ဲ“ပသဲဂီၤန့ၣ်ပဘၣ်မၢ်လီၤအီၤလၢမီၣ်လမၠဲၣ်ႇ၀့ၢ်တကူၣ်တကပၤမီၤနီၤႉ လၢကျးပူၤအံၤပသဲဂီၤအပီၢ်(၁၀)တထၢၣ်န့ၣ်အၦ့ၤအိၣ်၀ဲ(၄၀၀၀၀)ကၠးညါမီၤနီၤႉလၢညါခါၦၤမ့ဟံ(၅)ထၢၣ်န့ၣ်ခဲအံၤၦၤဟံက့ၤထဲ(၂)ထၢၣ်လီၤႉမ့ၢ်လၢတၢ်ၦ့ၤတဂၢၢ်တကျၢၤဘၣ်အဃိၦၤအိၣ်လၢသ၀ီတဖၣ်န့ၣ်ဟဲၦ့ၤက့ၤတၢ်တစဲးလီၤႉတၢ်လုၢ်တၢ်ၦ့ၤထီၣ်အဃိလၢကျးပူၤန့ၣ်ပတဆါတၢ်ဖိတၢ်လံၤအါအါလၢၤဘၣ်ႉအပူၤကွံာ်နၦ့ၤတၢ်တဘျီန့ၣ်လၢာ်အကလီၢ်(၅၀)န့ၣ်ခဲအံၤလၢာ်လၢအကလီၢ်(၁၀၀)ညါႉၦၤအိၣ်လၢသ၀ီတဖၣ်နါက့ဟဲၦ့ၤတၢ်လီၤစှၤ၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤလၢကညီကီၢ်စဲၣ် ကီၢ်ဆၣ်ကိးဘ့ၣ်ဒဲး ဒူသ၀ီတဖၣ်အပူၤန့ၣ် ပသဲဂီၤတပီၢ်န့ၣ်အၦ့ၤအိၣ်၀ဲ(၄၅၀၀)တုၤလၢ(၆၀၀၀)ကၠးညါလံအဂ့ၢ်န့ၣ်သ့ၣ်ညါဘၣ်လၢၦၤၦ့ၤအီၣ်တၢ်ဖိတဖၣ် အအိၣ်န့ၣ်လီၤႉ

လါဒံၣ်စ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ်အပူၤ ခီဖျိပယီၤသုးနုာ်လီၤအါထီၣ်ကဒီးလၢချၢၣ်တကူၣ်တၢၣ်ပၢၤကီၢ်၀ဲၤလီၢ် ကရၢၢ်ပူၤအဃိသ၀ီဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်လၢလီၢ်က၀ီၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါလါဒံၣ်စ့ဘၢၣ် ၅ သီ ဂီၤခီ ၈ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးတဖၣ်အိၣ်လၢကၠဲၣ်မယီကီၢ်ဆၣ်(တီၤကလ့သ၀ီ)တဆီဒီးနုာ်လီၤအါထီၣ်ကဒီးလၢတကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအဃိသ၀ီဖိတနီၤဟးစံၣ်ပလဲာ်သးလံအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲန့ၣ်လီၤႉ “ဖဲဂီၤခီန့ၣ်အ၀ဲသ့ၣ်သ့ၣ်ဟဲထီၣ်ဒီးသိလ့ၣ်ဟံၣ်ႇသိလ့ၣ်မၤတၢ်မၤမီၤနီၤႉကအိၣ်အဂၤ (၁၀၀) ဘျဲၣ်ညါႉအ၀ဲသ့ၣ်မ့ဟဲန့ၣ်သ၀ီဖိအိၣ်တဘူၣ်လၢၤဘၣ်ႉၦၤအိၣ်ဖဲတၢ်ကပိၤကပၤတဖၣ်အါတက့ၢ်န့ၣ်အဟးစံၣ်မီၤနီၤႉတၢ်မ့ကဲထီၣ်တမံၤမံၤန့ၣ်အ၀ဲသ့ၣ်ခးလီၤကျိဖးဒိၣ်လၢသ၀ီပူၤလီၤႉပတမၤဘၣ်စ့ၢ်ကီးတၢ်မၤမူၤမူၤနီၢ်နီၢ်ဒံးဘၣ်အဃိတၢ်ကီတၢ်ခဲအိၣ်လၢကအီၣ်ကအီအဂီၢ်မီၤနီၤ” အဂ့ၢ်န့ၣ်၀ီၢ်ရ့ၣ်လီၢ်က၀ီၤသ၀ီဖိတဂၤစံးဘၣ်ခ့ၣ်အဲးစံၣ်ဖဲမဟါလါဒံၣ်စ့ဘၢၣ် ၅ သီအနံၤ န့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၂၉ သီအနံၤစ့ၢ်ကီး ပယီၤသုးဟဲထီၣ်၀ဲဒၣ်အါအါဂီၢ်ဂီၢ်ဒီး ဒွဲၣ်အူအီၣ်၀ဲ(ည့ခၠါမၠဲၤ)လီၢ်က၀ီၤ ကမျၢၢ်အဟံၣ် ၂ ဖျၢၣ်ဒံးန့ၣ်လီၤႉ တကးဒံးဘၣ်ဖီၣ်က့ၤကိးသူ၀ဲလီၢ်က၀ီၤပိာ်ခွါႇမုၣ်ပိာ်မုၣ်မၢၤတဖၣ်ဒ်တၢ်ဒီသဒၢ စုက၀ဲၤအသိးဒီးနုာ်လီၤဃုမၤဟးဂီၤတၢ်လၢၦၤဟံၣ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိအအိၣ်န့ၣ်လီၤႉ “အ၀ဲသ့ၣ်ကအီသံးအဂီၢ်န့ၣ်ဟးဃ့စ့လၢၦၤအိၣ်ႉဟးနုာ်လီၤဃုတၢ်လၢသ၀ီဖိအဟံၣ်ပူၤမၤဟးဂီၤၦၤတၢ်ဖိတၢ်လံၤအိၣ်ႉအ၀ဲသ့ၣ်မ့ဟဲထီၣ်လံန့ၣ်ၦၤကိးဂၤဒဲးန့ၣ်တအိၣ်ဘၣ်မုာ်မုာ်ခုၣ်ခုၣ်လၢၤဘၣ်ႉခဲအံၤနါက့ဟဲထီၣ်ကဒီးလံႉတၢ်ပၢၢ်ဆၢကရူၢ်မ့မၤတၢ်တမံၤမံၤန့ၣ်အ၀ဲသ့ၣ်ခးလီၤကျိဖးဒိၣ်လီၤႉက့ၤမၤပျံၤမၤဖုးၦၤသ၀ီဖိႉအ၀ဲသ့ၣ်မ့အိၣ်န့ၣ်ၦၤလဲၤကွးရီဘၢၣ်တဘူၣ်လၢာ်ဘၣ်မီၤနီၤ” အဂ့ၢ်န့ၣ်ချၢၣ်တကူၣ်တၢၣ်သ၀ီဖိနီမံမံစံး၀ဲန့ၣ်လီၤႉ ၀ီၢ်ရ့ၣ်လီၢ်က၀ီၤသ၀ီကရူၢ်တကူၣ်တၢၣ်ႇလိၣ်ရှါႇနိၣ်ခၠိနဲၣ်ႇလ့နိးသ၀ီအံၤအိၣ်၀ဲလၢခ့ၣ်အဲၣ်ယူၣ်–ကညီဒီကလုာ် စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်တၢ်ပၢဟီၣ်က၀ီၤအပူၤဒီး လၢသ၀ီတဖၣ်အံၤအပူၤပယီၤသုးကလၢၤ အိၣ်ဆီလီၤသးဒီးခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိလီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်ခဲအံၤခဲအံၤန့ၣ်လီၤႉ တကးဒံးဘၣ်လၢန့ၣ်အမဲာ်ညါပယီၤသုးတဲပျံၤသ၀ီဖိတဖၣ်လၢတၢ်ပၢၢ်ဆၢသုးကရူၢ်မ့ဟဲခးအ၀ဲသ့ၣ်သုးကလၢၤန့ၣ်ကက့ၤဒွဲၣ်အူအီၣ်ကဒါသ၀ီခဲအံၤခဲအံၤအိၣ်၀ဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

လါဒံၣ်စ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံတၢ်ဖံးတၢ်မၤကၤထီၣ်၀ဲဒီးခီဖျိထံရူၢ်ကီၢ်သဲးတၢ်အိၣ်သးတဂၢၢ်တကျၢၤဘၣ်အဃိလီၢ်က၀ီၤကမျၢၢ်လၢအဟံလိၢ်ဃာ်စ့သ့ၣ်တဖၣ်အံၤတၢ်ကီတၢ်ခဲအိၣ်ထီၣ်လၢကက့ၤဟ့ၣ်ကဒါစ့အဂ့ၢ်န့ၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ စ့လၢဟံလိၢ်စိဃာ်လၢနီၢ်တဂၤ(ပိၣ်ကလံၣ်ကၣ်)ခီပနံၣ်အအိၣ်တဖၣ်အံၤတကီၢ်ခါတၢ်ကီတၢ်ခဲအိၣ်ထီၣ်လၢကက့ၤဟ့ၣ်ကဒါ၀ဲအဃိလီၢ်က၀ီၤကမျၢၢ်တနီၤန့ၣ်ဆါလီၤက့ၤအတၢ်ဖိတၢ်လံၤက့ၤဟ့ၣ်ကဒါ၀ဲစ့ဒ်န့ၣ်အိၣ်၀ဲအဂ့ၢ်န့ၣ် ဖၣ်အၣ်၀့ၢ်ကျးဖးဒိၣ်ကစၢ်လၢအဟံလိၢ်ဃာ်စ့တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤန့ၣ်ဒ်သုသ့ၣ်ညါအသိးလီၤဟီၣ်က၀ီၤပူၤတၢ်တမုာ်တခုၣ်ဘၣ်အဃိၦၤကညီနါက့တၢ်ဖံးတၢ်မၤကၤထီၣ်၀ဲမီၤနီၤႉလၢကီၢ်ဆၢနါက့ကျဲကးတံၢ်ဃာ်သးႇမၤတၢ်တဘၣ်ဂီၢ်နီတမံၤလၢာ်ဘၣ်ႉမုၢ်ကျိၤ၀ဲၤကွာ်တဂ့ၤဘၣ်အဃိၦၤလၢအဟံလိၢ်ဃာ်စ့တဖၣ်န့ၣ်အ၀ဲသ့ၣ်ကက့ၤဟ့ၣ်ကဒါစ့အဂီၢ်တညီလၢၤဘၣ်မီၤနီၤႉအဃိန့ၣ်အ၀ဲသ့ၣ်ဆါလီၤက့ၤ၀ဲဒၣ်အတၢ်ဖိတၢ်လံၤဒီးဘၣ်က့ၤဟ့ၣ်ကဒါ၀ဲစ့ဒ်န့ၣ်လီၤ”အဂ့ၢ်န့ၣ်စံး၀ဲန့ၣ်လီၤႉ ဒ်န့ၣ်အသိးဘုၣ်၀ဲကျီၢ်လၢတၢ်ဘံးဆါအနုၢ်ထံတဖၣ်လီၤဒီးလၢကမၤအါထီၣ်တၢ်ဖံးတၢ်မၤအဂီၢ်စ့ၢ်ကီးဘၣ်ဟံလိၢ်စိ၀ဲစ့လၢနီၢ်တဂၤ(ပိၣ်ကလံၣ်ကၣ်)ခီပနံၣ်အအိၣ်လီၤဒီးဖဲန့ၣ်အခါတၢ်ဖံးတၢ်မၤလဲၤတရံးသးဘၣ်ဂီၢ်ဘၣ်ဒွါ၀ဲဘၣ်ဆၣ်စးထီၣ်ဖဲခိ၀ံၣ်တၢ်ဆါလီၤသုးဟံးန့ၢ်တၢ်စိတၢ်ကမီၤကဲထီၣ်သး၀ံၤအလီၢ်ခံန့ၣ်တၢ်ဖံးတၢ်မၤတဘၣ်ဂီၢ်၀ဲလၢၤဘၣ်နးဒိၣ်ထီၣ်ကွ့ၢ်ကွ့ၢ်အဃိကက့ၤဟ့ၣ်ကဒါစ့အဂီၢ်န့ၣ်ဘၣ်က့ၤဆါလီၤ၀ဲကျီၢ်လၢတၢ်ဘံးဆါအနုၢ်ထံတနီၤ၀ံၤဘၣ်က့ၤဟ့ၣ်လီၤ၀ဲအဂ့ၢ်န့ၣ်ဖၣ်အၣ်လီၢ်က၀ီၤကမျၢၢ်လၢအဘုၣ်ကျီၢ်အီတၢ်နုၢ်ထံတဂၤစံး၀ဲဒ်အံၤန့ၣ်လီၤႉ “စးထီၣ်မၤအသီသီခါဒုအဘၣ်ဂီၢ်လီၤမီၤနီၤႉစးထီၣ်ဖဲခိ၀ံၣ်တၢ်ဆါလီၤဘျီန့ၣ်ဘၣ်ဒိဆါဖဲန့ၣ်တဘျီႉခဲအံၤဘၣ်တဲက့ၤလၢအနးကတၢၢ်လီၤမီၤနီၤႉမၤတၢ်တဘၣ်နီတမံၤလၢၤဘၣ်လီၢ်ခံကတၢၢ်န့ၣ်ပဘၣ်ထုးထီၣ်ပကစၢ်စ့တနီၤဒီးဘၣ်ဆါလီၤက့ၤကျီၢ်တနီၤ၀ံၤဘၣ်က့ၤဟ့ၣ်ကဒါစ့ဒ်န့ၣ်လီၤမီၤနီၤႉမၤဘၣ်၀ဲလဲၣ်ၦၤကိးဂၤဒဲးန့ၣ်တူၢ်ဘၣ်တၢ်ဒ်အံၤလီၤတမ့ၢ်ဧါ” အဂ့ၢ်န့ၣ်အ၀ဲစံး၀ဲန့ၣ်လီၤႉ ကီၢ်ပယီၤထံကီၢ်ဒီတဘ့ၣ်အပူၤကီၢ်ခီဒိၣ်ဒီးကီၢ်စဲၣ်တဖၣ်အပူၤန့ၣ်နီၢ်တဂၤ(ပိၣ်ကလံၣ်ကၣ်)ခီပနံၣ်လၢအမၤတၢ်ဟ့ၣ်လိၢ်စ့လၢအဖိးသဲစးအံၤအိၣ်၀ဲခဲလၢာ်(၁၉၃)ဒူၣ်ဒီးၦၤနီၣ်ဂံၢ်လၢအဟံလိၢ်စ့အိၣ်၀ဲခဲလၢာ်(၄ႉ၆)အကကွဲၢ်အဂ့ၢ်န့ၣ်အပူၤကွံာ်(၂၀၂၁)ကီၢ်ပယီၤကျိၣ်စ့တၢ်ဖံးတၢ်မၤကရူၢ်ကရၢ(MMFA)ထုးထီၣ်ပာ်ဖျါစရီပူၤအသိးသ့ၣ်ညါဘၣ်န့ၣ်လီၤႉ ကတီၢ်ခဲအံၤခီပနံၣ်ကရူၢ်ကရၢလၢအမၤကျိၣ်စ့တၢ်ဖံးတၢ်မၤအံၤတဖၣ်ခီဖျိထံရူၢ်ကီၢ်သဲးတၢ်အိၣ်တဂၢၢ်တကျၢၤဘၣ်အဃိအ၀ဲသ့ၣ်က့ၤထၢကဒါစ့လၢအ၀ဲသ့ၣ်ထုးထီၣ်ဟ့ၣ်လိၢ်ဃာ်၀ဲတဖၣ်ဒီးတၢ်ဒုးလိၢ်စ့တၢ်ဖံးတၢ်မၤအံၤစ့ၢ်ကီးအ၀ဲသ့ၣ်တဆဲးမၤ၀ဲလၢၤဘၣ်န့ၣ်လီၤႉတကးဒံးဘၣ်လၢန့ၣ်အမဲာ်ညါအ၀ဲသ့ၣ်မၤလီၤစှၤစ့ၢ်ကီး၀ဲၦၤမၤတၢ်ဖိတဖၣ်အဂ့ၢ်န့ၣ်ၦၤလၢအဘူးဒီးတၢ်ဒုးလိၢ်စ့ၦၤမၤတၢ်ဖိတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လါဒံၣ်စ့ဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢတၢ်သ့ၣ်နီၣ်မၤလၤကပီၤက့ၤကညီဒီကလုာ်နံၣ်ထီၣ်သီ(၂၇၆၂)နံၣ်လၢအကလီၤဘၣ်၀ဲအံၤအဂီၢ်န့ၣ် အ့ၣ်ယၣ်၀တံၣ်ကီၢ်ခီကညီသးစၢ်တီခိၣ်ရိၣ်မဲမၤ၀ဲ(Campaign)တၢ်ဟူးတၢ်ဂဲၤတခါလၢကဟ့ၣ်နီၤလီၤ၀ဲ ကညီနီၣ်တယၢ်အဘ့ၣ်ခံကထိဘျဲၣ်အံၤလၢအ့ၣ်ယၣ်၀တံၣ်ကီၢ်ဆၣ်ကိးဘ့ၣ်ဒဲးပူၤအဂ့ၢ်န့ၣ်ၦၤတီခိၣ်ရိၣ်မဲတၢ်တဖၣ်စံး၀ဲန့ၣ်လီၤႉ (Campaign) အတၢ်ပညိၣ်မ့ၢ်ဒ်သိးတၢ်ကသ့ပာ်လုၢ်ပာ်ၦ့ၤကညီဒီကလုာ်အနီၣ်တယၢ်ႇကသ့ပၢၤဃၢၤက့ၤအလုၢ်လၢ်ထူသနူဒီးကသ့ဘိးထီၣ်ဃာ်ကညီဒီကလုာ်အနီၣ်တယၢ်အံၤအဂီၢ်ဒီးနံၣ်လၢကဟဲကညီနံၣ် (၂၇၆၂) နံၣ်ထီၣ်သီမုၢ်နံၤဒိၣ်မုၢ်နံၤထီအဂီၢ်ကဟ့ၣ်နီၤလီၤ၀ဲကညီနီၣ်တယၢ် (၂၇၆၂) ဘျဲၣ်အဂ့ၢ်န့ၣ်ကညီသးစၢ်လၢအတီခိၣ်ရိၣ်မဲတၢ်တဂၤစံး၀ဲဒ်အံၤန့ၣ်လီၤႉ “ပမၤ၀ဲဒၣ် (Campaign)တခါအံၤတၢ်ပညိၣ်အခိၣ်သ့ၣ်န့ၣ်ဒ်သိးကညီကမျၢၢ်လၢအိၣ်အ့ၣ်ယၣ်၀တံၣ်ပူၤတဖၣ်ဒ်သိးအ၀ဲသ့ၣ်ကအိၣ်ဒီးဒီကလုာ်တၢ်သူၣ်ဆူၣ်သးဂဲၤဒီးလၢဒီကလုာ်တၢ်ထူၣ်ဖျဲးဒီးဒီကလုာ်တၢ်ထဲသိးတုၤသိးအဂီၢ်န့ၣ်ကသ့ပာ်ဒိၣ်ပာ်ကဲ၀ဲဒီကလုာ်နီၣ်တယၢ်အံၤဒီးကသ့ၣ်ညါနၢ်ပၢၢ်အါထီၣ်တၢ်သိၣ်တၢ်သီလၢဘၣ်တၢ်ပာ်ပနီၣ်အီၤလၢနီၣ်တယၢ်အလိၤအံၤအဃိပမၤ၀ဲဒၣ် (Campaign)အံၤလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါ(Campaign)လၢတၢ်မၤ၀ဲအံၤအတၢ်ပညိၣ်မ့ၢ်ဒ်သိးကညီကလုာ်လၢအိၣ်ကီၢ်ပူၤကီၢ်ချၢတဖၣ်ကပာ်ဖှိၣ်မၤသကိးတၢ်အသိးကညီဒီကလုာ်နီၣ်တယၢ်လၢတၢ်ကဟ့ၣ်နီၤလီၤ၀ဲအံၤစ့ၢ်ကီးနုာ်လီၤပၣ်ဃုာ်ဆီၣ်ထွဲဟ့ၣ်ဂံၢ်ဟ့ၣ်ဘါသကိးဒ်တၢ်သးအိၣ်အိၣ်၀ဲအသိးသ့၀ဲအဂ့ၢ်န့ၣ်ကညီသးစၢ်တဂၤဃီ၀ဲန့ၣ်ဆီၣ်တခူစံး၀ဲန့ၣ်လီၤႉ (Campaign)အံၤတၢ်ကစးထီၣ်မၤအီၤဖဲလါဒံၣ်စ့ဘၢၣ် ၃ သီတုၤလၢလါဒံၣ်စ့ဘၢၣ် ၁၅ သီဒီး ၦၤလၢအအဲၣ်ဒိးပၣ်ဃုာ်ဆီၣ်ထွဲမၤစၢၤ၀ဲတဖၣ်န့ၣ်ဆဲးကျိးလၢ (Ayeyarwady Karen Youth Facebook) ပူၤ တဆီသ့၀ဲအဂ့ၢ်န့ၣ် ပာ်ဖျါ၀ဲလၢအ၀ဲသ့ၣ်(facebook)ပူၤန့ၣ်လီၤႉ (Campaign)တၢ်ဟူးတၢ်ဂဲၤလၢတၢ်ကမၤ၀ဲခဲအံၤန့ၣ်တမ့ၢ်ပၣ်ဃုာ်သ့ထဲလၢကညီကလုာ်ဘၣ်ဒီး မ့မ့ၢ်တခီကလုာ်ဒူၣ်လၢအသ့ၣ်ညါပာ်ပနီၣ်၀ဲကညီကလုာ်အံၤတဖၣ်စ့ၢ်ကီးနုာ်လီၤပၣ်ဃုာ်ပၣ်ဂီၢ်သ့၀ဲဒီးကနုာ်လီၤပၣ်ဃုာ်ပာ်ဂီၢ်သကိးတပူၤဃီစ့ၢ်ကီးအဂ့ၢ်န့ၣ် အ့ၣ်ယၣ်၀တံၣ်သးစၢ်တဖၣ်ကွဲမုာ်၀ဲန့ၣ်လီၤႉ

