ခ့ၣ်အဲးစံၣ် – KIC News

လါမးရှး ၂ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါဖ့ၤဘြူၤအါရံၤ ၂၈ သီအနံၤ သုးကီၣ်ကးထုးထီၣ်ဘိးဘၣ်ရၤလီၤဃ့ကညး၀ဲ ကလုာ်ဒူၣ်ဖီၣ်စုက၀ဲၤတၢ်ကရၢကရိ(EAOs)ဒီးၦၤလၢအဘၣ်ထွဲခဲလၢာ်ကနုာ်လီၤပၣ်ဃုာ်မၤသကိးတၢ်လၢတၢ်မုာ်တၢ်ခုၣ်တၢ်မၤအကျဲပူၤအံၤအဖီခိၣ်န့ၣ် (EAOs)တဖၣ်က့ၤခီၣ်ဆၢကဒါ၀ဲလၢတၢ်ကဘၣ်ဘှါဆှဲဆိလၢ တကီၢ်ခါသုးဟံးန့ၢ်တၢ်စိတၢ်ကမီၤတၢ်ဂ့ၢ်ကီအဂီၢ်လိၣ်၀ဲဒၣ်န့ၣ်လီၤႉ ဘၣ်ဃးဒီးပယီၤသုးမီၤစိရိၤအလံာ်တၢ်ဘိးဘၣ်ရၤလီၤအပူၤစံး၀ဲလၢ တၢ်ပတုာ်တၢ်ခးဒီးလီၤစိၤတၢ်မုာ်တၢ်ခုၣ်အဂီၢ် (EAOs)ဒီးၦၤလၢအဘၣ်ထွဲတဖၣ်ခဲလၢာ်လၢတၢ်ကမၤအါထီၣ်လဲၢ်ထီၣ်တၢ်မုာ်တၢ်ခုၣ်တၢ်မၤအကျဲအဂီၢ်န့ၣ် ကနုာ်လီၤပာ်ဖှိၣ်မၤသကိးတၢ်ဒ်ကယဲၢ်မ့ၢ်တၢ်သ့အိၣ်ဒီးၦၤအသိးအံၤအဖီခိၣ် ကညီဒီကလုာ်စၢဖှိၣ်ကရၢ(KNU)တကပၤက့ၤခီၣ်ဆၢကဒါ၀ဲဒ်အံၤန့ၣ်လီၤႉ ခ့ၣ်အဲၣ်ယူၣ်ၦၤကတိၤတၢ်ပၢပဒိၣ်စီၤတီနံစံး၀ဲလၢ“ပကိး၀ဲဒၣ်လၢ(Transitional justice)န့ၣ်ကဘၣ်အၢၣ်လီၤတူၢ်လိာ်၀ဲလီၤတံၢ်လီၤဆဲးလီၤႉဘၣ်မနုၤအဃိလဲၣ်န့ၣ်တၢ်အ၀ဲအံၤမ့တအိၣ်ဘၣ်န့ၣ်တၢ်တုၤသိးထဲသိးႇၦၤလၢအတူၢ်ဘၣ်ခီၣ်ဘၣ်တၢ်သ့ၣ်တဖၣ်န့ၣ်မ့ၢ်ဂ့ၤဒီးဟံၣ်ဖိဃီဖိလၢအသးသမူလီၤမူၤလီၤမၢ်လၢတၢ်မၤဆှူၣ်မဲာ်ကဲၤမဲာ်တၢ်မၤသံမၤ၀ီတဖၣ်ဘၣ်အိၣ်ဒီဒူၣ်လီၤႉတချုးဒံးလၢအဟံးန့ၢ်တၢ်စိတၢ်ကမီၤဒံးဘၣ်န့ၣ်အ၀ဲသ့ၣ်မၤကမၣ်ဃာ်၀ဲလံႇတၢ်သ့ၣ်တဖၣ်အံၤကဘၣ်တူၢ်၀ဲဒၣ်ကဘၣ်ဟံး၀ဲမူဒါကဘၣ်အိၣ်၀ဲလီၤတံၢ်လီၤဆဲးလီၤႉတၢ်သ့ၣ််တဖၣ်အံၤမ့တတူၢ်လိာ်၀ဲဘၣ်န့ၣ်တၢ်ထံၣ်လိာ်တဲသကိးန့ၣ်ကဲထီၣ်အဂ့ၢ်တအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ အပူၤကွံာ်လၢညါခါလံၤလံၤပယီၤသုးအံၤအတၢ်သူၣ်တီသးလိၤမ့အိၣ်လၢထံကီၢ်ဒီးထံဖိကီၢ်ဖိကမျၢၢ်အဖီခိၣ်န့ၣ် ကတီၢ်အံၤထံကီၢ်ကလဲၤထီၣ်လဲၤထီ၀ဲလံဘၣ်ဆၣ်သနါက့ခဲအံၤအ၀ဲသ့ၣ်ဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤမၤ၀ဲဒၣ်တၢ်စုဆူၣ်ခီၣ်တကးအဖီခိၣ်အံၤန့ၣ် ကဘၣ်တၢၣ်ပီၣ်တဲသကိးတၢ်ဒီးအ၀ဲသ့ၣ်အလီၢ်တအိၣ်ဘၣ်အဂ့ၢ်န့ၣ် ပဒိၣ်စီၤတီနံစံးအါထီၣ်၀ဲန့ၣ်လီၤႉ ပယီၤသုးမီၤစိရိၤအလံာ်တၢ်ပာ်ဖျါအပူၤ ထံကီၢ်ဒီဘ့ၣ်ကဒိးန့ၢ်ဘၣ်လီၤစိၤတၢ်မုာ်တၢ်ခုၣ်ႇ ကမၤဒိၣ်ထီၣ်လဲၢ်ထီၣ်တၢ်မုာ်တၢ်ခုၣ်တၢ်မၤအကျဲတဖၣ်ကန့ၢ်အဂီၢ်ဒီးတၢ်တြီဆၢဒီသဒၢကူစါယါဘျါခိ၀ံၣ်အဂီၢ် ကမၤအါထီၣ်၀ဲတၢ်ဆိကတီၢ်တၢ်ပတုာ်တၢ်ခးအမုၢ်နံၤမုၢ်သီစးထီၣ်ဖဲတနံၣ်အံၤ(၂၀၂၂)လါမးရှး ၁ သီတုၤလၢနံၣ်လၢာ်တစုအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါစးထီၣ်လၢ(၂၀၀၈)တုၤလၢ(၂၀၂၂)နံၣ်န့ၣ်ပယီၤသုးမီၤစိရိၤထုးထီၣ်ဘိးဘၣ်ရၤလီၤ၀ဲကဆိကတီၢ်ဃာ်တၢ်ပတုာ်တၢ်ခးအိၣ်၀ဲ(၂၀)ဘျီလံအသိး ဖဲအပူၤကွံာ်ကီၢ်ပယီၤကီၢ်စၢဖှိၣ်မုၢ်နံၤတၢ်ရဲၣ်တၢ်ကျဲၤအခါစ့ၢ်ကီး (EAOs)တၢ်ကရၢကရိ(၇)ဒူၣ်လၢအဆဲးလီၤ(NCA)တဖၣ်ဒီး(EAOs)တၢ်ကရၢကရိ(၄)ဒူၣ်လၢအတဆဲးလီၤဘၣ်ဒံးတၢ်ပတုာ်တၢ်ခးဘၣ်သ့ၣ်တဖၣ်ဟဲထီၣ်၀ဲဒီး တၢၣ်ပီၣ်တဲသကိး၀ဲတၢ်မုာ်တၢ်ခုၣ်တၢ်ဂ့ၢ်တၢ်ကျိၤသ့ၣ်တဖၣ်အဂ့ၢ်န့ၣ် ပယီၤသုးမီၤစိရိၤအလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ကလုာ်ဒူၣ်ဖီၣ်စုက၀ဲၤတၢ်ကရၢကရိလၢအဆဲးလီၤ(NCA)တၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲကရူၢ်(PPST)အံၤစ့ၢ်ကီးစးထီၣ်လၢသုးဟံးန့ၢ်တၢ်စိတၢ်ကမီၤန့ၣ်ထုးထီၣ်ဘိးဘၣ်ရၤလီၤ၀ဲလၢတၢ်တဲသကိးထံရူၢ်ကီၢ်သဲးဆိကတီၢ်အသးလံအသိးႇတၢ်မုာ်တၢ်ခုၣ်တၢ်မၤအကျဲအမဲာ်ညါန့ၣ်ကဘၣ်ဃဲၣ်လီၤဘှါရှဲဆိအီၤလၢထံရူၢ်ကီၢ်သဲးတၢ်ဃံးတၢ်စ့ၤအဂီၢ်လိၣ်၀ဲအဂ့ၢ်န့ၣ်(PPST)ၦၤကတိၤတၢ်ပၢသုးဖိမၠိ၀့စံး၀ဲဒ်အံၤန့ၣ်လီၤႉ “တၢ်လၢထံကီၢ်ဒီဘ့ၣ်တၢ်ပတုာ်တၢ်ခးအံၤမ့ၢ်တၢ်သိၣ်တၢ်သီသနူလၢပ၀ဲ(PPST)ဃုာ်ဒီး(EAOs)တဖၣ်ကဘၣ်ဖီၣ်ဃာ်အီၤလီၤႉဘၣ်ဆၣ်တၢ်တပတုာ်တၢ်ခးအံၤတကဲထီၣ်လၢထံကီၢ်ဒီတဘ့ၣ်နီၢ်နီၢ်ဒံးဘၣ်မီၤနီၤႉ အ၀ဲတကပၤဘိဘၣ်ရၤလီၤ၀ဲဘၣ်ဆၣ်ဖီၣ်စုက၀ဲၤတၢ်သဘံၣ်သဘုၣ်မ့အိၣ်ဒံး၀ဲန့ၣ် ကကဲထီၣ်က့ၤတၢ်ပတုာ်တၢ်ခးလၢအတအိၣ်ဒီးအလုၢ်အၦ့ၤဘၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ အပူၤကွံာ်စ့ၢ်ကီးပယီၤသုးမီၤစိရိၤအံၤထုးထီၣ်ဘိးဘၣ်ရၤလီၤ၀ဲကဆိကတီၢ်တၢ်ပတုာ်တၢ်ခးအကလုာ်ကလုာ်ဒီးဘိးဘၣ်ရၤလီၤ၀ဲလၢကတၢၣ်ပီၣ်တဲသကိးထံရူၢ်ကီၢ်သဲးဘၣ်ဆၣ် ဖီၣ်စုက၀ဲၤတၢ်သဘံၣ်သဘုၣ်ဟဲအါထီၣ်၀ဲဒၣ်ကွ့ၢ်ကွ့ၢ်လၢကီၢ်ပူၤအသိးလၢထံကီၢ်ဒီဘ့ၣ်အပူၤခံခီခံကပၤတၢ်ဒုးကဲထီၣ်ဒံး၀ဲဒၣ်န့ၣ်လီၤႉ ခီဖျိဖီၣ်စုက၀ဲၤတၢ်သဘံၣ်သဘုၣ်တဖၣ်အဃိထံဖိကီၢ်ဖိကမျၢၢ်လၢအကထိဘၣ်သံ၀ဲဒၣ်အါအါဂီၢ်ဂီၢ်ဒီး ပယီၤသုးအံၤဒွဲၣ်အူကွံာ်သ၀ီဒီတဖျၢၣ်ႇကွံာ်လီၤမ့ၣ်ပိၢ်ဒီးကဘီယူၤႇသူ၀ဲကမျၢၢ်ဒ်တၢ်ဒီသဒၢစုက၀ဲၤတခါအသိးတၢ်သ့ၣ်တဖၣ်အံၤ ပယီၤသုးမီၤစိရိၤမၤထီဒါလုၢ်သ့ၣ်ခါပတာ်ဒံး၀ဲအဖၢမုၢ်အဂ့ၢ်န့ၣ်...

လါမးရှး ၂ သီႇ ၂၀၂၂ နံၣ်ႇ ခ့ၣ်အဲးစံၣ် မၠၣ်၀တံၣ်ကလံၤထံးလ့က့ၣ်ကိာ်ဟီၣ်က၀ီၤလီၢ်က၀ီၤဖိလၢအဘၣ်ဃ့ၢ်မှံဟးဖျိးသ့ၣ်တဖၣ်အံၤအဂီၢ် တၢ်ရဲၣ်တၢ်ကျဲၤအိၣ်လၢတၢ်ကမၤလိန့ၢ်၀ဲဖိဒံဖိသၣ်တဖၣ်အလံာ်ဒီးတၢ်ကဟ့ၣ်၀ဲပိာ်မုၣ်ပိာ်မၢၤတၢ်သ့စုခီၣ်ဘၣ်တဖၣ်အိၣ်၀ဲအဂ့ၢ်န့ၣ် ၦၤဘၣ်မူဘၣ်ဒါတဖၣ်စံးဘၣ်ခ့ၣ်အဲးစံၣ်န့ၣ်လီၤႉ ကၠိသရၣ်မုၣ်လၢအအိၣ်ဖဲၦၤလီၢ်အိၣ်ကဒုအလီၢ်တဂၤစံး၀ဲ“ဖိသၣ်သ့ၣ်တဖၣ်အံၤမ့ၢ်ဖိသၣ်လၢအစးထီၣ်ကၠိသီသီဖဲလ့က့ၣ်ကိာ်ကၠိတဖၣ်လီၤမီၤနီၤ ပစံၣ်ပၣ်ဃုာ်၀ဲတပူၤဃီလီၤႉၦၤလီၢ်အိၣ်ကဒုလီၢ်ဖဲအံၤန့ၣ်ဖိသၣ်ပၣ်၀ဲအဂၤ(၈၀)ညါလီၤႉ ကဘၣ်ထီၣ်ကၠိအရွဲၢ်လီၤမီၤနီၤႇဖိသၣ်နီၢ်ဒိၣ်အိၣ်ဒီဒူၣ်ညါမီၤနီၤႉလၢပကက့ၤသိၣ်လိိတၢ်အဂီၢ်ပကကွဲးလီၤကဒါက့ၤလံာ်ညိၣ်သိၣ်ဒိၣ်လီၤႉလံာ်မ့၀ံၤႇပသူၣ်ထီၣ်တၢ်သူၣ်ထီၣ်မ့၀ံၤန့ၣ်ပကစးထီၣ်သိလိတၢ်လီၤႉပကသိၣ်လိ၀ဲကီၤလၤ၀ါႇခီၣ်ဖၠူထၢၣ်ႇလံာ်ကညီတဖၣ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ လၢန့ၣ်အမဲာ်ညါၦၤလီၢ်အိၣ်ကဒုဖိလၢအဂၤသ့ၣ်တဖၣ်စ့ၢ်ကီးတၢ်ရဲၣ်တၢ်ကျဲၤအိၣ်လၢတၢ်ကမၤစ့ၢ်ကီး၀ဲဒ်အံၤအသိး လၢၦၤလီၢ်အိၣ်ကဒုဖိပိာ်မုၣ်ပိာ်မၢၤသ့ၣ်တဖၣ်အဂီၢ်န့ၣ်တၢ်ကဟ့ၣ်၀ဲတၢ်သ့စုခီၣ်ဘၣ်ဘၣ်ဃၣ်ဃးဒီးတၢ်ဆးဆ့က့ၤဖီတၢ်သိၣ်လိတဖၣ်စ့ၢ်ကီးအဂ့ၢ်န့ၣ် ကၠိသရၣ်မုၣ်စံးအါထီၣ်၀ဲန့ၣ်လီၤႉ လ့က့ၣ်ကိာ်ဟီၣ်က၀ီၤအပူၤဖိသၣ်လၢအကထီၣ်ကၠိသ့အရွဲၣ်သ့ၣ်တဖၣ်န့ၣ် ခီဖျိတၢ်တြီဆၢဒီသဒၢခိ၀ံၣ်တၢ်ဘၣ်ကူဘၣ်ဂာ်တၢ်အိၣ်သးဒီးသုးဟံးန့ၢ်တၢ်စိတၢ်ကမီၤ၀ံၤအလီၢ်ခံ ခီဖျိဒုးယၤတၢ်သဘံၣ်သဘုၣ်ဟဲအိၣ်ထီၣ်၀ဲလၢဟီၣ်က၀ီၤပူၤအဃိ ကၠိဖိလၢကဘၣ်အိၣ်ကၠိအရွဲၣ်ဃုာ်ဒီးလီၢ်က၀ီၤဖိလၢအကထိဘၣ်ဃ့ၢ်မှံဟးဖျိး၀ဲအသိးကၠိစ့ၢ်ကီးတၢ်ကးတံၢ်ဃာ်အီၤန့ၢ်၀ဲ(၃)နံၣ်ဃၣ်ဃၣ်လံန့ၣ်လီၤႉ လၢတၢ်အိၣ်သးဒ်အံၤအဖီခိၣ်ဟီၣ်က၀ီၤပူၤဖိဒံဖိသၣ်သ့ၣ်တဖၣ်ဖဲဘၣ်ဟးစံၣ်အကတီၢ်ဒ်သိးအ၀ဲသ့ၣ်ကမၤလိဘၣ်တၢ်ဒီးဒ်သိးပိာ်မုၣ်ပိာ်မၢၤသ့ၣ်တဖၣ်ကသ့၀ဲတၢ်လုၢ်အီၣ်နီၢ်ခိသးသမူတၢ်သ့စုခီၣ်ဘၣ်တၢ်သ့တၢ်ဘၣ်အဂီၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤပူၤ ကညီကူၣ်သ့ဆဲးလၤ၀ဲၤကျိၤကၠိသရၣ်၊သရၣ်မုၣ်ဒီးၦၤကူၣ်ဘၣ်ကူၣ်သ့ဖိတဖၣ်ပာ်ဖှိၣ်ထီၣ်သးဒီးဘၣ်ရဲၣ်ကျဲၤ၀ဲဒ်အံၤလီၤအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ “ပတမၤလိဘၣ်တၢ်န့ၢ်၀ဲ(၃)နံၣ်ဃၣ်ဃၣ်လံႉဖဲကၠိထီၣ်အခါန့ၣ်ယအိၣ်(၇)တီၤမီၤနီၤႉခဲအံၤဘၣ်စံၣ်ဘၣ်သုးလီၢ်သုးကျဲတလီၢ်လီၢ်ဒီးပဟဲတုၤ၀ဲဖဲသးၦၢ်လီၢ်အိၣ်ကဒုလီၢ်ႇၦၤကသိၣ်လံာ်အဃိယကနုာ်လီၤထီၣ်ကဒါကၠိလီၤႉယဆိမိၣ်ဃာ်လၢယကမၤလိခီၣ်ဖၠူထၢၣ်လီၤႉယတိာ်ပာ်လၢယမ့ၢ်ဖျိထီၣ်န့ၣ်ယကနုာ်လီၤသိၣ်လိစၢၤဖိသၣ်သ့ၣ်တဖၣ်အလံာ်လီၤ”အဂ့ၢ်န့ၣ် ၦၤလီၢ်အိၣ်ကဒုကၠိဖိပိာ်မုၣ်ဖိတဂၤစံး၀ဲန့ၣ်လီၤႉ ခီဖျိပယီၤသုးဒီးသုးခိးကီၢ်ဆၢ(BGF)သုးအိၣ်ဆီလီၤသးဒံးလၢလ့က့ၣ်ကိာ်ဟီၣ်က၀ီၤဃုာ်ဒီးသ၀ီ(၅)ဖျၢၣ်ပူၤဒံးအဃိ ကက့ၤအိၣ်လၢသ၀ီပူၤအဂီၢ်တၢ်ကီတၢ်ခဲအိၣ်ဒံး၀ဲအဂ့ၢ်န့ၣ် ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ လၢလ့ၣ်က့ၣ်ကိာ်ဟီၣ်က၀ီၤအပူၤခီဖျိတၢ်ကးတံၢ်ဃာ်ကၠိတစှၤန့ၢ်အဖျၢၣ်(၁၀)ဘၣ်အဃိ ကၠိဖိလၢကဘၣ်ထီၣ်ကၠိအဂၤ(၂၀၀၀)ဃၣ်ဃၣ်တမၤလိဘၣ်တၢ်ဘၣ်ဒီး ဘၣ်ဟးစံၣ်ဒံး၀ဲအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါမးရှး ၁ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိ(အိၤမံၤခြိၤ)တၢ်ဆါဘၣ်ကူဘၣ်ဂာ်ဟဲအါထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ တၢ်မၤဃံးထီၣ်က့ၤတၢ်နုာ်လီၤဟးထီၣ်လၢဟီၣ်က၀ီၤပူၤအဂ့ၢ်န့ၣ် ခ့ၣ်အဲၣ်ယူၣ်ဆူၣ်ချ့မၤစၢၤ၀ဲၤကျိၤ(KDHW)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ (အိၤမံၤခြိၤ)တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်၀ဲလၢဟီၣ်ခိၣ်ဒီဘ့ၣ်အသိး လၢကီၢ်ပယီၤအပူၤစ့ၢ်ကီးခီဖျိတၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်အဃိ တၢ်သိၣ်တၢ်သီလၢအပူၤကွံာ်တၢ်ပာ်လီၤဃာ်၀ဲသ့ၣ်တဖၣ်အံၤတၢ်က့ၤမၤဃံးထီၣ်အီၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤကီၢ်ရ့ၣ်ႇကီၢ်ဆၣ်တဖၣ်အပူၤလီၤအဂ့ၢ်န့ၣ် (KDHW)၀ဲၤကျိၤခိၣ်ပဒိၣ်စီၤဒဲမိခ့ၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အပတီၢ်ခီဒုခဲအံၤမ့ဘၣ်တဲဘၣ်ဖဲအဟဲကဲထီၣ်ဒီးအသဟီၣ်ဆူၣ်မးႇဒီးဖဲန့ၣ်ပပာ်လီၤ၀ဲတၢ်ဘျၢၦၤကိး ဂၤဒဲးန့ၣ်မ့ကလဲၤလၢတၢ်လီၢ်တခါခါမ့ၢ်ဂ့ၤႇမ့အိၣ်ဟဲက့ၤလၢ(risk area)မ့ၢ်ဂ့ၤန့ၣ်ပကဘၣ်မၤကွၢ်(test)လီၤႉဒ်သိးကီၢ်ရ့ၣ်ကီၢ်ဆၣ်ကဟံးမူဒါအဂီၢ်ပပာ်လီၤ၀ဲဒၣ်ခိ၀ံၣ်တၢ်သိတၢ်သီတဖၣ်လီၤႉကဘၣ်လဲၤဒ်တၢ်သိၣ်တၢ်သီအသိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခိ၀ံတၢ်ဆါဘၣ်ကူဘၣ်ဂာ်လၢတကီၢ်ခါခဲအံၤန့ၣ်ပနီၢ်ကစၢ်ဒၣ်၀ဲသမံသမိးလီၤသးသ့၀ဲအသိး ခီဖျိကတီၢ်အံၤတၢ်ဒုးကဲထီၣ်လၢဟီၣ်က၀ီၤပူၤအဃိတၢ်ထၢန့ၢ်တၢ်ဆါဘၣ်ကူဘၣ်ဂာ်တၢ်အိၣ်သးတန့ၢ်ဒံး၀ဲဘၣ်ဘၣ်ဆၣ် ထံၣ်ဘၣ်လၢတၢ်ဘၣ်ကူဘၣ်ဂာ်အိၣ်၀ဲအါဒီးတၢ်သံတၢ်ၦၢ်တအိၣ်ဒံး၀ဲဘၣ်အဂ့ၢ်န့ၣ် ပဒိၣ်စီၤဒဲမိခ့ၤစံးအါထီၣ်၀ဲန့ၣ်လီၤႉ ကတီၢ်အံၤခီဖျိတၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်လၢခ့ၣ်အဲၣ်ယူၣ်(သုးက့ ၇)ဟီၣ်က၀ီၤဖၣ်အၣ်ကီၢ်ရ့ၣ်ပူၤအဃိ တၢ်မၤဃံးထီၣ်၀ဲတၢ်ဟးထီၣ်နုာ်လီၤဒီး