ခ့ၣ်အဲးစံၣ် – KIC News

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်အပူၤန့ၣ် ခီဖျိပယီၤသုးမီၤစိရိၤနီဟးထီၣ်ကွံာ်သ၀ီ(၃)ဖျၢၣ်လီၢ်က၀ီၤဖိတဖၣ်လၢသ၀ီပူၤအဃိ လီၢ်က၀ီၤသ၀ီဖိတဖၣ်ဘၣ်ဟးထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၁၁ သီအခါ ပယီၤသုးမီၤစိရိၤ သုးခိၣ်စိ စ့ၤယၤလ့လၢအနုာ်လီၤအိၣ်ဆီလီၤသးဖဲ ဟီၣ်က၀ီၤဖဲန့ၣ်အပူၤအံၤကိးဖှိၣ်၀ဲဒူသ၀ီသူၣ်က့သးၦၢ်တဖၣ်ဒီးမၢဆူၣ်၀ဲ(တမၤခီ)သ၀ီဒီး(တီၤစူၣ်)သ၀ီဖိတဖၣ်လၢဟးထီၣ်ကွံာ်လၢသ၀ီပူၤအသိး ဖဲလါစဲးပထ့ဘၢၣ် ၁၃ သီအနံၤစ့ၢ်ကီးမၢဆူၣ်ကဒီး(နီၤကိ)သ၀ီဖိတဖၣ် လၢကဟးထီၣ်ကွံာ်လၢသ၀ီပူၤအဃိ လီၢ်က၀ီၤဖိတဖၣ်ဘၣ်ဟးထီၣ်သုးအလီၢ်အဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ် လီၢ်က၀ီၤကညီၦၤဂ့ၢ်၀ီကရူၢ် ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘၣ်မနုၤအဃိလၢဘၣ်သုးလီၢ်လဲၣ်န့ၣ်တသ့ၣ်ညါဘၣ်ႉဖဲလါထီၣ် ၁၁ သီအနံၤန့ၣ် မၢၦၤသုးလီၢ်အဃိ လီၢ်က၀ီၤဖိတဖၣ်ဖဲ ၁၂ သီအနံၤန့ၣ် သုးလီၢ်ခဲလၢာ်လီၤႉ မ့၀ံၤဖဲမဟါဟါခီနါက့ပယီၤသုးနုာ်လီၤလၢ(နီၤကိ)သ၀ီပူၤ နီဟးထီၣ်ၦၤခဲလၢာ်လီၤႉပံးဃာ်၀ဲကျဲလၢအံၤတကပၤဒီးမၢလဲၤ၀ဲလၢကျဲမုၢ်ခိၣ်လၢန့ၣ်တကပၤန့ၣ်မီၤနီၤႉမၢလီၢ်က၀ီၤကမျၢၢ်လဲၤဟးပလဲာ်လၢလၢၢ်ဒိၣ်တကပၤန့ၣ်မီၤနီၤႉမ့၀ံၤလၢတၢ်ကနုာ်လီၤလၢၢ်ဒိၣ်ႇဆ့းကၠံနါက့ကယဲၢ်မ့ၢ်ၦၤစိာ်လီတဲစိန့ၣ်ဟံသမံသမိး၀ဲဒီးဟံးဃာ်၀ဲခဲလၢာ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တမၤခီသ၀ီလီၢ်က၀ီၤဖိလၢအဘၣ်သုးလီၢ်တဖၣ်ဟံၣ်ခိၣ်အိၣ်၀ဲ(၆၁)ဖျၢၣ်ႇၦၤနီၣ်ဂံၢ်အိၣ်၀ဲ(၃၃၄)ဂၤဒီး ၦၤသ့ၣ်တဖၣ်အံၤသုးအလီၢ်လဲၤအိၣ်၀ဲလၢစ့ၣ်တီကျိမုၢ်နုာ်နိၤဘိခံသ၀ီဒီးဒူသ၀ီလၢအိၣ်ဘူးဖဲန့ၣ်တဖၣ်အပူၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ နီၤကိသ၀ီလၢပယီၤသုးမၢအသုးလီၢ်သုးကျဲအံၤဖဲအပူၤကွံာ်လါအီကူးအခါစ့ၢ်ကီးသ၀ီဖိတဖၣ်သုးအလီၢ်အကျဲဒီးခီဖျိသ၀ီဖိတနီၤလၢတၢ်လုၢ်အီၣ်နီၢ်ခိသးသမူအဂီၢ်ဖဲအ၀ဲသ့ၣ်ဟဲက့ၤအိၣ်ကဒါလၢသ၀ီပူၤအကတီၢ်ဖဲမဟါလါစဲးပထ့ဘၢၣ် ၁၃ သီ ဟါခီ...

