ခ့ၣ်အဲးစံၣ် – KIC News

လါမးရှး ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလၢတနီသရံၣ် ဘျံးဒ၀ဲၣ်ကီၢ်ရ့ၣ် လၢၢ်မုၢ်လါကီၢ်ဆၣ် လၢၢ်မုၢ်လါကိဟီၣ်က၀ီၤပူၤ တၢ်ဒုးကဲထီၣ်လၢပယီၤသုးႇဘၠူၣ်စီထံသုးပာ်ဖှိၣ်ဒီးဟီၣ်က၀ီၤတၢ်ဒီတဒၢကမျၢၢ်(PDF)သုးပာ်ဖှိၣ်တဖၣ်အဘၢၣ်စၢၤ၀ံၤအလီၢ်ခံ ပယီၤသုးအၦၤလၢအသံလၢတၢ်ဒုးပူၤသ့ၣ်တဖၣ်အံၤတၢ်ကဟဲထၢဒံးအစိၣ်ဘၣ်အဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲမဟါလါမးရှး ၁၆ သီအနံၤ ဟီၣ်က၀ီၤ(PDF)သုးပာ်ဖှိၣ်နုာ်လီၤခး၀ဲဘၠူၣ်စီထံသုးလၢအမၤပျံၤမၤဖုးကမျၢၢ်တဖၣ် ဖဲလၢၢ်မုၢ်လါကိဟီၣ်က၀ီၤပူၤဒီးတၢ်ခိးထုးပယီၤသုးလၢအကဟဲမၤစၢၤတၢ်သ့ၣ်တဖၣ်အံၤဒီးမ့ၣ်ပိၢ်အဃိ ပယီၤသုးသံကအိၣ်လၢအဂၤ(၂၀)ညါဒီး ဖဲန့ၣ်ပယီၤသုးအစိၣ်တဖၣ်တုၤလၢခဲအံၤဟဲထၢ၀ဲတဘူၣ်ဒံးဘၣ်အဂ့ၢ်န့ၣ် လီၢ်က၀ီၤဖိလၢအဘူးဒီး(PDF)တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမဟါန့ၣ်ပယီၤသုးတဟဲထၢဒံးအ၀ဲသ့ၣ်ၦၤအစိၣ်ဒံးဘၣ်ႉဟဲထီၣ်၀ဲတဘူၣ်ဘၣ်ခီဧါတသ့ၣ်ညါဘၣ်ႉခဲအံၤအစိၣ်တဖၣ်အိၣ်ဖဲဆှါဒိၣ်သ၀ီခိၣ်ထိးလီၤႉဖဲမဟါနါက့တိၤဟးဂီၤတဘိႉလၢန့ၣ်တကပၤတၢ်ဒိးလီၤဃာ်မ့ၣ်ပိၢ်အဃိဘၣ်သ့ၣ်သ့ၣ်အ၀ဲသ့ၣ်ဟဲတဘူၣ်ဘၣ်လီၤႉမ့၀ံၤဘၠူၣ်စီထံကးတံၢ်ဃာ်ကျဲခဲလၢာ်လီၤႉဟုသးစ့ၢ်ကီးတအဲၣ်စိာ်ထီၣ်စိာ်လီၤ၀ဲလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကတီၢ်ခဲအံၤလၢမံၣ်ခၠီသဲၣ်သ၀ီႇဆှါဒိၣ်ႇကၠီၣ်လဲၣ်ႇမ့၀့သ၀ီတုၤလၢလၢၢ်မုၢ်လါကိတကပၤန့ၣ် ဘၠူၣ်စီထံကးတံၢ်ဃာ်တၢ်ဟးထီၣ်က့ၤလီၤအသိး လၢလၢၢ်မုၢ်လါကိတကပၤစ့ၢ်ကီးတပျဲၦၤဟးထီၣ်က့ၤလီၤလၢလီၢ်က၀ီၤဖဲန့ၣ်တကပၤဘၣ်အမဲာ်ညါ တပျဲၦၤစိာ်ထီၣ်စိာ်လီၤဟုးသးလၢၤဘၣ်အဂ့ၢ်န့ၣ် လီၢ်က၀ီၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲမဟါစးထီၣ်ဂီၤခီ ၆ နၣ်ရံၣ်တုၤလၢ ၉ နၣ်ရံၣ်ဘျဲၣ် ခံခီခံကပၤတၢ်ဒုးကဲထီၣ်ယံၤ၀ဲ(၃)နၣ်ရံၣ်ဘျဲၣ်ဒီး ခီဖျိ(PDF)ခိးထုးပယီၤသုးဒီးမ့ၣ်ပိၢ်အဃိပယီၤသုးသံတစှၤန့ၢ်အဂၤ(၂၀)ဘၣ်န့ၣ်လီၤႉ မ့မ့ၢ်တၢ်ဒုးကဲထီၣ်လၢလၢၢ်မုၢ်လါကိသ၀ီအံၤန့ၣ်ဘၠူၣ်စီထံသံအနီၣ်ဂံၢ်စရီန့ၣ်တၢ်ပာ်ဂၢၢ်ပာ်ကျၢၤတန့ၢ်ဒံး၀ဲဘၣ်အဂ့ၢ်န့ၣ် လၢၢ်မုၢ်လါ(PDF)တၢ်ကစီၣ်ဒီးတၢ်ဘိးဘၣ်ရၤထုးထီၣ်ပာ်ဖျါ၀ဲဖဲမဟါန့ၣ်လီၤႉ ကရူၢ်လၢအနုာ်လီၤခးဘၠူၣ်စီထံလၢအအိၣ်ဆီလီၤသးဖဲလၢၢ်မုၢ်လါကိသ၀ီအံၤမ့ၢ်၀ဲ လၢၢ်မုၢ်လါကီၢ်ဆၣ်တၢ်ဒီတဒၢကမျၢၢ်သုးမုၢ်ဒိၣ်(PPDF)ႇKNU(သုးက့ ၄)စုတီၤအဖီလာ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်တဖၣ်ႇတၢ်ဒီတဒၢလၢၢ်မုၢ်လါဟီၣ်က၀ီၤ(PRDF)သုးႇကညီ(PDF)သိၣ်မှံၤကရူၢ်တဖၣ်လီၤန့ၣ်လီၤႉ

