ခ့ၣ်အဲးစံၣ် – KIC News

လါစဲးပထ့ဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်ကလံၤထံး ဖဲမဟါန့ၣ်တၢ်နုာ်လီၤခး၀ဲကျ့းပယီၤသုးကလၢၤဒီး ကျိချံၦာ်သၣ်လၢတၢ်မၤန့ၢ်အီၤလၢသုးကလၢၤပူၤတဖၣ်အံၤန့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤလါစဲးပထ့ဘၢၣ် ၂၁ သီအနံၤန့ၣ်လီၤႉ ဖဲမဟါလါစဲးပထ့ဘၢၣ် ၂၀ သီ မုၢ်ဃ့ၢ်လီၤအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၈ ဒီး တီနီၢ်သုးကျိၤ(SOG)သုးပာ်ဖှိၣ်တဖၣ်နုာ်လီၤခးမၤန့ၢ်ကွံာ်၀ဲပယီၤသုးခီၣ််ချ့သုးရ့ၣ်(ခမရ–၅၅၇)သုးကလၢၤလၢ အအိၣ်ဖဲကျ့းသ၀ီပူၤအံၤလံန့ၣ်လီၤႉ တၢ်ထီၣ်မၤန့ၢ်သုးကလၢၤဘျီ၀ဲအံၤအပူၤန့ၣ်တၢ်မၤန့ၢ်၀ဲ RPG‚ BA 100 ကျိဖးဒိၣ်အပျီႇစဲးလးႇ AK‚ MAS sniper‚ MA4.MAK‚MA1‚MA3‚MA5ဒီး MG3 ကျိတဖၣ်ဃုာ်ဒီး MA အဒၢႇ 9MM‚ 16 အဒၢႇ sniper အဒၢႇ 60 MM‚...

လါစဲးပထ့ဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတလါညါအံၤအတီၢ်ပူၤလၢကညီကီၢ်စဲၣ် မ့ၢ်မၠၣ်၀တံၣ်၀့ၢ်ပူၤန့ၣ် ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်မၤအါထီၣ်အသုးဂံၢ်ဘါဟးဆှၣ်သမံသမိးတၢ်ဒီး အ၀ဲသ့ၣ်အိၣ်ဆီလီၤသးလၢအံၤတတီၤလၢန့ၣ်တတီၤလၢက၀ီၤဒ့ကျဲနုာ်လီၤဟးထီၣ်အလီၢ်တဖၣ်အဂ့ၢ်န့ၣ် မၠၣ်၀တံၣ်၀့ၢ်ဖိတဖၣ်စံး၀ဲန့ၣ်လီၤႉ မၠၣ်၀တံၣ်၀့ၢ်ဖိတဂၤစံး၀ဲ“လၢမၠၣ်၀တံၣ်န့ၣ်အီၤမၠ့ၤစွ့ၤဘိၤႇမၠ့ၤနံၤကိႇမၠၣ်စၤနံၤကိႇကၠီၣ်လိကၠံႇပနံာ်တၢ်ကၤလီၢ်ႇဖါခၠီႇယွၤသ့ၣ်ႇတိတတါႇမဲၢ်ကနဲႇညံၣ်နီၣ်ကွဲၣ်သ့ၣ်လၢၦၤနုာ်လီၤဟးထီၣ်သ့လၢၦၢ်ပူၤတၢ်လီၢ်တဖၣ်န့ၣ်ပယီၤသုးႇ(BGF)အိၣ်ဆီလီၤသးလၢအံၤတတီၤလၢန့ၣ်တတီၤမီၤနီၤႉစးထီၣ်လၢလါထီၣ်န့ၣ်ပယီၤသုးဒီး(BGF)သုးပာ်ဖှိၣ်မၤအါထီၣ်အသုးဂံၢ်ဘါ(၂၀၀)ဃၣ်ဃၣ်ဒီးဟးဆှၣ်တၢ်လၢ၀့ၢ်ပူၤ၀့ၢ်ချၢမီၤနီၤ”အဂ့ၢ်န့ၣ်စံး၀ဲန့ၣ်လီၤႉ လၢမၠၣ်၀တံၣ်ကီၢ်ဆၣ်အပူၤခီဖျိပယီၤသုးဒီးဖီၣ်စုက၀ဲၤသုးပာ်ဖှိၣ်ကရူၢ်တဖၣ်အဘၢၣ်စၢၤတၢ်ဒုးကဲထီၣ်တလီၢ်လီၢ်အဃိဘၣ်ဟးထီၣ်က့ၤလီၤလၢတၢ်ပလီၢ်ပဒီအပူၤအဂ့ၢ်န့ၣ် မၠၣ်၀တံၣ်၀့ၢ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးလၢကညီကီၢ်စဲၣ် မၠၣ်၀တံၣ်ႇကီးတရံးႇကၠၤအ့စ့ၣ်ကၠံႇသၣ်တီၣ်ႇဖၣ်ပူၣ်၀့ၢ် အခိၣ်အဃၢၤလီၢ်က၀ီၤဒူသ၀ီတကပၤန့ၣ်စ့ၢ်ကီး ပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢတၢ်န့ၣ်အဃိသုးမီၤစိရိၤအစုတီၤဖီလာ်ၦၤမၤတၢ်ဖိလၢအိၣ်၀့ၢ်ပူၤတဖၣ်အံၤအ၀ဲသ့ၣ်ဘၣ်လဲၤထီၣ်ရူလၢအကလဲးႇဘၣ်ဆှၢတၢ်ကစီၣ်ႇဘၣ်အိၣ်ခိး(ကၠူၤတံၤ)ဒ်န့ၣ်လီၤအဂ့ၢ်န့ၣ်ၦၤဟ့ၣ်တၢ်ကစီၣ်ဖိလၢအဘူးဒီး(Non CDM) ၦၤမၤတၢ်ဖိအံၤစံး၀ဲန့ၣ်လီၤႉ “ၦၤမၤတၢ်ဖိလၢအက့ၤထီၣ်ကဒါရူတဖၣ်န့ၣ်ဘၣ်အိၣ်ခိး(ကၠူၤတံၤ)လၢအကလဲးႇဘၣ်ဆှၢလီပျံၤႇဘၣ်ရၤလီၤလံာ်ဒ်န့ၣ်လီၤႉမ့မ့ၢ်လၢမုာ်ခုၣ်ၦဲၤအါ(စည်ပင်)ႇ(ေထွအုပ်)ႇခိသွဲႇ(လ၀က)ရူခီန့ၣ်အအိးထီၣ်မီၤနီၤႉလၢမၠၣ်၀တံၣ်–ကြုၢ်တုကျဲန့ၣ်မ့ၢ်တၢ်ခးလိာ်သးကကဲထီၣ်ဆံးယံာ်လဲၣ်ႇမ့ၢ်တၢ်ကခးလီၤကျိဖးဒိၣ်ဆံးယံာ်လဲၣ်တသ့ၣ်ညါဘၣ်ႉမ့ဘၣ်သူၣ်ကိၢ်သးဂီၤလၢတၢ်ဘံၣ်တၢ်ဘၢဂီၢ်မီၤနီၤႉဟးထီၣ်က့ၤလီၤန့ၢ်က့ၤထဲလၢကီၢ်စဲၣ်ဖၣ်အၣ်၀့ၢ်ဒီးလူၢ်ပျဲၢ်–မၠဲၣ်ကၠဲငူၣ် ကျဲလီၤ”အဂ့ၢ်န့ၣ်ၦၤဟ့ၣ်တၢ်ကစီၣ်ဖိလၢအဘူးဒီးသုးမီၤစိရိၤ၀ဲၤကျိၤဘၣ်ထွဲအံၤစံး၀ဲန့ၣ်လီၤႉ ဒ်သိးတၢ်ဒုးသုတကဲထီၣ်လၢမၠၣ်၀တံၣ်၀့ၢ်ပူၤတဂ့ၤအဂီၢ်န့ၣ်ပယီၤသုးဒီး(BGF)တဖၣ်မၤအါထီၣ်အသုးဂံၢ်ဘါဟးဆှၣ်သမံသမိးတၢ်အိၣ်၀ဲဘၣ်ဆၣ်လၢက၀ီၤဒ့တဖၣ်အပူၤန့ၣ်တၢ်ဟုၣ်တၢ်ဘျၣ်ႇတၢ်ကမျာ်တၢ်ကဲထီၣ်သးအိၣ်၀ဲကိးမုၢ်နံၤဒဲးအဂ့ၢ်န့ၣ်ကမျၢၢ်လၢၦၤအိၣ်၀့ၢ်ပူၤတဖၣ်စံး၀ဲန့ၣ်လီၤႉ

လါစဲးပထ့ဘၢၣ် ၂၀ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုး(၂)ဂၤလၢအဟဲက့ၤပာ်လီၤစုက၀ဲၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤသုးမုၢ်ဒိၣ်(သုးက့ ၅)အအိၣ်အံၤဘၣ်တၢ်ဟ့ၣ်လၤကပီၤအ၀ဲသ့ၣ်လၢစ့အဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ ဖဲအပူၤကွံာ်လါအီကူး ၂၁ သီအနံၤန့ၣ် ဒုးယၤပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ–၈) ခီၣ်ချ့သုးရ့ၣ်(ခမရ–၄၀၁)လၢအအိၣ်ဆီလီၤသးဖဲဖၣ်ပူၣ်ကီၢ်ရ့ၣ်အံၤအသုးဖိမီၤသၤလၣ်(၂၄)နံၣ်ဒီးယဲသံၤဟၣ်(၂၁)နံၣ်ခံဂၤအံၤ စံၣ်ဖျိးထီၣ်ဒီးဟဲက့ၤဟ့ၣ်လီၤအသးဆူခ့ၣ်အဲၣ်ယူၣ်(သုးက့ ၅)အအိၣ်ဃုာ်ဒီး(3A-4)ကျိစုဘျၢတခိၣ်ႇ ကျိချံ(၁၆)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ သုးဖိမီၤသၤလၣ်လၢအဟဲက့ၤစိာ်ဃုာ်ဒီးကျိအံၤဘၣ်တၢ်ဟ့ၣ်လၤကပီၤအီၤလၢစ့(၁၅)ကလီၢ်ကၠးဒီး မ့မ့ၢ်သုးဖိယဲသံၤဟၣ်ထိလၢအတဟဲက့ၤစိာ်တၢ်စုက၀ဲၤနီတမံၤဘၣ်တဂၤအံၤတၢ်ဟ့ၣ်လီၤအီၤစ့(၅)ကလီၢ်ကၠးအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ စးထီၣ်လၢ(၂၀၂၁)နံၣ် လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ် သုးမီၤစိရိၤအၦၤဟဲက့ၤဟ့ၣ်လီၤသးဆူခ့ၣ်အဲၣ်ယူၣ်(သုးက့ ၅)အအိၣ်ဟဲအါထီၣ်၀ဲအသိး (၂၀၂၁)ထီၣ်သီတုၤလၢတနံၣ်အံၤလါယနူၤအါရံၤ ၂၆ သီန့ၣ် ပယီၤသုးဟဲက့ၤဟ့ၣ်လီၤသးအိၣ်၀ဲခဲလၢာ် အဂၤ(၈၀)ဘျဲၣ်လံအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၂၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ််စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်အပူၤန့ၣ် ဖဲလါစဲးပထ့ဘၢၣ် ၁၇ သီအနံၤ ခီဖျိပယီၤသုးခးလီၤကျိဖးဒိၣ်အဃိ ဘၣ်၀ဲဒၣ်ကမျၢၢ်ၦၤလီၢ်အိၣ်ကမှံပိာ်မုၣ်တဂၤလၢ အက့ၤဟံးအီၣ်တၢ်လၢသ၀ီပူၤအံၤဒီးသံကွံာ်၀ဲဒၣ်န့ၣ်လီၤႉ ကမျၢၢ်ၦၤလီၢ်အိၣ်ကမှံဖိနီၢ်သူလ့ၤဖီလၢအသးနံၣ်အိၣ်၀ဲ(၄၆)နံၣ်အံၤအိၣ်၀ဲဒၣ်လၢ(တီၤစူၣ်)သ၀ီဒီး ခီဖျိပယီၤသုးနီဟးထီၣ်၀ဲအဃိအ၀ဲသုးအလီၢ်လဲၤအိၣ်၀ဲဒၣ်လၢသ၀ီချၢ၀ံၤအလီၢ်ခံဖဲအဟဲက့ၤဟံတၢ်အီၣ်အဆၢကတီၢ်ဘၣ်၀ဲဒီးကျိဖးဒိၣ်သံ၀ဲလီၤအဂ့ၢ်န့ၣ်လီၢ်က၀ီၤကညီၦၤဂ့ၢ်၀ီကရူၢ်အၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲက့ၤဟံအီၣ်ဘုသးလၢသ၀ီပူၤမီၤနီၤႉကျိဖးဒိၣ်လီၤတဲာ်လၢသ၀ီချၢအဃိဘၣ်ဖဲအကဟဲက့ၤဟးထီၣ်လၢသ၀ီချၢအခါန့ၣ်အဘၣ်၀ဲဒီးကျိဖးဒိၣ်မီၤနီၤႉလၢညါတဘျီန့ၣ်ခီဖျိပယီၤသုးနီဟးထီၣ်ကွံာ်သ၀ီဖိတဖၣ်အဃိအ၀ဲသ့ၣ်လဲၤအိၣ်၀ဲဒၣ်လၢတၢ်ချၢလၢအဘူးဒီးသ၀ီမီၤနီၤႉဒ်ပထံၣ်ဘၣ်လၢတၢ်ဂီၤပူၤအသိးလီၤအခီၣ်ကပၤန့ၣ်အိၣ်ဒီးဟုသးထၢၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲပယီၤသုးခးလီၤကျိဖးဒိၣ်အခါန့ၣ်တၢ်ခးလိာ်သးကဲထီၣ်တအိၣ်၀ဲဘၣ်အသိးပယီၤသုး(ခမရ-၃၅၁)သုးရ့ၣ်လၢအိၣ်(နၣ်သၤကွ့)တိၤအံၤခးလီၤနါစိၤ၀ဲကျိဖးဒိၣ်ဆူ(တီၤစူၣ်)သ၀ီပူၤလၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁၁ သီအခါန့ၣ် ပယီၤသုးလၢအနုာ်လီၤအိၣ်ဆီလီၤသးဖဲလီၢ်က၀ီၤပူၤတဖၣ်အံၤ ကိးဖှိၣ်၀ဲမူကီၢ်ဆၣ်ပူၤ(တမၤခီ)ဒီး(တီၤစူၣ်)သ၀ီၦၤဘၣ်မူဘၣ်ဒါတဖၣ်ဒီးမၢ၀ဲလီၢ်က၀ီၤကမျၢၢ်တဖၣ်ဟးထီၣ်ကွံာ်လၢသ၀ီပူၤဒီးတဲပျံၤ၀ဲလၢမ့တဟးထီၣ်ဘၣ်န့ၣ်ကဒွဲၣ်အူအီၣ်၀ဲသ၀ီႇကခးသံကမျၢၢ်အဃိလီၢ်က၀ီၤဖိတဖၣ်ဘၣ်ဟးထီၣ်ကွံာ်လၢသ၀ီပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢမူကီၢ်ဆၣ်အပူၤန့ၣ်သ၀ီအဖျၢၣ်(၄၀)ဘျဲၣ်ဘၣ်ဃ့ၢ်ထီၣ်၀ဲသ၀ီကိးဖျၢၣ်ဒဲးညါဒီးတနီၤန့ၣ်ဖဲပယီၤသုးတၢ်ဟူးတၢ်ဂဲၤတအိၣ်ဘၣ်အခါအ၀ဲသ့ၣ်က့ၤဟံအီၣ်တၢ်အီၣ်တၢ်အီလၢသ၀ီပူၤအဃိအ၀ဲသ့ၣ်တိနိၣ်ဒီးပယီၤသုးတၢ်ဖီၣ်အ၀ဲသ့ၣ်အိၣ်စ့ၢ်ကီးန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁၂ သီအနံၤစ့ၢ်ကီး ကမျၢၢ်ၦၤဃ့ၢ်မှံဟးဖျိးပိာ်မုၣ်လၢအက့ၤဟံအီၣ် တၢ်အီၣ်တၢ်အီလၢသ၀ီပူၤတဂၤဘၣ်၀ဲဒီးပယီၤသုးကျိဖးဒိၣ်သံ၀ဲဒၣ်စ့ၢ်ကီးအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါစဲးပထ့ဘၢၣ် ၁၄ သီအနံၤန့ၣ် ဘၣ်ဃးကညီတၢ်မုာ်တၢ်ခုၣ်ကီၣ်ကး(KNU/KNLA-PC)ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ခိၣ်နၢ်တဖၣ်လဲၤတုၤ၀ဲဒၣ်လၢန့ၢ်ပၠံၣ်တီၣ်လၢကထံၣ်လိာ်သးဒီးသုးမီၤစိရိၤအခိၣ်မ့အီၣ်လဲၣ်ခံဘျီတဘျီအဖီခိၣ်အံၤတၢ်ပဲာ်ထံနီၤဖးဟဲအိၣ်ထီၣ်၀ဲလၢကညီတ၀ၢအပူၤအကလုာ်ကလုာ်န့ၣ်လီၤႉ ကညီဖိလၢအတုၤအိၣ်(ကိရံယါ)ထံကီၢ်တဂၤစံး၀ဲ“ကဘၣ်လဲၤတၢၣ်ပီၣ်တဲသကိးတၢ်ဒီးၦၤလၢအမၤဟးဂီၤထံကီၢ်ဒီတဘ့ၣ်အံၤအလီၢ်တအိၣ်ဘၣ်ႉယဆိမိၣ်အ၀ဲသ့ၣ်အဲၣ်ဒိးတၢ်ခွဲးတၢ်ယာ်အဃိကလဲၤမၤဘူးအသးလီၤႉအ၀ဲသ့ၣ်မၤ၀ဲဒ်အံၤဒ်ပမ့ၢ်ကညီကလုာ်တဂၤအသိးမဲာ်ဆှးဒိၣ်မးလီၤႉမ့ဟံ၀ဲတၢ်ခွဲးတၢ်ယာ်ဒ်(BGF)အသိးဒုမုၢ်တနံၤန့ၣ်ကဘၣ်တၢ်စံၣ်ညီၣ်သိၣ်ဃီၣ်အီၤလၢကမျၢၢ်ထံဖိကီၢ်ဖိလီၤႉ(မအလ)အံၤထံၣ်ဘၣ်တၢ်ဃံးတၢ်စ့ၤဖးဒိၣ်လံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ သုးမီၤစိရိၤအခိၣ်မ့အီၣ်လဲၣ်စံး၀ဲလၢထံကီၢ်ဒီတဘ့ၣ်ကဒိးန့ၢ်ဘၣ်လီၤစိၤတၢ်မုာ်တၢ်ခုၣ်အဂီၢ်ဒီး ဖီၣ်စုက၀ဲၤတၢ်သဘံၣ်သဘုၣ်ကကတၢၢ်ကွံာ်အဂီၢ်န့ၣ်အ၀ဲအနီၢ်ကစၢ်ဒၣ်၀ဲကထံၣ်လိာ်တၢၣ်ပီၣ်တဲသကိးတၢ်ဒီး ကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်အဂ့ၢ်န့ၣ် စံးကတိၤလီၤကွဲမုာ်၀ဲဒၣ်ဖဲအပူၤကွံာ်လါမ့ၤအခါန့ၣ်လီၤႉ “ဆၢကတီၢ်ခဲအံၤပမ့တလဲၤထံၣ်လိာ်သးဒီးအ၀ဲသ့ၣ်န့ၣ်အဂ့ၤကတၢၢ်လီၤႉဘၣ်မနုၤအဃိလဲ၊်န့ၣ်(မအလ)အံၤအယိးကဒါဘီ(သ့ၣ်စၤဖီး)လၢကမျၢၢ်ထံဖိကီၢ်ဖိႇထံကီၢ်အဖီခိၣ်အသိးမၤကမၣ်လုၢ်သ့ၣ်ခါပတာ်၀ဲၦၤဂ့ၢ်၀ီခွဲးယာ်တကးဒံးဘၣ်မၤ၀ဲတုၤလၢထံကီၢ်ကဟးဂီၤလီၤၦီၢ်ညါဒီးအပတီၢ်တုၤလၢဟီၣ်ခိၣ်ဒီဘ့ၣ်အံၤအိၣ်ခိးကွၢ်အီၤလံႉ (PC)ဒီး (DKBA)အံၤမ့ၢ်ဆဲးဖီၣ်လိာ်သးစုဒီး(မအလ)ဒုခါဆူညါန့ၣ်ထံဂုၤကီၢ်ဂၤကဟံးန့ၢ်အရ့ဒ်(မအလ)အသိးသ့၀ဲလီၤႉအ၀ဲသ့ၣ်မၤတၢ်အံၤတဂ့ၤလၢကညီကလုာ်အဂီၢ်ဘၣ်” အဂ့ၢ်န့ၣ်တၢ်ဘူၣ်တၢ်ဘါခိၣ်နၢ်တဂၤလၢအိၣ်ဖၣ်ပူၣ်လီၢ်က၀ီၤပူၤအံၤ ပဲာ်ထံနီၤဖးစံး၀ဲန့ၣ်လီၤႉ သုးမီၤစိရိၤအတၢ်ကစီၣ်သန့ပာ်ဖျါဃာ်၀ဲလၢ(KNU/KNLA-PC)ကရၢခိၣ်–၂ ဒီကထၢၣ်နီၢ်ကပီၤထူတီခိၣ်ရိၣ်မဲ ကရူၢ်ခၢၣ်စးဒီး(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ တီခိၣ်ရိၣ်မဲကရူၢ်ခၢၣ်စးအံၤတဖၣ် ကတၢၣ်ပီၣ်တဲသကိးတၢ်ဒီးသုးကီၣ်ကးလၢတၢ်မုာ်တၢ်ခုၣ်တၢ်မၤအကျဲတၢ်ဂ့ၢ်သ့ၣ်တဖၣ်န့ၣ်လီၤႉ ကတီၢ်ခဲအံၤထံရူၢ်ကီၢ်သဲးတၢ်အိၣ်သးတဂၢၢ်တကျၢၤဘၣ်အဖီခိၣ်အံၤဘၣ်ဃးကလုာ်ဒူၣ်ဖီၣ်စုက၀ဲၤတနီၤလဲၤထံၣ်လိာ်သးဒီးသုးမီၤစိရိၤအခိၣ်မ့အီၣ်လဲၣ်တၢ်ဂ့ၢ်အံၤန့ၣ် ပှၤဃုသ့ၣ်ညါထံရူၢ်ကီၢ်သဲးဖိတဖၣ်အတၢ်ပဲာ်ထံနီၤဖး ဟဲအိၣ်ထီၣ်၀ဲအကလုာ်ကလုာ်န့ၣ်လီၤႉ သုးမီၤစိရိၤအခိၣ်မ့အီၣ်လဲၣ်အတၢ်ကွဲမုာ််အဖီခိၣ်အံၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတကပၤ တတူၢ်လိာ်၀ဲဘၣ်အဃိတၢ်ရဲၣ်တၢ်ကျဲၤတအိၣ်လၢကလဲၤထံၣ်လိာ်သးဒီးသုးမီၤစိရိၤအခိၣ်ဘၣ်အဂ့ၢ်န့ၣ် (ခ့ၣ်အဲၣ်ယူၣ်)ၦၤကတိၤတၢ်ပၢ ပဒိၣ်စီၤတီနံ စံးဘၣ်ခ့ၣ်အဲးစံၣ်ဖဲအပူၤကွံာ်လါအီကူး ၂၄ သီအနံၤန့ၣ်လီၤႉ ဖဲအပူၤကွံာ်လါမ့ၤ ၂၆ သီတုၤလၢ ၂၈ သီအနံၤ (KNU/KNLA-PC)ကရူၢ်ဒီး လါယူၤ ၁၉ သီတုၤလၢ...