ကတီၢ်အံၤလၢတၢ်ကနုာ်လီၤသမံသမိး၀ဲအဂီၢ်စ့ၢ်ကီးတၢ်ကီတၢ်ခဲအိၣ်အဃိ ခိ၀ံၣ်တၢ်သိၣ်တၢ်သီလၢလီၢ်ခၢၣ်သးႇကီၢ်ရ့ၣ်ႇကီၢ်ဆၣ်အပတီၢ်ထုးထီၣ်ဃာ်၀ဲသ့ၣ်တဖၣ်တၢ်ကက့ၤဘှီဘၣ်ထုးထီၣ်ကဒါ၀ဲဒီးတၢ်သမံသမိးခိ၀ံၣ်တၢ်ဖိတၢ်လံၤလၢတၢ်ဆှၢလီၤ၀ဲသ့ၣ်တဖၣ်အံၤဒ်တၢ်လိၣ်အိၣ်အသိးထုးထီၣ်သူ၀ဲသ့အဂ့ၢ်န့ၣ် (KDHW)စံး၀ဲန့ၣ်လီၤႉ ဒ်န့ၣ်အသိး(အိၤမံၤခြိၤ)တၢ်ဆါဘၣ်ကူဘၣ်ဂာ်ရၤလီၤသးဟဲအါထီၣ်လၢခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်လ့က့ၣ်ကိာ်ဟီၣ်က၀ီၤကမျၢၢ်ၦၤဃ့ၢ်မှံဟးဖျိးအကျါဒီး ဖဲအပူၤကွံာ်တနွံန့ၣ်တၢ်ထံၣ်န့ၢ်ၦၤဘၣ်တၢ်ဆါအဂၤ(၅၀)ဘျဲၣ်ဒီး ကတီၢ်အံၤၦၤလၢတၢ်တယးကွၢ်၀ဲလၢအအိၣ်ဒီးတၢ်ဆါအံၤသ့ၣ်တဖၣ်အဂီၢ်န့ၣ် တၢ်တ့ထီၣ်ဘှီထီၣ်န့ၢ်၀ဲ(ခွၤရထံ)အလီၢ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ဒုးတၢ်ယၤမ့ၢ်တအိၣ်ႇ မ့ၢ်တၢ်သးခုလၢဟီၣ်ခိၣ် ၁.ၦၤကလု၁်အိၣ်လၢဟီၣ်ခိၣ် တၢ်ဒုးတၢ်ယၤတပ၁်ဒိၣ် တၢ်ဒုးတၢ်ယၤတသးလီ လီၢ်မု၁်ဃံလၤမ့ၢ်ဟံၣ်ဃီ ၂.ဆၢကတီၢ် မုၢ်မဆါအံၤ ပဘၣ်သဂၢၢ် တၢ်အါမံၤ ခ့ခါခဲအံၤ လၢပဂီၢ် မ့ၢ်တၢ်ကီတၢ်ခဲနီၢ်နီၢ် ၃.ထံကီၢ်ကမျၢၢ် သဝီဖိ ကိးမုၢ်နံၤ ဃ့ၢ်မုၢ် ဖျ့ဖျိ သုးမုၢ်သံၣ်ဘိ ဒီးသိၣ်ဒူ ...

လါဖ့ၤဘြူၤအါရံၤ ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ် လူၢ်ပျဲၢ်ကီၢ်ဆၣ် မၠဲၣ်ကၠံငူၣ်ဟီၣ်က၀ီၤအပူၤ တကီၢ်ခါခဲအံၤၦၤလီၢ်အိၣ်ကဒုဖိအနီၣ်ဂံၢ်အိၣ်တုၤလၢတကလးဘျဲၣ်လံဒီးဖဲန့ၣ်အကျါပၣ်ဃုာ်၀ဲဒီးဖၣ်ပူၣ်လီၢ်က၀ီၤၦၤလီၢ်အိၣ်ကဒုဖိတဖၣ်အဂ့ၢ်န့ၣ် သ့ၣ်ညါဘၣ်လၢၦၤမၤနီၣ်ၦၤဃ့ၢ်မှံဟးဖျိးစရီအအိၣ်န့ၣ်လီၤႉ စးထီၣ်လၢတၢ်ဒုးဆူၣ်ထီၣ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤတုၤလၢခဲအံၤတစုန့ၣ် ခီဖျိတၢ်ခးလိာ်သးကဲထီၣ်၀ဲကိးမုၢ်နံၤဒဲးဃၣ်ဃၣ်အဃိ ဒူသ၀ီကမျၢၢ်သ့ၣ်တဖၣ်အိၣ်လၢဒူသ၀ီပူၤတဘူၣ်လၢၤဘၣ်ဒီး ဟဲဃ့ၢ်ထီၣ်တုၤ၀ဲလၢလူၢ်ပျဲၢ်ကီၢ်ဆၣ် မၠဲၣ်ကၠံငူၣ်ဟီၣ်က၀ီၤပူၤအံၤန့ၣ်လီၤႉ ဖၣ်ပူၤလီၢ်က၀ီၤၦၤလီၢ်အိၣ်ကဒုဖိသ့ၣ်တဖၣ်မ့ၢ်ၦၤလၢအဟဲတုၤ၀ဲဒၣ်ဖဲအပူၤကွံာ်နံၣ်တုၤလၢတနံၣ်အံၤလါဖ့ၤဘြူၤအါရံၤသ့ၣ်တဖၣ်ဒီး တနီၤန့ၣ်အိၣ်၀ဲဖဲမၠဲၣ်ကၠံငူၣ်လီၢ်က၀ီၤပူၤအိၣ်၀ဲအသိး တနီၤန့ၣ်နုာ်လီၤအိၣ်ကဒု၀ဲဒၣ်ဖဲမၠဲၣ်ကၠံငူၣ်၀ၢ်ခီအိတီသ၀ီဒီးကမၤမိၢ်၀့ၢ်ပူၤစ့ၢ်ကီးအိၣ်၀ဲအဂ့ၢ်န့ၣ် ၦၤမၤနီၣ်ၦၤဃ့ၢ်မှံဟးဖျိးစရီတဖၣ်စံး၀ဲန့ၣ်လီၤႉ ၦၤလီၢ်အိၣ်ကဒုဖိလၢအမၤနီၣ်စရီလၢတအဲၣ်ဒိးပာ်ဖျါအမံၤတဂၤစံး၀ဲ“တန့ၢ်ဘၣ်စရီခဲလၢာ်ဒံးဘၣ်ႉ ဘၣ်ဆၣ်စးထီၣ်ဖဲမဟိတၢ်ဒုးဆူၣ်ထီၣ်အခါတုၤလၢခဲအံၤန့ၣ် ၦၤဃ့ၢ်မှံဟးဖျိးဟဲတုၤ၀ဲဒၣ်ဖဲမၠဲၣ်ကၠံငူၣ်ဃုာ်ဒီး အကပိၤကပၤဖဲအံၤအါအါဂီၢ်ဂီၢ်လီၤႉ ခဲအံၤနါက့ဟံၣ်ဖိဃီဖိတဒူၣ်ခံဒူၣ်ဟဲတုၤ၀ဲထီဘိလီၤႉ ခဲအံၤဟဲအါထီၣ်လံႇတထၢဘၣ်စရီဒံးဘၣ်ႉမ့မ့ၢ်အီၣ်အီခီန့ၣ်ပနီၤလီၤအီၣ်လိာ်ပသးလီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ မၠဲၣ်ကၠံငူၣ်ၦၤလီၢ်အိၣ်ကဒုအလီၢ်လၢအမ့ၢ်ကၠီၣ်စၤကွ့ႇမၠၣ်ပါ၀ိၣ်မိၤတၢ်လီၢ်သ့ၣ်တဖၣ်အံၤ တၢ်ပာ်လီၤ၀ဲက၀ီၤဒ့(၁)ႇ(၂)ႇ(၃)ဒီးတၢ်လီၢ်သၢတီၤအံၤၦၤလီၢ်အိၣ်ကဒုဖိလၢအအိၣ်ပာ်စၢၤလၢညါသ့ၣ်တဖၣ်အိၣ်ဆိး၀ဲဒီး ဖဲန့ၣ်ဟံၣ်ခိၣ်အိၣ်၀ဲ(၇၀၀)ဘျဲၣ်ဒီးၦၤနီၣ်ဂံၢ်အိၣ်၀ဲ(၄၀၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဆၣ််ဖၣ်ပူၣ်ဟီၣ်က၀ီၤၦၤလီၢ်အိၣ်ကဒုဖိတဖၣ်ကအိၣ်ဆိး၀ဲအဂီၢ် တၢ်တ့ထီၣ်န့ၢ်အ၀ဲသ့ၣ်တၢ်သူၣ်ထီၣ်လီၤလီၤဆီဆီတအိၣ်၀ဲဘၣ်ဒီးအိၣ်၀ဲဒၣ်လၢက၀ီၤဒ့ပူၤအဘူးအတံၢ်သမူသကိးအဟံၣ်န့ၣ်လီၤႉတနီၤန့ၣ်ဃ့အခွဲးလၢဟံၣ်ကစၢ်အအိၣ်ဒီးအိၣ်၀ဲလၢၦၤဟံၣ်ဖီလာ်ဒီးတ့ထီၣ်၀ဲဒဲလၢၦၤကရၢၢ်ပူၤအဂ့ၢ်န့ၣ် ၦၤဃ့ၢ်မှံဟးဖျိးလၢအဟဲတုၤအိၣ်ဖဲမၠဲၣ်ကၠံငူၣ်ပူၤတဂၤစံး၀ဲန့ၣ်လီၤႉ စးထီၣ်လၢ(၂၀၁၇)နံၣ်န့ၣ်မဲၢ်သ၀ီဟီၣ်က၀ီၤၦၤလီၢ်အိၣ်ကဒုဖိဟဲစံၣ်အိၣ်၀ဲဒၣ်ဖဲမၠဲၣ်ကၠံငူၣ်ဟီၣ်က၀ီၤပူၤ တကးဒံးဘၣ်အမဲာ်ညါဖဲ(၂၀၂၁)နံၣ်ဒီး(၂၀၂၂)နံၣ်န့ၣ်ဟဲအါထီၣ်ကဒီး၀ဲလၢဖၣ်ပူၣ်ဟီၣ်က၀ီၤၦၤဃ့ၢ်မှံဟးဖျိးတဖၣ်ဒီးလၢၦၤသ့ၣ်တဖၣ်အံၤအဂီၢ်န့ၣ်ထံဂုၤကီၢ်ဂၤတၢ်တိစၢၤမၤစၢၤကရူၢ်သ့ၣ်တဖၣ်လဲၤမၤစၢၤ၀ဲတၢ်အီၣ်တၢ်အီဒီးတၢ်ဖိတၢ်လံၤလၢအဂၤသ့ၣ်တဖၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ထံဂုၤကီၢ်ဂၤတၢ်ကရၢကရိဒုဟဲမၤစၢၤအိၣ်လီၤႉခီဖျိလၢၦၤလီၢ်အိၣ်ကဒုဖိအိၣ်အါအဃိလၢဒုတလၢဘၣ်မီၤနီၤႉဘၣ်ဆၣ်ပနီၤလီၤအီၣ်သးလီၤမီၤနီၤႉမ့မ့ၢ်ကပၢၤလီခီတဖၣ်န့ၣ်ခီဖျိၦၤဟဲလၢအသီတဖၣ်န့ၣ်လိၣ်၀ဲအါအဃိ စရီပူၤအ၀ဲသ့ၣ်အမံၤတပၣ်ဒံး၀ဲဘၣ်ဆၣ်ပက့ၤမၤစၢၤနါက့အိၣ်လီၤႉဟံၣ်ဖိဃီဖိတနီၤလၢအအိၣ်ဖဲအိတီတကပၤနါက့ပလဲၤနီၤလီၤစ့ၢ်ကီးအိၣ်လီၤ”အဂ့ၢ်န့ၣ် မၠဲၣ်ကၠံငူၣ်ၦၤလီၢ်အိၣ်ကဒုဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးမီၤစိရိၤမၤ၀ဲတၢ်ဒုးဒီးကဘီယူၤလၢဖၣ်ပူၣ်ဟီၣ်က၀ီၤဒူသ၀ီတဖၣ်အပူၤအမဲာ်ညါတၢ်ဒုးမ့ကဲထီၣ်ဒီးဟီၣ်က၀ီၤ(KNLA)တဘျီလၢ်လၢ်န့ၣ်ခီဖျိပယီၤသုးအံၤခးလီၤ၀ဲကျိဖးဒိၣ်ဆူသ၀ီပူၤအဃိ လီၢ်က၀ီၤသ၀ီဖိအဟံၣ်အဃီဟးဂီၤ၀ဲအမဲာ်ညါကမျၢၢ်ဘၣ်ဒိဘၣ်ထံးသံအိၣ်၀ဲအသိး လီၢ်က၀ီၤကမျၢၢ်တဖၣ်အါဒၣ်တက့ၢ်န့ၣ်လဲၤစံၣ်အိၣ်၀ဲလၢမၠဲၣ်ကၠံငူၣ်လီၢ်က၀ီၤဒီးတၢ်လီၢ်အဂၤသ့ၣ်တဖၣ်န့ၣ်လီၤႉ ဒ်ပဒိးန့ၢ်ဘၣ်တၢ်ကစီၣ်လီၢ်ခံကတၢၢ်အသိးန့ၣ် ခီဖျိပယီၤသုးခးလီၤကျိဖးဒိၣ်ဆူလီၢ်က၀ီၤကမျၢၢ်ဒူသ၀ီပူၤကိးမုၢ်နံၤဒဲးအဃိ ဖဲလါဖ့ၤဘြူၤအါရံၤ ၂၆ သီ...

လါဖ့ၤဘြူၤအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲ(၂၀၂၂)နံၣ် လါဖ့ၤဘြူၤအါရံၤ ၁ သီတုၤလၢ ၂၀ သီအနံၤ လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးပယီၤသုးႇသုးခိးကီၢ်ဆၢ(BGF)သုးတဖၣ်အဘၢၣ်စၢၤတၢ်ခးလိာ်သးကဲထီၣ်ပာ်ဖှိၣ်ခဲလၢာ်(၆၇)ဘျီဒီးဖဲန့ၣ်ပယီၤသုးတကပၤသံ၀ဲ(၂၂၇)ဂၤႇဘၣ်ဒိ၀ဲ(၁၅၉)ဂၤအဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲဖဲတနံၤအံၤလါဖ့ၤဘြူၤအါရံၤ ၂၄ သီအနံၤန့ၣ်လီၤႉ ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲအသိး လၢအသီ(၂၀)အတီၢ်ပူၤမ့မ့ၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ (KNDO)တကပၤ ဘၣ်ဟ့ၣ်လီၤကွံာ်အသးသမူ(၅)ဂၤဒီးဘၣ်ဒိ၀ဲ(၂၁)ဂၤန့ၣ်လီၤႉ လၢန့ၣ်အမဲာ်ညါခီဖျိယီၤသုးကဘီယူၤဟဲကွံာ်လီၤမ့ၣ်ပိၢ်(၇)ဖျၢၣ်ဆူဒွဲၣ်လိကီၢ်ဆၣ်ဒီးလူၢ်သီကီၢ်ဆၣ်တဖၣ်အပူၤအဃိ လီၢ်က၀ီၤကမျၢၢ်သံ၀ဲ(၄)ဂၤႇဘၣ်ဒိ၀ဲ(၁၄)ဂၤဒီး ဒူသ၀ီလီၢ်က၀ီၤကမျၢၢ်တနီၤဘၣ်ပာ်တ့ၢ်ကွံာ်အဟံၣ်အဃီဘၣ်ဟးဃ့ၢ်အိၣ်ခူသူၣ်၀ဲလၢၦၢ်ပူၤန့ၣ်လီၤႉ ခီဖျိပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ခးလီၤနါစိၤကျိအဃိ လၢအသီ(၂၀)အတီၢ်ပူၤလီၢ်က၀ီၤကမျၢၢ်ဘၣ်ဒိဘၣ်ထံး၀ဲ(၄)ဂၤတကးဒံးဘၣ်ဟံၣ်ဃီဟးဂူာ်ဟးဂီၤအိၣ်စ့ၢ်ကီး၀ဲတနီၤအသိး လီၢ်က၀ီၤသ၀ီဖိတဖၣ်ဘၣ်ဟးဃ့ၢ်အိၣ်ကဒု၀ဲလၢၦၢ်ပူၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ပယီၤသုးႇသုးခိးကီၢ်ဆၢ(BGF)သုးရ့ၣ်(၁၀၁၄)သုးပာ်ဖှိၣ်တဖၣ်ခးလီၤကျိဖးဒိၣ်ဆူ ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ(သုးက့ ၁)ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ႇကၠဲၣ်ထိၤကီၢ်ဆၣ်ဒီးသထူၣ်ကီၢ်ဆၣ် လီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲပူၤတလီၢ်လီၢ်အမဲာ်ညါ မၤပျံၤမၤဖုးဟံးန့ၢ်ဆူၣ်၀ဲလီၢ်က၀ီၤဖိအစ့ႇတၢ်အီၣ်တၢ်အီႇတၢ်ဖိတၢ်လံၤဒီးမၢဆူၣ်၀ဲလီၢ်က၀ီၤဖိတဖၣ်န့ၣ်လီၤႉ တကးဒံးဘၣ်လၢ(သုးက့ ၃)ဘျံးဒ၀ဲၢ်ကီၢ်ရ့ၣ် လၢၢ်ဒိၣ်ကီၢ်ဆၣ်ႇမိကီၢ်ဆၣ်ႇဆီထံးကီၢ်ဆၣ်တဖၣ်အပူၤစ့ၢ်ကီး ခီဖျိပယီၤသုးသမံသမိး၀ဲလီၢ်က၀ီၤကမျၢၢ်လၢအဟးထီၣ်က့ၤလီၤသ့ၣ်တဖၣ်ဟဲအါထီၣ်၀ဲအဃိ လီၢ်က၀ီၤကမျၢၢ်သ့ၣ်တဖၣ်လဲၤဖံးလဲၤမၤတၢ်တသဘျ့၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၅)မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်ႇဘုသိၣ်ကီၢ်ဆၣ်ဒီးလူၢ်သီကီၢ်ဆၣ်တဖၣ်အပူၤစ့ၢ်ကီး