လါဒံၣ်စ့ဘၢၣ် ၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တၢ်ကြဲၢ်ဆၣ်အပူၤ (ဒီၤလါ)လီၢ်က၀ီၤၦၤဖီၣ်ညၣ်ဖိတဖၣ်အခိၣ်သ့ၣ်န့ၣ်မၤအီၣ်မၤအီလုၢ်အီၣ် အသးသမူလၢတၢ်ဖီၣ်ညါတၢ်မၤလီၤဒီးကတီၢ်ခဲအံၤခီဖျိညၣ်အၦ့ၤတဂၢၢ်တကျၢၤဘၣ်အဃိကျိၣ်စ့တၢ်ဟဲနုာ်တဘၣ်ဂီၢ်လၢၤ၀ဲဘၣ်ဒီးတၢ်လုၢ်အီၣ်နီၢ်ခိသမူစ့ၢ်ကီးဃံးထီၣ်စ့ၤထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ညၣ်လၢအဟးထီၣ်လီၢ်က၀ီၤပူၤတဖၣ်အံၤခီဖျိၦၤၦ့ၤညၣ်ဖိတဖၣ်ၦ့ၤ၀ဲလၢအၦ့ၤဘၣ်ဒီးလိာ်ကွဲ၀ဲအၦ့ၤအဃိ ညၣ်လၢၦၤဖီၣ်ညၣ်ဖိဟးဃု၀ဲသ့ၣ်တဖၣ်အံၤဖဲအ၀ဲသ့ၣ်က့ၤဆါကဒါ၀ဲအခါတၢ်ဘၣ်လီၢ်ဘၣ်ဆးတအိၣ်၀ဲဘၣ်အဂ့ၢ်န့ၣ် (ဒီၤလါ)လီၢ်က၀ီၤကမျၢၢ်စံး၀ဲန့ၣ်လီၤႉ တချုးသုးဟံးန့ၢ်တၢ်စိတၢ်ကမီၤကဲထီၣ်ဒံးဘၣ်န့ၣ်(ဒီၤလါ)လီၢ်က၀ီၤကမျၢၢ်တဖၣ်အံၤညၣ်လၢအ၀ဲသ့ၣ်ဃု၀ဲတဖၣ်လဲၤစိာ်ဆါ၀ဲလၢၦၤၦ့ၤညၣ်ဖိတဖၣ်အအိဒီးဒိးန့ၢ်ဘၣ်၀ဲအၦ့ၤဂ့ၤဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ် ခီဖျိစ့ပယီၤအၦ့ၤလီၤႇတၢ်လုၢ်တၢ်ၦ့ၤထီၣ်ႇသိၦ့ၤထီၣ်အဃိဘၣ်ဆါန့ၢ်ၦၤၦ့ၤညၣ်ဖိဒ်အ၀ဲသ့ၣ်ဟ့ၣ်၀ဲအၦ့ၤအသိးလီၤအဂ့ၢ်န့ၣ်ၦၤဖီၣ်ညၣ်ဖိတဂၤစံး၀ဲဒ်အံၤန့ၣ်လီၤႉ ၦၤဖီၣ်ညၣ်ဖိ ကိၤထဲၣ်ကၠံ စံး၀ဲလၢ“ပဖီၣ်ညၣ်မ့န့ၢ်အါအခါန့ၣ်ၦၤဂဲာ်လိာ်ကွဲၦၤညၣ်အၦ့ၤ(ညၣ်အၦ့ၤတအိၣ်ဘၣ်) မီၤနီၤႉၦၤၦ့ၤညၣ်ဖိမ့မၤလီၤစှၤညၣ်ၦ့ၤန့ၣ်ပထံၣ်ဘၣ်တၢ်ကီတၢ်ခဲခဲလၢာ်လီၤႉၦၤဃုညၣ်ဖိတဖၣ်နါက့မ့ဆါညၣ်မးန့ၢ်မီၤနီၤႉဆါမ့တန့ၢ်ဘၣ်န့ၣ်ညၣ်ကအုၣ်ဂီၤလီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ (ဒီၤလါ)လီၢ်က၀ီၤကမျၢၢ်တဖၣ်အံၤအါဒၣ်တက့ၢ်န့ၣ်လုၢ်အီၣ်အသးသမူလၢတၢ်ဖီၣ်ညၣ်တၢ်မၤတခါလီၤဒီး ခီဖျိညၣ်ၦ့ၤတဂၢၢ်တကျၢၤဘၣ်အဃိတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသမူဒီးတၢ်ဖီၣ်ညါတၢ်မၤအမဲာ်ညါန့ၣ်ဘၣ်ဃုဖံးဃုမၤက့ၤတၢ်မၤလၢအဂၤစ့ၢ်ကီးအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ဘၣ်နံၤနံၤပဖီၣ်ညၣ်မ့တန့ၢ်ဘၣ်န့ၣ်အီၣ်အီၦ့ၤလၢၤမီၤနီၤႉပဖီၣ်ညၣ်မ့တဘၣ်ဂီၢ်ဘၣ်န့ၣ်ပနုာ်လီၤမၤတူၢ်ငါတနံၤဂီၢ်တနံၤဂီၢ်ဒ်န့ၣ်လီၤမီၤနီၤ” အဂ့ၢ်န့ၣ် အူယဲမ့ လၢအဖီၣ်ညၣ်န့ၢ်အနံၣ် (၁၀) ဘျဲၣ်အံၤစံး၀ဲန့ၣ်လီၤႉ (ဒီၤလါ)လီၢ်က၀ီၤဖိသ့ၣ်တဖၣ်အံၤအါဒၣ်တက့ၢ်န့ၣ်အစိၤဘၣ်အစိၤမၤအီၣ်မၤအီလုၢ်အီၣ်အသးသမူလၢတၢ်ဖီၣ်ညၣ်တၢ်ဖံးတၢ်မၤအံၤလၢလူၢ်ပျဲၢ်ထံကျိပူၤအံၤန့ၣ်လီၤႉလူၢ်ပျဲၢ်ထံကျိအံၤအပူၤန့ၣ်သဒီၣ်ႇညၣ်(ငယၣ်)ႇငဖဲၤႇငကၠ့ဒီးငဘၣ်သ့ၣ်တဖၣ်အိၣ်၀ဲဒၣ်န့ၣ်လီၤႉ ကတီၢ်ခဲအံၤညၣ်တပီၢ်န့ၣ်(ဖီၣ်သဲၤစ့)အၦ့ၤအိၣ်၀ဲ ၁၀၀၀၀ ဘျဲၣ်ဘၣ်ဆၣ် ၦၤခိးၦ့ၤညၣ်ဖိန့ၣ်ၦ့ၤ၀ဲထဲ(၇၀၀၀)တုၤလၢ(၈၀၀၀)ကၠးန့ၣ်လီၤႉခီဖျိသိၦ့ၤထီၣ်အဃိကဟးထီၣ်ဖီၣ်ညၣ်ဒီးချံအဂီၢ်န့ၣ်တဘၣ်ဂီၢ်၀ဲဘၣ်အဂ့ၢ်န့ၣ်လီၢ်က၀ီၤဖိစံး၀ဲန့ၣ်လီၤႉ