လါစဲးပထ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢတီနီၢ်မုၢ်ထီၣ် မၠၣ်၀တံၣ်ကလံၤထံးတကပၤန့ၣ် ဖဲမဟါလါစဲးပထ့ဘၢၣ် ၁၅ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲးသုးမုုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဘၢၣ်စၢၤတၢ်ဒုးကဲထီၣ်၀ဲဖဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်သ၀ီကပၤလ့ဂီၤသ၀ီပူၤအဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ၦၤဘၣ်မူဘၣ်ဒါဘၣ်ထွဲတဖၣ်စံး၀ဲန့ၣ်လီၤႉ ဖဲမဟါလါစဲးပထ့ဘၢၣ် ၁၅ သီ ဂီၤခီ ၁၁ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးလၢအနုာ်လီၤအိၣ်ဖဲ(DKBA)၀ဲၤလီၢ်ခိၣ်သ့ၣ်ဆိၣ်စံမၠဲၣ်သ၀ီပူၤတဖၣ် ဖဲအ၀ဲသ့ၣ်လဲၤထီၣ်လၢလ့ဂီၤသ၀ီ(ဃိၣ်လူၢ်)အခါခီဖျိတၢ်ဘၣ်သဂၢၢ်ခးလိာ်သးကဲထီၣ်၀ဲဒီး(KNLA)သုးပာ်ဖှိၣ်အဃိ လ့ဂီၤလီၢ်က၀ီၤကမျၢၢ်သံ၀ဲ(၁)ဂၤဒီး(DKBA)သုးဖိဘၣ်ဒိစ့ၢ်ကီးဲ၀(၁)ဂၤအဂ့ၢ်န့ၣ် (DKBA)သုးခိၣ်တဂၤစံး၀ဲဒ်အံၤန့ၣ်လီၤႉ (DKBA)သုးခိၣ်စံး၀ဲလၢ “ပယီၤသုးတဖၣ်အိၣ်ဖဲလ့ဂီၤဒီးကဘၣ်မ့ၢ်အကလဲၤထီၣ်လၢတၢ်ဖီခိၣ်တကပၤမီၤနီၤႉလၢန့ၣ်တကပၤခီဒုဟဲခး၀ဲဒီး(drone) မီၤနီၤႉပယီၤသုးတကပၤခီက့ၤခးလီၤကဒါဒီး (၁၂၀ မမ) လီၤႉ ခံခီခံကပၤခးလိာ်သးအဃိဘၣ်၀ဲဒၣ်လီၢ်က၀ီၤကမျၢၢ် (၁) ဂၤဒီးသံ၀ဲတဘျီဃီလီၤႉဘၣ်ဒိဃုာ်စ့ၢ်ကီး (DKBA) သုးဖိတဂၤဒံး” အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၁၅ သီအနံၤန့ၣ်လီၤႉ တၢ်ဒုးကဲထီၣ်ဘျီ၀ဲအံၤအပူၤခီဖျိပယီၤသုးတကပၤခးလီၤကဒါကျိဖးဒိၣ်အဃိလ့ဂီၤဒီးသ့ၣ်ဘီဘိသ၀ီ ၦၤလီၢ်အိၣ်ကမှံဘၣ်ဒိစ့ၢ်ကီး(၁)ဂၤအဂ့ၢ်န့ၣ် သ၀ီပှၤဘၣ်မူဘၣ်ဒါတဖၣ်စံးဘၣ်ခ့ၣ်အဲးစံၣ်န့ၣ်လီၤ ခီဖျိပယီၤသုးနုာ်လီၤအိၣ်ဆီလီၤသးလၢလ့ဂီၤသ၀ီပူၤအါအါဂီၢ်ဂီၢ်အဃိလီၢ်က၀ီၤသ၀ီဖိတဖၣ်ဃ့ၢ်ထီၣ်၀ဲသ၀ီဒီတဖျၢၣ်ညါဒီးတၢ်လီၢ်ဖဲန့ၣ်အိၣ်တ့ၢ်က့ၤထဲပယီၤသုးဒီး(DKBA)သုးတဖၣ်လီၤအဂ့ၢ်န့ၣ် (KNLA)သုးပာ်ဖှိၣ်တကပၤစံး၀ဲန့ၣ်လီၤႉ (KNLA)သုးပာ်ဖှိၣ်ၦၤဘၣ်မူဘၣ်ဒါတဂၤစံး၀ဲ “လၢလ့ဂီၤန့ၣ်အိၣ်ထဲပယီၤသုးလီၤႉလီၢ်က၀ီၤကမျၢၢ်တအိၣ်လၢၤဘၣ်ႉမ့ဘၣ်လၢန့ၣ်တကပၤဒုကဘၣ်မ့ၢ်ၦၤလၢအအိၣ်ဒီးပယီၤသုးတဖၣ်လီၤႉဘၣ်ခီန့ၣ်ပတသ့ၣ်ညါဘၣ်ႉပယီၤသုးခးလီၤကျိဖးဒိၣ်လၢသ့ၣ်ဘီဘိသ၀ီပူၤတကပၤအဃိပသ့ၣ်ညါဘၣ်လၢလီၢ်က၀ီၤဖိဘၣ်ဒိမီၤနီၤ”...