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံလၢဖၣ်အၣ်ကီၢ်ဆၣ် ဒူယီၢ်ဟီၣ်က၀ီၤအပူၤန့ၣ် တၢ်မၤ၀ဲဒၣ်(အၤ၀ၤဒ့)ဘူၣ်တၢ်ဂဲၤလိာ်ကွဲတၤကျိၣ်တၤစ့ဟဲအါထီၣ်ဒိၣ်န့ၢ်အပူၤကွံာ်အဂ့ၢ်န့ၣ် သ့ၣ်ညါဘၣ်လၢဖၣ်အၣ်လီၢ်က၀ီၤဖိတဖၣ်အအိၣ်န့ၣ်လီၤ တချုးလၢသုးဟံးန့ၢ်ဆူၣ််တၢ်စိတၢ်ကမီၤကဲထီၣ်သးဒံးဘၣ်အခါတၢ်မၤ၀ဲ(အၤ၀ၤဒ့)ဘူၣ်အိၣ်၀ဲဘၣ်ဆၣ် စးထီၣ်လၢသုးဟံးန့ၢ်တၢ်စိတၢ်ကမီၤကဲထီၣ်သး၀ံၤအလီၢ်ခံန့ၣ် ဟ့ၣ်ထီၣ်၀ဲတၢ်ဂ့ၢ်အခိၣ်တီလၢ တၢ်အိးထီၣ်ကျဲအမူးႇတၢ်ဘူၣ်တၢ်ဘါပွဲႇဘူၣ်တပွဲႇမ့ၣ်အူဘူၣ်ႇသီခါယူၤဘူၣ်တဖၣ်အမံၤမံၤဒီးဟးမၤ၀ဲ(အၤ၀ၤဒ့)ဘူၣ်တဖၣ်လၢသ၀ီတဖျၢၣ်၀ံၤတဖျၢၣ်အပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“လၢညါခါန့ၣ်(အၤ၀ၤဒ့)အိၣ်မီၤနီၤႉခီဖျိလၢကမျၢၢ်ပဒိၣ်စိၤအခါန့ၣ်တၢ်ပံးဃာ်၀ဲအိၣ်အဃိလီၤမၢ်ကွံာ်ဖဲန့ၣ်တတီၤမီၤနီၤႉသုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်ၦၤမၤ၀ဲ(အၤ၀ၤဒ့)ဘူၣ်လၢသ၀ီပူၤတဖျၢၣ်၀ံၤတဖျၢၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ စးထီၣ်ဖဲအပူၤကွံာ်(၂၀၁၅)တုၤလၢ(၂၀၂၀)နံၣ်အခါဖဲတၢ်မၤတၢ်ဘူၣ်မၤပွဲအပူၤန့ၣ်ထဲဒၣ်တၢ်ဖီၣ်မဲမးတၢ်တဟ့ၣ်အခွဲးလၢကမၤ၀ဲဘၣ်ဒီးဘၣ်ဆၣ်ကတီၢ်ခဲအံၤဟ့ၣ်ထီၣ်၀ဲတၢ်ဂ့ၢ်အခိၣ်တီအမံၤမံၤ၀ံၤမၤ၀ဲတၢ်ဂဲၤလိာ်ကွဲတၢ်တၤကျိၣ်တၤစ့အံၤဒ်မုၢ်ကျိၤ၀ဲၤကွာ်တၢ်ဖံးတၢ်မၤအသိးအဂ့ၢ်န့ၣ်် လီၢ်က၀ီၤဖိတနီၤပဲာ်ထံနီၤဖးစံး၀ဲန့ၣ်လီၤႉ ခီဖျိတၢ်မၤ၀ဲတၢ်ဂဲၤလိာ်ကွဲတၢ်တၤကျိၣ်တၤစ့ဟဲအါထီၣ်ဒ်အံၤအဃိတၢ်အ့ၣ်လိာ်ဆိးက့ဟဲအိၣ်ထီၣ်၀ဲလၢဟံၣ်ဖိဃီဖိအပူၤဒီးတၢ်ဟုၣ်တၢ်ဘျၣ်ႇတၢ်ပီၣ်လီၤကွံာ်ဟံၣ်ဃီကရၢၢ်တဖၣ်စ့ၢ်ကီးဟဲအိၣ်ထီၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “မၤဘူၣ်အံၤတသီခံသီတကးလၢၤဘၣ်ႉမၤ၀ဲန့ၢ်လၢအလါလံမီၤနီၤႉမၤ၀ဲဒ်န့ၣ်အဃိတသီမ့တမ့ၢ်တသီသီန့ၣ်လဲၤလီၤမီၤနီၤႉၦၤတနီၤန့ၣ်အဟံၣ်အဟီၣ်ခိၣ်ဆှူကွံာ်ႉယ၀ၤနါက့ဆှူ၀ဲလွံၢ်ကလီၢ်အဃိအအိၣ်ဘှံးလံႉဂ့ၤလၢကမၢ်တထီၣ်ဘၣ်” အဂ့ၢ်န့ၣ်ဟီၣ်က၀ီၤၦၤမုၢ်ၦၢ်တဂၤစံး၀ဲန့ၣ်လီၤႉ ဖၣ်အၣ်ကီၢ်ဆၣ်(ဒူယီၢ်)ဟီၣ်က၀ီၤတကးဒံးဘၣ်အမဲာ်ညါလၢကီးတရံးႇလူၢ်ပျဲၢ်ႇကၠၤအ့စ့ၣ်ကၠံဒီးမၠၣ်၀တံၣ်ကီၢ်ဆၣ်သ၀ီတဖၣ်အပူၤစ့ၢ်ကီးသုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်မၤ၀ဲ(အၤ၀ၤဒ့)ဘူၣ်ဒီးဆီလီၤတၢ်ဂဲၤလိာ််ကွဲတၢ်တၤကျိၣ်တၤစ့လီၢ်ဖျိဖျိဖျါဖျါအဃိလီၢ်က၀ီၤကမျၢၢ်တဖၣ်တၢ်ဘၣ်ယိၣ်ဘၣ်ဘှီဟဲအါထီၣ်၀ဲန့ၣ်လီၤႉ

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤ စးထီၣ်ဖဲအပူၤကွံာ်(၂၀၂၁) လါယနူၤအါရံၤတုၤလၢတနံၣ်အံၤလါအီကူးအလါ(၂၀)အတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိကမျၢၢ်ဘၣ်သံ၀ဲ(၁၀၀)ဘျဲၣ်ဒီးဘၣ်ဃ့ၢ်မှံဟးဖျိးအဂၤ(၃)ကလီၢ်ဘျဲၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၁၃ သီအနံၤန့ၣ်လီၤႉ တချုးဒံးလၢသုးဟံးန့ၢ်ဆူၣ်တၢ်စိတၢ်ကမီၤ(၂၀၂၁)လါယနူၤအါရံၤတုၤလၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံတနံၣ်အံၤလါအီကူးအတီၢ်ပူၤန့ၣ်ခ့ၣ်အဲၣ်ယူၣ်စုတီၤအဖီလာ်သုးကရူၢ်ဒီးပယီၤသုးႇ(BGF)တဖၣ်အဘၢၣ်စၢၤတၢ်ဘၣ်သဂၢၢ်ခးလိာ်သးကဲထီၣ်၀ဲ(၆ႇ၃၅၆)ဘျီအပူၤန့ၣ်ကမျၢၢ်ဘၣ်သံ၀ဲ(၁၃၁)ဂၤႇဘၣ်ဒိ၀ဲ(၂၉၄)ဂၤဒီးဘၣ်ဃ့ၢ်မှံဟးဖျိး၀ဲခဲလၢာ်(၃၇၁၉၅၈)ဂၤအဂ့ၢ်န့ၣ်ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခံခီခံကပၤတၢ်ဒုးကဲထီၣ်အဘျီ(၆)ကထိဘျဲၣ်အပူၤန့ၣ်ပယီၤသုးဒီး(BGF)တကပၤသံ၀ဲ(၅၁၂၅)ဂၤဒီးဘၣ်ဒိ၀ဲ(၄၁၄၇)ဂၤန့ၣ်လီၤႉဒ်န့ၣ်အသိးမ့မ့ၢ်(KNLA)သုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁၃၇)ဂၤဒီးဘၣ်ဒိ၀ဲ(၃၅၂)ဂၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တၢ်ဒုးကဲထီၣ်လၢအလါ(၂၀)အတီၢ်ပူၤန့ၣ်ပယီၤသုးဒီး(BGF)ခးလီၤ၀ဲကျိဖးဒိၣ်ဆူကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၄ႇ၄၅၆)ဖျၢၣ်ဒီးသုးမီၤစိရိၤကဘီယူၤဟဲခးလီၤတၢ်လၢ(KNLA)ႇ(KNDO)တၢ်လီၢ်ဒီးလၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၁၁၇)ဘျီအသိးဖီၣ်၀ဲကမျၢၢ်လၢအတၢ်ကမၣ်တအိၣ်ဘၣ်ခဲလၢာ်(၄၁၂)ဂၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်ဒုးဆူၣ်ထီၣ်၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤသုးက့(၆)ဘ့ၣ်အပူၤဒီး လၢခ့ၣ်အဲၣ်ယူၣ်(သုးက့ ၁)ႇ(သုးက့ ၃)ႇ(သုးက့ ၅)ဒီး(သုးက့ ၆)ဟီၣ်က၀ီၤအပူၤန့ၣ် တၢ်ဒုးကဲထီၣ်အါကတၢၢ်လီၤဒီး(KNLA)ႇ(KNDO)ထီၣ်ဒုးဖျိးကွံာ်၀ဲသုးမီၤစိရိၤအသုးကလၢၤခဲလၢာ်(၉)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်ဒုးအိၣ်ထီၣ်ဒူသ၀ီပၢၤကီၢ်သုးအံၤတမ့ၢ်ဘၣ်ကဲသုးခိးကီၢ်ဆၢ(BGF)သုးဘၣ်ဒီး မ့ၢ်ဒၣ်လၢတၢ်ကဒီသဒၢလီၤက့ၤဒူသ၀ီတၢ်ဘံၣ်တၢ်ဘၢအဂီၢ်လီၤအဂ့ၢ်န့ၣ် BGF နီၣ်ဂံၢ်(၂)သုးဟီၣ်က၀ီၤခိၣ် သုးခိၣ်ဒိၣ်ဖိ စီၤကၠၤအ့စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီကူး ၂၃ သီအခါ လၢလူၢ်ပျဲၢ်ကီၢ်ဆၣ်အပူၤ သုးမီၤစိရိၤအစုတီၤဖီလာ်ကညီကီၢ်စဲၣ် သုးခိးကီၢ်ဆၢ(BGF)အနဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠ့ၣ်သူၤတီခိၣ်ရိၣ်မဲအၦၤဒီး မၤ၀ဲတၢ်ထံၣ်လိာ်အိၣ်သကိးဒီးဒူသ၀ီလီၢ်က၀ီၤကမျၢၢ်တဖၣ်န့ၣ်လီၤႉ တၢ်မၤ၀ဲတၢ်ထံၣ်လိာ်အိၣ်သကိး၀ံၤအလီၢ်ခံလၢတၢ်ကဒုးအိၣ်ထီၣ်ဂၢၤကီၢ်သုးအဂီၢ်န့ၣ်လီၢ်က၀ီၤကမျၢၢ်တဖၣ်နၢ်ပၢၢ်၀ဲလၢကဘၣ်ကဲ(BGF)သုးအံၤမ့ၢ်တၢ်နၢ်ပၢၢ်ကမၣ်လိာ်သးလီၤဒီးကတီၢ်ခဲအံၤလၢကီၢ်စဲၣ်အပူၤခီဖျိတၢ်ဟုၣ်တၢ်ဘျၣ်ဟဲအါထီၣ်အဃိမ့ၢ်တၢ်အိၣ်ကတီၤသးလၢကဒီသဒၢလီၤက့ၤဒူသ၀ီတၢ်ဘံၣ်တၢ်ဘၢအဂီၢ်လီၤအဂ့ၢ်န့ၣ် BGF နီၣ်ဂံၢ်(၂)သုးဟီၣ်က၀ီၤခိၣ် သုးခိၣ်ဒိၣ်ဖိ စီၤကၠၤအ့စံး၀ဲန့ၣ်လီၤႉ အ၀ဲစံး၀ဲလၢ“ခိၣ်နၢ်တဂၤမးတတဲဃာ်၀ဲလၢကဘၣ်ကဲ(BGF)သုးႇကဘၣ်ထီၣ်သုးတၢ်သိၣ်လိဘၣ်ႉဘၣ်ဆၣ်မ့အဲၣ်ဒိးဒီသဒၢဒူသ၀ီအဂီၢ်ဒုသ့မီၤနီၤႉတၢ်အံၤခီန့ၣ်ပကစၢ်သးမ့ပၣ်မးလီၤႉသးမ့တပၣ်ဘၣ်န့ၣ်ၦၤတမၤန့ၢ်ဆူၣ်ဘၣ်ႉယနီၢ်ကစၢ်ဒၣ်၀ဲယလဲၤထီၣ်ကရူၢ်တၢ်အိၣ်ဖှိၣ်ဒံးႉယတနၢ်ဟူတၢ်ဖီခိၣ်ခိၣ်နၢ်တဖၣ်တဲ၀ဲဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲတၢ်လဲၤထံၣ်လိာ်သးဒီးကမျၢၢ်တဖၣ်အခါတၢ်အိၣ်ဖှိၣ်အပူၤ(BGF)စံးလီၤတၢၣ်ပီၣ်တဲသကိး၀ဲလၢဒ်သိးကညီကမျၢၢ်တဖၣ်ကပၢၤဃာ်က့ၤနီၢ်ကစၢ်လံာ်လဲၢ်တၢ်ဆဲးတၢ်လၤဒီးကတီၢ်ခဲအံၤထံၣ်ဘၣ်လၢကညီသူၣ်ဘီၣ်သးစၢ်တဖၣ်သူၦ့ၤဆါကသံၣ်မူၤဘှီးဟဲအါထီၣ်အဃိဒ်သိးသးစၢ်တဖၣ်သူကသံၣ်မူၤဘှီးသုတဟဲအါထီၣ်လၢဒူသ၀ီပူၤလၢၤတဂ့ၤဒီးတၢ်ကဒီသဒၢလီၤက့ၤဒူသ၀ီတၢ်ဘံၣ်တၢ်ဘၢအဂ့ၢ်န့ၣ် သုးခိၣ်ဒိၣ်ဖိစီၤကၠၤအ့စံးအါထီၣ်၀ဲန့ၣ်လီၤႉ တၢ်ထံၣ်လိာ်အိၣ်သကိးဖဲတၢ်တနံၤန့ၣ်ခီဖျိအ၀ဲသ့ၣ်တဒုးသ့ၣ်ညါဆိဃာ်၀ဲဘၣ်အဃိဒူသ၀ီကရူၢ်သးၦၢ်တဖၣ်အါဒၣ်တက့ၢ်န့ၣ်တဟဲထီၣ်၀ဲတၢ်အိၣ်ဖှိၣ်အံၤဘၣ်ဒီးၦၤလီၢ်က၀ီၤကမျၢၢ်စှၤကိာ်ဖိဟဲထီၣ်၀ဲအဂ့ၢ်န့ၣ် သးစၢ်လၢလဲၤထီၣ်တၢ်အိၣ်ဖှိၣ်အံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သ၀ီသးၦၢ်တဲ၀ဲလၢယၤမးယတသ့ၣ်ညါတၢ်နီတမံၤဒံးဘၣ်ႉခီဖျိအတသ့ၣ်ညါစိ၀ဲဘၣ်အဃိအ၀ဲသ့ၣ်အၦၤဟဲကိးအဃိဘၣ်လဲၤ၀ဲတၢ်အိၣ်ဖှိၣ်တဘျီဃီလီၤႉလၢတၢ်အိၣ်ဖှိၣ်အပူၤန့ၣ်(BGF)ခိၣ်နၢ်ပၣ်ဒီဒူၣ်ညါႉတဲလီၤ၀ဲအခိၣ်သ့ၣ်န့ၣ်အိၣ်မ့ဃူအိၣ်မ့့ဖိးႇဒီသဒၢလီၤက့ၤဒူသ၀ီဒီးအလီၢ်မ့အိၣ်န့ၣ်လဲၤထီၣ်သုးတၢ်သိၣ်လိလၢအ၀ဲသ့ၣ်အအိၣ်ဒ်န့ၣ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ သုးခိးကီၢ်ဆၢ(BGF)လဲၤထံၣ်လိာ်သးဒီးကညီကမျၢၢ်အံၤမ့ၢ်ဒၣ်တၢ်လဲၤကရၢကရိတၢ်ရဲၣ်တၢ်ကျဲၤတခါလီၤဒီးဖဲအပူၤကွံာ်လါလၢကညါအခါစ့ၢ်ကီးစံး၀ဲလၢတၢ်ဒီသဒၢဒူသ၀ီတၢ်ဘံၣ်တၢ်ဘၢအဂီၢ်ဒီးဒုးထီၣ်၀ဲသူၣ်ဘီၣ်သးစၢ်လၢအိၣ်သ၀ီပူၤတဖၣ်လၢသုးတၢ်သိၣ်လိ၀ံၤအလီၢ်ခံဆှၢထီၣ်၀ဲဆူခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤအဂ့ၢ်န့ၣ် ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် ကညီသးစၢ်ကရၢ(KYO)စီၤဒူဒူၤစံးဘၣ်ခ့ၣ်အဲးစံၣ်န့ၣ်လီၤႉ “ဒ်တၢ်အိၣ်သးခဲအံၤအသိးန့ၣ်ယထံၣ်လၢ (BGF)အံၤအလီၢ်အိၣ်လၢကလဲၤကရၢကရိကမျၢၢ်တဖၣ်မီၤနီၤႉဘၣ်မနုၤအဃိလဲၣ်န့ၣ်အၦၤသံလၢတၢ်မဲာ်ညါန့ၣ်အါမီၤနီၤႉမ့ဘၣ်တဲန့ၣ်ကိး၀ဲဒၣ်သူၣ်ဘီၣ်သးစၢ်ႇဒုးထီၣ်၀ဲသုးတၢ်သိၣ်လိႉတဲ၀ဲခီလၢကဘၣ်မၤလၢသ၀ီတၢ်ဘံၣ်တၢ်ဘၢအဂီၢ်လီၤႉအနီၢ်နီၢ်ခီန့ၣ်ဆှၢထီၣ်၀ဲလၢ (သုးက့ ၅)ႇ မ့၀ံၤသံဘၣ်ဒိအိၣ်မီၤနီၤႉ အ၀ဲသ့ၣ်န့ၣ်တဲ၀ဲလၢဒူသ၀ီတၢ်ဘံၣ်တၢ်ဘၢအဂီၢ်ဒီးဆှၢထီၣ်၀ဲသးစၢ်တဖၣ်ဆူတၢ်မဲာ်ညါအဃိဒူသ၀ီကမျၢၢ်တဖၣ်အတၢ်နာ်အီၣ်အ၀ဲသ့ၣ်စှၤလီၤမီၤနီၤႉလၢတၢ်န့ၣ်အဃိယဲယထံၣ်လၢအ၀ဲသ့ၣ်ဘၣ်ဟဲလီၤကရၢကရိကမျၢၢ်ဒ်အံၤလီၤ” အဂ့ၢ်န့ၣ်စံး၀ဲန့ၣ်လီၤႉ ဘၣ်ဃးတၢ်ကဒုးအိၣ်ထီၣ်သ၀ီတၢ်ဘံၣ်တၢ်ဘၢတၢ်ဂ့ၢ်အံၤန့ၣ်လီၢ်က၀ီၤကညီသူၣ်ဘီၣ်သးစၢ်တဖၣ်ဘၣ်ယိၣ်၀ဲလၢတၢ်ကထၢဆူၣ်သုးအဃိသးစၢ်တဖၣ်လဲၤထီၣ်ဃုဖံးဃုမၤတၢ်လၢကီၢ်ကၠီၣ်တဲၣ်ပူၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လါစဲးပထ့ဘၢၣ် ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢကီးတရံးကီၢ်ဆၣ် တီၤကၠၤအ့သ၀ီအပူၤ စးထီၣ်ဖဲလါစဲးပထ့ဘၢၣ် ၁၀ သီအနံၤန့ၣ် ပယီၤသုးခး၀ဲဟံၣ်လၢအနိထီၣ်မ့ၣ်အူစဲးလၢမုၢ်နၤခီတဖၣ်အဂ့ၢ်န့ၣ် လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ လၢကညီကီၢ်စဲၣ် ကီးတရံးကီၢ်ဆၣ် တီၤကၠၤအ့သ၀ီအပူၤန့ၣ် ပယီၤသုးတဟ့ၣ်အခွဲးလၢသ၀ီဖိတဖၣ်ကသူမ့ၣ်အူဘိဖးထီႇကအိးထီၣ်မ့ၣ်အူစဲးတဖၣ်ဘၣ်ဒီးဘၣ်အိၣ်လၢတၢ်ခံးကျါကိးမုၢ်နၤဒဲးဒီးဟံၣ်လၢအနိထီၣ်မ့ၣ်အူစဲးတဖၣ်တနံၤန့ၣ်ပၢၤကီၢ်သိလ့ၣ်ဟးဆှၣ်၀ဲတၢ်(၃)ဘျီ၀ံၤခးနါစိၤ၀ဲကျိအဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“စးထီၣ်ဖဲလါထီၣ်အသီ ၁၀ အနံၤန့ၣ်ဟံၣ်လၢအမၤကပီၤမ့ၣ်အူတဖၣ်န့ၣ် ပယီၤသုးခးပိၢ်ထီၣ်၀ဲဒီးကျိမီၤနီၤႉဖဲမဟါနါက့ပၢၤကီၢ်သိလ့ၣ်တခိၣ်ဟဲဆှၣ်တၢ်လၢယဟံၣ်မဲာ်ညါအိၣ်(၃)ဘျီညါႉတဲ၀ဲလၢယနိထီၣ်မ့ၣ်အူစဲးႇတဲ၀ဲလၢပၢၤကီၢ်တဲဃာ်လၢအိးထီၣ်မ့ၣ်အူစဲးတန့ၢ်ဘၣ်ႉ ဟံၣ်လၢအမ့နိထီၣ်မ့ၣ်အူစဲးတဖျၢၣ်လၢ်လၢ်န့ၣ်ပၢၤကီၢ်သိလ့ၣ်ဟဲလၢၦၤအိးထီၣ်မ့ၣ်အူစဲးအဟံၣ်ဒီးပၠးလီၤ၀ဲအစိအကမီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ လၢတီၤကၠၤအ့သ၀ီကျဲဒီတဘိန့ၣ်သုးခိးကီၢ်ဆၢ(BGF)ဆီလီၤတြဲၤအိၣ်ခိးတၢ်လီၢ်အိၣ်၀ဲ(၁၇)တီၤညါဒီး တၢ်ခးလိာ်သးကဲထီၣ်၀ဲလၢပယီၤသုးဒီးတၢ်ပၢၢ်ဆၢကရူၢ်သုးပာ်ဖှိၣ်တဖၣ်အဘၢၣ်စၢၤတလီၢ်လီၢ်အိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၄ သီအနံၤစ့ၢ်ကီး လၢကီးတရံးကီၢ်ဆၣ် တီၤကၠၤအ့သ၀ီတကပၤန့ၣ်တၢ်ဒုးကဲထီၣ်တအိၣ်၀ဲဘၣ်ဘၣ်ဆၣ်သနါက့ခီဖျိပယီၤသုးကျိဖးဒိၣ်လူၢ်လၢအိၣ်ဆီလီၤသးဖဲကီးတရံး၀့ၢ်အံၤတဖၣ်ခးလီၤကျိဖးဒိၣ်အဃိ သ၀ီပူၤဃိၣ်တဖၣ်ဟးဂူာ်ဟးဂီၤကဲထီၣ်တ့ၢ်အသးဒံးန့ၣ်လီၤႉ

လါစဲးပထ့ဘၢၣ် ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးလၢအနုာ်လီၤအိၣ်ဆီလီၤသးဖဲတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ်(ဘ၀့ၤပ့ၤ)သ၀ီပူၤတဖၣ်အံၤ ဖီၣ်က့ၤကိး၀ဲလီၢ်က၀ီၤသ၀ီဖိအဂၤ(၁၀၀)ဃၣ်ဃၣ်ဒ်တၢ်ဒီသဒၢစုက၀ဲၤအသိးန့ၢ်၀ဲတနွံလံဘၣ်ဆၣ် တုၤလၢခဲအံၤတပျၢ်လီၤ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၆ သီအနံၤန့ၣ် ပယီၤသုးဒီးဟီၣ်က၀ီၤတၢ်ဒီသဒၢကမျၢၢ်သုး(PDF)တဖၣ် အဘၢၣ်စၢၤတၢ်ခးလိာ်သးကဲထီၣ်ဖဲ(ဘ၀့ၤပ့ၤ)သ၀ီပူၤ၀ံၤအလီၢ်ခံပယီၤသုးအံၤဒ်သိးကဒီသဒၢလီၤအသးအဂီၢ် ဖီၣ်က့ၤကိး၀ဲလီၢ်က၀ီၤသ၀ီဖိအဂၤ(၁၀၀)ဃၣ်ဃၣ်အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “သ၀ီဖိလၢပယီၤသုးဖီၣ်ဃာ်၀ဲတဖၣ်န့ၣ်တၢ်တပျၢ်လီၤ၀ဲဒံးဘၣ်ႉပနၢ်ဟူလၢတၢ်မၤဒၢၣ်မၤလီၤအ၀ဲသ့ၣ်အိၣ်မီၤနီၤႉခီဖျိ(PDF)နုာ်လီၤလၢသ၀ီပူၤအါအဃိအဲၣ်ဒိးဆီၣ်တံၢ်မၤနၢၤသ၀ီမီၤနီၤႉပယီၤသုးထီၣ်ဟံန့ၢ်တၢ်ဖိတၢ်လံၤတုၤလၢဟံၣ်ပူၤညါႉတၢ်ဖိတၢ်လံၤလၢအမ့တလိၣ်လၢအ၀ဲသ့ၣ်အဂီၢ်ဘၣ်န့ၣ်မၤဟးဂီၤကွံာ်၀ဲႉမ့မ့ၢ်တၢ်ဖိတၢ်လံၤလၢအၦ့ၤဒိၣ်န့ၣ်ဟံ၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးအနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်လၢအနုာ်လီၤအိၣ်လၢသ၀ီပူၤအံၤတဖၣ်ဟးလူၤဖီၣ်၀ဲလီၢ်က၀ီၤကမျၢၢ်တဖၣ်တကးဒံးဘၣ်အမဲာ်ညါခီဖျိတၢ်ခးလိာ်သးကဲထီၣ်ဒီးဟီၣ်က၀ီၤ(PDF)တလီၢ်လီၢ်အဃိလီၢ်က၀ီၤသ၀ီဖိတဖၣ်အိၣ်လၢသ၀ီပူၤတဘူၣ်လၢၤဘၣ်ဒီးဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဟီၣ်က၀ီၤ(PDF)ၦၤကတိၤတၢ်ပၢတဂၤစံး၀ဲ“ဖဲတလါအံၤလါထီၣ် ၁ သီအခါန့ၣ်တၢ်ခးလိာ်သးကဲထီၣ်ႉ ခးလိာ်သးဒီတနံၤလီၤႉမ့၀ံၤဖဲလါထီၣ် ၆ သီနါက့တၢ်ခးလိာ်သးကဲထီၣ်ဒံးႉပယီၤသုးတဲဃာ်၀ဲလၢၦၤမ့ခးအ၀ဲသ့ၣ်န့ၣ် ကဒွဲၣ်အူအီၣ်သ၀ီဒီးကမၤသံသ၀ီဖိအဃိပဆဲးမၤတၢ်တဘၣ်နီတမံၤလၢၤဘၣ်ဒီးပဘၣ်ဟးပလဲာ်သးလီၤႉသ၀ီဖိတဖၣ်နါက့တၢ်ကီတၢ်ခဲအိၣ်လၢအီၣ်အီအိၣ်ဆိးလီၢ်ကျဲလီၤႉယအဲၣ်ဒိးဃ့ထီၣ်လၢမၤစၢၤမ့ၢ်သ့န့ၣ်မၤစၢၤသ၀ီဖိတဖၣ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ လီၢ်က၀ီၤကမျၢၢ်တနီၤလၢအဃ့ၢ်ထီၣ်တဖၣ်အံၤလဲၤစံၣ်အိၣ်၀ဲဒၣ်လၢကစၢၢ်ကလိကျါၦၢ်ပူၤဒီးကတီၢ်ခဲအံၤခီဖျိတၢ်စူၤခါအဃိတၢ်ကီတၢ်ခဲအိၣ်လၢတခိၣ်ဒုး(မိကၤ)တကးဒံးဘၣ်လၢန့ၣ်အမဲာ်ညါမ့ယံၤထီၣ်ယံၤထီၣ်န့ၣ်တၢ်ကီတၢ်ခဲကအိၣ်ထီၣ်လၢတၢ်အီၣ်တၢ်အီတကပၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

6Q3uXu3H0XU

လါစဲးပထ့ဘၢၣ် ၁၀ သီ, ၂၀၂၂ နံၣ်, ခ့ၣ်အဲးစံၣ် ဒ်သိးထံဖိကီၢ်ဖိကမျၢၢ်အတၢ်နာ်န့ၢ်ကညီဒီကလုာ်ပၢၤကီၢ်သုး(KNPF)အံၤကသ့အဂီၢ်န့ၣ် အလီၢ်အိၣ်လၢကညီပၢၤကီၢ်သုးတဖၣ်ကဘၣ်ပာ်သူူၣ်ပာ်သး၀ဲအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဟ့ၣ်သဆၣ်ထီၣ်၀ဲဖဲလါစဲးပထ့ဘၢၣ် ၉ သီလၢအလီၤဘၣ်၀ဲ(KNPF)ၦဲၤထီၣ် ၃၁ ၀ီတ၀ီအလံာ်ဟ့ၣ်ယုၢ်အပူၤန့ၣ်လီၤႉ KNPF အံၤဘၣ်တၢ်ဒုးအိၣ်ထီၣ်အီၤလၢထံဖိကီၢ်ဖိကမျၢၢ်တဖၣ်အတၢ်ဘံၣ်တၢ်ဘၢႇသဲစးတၢ်ဒိၣ်စိအဂီၢ်ဒီး ကညီဒီကလုာ်ပၢၤကီၢ်သုးအံၤအိၣ်ဒီးမူဒါဖးဒိၣ်လၢကမၤလၢၦဲၤ၀ဲကညီကလုာ်အတၢ်မိၣ်န့ၢ်သးလီဒီးကညီကလုာ်အထံရူၢ်ကီၢ်သဲးတၢ်ပညိၣ်ကွၢ်စိခီဖျိလၢပာ်ဖှိၣ်မၤသကိးတၢ်ဒီးထံဖိကီၢ်ဖိကမျၢၢ်တဖၣ်ဘူးဘူးတံၢ်တံၢ်အဂ့ၢ်န့ၣ်ခ့ၣ်အဲၣ်ယူၣ်အလံာ်ဟ့ၣ်ယုၢ်အပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါလီၢ်က၀ီၤတဖၣ်အပူၤသဲစးတၢ်ဒိၣ်စိဒီးလီၢ်က၀ီၤထံဖိကီၢ်ဖိကမျၢၢ်အတၢ်ဘံၣ်တၢ်ဘၢအဂီၢ်န့ၣ်တၢ်ပာ်ဖှိၣ်မၤသိကးဒီးတၢ်ဒိးန့ၢ်ဘၣ်ၦၤသူၣ်ဘီၣ်သးစၢ်တဖၣ်အတၢ်ဂံၢ်တၢ်ဘါႇအတၢ်ဆီၣ်ထွဲမၤစၢၤန့ၣ်မ့ၢ်တၢ်လၢအကါဒိၣ်၀ဲဒီးတၢ်အံၤအဂီၢ်တၢ်ကဘၣ်မၤဂ့ၤထီၣ်တၢ်ပာ်ဖှိၣ်မၤသကိးတၢ်ဒီးၦၤသူၣ်စၢ်သးဘီၣ်တဖၣ်ဒီးမၤဂ့ၤထီၣ်စ့ၢ်ကီးကညီဒီကလုာ်ပၢၤကီၢ်သုးတဖၣ်အဂံၢ်အစီႇတၢ်သ့ၣ်ညါနၢ်ပၢၢ်ဒီးတၢ်သ့တၢ်ဘၣ်တဖၣ်ထီဘိအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ကတီၢ်ခဲအံၤအံၤပထံၣ်ဘၣ်လၢကညီဒီကလုာ်ပၢၤကီၢ်သုးအဂံၢ်ဘါအါထီၣ်ႇပၢၤကီၢ်သုးအတၢ်ဖံးတၢ်မၤအဂံၢ်အဘါဆူၣ်ထီၣ်၀ဲဒီးပထံၣ်ဘၣ်လၢပၢၤကီၢ်သုးမုၢ်သ့ၣ်တဖၣ်အနီၣ်ဂံၢ်အါထီၣ်၀ဲတကးဒံးဘၣ်ပအဲၣ်ဒိးထံၣ်ဘၣ်အါထီၣ်ပၢၤကီၢ်ပိာ်မုၣ်တဖၣ်စးထီၣ်လၢတၢ်တီခိၣ်ရိၣ်မဲဒီးတၢ်မၤတၢ်ဆၢတဲာ်ပတီၢ်တုၤလီၤလၢတၢ်ကဲပၢၤကီၢ်ပတီၢ်မုၢ်အါထီၣ်၀ဲတုၤလၢအစှၤကတၢၢ်(၃၀)မျးကယၤအဂ့ၢ်န့ၣ် ကညီပိာ်မုၣ်ကရၢ(KWO)ဟ့ၣ်သဆၣ်ထီၣ်၀ဲလၢကညီပၢၤကီၢ်မုၢ်နံၤၦဲၤထီၣ် အပူၤန့ၣ်လီၤႉ သုးဟံးန့ၢ်တၢ်စိတၢ်ကမီၤအဃိတၢ်ဒုးတၢ်ယၤဆူၣ်ထီၣ်၀ဲလၢပထံပကီၢ်ပူၤႇတၢ်ၦ့ၤတၢ်ကလံၤဒိၣ်ထီၣ်၀ဲတုၤထံဖိကီၢ်ဖိဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲတၢ်နးတၢ်ဖှီၣ်တကးဒံးဘၣ်တၢ်ဆါကသံၣ်မူၤဘှီးႇတၢ်အီကသံၣ်မူၤဘှီးဒီးတၢ်လိာ်ကွဲတၤကျိၣ်တၤစ့အကလုာ်ကလုာ်အါထီၣ်၀ဲတုၤလၢသ၀ီသူၣ်က့သးၦၢ်သ့ၣ်တဖၣ်မၤ၀ဲတနၢၤလၢၤဘၣ်အဃိဒ်သိးသဲစးကဒိၣ်စိအဂီၢ်မူဒါအိၣ်၀ဲလၢပၢၤကီၢ်သုးအစုပူၤအသိးမ်ကညီပၢၤကီၢ်သုးမုၣ်ခွါခဲလၢာ်ကဂုာ်ကျဲးစၢးမၤအမူဒါအဂ့ၤကတၢၢ်ဒ်တၢ်ပာ်လီၤတ့ၢ်ဃာ်၀ဲအသိးအဂ့ၢ်န့ၣ်(KWO)ဟ့ၣ်သဆၣ်ထီၣ်၀ဲန့ၣ်လီၤႉ ဖဲမဟါစဲပထ့ဘၢၣ်(၉)သီအနံၤလၢအလီၤဘၣ်၀ဲကညီဒီကလုာ်ပၢၤကီၢ်သုး(KNPF)မုၢ်နံၤတၢ်ရဲၣ်တၢ်ကျဲၤအံၤ လၢကညီကီၢ်စဲၣ်တၢ်လီၢ်တနီၤအပူၤစ့ၢ်ကီးတၢ်မၤလၤကပီၤ၀ဲတၢ်ရဲၣ်တၢ်ကျဲၤအံၤတကးဒံးဘၣ်အမဲာ်ညါ လၢဒူပျာ်ယာ်ကီၢ်ရ့ၣ်အပူၤစ့ၢ်ကီးကသံၣ်မူးဘှီးဒီးဘဲထံလၣ်လၢ(KNPF)ဖီၣ်န့ၢ်၀ဲသ့ၣ်တဖၣ်အံၤတၢ်ဒွဲၣ်အူအီၣ်ကွံာ်၀ဲဖဲ တၢ်ရဲၣ်တၢ်ကျဲၤမူးအပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဒ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(၁၀)၀ီတ၀ီခီကရဲးတၢ်ဆၢတဲာ်အိၣ်၀ဲအသိးန့ၣ် ကညီဒီကလုာ်ပၢၤကီၢ်သုး(KNPF)အံၤခ့ၣ်အဲၣ်ယူၣ်လီၢ်ခၢၣ်သးစးထီၣ်ဒုးအိၣ်ထီၣ်၀ဲဖဲ(၁၉၉၁)နံၣ် လါစဲးပထ့ဘၢၣ်(၉)သီအနံၤဒီး ကတီၢ်ခဲအံၤကညီဒီကလုာ််ပၢၤကီၢ်သုးအံၤအိၣ်၀ဲလၢခ့ၣ်အဲၣ်ယူၣ် ထံလီၢ်ကီၢ်ပူၤဒီးတၢ်ဘူၣ်တၢ်ဘါ၀ဲၤကျိၤအစုတီၤဖီလာ်ဒံးန့ၣ်လီၤႉ

လါစဲးပထ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် (သုးက့ ၅) ဟီၣ်က၀ီၤအပူၤ လီၢ်က၀ီၤကမျၢၢ်တဂၤဟံးန့ၢ်အဖိခွါလၢအကဲ (BGF) သုးအံၤအကျိဒီးလဲၤဟ့ၣ်လီၤ၀ဲဆူခ့ၣ်အဲၣ်ယူၣ်အစုပူၤအဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤလါစဲးပထ့ဘၢၣ် ၉ သီအနံၤန့ၣ်လီၤႉ မးထီသ၀ီဖိစီၤမံလ့အံၤလဲၤကိးအဖိခွါလၢအကဲ (BGF) သုးအံၤကိး၀ဲတန့ၢ်ဘၣ်အဃိဟံးန့ၢ်၀ဲအဖိခွါအကျိ(၃)ခိၣ်ဒီးကျိချံတဖၣ်၀ံၤအနီၢ်ကစၢ်ဒၣ်၀ဲဟဲဟ့ၣ်လီၤ၀ဲဆူခ့ၣ်အဲၣ်ယူၣ် (သုးက့ ၅) အစုပူၤအံၤန့ၣ်လီၤႉ ကျိလၢစီၤမံလ့ဟဲဟ့ၣ်လီၤ၀ဲတဖၣ်န့ၣ်မ့ၢ်၀ဲ (AR) တခိၣ်ႇအဆၣ်ဒၢ (၁) ဘ့ၣ်ႇအချံ (၃၀) ဖျၢၣ်ႇ (G3) တခိၣ်ႇအဆၣ်ဒၢ (၂) ဘ့ၣ်ႇအချံ (၁၃၃) ဖျၢၣ်ဒီးခါဘဲတခိၣ်ႇအဆၣ်ဒၢ (၁) ဘ့ၣ်ႇအချံ(၁၅)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်အလံာ်တၢ်ပာ်အပူၤပာ်ဖျါ၀ဲန့ၣ်လီၤႉ (သုးက့ ၅) လီၢ်က၀ီၤဖိစီၤမံလ့အံၤမ့ၢ်ၦၤတဂၤလၢအနီၢ်ခိက့ၢ်ဂီၤတဂ့ၤ၀ဲဘၣ်ဆၣ် အ၀ဲမ့ၢ်ၦၤတဂၤလၢအဲၣ်ဘၣ်အထံအကီၢ်ႇအတၢ်ကရၢကရိဒီးဟ့ၣ်လီၤအသးနီၢ်နီၢ်အဃိမုၢ်တြီၢ်ကီၢ်ရ့ၣ် (သုးက့...

လါစဲးပထ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ လါအီကူးအတီၢ်ပူၤ တၢ်ဒုးကဲထီၣ်၀ဲအဘျီ(၂၀၀)ဘျဲၣ်ဒီး ဖဲန့ၣ်ပယီၤတကပၤသံ(၃၀၀)ဘျဲၣ်ႇဘၣ်ဒိ(၂၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၈ သီအနံၤန့ၣ်လီၤႉ ခ့ၣ်အဲၣ်ယူၣ်တၢ်ပၢဟီၣ်က၀ီၤသုးက့(၇)ဘ့ၣ်အကျါသုးက့(၆)ဘ့ၣ်အပူၤလါအီကူးတလါအတီၢ်ပူၤန့ၣ် သုးမီၤစိရိၤႇ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ကညီဒီကလုာ်ဂၢၤသးကရၢ(KNDO)တဖၣ်အဘၢၣ်စၢၤတၢ်ဒုးကဲထီၣ်၀ဲ(၂၆၂)ဘျီဒီးဖဲန့ၣ်ပယီၤသုးႇသုးခိးကီၢ်ဆၢ(BGF)တကပၤသံ၀ဲ(၃၃၃)ဂၤႇဘၣ်ဒိ(၂၆၁)ဂၤ အဂ့ၢ်န့ၣ်ခ့ၣ်အဲၣ်ယူၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲအသိးန့ၣ်ပယီၤသုးဒီးသုးခိးကီၢ်ဆၢ(BGF)ခးလီၤကျိဖးဒိၣ်(၃၇၃)ဖျၢၣ်ဆူကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲပူၤဒီးပယီၤသုးကဘီယူၤဟဲခးလီၤတၢ်လၢဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၁၂)ဘျီအဂ့ၢ်န့ၣ် ပာ်ဖျါ၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်သံ(၉)ဂၤႇဘၣ်ဒိ၀ဲ(၁၆)ဂၤဒီးကမျၢၢ်အဟံၣ်ဟးဂီၤ၀ဲ(၁၆)ဖျၢၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါပယီၤသုးဖီၣ်၀ဲကမျၢၢ်တဖၣ်လၢအတၢ်ကမၣ်တအိၣ်ဘၣ်ခဲလၢာ်(၉၇)ဂၤဒီးမၢကမျၢၢ်တဖၣ်လၢက၀ံန့ၢ်အ၀ဲသ့ၣ်သုးတၢ်ပီးတၢ်လီကဒုးနဲၣ်န့ၢ်အ၀ဲသ့ၣ်ကျဲအံၤအဂီၢ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ဒုးကဲထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤလါအီကူးတလါအတီၢ်ပူၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤစ့ၢ်ကီးဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၄)ဂၤဒီးဘၣ်ဒိ၀ဲ(၁၈)ဂၤအဂ့ၢ်န့ၣ်ပာ်ဖျါ၀ဲန့ၣ်လီၤႉ ဖဲအပူၤကွံာ်လါယူၤလံတလါအတီၢ်ပူၤစ့ၢ်ကီးလၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲ(၂၅၉)ဘျီဒီးဖဲန့ၣ်ပယီၤသုးတကပၤသံ၀ဲ(၃၈၆)ဂၤႇဘၣ်ဒိ၀ဲ(၂၈၀)ဂၤအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါတ့ၢ်ဃာ်၀ဲဖဲအပူၤကွံာ်လါအီကူး ၈ သီအနံၤန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်ဒုးစးထီၣ်ကဲထီၣ်၀ဲလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤတဖၣ်အပူၤဒီး ခီဖျိတၢ်ဒုးကဲထီၣ်အဃိ(သုးက့ ၆)ဘ့ၣ်အပူၤ ကမျၢၢ်တဖၣ်ဘၣ်ဃ့ၢ်မှံဟးဖျိး အနီၣ်ဂံၢ်အိၣ်လၢ(၃)အကလီၢ်ဘျဲၣ်ညါဒီး တုၤလၢခဲအံၤလီၢ်က၀ီၤကမျၢၢ်ထံဖိကီၢ်ဖိိတဖၣ် ဘၣ်ဃ့ၢ်မှံဟးဖျိး၀ဲအဖၢမုၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