ခ့ၣ်အဲးစံၣ် – KIC News

လါစဲးပထ့ဘၢၣ် ၉ သီႇ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်၀့ၢ်(အ့ၤဒူၣ်)သ၀ီပူၤ ဖဲမဟါလါစဲးပထ့ဘၢၣ် ၈ သီ ဟါခီ ၇ နၣ်ရံၣ်ဃၣ်ဃၣ် အဆၢကတီၢ်န့ၣ် တၢ်လဲၤခးသံ၀ဲအူခွ့ၣ်လိၣ်ပၤ(၅၀)နံၣ်ဘျဲၣ်လၢအဟ့ၣ်သုးမီၤစိရိၤတၢ်ကစီၣ်လၢ အမံၤဒိၣ်အံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲ “အမံၤလၢအူခွ့ၣ်လိၣ်ပၤမီၤနီၤႉဖဲဟါခီ ၆း၄၅ မံးနံးအခါန့ၣ် အဟးထီၣ်လၢအဟံၣ်ပူၤဒီးကဘၣ်မ့ၢ်အကလဲၤလၢအဟံၣ်ကျဲခိၣ်ထိးက၀ီၤဒ့ပူၤၦၤဖး(ဒမၣ်စဲၣ်ကၠၤ)အလီၢ်န့ၣ်မီၤနီၤႉဖဲအကလဲၤအခါဆဲးကဲးတခိၣ်ဟဲနုာ်လီၤဒီးၦၤခးအီၤဒီးကျိ(၂)ထံၣ်ဘူးဘူးလီၤႉဘၣ်၀ဲဒၣ်အသးနါၦၢ်ႉၦၤခးတၢ်ဖိခီခး၀ဲ၀ံၤစံၣ်ထီၣ်တဘျီဃီလီၤႉၦၤလဲၤဆှၢအီၤလၢ(အ့ၤဒူၣ်)သိလ့ၣ်လီၢ်ဘျီကသံၣ်သရၣ်တတူၢ်လိာ်၀ဲလၢၤဘၣ်ႉအသွံၣ်လီၤအါအဃိတတုၤလၢဖၣ်အၣ်ဘၣ်သံ၀ဲလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၈ သီအနံၤန့ၣ်လီၤႉ အူခွ့ၣ်လိၣ််ပၤအံၤလၢ(အ့ၤဒူၣ်)သ၀ီပူၤန့ၣ်မ့ၢ်ၦၤမံၤဒိၣ်တဂၤလၢအဟ့ၣ်တၢ်ကစီၣ်လၢ(နအဖ)သုးပဒိၣ်ႇကီၢ်ခိၣ်အူသ့ၣ်စ့ၣ်ပၢတၢ်အစိၤတုၤဃီၤလၢသုးမီၤစိရိၤအစိၤခဲအံၤဒီးခီဖျိအ၀ဲအဃိတၢ်ဖီၣ်ချုး၀ဲသူၣ်ဘီၣ်သးစၢ်လၢအထီဒါသုးမီၤစိရိၤတဖၣ်ဒီးဘၣ်လီၤလၢဃိာ်ပူၤအိၣ်၀ဲအါအါဂီၢ်ဂီၢ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လၢန့ၣ်အမဲာ်ညါအူခွ့ၣ်လိၣ်ပၤအံၤမၤသကိးတၢ်ဒီးသုးမီၤစိရိၤလူၤဖီၣ်၀ဲ(CDM)၀ဲၤကျိၤဘၣ်ထွဲၦၤမၤတၢ်ဖိလၢအထီဒါ၀ဲသုးမီၤစိရိၤအံၤတဖၣ်ႇမၤအီၣ်စ့မၤပျံၤမၤဖုးကမျၢၢ်တဖၣ်ဒီးဟံးန့ၢ်၀ဲတၢ်ဒီသဒၢလၢသုးမီၤစိရိၤအအိၣ်ဒီးရၤလီၤဆါ၀ဲကသံၣ်မူၤဘှီးတဖၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ တၢ်လဲၤခးအူခွ့ၣ်လိၣ်ပၤကဲထီၣ်သး၀ံၤအလီၢ်ခံပယီၤသုးဒီးပၢၤကီၢ်တဖၣ်ဟဲတုၤ၀ဲဖဲတၢ်ကဲထီၣ်သးအလီၢ်ဒီး ဆီလီၤ၀ဲတြဲၤအိၣ်ခိးသမံသမိးတၢ်လီၢ်လၢ(အ့ၤဒူၣ်)သ၀ီကျဲဟးထီၣ်နုာ်တဖၣ်အဂ့ၢ်န့ၣ် လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ

လါစဲးပထ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၣ်ဆၣ်အပူၤ ပယီၤသုးလၢအိၣ်လ့က့ၣ်သုးကလၢၤလၢအကဆီတလဲအသးအံၤတဖၣ် ဖဲလါစဲးပထ့ဘၢၣ် ၆ သီအနံၤန့ၣ် ဖီၣ်က့ၤကိးသူ၀ဲဒၣ်လီၢ်က၀ီၤကမျၢၢ်(၉)ဂၤဒ်တၢ်ဒီသဒၢစုက၀ဲၤအသိးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါစဲးပထ့ဘၢၣ် ၇ သီအနံၤန့ၣ်လီၤႉ ပယီၤသုးခီၣ်ချ့သုးရ့ၣ်(ခမရ–၄၁၀)လၢအိၣ်ဆီလီၤသးဖဲလ့က့ၣ်သုးကလၢၤအံၤတဖၣ်လၢကဆီတလဲသးအဂီၢ် ဖဲအ၀ဲသ့ၣ်က့ၤလၢတၤပီသုးကလၢၤအဆၢကတီၢ်ဖီၣ်က့ၤကိး၀ဲကါမဲသ၀ီႇတၤပီၤခံသ၀ီႇနီၣ်ကတိးခံႇကၠီၣ်တီၤဒီးနိၣ်တလၤအီသ၀ီဖိ(၉)ဂၤဒီးသူ၀ဲဒ်တၢ်ဒီသဒၢစုက၀ဲၤအသိးအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လီၢ်က၀ီၤသ၀ီဖိလၢပယီၤသုးဖီၣ်က့ၤကိး၀ဲ(၉)ဂၤအံၤအကျါဖဲလါစဲးပထ့ဘၢၣ် ၆ သီအနံၤန့ၣ် တၢ်ပျၢ်လီၤက့ၤ၀ဲ(၆)ဂၤလံဘၣ်ဆၣ် သ၀ီဖိလၢအအိၣ်တ့ၢ်(၃)ဂၤန့ၣ်တၢ်တပျၢ်လီၤက့ၤ၀ဲဒံးဘၣ်ဒီး ဖဲလါစဲးပထ့ဘၢၣ် ၇ သီ မုၢ်နၤခီအဆၢကတီၢ်န့ၣ် က့ၤကိး၀ဲပှၤသ့ၣ်တဖၣ်အံၤတုၤလၢပနွဲၢ်ကျါသုးကလၢၤညါ အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤဖိတဂၤစံး၀ဲ“တၢ်တနံၤန့ၣ်အ၀ဲသ့ၣ်၀ံထီၣ်ဃၤဒီးက့ၤ၀ဲတဒူၣ်မီၤနီၤႉဖဲအ၀ဲသ့ၣ်က့ၤလၢကျဲအခါန့ၣ်ပနၢ်ဟူလၢအဖီၣ်ၦၤလီၢ်က၀ီၤသ၀ီဖိတဖၣ်မီၤနီၤႉအ၀ဲသ့ၣ်မ့က့ၤန့ၣ်တက့ၤတဘျီဃီဘၣ်က့ၤနုာ်လီၤ၀ဲဒၣ်လၢအ၀ဲသ့ၣ်သုးကလၢၤလၢအိၣ်တၢ်ဘၢၣ်စၢၤအံၤဒီးမုၢ်ဟါမးအ၀ဲသ့ၣ်ဟးထီၣ်ႉၦၤလၢတၢ်ဖီၣ်အီၤတဖၣ်အံၤကဘၣ်မ့ၢ်ပယီၤသုးထံၣ်၀ဲလၢကျဲႇဖီၣ်၀ဲလၢဒဲပူၤတဖၣ်လီၤမီၤနီၤႉပယီၤသုးကရူၢ်လၢအဂၤနါက့အီသံးဆူၣ်မးႉမ့၀ံၤအ၀ဲသ့ၣ်အခိၣ်န့ၣ် အသးတထီဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၄ သီအနံၤန့ၣ် ပယီၤသုးလၢအိၣ်လ့က့ၣ်သုးကလၢၤတဖၣ်အံၤမူၤထီၣ်သံးဒီး နုာ်လီၤလၢသ၀ီပူၤခးနါစိၤကျိႇဆိၣ်ထု၀ဲလီၢ်က၀ီၤသ၀ီဖိတဖၣ်အသိးခီဖျိအ၀ဲသ့ၣ်ခးတပျုာ်တပျီာ်ကျိအဃိဘၣ်၀ဲဒၣ်ၦၤဟံၣ်အိၣ်၀ဲအဂ့ၢ်န့ၣ် လီၢ်က၀ီၤဖိိတဖၣ်စံး၀ဲန့ၣ်လီၤႉ ပယီၤသုးလၢအိၣ်ဆီလီၤသးဖဲလ့က့ၣ်သုးကလၢၤအံၤတဖၣ်ဖဲအပူၤကွံာ်လါစဲးပထ့ဘၢၣ် ၁ သီအနံၤစ့ၢ်ကီး...

လါစဲးပထ့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်အဃၢၤ အ့ရှါကျဲမုၢ်ကပၤကီးနွဲၢ်သ၀ီဒီးအီကြီသ၀ီတဖၣ်အပူၤန့ၣ် ဖဲလါစဲးပထ့ဘၢၣ် ၆ သီ ဟါခီအဆၢကတီၢ် ပယီၤသုးလၢအဟးဆှၣ်တၢ်သ့ၣ်တဖၣ်အံၤ နုာ်လီၤမၤဖျိသ၀ီဖိတဖၣ်အဟံၣ်ဒီး က့ၤစိာ်ဟုၣ်၀ဲၦၤတၢ်ဖိတၢ်လံၤတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲလါစဲးပထ့ဘၢၣ် ၆ သီ ဂီၤခီအဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ်နုာ်လီၤခးပယီၤသုးတြဲၤအိၣ်ခိးတၢ်လီၢ်တခါလၢအအိၣ်ခိးထၢစ့အံၤကဲထီၣ်သး၀ံၤအလီၢ်ခံ ဖဲပယီၤသုးနုာ်လီၤမၤရှဲတၢ်လၢကီးနွဲၢ်ဒီးအီကြီသ၀ီပူၤအခါခီဖျိတၢ်ဒုးကဲထီၣ်အဃိသ၀ီခံဖျၢၣ်အံၤသ၀ီဖိ စံၣ်ထီၣ်အလီၢ်ခံပယီၤသုးနုာ်လီၤတီၢ်လီၤၦီၢ်ကွံာ်ၦၤဟံၣ်သီး၀ံၤဟံးန့ၢ်က့ၤစိာ်၀ဲတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်တဖၣ်အဂ့ၢ်န့ၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ပယီၤသုးအိၣ်လၢသ၀ီပူၤအံၤန့ၢ်လၢအလါလံႉအိၣ်လၢသ၀ီအခိၣ်အဃၢၤလီၤႉဖဲ ၆ သီဟါခီန့ၣ်ဟဲနုာ်လီၤလၢသ၀ီပူၤႉပယီၤသုးနုာ်လီၤဟံးန့ၢ်ပာ်စၢၤအလီၢ်လၢကီးနွဲၢ်ဒီးအီကြီသ၀ီပူၤနါက့ အိၣ်မီၤနီၤႉပယီၤသုးလၢအဟးဆှၣ်တၢ်တဖၣ်အံၤနုာ်လီၤလၢသ၀ီပူၤဟံၣ်လၢအကစၢ်တအိၣ်ဘၣ်တဖၣ်န့ၣ်တီၢ်မၤဂီၤကွံာ်ဟံၣ်သီး၀ံၤက့ၤစိာ်၀ဲၦၤတၢ်ဖိတၢ်လံၤႇတၢ်ကူတၢ်ကၤႇထူစ့တဖၣ်ခဲလၢာ်လီၤႉတၢ်ဒုးကဲထီၣ်မးဟးလူၤဟုၣ်၀ဲတမ့ၢ်ဘၣ်ႉတၢ်ဒုးတကဲထီၣ်ဘၣ်နါက့ဟးနုာ်လီၤဟံးတၢ်လၢၦၤဟံၣ်ပူၤလီၤ” အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၅ သီအနံၤစ့ၢ်ကီး ပယီၤသုးမီၤစိရိၤအကျိဖးဒိၣ်လူၢ်လၢအိၣ်ကီးတရံး၀့ၢ်အံၤတဖၣ် ခးလီၤကျိဖးဒိၣ်ဆူကီးနွဲၢ်သ၀ီႇအီကြီႇတီၤကၠၤအ့ႇထံမူထၣ်သ၀ီတဖၣ်အပူၤအဃိလီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီးတုၤလၢခဲအံၤက့ၤအိၣ်လၢသ၀ီပူၤတဘူၣ်ဒံးဘၣ်အဂ့ၢ်န့ၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ပယီၤသုးလၢအိၣ်ကီးတရံးကျိဖးဒိၣ်သုးကလၢၤအံၤတဖၣ်ခးလီၤကျိဖးဒိၣ်လၢသ၀ီပူၤမီၤနီၤႉသုးကလၢၤ၀ဲန့ၣ်အိၣ်လၢ(လဲၤ၀ၣ်)မီၤနီၤႉခးလီၤတၢ်အါကတၢၢ်န့ၣ်တၢ်တခါန့ၣ်လီၤႉဘၣ်ကျီၢ်ႇဘၣ်ဟံၣ်လီၢ််ၦီၢ်ႉကဲထီၣ်သးဒ်အံၤအဃိၦၤလၢအအိၣ်ဘူၣ်တဖၣ်န့ၣ်အိၣ်လၢသ၀ီပူၤလီၤႉတနီၤခီဒုအိၣ်တဘူၣ်ဘၣ်အဃိဟးစံၣ်အိၣ်လၢတၢ်လီၢ်အဂၤလီၤႉမ့မ့ၢ်အီကြီသ၀ီခီန့ၣ်ၦၤဃ့ၢ်ထီၣ်သ၀ီဒီတဖျၢၣ်ညါလီၤႉတၢ်ဒုးမ့ကဲထီၣ်န့ၣ်ဘၣ်အါလၢအီကြီမီၤနီၤႇသ၀ီဖိလၢအလဲၤအိၣ်လၢသီခါဖၠၣ်နါက့အိၣ်စ့ၢ်လီၤ” အဂ့ၢ်န့ၣ်စံးအါထီၣ်၀ဲန့ၣ်လီၤႉ လၢကီးတရံးကီၢ်ဆၣ်အပူၤန့ၣ်ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်ဒီးပယီၤသုးတဖၣ်တၢ်ဒုးမ့တကဲထီၣ်ဘၣ်ဆၣ်သနါက့ခးလီၤ၀ဲကျိဖးဒိၣ်တဖၣ်ဆူသ၀ီတဖၣ်အပူၤကိးမုုၢ်နၤဒဲးအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ဒ်န့ၣ်အသိးတၢ်လီၢ်လၢတၢ်ဒုးကဲထီၣ်လၢဟီၣ်က၀ီၤပူၤအဂၤတဖၣ်စ့ၢ်ကီးခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်ဒီးဖဲကမျၢၢ်ဃ့ၢ်ထီၣ်အလီၢ်ခံပယီၤသုးတဖၣ်နုာ်လီၤၦၤဟံၣ်ပူၤက့ၤစိာ်၀ဲလီၢ်က၀ီၤကမျၢၢ်အတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်တဖၣ်တကးဒံးဘၣ်ဒွဲၣ်အူအီၣ်ကွံာ်ဟံၣ်ဃီတဖၣ်အိၣ်၀ဲအဂ့ၢ်န့ၣ်တၢ်ကစီၣ်သန့လၢအိၣ်ဟီၣ်က၀ီၤအပူၤတဖၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါစဲးပထ့ဘၢၣ် ၄ သီအနံၤန့ၣ် တၢ်ဖီၣ်န့ၢ်၀ဲသုးမီၤစိရိၤအၦၤသုးဖိ(၈)ဂၤလၢတလၢၤကီၢ်စဲၣ် သၤဖၠူၤစယၣ်–ယ့ကျဲတၢ်လီၢ်တတီၤဒီးၦၤသ့ၣ်တဖၣ်အံၤတၢ်ပၢၤဃာ်အ၀ဲသ့ၣ်ဒ်သုးတၢ်သိၣ်တၢ်သီအိၣ် အသိးအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်အနဲၣ်ရွဲၣ် ပဒိၣ်စီၤလ့စတၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုုးဖိတဖၣ်အံၤထီၣ်၀ဲတၢ်သိၣ်လိလၢပကိကီၢ်ခီဒိၣ်ႇယ့ၤနံၤကီၢ်ဆၣ်နီၣ်ဂံၢ်(၅)ဂံၢ်ခီၣ်ထံးသုးတၢ်သိၣ်လိသုးတၢ်လီၢ်ဒီး လၢကလဲၤလီၤက့ၤမူဒါဆူတလၢၤကီၢ်စဲၣ်ႇယ့ကီၢ်ဆၣ်(အၤယူၣ်တိၤ)သ၀ီပူၤ ခီၣ်ချ့သုးရ့ၣ်(ခမရ–၃၄၃)အအိၣ်အဂီၢ် ဖဲအဟဲလၢကျဲအခါ ခ့ၣ်အဲၣ်ယူၣ်(သုးက့ ၆)ဒီးသုးပာ်ဖှိၣ်ကရူၢ်ဖီၣ်ချုးအ၀ဲသ့ၣ်ဖဲ သၤဖၠူၤစယၣ်–ယ့ကျဲတၢ်လီၢ်တတီၤန့ၣ်လီၤႉ ပယီၤသုးလၢတၢ်ဖီၣ်ချုးတဖၣ်မ့ၢ်၀ဲသုးဖိစ့ၤမိအီၣ်ႇမီၤမီၤထွ့ႇကၠီၤမ့ခၣ်ႇပၠ့ၣ်စိၣ်အူႇပၠ့ၣ်ဖၠိအီၣ်ႇ စံၣ်သူၣ်ထဲၣ်ႇထဲၣ်စီၣ်ဒီး(ခမရ–၃၄၃)ပတြီာ်သုးခိၣ်ဖိလၣ်တ့ၤလၢအဟဲစိၢ်သုးဖိသ့ၣ်တဖၣ်အံၤန့ၣ်လီၤႉ ဒူပျာ်ယာ်ကီၢ်ရ့ၣ်(သုးက့ ၆)အနဲၣ်ရွဲၣ် ပဒိၣ်စီၤလ့စတၣ်စံး၀ဲ“ဒ်ပယီၤသုးကမၣ်အသိးန့ၣ်ပမၤပိာ်အခံ တန့ၢ်ဘၣ်ႉတၢ်တဘၣ်ဘၣ်န့ၣ်ပထိၣ်သတြီၤအီၤဒီးတၢ်တဘၣ်ဘၣ်တသ့ဘၣ်ႉဒ်ပၦၤအီၣ်ဘၣ်အသိးန့ၣ်အ၀ဲသ့ၣ်အီၣ်ဘၣ်လီၤႉဒ်သုးတၢ်သိၣ်တၢ်သီအိၣ်အသိးန့ၣ်ပပၢၤဃာ်အ၀ဲသ့ၣ်ဂ့ၤဂ့ၤလီၤႉခ့ၣ်အဲၣ်ယူၣ်အံၤလၢတၢ်လဲၤကျဲအတၢ်ပညိၣ်အပူၤန့ၣ်ကဟးမၤဟးဂီၤဒူသ၀ီႇကဒွဲၣ်အူဒူသ၀ီႇကမၤသံၦၤကညီဒ်သိးပယီၤန့ၣ်နပြၢဒီးအ၀ဲသ့ၣ်တန့ၢ်ဘၣ်မီၤနီၤႉပလဲၤဒ်တၢ်သိၣ်တၢ်သီတၢ်ဘျၢအိၣ်အသိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါစဲးပထ့ဘၢၣ် ၇ သီအနံၤန့ၣ်လီၤႉ လၢန့ၣ်အမဲာ်ညါပယီၤသုး(၈)ဂၤလၢတၢ်ဖီၣ်န့ၢ်၀ဲအံၤတဖၣ်အတၢ်အိၣ်သးလီၤတံၢ်လီၤဆဲးအံၤစ့ၢ်ကီး တၢ်ကဟ့ၣ်ဒုးသ့ၣ်ညါ၀ဲဆူဟီၣ်ခိၣ်ဒီဘ့ၣ်ဂာ်တဲာ်ဂီၤကမံးတံာ်(ကြက်ေခြနီ-ICRC)အအိၣ်အဂ့ၢ်န့ၣ် ပဒိၣ်စီၤလ့စတၣ်စံးအါထီၣ်၀ဲန့ၣ်လီၤႉ ပတြီာ်သုးခိၣ်ဖိလၣ်တ့ၤလၢတၢ်ဖီၣ်ချုး၀ဲအံၤစ့ၢ်ကီးစံး၀ဲ“ဖဲယလဲၤကိးၦၤထီၣ်တၢ်သိၣ်လိဖိဟဲက့ၤလၢကျဲအခါၦၤဖီၣ်ချုးၦၤမီၤနီၤႉၦၤသုးဖိလၢအိၣ်တၢ်ဖီလာ်တဖၣ်အံၤလ့ၤတက့ၤတတူၢ်လိာ်၀ဲသုးဟံးန့ၢ်တၢ်စိတၢ်ကမီၤအံၤဘၣ်မီၤနီၤႉခီဖျိဟံၣ်ဖိဃီဖိတၢ်အိၣ်သးဒီးသးၦၢ်ညါအိၣ်ထီၣ်အဃိအိၣ်ခိးမုၢ်လၢ်၀ဲ(ပင်စင်)ဒီးဆဲးအိၣ်၀ဲလၢသုးပူၤလီၤႉ ၦၤဖီၣ်ၦၤနါက့ၦၤပာ်ၦၤဂ့ၤဂ့ၤခဲလၢာ်လီၤ”အဂ့ၢ်န့ၣ်စံး၀ဲန့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံခီဖျိသုးမီၤစိရိၤအၦၤသုးဖိတဖၣ်တအဲၣ်ဒိးဆဲးမၤတၢ်သုးပူၤလၢၤဘၣ်ဒီးစံၣ်ဖျိးထီၣ်ကွံာ်တကးဒံးဘၣ်သံလၢတၢ်ဒုးပူၤစ့ၢ်ကီးအိၣ်အဃိလၢတၢ်မၤလၢၦဲၤသုးဖိအတၢ်လိၣ်ဘၣ်အံၤအဂီၢ်န့ၣ်အ၀ဲသ့ၣ်ကိး၀ဲတၢ်အိၣ်ဖှိၣ်စံးလီၤ၀ဲလၢၦၤလၢအမၤကမၣ်တၢ်သ့ၣ်တဖၣ်န့ၣ်ကပျၢၢ်၀ဲတၢ်ကမၣ်အဂ့ၢ်န့ၣ် ပယီၤသုးလၢတၢ်ဖီၣ်ချုး၀ဲတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ပယီၤသုးလၢအဟဲနုာ်လီၤမၤတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီပူၤအံၤတဖၣ်ဒီး တၢ်ပၢၢ်ဆၢသုးပာ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်ဒံး၀ဲတပယူာ်ဃီဒီး ပယီၤသုးလၢတၢ်ဖီၣ်န့ၢ်အီၤလၢတၢ်ဒုးပျီပူၤအိၣ်၀ဲအဂၤ(၃၀)ဃၣ်ဃၣ်ညါဒီး ၦၤသ့ၣ်တဖၣ်အံၤတၢ်ပၢၤဃာ်အ၀ဲသ့ၣ် ဂ့ၤဂ့ၤလီၤဒီးကလဲၤဒ်ကရူၢ်တၢ်သိၣ်တၢ်သီတၢ်ဘျၢအိၣ်အသိးလီၤအဂ့ၢ်န့ၣ်ခ့ၣ်အဲၣ်ယူၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လါစဲးပထ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါစဲးပထ့ဘၢၣ် ၆ သီ မုၢ်နၤခီ အဆၢကတီၢ်န့ၣ် တၢ်လဲၤခးဘၣ်၀ဲတၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိစီၤစတံအဟံၣ်လၢ(ဒြိ)ဖဲဆိၣ်စံမၠဲၣ်သ၀ီပူၤအဂ့ၢ်န့ၣ် (DKBA)သုးခိၣ်လၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ အ၀ဲစံး၀ဲလၢ "အမ့ၢ်လီၤ ပှၤဟဲခး၀ဲန့ၣ်ဘၣ်ဖဲမုၢ်နၤခီ ၁၂ နၣ်ရံၣ်ဘျဲၣ်န့ၣ်မီၤနီၤႉဘၣ်၀ဲဒၣ်အဟံၣ်မဲာ်ညါတစဲးမီၤနီၤႉ ဘၣ်ၦၤကညီဒုတအိၣ်ဘၣ်ႉတၢ်ဂ့ၢ်န့ၣ်ကဘၣ်မ့ၢ်အပာ်ပယီၤသုးလၢအဟုသး(ကိၤဒီၤ)လီၢ်အဃိတၢ်ဟဲခး၀ဲဒ်အံၤလီၤ”အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါအီကူးအတီၢ်ပူၤဂီၤလ့ၤသုးမီၤစိရိၤအသုးကျိၤ(၂)ကျိၤအံၤနုာ်လီၤအိၣ်၀ဲဒၣ်လၢ(DKBA)ဟီၣ်က၀ီၤ၀ၣ်မံၤထၣ်ႇအုကြ့ၣ်ထၣ်ႇသ့ၣ်ဘီဘိႇလ့ဂီၤႇဆိၣ်စံမၠဲၣ်တၢ်လီၢ်ဒီးလၢကလုၢ်ဘၢဒိၣ်စိ၀ဲဆိၣ်စံမၠဲၣ်–ဂီၤလ့ၤကျဲအံၤအဖီခိၣ် ဖဲမဟါလါစဲးပထ့ဘၢၣ် ၆ သီအနံၤန့ၣ် တၢ်ဒုးစးထီၣ်ကဲထီၣ်၀ဲဒီး(KNLA)သုးပာ်ဖှိၣ်တဖၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ (KNLA)ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤစံး၀ဲ“စးထီၣ်လၢအူကြ့ၣ်ထၣ်တၢ်ဒုး၀ံၤန့ၣ်ဂီၤလ့ၤသုးမီၤစိရိၤအသုးကျိၤ(၂)ကျိၤဟဲထီၣ်၀ဲလၢသ့ၣ်ဘီဘိႇ၀ၣ်မံၤထၣ်သ၀ီတကပၤဒီးဖဲန့ၣ်နုာ်လီၤဟံးန့ၢ်အလီၢ်လၢ(DKBA)ဆိၣ်စံမၠဲၣ်တၢ်လီၢ်အါအါဂီၢ်ဂီၢ်ဒီးကးတံၢ်ဃာ်၀ဲကျဲဒီတဘိန့ၣ်န့ၢ်ဖးယံၤလံမီၤနီၤႉခဲအံၤလၢလ့ဂီၤကစၢၢ်ကျဲနါက့ပံးကဒီး၀ဲဒီးသုးကျိၤဟဲထီၣ်အဃိတၢ်ဒုးကဲထီၣ်မီၤနီၤႉလၢ(သုးက့ ၆)ဟီၣ်က၀ီၤအပူၤဒုတၢ်ဒုးကဲထီၣ်တၢ်လီၢ်ကိးတီၤဒဲးလီၤႉ ကဘီယူၤဟဲဆှၣ်တၢ်ဒုအိၣ်ႇ ဟဲတ့ၢ်လီၤမ့ၣ်ပိၢ်ဒုတအိၣ်ဒံးဘၣ်ႉပယီၤသုးလၢအိၣ်ဆိၣ်စံမၠဲၣ်တကပၤန့ၣ်ခးလီၤ၀ဲကျိဖးဒိၣ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ လၢမၠၣ်၀တံၣ်ကလံၤထံး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုး၀ဲၤလီၢ်ခိၣ်သ့ၣ် ဆိၣ်စံမၠဲၣ်ဒီးလ့ဂီၤသ၀ီကျဲန့ၣ် ဖဲမဟါလါစဲးပထ့ဘၢၣ် ၆ သီ တုၤလၢတနံၤအံၤ ၇ သီ ဂီၤခီန့ၣ် တၢ်ခးလိာ်သးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤအဃိ ဘၣ်ယိၣ်လၢသုးမီၤစိရိၤကဘီယူၤကဟဲတ့ၢ်လီၤမ့ၣ်ပိၢ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ “စှၤသီအတီၢ်ပူၤအံၤပယီၤသုးဟး၀့ၤ၀ီၤလၢအံၤလၢန့ၣ်ဟဲအါထီၣ်မီၤနီၤႉစးထီၣ်ဖဲမဟါမုၢ်နၤခီန့ၣ်ပယီၤသုးခးလီၤကျိဖးဒိၣ်လၢလ့ဂီၤတကပၤန့ၣ်ႉကျိဖိကလုၢ်နါက့ပနၢ်ဟူစ့ၢ်ႉဖဲတဂီၤညါအံၤနါက့ခးလီၤကဒီး၀ဲႉ၀ၣ်မံၤထၣ်ႇလ့ဂီၤႇလၢၢ်ဃီၤသ၀ီတဖၣ်န့ၣ်အိၣ်ကတီၤထီၣ်သးလၢကလဲၤစံၣ်အိၣ်လၢသူမှဲကျိကၢၢ်ခိၣ်ႇကလဲၤခီလၢယိၤကီၢ်တကပၤန့ၣ်မီၤနီၤႉမ့မ့ၢ်ယၤဒုယကလဲၤအိၣ်က့ၤလၢဂီၤလ့ၤက၀ီၤဒ့တကပၤမီၤနီၤႉအ၀ဲသ့ၣ်မ့ဟဲခးလီၤတၢ်ဒီးကဘီယူၤဒုမ့တဘၣ်ၦၤကညီဘၣ်ဒုဘၣ်ႉမ့တဘၣ်ဘၣ်ဒုကဘၣ်ဟံၣ်ကဘၣ်သီခါဖၠၣ်လီၤအဃိပဟးစံၣ်အိၣ်ဆိပာ်မီၤနီၤ”အဂ့ၢ်န့ၣ်ၦၤလၢအိၣ်လၢၢ်ဃီၤသ၀ီလီၢ်အိၣ်ကဒုလီၢ်အံၤစံး၀ဲန့ၣ်လီၤႉ ခီဖျိပယီၤသုးနုာ်လီၤမၤသုးတၢ်ဟူးတၢ်ဂဲၤလၢခ့ၣ်အဲၣ်ယူၣ်(သုးက့...

လါစဲးပထ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် ၦၤလၢအိၣ်ကီၢ်စဲၣ်ဒီးကီၢ်ခီဒိၣ်တၢ်လီၢ်လၢအဂၤလၢအဟဲအိၣ်ဆိးဖဲဖၣ်အၣ်ကီၢ်ဆၣ်အပူၤတဖၣ်အံၤပယီၤသုးမီၤစိရိၤအသ၀ီသးၦၢ်ဃ့၀ဲၦၤသ့ၣ်တဖၣ်အံၤလၢပၢကီၢ်ဒီးပၢပြးအလံာ်အုၣ်သးလၢအ၀ဲသ့ၣ်နီၢ်ကစၢ်အိၣ်တၢ်လီၢ်အဃိထံၣ်ဘၣ်တၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါအီကူး ၃၀ သီအနံၤန့ၣ် လၢဖၣ်အၣ်ကီၢ်ဆၣ် ဖအိၤသ၀ီႇဖါကၣ်ဒီးမ့မလၣ်ကၠိသ၀ီကရူၢ်အပူၤ သုးမီၤစိရိၤအသ၀ီသးၦၢ်လၢအမ့ၢ်အူအီၤခ့ၤအံၤကိးအိၣ်ဖှိၣ်၀ဲသ၀ီကရူၢ်ဖဲန့ၣ်အပူၤလီၢ်က၀ီၤကမျၢၢ်တဖၣ်ဒီးဃ့၀ဲလံာ်အုၣ်သးအံၤလီၤအဂ့ၢ်န့ၣ်ၦၤလၢအဟဲအိၣ်ဆိးသုးလီၢ်တဖၣ်စံး၀ဲန့ၣ်လီၤႉ လံာ်အုၣ်သးလၢသုးမီၤစိရိၤအၦၤဘၣ်မူဘၣ်ဒါဃ့၀ဲတဖၣ်အံၤတၢ်ကီတၢ်ခဲအိၣ်လၢကက့ၤထုးထီၣ်လၢနီၢ်ကစၢ်လီၢ်ကျဲအဃိ ဘၣ်အိၣ်လၢတၢ်ကိၢ်တၢ်ဂီၤတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် ၦၤလၢအိၣ်ဟဲသုးလီၢ်လၢတၢ်လီၢ်အဂၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဟီၣ်က၀ီၤပူၤတၢ်မုာ်တၢ်ခုၣ်တအိၣ်ဘၣ်အဃိကဘၣ်က့ၤဒ်လဲၣ်တသ့ၣ်ညါလၢၤဘၣ်ႉမ့ၢ်ကဟဲပိာ်ထွဲထီၣ်အခံဒ်လဲၣ်န့ၣ်ဘၣ်ကိၢ်ဘၣ်ဂီၤဒိၣ်မးလီၤႉတၢ်ဂ့ၢ်တခါအံၤမ့ၢ်ဘၣ်လဲၤအါကိမတဂၤလဲၣ်မးတသ့ၣ်ညါလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လံာ်အုၣ်သး၀ဲအံၤန့ၣ်မ့ၢ်လံာ်အုၣ်သးတၢ်လီၢ်လၢပအိၣ်တ့ၢ်ဃာ်ပဂ့ၢ်ကျိၤလီၢ်ခံဆှဲ၀ဲအသိး ကဘၣ်မ့ၢ်၀ဲပၢၤကီၢ်ဒီးသ၀ီသးၦၢ်အလံာ်အုၣ်သးစ့ၢ်ကီးလီၤန့ၣ်သ၀ီသးၦၢ်စံးလီၤ၀ဲလၢတၢ်အိၣ်ဖှိၣ်ပူၤအဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ “ဃ့၀ဲဒၣ်ၦၤလၢအဟဲအိၣ်ဖဲအံၤခဲလၢာ်လၢပၢၤကီၢ်ဒီးသ၀ီသးၦၢ်အလံာ်အုၣ်သးမီၤနီၤႉတဲ၀ဲဒၣ်လၢလံာ်အုၣ်သးအံၤမ့ၢ်လံာ်အုၣ်သးလၢလီၢ်ခံဆှဲတဲ၀ဲဒ်န့ၣ်ႉမ့မ့ၢ်ဟံၣ်ခိၣ်စရီန့ၣ်အတတူၢ်လိာ်၀ဲဘၣ်ႉၦၤလၢအတၢ်တအိၣ်ဘၣ်တဖၣ်န့ၣ်မၢအက့ၤမၤ၀ဲလၢအဟီၣ်က၀ီၤဒီးမ့၀ံၤကဘၣ်ဟဲက့ၤဟ့ၣ်လံာ်အုၣ်သးအံၤလၢအအိၣ်န့ၣ်တဲလီၤ၀ဲလၢတၢ်အိၣ်ဖှိၣ်အပူၤ”အဂ့ၢ်န့ၣ်အ၀ဲစံး၀ဲန့ၣ်လီၤႉ ဘၣ်ဃးတၢ်ဃ့လံာ်အုၣ်သးတၢ်ဂ့ၢ်အံၤကဘၣ်ထွဲလိာ်အသးဒီးဖဲအပူၤကွံာ်လါအီကူးသၢနွံတနွံအခါၦၤအိၣ်တဒူၣ်ဟဲခး၀ဲဖၣ်အၣ်ကီၢ်ဆၣ်(မကၠံကၠိ)သ၀ီသးၦၢ်တၢ်ဂ့ၢ်အံၤအဂ့ၢ်န့ၣ်လီၢ်က၀ီၤဖိတဖၣ်ပဲာ်ထံနီၤဖးစံး၀ဲန့ၣ်လီၤႉ လၢအပူၤကွံာ်ကီၢ်ခိၣ်အူသ့စ့ၣ်ပဒိၣ်ပၢတၢ်အစိၤအခါစ့ၢ်ကီးၦၤအိၣ်တၢ်လီၢ်လၢအဂၤလၢဟဲအိၣ်သ၀ီဖဲန့ၣ်အပူၤတဖၣ်သ၀ီသးၦၢ်ဃ့အ၀ဲသ့ၣ်လံာ်အုၣ်သးဒ်အံၤအိၣ်၀ဲစ့ၢ်ကီးန့ၣ်လီၤႉ

လါစဲးပထ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲအပူၤကွံာ်လါအီကူးတၢ်ဒုးကဲထီၣ်တလါအတီၢ်ပူၤပယီၤသုးဒီး(BGF)သုးသံ ၈၄ ဂၤဒီးဘၣ်ဒိ ၄၇ ဂၤအဂ့ၢ်န့ၣ် ခ့ၣ်အဲၣ်ယူၣ်–မုၢ်တြီၢ်ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၅ သီအနံၤန့ၣ်လီၤႉ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤလါအီကူးတလါအတီၢ်ပူၤပယီၤသုးႇသုးခိးကီၢ်ဆၢ(BGF)ဒီး ဟီၣ်က၀ီၤကညီဒီကလုာ်တၢ်ထူၣ်ဖျဲးသုုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲ(၁၁၈)ဘျီဒီးဖဲန့ၣ်ပယီၤသုးတကပၤသံ(၄၈)ဂၤအကျါပၣ်ဃုာ်၀ဲသုးစကီၤဖိတဂၤဒီးၦၤသံအါဒၣ်တက့ၢ်န့ၣ်မ့ၢ်၀ဲ(BGF)သုးလီၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဟီၣ်က၀ီၤ(KNLA)အၦၤမၤဟးဂီၤကွံာ်သုးမီၤစိရိၤအ၀ံစိာ်တီဆှၢကျဲဒ်အမ့ၢ်တိၤတဘိအဂ့ၢ်န့ၣ် မုၢ်တြီၢ်ကီၢ်ရ့ၣ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်(၃)ဘျီအဃိကမျၢၢ်သံ(၁)ဂၤႇဘၣ်ဒိ၀ဲ(၅)ဂၤဒီး ဟံၣ်ဟးဂီၤ၀ဲ(၂၄)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါယူၤလံအခါစ့ၢ်ကီးခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ တၢ်ဒုးကဲထီၣ်၀ဲ(၁၁၀)ဘျီဒီးဖဲန့ၣ်ပယီၤသုးႇသုးခိးကီၢ်ဆၢ(BGF)တကပၤသံ၀ဲ(၈၈)ဂၤႇဘၣ်ဒိ၀ဲ(၅၇)ဂၤဒီးမ့မ့ၢ်(KNLA)တကပၤဘၣ်ဒိ၀ဲ(၉)ဂၤအဂ့ၢ်န့ၣ် အပူၤကွံာ်တလါလံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်လၢလါအီကူးအတီၢ်ပူၤန့ၣ်ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်- KNNLA(သုးက့ ၅)တကပၤ ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁)ဂၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

လါစဲးပထ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါစဲးပထ့ဘၢၣ် ၅ သီ ဟါခီ ၆း၁၅ မံးနံးအဆၢကတီၢ်န့ၣ် လၢကီးတရံး၀့ၢ် အ့ရှါကျဲမုၢ်ဖီခိၣ် သုးခိးကီၢ်ဆၢ(BGF)ဒီးပယီၤသုးခးကမၣ်လိာ်သးကဲထီၣ်အဃိ ကီးနွဲၢ်သ၀ီပူၤဟံၣ်ဃီဟးဂီၤဒီးကျီၢ် တဖၣ်သံဘၣ်ဒိဘၣ်ထံး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ပယီၤသုးလၢအိၣ်ဆီလီၤသးဖဲ(ဒီနၣ်လ့)ဒီးကီးနွဲၢ်တိၤတၢ်လီၢ်ခံတီၤအံၤတဖၣ် ခးကမၣ်၀ဲသုးခိးကီၢ်ဆၢ(BGF)သုးလၢအိၣ်ကီးတရံး၀့ၢ်ကက့ၤထီၣ်ဆူ(တတါကူ)အံၤဒီး ခီဖျိပယီၤသုးခးကျိဖးဒိၣ်အဃိကီးနွဲၢ်သ၀ီဟံၣ်ဟးဂီၤ၀ဲတဖျၢၣ်ဒီးကျီၢ်ဘၣ်ဒိဘၣ်ထံးသံ၀ဲ(၈)ဒုအဂ့ၢ်န့ၣ်သ့ၣ်ညါဘၣ်န့ၣ်လီၤႉ “ကျီၢ်လၢအဘၣ်(၈)ဒုန့ၣ်ဆါကွံာ်၀ဲခဲလၢာ်လံႉကျီၢ်(၈)ဒုမးန့ၢ်၀ဲ(၁၃)ကလီၢ်ကၠးလီၤႉကျီၢ်မ့တဘၣ်နီတမံၤဘၣ်န့ၣ်(၈)ဒုန့ၣ်ကန့ၢ်အကလီၢ်(၄၀)ဘျဲၣ်ညါႉခဲအံၤဖဲကန့ၢ်န့ၣ်ဆါကွံာ်၀ဲလံ”အဂ့ၢ်န့ၣ်ၦၤလၢအသ့ၣ်ညါလိာ်သးဒီးကျီၢ်ကစၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ခီဖျိကျိဖးဒိၣ်အဃိလီၢ်က၀ီၤကမျၢၢ်ဟံၣ်လၢအဟးဂီၤတဖျၢၣ်အံၤအကစၢ်လဲၤမၤတၢ်လၢကီၢ်ကၠီၣ်တဲၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါတချုးလၢတၢ်ခးလိာ်သးကဲထီၣ်ဒံးဘၣ်န့ၣ်သုးခိးကီၢ်ဆၢ(BGF)သုးကက့ၤနုာ်လီၤ၀ဲဒီးသိလ့ၣ်လၢကီးတရံး၀့ၢ်ပူၤဒီးဖဲန့ၣ်ခီဖျိပယီၤသုးကးတံၢ်ဃာ်၀့ၢ်ပူၤကျဲနုာ်လီၤဟးထီၣ်အဃိက့ၤနုာ်လီၤလၢ၀့ၢ်ပူၤတန့ၢ်ဘၣ်ဒီးနီထီၣ်သိလ့ၣ်က့ၤ၀ဲကျဲအဂၤဒီးဖဲန့ၣ်တၢ်ခးလိာ်သးကဲထီၣ်၀ဲလီၤအဂ့ၢ်န့ၣ်ၦၤလၢထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ “(BGF)ကနုာ်လီၤလၢ၀့ၢ်ပူၤအဂီၢ်န့ၣ်မၢတၢ်အိးထီၣ်န့ၢ်၀ဲကျဲမီၤနီၤႉပယီၤသုးခီတအိးထီၣ်န့ၢ်၀ဲဘၣ်ႉ၀ံၤဘျီပနၢ်ဟူလၢအတဲအါလိာ်သးႉမ့၀ံၤ(BGF)နီထီၣ်သိလ့ၣ်ဆူအ့ရှါကျဲ(တတါကူ)ဒီးခးပိၢ်ထီၣ်ကျိ၀ံၤဟဲက့ၤကဒါမီၤနီၤႉပယီၤသုးလၢအိၣ်ခိးတၢ်ဖဲန့ၣ်တဖၣ်အိၣ်ခိးခး၀ဲ(BGF)သိလ့ၣ်”အဂ့ၢ်န့ၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ ဘၣ်ဃးပယီၤသုးဒီးသုးခိးကီၢ်ဆၢ(BGF)အဘၢၣ်စၢၤတၢ်ခးကမၣ်လိာ်သးကဲထီၣ်သးအံၤဖဲတနံၣ်အံၤအတီၢ်ပူၤမ့ၢ်၀ဲအဆိကတၢၢ်တဘျီလီၤဒီးခီဖျိတၢ်ခးလိာ်သးဘျီ၀ဲအံၤအဃိသုးခိးကီၢ်ဆၢ(BGF)သုးဖိခံဂၤအခီၣ်ဒီးအစုဘၣ်ဒိဘၣ်ထံးတဆံးတက့ၢ်အဂ့ၢ်န့ၣ် သ့ၣ်ညါဘၣ်လၢၦၤလၢဘူးဒီးသုးခိးကီၢ်ဆၢအအိၣ်န့ၣ်လီၤႉ

လါစဲးပထ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တီနီၢ်မုၢ်ထီၣ် မၠၣ်၀တံၣ်ကလံၤထံးတကပၤန့ၣ် ခီဖျိပယီၤသုးနုာ်လီၤအိၣ်လၢတၢ်ဘၣ်ဘျုးဒံၣ်မိၣ်ခြ့ၣ်စံၣ်(DKBA)တၢ်ပၢဟီၣ်က၀ီၤ လ့ဂီၤဒီးဆိၣ်စံမၠဲၣ်သ၀ီတဖၣ်အပူၤအဃိတၢ်ကီတၢ်ခဲအိၣ်ထီၣ်လၢလီၢ်က၀ီၤသ၀ီဖိကဟးထီၣ်က့ၤလီၤအဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါမ့ၤအခါသ့ၣ်ဘီဘိပယီၤသုးကလၢၤလၢတၢ်ထီၣ်မၤန့ၢ်၀ဲအံၤဒ်သိးကဟဲက့ၤဆ့ၣ်နီၤအိၣ်ကဒါအဂီၢ်ဒီးကလုၢ်ဘၢဒိၣ်စိ၀ဲဖလူ–ဂီၤလ့ၤကျဲအံၤအဂီၢ်န့ၣ် ပယီၤသုးကျိၤလၢအိၣ်ဂီၤလ့ၤ(ကျိဖးဒိၣ်)လူၢ်ႇ၀ၣ်မံၤထၣ်အံၤတဖၣ် ဖဲလါစဲးပထ့ဘၢၣ် ၁ သီအနံၤန့ၣ် ဟဲနုာ်လီၤဟံးန့ၢ်အလီၢ်ဆီလီၤသးအိၣ်၀ဲဒၣ်လၢ(DKBA)သုး၀ဲၤလီၢ်ခိၣ်သ့ၣ် ဆိၣ်စံမၠဲၣ်ဒီးလ့ဂီၤသ၀ီပူၤအဂၤ(၃၀၀)ဃၣ်ဃၣ်န့ၣ်လီၤႉ ကတီၢ်ခဲအံၤခီဖျိတၢ်ကးတံၢ်ဃာ်၀ဲလ့ဂီၤဒီးဆိၣ်စံမၠဲၣ်ကျဲအဃိလီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢကဟးထီၣ်က့ၤလီၤတကးဒံးဘၣ်အမဲာ်ညါဘၣ်ယိၣ်လၢတၢ်ဒုးကကဲထီၣ််အဂ့ၢ်န့ၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးနုာ်လီၤအိၣ်လၢဆိၣ်စံမၠဲၣ်ဒီးဂီၤလ့ၤဟီၣ်က၀ီၤလၢၤလံႉမ့၀ံၤပံးဃာ်၀ဲကျဲႉတဟ့ၣ်ဒုးလဲၤသ၀ီဖိလၢၤဘၣ်ႉခဲအံၤဆိၣ်စံမၠဲၣ်ဒီးဂီၤလ့ၤန့ၣ်တပျဲဖၠး၀ဲလၢၤဘၣ်ႉၦၤပံးဃာ်ကျဲဒ်အံၤအဃိတၢ်ကီတၢ်ခဲဒုအိၣ်မီၤနီၤႉၦၤပံးဃာ်ကျဲဒ်အံၤအဃိၦၤဟဲၦ့ၤအီၣ်တၢ်တအိၣ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးနုာ်လီၤအိၣ်လၢသ၀ီပူၤအဃိလီၢ်က၀ီၤကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ်ဒီးလဲၤစံၣ်အိၣ်ဃာ်၀ဲလၢသူမှဲကျိထံ၀ၢ်ခီကီၢ်ကၠီၣ်တဲၣ်ပူၤအိၣ်၀ဲအသိးတနီၤန့ၣ်လၢတၢ်ဘံၣ်တၢ်ဘၢဂီၢ်မုၢ်နၤခီန့ၣ်လဲၤမံ၀ဲလၢသီခါဖၠၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ “မ့မ့ၢ်ၦၤလ့ဂီၤဒုစံၣ်လၢၤလံႉၦၤဆိၣ်စံမၠဲၣ်ဒုအိၣ်တနီၤဒံးႉအိၣ်ဒၣ်လၢအိၣ်ခိးဟံၣ်အိၣ်ခိးစဲၢ်တဖၣ်န့ၣ်လီၤမီၤနီၤႉကစိာ်တၢ်ဖိတၢ်လံၤခီဒုစိာ်တသ့ဘၣ်ခီဖျိတၢ်ဖိတၢ်လံၤအါအဃိမီၤဒ်န့ၣ်”အဂ့ၢ်န့ၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤလၢအဂၤတဂၤစံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးနုာ်လီၤဟံးန့ၢ်လီၢ်အိၣ်လၢ(DKBA)တၢ်ပၢဟီၣ်က၀ီၤအပူၤဒ်အံၤအဖီခိၣ်(DKBA)ခိၣ်နၢ်တနီၤဒီးပယီၤသုးအဘၢၣ်စၢၤတၢ်ပာ်ဖှိၣ်မၤသကိးအိၣ်၀ဲတမံၤမံၤအဂ့ၢ်န့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ၦၤဘၣ်မူဘၣ်ဒါတဂၤပဲာ်ထံနီၤဖးစံး၀ဲန့ၣ်လီၤႉ ဘၣ်ဃးတကီၢ်ခါတၢ်အိၣ်သးလၢဟီၣ်က၀ီၤအပူၤအံၤ(DKBA)ၦၤဘၣ်မူဘၣ်ဒါတဂၤစံး၀ဲ“မ့မ့ၢ်လီၢ်က၀ီၤဖိတဖၣ်ဒုခီဖျိစုက၀ဲၤတအိၣ်ဘၣ်အဃိၦၤတဟ့ၣ်ဒုးလဲၤဘၣ်ဒုလဲၤ၀ဲန့ၢ်၀ဲလဲၣ်ႉမ့မ့ၢ်(DKBA)ခီလဲၤန့ၢ်မီၤနီၤႉဘၣ်ဆၣ်ကဘၣ်လဲၤတဲဘၣ်လၢန့ၣ်တကပၤႇလၢ(KNLA)တကပၤအဃိဘၣ်ယိၣ်လၢၦၤကဆိကမိၣ်တမၠိမီၤနီၤႉအဃိန့ၣ်ပအိၣ်လၢပကစၢ်လီၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကတီၢ်ခဲအံၤခီဖျိဒုးယၤတၢ်ဖ့ၣ်စၢအိၣ်ထီၣ်အဃိပယီၤသုးကးတံၢ်ဃာ်၀ဲမၠၣ်၀တံၣ်ကလံၤထံးဖလူ–ဂီၤလ့ၤကျဲအသိး(DKBA)ဒီး(KNLA)တကပၤစ့ၢ်ကီးဟ့ၣ်ပလီၢ်လီၢ်က၀ီၤဖိတဖၣ်လၢတဘၣ်ဟးထီၣ်က့ၤလီၤဘၣ်အိၣ်၀ဲစ့ၢ်ကီးအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါစဲးပထ့ဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါစဲးပထ့ဘၢၣ် ၄ သီ မုၢ်နၤခီ ၁ နၣ်ရံၣ်အဆၢကတီၢ်န့ၣ် ပယီၤသုးလၢအိၣ်ဆီလီၤသးဖဲကညီကီၢ်စဲၣ် ကီးတရံး၀့ၢ်ပူၤတဖၣ်ခးလီၤကျိဖးဒိၣ်ဆူတီၤကၠၤအ့သ၀ီပူၤတကပၤအဃိသီခါဘၣ်ဒိ(၁)ပါအသိး ဃိၣ်ဒီးဟံၣ်ဃီဟးဂူာ်ဟးဂီၤအိၣ်၀ဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ဟီၣ်က၀ီၤဖဲန့ၣ်အပူၤခံခီခံကပၤတၢ်ခးလိာ်သးကဲထီၣ်တအိၣ်၀ဲဘၣ်ဆၣ်ပယီၤသုးကျိဖးဒိၣ်လူၢ်လၢအိၣ်ဆီလီၤသးဖဲကီးတရံး၀့ၢ်အံၤခးလီၤကျိဖးဒိၣ်အထံၣ်(၄၀)ဃၣ်ဃၣ်ဆူတီၤကၠၤအ့သ၀ီတကပၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉခီဖျိပယီၤသုးခးလီၤကျိဖးဒိၣ်အဃိသ၀ီပူၤသီခါဘၣ်ဒိ၀ဲ(၁)ပါဒီးဟံၣ်ဃီႇဃိၣ်တဖၣ်ဟးဂီၤ၀ဲအါမး အဂ့ၢ်န့ၣ် တီၤကၠၤအ့လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ကျိဖးဒိၣ်လူၢ်လၢအိၣ်ကီးတရံး၀့ၢ်အံၤခးလီၤကျိဖးဒိၣ်လၢတီၤကၠၤအ့သ၀ီပူၤႉခးလီၤ၀ဲကျိဖးဒိၣ်အကလုၢ်သီဖးဒိၣ်ညါႉခးလီၤ၀ဲဖဲမုၢ်နၤခီ(၁)နၣ်ရံၣ်တုၤလၢ(၄)နၣ်ရံၣ်တခီညါမီၤနီၤႉဘၣ်၀ဲဒၣ်ဃိၣ်ႇဘၣ်ဃုာ်၀ဲသီခါ(၁)ပါႉမ့မ့ၢ်သ၀ီဖိဘၣ်ခီဒုပတနၢ်ဟူဒံးဘၣ်ႉသ၀ီပူၤဟံၣ်ဘၣ်ဒိဟးဂီၤဒီဒူၣ်ညါႉခးလီၤကျိဖးဒိၣ်အဖျၢၣ်ဖးအါညါႉကအိၣ်အထံၣ်(၄၀)ဘျဲၣ်ညါႇမ့မ့ၢ်သီခါလၢအဘၣ်ဒိတပါန့ၣ်ၦၤဆှၢအီၤလၢတၢ်ဆါဟံၣ်”အဂ့ၢ်န့ၣ်စံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိလီၢ်က၀ီၤကမျၢၢ်လၢအိၣ်သ၀ီပူၤတဖၣ်ဃ့ၢ်ထီၣ်၀ဲဒီးတၢ်ဘၣ်ဒိဘၣ်ထံးဟးဂူာ်ဟးဂီၤလၢသ၀ီပူၤတၢ်အိၣ်သးလီၤတံၢ်လီၤဆဲးခီတၢ်တသ့ၣ်ညါ၀ဲဒံးဘၣ်ဒီးလီၢ်က၀ီၤသ၀ီဖိတဖၣ်တုၤလၢခဲအံၤက့ၤလၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ကတီၢ်ခဲအံၤလၢကိတဲၤ(၉ တုိင်)သ၀ီဒီးတီၤကၠၤအ့သ၀ီကျဲဒီတကျိၤန့ၣ်စ့ၢ်ကီးသုးခိး ကီၢ်ဆၢ(BGF)ဆီလီၤ၀ဲတြဲၤအိၣ်(၁၇)တီၤညါအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါအီကူး ၁၅ သီအနံၤစ့ၢ်ကီး ပယီၤသုးကလၢၤလၢအိၣ်ဆီလီၤသးဖဲ(လဲၤ၀ၣ်)အံၤတဖၣ် ခးလီၤကျိဖးဒိၣ်ဆူကီးတရံး၀့ၢ်ကလံၤထံးဒီးကလံၤစိးသ၀ီတဖၣ်အပူၤအဃိ ယီၤကိၣ်သ၀ီဖိဘၣ်ဒိ(၃)ဂၤအကျါပၣ်ဃုာ်၀ဲဖိသၣ်တဂၤကဲထီၣ်တ့ၢ်အသးဒံးန့ၣ်လီၤႉ