လါစဲးပထ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်အပူၤ ဖဲမဟါလါစဲးပထ့ဘၢၣ် ၁၅ သီ ဂီၤခီအဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်ဆူကီၢ်လဲ၀ါသ၀ီပူၤအဃိဘၣ်၀ဲဒၣ်သ၀ီဖိပိာ်မုၣ်တဂၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲမဟါဂီၤခီ ၈ နၣ်ရံၣ်ဃၣ်ဃၣ်အဆၢကတီၢ် ပယီၤသုး(ခမရ–၅၄၆)သုးရ့ၣ် လၢအိၣ်ကီးတရံးဒီးကြုၢ်တု၀့ၢ်အဘၢၣ်စၢၤအံၤခီဖျိခးလီၤ၀ဲကျိဖးဒိၣ်တစှၤန့ၢ်(၄)ဖျၢၣ်ဆူကီၢ်၀ါလဲသ၀ီပူၤအဃိ ဘၣ်၀ဲဒၣ်သ၀ီဖိပိာ်မုၣ်အနံၣ်(၃၀)ဘျဲၣ်တဂၤအခီၣ်လ့ၢ်ခိၣ်အဂ့ၢ်န့ၣ် ကီၢ်၀ါလဲသ၀ီဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“ဖဲတဂီၤအံၤကဘၣ်ဖဲ ၈ နၣ်ရံၣ်န့ၣ်ပယီၤသုး(၅၄၆)သုးရ့ၣ်ခးလီၤကျိဖးဒိၣ်လၢသ၀ီပူၤႉ ခးလီၤ၀ဲအထံၣ်အါဃိမ့တဘၣ်ၦၤကညီႇဟံၣ်ႇဆၣ်ဖိကီၢ်ဖိဘၣ်ဒုဘၣ်တခါခါလီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၁၅ သီအနံၤန့ၣ်လီၤႉ ဖဲစှၤသီအတီၢ်ပူၤအံၤခီဖျိပယီၤသုးခးလီၤကျိဖးဒိၣ်ကျိဖိတဖၣ်ကိးမုၢ်နံၤဒဲးအဃိ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီးလၢသ၀ီပူၤန့ၣ်ၦၤအိၣ်တ့ၢ်တအါလၢၤဘၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

လါစဲးပထ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်၀့ၢ်ပူၤန့ၣ် ၀့ၢ်ပူၤ၀့ၢ်ချၢတၢ်လီၢ်လၢပယီၤသုးတြဲၤအိၣ်ဆီလီၤသးအလီၢ်တဖၣ်န့ၣ် ခီဖျိတၢ်ဖီၣ်သမံသမိး၀ဲထံဖိကီၢ်ဖိကမျၢၢ်လၢအဟးထီၣ်နုာ်လီၤတဖၣ်ဟဲဃံးဒိၣ်န့ၢ်ဒံးအပူၤကွံာ်အဃိ ကဲထီၣ်တၢ်ကီတၢ်ခဲအဂ့ၢ်န့ၣ် ဒ၀ဲၢ်လီၢ်က၀ီၤဖိတဖၣ်စံး၀ဲန့ၣ်လီၤႉ ပယီၤသုးတြဲၤ(gate)တဖၣ်အံၤအခိၣ်သ့ၣ်န့ၣ်အိၣ်ခိးသမံသမိး၀ဲထံကီၢ်ခိၣ်ဂီၤဒီး မ့တမ့ၢ်ၦၤလီၢ်က၀ီၤဖိတဖၣ်ဘၣ်န့ၣ်သမံသမိး၀ဲအါမးအမဲာ်ညါဃ့အီၣ်စ့လၢထံဖိကီၢ်ဖိကမျၢၢ်လၢအဟးထီၣ်က့ၤလီၤတဖၣ်အအိၣ်အဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ ဒ၀ဲၢ်လီၢ်က၀ီၤဖိတဂၤစံး၀ဲ“လၢ၀့ၢ်ပူၤကျဲနုာ်လီၤဟးထီၣ်ခဲလၢာ်န့ၣ်ပယီၤသုးတြဲၤအိၣ်မီၤနီၤႉလၢကျဲပူၤမ့ၢ်ဂ့ၤႇကျဲလၢၦၤဟးဆှဲး၀ဲတဖၣ်နါက့အ၀ဲသ့ၣ်ဆီလီၤ၀ဲတြဲၤမီၤနီၤႉအခိၣ်သ့ၣ်န့ၣ်သမံသမိး၀ဲ(မၣ်ပိၤတ့ၤ)လီၤႉမ့တမ့ၢ်ၦၤအိၣ်ဖဲအံၤတဖၣ်ဘၣ်န့ၣ်အ၀ဲသ့ၣ်သမံသမိး၀ဲအါတစဲးႉတဘျီတခီၣ်န့ၣ်ဖီၣ်ၦၤအိၣ်အဃိဘၣ်ပျံၤစ့ၢ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးအတြဲၤအိၣ်ခိးသမံသမိးတၢ်လီၢ်တဖၣ်အံၤဃ့အီၣ်စ့လၢထံဖိကီၢ်ဖိကမျၢၢ်လၢအဟးထီၣ်က့ၤလီၤတဖၣ်အအိၣ်တကးဒံးဘၣ်အမဲာ်ညါဟီၣ်က၀ီၤပူၤလီၢ်က၀ီၤဖိအသိလ့ၣ်လၢအတီၣ်ဆှၢတၢ်ဖိတၢ်လံၤတဖၣ်မ့တအိၣ်ဒီးသိလ့ၣ်အလံာ်လဲၢ်(လဲၤစ့ၤ)ဘၣ်န့ၣ်တပျဲလဲၤ၀ဲလၢၤဘၣ်အသိးသိလ့ၣ်ပူၤတၢ်ဖိတၢ်လံၤပၣ်မ့အါန့ၣ်ဃ့အီၣ်၀ဲစ့အါမးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လၢဒ၀ဲၢ်၀့ၢ်ပူၤန့ၣ်ပယီၤသုးဟးဆှၣ်တၢ်လၢမုၢ်နၤခီႇဟးထၢၦၤတမှံၤစရီဖီၣ်တၢ်တပယူာ်ဃီဒီး