ခ့ၣ်အဲးစံၣ် – KIC News

လါမးရှး ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါမးရှး ၉ သီအနံၤ ပယီၤသုးဒုးယၤကဘီယူၤ(၃)ဘ့ၣ်ဟဲခးလီၤတၢ်လၢ မၠၣ်၀တံၣ်ကလံၤထံးလ့က့ၣ်ကိာ်ဟီၣ်က၀ီၤပူၤဘၣ်ဆၣ် တၢ်ဘၣ်ဒိဘၣ်ထံးတအိၣ်နီတမံၤဘၣ်အဂ့ၢ်န့ၣ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တကပၤစံး၀ဲန့ၣ်လီၤႉ ဖဲမဟါလါမးရှး ၉ သီ ဟါခီ ၄း၃၀ မံးနံးဃၣ်ဃၣ်အဆၢကတီၢ် ပယီၤသုးဒုးယၤကဘီယူၤ(MI-၁၇)သၢဘ့ၣ်ဟဲကွံာ်လီၤမ့ၣ်ပိၢ်လၢလ့က့ၣ်ကိာ်ယသ့ၣ်ကူၤႇလ့ကပီၤထံလီၤဆှူႇမဲၢ်ကနဲတၢ်လီၢ်သ့ၣ်တဖၣ်န့ၣ်လီၤႉ ပယီၤသုးဟီၣ်က၀ီၤသုးကျိၤလၢအဟဲထီၣ်မၤတၢ်ထီၣ်ဒုးဆူလ့က့ၣ်ကိာ်ဟီၣ်က၀ီၤပူၤအံၤတဖၣ် ခီဖျိ(KNLA)သုးပာ်ဖှိၣ်တဖၣ်က၀ီၤတံၢ်ဃာ်အ၀ဲသ့ၣ်ဒီးအိၣ်ကတာ်ထီသးအဃိ ကဘီယူၤဟဲခးစၢၤတ့ၢ်လီၤ၀ဲမ့ၣ်ပိၢ်ဒ်အံၤလီၤအဂ့ၢ်န့ၣ် (KNLA)သုးခိၣ်တဂၤစံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟဲထီၣ်မၤတၢ်ထီၣ်ဒုးလၢယသ့ၣ်ကူၤဒီးထံလီၤဆှူကလံၤထံးတကပၤန့ၣ် ကအိၣ်တနွံလံႇကျိဖးဒိၣ်လူၢ်ခးလီၤစၢၤ၀ဲကျိဖးဒိၣ်လီၤႉန့ၢ်တနွံဘျဲၣ်လံခး၀ဲတန့ၢ်ဒံးဘၣ်ႇအ၀ဲသ့ၣ်အၦၤသံဘၣ်ဒိဘၣ်ထံးအါက့ၤဂုၤလီၢ်ခံတန့ၢ်ဘၣ်အိၣ်ကတာ်ထီသးအဃိကဘီယူၤဟဲခးလီၤစၢၤ၀ဲလီၤႇဘၣ်တဲလၢတၢ်ဒုးကဲထီၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲမဟါတၢ်လဲၤက၀ီၤထီၣ်ခးပယီၤသုးဟီၣ်က၀ီၤသုးကျိၤလၢပျီပူၤအခါ ပယီၤသုးတကပၤသံ၀ဲ(၅)ဂၤႇဘၣ်ဒိ(၃)ဂၤဒီး မ့မ့ၢ်(KNLA)သုးပာ်ဖှိၣ်တကပၤ တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ပယီၤသုးအံၤနုာ်လီၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤယံၤ၀ဲ(၃)လါဘျဲၣ်လံဒီး ခီဖျိတၢ်ထီၣ်ဒုးအဃိလ့က့ၣ်ကိာ်ဟီၣ်က၀ီၤၦၤဃ့ၢ်မှံဟးဖျိးသ၀ီ(၅)ဖျၢၣ်ၦၤနီၣ်ဂံၢ်တကလးဃၣ်ဃၣ်ဒီးတီနီၢ်ကစၢၢ်လၢမုၢ်နုာ်ကီးတရံးကလံၤထံးသ၀ီအဖျၢၣ်(၁၀)ဃၣ်ဃၣ်ၦၤနီၣ်ဂံၢ်တကလးခိၣ်ဃၢၤဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ဒ်သိးကမျၢၢ်ဒူဖိသ၀ီဖိလၢအဘၣ်ဃ့ၢ်မှံဟးဖျိးတဖၣ်အံၤကက့ၤအိၣ်ဆိးလၢအဒူသ၀ီတၢ်လီၢ်တၢ်ကျဲမုာ်မုာ်ခုၣ်ခုၣ်အဂီၢ် ဖဲလါမးရှး ၇ သီအနံၤ ဒူပျာ်ယာ်ကီၢ်ရ့ၣ်ထုးထီၣ်လံာ်ဒုးသ့ၣ်ညါ၀ဲမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်လၢ ပယီၤသုးလၢအိၣ်ဆီလီၤသးဖဲသ၀ီပူၤတဖၣ်ကဟးထီၣ်ကွံာ်လၢ(၃)သီအတီၢ်ပူၤဘၣ်ဆၣ် ပယီၤသုးအံၤတဟးထီၣ်ကံွာ်၀ဲဘၣ်ဒီးတုၤလၢခဲအံၤတၢ်ဒုးကဲထီၣ်ဒံး၀ဲလၢပျီပူၤကိးမုၢ်နံၤဒဲးန့ၣ်လီၤႉ

လါမးရှး ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် (၂၀၂၁-၂၀၂၂)တၢ်မၤလိနံၣ်အဂီၢ် မၠၣ်၀တံၣ်၀့ၢ်ဃုာ်ဒီးကညီကီၢ်စဲၣ် ကီၢ်ဆၣ်(၇)ဘ့ၣ်အပူၤ ၦၤကၠိဖိလၢအတီၣ်ထီၣ်ဃာ်အမံၤစရီလၢကနုာ်လီၤဒိးစဲးသုးမီၤစိရိၤအတီၤတဆံတၢ်ဒိးစဲးအိၣ်၀ဲ(၅ႇ၉၀၃)ဂၤဒီး တနံၣ်အံၤၦၤကၠိဖိနုာ်လီၤဒိးစဲးစှၤန့ၢ်ဒံးအပူၤကွံာ်နံၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်သိနံၣ်တနံၣ်အံၤအဂီၢ် ကညီကီၢ်စဲၣ် ကီၢ်ဆၣ်(၇)ဘ့ၣ်အပူၤကၠိဖိ(၅ႇ၉၀၃)ဂၤတီၣ်ထီၣ်အမံၤအသၣ်လၢ ကနုာ်လီၤဒိးစဲး၀ဲတၢ်ဒိးစဲးအဂ့ၢ်န့ၣ် ကီၢ်စဲၣ်သုးမီၤစိရိၤကူၣ်သ့ခိၣ်၀ဲၤဒၢး ထုးထီၣ်ဘိးဘၣ်ရၤလီၤ၀ဲတၢ်ကစီၣ်န့ၣ်လီၤႉ ကညီကီၢ်စဲၣ် ကီၢ်ဆၣ်ကိးဘ့ၣ်ဒဲးအပူၤၦၤလၢတီၣ်ထီၣ်ဃာ်အမံၤအသၣ်လၢကနုာ်လီၤဒိးစဲးသ့ၣ်တဖၣ်အံၤ ဖၣ်အၣ်ကီၢ်ဆၣ်န့ၣ်အိၣ်၀ဲ(၂၀၄၉)ဂၤႇလူၢ်ပျဲၢ်ကီၢ်(၈၈၇)ဂၤႇသၣ်တီၣ်ကၠံကီၢ်ဆၣ်(၂၀၀)ဂၤႇဖၣ်ပူၣ်ကီၢ်ဆၣ်(၂၄၂)ဂၤႇကီးတရံးကီၢ်ဆၣ်(၁၁၂၀)ဂၤႇကၠၤအ့စ့ၣ်ကၠံကီၢ်ဆၣ်(၇၄၀)ဂၤဒီးမၠၣ်၀တံၣ်ကီၢ်ဆၣ်န့ၣ်အိၣ်၀ဲ(၆၆၅)ဂၤ ပာ်ဖှိၣ်ခဲလၢာ်အိၣ်၀ဲ(၅၉၀၃)ဂၤန့ၣ်လီၤႉဖဲန့ၣ်အကျါၦၤကဒိးစဲးလၢကၠိပူၤ(၄ႇ၅၁၄)ဂၤဒီးၦၤကဒိးစဲးလၢတၢ်ချၢ(၁ႇ၃၈၉)ဂၤတီၣ်ထီၣ်ဃာ်အမံၤအသၣ်လံအဂ့ၢ်န့ၣ် ကညီကီၢ်စဲၣ်သုးမီၤစိရိၤကူၣ်သ့ခိၣ်၀ဲၤဒၢးလံာ်တၢ်ဘိးဘၣ်ရၤလီၤအပူၤ ပာ်ဖျါ၀ဲန့ၣ်လီၤႉ “တချုးလၢခိ၀ံၣ်ကဲထီၣ်သးဒံးဘၣ်အခါ(၂၀၁၉-၂၀၂၀)တၢ်သိလိနံၣ်အဂီၢ်န့ၣ် လၢမၠၣ်၀တံၣ်န့ၣ်ၦၤနုာ်ဒိးစဲးအတီၤတဆံအိၣ်၀ဲ(၁ႇ၈၉၄)ဂၤညါလီၤႉဖဲန့ၣ်အကျါၦၤနုာ်ဒိးစဲးလၢတၢ်ချၢအိၣ်(၄၀၀)ဘျဲၣ်ညါလီၤႉတၢ်သိၣ်လိနံၣ်တနံၣ်အံၤၦၤတီၣ်ထီၣ်မံၤလၢကနုာ်လီၤဒိးစဲးန့ၣ်အိၣ်ထဲ(၆၆၅)ဂၤလီၤအဃိ မ့ဘၣ်က့ၤထိၣ်သတြီၤဒီးအပူၤကွံာ်နံၣ်န့ၣ်လီၤစှၤ၀ဲသၢပူခံပူညါမီၤနီၤ”အဂ့ၢ်န့ၣ် ၦၤလၢအဘူးဒီးမၠၣ်၀တံၣ်သုးမီၤစိရိၤကီၢ်ဆၣ်ကူၣ်သ့၀ဲၤဒၢးတဂၤစံး၀ဲန့ၣ်လီၤႉ (၂၀၂၁-၂၀၂၂)တၢ်သိၣ်လိနံၣ်အတီၤတဆံတၢ်ဒိးစဲးအံၤ တၢ်ကစးထီၣ်အီၤဖဲလါမးရှး ၃၀ သီတုၤလၢလါအ့ဖြ့ၣ် ၉ သီအနံၤဒီး တၢ်ကအိးထီၣ်၀ဲတၢ်သမံသမိးလံာ်၀ဲၤကျိၤ(၂၈)ခါလၢကညီကီၢ်စဲၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါမးရှး ၉ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးလၢအနုာ်လီၤဟူးဂဲၤအိၣ်ဆိးဖဲလ့က့ၣ်ကိာ်ဟီၣ်က၀ီၤဒီးကီးတရံးကလံၤထံးလီၢ်က၀ီၤပူၤတဖၣ် ကဟးထီၣ်ကွံာ်လၢ(၃)သီအတီၢ်ပူၤအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ထုးထီၣ်လံာ်ဒုးသ့ၣ်ညါ၀ဲမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်သုးကီၢ်ခီခိၣ်ဖဲလါမးရှး ၇ သီအနံၤန့ၣ်လီၤႉ ဒ်သိးကမျၢၢ်ထံဖိကီၢ်ဖိလၢအဘၣ်ၦၤဃ့ၢ်မှံဟးဖျိးသ့ၣ်တဖၣ်ကဟဲက့ၤဖံးအီၣ်မၤအီၣ်အိၣ်ဆိးဘၣ်မုာ်မုာ်ခုၣ်ခုၣ်လၢအအဒူသ၀ီအဟံၣ်အဃီအဂီၢ် ပယီၤသုးလၢအအိၣ်ဆီလီၤသးဟူးဂဲၤဖဲကီးတရံးကလံၤဟီၣ်က၀ီၤအပူၤတဖၣ် ကဟးထီၣ်ကွံာ်လၢ(၃)သီအတီၢ်ပူၤအဂ့ၢ်န့ၣ်ခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်နဲၣ်ရွဲၣ်ပဒိၣ်စီၤလ့စတၣ်ဆဲးလီၤစုပနီၣ်ထုးထီၣ်လံာ်ဒုးသ့ၣ်ညါ၀ဲ မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်သုးကီၢ်ခီခိၣ်န့ၣ်လီၤႉ ပဒိၣ်စီၤလ့စတၣ်စံး၀ဲလၢ“ကမျၢၢ်တဖၣ်ဘၣ်တူၢ်ဘၣ်တၢ်လၢအလါညါလံႉမ့၀ံၤမူခိၣ်ကလံၤသီၣ်ဂီၤတဘၣ်လီၢ်ဘၣ်စးဘၣ်အဖီခိၣ်န့ၣ်တၢ်စူၤတၢ်အုၣ်တၢ်အိၣ်ဆိးလီၢ်ကျဲတအိၣ်ဘၣ်ႉမိၢ်ဖိဆံးႇဖိဒံဖိသၣ်ႇပိာ်မုၣ်ပိာ်မၢၤႇသူၣ်က့သးၦၢ်သ့ၣ်တဖၣ်နးဒိၣ်၀ဲလီၤႉၦၤသ့ၣ်တဖၣ်အံၤအဲၣ်ဒိးက့ၤအိၣ်မုာ်အိၣ်ခုၣ်လၢအဟံၣ်အကစၢ်တၢ်လီၢ်တၢ်ကျဲဘၣ်ဆၣ် ခီဖျိပယီၤသုးအၦၤတဖၣ်အိၣ်ဖဲတၢ်လီၢ်တဖၣ်န့ၣ်ဒံးအဃိၦၤက့ၤတဘူၣ်၀ဲဘၣ်လီၤႉအဃိၦၤပာ်ဖျါထီၣ်ယၤအါအါဂီၢ်ဂီၢ်ဘျီယဘၣ်ကွဲးထီၣ်၀ဲလံာ်လီၤႉယကွဲးတဂၤဒုတမ့ၢ်ဘၣ်ပထိးဖှိၣ်လီၤပခိၣ်ဒီးခိၣ်နၢ်အါဒံအါဂၤပကွဲးလီၤပပာ်ဂၢၢ်ပာ်ကျၢၤ၀ံၤမးယဆဲးလီၤယမံၤဒီးကဆှၢဆူ(ရတခ)သုးကီၢ်ခိခိၣ်အအိၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဒ်လံာ်တၢ်နဲၣ်လီၤပာ်ပနီၣ်မုၢ်နံၤမုၢ်သီအသိးမ့တဟးထီၣ်ဘၣ်န့ၣ် တၢ်ဂ့ၢ်ကီလၢအကပိာ်ထွဲထီၣ်အခံသ့ၣ်တဖၣ်အံၤ တမ့ၢ်ပခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)အမူအဒါဘၣ်ဒီးမ့မ့ၢ်တခီမ့ၢ်၀ဲပယီၤသုးမီၤစိရိၤအမူဒါလီၤအဂ့ၢ်န့ၣ် လံာ်တၢ်ဒုးသ့ၣ်ညါအပူၤပာ်ဖျါ၀ဲန့ၣ်လီၤႉ လံာ်တၢ်ဒုးသ့ၣ်ညါအပူၤစံး၀ဲ လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ စးထီၣ်လၢ(၂၀၂၁)နံၣ် လါဒံၣ်စ့ဘၢၣ် ၁၅ သီအနံၤ ခီဖျိပယီၤသုးမၤ၀ဲတၢ်ထီၣ်ဒုးအဃိ တီၢ်နီၢ်မုၢ်ထီၣ်လ့က့ၣ်ကိာ်၀့ၢ်သီဃုာ်ဒီးဒူသ၀ီကမျၢၢ်လၢအိၣ်ဘူးဖဲန့ၣ်သ့ၣ်တဖၣ်ဒီးတီနီၢ်မုၢ်နုာ်ကီးတရံးကလံၤထံးဒူသ၀ီကမျၢၢ်တဖၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ပာ်ဖျါ၀ဲန့ၣ်လီၤႉ လီၢ်က၀ီၤဒူသ၀ီလၢတၢ်ဒုးကဲထီၣ်အပူၤသ့ၣ်တဖၣ်တုၤလၢခဲအံၤတစုပယီၤသုးအိၣ်ဆီလီၤသးဟူးဂဲၤ၀ဲဒံးဒီး ခီဖျိအ၀ဲသ့ၣ်ဟံးန့ၢ်၀ဲကမျၢၢ်အတၢ်ဖိတၢ်လံၤႇမၤဟးဂီၤ၀ဲအဃိ ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်က့ၤအိၣ်လၢအဒူသ၀ီအဟံၣ်အဃီတဘူၣ်ဒံး၀ဲဘၣ်အဂ့ၢ်န့ၣ် စံး၀ဲန့ၣ်လီၤႉ ဖဲ(၂၀၂၁)နံၣ်,လါဒံၣ်စ့ဘၢၣ်န့ၣ်ခီဖျိဒုးယၤတၢ်သဘံၣ်သဘုၣ်စးထီၣ်ကဲထီၣ်ဖဲမၠၣ်၀တံၣ်ကလံၤထံးလ့က့ၣ်ကိာ်ဟီၣ်က၀ီၤပူၤဒီးကီးတရံးကလံၤထံးတကပၤအဃိလီၢ်က၀ီၤကမျၢၢ်လၢအကလးဘၣ်ပာ်တ့ၢ်ကွံာ်အဟံၣ်အဃီဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ လၢန့ၣ်အမဲာ်ညါတုၤလၢခဲအံၤခီဖျိပယီၤသုးအိၣ်ဆီလီၤသးလၢဒူသ၀ီတဖၣ်အပူၤဒံးအဃိ ကက့ၤအိၣ်လၢအဒူသ၀ီပူၤအဂီၢ်တညီဒံး၀ဲဘၣ်အဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

လါမးရှး ၉ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါဖ့ၤဘြူၤအါရံၤလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢကီၢ်သူလ့ၤတၢ်ပၢဟီၣ်က၀ီၤအပူၤ တၢ်ဒုးကဲထီၣ်တလါအတီၢ်ပူၤပယီၤသုးဒီးသုးခိးကီၢ်ဆၢ(BGF)တကပၤသံ၀ဲ(၃၁၁)ဂၤႇဘၣ်ဒိ(၂၂၈)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ ခ့ၣ်အဲၣ်ယူၣ်လံာ်တၢ်ပာ်ဖျါအပူၤ“၂၀၂၂ နံၣ် လါဖ့ၤဘြူၤအါရံၤတလါအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဂၢၤသးကရၢ(KNDO)ဒီးပယီၤသုးႇသုးခိးကီၢ်ဆၢ(BGF)တဖၣ်အဘၢၣ်စၢၤတၢ်ခးလိာ်သးကဲထီၣ်ခဲလၢာ်(၄၂၁)ဘျီဒီး ဖဲန့ၣ်ပယီၤသုးဒီးသုးခိးကီၢ်ဆၢ(BGF) တကပၤသံ၀ဲ(၃၁၁)ဂၤႇဘၣ်ဒိ၀ဲ(၂၂၈)ဂၤန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)တဖၣ်မၤဟးဂီၤကွံာ်၀ဲပယီၤသုးမီၤစိရိၤအသိလ့ၣ်(၃၅)ခိၣ်အဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဒ်န့ၣ်အသိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)တကပၤစ့ၢ်ကီးဘၣ်ဟ့ၣ်လီၤကွံာ်အသးသမူ(၁၆)ဂၤဒီးဘၣ်ဒိ၀ဲ(၂၇)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤတလါအတီၢ်ပူၤပယီၤသုးဒီး(BGF)ခးလီၤကျိဖးဒိၣ်အဖျၢၣ်(၄၀၀)ဘျဲၣ်ဆူဒူသ၀ီကမျၢၢ်တၢ်ဖံးအီၣ်မၤအီၣ်လီၢ်ကျဲတကးဒံးဘၣ်အမဲာ်ညါ ပယီၤသုးကဘီယူၤဟဲခးလီၤတၢ်ခံဘျီကွံာ်လီၤ၀ဲမ့ၣ်ပိၢ်အဖျၢၣ်(၁၀)လၢမုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤတၢ်လီၢ်(၅)တီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခီဖျိပယီၤသုးမၤ၀ဲတၢ်ထီၣ်ဒုးလၢကဘီယူၤဒီးခးလီၤကျိဖးဒိၣ်တဖၣ်ဆူလီၢ်က၀ီၤဒူသ၀ီတၢ်ဖံးအီၣ်မၤအီၣ်လီၢ်ကျဲပူၤအဃိ ကမျၢၢ်သံ၀ဲ(၇)ဂၤႇဘၣ်ဒိ(၂၆)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ခီဖျိပယီၤသုးမၤ၀ဲဒုးယၤတၢ်ဟူးတၢ်ဂဲၤဒီးတၢ်ဒုးကဲထီၣ်အဃိ လၢခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်ႇချၢၣ်လွံၢ်ထူၣ်ကီၢ်ရ့ၣ်ႇဘျံးဒ၀ဲၢ်ကီၢ်ရ့ၣ်ႇမုၢ်တြီၢ်ကီၢ်ရ့ၣ်ဒီးဒူပျာ်ယာ်ကီၢ်ရ့ၣ်အပူၤ ကမျၢၢ်ထံဖိကီၢ်ဖိအဂၤ(၇၀၀၀၀)ဘျဲၣ်ဘၣ်ပာ်တ့ၢ်ကွံာ်အဒူသ၀ီအဟံၣ်အဃီဘၣ်ဃ့ၢ်မှံဟးဖျိး၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ

လါမးရှး ၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၈ သီအနံၤ တၢ်မၤလၤကပီၤ၀ဲဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤအံၤလၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ် နဘူကီၢ်ဆၣ် သၤယၤကိသ၀ီပူၤဒီး ဖဲန့ၣ်တၢ်ဟ့ၣ်လၤကပီၤ၀ဲလီၢ်က၀ီၤကညီပိာ်မုၣ်(၃၄)ဂၤလၢ အကဲတ့ၢ်သ၀ီသးၦၢ်လၢတဲာ်လွံၢ်တဲာ်သုးပဒိၣ်စိၤအခါသ့ၣ်တဖၣ်န့ၣ်လီၤႉ ဖဲဖီၣ်စုက၀ဲၤတၢ်သဘံၣ်သဘုၣ်ကဲထီၣ်ကတီၢ်ၦၤသ့ၣ်တဖၣ်အံၤတူၢ်ဆါခီၣ်ဆါအသးဒီးဒီသဒၢ၀ဲဒူသ၀ီအဖီခိၣ်အံၤ ဒ်သိးတၢ်ကသ့ၣ်ညါပာ်ပနီၣ်ဒီးကကဲထီၣ်တၢ်လီၤကွၢ်လိလၢသူၣ်ဘီၣ်သးစၢ်သ့ၣ်တဖၣ်အဂီၢ်ဘၣ်တၢ်ပညိၣ်အီၤဒီးဘၣ်ဟ့ၣ်လၤကပီၤ၀ဲလီၤအဂ့ၢ်န့ၣ် ဖၣ်အၣ်ကီၢ်ရ့ၣ်တၢ်ကရၢကရိဒီးတၢ်ဘိးဘၣ်ရၤလီၤ၀ဲၤကျိၤခိၣ် ပဒိၣ်နီၢ်ရှံ၀ါစံး၀ဲဒ်အံၤန့ၣ်လီၤႉ “ပမ့ဘၣ်က့ၤကွၢ်ကဒါန့ၣ်အ၀ဲသ့ၣ်မ့ၢ်ၦၤလၢအတူၢ်ဆါအသးလီၤႉအ၀ဲသ့ၣ်မ့ၢ်ၦၤဒူၦၤဃိၤလၢပ၀ဲဒၣ်သ့ၣ်တဖၣ်အဂီၢ်လီၤႉခဲအံၤအ၀ဲသ့ၣ်အသးၦၢ်ထီၣ်လံအဃိကဲထီၣ်၀ဲဒၣ်တၢ်လီၤကွၢ်လိလၢသူၣ်ဘီၣ်သးစၢ်တဖၣ်အဂီၢ်တခါအသိးပဒိးန့ၢ်ဘၣ်တၢ်လဲၤခီဖျိလၢအ၀ဲသ့ၣ်အအိၣ်အါမးအဃိႇပဒိးန့ၢ်ဘၣ်တၢ်မၤလိအါမးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်မၤလၤကပီၤဟီၣ်ခိၣ်ဒီဘ့ၣ််ပိာ်မုၣ်မုၢ်နံၤတၢ်ရဲၣ်တၢ်ကျဲၤဘျီ၀ဲအံၤအပူၤ တၢ်ဟ့ၣ်မၤလၤကပီၤ၀ဲခ့ၣ်အဲၣ်ယူၣ်-ဖၣ်အၣ်ကီၢ်ရ့ၣ်ပူၤ လူၢ်ပျဲၢ်ႇတၢ်-ကဲၢ်ႇထံၤလိၤႇတန့ဆါဒီးဒူယီၢ်ကီၢ်ဆၣ်(၅)ဘ့ၣ် လီၢ်က၀ီၤသ၀ီသးၦၢ်မုၣ်သ့ၣ်တဖၣ်ဒီး(၃၄)ဂၤအကျါဟဲထီၣ်၀ဲတၢ်ရဲၣ်တၢ်ကျဲၤမူးအံၤ(၂၉)ဂၤန့ၣ်လီၤႉ ထိၣ်ကီးကိလီၢ်က၀ီၤသ၀ီသးၦၢ်မုၣ်လီၢ်လံၤနီၢ်မံၤနၤ(၆၃)နံၣ်လၢအဘၣ်တၢ်ဟ့ၣ်မၤလၤကပီၤအီၤတဂၤစံး၀ဲ“အပူၤကွံာ်န့ၣ်တဒိးန့ၢ်ဘၣ်တၢ်တဟ့ၣ်မၤလၤကပီၤဒ်အံၤနီတဘျီဘၣ်ႉတၢ်သ့ၣ်ညါပာ်ပနီၣ်မၤလၤကပီၤယၤဒ်အံၤယသးခုဒိၣ်မးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါသ၀ီသးၦၢ်မုၣ်လီၢ်လံၤလၢအကဲတ့ၢ်သ၀ီသးၦၢ်လၢညါသ့ၣ်တဖၣ်န့ၣ် ဘၣ်လဲၤခီဖျိ၀ဲပယီၤသုးအတၢ်ဆီၣ်တံၢ်မၤနၢၤအကလုာ်ကလုာ်အသိး ကတီၢ်ခဲအံၤလၢဟီၣ်က၀ီၤတဖၣ်အပူၤတဘၣ်လဲၤခီဖျိတၢ်ဒ်အပူၤကွံာ်လၢၤဘၣ်အဃိသးခုဒိၣ်မးအဂ့ၢ်န့ၣ် သ၀ီသးၦၢ်မုၣ်လီၢ်လံၤနီၢ်မံၤနၤစံးအါထီၣ်၀ဲန့ၣ်လီၤ ႉ အပူၤကွံာ်လၢညါသုးမီၤစိရိၤပၢတၢ်အစိၤအခါဖီၣ်စုက၀ဲၤတၢ်သဘံၣ်သဘုၣ်ဟဲအိၣ်ထီၣ်ဒီး လၢကညီကီၢ်စဲၣ်ဟီၣ်က၀ီၤတဖၣ်အပူၤခီဖျိပယီၤသုးအံၤဖီၣ်မၤသံမၤ၀ီဆီၣ်တံၢ်မၤနၢၤ၀ဲသ၀ီသးၦၢ်ပိာ်ခွါတဖၣ်ဒီးမၢဆူၣ်မၢဆိး၀ဲအဃိ လီၢ်က၀ီၤပိာ်မုၣ်သ့ၣ်တဖၣ်ဘၣ်ကဲက့ၤသ၀ီသးၦၢ်လၢပိာ်ခွါအလီၢ်ဒီး ဖဲန့ၣ်သ၀ီသးၦၢ်မုၣ်စးထီၣ်ဟဲအိၣ်ဖျါထီၣ်၀ဲဒၣ်န့ၣ်လီၤႉ နီၢ်သရံး(၇၅)နံၣ်လၢအကဲတ့ၢ်သ၀ီသးၦၢ်မုၣ်ယံၤအနံၣ်(၁၀)ဘျဲၣ်တဂၤစ့ၢ်ကီးစံး၀ဲလၢ“လၢပစိၤခါန့ၣ်ပဘၣ်ယိး၀ဲဒၣ်မ့ၣ်ပိၢ်ဖျၢၣ်တဖၣ်လီၤႉဒ်အ၀ဲသ့ၣ်မၢၦၤအသိးပမၤမ့တန့ၢ်ဘၣ်န့ၣ်ပဘၣ်ဟ့ၣ်လီၤ၀ဲဆီႇထိးတဖၣ်မီၤနီၤႉၦၤတနီၤန့ၣ်တဲၦၤလၢပကဲပယီၤသုးအမါလီၤႉပတူၢ်ဆါဟ့ၣ်လီၤသးလၢလီၢ်က၀ီၤအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ် ၂၀၂၁ နံၣ် လါမးရှး ၈ သီအနံၤလၢအလီၤဘၣ်၀ဲဟီၣ်ခိၣ်ဒီဘ့ၣ်ပိာ်မုၣ်အမုၢ်နံၤအခါစ့ၢ်ကီး ကညီပိာ်မုၣ်ကရၢ(KWO)ဟ့ၣ်လၤကပီၤ၀ဲဖၣ်ကီၢ်အၣ်ကီၢ်ရ့ၣ်ပူၤ လူၢ်ပျဲၢ်ႇတၢ်ကြဲၢ်ႇထံၤလိၤႇတန့ဆါဒီးဒူယီၢ်ကီၢ်ဆၣ်(၅)ဘ့ၣ်ပူၤသ၀ီသးၦၢ်မုၣ်လီၢ်လံၤ(၅၄)ဂၤဒံးန့ၣ်လီၤႉ တၢ်မၤလၤကပီၤဟီၣ်ခိၣ်ဒီဘ့ၣ်ပိာ်မုၣ်မုၢ်နံၤတၢ်ရဲၣ်တၢ်ကျဲၤအပူၤ သ၀ီသးၦၢ်မုၣ်လီၢ်လံၤဃုာ်ဒီးလီၢ်က၀ီၤသ၀ီဖိအဂၤ(၃၀၀)ဃၣ်ဃၣ်ဟဲထီၣ်၀ဲဒီး တၢ်ရဲၣ်တၢ်ကျဲၤအပူၤတၢ်ရှဲပၠးလီၤ၀ဲပိာ်မုၣ်မုၢ်နံၤဟဲကဲထီၣ်သးအဂ့ၢ်အကျိၤႇတၢ်စံၣ်စိၤတဲစိၤအဂ့ၢ်အကျိၤဒီးလီၢ်က၀ီၤခိၣ်နၢ်ဘၣ်ထွဲတဖၣ်ကတိၤစံးဘျုးစံးဖှိၣ်လီၤတၢ်တဂၤစုာ်စုာ်န့ၣ်လီၤႉ

လါမးရှး ၇ သီႇ ၂၀၂၂ နံၣ်ႇဘ ခ့ၣ်အဲးစံၣ် ဖဲတနံၤအံၤလါမးရှး ၇ သီ ဂီၤခီအဆၢကတီၢ် လၢမၠၣ်၀တံၣ် လ့က့ၣ်ကိာ် ဖီကရၢၢ်လူၢ်ကပၤ ပယီၤသုးကျိဖးဒိၣ်လူၢ်သုးကျိၤတဖၣ်ခးလီၤကျိဖးဒိၣ်ကျိဖိတဖၣ်ဆူကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အအိၣ်တကပၤဒီးဖဲန့ၣ်တၢ်ဒုးကဲထီၣ်၀ဲအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ ၦၤလၢအပၣ်ဃုာ်လၢ(KNLA)သုးပာ်ဖှိၣ်အကျါတဂၤစံး၀ဲ“ၦၤခးလီၤတၢ်န့ၣ်မ့ၢ်၀ဲလ့က့ၣ်ကိာ်ထွံၣ်လူၢ်(ကျိဖးဒိၣ်လူၢ်) မီၤနီၤႉဖဲမဟါန့ၣ်တၢ်ပိၢ်ထီၣ်လၢစွဲၣ်တီၣ်ကျိဖးဒိၣ်လူၢ်လီၤႉတစိၢ်ဖိ၀ံၤခး၀ဲကျိဖးဒိၣ်ႇယဆိကမိၣ်ဒုကဘၣ်မ့ၢ်အ၀ဲသ့ၣ်ကဒဲကဒဲခးလိာ်သးလီၤႉ ဖဲမဟါန့ၣ်လၢပ၀ဲတကပၤတၢ်ခးလိာ်သးတအိၣ်ဘၣ်ႉ ဖဲတဂီၤအံၤ(၆)နၣ်ရံၣ်ဘျဲၣ်န့ၣ် စးထီၣ်ခး၀ဲလၢယသ့ၣ်ကူၤတကပၤန့ၣ်ဒီးခဲအံၤတၢ်ဒုးကဲထီၣ်လီၤႉ ထွံၣ်လူၢ်ခးလီၤကျိဖးဒိၣ်ႇခးလီၤ၀ဲတပယူာ်ဃီလီၤႉပ၀ဲဒၣ်နါပက့ပက့ၤခးဆၢကဒါတၢ်လီၢ်တဘျုးတီၤညါလီၤ”အဂ့ၢ်န့ၣ် စံး၀ဲန့ၣ်လီၤႉ စးထီၣ်ဖဲလါမးရှး ၂ သီအနံၤန့ၣ် ပယီၤသုးဒီးလီၢ်က၀ီၤသုးခိးကီၢ်ဆၢ(BGF)တဖၣ်ပာ်ဖှိၣ်ထီၣ်အသး မၤအါထီၣ်သုးဂံၢ်ဘါဒီးနုာ်လီၤမၤရှဲလဲ၀ဲတၢ်လီၢ်လၢ(KNLA)သုးပာ်ဖှိၣ်အိၣ်အလီၢ်သ့ၣ်တဖၣ်အဃိ လ့က့ၣ်ကိာ်လီၢ်က၀ီၤဖလူဖိ-ယသ့ၣ်ကူၤကျဲမုၢ်ခိၣ်န့ၣ် တၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးအံၤဟဲဃုသ့ၣ်တၢ်ဒီးကဘီယူၤတလီၢ်လီၢ်အဃိ တၢ်ဘၣ်ယိၣ်ဟဲအိၣ်ထီၣ်၀ဲလၢတၢ်ဘံၣ််တၢ်ဘၢအဂီၢ်အဂ့ၢ်န့ၣ် ဖလူလီၢ်က၀ီၤဖိလၢအတက့ၤဘၣ်ဒံးလၢအသ၀ီတဂၤစံး၀ဲဒ်အံၤန့ၣ်လီၤႉ “ဖဲစှၤသီအတီၢ်ပူၤ(BGF)ဒီးပယီၤသုးတဖၣ်ဟဲအါထီၣ်၀ဲလၢလ့က့ၣ်ကိာ်ႇမဲး၀ါခံသ၀ီတကပၤလီၤႉလၢကမၤရှဲကွံာ်ယသ့ၣ်ကူၤလ့ကပီၤထံလီၤဆှူတကပၤလၢ(ခ့ၣ်အဲၣ်ယူၣ်)အိၣ်ဆီလီၤသးအံၤအဂီၢ်န့ၣ် စှၤသီအတီၢ်ပူၤအ၀ဲသ့ၣ်ခးနါစိၤကျိဖးဒိၣ်လီၤႉဒြိဟဲယူၤႇကဘီယူၤဟဲဃုသ့ၣ်တၢ်အိၣ်လီၤႉပ၀ဲၦၤဃ့ၢ်တၢ်ဒုးဖိတဖၣ်ပပာ်ဖှိၣ်ထီၣ်သးပအိၣ်လၢတၢ်ပလီၢ်ပဒီအပူၤလီၤ”အဂ့ၢ်န့ၣ် ၦၤဃ့ၢ်တၢ်ဒုးဖိတဂၤဃီ၀ဲန့ၣ်စံး၀ဲန့ၣ်လီၤႉ လ့က့ၣ်ကိာ်ဟီၣ်က၀ီၤပူၤတၢ်ဒုးကဲထီၣ်ယံၤ၀ဲ(၃)လါဘျဲၣ်လံဒီး ကတီၢ်အံၤလ့က့ၣ်ကိာ်ဟီၣ်က၀ီၤဃုာ်ဒီးသ၀ီ(၅)ဖျၢၣ်ၦၤဃ့ၢ်မှံဟးဖျိးအိၣ်၀ဲတၢ်လီၢ်(၅)တီၤၦၤနီၣ်ဂံၢ်(၆၁၅၂)ဂၤအံၤအိၣ်ကဒုဒံး၀ဲဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမှဲကျိကၢၢ်နံၤအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါမးရှး ၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါမးရှး ၅ သီ ဟါခီအဆၢကတီၢ် ခီဖျိပယီၤသုးလၢအအိၣ်ဖဲဖၣ်ပူၣ်၀့ၢ်အံၤခးလီၤကျိဖးဒိၣ်အဃိ မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ် မဲးကျီသ၀ီသရူၢ် ကျီၢ်ဒ့သ၀ီဖိသံ၀ဲ(၇)ဂၤအကျါပၣ်ဃုာ်၀ဲဖိသၣ်(၂)နံၣ်ဒီးၦၤမိၢ်ဒၢတဖၣ်အဂ့ၢ်န့ၣ် တၢ်တိစၢၤမၤစၢၤကညီတၢ်မုာ်တၢ်ခုၣ်ၦာ်ဘျးစဲ(KPSN)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲလါမးရှး ၅ သီ ဟါခီ(၇း၂၀)မံးနံးဃၣ်ဃၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကျီၢ်ဒ့သ၀ီတကပၤအဃိ လီၢ်က၀ီၤသ၀ီဖိသံ၀ဲ(၇)ဂၤအကျါ ပၣ်ဃုာ်၀ဲဖိသၣ်(၂)နံၣ်တဂၤႇ(၅)နံၣ်တဂၤႇၦၤမိၢ်ဒၢတဂၤဒီး ဘၣ်ဒိဘၣ်ထံး၀ဲနးနးကလဲာ်(၄)ဂၤအဂ့ၢ်န့ၣ် (KPSN)ၦၤကတိၤတၢ်ပၢနီၢ်၀ါခုၣ်ရှံစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲသ၀ီဖိတဖၣ်ဟဲက့ၤမံလၢအဟံၣ်အဆၢကတီၢ်န့ၣ်ပယီၤသုးကလၢၤလၢအအိၣ်ဖဲဖၣ်ပူၣ်အံၤခးလီၤကျိဖးဒိၣ်အဃိ ဖဲန့ၣ်သံ၀ဲ(၇)ဂၤႇဘၣ်ဒိဘၣ်ထံး၀ဲနးနးန့ၣ်(၄)ဂၤလီၤႉ ၦၤဘၣ်ဒိဘၣ်ထံးတဖၣ်အကျါပၣ်ဃုာ်၀ဲဖိသၣ်(၃)နံၣ်တဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါပယီၤသုးအံၤပညိၣ်ထီၣ်ဒုး၀ဲကမျၢၢ်ဒ်အံၤတမ့ၢ်ထဲအဆိကတၢၢ်တဘျီဘၣ်မၤ၀ဲဒ်အံၤထီဘိလီၤဒီး တၢ်ဖံးတၢ်မၤဒ်အံၤသ့ၣ်တဖၣ်မၤကမၣ်၀ဲထံဂုၤကီၢ်ဂၤတၢ်သိၣ်တၢ်သီအဃိ အပူၤကွံာ်လၢညါလံၤလံၤပဃ့ထီၣ်ထံဂုၤကီၢ်ဂၤလၢဟံးန့ၢ်ဂ့ၢ်၀ီဒီးကဒီၣ်တဲာ်ကွံာ်အ၀ဲသ့ၣ်မုၢ်ကျိၤ၀ဲၤကွာ်သ့ၣ်တဖၣ်အဂ့ၢ်န့ၣ် နီၢ်၀ါခုၣ်ရှံစံးအါထီၣ်၀ဲန့ၣ်လီၤႉ ၦၤလၢအသံတဖၣ်န့ၣ်မ့ၢ်၀ဲကျီၢ်ဒ့သ၀ီဖိနီၢ်တလူၢ်(၂)နံၣ်ႇနီၣ်ထူဖီ(၅)နံၣ်ႇနီၢ်တ့ၤနံၤလၤ၀့(၁၄)နံၣ်ႇစီၤဒ့ဖိ(၁၉)နံၣ်ႇစီၤက့ၣ်(၄၀)နံၣ်ႇနီၢ်အဲၣ်မူ(၂၂)နံၣ်ႇနီၢ်ဖီ၀ါ(၃၂)နံၣ်သ့ၣ်တဖၣ်ဒီး ၦၤလၢအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်၀ဲစီၤကၠီၤဘံၣ်(၃)နံၣ်ႇနီၢ်စဘီ(၁၇)နံၣ်ႇနီၢ်ကရံဆၢ(၂၈)နံၣ်ဒီးမီၤညိၣ်ထူ(၂၈)နံၣ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၄ သီအနံၤစ့ၢ်ကီး ခီဖျိပယီၤသုးကဘီယူၤဟဲကွံာ်လီၤမ့ၣ်ပိၢ်(၂)ဖျၢၣ်အဃိ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် မးထီကရူၢ် တဒွံခိၣ်သ၀ီဖိသံ၀ဲ(၂)ဂၤဒီး ဘၣ်ဒိဘၣ်ထံး၀ဲ(၆)ဂၤအကျါပၣ်ဃုာ်၀ဲဒီးဖိသၣ်စ့ၢ်ကီးန့ၣ်လီၤႉ ဒ်န့ၣ်အသိးဖဲအပူၤကွံာ်လါယနူၤအါရံၤ...