လါမးရှး ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီဒီကလုာ်စၢဖှိၣ်ကရၢ(KNU)မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ တလါအံၤလါမးရှး(၁၅)သီအတီၢ်ပူၤပယီၤသုးႇသုးခိးကီၢ်ဆၢ(BGF)ဒီးခ့ၣ်အဲၣ်ယူၣ်စုဒုၣ်တီၤအဖီလာ်သုးကရူၢ်တဖၣ်အဘၢၣ်စၢၤတၢ်ဒုးကဲထီၣ်ခဲလၢာ်(၁၀၀)ဘျဲၣ်ဒီး ပယီၤသုးတကပၤသံဘၣ်ဒိဘၣ်ထံးအဂၤ(၉၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲမဟါန့ၣ်လီၤႉ တလါအံၤလါမးရှး ၁ သီတုၤလၢ ၁၆ သီအနံၤန့ၣ် တၢ်ဒုးကဲထီၣ်၀ဲလၢပယီၤသုးႇသုးခိးကီၢ်ဆၢ(BGF)ဒီး ခ့ၣ်အဲၣ်ယူၣ်(သုးက့ ၅)စုတီၤအဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤခဲလၢာ်(၁၆၇)ဘျီဒီး ဖဲန့ၣ်ပယီၤသုးဒီး(BGF)တကပၤသံ၀ဲ(၅၄)ဂၤႇဘၣ်ဒိ၀ဲ(၄၀)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးတၢ်ဒုးကဲထီၣ်အပူၤပယီၤသုးတကပၤသံဘၣ်ဒိဘၣ်ထံးအါ၀ဲအသိး (KNLA)တကပၤစ့ၢ်ကီးဘၣ်ဟ့ၣ်လီၤကွံာ်အသးသမူ(၇)ဂၤႇဘၣ်ဒိ၀ဲ(၁၆)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါပယီၤသုးခးလီၤကျိဖးဒိၣ်ဆူကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၁၈၉)ဖျၢၣ်ဒီး ပယီၤသုးကဘီယူၤဟဲတ့ၢ်လီၤမ့ၣ်ပိၢ်ခဲလၢာ်(၁၇)ဖျၢၣ်န့ၣ်လီၤႉ တကးဒံးဘၣ်ခီဖျိပယီၤသုးမီၤစိရိၤခးလီၤကျိဖးဒိၣ်ကျိဖိတဖၣ်အဃိ ကမျၢၢ်သံ၀ဲ(၁၅)ဂၤႇဘၣ်ဒိ(၄)ဂၤန့ၣ်လီၤႉ ဒ်န့ၣ်အသိးပယီၤသုးမီၤစိရိၤအသိလ့ၣ်ဟးဂီၤ၀ဲ(၁၂)ခိၣ်ဒီးကသ့ၣ်သံ၀ဲ(၂)ဒုအဂ့ၢ်န့ၣ် ပာ်ဖျါ၀ဲန့ၣ်လီၤႉ

လါမးရှး ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိပယီၤသုးခးလီၤနါစိၤကျိဖးဒိၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ် တီၤကၠၤအ့သ၀ီပူၤအဃိ လီၢ်က၀ီၤသ၀ီဖိတနီၤအိၣ်လၢသ၀ီပူၤတဘူၣ်လၢၤဘၣ်ဟးစံၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါမးရှး ၁၁ သီအနံၤ လၢတီၤကၠၤအ့သ၀ီပူၤ တၢ်ခးလိာ်သးကဲထီၣ်လၢပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤ၀ံၤအလီၢ်ခံ ပယီၤသုးခးလီၤကျိဖးဒိၣ်ဆူသ၀ီပူၤအါအါဂီၢ်ဂီၢ်ဟဲကဲထီၣ်သးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ တီၤကၠၤအ့သ၀ီဖိတဂၤစံး၀ဲလၢ“ယဆှၢကွံာ်ယဖိမုၣ်ဖိခွါတဖၣ်လၢသ၀ီအဂၤလံလီၤႉမ့ၢ်တၢ်အိၣ်သးကမၤသးဒ်လဲၣ်ဒုတသ့ၣ်ညါဘၣ်ႉဘၣ်ယိၣ်လၢတၢ်ဒုးကဆူၣ်ထီၣ်လီၤႉခးလီၤကျိဖးဒိၣ်လၢသ၀ီပူၤတလီၢ်လီၢ်လီၤႉခဲအံၤနါက့ဘၣ်ယိၣ်လၢကဘီယူၤကဟဲခးလီၤတၢ်လီၤႉမ့ခးလီၤကျိဖးဒိၣ်လၢသ၀ီပူၤခဲအံၤခဲအံၤဒုအိၣ်လၢသ၀ီပူၤအ့အ့ဆ့ဆ့တဘူၣ်လၢၤဘၣ်ႉဘၣ်ဟးစံၣ်အိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲအဟါလါမးရှး ၁၅ သီ ဟါခီအဆၢကတီၢ်စ့ၢ်ကီး ခီဖျိပယီၤသုးလၢအအိၣ်ဖဲမၠီၣ်ကၠၤအ့သ၀ီႇဒၣ်လီကစၢၢ်ခိၣ်တဖၣ်ခးလီၤကျိဖးဒိၣ်တစှၤန့ၢ်(၅)ဖျၢၣ်ဆူ တီၤကၠၤအ့သ၀ီပူၤအဃိ တီၤကၠၤအ့သ၀ီဖိတနီၤဘၣ်ဟးစံၣ်မံသုးလီၢ်သုးကျဲလၢမုၢ်နၤခီအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးခးလီၤနါစိၤကျိဖးဒိၣ်အဃိ တီၤကၠၤအ့သ၀ီဃုာ်ဒီးမၠီၣ်ကၠၤအ့သ၀ီႇလီကဲၤႇနီၤတလၤဒီးဖါကၠၣ်သ၀ီဖိကမျၢၢ်တနီၤ ဘၣ်သုးလီၢ်သုးကျဲလဲၤစံၣ်အိၣ်လၢသ၀ီအဂၤတဖၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ပယီၤသုးကရူၢ်လၢအခးလီၤတၢ်ဖဲသ၀ီပူၤဖဲမဟါန့ၣ် တမ့ၢ်ပယီၤသုးလၢအအိၣ်ဖဲတီၤကၠၤအ့သ၀ီပူၤတဖၣ်န့ၣ်ဘၣ်ႉအ၀ဲသ့ၣ်အၦၤန့ၣ်လၢန့ၣ်တကပၤနါက့အိၣ်လီၤႉပယီၤသုးလၢအအိၣ်ဖဲဒၣ်လီကစၢၢ်ခိၣ်တဖၣ်န့ၣ်ခး၀ဲလီၤႉခဲအံၤလီၢ်က၀ီၤသ၀ီဖိတနီၤလဲၤစံၣ်အိၣ်လၢအဘူးအတံၢ်အဟံၣ်အိၣ်လီၤ”အဂ့ၢ်န့ၣ် ခ့ၣ်အဲၣ်ယူၣ် ကြုၢ်တုကီၢ်ဆၣ်ခိၣ် မါကၠၤညိၤ စံးဘၣ်ခ့ၣ်အဲးစံၣ်န့ၣ်လီၤႉ တီၤကၠၤအ့သ၀ီပူၤအံၤအပူၤကွံာ်န့ၣ်ပယီၤသုးအိၣ်ထဲအဂၤ(၁၀)ဘျဲၣ်လီၤဒီး ကတီၢ်ခဲအံၤပယီၤသုးမၤအါထီၣ်သုးဂံၢ်ဘါအဂၤ(၅၀)ဃၣ်ဃၣ်လံအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါမးရှး ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၁၆ သီ ဂီၤခီ ၆ နၣ်ရံၣ်အဆၢကတီၢ် လၢတနီသရံၣ်ကီၢ်ခီ ဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ် လၢၢ်မုၢ်လါကိဟီၣ်က၀ီၤအပူၤ တၢ်ဒုးကဲထီၣ်၀ဲလၢဟီၣ်က၀ီၤဘၠူၣ်စီထံႇပယီၤသုးပာ်ဖှိၣ်ဒီး လီၢ်က၀ီၤတၢ်ဒီတဒၢကမျၢၢ်(PDF)သုးပာ်ဖှိၣ်တဖၣ်အဘၢၣ်စၢၤအဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“တၢ်ဒုးန့ၣ်ကကဲထီၣ်လၢမဟါကၢာ်လံႉဘၣ်ဆၣ်တကဲထီၣ်ဘၣ်ကဲထီၣ်က့ၤဖဲတဂီၤညါအံၤလီၤႉ စးထီၣ်ခးခီန့ၣ်ဘၠူၣ်စီထံစးထီၣ်ခးစိ၀ဲလီၤႉ စးထီၣ်ခး၀ဲဖဲတဂီၤအံၤ ၆ နၣ်ရံၣ် တုၤလၢခဲအံၤလီၤႉ တၢ်အိၣ်သးဒုတဂ့ၤဘၣ်ႉ ခီဖျိအ၀ဲသ့ၣ်သူ၀ဲထဲကျိဖးဒိၣ်လီၤမီၤနီၤႉ ပပာ်သူၣ်ပာ်သးန့ၣ်ကျိဖးဒိၣ်ကအိၣ်အထံၣ်တဆံခံဆံဃၣ်ဃၣ်လံႉသ၀ီဖိတဖၣ်ဒုစံၣ်လၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ဒုးအံၤကဲထီၣ်၀ဲလၢလၢၢ်မုၢ်လါကိသ၀ီကပၤဒီး ကတီၢ်ခဲအံၤလၢၢ်မုၢ်လါကိနၣ်အ့ၤထီၤသ၀ီႇကမဲၤသ၀ီဖိတဖၣ်ခဲလၢာ်ဃၣ်ဃၣ်စံၣ်လၢာ်လံအသိး ပယီၤသုးတကပၤနါက့မၤအါထီၣ်အသုးဂံၢ်ဘါလံအဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တၢ်ဒုးကဲထီၣ်ဘျီ၀ဲအံၤယံၤ၀ဲ(၃)နၣ်ရံၣ်ဘျဲၣ် ဖဲန့ၣ်ပယီၤသုးတကပၤသံ၀ဲ(၁၀)ဂၤအဂ့ၢ်န့ၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ကတီၢ်အံၤပယီၤသုးဆှၢအါထီၣ်အသုးမုၢ်သံၣ်ဘိအါအါဂီၢ်ဂီၢ်လံဘၣ်ဆၣ်ဟဲတတုၤလၢ(PDF)ဟီၣ်က၀ီၤပူၤဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်တနံၤအံၤတၢ်ဂ့ၢ်တၢ်ကျိၤခီန့ၣ် ဘၠူၣ်စီထံအ၀ဲၢ်ခွါလၢၢ်မုၢ်လါကိသ၀ီသးၦၢ်တဲ၀ဲလၢ ဘၣ်ဃးဒီးသ၀ီဖိမၤသံလိာ်သးကဒဲကဒဲကဲထီၣ်သးအံၤ ခီဖျိလၢလီၢ်က၀ီၤ(PDF)သုးအတၢ်ဖံးတၢ်မၤလီၤအဃိ စးထီၣ်ခးစိ၀ဲလီၤအဂ့ၢ်န့ၣ် စံး၀ဲန့ၣ်လီၤႉ တၢ်ဒုးကဲထီၣ်ဘျီ၀ဲအံၤအပူၤ လီၢ်က၀ီၤလၢၢ်မုၢ်လါ(PDF)သုးအမဲာ်ညါ...

လါမးရှး ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါမးရှး ၁၃ သီအနံၤ လၢဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်အပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဖီၣ်န့ၢ်၀ဲပယီၤသုး(၄)ဂၤလၢအဟဲလီၤၦ့ၤအီၣ်တၢ်ဖဲမီခံသ၀ီပူၤဒီး ပယီၤသုးလၢတၢ်ဖီၣ်န့ၢ်၀ဲသ့ၣ်တဖၣ်အံၤတၢ်ပၢၤဃာ်၀ဲဒ်သုးတၢ်သိၣ်တၢ်သီအိၣ်အသိးလီၤအဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါအအိၣ်န့ၣ်လီၤႉ ပယီၤသုးခီၣ်ချ့သုးရ့ၣ်(ခမရ-၅၅၅)ဒီးခီၣ်သုးရ့ၣ်(ခလရ-၃၂)သုးကလၢၤခိၣ်ႇသုးကျိၤခိၣ်-၂ ဃုာ်ဒီးအၦၤသုးဖိခံဂၤလၢအဟဲလီၤၦ့ၤအီၣ်တၢ်ဖဲမီခံသ၀ီပူၤအံၤတဖၣ် KNLA သုးရ့ၣ်(၂၀၁)သုးပာ်ဖှိၣ်တဖၣ်ဖီၣ်ချုး၀ဲဒီး ၦၤသ့ၣ်တဖၣ်အံၤတၢ်ပၢၤဃာ်၀ဲဂ့ၤဂ့ၤလီၤအဂ့ၢ်န့ၣ် KNLA သုးရ့ၣ်(၂၀၁)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဘုဖီစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤဒုပသမံသမိးအ၀ဲသ့ၣ်အဖၢမုၢ်လီၤႉပရ့အ၀ဲသ့ၣ်ဒ်ခ့ၣ်အဲၣ်ယူၣ်သုးတၢ်သိၣ်တၢ်သီပာ်လီၤဃာ်၀ဲအသိးလီၤႉ ပဒုးအီၣ်အီၤမ့ၤႇပသမံသမိးအီၤဒီးပတီၣ်ဖျါထီၣ်လၢတၢ်ဖီခိၣ်လီၤႉ အ၀ဲသ့ၣ်က့ၤ၀ဲမ့ဘူၣ်န့ၣ်မ့ၢ်ခိၣ်နၢ်ကကွၢ်ကျဲၤ၀ဲဒ်လဲၣ်ဒီးက့ၤ၀ဲမ့တဘူၣ်ဘၣ်ခီခိၣ်နၢ်ကကွၢ်ကျဲၤ၀ဲဒ်လဲၣ်န့ၣ်အိၣ်တ့ၢ်က့ၤလၢခိၣ်နၢ်အစုပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးလၢတၢ်ဖီၣ်န့ၢ်၀ဲတဖၣ်အံၤမ့ၢ်၀ဲပယီၤသုးခီၣ်ချ့သုးရ့ၣ်(ခမရ-၅၅၅)သုးကျိၤခိၣ်-၂ စ့ၤယၤမ့ဒီးအၦၤသုးစကီၤပြံခၠ့ၣ်သူၤႇ ခီၣ်သုးရ့ၣ်(ခလရ-၃၂)သုးကလၢၤခိၣ် သုးခိၣ်စိတဂၤဒီးအၦၤသုးဖိတဂၤန့ၣ်လီၤႉလၢန့ၣ်အမဲာ်ညါ တၢ်ပၢၤဃာ်ဃုာ်ဒီးလီၢ်က၀ီၤဖိ(၂)ဂၤလၢအဟဲပၣ်ဃုာ်ဒီးပယီၤသုးအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၀ီၤလ့ၤဒီးမီခံလီၢ်က၀ီၤအံၤအိၣ်၀ဲဒၣ်လၢကညီဒီကလုာ်စၢဖှိၣ်ကရၢ-KNU(သုးက့ ၆)ဟီၣ်က၀ီၤဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်က၀ီၤအပူၤန့ၣ်လီၤႉ ဖဲအပူၤကွံာ်လါမးရှး ၁၁ သီအနံၤစ့ၢ်ကီး လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ တၢ်နုာ်လီၤခး၀ဲပယီၤသုးကျိၤဒီးဖဲန့ၣ်တၢ်ဖီၣ်ချုးသမူန့ၢ်ပယီၤသုး(၂၇)ဂၤအကျါပၣ်ဃုာ်၀ဲသုးဒ့ခိၣ်တဂၤဒီး မၤန့ၢ်၀ဲပယီၤသုးအကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါဒံး၀ဲန့ၣ်လီၤႉ

လါမးရှး ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ကၤလံၣ်ခံသ၀ီ တီၤဖုၣ်ကၠိသရၣ်တဂၤလၢအဟူးဂဲၤပၣ်ဃုာ်လၢ(CDM)ပူၤအံၤ ပယီၤသုးမီၤစိရိၤကွီၢ်ဘျီၣ်စံၣ်ညီၣ်လီၤ၀ဲလၢဘၣ်အိၣ်ဃိာ်ပူၤ(၁၇)နံၣ်လၢနံၣ်ယံၤနံၣ်ထၢအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကၠိသရၣ်မီၤဟ့ထဲၣ်အီၤလၢအသိၣ်လိတီၤဖုၣ်ကၠိဖဲကၠၤအ့စ့ၣ်ကၠံ၀့ၢ် ကၤလံၣ်ခံသ၀ီပူၤအံၤ ပယီၤသုးမီၤစိရိၤလိာ်ကွီၢ်အီၤလၢတၢ်ဘျၢသဲစး(၃)ခါ၀ံၤအလီၢ်ခံ ဖဲအပူၤကွံာ်လါမးရှး ၉ သီအနံၤန့ၣ် ဖၣ်အၣ်ဃိာ်ကွီၢ်ဘျီၣ်စံၣ်ညီၣ်လီၤ၀ဲလၢဘၣ်အိၣ်ဃိာ်ပူၤလၢနံၣ်ယံၤနံၣ်ထၢအဂ့ၢ်န့ၣ် သ့ၣ်ညါဘၣ်လၢအသကိးအအိၣ်န့ၣ်လီၤႉ “တၢ်တထံၣ်န့ၢ်အီၤဒီးတၢ်မၤတၢထီၣ်တၢလီၤတၢ်ဖိတၢ်လံၤနီတမံၤဘၣ် တၢ်စံၣ်ညီၣ်လီၤအီၤလၢတဖိးသဲစးဘၣ်လီၤႉ ကွၢ်ဘျီၣ်ရူခီန့ၣ်တဲ၀ဲလၢအ၀ဲသ့ၣ်န့ၣ်အတၢ်ကမၣ်တအိၣ်ဘၣ်ႉတၢ်ပာ်အ၀ဲသ့ၣ်လၢဖၣ်အၣ်ဃိာ်ပူၤတဒၢးန့ၣ်ပာ်၀ဲအဂၤ(၄၀)ညါအဃိအိၣ်ဆိးတဘၣ်ဂီၢ်ဘၣ်မီၤနီၤႉပလဲၤဆှၢတၢ်အီၣ်တၢ်အီနါက့တဲ၀ဲလၢတတုၤလၢအ၀ဲသ့ၣ်အအိၣ်ဘၣ်”အဂ့ၢ်န့ၣ် ကၠိသရၣ်မီၤဟ့ထဲၣ်အီၤအသကိးတဂၤစံးဘၣ်ခ့ၣ်အဲးစံၣ်န့ၣ်လီၤႉ ကၠိသရၣ်ႇကၠိဖိလၢတၢ်ဖီၣ်၀ဲတဘျီဃီဒီးမီၤဟ့ထဲၣ်အီၤသ့ၣ်တဖၣ်အံၤစ့ၢ်ကီး တၢ်စံၣ်ညီၣ်လီၤလၢဘၣ်အိၣ်ဃိာ်ပူၤလၢနံၣ်ယံၤနံၣ်ထၢစ့ၢ်ကီးန့ၣ်လီၤႉ ဖဲတၢ်ဟဲဆှၢအ၀ဲသ့ၣ်ဆူကွီၢ်ဘျီၣ်ရူအခါန့ၣ် အ၀ဲသ့ၣ်သမၢ၀ဲလၢတကူသိးဃိာ်ကူကၤဘၣ်ဒီး ဃ့ထီၣ်၀ဲလၢကဟဲကူသိး၀ဲကၠိဖိကူကၤလီၤတကးဒံးဘၣ် စံး၀ဲလၢပတၢ်ကမၣ်တအိၣ်ဘၣ်ဒီးနဲၣ်ထီၣ်အစုသၢဘိအဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးအ၀ဲသ့ၣ်အအိၣ်န့ၣ်လီၤႉ (CDM)ကၠိသရၣ်မုၣ်တဂၤစံး၀ဲ“အတၢ်ကမၣ်တအိၣ်နီတမံၤဘၣ်ႉ ပယီၤသုးဖီၣ်အီၤလၢအတဖိးသဲစးဒီးဒုးလီၤအီၤလၢဃိာ်ပူၤလီၤႉစုလၢအဖီၣ်၀ဲဟီၣ်ခိၣ်၀ါအံၤတၢ်စံၣ်ညီၣ်လီၤလၢဘၣ်အိၣ်ဃိာ်ပူၤလၢနံၣ်ယံၤနံၣ်ထၢအံၤ ပာ်ဖျါထီၣ်၀ဲလၢတၢ်ဘျၢသဲစးတအိၣ်ဘၣ်န့ၣ်လီၤႉ ပ၀ဲကဒဲကဒဲတၢ်ကီတၢ်ခဲအိၣ်အဃိပမၤစၢၤလိာ်သးႇ ပပာ်ဖျါထီၣ်သးလၢတၢ်မုာ်တၢ်ခုၣ်အပူၤႉ တၢ်သ့ၣ်တဖၣ်အံၤလိာ်ကွီၢ်၀ဲလၢ(အဆၢဖိ)ဒ်အံၤ လ့ၤတက့ၤပတတူၢ်လိာ်ဘၣ်ႉ ပကကွၢ်ဆၢၣ်မဲာ်တုၤလၢအကတၢၢ်တစုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကၠိသရၣ်မီၤဟ့ထဲၣ်အီၤအံၤ သုးကီၣ်ကးလိာ်ကွၢ်အီၤလၢတၢ်မၤဟးဂီၤထံကီၢ်သူးသ့ၣ်လၤကပီၤတၢ်ဘျၢသဲစး(၅၀၅)အဂီၢ် ဘၣ်လီၤ၀ဲဃိာ်ပူၤ(၂)နံၣ်ႇတၢ်ဘျၢသဲစး(၅၂ က)ဒီး(၅၀ စျ)ခဲလၢာ်(၃)ခါအဂီၢ်ဘၣ်လီၤလၢဃိာ်ပူၤ(၁၇)နံၣ်အဂ့ၢ်န့ၣ်...

လါမးရှး ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါမးရှး ၁၀ သီအနံၤ လၢတနီသရံၣ် ဘျံးဒ၀ဲၢ်ကီၢ်ရ့ၣ် လၢၢ်မုၢ်လါကီၢ်ဆၣ်အပူၤ တၢ်ခးလိာ်သးကဲထီၣ်လၢလီၢ်က၀ီၤတၢ်ဒီတဒၢ(PDF)သုးဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ပယီၤသုးဖီၣ်၀ဲလီၢ်က၀ီၤသ၀ီဖိ(၇)ဂၤ၀ံၤ ဖဲမဟါန့ၣ်ပျၢ်လီၤက့ၤ၀ဲ(၅)ဂၤလံဘၣ်ဆၣ် အိၣ်တ့ၢ်ဒံး၀ဲ(၂)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါမးရှး ၁၀ သီအနံၤန့ၣ် လီၢ်က၀ီၤ(PDF)သုးခိးခးပယီၤသုးအသိလ့ၣ်လၢ ကဆီဖိယွဲၢ်သ၀ီဃၢၤကဲထီၣ်သး၀ံၤအလီၢ်ခံ ဖဲလါမးရှး ၁၁ သီအနံၤန့ၣ် ပယီၤသုးဖီၣ်၀ဲဘီၤမသံၣ်သ၀ီဖိစီၤထ့ၤ၀့ဒီးကပၠီၣ်သ၀ီဖိစီၤလီတဖၣ်၀ံၤ ဖီၣ်ကဒီး၀ဲဘီၤမသံၣ်သ၀ီဖိ(၄)ဂၤဒီးကပၠီၣ်သ၀ီသးၦၢ်တဂၤအဂ့ၢ်န့ၣ် လီၢ်က၀ီၤပိာ်မုၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤအိၣ်ဒံးလၢပယီၤစုပူၤခံဂၤႇတၢတဂၤန့ၣ်စီၤလီအိၣ်လၢကပၠီၣ်သ၀ီလီၤႉအသးနံၣ်အိၣ်၀ဲ(၂၈)နံၣ် အဖိအိၣ်၀ဲ(၄)ဂၤလီၤႉ တၢ်ဖီၣ်အ၀ဲသ့ၣ်လၢကျဲပူၤ ဖဲအလဲၤမၤတၢ်လၢကဆီဖိယွဲၢ်ဟဲက့ၤလၢကျဲအခါတၢ်ဖီၣ်အီၤလီၤႉ ပယီၤသုးဖီၣ်ဒိတီၢ်သမံသမိးအီၤအဃိ အ၀ဲပျံၤတၢ်က့ၤစံးဆၢတၢ်ကတိၤကမၣ်အဃိတၢ်ဖီၣ်အီၤလီၤႉ ခဲအံၤပယီၤသုးကမၢအ၀ဲသ့ၣ်လၢကနဲၣ်ပၠးကျဲအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘီၤမသံၣ်သ၀ီဖိ(၅)ဂၤလၢပယီၤသုးဖီၣ်ကဒီး၀ဲသ့ၣ်တဖၣ်မ့ၢ်၀ဲ နီၢ်မံးမံၣ်(၁၄)နံၣ်ႇနီၢ်မ့လ့ၣ်(၃၆)နံၣ်ႇကပၠီၣ်သ၀ီသးၦၢ်စီၤဂီၤဒီးအဖိမုၣ်နီၢ်မးမးႇတၢ်အိၣ်ဖှိၣ်သရၣ်စီၤခၠါလ့ၣ်သ့ၣ်တဖၣ်ဒီး ၦၤသ့ၣ်တဖၣ်အံၤပယီၤသုးသမံသမိး၀ဲ၀ံၤပျၢ်လီၤက့ၤ၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢၢ်မုၢ်လါဟီၣ်က၀ီၤအံၤအိၣ်၀ဲဒၣ်လၢခ့ၣ်အဲၣ်ယူၣ်-ကညီဒီကလုာ်တၢ်ပၢဟီၣ်က၀ီၤအပူၤဒီး ဖဲအပူၤကွံာ်လါတဖၣ်စ့ၢ်ကီးခီဖျိ(PDF)သုးဒီးပယီၤသုးအဘၢၣ်စၢၤတၢ်ခးလိာ်သးကဲထီၣ်တလီၢ်လီၢ်အဃိ လီၢ်က၀ီၤသ၀ီဖိတဖၣ်ဘၣ်ဟးဃ့ၢ်အိၣ်ခူသူၣ်အါအါဂီၢ်ဂီၢ်အသိး ပယီၤသုးဖီၣ်ဒီးသူ၀ဲလီၢ်က၀ီၤဖိဒ်တၢ်ဒီသဒၢစုက၀ဲၤတခါအသိးကဲထီၣ်သးခဲအံၤခဲအံၤန့ၣ်လီၤႉ ဒ်န့ၣ်အသိးဖဲလါမးရှး...

လါမးရှး ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်နုာ်လီၤအိၣ်ဆိးဟံးန့ၢ်အလီၢ်လၢလ့က့ၣ်ကိာ်၀့ၢ်သီက၀ီၤဒ့တဖၣ်အပူၤဒီး ဟံးန့ၢ်၀ဲကမျၢၢ်လၢအဘၣ်ဃ့ၢ်မှံဟးဖျိးတဖၣ်အတၢ်ဖိတၢ်လံၤလၢက၀ီၤဒ့တဖၣ်အပူၤကိးမုၢ်နံၤဒဲးအဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ကတီၢ်အံၤပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် နုာ်လီၤအိၣ်ဆိးဟံးန့ၢ်အလီၢ်လၢလ့က့ၣ်ကိာ်၀့ၢ်သီက၀ီၤဒ့တဖၣ်အပူၤဒီးခူၣ်ဃာ်၀ဲတၢ်ပူၤအကျိၤတဖၣ်လၢတစှၤန့ၢ်တၢ်လီၢ်အတီၤ(၁၀)ဘၣ်ဒီး နုာ်လီၤဟံးန့ၢ်ကမျၢၢ်ၦၤဃ့ၢ်မှံဟးဖျိးအတၢ်ဖိတၢ်လံၤလၢဟံၣ်ပူၤတဖၣ်အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ကမျၢၢ်ၦၤဃ့ၢ်တၢ်ဒုးဖိလၢတအဲၣ်ဒိးပာ်ဖျါအမံၤတဂၤစံး၀ဲ“ယသိလ့ၣ်တခိၣ်န့ၣ်ႇၦၤလဲၤထီၣ်လၢမၠၣ်၀တံၣ်တဖၣ်ထံၣ်၀ဲလၢၦၤနီ၀ဲအဃိ အတဲဘၣ်ယၤမးယသ့ၣ်ညါလီၤႉယမၢအသံကွၢ်ၦၤနီသိလ့ၣ်ဖိတဂၤန့ၣ်ဘျီ တဲ၀ဲလၢအၦ့ၤဒိး၀ဲလၢသုးရ့ၣ်(၂၇၅)သုးဖိအဟံၣ်ဖိဃီဖိတဂၤအအိၣ်လီၤႉပယီၤသုးနုာ်လီၤဟံၦၤတၢ်ဖိတၢ်လံၤအံၤမ့ဘၣ်တဲန့ၣ် ဟံၣ်ခဲလၢာ်ဃၣ်ဃၣ်လၢၤလံႉအ၀ဲတဂၤမ့ထံၣ်န့ၣ်ဟံႇအ၀ဲတဂၤနါက့မ့လီကီ၀ဲဒီးဟံ၀ဲလီၤႉ နုာ်လီၤဟံၦၤတၢ်ဖိတၢ်လံၤလၢၦၤဟံၣ်ကိးမုၢ်နံၤဒဲးလီၤႉမ့တဲန့ၣ်အိၣ်တ့ၢ်က့ၤထဲဟံၣ်အဘ့ၣ်အကုလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤယံၤ၀ဲ(၃)လါဘျဲၣ်အတီၢ်ပူၤအံၤ သ၀ီ(၅)ဖျၢၣ်ဒီးလ့့က့ၣ်ကိာ်၀့ၢ်သီက၀ီၤဒ့ပူၤကမျၢၢ်ၦၤဃ့ၢ်မှံဟးဖျိး(၆၀၀၀)ဘျဲၣ်တက့ၤဘၣ်ဒံးလၢအဒူသ၀ီဘၣ်ဒီး ဘၣ်ဟးဃ့ၢ်အိၣ်ကဒုဒံးသးအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်သိးတၢ်ကသ့ၣ်ညါဘၣ်တၢ်စုလီၢ်ခီၣ်ခိၣ်တၢ်ဂ့ၢ်တၢ်ကျိၤလၢၦၤဃ့ၢ်မှံဟးဖျိးပၢ၀ဲတဖၣ်ဒီးတၢ်ဖိတၢ်လံၤလၢအဟးဂီၤလၢပျီပူၤတဖၣ်အံၤအဂီၢ်န့ၣ် တၢ်ဃုထၢမၤနီၣ်မၤဃါၦၤဃ့ၢ်မှံဟးဖျိးအနီၣ်ဂံၢ်စရီဒီး တုၤလၢခဲအံၤတဒိးန့ၢ်ဘၣ်စရီလၢလၢၦဲၤၦဲၤဒံးဘၣ်အဂ့ၢ်န့ၣ် တၢ်ကရၢကရိလၢအမၤစၢၤတၢ်တဖၣ်စံး၀ဲန့ၣ်လီၤႉ “တၢ်ဒုးကဲထီၣ်အဃိယပာ်ယသိလ့ၣ်ႇဆဲးကဲးႇခီၣ်ဖၠူထၢၣ်တၢ်ဖိတၢ်လံၤလၢဟံၣ်ဒီးယကးတံၢ်ဃာ်အီၤလီၤႉဖဲတၢ်ဒုးဂၢၢ်ထီၣ်အခါယမၢၦၤလဲၤကွၢ်န့ၢ်ယဟံၣ်ဒီးတဲ၀ဲလၢဟံၣ်တြဲၤဒီးကျးအတြဲၤတဖၣ်အိးထီၣ်သးႇတထံၣ်သိလ့ၣ်ဆဲးကဲးတဖၣ်လၢၤဘၣ်ႉယသ့ၣ်ညါလၢကျိဖးဒိိၣ်လီၤတဲာ်လၢယဟံၣ်ပူၤအဃိမ့ဆိမိၣ်လၢကက့ၤအိၣ်တဘျီလၢ်လၢ်န့ၣ်ယသးဟးဂီၤဒိၣ်မးလီၤ”အဂ့ၢ်န့ၣ် လ့က့ၣ်ကိာ်လီၢ်က၀ီၤပိာ်မုၣ်တဂၤစံး၀ဲန့ၣ်လီၤႉ ဖဲအပူၤကွံာ်လါမးရှး ၁၀ သီအနံၤန့ၣ် နံၣ်ပိဖီၣ်ဒ့ရှၢၣ်ၦၤပၢၤလီၢ်ဆ့ၣ်နီၤ မံၣ်စထၢၣ်စၤစၤကၤ၀ၤဒီး ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ်စီၤမူးတူစ့ဖိတဖၣ်ထံၣ်လိာ်သးလၢကီၢ်ကၠီၣ်တဲၣ်ကံၣ်မဲ၀့ၢ်ပူၤဒီး တၢၣ်ပီၣ်တဲသကိး၀ဲဘၣ်ဃးလ့က့ၣ်ကိာ်လီၢ်က၀ီၤဖိကက့ၤအိၣ်လၢအဒူသ၀ီအဂ့ၢ်ဒီးၦၤဂ့ၢ်၀ီတၢ်ဆီၣ်ထွဲမၤစၢၤတၢ်ရဲၣ်တၢ်ကျဲၤအဂ့ၢ်တဖၣ်ဒံးအဂ့ၢ်န့ၣ် ၦၤလၢအဘူးဒီးခ့ၣ်အဲၣ်ယူၣ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