လီၢ်က၀ီၤကမျၢၢ်လၢပယီၤသုးဖီၣ်၀ဲတဖၣ်စ့ၢ်ကီးတၢ်မၤသံ၀ဲအိၣ်အဃိဘၣ်အိၣ်လၢတၢ်ပျံၤတၢ်ဖုးပူၤအဂ့ၢ်န့ၣ် ၦၤအိၣ်၀့ၢ်ပူၤတဂၤစံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံဖဲပယီၤသုးတဖၣ်နုာ်လီၤအိၣ်လၢတနီသရံၣ်ကီၢ်ခီဒိၣ်ဒူသ၀ီပူၤအခါ ခီဖျိဖီၣ်မၤသံ၀ဲလီၢ်က၀ီၤကမျၢၢ်ႇခးလီၤနါစိၤကျိဖးဒိၣ်အဃိလီၢ်က၀ီၤကမျၢၢ်သံ၀ဲ(၂၂၄)ဂၤအဂ့ၢ်န့ၣ်(Southern Monitor)ကရူၢ်လၢအဃုသ့ၣ်ညါ၀ဲတနီသရံၣ်ကီၢ်ခီဒိၣ် ၦၤဂ့ၢ်၀ီမုၢ်ကျိၤ၀ဲၤကွာ်တၢ်အိၣ်သးႇၦၤဃ့ၢ်မှံဟးဖျိး တၢ်အိၣ်သးဒီးတၢ်မၤကမၣ်ၦၤဂ့ၢ်၀ီခွဲးယာ်တၢ်အိၣ်သးအံၤထုးထီၣ်ပာ်ဖျါ၀ဲဖဲလါစဲးပထ့ဘၢၣ် ၁၁ သီအနံၤန့ၣ်လီၤႉ

လါစဲးပထ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢတီနီၢ်မုၢ်ထီၣ် မၠၣ်၀တံၣ်ကလံၤထံး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်က၀ီၤ ဆိၣ်စံမၠဲၣ်သ၀ီအပူၤန့ၣ် ခီဖျိပယီၤသုးမၤအါထီၣ်တၢ်ဘံၣ်တၢ်ဘၢဒီးကးတံၢ်ဃာ်၀ဲတၢ်အီၣ်တၢ်အီကျဲတဖၣ်အဃိ ကမျၢၢ်ၦၤလီၢ်အိၣ်ကမှံလၢအိၣ်သ၀ီပူၤတဖၣ်သဂၢၢ်ဘၣ်၀ဲတၢ်အီၣ်တၢ်အီလီၤတူာ်အဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ စးထီၣ်ဖဲလါစဲးပထ့ဘၢၣ် ၈ သီအနံၤန့ၣ် ပယီၤသုးတဖၣ်ဒိးလီၤဃာ်၀ဲမ့ၣ်ပိၢ်လၢ(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံအဟံၣ်ခိၣ်ဟံၣ်ဃၢၤဒီးကျဲဒီတဘီဒီးခီဖျိနုာ်လီၤဟံးန့ၢ်အလီၢ်ကးတံၢ်ဃာ်၀ဲ တၢ်အီၣ်တၢ်ကျဲအဃိကမျၢၢ်ၦၤဃ့ၢ်မှံဟးဖျိး(၃၅၀)ဘျဲၣ်လၢအလဲၤအိၣ်ကဒုသးဖဲသ၀ီပူၤသီခါဖၠၣ်အံၤတဖၣ်သဂၢၢ်ဘၣ်၀ဲတၢ်အီၣ်တၢ်အီလီၤတူာ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ “ပလဲၤမၤဘူၣ်လီၤန့ၣ်လၢ ၈ သီအနံၤလံမီၤနီၤႉလၢန့ၣ်တကပၤနါက့ၦၤတတူၢ်လိာ်ၦၤဃ့ၢ်မှံဟးဖျိးတဖၣ်ဘၣ်ႉ ခီဖျိကၠီၣ်တဲၣ်တကပၤတတူၢ်လိာ်၀ဲဘၣ်အဃိၦၤလီၢ်အိၣ်ကမှံတဖၣ်အိၣ်ကတာ်ထီ၀ဲသးလၢသီခါဖၠၣ်န့ၣ်မီၤနီၤႉဆှၢတၢ်အီၣ်တၢ်အီနါက့ဘၣ်ဆှၢဟုၣ်ဆှၢဘျၣ်လီၤႉတၢ်လီၢ်တနီၤန့ၣ်ၦၤပာ်လီၤတၢ်ဘံၣ်တၢ်ဘၢဃံးဃီၣ်ဒီၣ်လီၤႉတၢ်ကီတၢ်ခဲအိၣ်လၢကဆှၢတၢ်အဃိတဘျီတခီၣ်န့ၣ်ဘၣ်စိာ်လၢဆဲးကဲးနါက့အိၣ်မီၤနီၤႉလၢကီၢ်ကၠီၣ်တဲၣ်တကပၤနါက့ပံးဃာ်၀ဲဒ်န့ၣ်လီၤ” အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၇ သီအနံၤန့ၣ် တၢ်လဲၤခးဘၣ်၀ဲ(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံအဟံၣ်လၢ(drone)၀ံၤအလီၢ်ခံခီဖျိပယီၤသုးလၢအနုာ်လီၤအိၣ်ဖဲအဟံၣ်ကရၢၢ်ပူၤတဖၣ်အံၤခးလီၤကဒါကျိဖးဒိၣ်ဆူသ၀ီပူၤအဃိဘၣ်ဟးဂီၤ၀ဲသ၀ီပူၤကမျၢၢ်ၦၤလီၢ်အိၣ်ကမှံဖိအဟံၣ်အဃီအိၣ်၀ဲတနီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁ သီအနံၤစ့ၢ်ကီး ပယီၤသုးကျိၤ(၂)ကျိၤလၢအနီၣ်ဂံၢ်အိၣ်အဂၤ(၃၀၀)ဃၣ်ဃၣ်အံၤ နုာ်လီၤဟံးန့ၢ်အလီၢ်လၢ(DKBA)သုး၀ဲၤလီၢ်ခိၣ်သ့ၣ် ဆိၣ်စံမၠဲၣ်ဒီးလ့ဂီၤဒူသ၀ီတဖၣ်အပူၤဒီး ခီဖျိပယီၤသုးကျိၤနုာ်လီၤဟံးန့ၢ်လီၢ်ဒ်အံၤအဃိလ့ဂီၤဒီးဆိၣ်စံမၠဲၣ်လီၢ်က၀ီၤဖိလၢအကထိဘၣ်ဃ့ၢ်ထီၣ်၀ဲဒၣ်န့ၣ်လီၤႉ