လါမးရှး ၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါမးရှး ၂ သီအနံၤ ကီၢ်ပယီၤဒွဲလၤကူၣ်သ့ဖိလၢအမံၤဟူသၣ်ဖျါတနီၤဟဲက့ၤထူၣ်ဖျဲးထီၣ်၀ဲဘၣ်ဆၣ် ၦၤသး၀ံၣ်တၢ်ဖိလၢအမံၤဟူသၣ်ဖျါစီၤဖိခွါတဟဲက့ၤထူၣ်ဖျဲးထီၣ်၀ဲဘၣ်အဃိကညီဒွဲလၤကူၣ်သ့ဖိဒီးကညီသးစၢ်သ့ၣ်တဖၣ်မုၢ်လၢ်၀ဲလၢအကဟဲက့ၤထူၣ်ဖျဲးထီၣ်စ့ၢ်ကီးန့ၣ်လီၤႉ စးထီၣ်လၢသုးဟံးန့ၢ်တၢ်စိတၢ်ကမီၤန့ၣ်တၢ်ဖီၣ်၀ဲၦၤသး၀ံၣ်တၢ်ဖိစီၤဖိခွါလၢအသး၀ံၣ်၀ဲတၢ်မုာ်တၢ်ခုၣ်တၢ်သး၀ံၣ်အံၤဒီး ဖဲန့ၣ်တၢ်တနၢ်ဟူအကစီၣ်နီတမံၤဘၣ်အသိးဖဲလါမးရှး ၂ သီအနံၤန့ၣ် ဒွဲလၤကူၣ်သ့ဖိလၢအမံၤဟူသၣ်ဖျါတနီၤဟဲက့ၤထူၣ်ဖျဲးထီၣ်၀ဲဘၣ်ဆၣ်ႇၦၤဟဲက့ၤထူၣ်ဖျဲးထီၣ်အကျါတပၣ်ဃုာ်၀ဲဒီးစီၤဖိခွါဘၣ်အံၤအဖီခိၣ်ဘၣ်သးတမုာ်၀ဲဘၣ်အဂ့ၢ်န့ၣ် ကညီၦၤသး၀ံၣ်တၢ်ဖိ K ဖိခွါ စံး၀ဲဒ်အံၤန့ၣ်လီၤႉ “ပနၢ်ဟူလၢဒွဲလၤကူၣ်သ့ဖိဟဲက့ၤထူၣ်ဖျဲးထီၣ်န့ၣ်ပသးခုဒိၣ်မးလီၤမီၤနီၤႉဘၣ်ဆၣ်သးတခုလၢလၢၦဲၤၦဲၤဘၣ်ႉဘၣ်မနုၤအဃိလဲၣ်န့ၣ်ပတနၢ်ဟူစီၤဖိခွါအတၢ်ကစီၣ်နီတမံၤဘၣ်ႉဒ်ယမ့ၢ်ကညီကလုာ်ဒူၣ်တဂၤအသိးအဲၣ်ဒိးစံးယဲလၢ မုၢ်လၢ်လၢအ၀ဲထူၣ်ဖျဲးထီၣ်စ့ၢ်မီၤနီၤႉဃ့ဘါထုကဖၣ်လၢအ၀ဲကပူၤဖျဲးထီၣ်အဂီၢ်ထီဘိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ၦၤမံၤဟူသၣ်ဖျါၦၤသး၀ံၣ်တၢ်ဖိစီၤဖိခွါအံၤမ့ၢ်ၦၤတဂၤလၢကွဲးဒီးသး၀ံၣ်၀ဲတၢ်မုာ်တၢ်ခုၣ်တၢ်သး၀ံၣ်သ့ၣ်တဖၣ်အသိး စးထီၣ်ဖဲတၢ်ဖီၣ်အီၤ၀ံၤအလီၢ်ခံန့ၣ်တၢ်စံၣ်ညီၣ်လီၤအီၤလၢကဘၣ်အိၣ်ဃိာ်ပူၤ(၂)နံၣ်ဒီး လၢအကဟဲက့ၤထူၣ်ဖျဲးထီၣ်အဂီၢ်လိၣ်က့ၤ၀ဲထဲ(၈)လါလီၤအဂ့ၢ်န့ၣ်(၈၈)ကၠိဖိလီၢ်လံၤကိၤမၠ့ၣ်အီၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲလီၤဘၣ်ဃိာ်ပူၤ(၂)နံၣ်အဃိကထူၣ်ဖျဲးထီၣ်အဂီၢ်န့ၣ် လိၣ်က့ၤထဲ(၈)လါလီၤႉအမ့ဟဲက့ၤထူၣ်ဖျဲးထီၣ်ဘၣ်ဆၣ် ဘၣ်ယိၣ်လၢတၢ်ကလိာ်ဘၢလိာ်ကွီၢ်ကဒီးအီၤတၢ်မူးတၢ်ရၢ်လၢအဂၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိကီၢ်ပယီၤဒွဲလၤကူၣ်သ့ဖိတနီၤဟဲက့ၤထူၣ်ဖျဲးထီၣ်အဃိၦၤလၢအဟ့ၣ်ဂံၢ်ဟ့ၣ်ဘါအ၀ဲသ့ၣ်တဖၣ်အိၣ်ခိးသဂၢၢ်လီၤ၀ဲအသိး ကညီသးစၢ်တဖၣ်စ့ၢ်ကီးကွဲးဖျါထီၣ်အတၢ်ထံၣ်လၢ(social media)အပူၤလၢ မုၢ်လၢ်၀ဲလၢစီၤဖိခွါကဟဲက့ၤထူၣ်ဖျဲးထီၣ်စ့ၢ်ကီးအိၣ်၀ဲန့ၣ်လီၤႉ သးစၢ်လၢတအဲၣ်ဒိးပာ်ဖျါအမံၤတဂၤစံး၀ဲ“တၢ်စးထီၣ်ဖီၣ်ၦၤအကျါန့ၣ်ပၣ်ဃုာ်ဒီးစီၤဖိခွါစ့ၢ်မီၤနီၤႉ ဖဲပပာ်ဖျါထီၣ်သးအခါန့ၣ်စ့ၢ်ကီးပဃ့ထီၣ်လၢတၢ်ကပျၢ်လီၤကွံာ်စီၤဖိခွါဒီးကညီသးစၢ်လၢတၢ်ဖီၣ်အီၤသ့ၣ်တဖၣ်လီၤႉဘၣ်ဆၣ်ဒွဲလၤကူၣ်သ့ဖိဟဲက့ၤထူၣ်ဖျဲးထီၣ်အကျါတပၣ်ဃုာ်စီၤဖိခွါဒီးသးစၢ်သ့ၣ်တဖၣ်ဘၣ်အဃိဘၣ်သးတမုာ်ဘၣ်ဖးဒိၣ်ညါလီၤႉဘၣ်မနုၤအဃိလဲၣ်န့ၣ်အ၀ဲသ့ၣ်န့ၣ်အတၢ်ကမၣ်တအိၣ်နီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပဃ့ထီၣ်လၢတၢ်ကပျၢ်ဖျဲးထီၣ်ကွံာ်ၦၤသး၀ံၣ်တၢ်ဖိစီၤဖိခွါဃုာ်ဒီးကညီသးစၢ်လၢအဂၤသ့ၣ်တဖၣ်ႇကလုာ်ဒူၣ်သးစၢ်လၢပယီၤသုးမီၤစိိရိၤဖီၣ်ဒုးဃာ်၀ဲဒံးသ့ၣ်တဖၣ်အမဲာ်ညါ စီၤဖိခွါစ့ၢ်ကီးခီဖျိအတၢ်အိၣ်ဆူၣ်အိၣ်ချ့တဂ့ၤဘၣ်အဃိဘၣ်ယိၣ်တၢ်လၢအဂီၢ်ဒိၣ်မးအဂ့ၢ်န့ၣ် ကညီသးစၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးကညီၦၤသး၀ံၣ်တၢ်ဖိစးဖီၤစ့ၢ်ကီးစံး၀ဲ“စးထီၣ်လၢတၢ်စးထီၣ်ကဲထီၣ်န့ၣ်တၢ်ဖီၣ်၀ဲစီၤဖိခွါလီၤႉစးထီၣ်လၢန့ၣ်လံၤလံၤတနၢ်ဟူအတၢ်ကစီၣ်နီတမံၤဘၣ်ႉမ့ၢ်တၢ်ဖီၣ်ဃာ်အီၤဖဲလဲၣ်ႇမ့ၢ်တၢ်အိၣ်သးအိၣ်ဒ်လဲၣ်န့ၣ်အိၣ်လၢတနံၣ်အတီၢ်ပူၤလံႉသူၣ်ကိၢ်သးဂီၤစ့ၢ်ကီးတၢ်လၢအသးသမူတၢ်ဘၣ်ယိၣ်အဂီၢ်ဒိၣ်မးလီၤႉလၢတၢ်န့ၣ်အဃိၦၤလၢအဟ့ၣ်ဂံၢ်ဟ့ၣ်ဘါအီၤတဖၣ်မ့ၢ်ဂ့ၤႇဒွဲလၤကူၣ်သ့ဖိလၢအဂၤတဖၣ်မ့ၢ်ဂ့ၤႇဆၢမုၢ်လၢ်လၢကစံးကတိၤတၢ်လၢစီၤဖိခွါအဂီၢ်အါအါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒ်သိးကညီၦၤသး၀ံၣ်တၢ်ဖိစီၤဖိခွါကဟဲက့ၤထူၣ်ဖျဲးထီၣ်အဂီၢ်ဒီးခီဖျိတၢ်တနၢ်ဟူစီၤဖိခွါအပရၢနီတမံၤဘၣ်အဃိ ကီၢ်ပူၤကီၢ်ချၢကညီသးစၢ်တဖၣ်အမဲာ်ညါအဟံၣ်ဖိဃီဖိစ့ၢ်ကီးကွဲးထီၣ်အတၢ်ထံၣ်တၢ်မုၢ်လၢ်သ့ၣ်တဖၣ်လၢစီၤဖိခွါကထူၣ်ဖျဲးထီၣ်အဂီၢ်န့ၣ်လီၤႉ

လါမးရှး ၃ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါမးရှး ၁ သီအနံၤ ကညီကီၢ်စဲၣ်သုးကီၣ်ကးအၦၤပၢၤလီၢ်ဆ့ၣ်နီၤ စီၤမၠ့ၣ်အူကိးထံၣ်၀ဲ(CDM)ကူၣ်သ့ၦၤမၤတၢ်ဖိ(၂၆၅)ဂၤလၢအဟဲက့ၤနုာ်လီၤမၤကဒါတၢ်မၤသ့ၣ်တဖၣ်အံၤဒီး သိၣ်က့ၤသီက့ၤ၀ဲအဂ့ၢ်န့ၣ်ကီၢ်စဲၣ်တၢ်ဘိးဘၣ်ရၤလီၤဒီးကမျၢၢ်တၢ်ရ့လိာ်မုာ်လိာ်၀ဲၤကျိိၤထုးထီၣ်ဘိးဘၣ်ရၤလီၤ၀ဲတၢ်ကစီၣ်န့ၣ်လီၤႉ ၦၤလၢအဟဲက့ၤနုာ်လီၤမၤကဒါတၢ်မၤတဖၣ်အံၤမ့ၢ်၀ဲကူၣ်သ့(CDM)ဖိတဖၣ်ဒီး ၦၤသ့ၣ်တဖၣ်အံၤတၢ်တထုးထီၣ်အ၀ဲသ့ၣ်လၢတၢ်မၤအပူၤဘၣ်ႇမ့မ့ၢ်တခီတၢ်ဟ့ၣ်အ၀ဲသ့ၣ်တၢ်ကမၣ်လၢတၢ်ဆိတီၢ်ကွံာ်၀ဲတၢ်သုးထီၣ်လီၢ်လး(၂)နံၣ်အဂ့ၢ် သ့ၣ်ညါဘၣ်န့ၣ်လီၤႉ ဖၣ်အၣ်ကီၢ်ဆၣ်တီၤဖုၣ်ကၠိသရၣ်မုၣ်လၢအက့ၤနုာ်လီၤမၤကဒါတၢ်မၤတဂၤစံး၀ဲ“ယက့ၤမၤကဒါတၢ်မၤဒ်အံၤမ့ၢ်ယသကိးတဖၣ်ကထံၣ်၀ဲဒ်လဲၣ်ဒုတသ့ၣ်ညါဘၣ်ႉခီဖျိဟံၣ်ဖိဃီဖိတၢ်အိၣ်သးအဃိတမၤတသ့ဘၣ်က့ၤမၤကဒါလီၤႉ မုၢ်ကျိၤ၀ဲၤကွာ်လၢတၢ်ချၢမ့အိၣ်ဒုတအဲၣ်ဒိးမၤပဒိၣ်တၢ်မၤလၢၤဘၣ်အနီၢ်ကီၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကီၢ်စဲၣ်သုးကီၣ်ကးကရၢဖိတၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲဖၣ်အၣ်၀့ၢ်ကွဲၢ်ကဘီဘျီၣ်ပူၤဒီး ကတိၤရှဲပၠးလီၤ၀ဲသုးဟံးန့ၢ်တၢ်စိတၢ်ကမီၤအဂ့ၢ်အကျိၤတဆီဘၣ်တဆီန့ၣ်လီၤႉ တကးဒံးဘၣ်မ့မ့ၢ်ပဒိၣ်ၦၤမၤတၢ်ဖိန့ၣ်တဘၣ်မၤဘၣ်ထွဲလိာ်သးဒီးထံရူၢ်ကီၢ်သဲးပၣ်တံၣ်ဘၣ်အမဲာ်ညါစံးလီၤ၀ဲလၢ(NUG,CRPH,PDF)လၢသုးကီၣ်ကးတပာ်ပနီၣ်၀ဲလၢအဖိးသဲစးဘၣ်တဖၣ်အတၢ်ဟူးတၢ်ဂဲၤန့ၣ် မ့ၢ်တၢ်မၤတၢထီၣ်တၢလီၤတၢ်ဖံးတၢ်မၤလီၤအဂ့ၢ်န့ၣ် သ့ၣ်ညါညါဘၣ်န့ၣ်လီၤႉ ကူၣ်သ့ၦၤမၤတၢ်ဖိ(၂၆၅)ဂၤလၢအဟဲက့ၤနုာ်လီၤမၤက့ၤတၢ်မၤတဖၣ်အကျါပၣ်ဃုာ်၀ဲဒၣ်တီၤထီကၠိသရၣ်(၃၀)ဂၤႇတီၤခၢၣ်သးကၠိသရၣ်(၇၈)ဂၤႇတီၤဖုၣ်ကၠိသရၣ်(၁၂၈)ဂၤဒီး၀ဲၤဒၢးၦၤမၤတၢ်ဖိ(၁၃)ဂၤအဂ့ၢ်န့ၣ် ကီၢ်စဲၣ်တၢ်ဘိးဘၣ်ရၤလီၤဒီးကမျၢၢ်တၢ်ရ့လိာ်မုာ်လိာ်၀ဲၤကျိၤအလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ကညီကီၢ်စဲၣ်အပူၤၦၤလၢအနုာ်လီၤပၣ်ဃုာ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤ(CDM)ပူၤတဖၣ်တၢ်ဖီၣ်၀ဲအိၣ်အသိး ၦၤအါဒၣ်တက့ၢ်န့ၣ်ဟးစံၣ်အိၣ်ခူသူၣ်ဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်သုးကီၣ်ကးကူၣ်သ့ကိတိာ်၀ဲၤကျိၤထုးထီၣ်ပာ်ဖျါ၀ဲအသိးဖဲ(၂၀၂၁)နံၣ်အတီၢ်ပူၤ ထံကီၢ်ဒီတဘ့ၣ်အပူၤကူၣ်သ့ၦၤမၤတၢ်ဖိခဲလၢာ်အိၣ်၀ဲ(၄၅၁ႇ၅၀၆)ဂၤဒီးဖဲန့ၣ်အကျါနုာ်လီၤ၀ဲဒၣ်လၢ(CDM)ပူၤအိၣ်၀ဲ(၁၂၁ႇ၄၅၅)ဂၤ အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါမ့မ့ၢ်ကညီကီၢ်စဲၣ်အပူၤကူၣ်သ့ၦၤမၤတၢ်ဖိခဲလၢာ်အိၣ်၀ဲ(၁၆ႇ၆၀၄)ဂၤဒီးဖဲန့ၣ်အကျါနုာ်လီၤဟူးဂဲၤပၣ်ဃုာ်၀ဲလၢ(CDM)ပူၤအိၣ်၀ဲ(၄ႇ၄၂၈)ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လါမးရှး ၃ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါယနူၤအါရံၤအတီၢ်ပူၤခီဖျိတၢ်ဒုးကဲထီၣ်အဃိ ဖဲကီးတရံးကီၢ်ဆၣ်ကလံၤထံးလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိးအကတီၢ်ဖဲန့ၣ်ဟံၣ်အဖျၢၣ်(၁၀၀)ဃၣ်ဃၣ်ပယီၤသုးနုာ်လီၤမၤဟးဂီၤဟံးန့ၢ်၀ဲတၢ်ဖိတၢ်လံၤသ့ၣ်တဖၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ ခီဖျိိတၢ်ဒုးကဲထီၣ်အဃိမၠိၣ်ဟီလီၢ်က၀ီၤဖိလၢအဘၣ်ဃ့ၢ်တၢ်ဒုးဟံၣ်(၄၀)ဖျၢၣ်ဃုာ်ဒီးမီမးသ၀ီသီႇကၠီၤစှၤကိႇအီးဖးဖိဒီးအီးဖးဖးဒိၣ်သ၀ီတဖၣ်အပူၤပယီၤသုးနုာ်လီၤအိၣ်ဆိး၀ဲဒီးမၤဟးဂီၤ၀ဲသ၀ီဖိအဟံၣ်အဃီဟံးန့ၢ်၀ဲတၢ်အီၣ်တၢ်အီႇတၢ်ဖိတၢ်လံၤဒီးဖီၣ်အီၣ်၀ဲဆၣ်ဖိကီၢ်ဖိလၢတၢ်ဘုၣ်ဃာ်၀ဲလၢဟံၣ်သ့ၣ်တဖၣ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ လီၢ်က၀ီၤဖိတဂၤစံး၀ဲ“သ၀ီကိးဖျၢၣ်ဒဲးလၢပယီၤသုးနုာ်လီၤန့ၣ်ကဲထီၣ်သးဒ်န့ၣ်ခဲလၢာ်လီၤႉသ၀ီဖိတအိၣ်ဘၣ်အဃိအ၀ဲသ့ၣ်မၤဟးဂီၤ၀ဲလီၤႉၦၤမ့အိၣ်န့ၣ်အ၀ဲသ့ၣ်တမၤ၀ဲဘၣ်ႉသ၀ီဖိတဖၣ်နါက့အိၣ်ဒီးပယီၤသုးတပူၤဃီလၢသ၀ီပူၤတဘူၣ်ဘၣ်အဃိဟးစံၣ်အိၣ်၀ဲလီၤႉအ၀ဲသ့ၣ်ဟံးန့ၢ်၀ဲတၢ်ခွဲးတၢ်ယၤဒီးဟံးန့ၢ်၀ဲသ၀ီဖိအဟုသးႇသိအီၣ်ႇအံသၣ်ႇကပၢၤနီၣ်ဒိႇတၢ်လိမုၢ်ႇလီဆၣ်ဒၢ(ဘဲးထြံး)တဖၣ်လီၤႉမ့၀ံၤအီၣ်ဟုၣ်စ့ၢ်ကီး၀ဲထိၣ်ဒ့ၣ်ႇဆီတဖၣ်မီၤနီၤႉတၢ်အီၣ်တၢ်အီဒီးတၢ်ဖိတၢ်လံၤသ့ၣ်တဖၣ်န့ၣ်ကဲထီၣ်ကဒါလၢအ၀ဲသ့ၣ်အဂီၢ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါပယီၤသုးနီၣ်ဂံၢ်အဂၤ(၈၀)ဃၣ်ဃၣ်လၢအအိၣ်ဆီလီၤသးဖဲကမဲၢ်ကိဒီးအီးဖးဖိသ၀ီပူၤလၢအယံၤ၀ဲတလါဘျဲၣ်အတီၢ်ပူၤအံၤ အ၀ဲသ့ၣ်နုာ်လီၤမၤဟးဂီၤသ၀ီဖိအဟံၣ်အဃီတကးဒံးဘၣ် ဟံၣ်ကရၢၢ်လၢအ၀ဲသ့ၣ်နုာ်လီၤအိၣ်၀ဲတဖၣ်န့ၣ်စ့ၢ်ကီးခူၣ်ဃာ်၀ဲတၢ်ပူၤအဂ့ၢ်န့ၣ် လီၢ်က၀ီၤဖိလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤအခါန့ၣ်ပယီၤသုးသုးကျိၤလၢအဟဲနုာ်လီၤလၢကီးတရံးကလံၤထံးဟီၣ်က၀ီၤတဖၣ်ဒီး ဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၆)ႇသုးရ့ၣ်(၁၈)ဒီး သုးရ့ၣ်(၂၇)တဖၣ်အဘၢၣ်စၢၤတၢ်ခးလိာ်သးကဲထီၣ်ဒီး ဖဲန့ၣ်ခီဖျိပယီၤသုးခးလီၤနါကျိဖးဒိၣ်တကးဒံးဘၣ်မၤ၀ဲတၢ်ထီၣ်ဒုးလၢကဘီယူၤအဃိ လီၢ်က၀ီၤဖိတကလးဘျဲၣ်ဘၣ်ဃ့ၢ်မှံဟးဖျိး၀ဲဒၣ်န့ၣ်လီၤႉ ကတီၢ်အံၤလီၢ်က၀ီၤၦၤဃ့ၢ်တၢ်ဒုးဖိတနီၤက့ၤအိၣ်လၢအဒူသ၀ီအဟံၣ်အဃီလံဘၣ်ဆၣ် ခီဖျိပယီၤသုးအံၤတဟးထီၣ်ဒံးလၢသ၀ီပူၤဆဲးအိၣ်ဒံး၀ဲအဃိလီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်ကဒါန့ၣ်လီၤႉ လၢတၢ်န့ၣ်အဃိဟံၣ်ခိၣ်လၢအတက့ၤဘၣ်ဒံးလၢအဒူသ၀ီအိၣ်ဒံး၀ဲ(၁၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ကီးတရံးကလံၤထံးလီၢ်က၀ီၤဒူဖိသ၀ီဖိလၢအဘၣ်ဃ့ၢ်မှံဟးဖျိးသ့ၣ်တဖၣ်အံၤအဂီၢ် တၢ်ဆီလီၤပာ်လီၤန့ၢ်အ၀ဲသ့ၣ်အလီၢ်အကျဲလီၤလီၤဆီဆီတအိၣ်၀ဲဘၣ်ဒီးအိၣ်ဆိး၀ဲဒၣ်လၢအဘူးအတံၢ်အသမူသကိးအဟံၣ်န့ၣ်လီၤႉ လီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤအဂီၢ် တၢ်ကရၢကရိတနီၤဟဲဆီၣ်ထွဲမၤစၢၤ၀ဲတၢ်အီၣ်တၢ်အီအိၣ်၀ဲဘၣ်ဆၣ်တကူတလၢ၀ဲဘၣ်အဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