လါမးရှး ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၁၄ သီ ဂီၤခီအဆၢကတီၢ် တၢ်ဒုးကဲထီၣ်လၢကၠၤအ့စ့ၣ်ကၠံ၀့ၢ် ပယီၤသုးခီၣ်ချ့သုးရ့ၣ်(ခလရ-၃၂)သုးကလၢၤအမဲာ်ညါအဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ ခီဖျိတၢ်ဒုးကဲထီၣ်အဃိကၠၤအ့စ့ၣ်ကၠံ-ဃိၣ်သၢဖျၢၣ်ကျဲမုၢ်ခိၣ်ဒီးကီးတရံးကျဲမုၢ်တဖၣ်ၦၤဟးထီၣ်က့ၤလီၤစှၤလီၤ၀ဲဒီး ခီဖျိတၢ်ဒုးကဲထီၣ်အဃိကမျၢၢ်လၢအိၣ်၀့ၢ်ပူၤသ့ၣ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးအဂ့ၢ်န့ၣ် သ့ၣ်ညါဘၣ်န့ၣ်လီၤႉ “တၢ်ဒုးကဲထီၣ်လၢ၀့ၢ်ပူၤအဃိ ၦၤလဲၤအိၣ်စိၢ်က့ၤၦၤဒံၣ်ၦၤဖိလၢကၠိဒီး တနီၤန့ၣ်လဲၤတသ့နီတပူၤလၢၤဘၣ်အိၣ်ကတာ်ထီသးန့ၣ်လီၤႉလဲၤတဘူၣ်နီတပူၤလၢၤဘၣ်ႉ ခးလိာ်သးဒီးကျိဖိကျိဖးဒိၣ်အဖၢမုၢ်လီၤႉကဲထီၣ်လၢသုးကလၢၤအမဲာ်ညါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကၠၤအ့စ့ၣ်ကၠံ၀့ၢ်ပူၤတၢ်ခးလိာ်သးကဲထီၣ်လၢပယီၤသုး(ခလရ-၃၂)သုးရ့ၣ်ဒီးဖီၣ်စုက၀ဲၤကရူၢ်တဖုအဘၢၣ်စၢၤ၀ံၤအလီၢ်ခံ ၀့ၢ်ပူၤကျဲမုၢ်ခိၣ်ဒီတဘိန့ၣ်ပယီၤသုးတဖၣ်ဟးဆှၣ်သမံသမိးတၢ်အဂ့ၢ်န့ၣ် ၦၤ၀့ၢ်ဖိတဖၣ်စံး၀ဲန့ၣ်လီၤႉ ဖဲတဂီၤအံၤ ၉ နၣ်ရံၣ် တၢ်ဒုးစးထီၣ်ကဲထီၣ်လၢကၠၤအ့စ့ၣ်ကၠံ၀့ၢ်မ့ၤကလၤကိမုၢ်နုာ်ဒီးပယီၤသုးကလၢၤကပၤ တုၤလၢခဲအံၤတစုတၢ်ဒုးကဲထီၣ်ဒံး၀ဲအဖၢမုၢ်ဒီး တၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤ၀့ၢ်ဖိအအိၣ်န့ၣ်လီၤႉ

လါမးရှး ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၁၀ သီ ဂီၤခီအဆၢကတီၢ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ် စီၤမူးတူစ့ဖိဒီးနံၣ်ပိဖီၣ်ဒ့ရှၢၣ်ၦၤပၢၤလီၢ်ဆ့ၣ်နီၤမံၣ်စထၢၣ်စၤစၤကၤ၀ၤတဖၣ်ထံၣ်လိာ်သးဖဲကီၢ်ကၠီၣ်တဲၣ် ကံၣ်မဲ၀့ၢ်ပူၤအံၤ တမ့ၢ်ထံၣ်လိာ်တဲသကိး၀ဲထံရူၢ်ကီၢ်သဲးအဂ့ၢ်ဘၣ်အဂ့ၢ်န့ၣ် ခ့ၣ်အဲၣ်ယူၣ်ထံဂုၤကီၢ်ဂၤ၀ဲၤကျိၤခိၣ် ပဒိၣ်စီၤတီနံစံး၀ဲန့ၣ်လီၤႉ ဘၣ်ထွဲဒီးခ့ၣ်အဲၣ်ယူၣ်ကရၢခိၣ်သုးခိၣ်ကျၢၢ်စိစီၤမူးတူစ့ဖိဒီးတၢ်ဒီတဒၢ၀ဲၤကျိၤမူဒါခိၣ်ပဒိၣ်စီၤရီကၠၢၣ်ခ့ၣ်ထံၣ်လိာ်သးဒီးမံၣ်စထၢၣ်စၤစၤကၤ၀ၤအံၤ မ့ၢ်ဒၣ်တၢ်ထံၣ်လိာ်တဲသကိးဘၣ်ဃးလ့က့ၣ်ကိာ်၀့ၢ်သီတၢ်ဂ့ၢ်လီၤဒီး