လါဒံၣ်စ့ဘၢၣ် ၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ ခီဖျိသုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤဒဲးအဃိ ကီးတရံးကလံၤထံးသ၀ီဖိအဂၤ(၅၀၀၀)ဘျဲၣ်ဘၣ်ဟးစံၣ်ပလဲာ်သးအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ တကီၢ်ခါခဲအံၤခီဖျိသုးမီၤစိရိၤကဘီယူၤဟဲဆှၣ်တၢ်ကိးမုၢ်နံၤမုၢ်နၤဒဲးအဃိလီၢ်က၀ီၤကမျၢၢ်တဖၣ်အိၣ်လၢဟံၣ်တဘူၣ်လၢၤဘၣ်ဒီးဘၣ်ဟးစံၣ်ပလဲာ်သးဒ်အံၤလီၤအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ အ၀ဲစံး၀ဲလၢ“ၦၤလၢအတစံၣ်ဘၣ်တဖၣ်န့ၣ်လၢမုၢ်ဆါခါန့ၣ်လဲၤမၤတၢ်လၢကျီးပူၤမ့မ့ၢ်မုၢ်နၤခီန့ၣ်လဲၤမံ၀ဲလၢသီခါဖၠၣ်မီၤနီၤႉအါဒၣ်တက့ၢ်န့ၣ်ၦၤဟးစံၣ်ပလဲာ်သးလီၤႉလၢလီကဲၤသ၀ီႇဖါကၠၣ်ႇသမ့ၤဒိၣ်ႇ၀့ကဘဲၣ်သ၀ီတကပၤမ့ၢ်ဂ့ၤႇလၢသိစဲၤသိဆူၣ်ႇအၤကီၤႇသရံၣ်သခီသ၀ီတကပၤနါက့ၦၤဟးစံၣ်ပလဲာ်သးမီၤနီၤ”အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ်အတီၢ်ပူၤခီဖျိသုးမီၤစိရိၤကဘီယူၤဟဲခးလီၤတၢ်ႇခးလီၤစ့ၢ်ကီးကျိဖးဒိၣ်တကးဒံးဘၣ်အမဲာ်ညါပယီၤသုးကျိၤနုာ်လီၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ တၢ်ဒုးကဲထီၣ်၀ဲတပယူာ်ဃီဒီးဟီၣ်က၀ီၤ(KNLA)သုးပာ်ဖှိၣ်အသိးသုးမီၤစိရိၤဘီယူၤစ့ၢ်ကီးဟဲဆှၣ်တၢ်ႇဟဲတ့ၢ်လီၤကျိဖးဒိၣ်လၢမုၢ်နၤခီဟဲအါထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ “ခဲအံၤလၢမုၢ်ဆါခီန့ၣ်ပဘၣ်ပျံၤလၢတၢ်ဒုးကကဲထီၣ်ဒီးပယီၤသုးမီၤနီၤႉလၢမုၢ်နၤခီန့ၣ်ပဘၣ်လဲၤမံဖှိၣ်လၢသီခါဖၠၣ်ႇတၢ်ဘါယွၤသရိာ်ႇရီဘၢၣ်ကျီးႇတူၢ်ရ့ၣ်ကျီးပူၤမီၤနီၤႉပယီၤသုးအိၣ်ခိးသမံသမိးတၢ်လၢကျဲပူၤအဃိတၢ်အီၣ်တၢ်အီနါက့တအိၣ်လၢၤဘၣ်” အဂ့ၢ်န့ၣ်ကမျၢၢ်လၢအဘၣ်ဟးစံၣ်ပလဲာ်သးတဂၤစ့ၢ်ကီးစံး၀ဲန့ၣ်လီၤႉ ဒ်န့ၣ်အသိးလၢကီးတရံး၀့ၢ်ကလံၤထံးဟီၣ်က၀ီၤဒီးမၠၣ်၀တံၣ်ကလံၤထံးဂီၤလ့ၤ–ကနဲလ့လီၢ်က၀ီၤႇကၠၤအ့စ့ၣ်ကၠံႇ ဃိၣ်သၢဖျၢၣ်လီၢ်က၀ီၤကပၤန့ၣ်ပယီၤသုးဒီး(KNLA)သုးပာ်ဖှိၣ်ႇကီၢ်သူလ့ၤသုးမုၢ်ဒိၣ်(KTLA)အဘၢၣ်စၢၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီန့ၣ်လီၤႉ ကတီၢ်ခဲအံၤလၢကီးတရံးႇကၠၤအ့စ့ၣ်ကၠံႇဃိၣ်သၢဖျၢၣ်လီၢ်က၀ီၤဒီတကျိၤန့ၣ်ကျဲတၢ်ဆဲးကျိးဟးဂီၤ၀ဲဒီး ခီဖျိပယီၤသုးဒီး(BGF)အံၤကးတံၢ်ဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီႇကသံၣ်ကသီႇတၢ်ဖိတၢ်လံၤတဖၣ်ဒီးအိၣ်ခိးသမံသမိးတၢ်ဟဲအါထီၣ်အဃိလီၢ်က၀ီၤၦၤဃ့ၢ်မှံဟးဖျိးတဖၣ်အံၤတၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီအဂ့ၢ်န့ၣ််လီၢ်က၀ီၤကမျၢၢ်စံး၀ဲန့ၣ်လီၤႉ

မၤဂ့ၤကတၢၢ်တုၤဖီတၢၣ် ၁.ဆူယၦၤကလု၁်ကညီ သ့ၣ်ညါလၢနမ့ၢ်ကညီ နၦၤကလု၁်ဘၣ်တၢ်ကီ လိၣ်ဘၣ်နစုတၢ်ဟ့ၣ်ခီ “ယၤ” ဒိၣ်စိနအိၣ်ဒၣ်တၢ် စၢၤသွဲၣ်လီၤတူ၁်ၦဲၤသံၦၢ် ၂.မ့ၢ်သံၣ်ထီၣ်စုဒီးကွၢ်စိ ကမျၢၢ်ဖိသၣ်ဝံၤလီၤဒိ သိၣ်ဒူဖိသယုၢ်သညိ မှံၤခိၣ်သိၣ်လ၁်လဲၤထီဘိ တၢ်တိ၁်ပ၁်အတၢ်မံမီၢ် အဲၣ်ကလု၁်ဒီးထံကီၢ်ဂီၢ် ၃.တၢ်သ ဘ့ဆျၢဒိးန့ၢ်က့ၤ သူၣ်ထီၣ်သကိးကီၢ်သူလ့ၤ ၦၤသိးအီၣ်မ့ၤပအီၣ်မ့ၤ ၦၤထံဂ့ၤၦၤထံဘၣ်ၦ့ၤ ...

လါဒံၣ်စ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်၀့ၢ်ပူၤ စးထီၣ်ဖဲအပူၤကွံာ်လါစဲးပထ့ဘၢၣ်န့ၣ် တၢ်အိးထီၣ်ဂဲၤလိာ်ကွဲ(အၤ၀ၤဒ့)တၢ်တၤကျိၣ်တၤစ့လီၢ်ဟဲအါထီၣ်၀ဲဖျိဖျိဖျါဖျါဒိၣ်န့ၢ်အပူၤကွံာ်လၢညါအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲန့ၣ်လီၤႉ လၢမၠၣ်၀တံၣ်၀့ၢ်ချၢ သူမှဲကျိကၢၢ်နံၤဒီတကျိၤန့ၣ် (ကၣ်စံၣ်နိၣ်)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်လၢ သုးခိးကီၢ်ဆၢ(BGF)ပၢ၀ဲအံၤအိၣ်၀ဲအါမးဒီးတကးဒံးဘၣ်လၢမၠၣ်၀တံၣ်(က၀ီၤဒ့ ၄)တီယၣ်သီခါဖၠၣ်လီၢ်ခံန့ၣ် အၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ႇတၢ်ခးညၣ်တၢ်လိာ်ကွဲလီၢ်ႇတၢ်ဒိဖဲအလီၢ်သ့ၣ်တဖၣ်အိၣ်၀ဲအါကတၢၢ်ဒီးဟဲအါထီၣ်ဒိၣ်န့ၢ်အပူၤကွံာ်လၢညါဒံးအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ “အၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်အံၤအိၣ်တုၤလၢ (က၀ီၤဒ့ ၇) ခဲအံၤအိၣ်ဒံးႉ စးထီၣ်ဖဲလါစဲးပထ့ဘၢၣ်န့ၣ် တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ဟဲအါထီၣ်ႉအအိၣ်အါဖဲလဲၣ်န့ၣ်အိၣ်အါလၢ (က၀ီၤဒ့ ၄) တီယၣ်သီခါဖၠၣ်လီၢ်ခံ တကပၤန့ၣ် အိၣ်အါလၢ(အၤကလိၤ)တၢ်လိာ်ကွဲႉ ဖဲန့ၣ်ၦၤလဲၤဂဲၤလိာ်ကွဲၦဲၤၦဲၤလီၤႉ မၠၣ်၀တံၣ်၀့ၢ်ပူၤအံၤတၢ်ဂဲၤလိာ်ကွဲ တၢ်တၤကျိၣ်တၤစ့အိၣ်ထီဘိလီၤႉ(အၤ၀ၤဒ့) တၢ်ဂဲၤလိာ်ကွဲအံၤတလီၤတူာ်နီတဘျီဘၣ်ႉလၢၦၤဆါကသံၣ်လီၢ်ကသီလီၢ်ႇညၣ်တၢ်တၤကျိၣ်တၤစ့လီၢ်နါက့အိၣ်ဒီဒူၣ်ညါ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါမၠၣ်၀တံၣ်၀့ၢ်ပူၤပယီၤသုးထုးထီၣ်တၢ်ကလုၢ်လၢမုၢ်နၤခီဟးထီၣ်တၢ်ချၢတန့ၢ်ဘၣ်အိၣ်၀ဲဘၣ်ဆၣ် မ့မ့ၢ်လၢ(အၤ၀ၤဒ့)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်န့ၣ်အိၣ်တုၤလၢမုၢ်၀ါတစုညါဒီးၦၤလဲၤဂဲၤလိာ်ကွဲမါမးအဂ့ၢ်န့ၣ်ကမျၢၢ်တဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးဒီး(BGF)ဟ့ၣ်အခွဲးပျဲမၤ၀ဲကၣ်စံၣ်နိၣ်တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ႇအၤ၀ၤဒ့တၢ်ဂဲၤလိာ်ကွဲတၢ်တၤကျိၣ်တၤစ့လီၢ်ဒ်အံၤမ့ၢ်တၢ်ဃၣ်ကဒါသူၣ်ဘီၣ်သးစၢ်အသးဒ်သိးသးစၢ်တဖၣ်သုတသးအိၣ်လၢထံရူၢ်ကီၢ်သဲဲးတကပၤတဂ့ၤအဂီၢ်လီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤပဲာ်ထံနီၤဖးစံး၀ဲဒ်အံၤန့ၣ်လီၤႉ “(BGF)မၤ၀ဲတၢ်ဂဲၤလိာ်ကွဲတၢ်တၤကျိၣ်တၤစ့အလီၢ်အံၤမၤ၀ဲဒ်သိးသူၣ်ဘီၣ်သးစၢ်တဖၣ်သုတသးအိၣ်လၢထံရူၢ်ကီၢ်သဲးတကပၤတဂ့ၤအဂီၢ်လီၤႉတလဲၤဘၣ်က့ၤဘၣ်ဘျ့ဘျ့ဆှီဆှီ၊တၢ်မုာ်တၢ်ပၠီၣ်တအိၣ်ဒ်သိးလၢညါခါလၢၤဘၣ်အဃိသူၣ်ဘီၣ်သးစၢ်ၦၤနီၣ်ဒိၣ်တဖၣ်လဲၤက့ၤ၀ဲလၢ(အၤ၀ၤဒ့)မီၤနီၤ”အဂ့ၢ်န့ၣ်အ၀ဲစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ်ႇဖၣ်အၣ်၀့ၢ်ႇယွၤသ့ၣ်သ၀ီႇထိအဲၤသ၀ီတဖၣ်အပူၤစ့ၢ်ကီး တၢ်အိးထီၣ်မၤ၀ဲ(အၤ၀ၤဒ့)တၢ်ဂဲၤလိာ်ကွဲတၢ်တၤကျိၣ်တၤစ့လီၢ်အိၣ်၀ဲခဲအံၤခဲအံၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

လါဒံၣ်စ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ် သ့ဘီဘိသ၀ီအပူၤန့ၣ် သုးမီၤစိရိၤအတၢ်ကစီၣ်သန့ထုးထီၣ်ဘိးဘၣ်ရၤလီၤ တၢ်ဂီၤမူလၢအ၀ဲသ့ၣ်က့ၤဆှၢကမျၢၢ်ၦၤဃ့ၢ်မှံဟးဖျိးတဖၣ်လၢဟံၣ်အံၤတမ့ၢ်၀ဲဘၣ်အဂ့ၢ်န့ၣ်သ့ၣ်ဘီဘိၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ပယီၤသုးထုးထီၣ်ဘိးဘၣ်ရၤလီၤတၢ်ဂီၤမူအပူၤန့ၣ်လီၢ်က၀ီၤသ၀ီသးၦၢ်ဟးကိးကမျၢၢ်ၦၤဃ့ၢ်မှံဟးဖျိးလၢကက့ၤဆူဟံၣ်က့ၤဆှၢတုၤ၀ဲလၢအဟံၣ်ဒီးလီၢ်က၀ီၤကမျၢၢ်လၢအပၣ်ဃုာ်လၢတၢ်ဂီၤမူပူၤတဖၣ်အံၤတမ့ၢ်၀ဲသ့ၣ်ဘီဘိလီၢ်က၀ီၤဖိဘၣ်မ့မ့ၢ်တခီမ့ၢ်၀ဲယသ့ၣ်ကူၤလီၢ်က၀ီၤဖိလၢအကိးမၢဂဲၤဒိ၀ဲတစိၢ်တလီၢ်လီၤအဂ့ၢ်န့ၣ် သ့ၣ်ဘီဘိၦၤဃ့ၢ်မှံဟးဖျိးလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟါၦၤက့ၤတဖၣ်န့ၣ်မ့ၢ်၀ဲဒၣ်ၦၤ(ယသ့ၣ်ကူၤ)ဖိခဲလၢာ်လီၤႉတမ့ၢ်သ့ၣ်ဘီဘိကမျၢၢ်တဖၣ်ဘၣ်ႉၦၤဟဲစံၣ်အိၣ်ဖဲအံၤအိၣ်ဒီး(ယသ့ၣ်ကူၤ)လီၢ်က၀ီၤဖိတဒူၣ်မီၤနီၤႉအက့ၤဘျီန့ၣ်ပယီၤသုးဒိနီၣ်ဃာ်၀ဲတၢ်ဂီၤတၢ်ဖှီၣ်အဲၣ်ဒိးမၤအိၣ်အမဲာ်ဒ်န့ၣ်မီၤနီၤႉအနီၢ်ကီၢ်ကီၢ်ခီန့ၣ်သ့ၣ်ဘီဘိလီၢ်က၀ီၤဖိတက့ၤဒံးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါနိၣ်၀့ဘၢၣ် ၃၀ သီအနံၤန့ၣ်လီၤႉ ပယီၤသုးပာ်ဖျါထီၣ်တၢ်ဂီၤမူလၢသ့ၣ်ဘီဘိလီၢ်က၀ီၤဖိက့ၤဆူအဟံၣ်လံဘၣ်ဆၣ်ၦၤက့ၤအကျါပၣ်ဃုာ်၀ဲသ့ၣ်ဘီဘိကမျၢၢ်ဘၣ်ဆၣ်အါဒၣ်တက့ၢ်န့ၣ်အ၀ဲသ့ၣ်က့ၤပာ်ဖှိၣ်က့ၤအမုၢ်တၢ်ဘိလၢအသူၣ်လီၤတ့ၢ်ဃာ်၀ဲတဖၣ်လီၤဒီးလၢဟါခီန့ၣ်အ၀ဲသ့ၣ်ဟဲက့ၤမံလၢၦၤလီၢ်အိၣ်ကဒုလီၢ်လီၤအဂ့ၢ်န့ၣ်ၦၤဃ့ၢ်မှံဟးဖျိးတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲလါနိၣ်၀့ဘၢၣ် ၂၉ သီအနံၤစ့ၢ်ကီး ဖလူႇကၠီးခဲးႇသ့ၣ်ဘီဘိႇ ဂီၤလ့ၤလီၢ်က၀ီၤကမျၢၢ်ဒီးမၠၣ်၀တံၣ်–ဂီၤလ့ၤကျဲ လီၢ်က၀ီၤကမျၢၢ်တဖၣ်က့ၤလၢအ၀ဲသ့ၣ်ဟံၣ်လံအဂ့ၢ်န့ၣ် သုးမီၤစိရိၤထုးထီၣ်ပာ်ဖျါ၀ဲတၢ်ကစီၣ်ဒံးန့ၣ်လီၤႉ “ပ၀ဲဒၣ်နါက့ပအဲၣ်ဒိးက့ၤစ့ၢ်ကီးလီၤႉဘၣ်ဆၣ်လ့ၤတက့ၤပတနာ်အီၣ်အ၀ဲသ့ၣ်ဘၣ်အဃိပတက့ၤဘၣ်ႉအ၀ဲသ့ၣ်တဲနါက့တမံၤဂ့ၤတမံၤဂ့ၤႇတဲ၀ဲလၢကဟံးန့ၢ်၀ဲတၢ်ဘံၣ်တၢ်ဘၢနါက့မတၤတဂၤမးတနာ်အီၣ်အ၀ဲသ့ၣ်ဘၣ်ႉတၢ်အိၣ်သးမ့ဂ့ၤထီၣ်နီၢ်ကီၢ်ဒုတလိၣ်လၢအ၀ဲသ့ၣ်ကီးဘၣ်ပကက့ၤလၢပကစၢ်ဒၣ်၀ဲလီၤမီၤနီၤ”အဂ့ၢ်န့ၣ်ၦၤဃ့ၢ်မှံဟးဖျိးတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်သိးလီၢ်က၀ီၤကမျၢၢ်ၦၤဃ့ၢ်မှံဟးဖျိးတဖၣ်ကက့ၤအိၣ်လၢသ၀ီပူၤအဂီၢ်န့ၣ်လီၢ်က၀ီၤသ၀ီၦၤဘၣ်မူဘၣ်ဒါဒီးဟီၣ်က၀ီၤ(DKBA)တဖၣ်ထိၣ်ဃူထိၣ်ဖိးန့ၢ်၀ဲလၢတၢ်ဘၢၣ်စၢၤဒီးၦၤက့ၤအကျါပၣ်ဃုာ်သ့ၣ်ဘီဘိကမျၢၢ်တနီၤဘၣ်ဆၣ်ကိးဂဲၤဒိလီၢ်က၀ီၤကမျၢၢ်လၢအဂၤမၤအိၣ်အမဲာ်လီၤအဂ့ၢ်န့ၣ် DKBA ၦၤဘၣ်မူဘၣ်ဒါလၢတအဲၣ်ဒိးပာ်ဖျါ အမံၤတဂၤ စံး၀ဲန့ၣ်လီၤႉ အ၀ဲစံး၀ဲလၢ“အမၤအိၣ်မဲာ်န့ၣ်ပမ့ၢ်ကွၢ်ဒုအမ့ၢ်လီၤႉဘၣ်ဆၣ်ဒွး၀ဲလၢကမျၢၢ်ကဟဲက့ၤအိၣ်ႇအ၀ဲသ့ၣ်နါက့အဲၣ်ဒိးက့ၤလံစ့ၢ်မီၤႉတၢ်အ၀ဲသ့ၣ်နါက့တမ့ၢ်ဟီၣ်က၀ီၤသုးဘၣ်ႉအဟဲထီၣ်မၤစၢၤတၢ်လီၤအဃိအ၀ဲသ့ၣ်ဘၣ်က့ၤမီၤႉအဒိသ၀ီဖိမ့ဟဲက့ၤအိၣ်ဘျီဒီးအ၀ဲသ့ၣ်နါက့ကဘၣ်က့ၤလီၤမီၤႉအဲၣ်ဒိးက့ၤ၀ဲဆိအဃိန့ၣ်အ၀ဲသ့ၣ်မၤ၀ဲဒ်န့ၣ်လီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ လၢန့ၣ်အမဲာ်ညါဒ်ပယီၤသုးထုးထီၣ်ပာ်ဖျါတၢ်ကစီၣ်တၢ်ဂီၤမူပူၤအသိးန့ၣ်ၦၤဟဲက့ၤတဖၣ်အကျါပၣ်ဃုာ်သ့ၣ်ဘီဘိလီၢ်က၀ီၤကမျၢၢ်တနီၤဘၣ်ဆၣ်ကိးမၢလီၢ်က၀ီၤဖိလၢအဂၤဟဲက့ၤဂဲၤဒိကဒါ၀ဲလီၤဒီးပယီၤသုးအံၤမ့ပာ်လီၢ်က၀ီၤကမျၢၢ်တဖၣ်ဒ်ဒုၣ်ဒါအသိးန့ၣ်(DKBA)စ့ၢ်ကီးတမ့ၢ်လၢကတူၢ်လိာ်၀ဲဘၣ်ဒီးနၢ်ပၢၢ်၀ဲကမျၢၢ်လၢအဟဲက့ၤတဘူၣ်ဒံးဘၣ်သ့ၣ်တဖၣ်အတၢ်ကိၢ်တၢ်ဂီၤအဂ့ၢ်န့ၣ်(DKBA)ၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တကးဒံးဘၣ်တၢ်သဘံၣ်သဘုၣ်လၢအကဲထီၣ်ခဲအံၤတဖၣ်န့ၣ်တမ့ၢ်အထီၣ်ဒုး၀ဲ(ခ့ၣ်အဲၣ်ယူၣ်)အၦၤတဖၣ်ဘၣ်ဒီး