လါစဲးပထ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျဲးဒ၀ဲၢ်ကီၢ်ရ့ၣ် ဒ၀ဲၢ်ကီၢ်ဆၣ်အပူၤ ဖဲလါစဲးပထ့ဘၢၣ် ၁၃ သီအနံၤန့ၣ် ပယီၤသုးလၢအနုာ်လီၤအိၣ်လၢ(ပ၀့ၤပ့ၤ)သ၀ီပူၤတဖၣ်ဒွဲၣ်အူအီၣ်၀ဲၦၤလီၢ်အိၣ်ကမှံတၢ်လီၢ်တခါဒီးခးလီၤကျိဖးဒိၣ်ကျိဖိ၀ံၤအလီၢ်ခံဟးထီၣ်ကွံာ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၆ သီအနံၤန့ၣ် ပယီၤသုးလၢအနုာ်လီၤအိၣ်လၢ ဘျံးဒ၀ဲၢ်ကီၢ်ရ့ၣ်(ဘ၀့ၤပ့ၤ)သ၀ီပူၤတဖၣ်အံၤဖီၣ်က့ၤကိး၀ဲသ၀ီဖိအဂၤ(၁၀၀)ဘျဲၣ်၀ံၤ ဖဲလါစဲးပထ့ဘၢၣ် ၁၃ သီ ဟါခီ ၉ နၣ်ရံၣ်ဃၣ်ဃၣ်အဆၢကတီၢ်န့ၣ် ပျၢ်လီၤက့ၤ၀ဲသ၀ီဖိိတဖၣ်အံၤ၀ံၤအလီၢ်ခံ ခးလီၤ၀ဲကျိဖးဒိၣ်ကျိဖိတဖၣ်ဒီး ဟးထီၣ်ကွံာ်၀ဲလၢသ၀ီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ တချုးလၢပယီၤသုးဟးထီၣ်လၢ(ဘ၀့ၤပ့ၤ)သ၀ီပူၤဒံးဘၣ်အခါန့ၣ်ဒွဲၣ်အူ၀ဲၦၤလီၢ်အိၣ်ကမှံလီၢ်တခါလၢအိၣ်ဖဲသ၀ီမုၢ်နုာ််တကပၤအံၤအသိးနုာ်လီၤမၤဟးဂီၤသ၀ီပူၤဟံၣ်တဖၣ်ဒီးက့ၤစိာ်၀ဲတၢ်ဖိိတၢ်လံၤတဖၣ်အဂ့ၢ်န့ၣ် လီၢ်က၀ီၤဖိိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟးထီၣ်လၢသ၀ီပူၤန့ၣ်ကဘၣ်ဖဲဟါခီ ၉ နၣ်ရံၣ်န့ၣ်မီၤနီၤႉ မ့၀ံၤခးလီၤ၀ဲကျိဖး ဒိၣ်ကျိဖိတဖၣ်လီၤႉဒွဲၣ်အူအီၣ်၀ဲၦၤလီၢ်အိၣ်ကမှံတၢ်လီၢ်တခါအိၣ်ဖဲ(ဘ၀့ၤပ့ၤ)သ၀ီမုၢ်နုာ်တကပၤန့ၣ်ႉနုာ်လီၤမၤဟးဂီၤၦၤဟံၣ်လၢသ၀ီပူၤဒီတဖျၢၣ်ႇမ့မ့ၢ်ယဟံၣ်န့ၣ်အခိၣ်သ့ၣ်လီၤသူအီၣ်တသ့နီတမံၤလၢၤဘၣ်ႉတအိၣ်တ့ၢ်နီတမံၤလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၁၄ သီအနံၤန့ၣ်လီၤႉ ပယီၤသုးတဖၣ်အံၤမၤဟးဂီၤလီၢ်က၀ီၤဖိအဟံၣ်တကးဒံးဘၣ်တဲပျံၤ၀ဲလၢၦၤမ့ဒိဃာ်ဟံၣ်လၢအဟးဂီၤႇမ့ဒိဃာ်တၢ်ဒွဲၣ်အူအီၣ်ၦၤလီၢ်အိၣ်ကမှံလီၢ်လၢတၢ်ဂီၤတဖၣ်န့ၣ်မ့ဟဲလၢသ၀ီပူၤတဘျီကဒီးန့ၣ်ကဒွဲၣ်အူအီၣ်ကဒီး၀ဲသ၀ီႇကမၤသံစ့ၢ်ကီးသ၀ီဖိအသိးသီခါလၢအိၣ်သ၀ီပူၤတဖၣ်ဘၣ်ဆဲးလီၤ၀ဲလံာ်တၢ်အၢၣ်လီၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ “သီခါလၢအိၣ်သ၀ီပူၤတဖၣ်ဘၣ်ဆဲးလီၤဃာ်လံာ်မီၤနီၤႉၦၤမ့ဒိဃာ်တၢ်ဂီၤလၢဟံၣ်လၢအ၀ဲသ့ၣ်မၤဟးဂီၤ၀ဲတဖၣ်န့ၣ်အ၀ဲသ့ၣ်မ့ဟဲလၢသ၀ီပူၤတဘျီကဒီးန့ၣ်ကဒွဲၣ်အူအီၣ်သ၀ီဒီတဖျၢၣ်လီၤတဲ၀ဲဒ်န့ၣ်ႉတဲပျံၤစ့ၢ်ကီး၀ဲလၢကမၤသံသ၀ီဖိတဖၣ်မီၤနီၤ” အဂ့ၢ်န့ၣ်သ၀ီဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ (ဘ၀့ၤပ့ၤ) သ၀ီပူၤအံၤအါဒၣ်တက့ၢ်န့ၣ်ကညီဖိတဖၣ်အိၣ်ဆိး၀ဲဒီးဟံၣ်ခိၣ်အိၣ်၀ဲ (၅၈၅) ဖျၢၣ်ဃၣ်ဃၣ်ဒီး ဖဲအပူၤကွံာ်လါစဲးပထ့ဘၢၣ်...