တၢ်တၢၣ်ပီၣ်တဲသကိးအပူၤတပၣ်ဃုာ်ထံရူၢ်ကီၢ်သဲးဒီးတၢ်မုာ်တၢ်ခုၣ်အဂ့ၢ်ဘၣ်န့ၣ် ပဒိၣ်စီၤတီနံစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲတၢ်သူၣ်ထီၣ်လ့က့ၣ်ကိာ်၀့ၢ်သီအခါနံၣ်ပီဖီၣ်ဒ့ရှၢၣ်ဟဲမၤစၢၤဃာ်တၢ်အိၣ်အဃိ ကမ့ၢ်ဒၣ်ကရၢခိၣ်လဲၤထံၣ်လိာ်သးဘၣ်ဃးတၢ်ဂ့ၢ်တခါန့ၣ်လီၤႉ မ့မ့ၢ်လၢပတၢ်ကရၢကရိတၢ်ဂ့ၢ်ခီန့ၣ်ဘၣ်တဲအလီၢ်တအိၣ်နီတမံၤဘၣ်ႉ လၢတၢ်မုာ်တၢ်ခုၣ်တၢ်ဂ့ၢ်အဂီၢ်န့ၣ် သုးကီၣ်ကးထံၣ်လိာ်သးဒီးအ၀ဲသ့ၣ်အဂီၢ်န့ၣ်မၤ၀ဲလၢအပူၤကွံာ်လါဖ့ၤဘြူၤအါရံၤအခါလံလီၤႉ မ့မ့ၢ်ပ(ခ့ၣ်အဲၣ်ယူၣ်)ဒုထံရူၢ်ကီၢ်သဲးတၢ်အိၣ်သးခဲအံၤအဂီၢ်ကထံၣ်လိာ်တဲသကိးတၢ်အဂီၢ်တမၤဘၣ်ႉဘၣ်ဃးဒီးတၢ်ဂ့ၢ်အံၤပတကနၣ်ဃုာ်လၢၤဘၣ်ယံၤလံ”အဂ့ၢ်န့ၣ် ပဒိၣ်စီၤတီနံစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါတၢ်ထံၣ်လိာ်သးအပူၤတၢ်တဲသကိးတၢ်ဂ့ၢ်တၢ်ကျိၤလီၤတံၢ်လီၤဆဲးန့ၣ်တသ့ညါဒံးဘၣ်အဂ့ၢ်န့ၣ် ပဒိၣ်စီၤတီနံစံးအါထီၣ်၀ဲန့ၣ်လီၤႉ ဖဲတနံၤအံၤဂီၤခီ ၉ နၣ်ရံၣ်အဆၢကတီၢ် ယပၣ်ခၢၣ်စးလီၤဆီမံၣ်စထၢၣ်စၤစၤကၤ၀ၤအံၤ ထံၣ်လိာ်သးဒီးခ့ၣ်အဲၣ်ယူၣ်ကရၢခိၣ်စီၤမူးတူစ့ဖိ၀ံၤအလီၢ်ခံ ထံၣ်လိာ်သးဒီးကရ့ၣ်နံၣ်ဒီကလုာ်တၢ်ဂုၤထီၣ်ပသီထီၣ်ပၣ်တံၣ်(KNPP)ကရၢခိၣ်ခူအူယဲၤတီခိၣ်ရိၣ်မဲခၢၣ်စးကရူၢ်တဖၣ်အသိးႇဖဲမုၢ်ဃ့ၢ်လီၤအဆၢကတီၢ်ထံၣ်လိာ်သးဒီးတၢ်သူၣ်ထီၣ်က့ၤယိၤဒိၣ်ကီၢ်ကီၣ်ကး(RCSS)ကရၢခိၣ်သုးခိၣ်ကျၢၢ်စိကၠံယိၣ်စ့ၣ်တီခိၣ်ရိၣ်မဲခၢၣ်စးကရူၢ်စ့ၢ်ကီးန့ၣ်လီၤႉ ၀ံၤအလီၢ်ခံတၢ်ရဲၣ်တၢ်ကျဲၤအိၣ်လၢကထံၣ်လိာ်သးဒီးကလုာ်ဒူၣ်ဖီၣ်စုက၀ဲၤတၢ်ကရၢကရိအဒူၣ်(၁၀)လၢအဆဲးလီၤ(NCA)တၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲကရူၢ်(PPST)ခိၣ်နၢ်သ့ၣ်တဖၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ မံၣ်စထၢၣ်စၤစၤကၤ၀ၤထံၣ်လိာ်သးဒီးကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်ဒ်အံၤ ကဘၣ်ထွဲလိာ်သးဒီးသုးကီၣ်ကးအတၢ်ကွဲမုာ်တၢ်တၢၣ်ပီၣ်တဲသကိးတၢ်မုာ်တၢ်ခုၣ်အဂ့ၢ်သ့၀ဲအဂ့ၢ်န့ၣ် နဲၤဘညါမိၤလၢအဃုသ့ၣ်ညါကလုာ်ဒူၣ်ထံရူၢ်ကီၢ်သဲးတဂၤပဲာ်ထံနီၤဖးစံး၀ဲန့ၣ်လီၤႉ နံၣ်ပိဖီၣ်ဒ့ရှၢၣ်ၦၤပၢၤလီၢ်ဆ့ၣ်နီၤမံၣ်စထၢၣ်စၤစၤကၤ၀ၤအံၤ မ့ၢ်ၦၤတဂၤလၢအတၢ်ရ့လိာ်သးဂ့ၤ၀ဲဒိၣ်မးဒီး ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢတၢ်ကရၢကရိခိၣ်နၢ်လၢအဆဲးလီၤထံကီၢ်ဒီဘ့ၣ်တၢ်ပတုာ်တၢ်ခး(NCA)တဖၣ်အသိး မ့ၢ်စ့ၢ်ကီးၦၤတဂၤလၢအတၢ်ရ့လိာ်သးဂ့ၤ၀ဲဒိၣ်မးဒီးပယီၤသုးမီၤစိရိၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်မၤတၢ်ပတုာ်တၢ်ခးလၢကီၢ်ပယီၤပူၤအကတီၢ် ဖဲတၢ်သူၣ်ထီၣ်ကညီကီၢ်စဲၣ်လ့က့ၣ်ကိာ်၀့ၢ်သီအခါန့ၣ်...