မ့မ့ၢ်တခီထီၣ်ဒုး၀ဲထဲလၢတၢ်ဒီသဒၢကမျၢၢ်သုး(PDF)အံၤလီၤဒီးတကးဒံးဘၣ်ပယီၤသုးဟ့ၣ်ပလီၢ်စ့ၢ်ကီးကမျၢၢ်တဖၣ်လၢတဘၣ်ပာ်ဖှိၣ်မၤသကိးတၢ်ဒီး(PDF)ဘၣ်ဒီးတၢ်မ့ဆီၣ်ထွဲမၤစၢၤအ၀ဲသ့ၣ်န့ၣ်ကဟးလူၤမၤဆှဲလဲ၀ဲအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ဒ်န့ၣ်အသိးလ့က့ၣ်ကိာ်က၀ီၤဒ့(၅)ဘ့ၣ်ဃုာ်ဒီးပဟံၣ်ကျီးႇထံမဲး၀ါခံႇယသ့ၣ်ကူၤလီၢ်က၀ီၤဖိလၢအလဲၤစံၣ်အိၣ်သူမှဲကျိကၢၢ်နံၤဒီတကျိၤအံၤတဖၣ်န့ၣ်လ့က့ၣ်ကိာ်(စွဲၤတီၤ)ကျိဖးဒိၣ်လူၢ်သုးတြိၤ(၄၄)သုးတြိၤခိၣ်စ့ၢ်ကီးဟဲကရၢကရိတဲဘၣ်လီၢ်က၀ီၤကမျၢၢ်ၦၤဃ့ၢ်တၢ်ဒုးသ့ၣ်တဖၣ်အံၤလၢကက့ၤအိၣ်လၢနီၢ်ကစီၢ်ဒူသ၀ီပူၤအိၣ်၀ဲစ့ၢ်ကီးအဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

လါနိၣ်၀့ဘၢၣ် ၃၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤန့ၣ် ဖဲလါနိၣ်၀့ဘၢၣ် ၂၈ သီအနံၤ ပယီၤသုးလၢအိၣ်ဆီလီၤသးဖဲလ့က့ၣ်သ၀ီပူၤတဖၣ်အံၤခးလီၤကျိဖးဒိၣ်အဃိ ဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲမဟါအနံၤဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နုာ်လီၤခးပယီၤသုးဒီးသုးခိးကီၢ်ဆၢ(BGF)လၢအိၣ်လ့က့ၣ်သ၀ီပူၤတဖၣ်ကဲထီၣ်သး၀ံၤအလီၢ်ခံပယီၤသုးခးလီၤကဒါကျိဖးဒိၣ်ဆူသ၀ီပူၤတကးဒံးဘၣ်ပယီၤသုးကျိဖးဒိၣ်လူၢ်လၢကမၤမိၢ်အံၤစ့ၢ်ကီးခးလီၤစၢၤ၀ဲကျိဖးဒိၣ်တုၤလၢမုၢ်နၤတၢ်ခံးညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ်သနါက့ မ့မ့ၢ်လ့က့ၣ်သ၀ီ စီၤကၠီၦၢ်အဟံၣ်ဒီးသရၣ်မုၣ်နူၣ်နူၣ်၀့ၤအဟံၣ်အံၤဟးဂီၤကွံာ်၀ဲအဂ့ၢ်န့ၣ်ခ့ၣ်အဲၣ်ယူၣ်(ဒူသထူၣ်ကီၢ်ရ့ၣ်)နဲၣ်ရွဲၣ် ပဒိၣ်စီၤအ့နဲၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“ဖဲမဟါမုၢ်ဆါခါန့ၣ်ပယီၤသုးလၢကမၤမိၢ်တကပၤန့ၣ်ခးလီၤစိ၀ဲကျိဖးဒိၣ်(၅)ဖျၢၣ်ႇလီၤတဲာ်လၢလ့က့ၣ်သ၀ီချၢမီၤနီၤႉမ့၀ံၤပယီၤသုးလၢအိၣ်လ့့ၣ်သုးကလၢၤတဖၣ်နါက့လၢမုၢ်နၤခီန့ၣ်ခးလီၤကျိဖးဒိၣ်လၢသ၀ီပူၤဒံးႉဘၣ်ဟးဂီၤ၀ဲၦၤဟံၣ်(၂)ဖျၢၣ်ႉအ၀ဲတဖျၢၣ်န့ၣ်မ့ၣ်အူအီၣ်၀ဲဒီးၦၤအိၣ်လၢသ၀ီပူၤတဖၣ်လဲၤမၤလီၤပံး၀ဲအဃိအူအီၣ်တစဲးလီၤႉလ့က့ၣ်သ၀ီပူၤအံၤၦၤအိၣ်တ့ၢ်က့ၤသၢပူတပူလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးခးလီၤကျိဖးဒိၣ်လၢသ၀ီပူၤတလီၢ်လီၢ်တကးဒံးဘၣ်လီၢ်က၀ီၤကမျၢၢ်စ့ၢ်ကီးဘၣ်ယိၣ်လၢကဘီယူၤကဟဲခးလီၤတၢ်အဃိသ၀ီဖိတဖၣ်လဲၤစံၣ်အိၣ်စိဃာ်လၢအဘူးအတံၢ်သ၀ီအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢကစၢၢ်ခီၣ်ထံးလ့ပူၤလၢၢ်ပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ကမျၢၢ်တဖၣ်စံၣ်စံၣ်က့ၤက့ၤလီၤႉၦၤက့ၤအိၣ်လၢသ၀ီပူၤလီၤတံၢ်တဘူၣ်ဘၣ်ႉခဲအံၤနါက့ၦၤလဲၤအိၣ်လၢလ့ပူၤညါလဲၤအိၣ်လီၤႉဖဲမဟါန့ၣ်ခးလီၤကဒီးကျိဖးဒိၣ်ႉပယီၤသုးကလၢၤအိၣ်လၢသ၀ီပူၤအဃိတအိၣ်ဘၣ်မုာ်မုာ်ခုၣ်ခုၣ်ဘၣ်ႉခဲအံၤနါက့တၢ်ကီတၢ်ခဲအိၣ်လၢကအီၣ်ကအီမီၤနီၤ”အဂ့ၢ်န့ၣ်လီၢ်က၀ီၤပိာ်မုာ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လ့က့ၣ်သုးကလၢၤအံၤပယီၤသုးဒီး(BGF)သုးပာ်ဖှိၣ်အနီၣ်ဂံၢ်ခဲလၢာ်ကအိၣ်၀ဲအဂၤ(၇၀)ဃၣ်ဃၣ်ညါဒီး ဒ်န့ၣ်အသိးလၢအ၀ဲသ့ၣ်ကမၤဂ့ၤထီၣ်က့ၤအသုးကလၢၤအဂီၢ်န့ၣ်မၢဆူၣ်၀ဲကမျၢၢ်အိၣ်၀ဲအမဲာ်ညါခးတပျုာ်တပျီာ်ကျိတလီၢ်လီၢ်အဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဖဲအပူၤကွံာ်လါမ့ၤ ၁ သီအနံၤစ့ၢ်ကီး ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်သ၀ီပူၤ(၂)ဘျီအဃိ မ့ၣ်အူအီၣ်ဟးဂီၤ၀ဲဟံၣ်အဖျၢၣ်(၁၀)ဘျဲၣ်ဒီးသ၀ီဖိလၢအဃ့ၢ်ထီၣ်တဖၣ်စ့ၢ်ကီးပယီၤသုးနုာ်လီၤမၤဟးဂီၤအဟံၣ်အဃီအဂ့ၢ်န့ၣ်သ့ၣ်ညါဘၣ်န့ၣ်လီၤႉ