ပယီၤသုးဒီးသုးခိးကီၢ်ဆၢ(BGF)သုးရ့ၣ်(၁၀၁၂ႇ၁၀၁၃ႇ၁၀၁၄)တဖၣ်ခးလီၤကျိဖးဒိၣ်ဆူလီၢ်က၀ီၤကမျၢၢ်တၢ်ဖံးအီၣ်မၤအီၣ်လီၢ်ကျဲဒူသ၀ီပူၤကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လါဖ့ၤဘြူၤအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် သုးက့(၄)ဟီၣ်က၀ီၤ လၢၢ်မုၢ်လါကီၢ်ဆၣ်သ၀ီတနီၤ အပူၤန့ၣ် ခီဖျိတဒိးန့ၢ်ဘၣ်၀ဲတၢ်ဒီတဒၢလၢခ့ၣ်အဲၣ်ယူၣ်အအိၣ်လၢလၢၦဲၤၦဲၤဘၣ်အဃိ တၢ်ဒုးအိၣ်ထီၣ်၀ဲကညီကမျၢၢ်သုး-KPDF ဒီးလိၣ်ဘၣ်၀ဲတၢ်ဆီၣ်ထွဲမၤစၢၤလၢသုးဖိသံၣ်ဖိတဖၣ်အဂီၢ်အဂ့ၢ်န့ၣ် ၦၤတီခိၣ်ရိၣ်မဲတၢ်တဖၣ်စံး၀ဲန့ၣ်လီၤႉ လၢၢ်မုၢ်လါကီၢ်ဆၣ်အံၤအိၣ်၀ဲဒၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဘၣ်ဆၣ် ခီဖျိလီၢ်က၀ီၤကမျၢၢ်သ့ၣ်တဖၣ်တူၢ်ဘၣ်၀ဲပယီၤသုးအတၢ်ဆီၣ်တံၢ်မၤနၢၤဒီးတဒိးန့ၢ်ဘၣ်တၢ်ဒီသဒၢလၢလၢၦဲၤဘၣ်အဖီခိၣ် သ၀ီအဖျၢၣ်(၄၀)ဘျဲၣ်လီၢ်က၀ီၤဖိတဖၣ်ပာ်ဖှိၣ်ထီၣ်သးဒုးအိၣ်ထီၣ်၀ဲကမျၢၢ်သုးလီၤအဂ့ၢ်န့ၣ် ၦၤဘၣ်မူဘၣ်ဒါလၢအပၣ်ဃုာ်လၢတၢ်တီခိၣ်ရိၣ်မဲအပူၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခ့ၣ်အဲၣ်ယူၣ်ခိၣ်နၢ်တနီၤန့ၣ်ရ့လိာ်သးဒီးပယီၤသုးအိၣ်အဃိတကနၣ်ဃုာ်လီၢ်က၀ီၤဖိတဖၣ်အါအါဘၣ်ႉသ၀ီဖိတဖၣ်ပယီၤသုးမ့ဆီၣ်တံၢ်မၤနၢၤအ၀ဲသ့ၣ်န့ၣ်(ခ့ၣ်အဲၣ်ယူၣ်)အံၤတဟံးန့ၢ်မူဒါနီတမံၤဘၣ်ႉသ၀ီဖိလီၤတနီၤဘၣ်က့ၤတြီဆၢဒီသဒၢအကစၢ်ဒၣ်၀ဲလီၤႉလၢတၢ်န့ၣ်အဃိပဒုးအိၣ်ထီၣ်(KPDF)လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ (KPDF)ကရူၢ်အံၤအပူၤကွံာ်န့ၣ်ဘၣ်တၢ်ဒုးအိၣ်ထီၣ်အီၤလၢတၢ်ခူသူၣ်အပူၤလီၤဒီး တၢ်ဟ့ၣ်၀ဲလီၢ်က၀ီၤသ၀ီဖိတဖၣ်လၢဂံၢ်ခီၣ်ထံးသုးတၢ်သိၣ်လိဘၣ်ဆၣ် ဖဲတနံၣ်အံၤလါယနူၤအါရံၤ ၁၄ သီအနံၤ တၢ်ဒုးအိၣ်ထီၣ်ကရူၢ်အံၤဘၣ်တၢ်ထုးထီၣ်ဘိးဘၣ်ရၤလီၤ၀ဲလၢအဖိးသဲစးန့ၣ်လီၤႉ ဒီးဖဲတနံၤအံၤလါဖ့ၤဘြူၤအါရံၤ ၂၄ သီအနံၤ လၢကရူၢ်သုးဖိသံၣ်ဖိတဖၣ်အဂီၢ်လိၣ်ဘၣ်၀ဲသုးတၢ်ဖိတၢ်လံၤႇကျိချံၦာ်သၣ်သ့ၣ်တဖၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ လၢၢ်မုၢ်လါကီၢ်ဆၣ်အံၤခီဖျိအိၣ်၀ဲဒၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤအဃိ စးထီၣ်ဖဲသုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံ တၢ်တဒုးအိၣ်ထီၣ်၀ဲ(KPDF)ဘၣ်ဆၣ် ခီဖျိပယီၤသုးအံၤတပာ်ကဲ၀ဲ(NCA)ဘၣ်နုာ်လီၤ၀ဲဆူခ့ၣ်အဲၣ်ယူၣ်တၢ်ပၢဟီၣ်က၀ီၤပူၤအါအါဂီၢ်ဂီၢ်အဃိ ဘၣ်တၢ်ဒုးအိၣ်ထီၣ်၀ဲ(KPDF)လၢလၢၢ်မုၢ်လါကီၢ်ဆၣ်ခ့ၣ်အဲၣ်ယူၣ်တၢ်ပၢဟီၣ်က၀ီၤပူၤလီၤအဂ့ၢ်န့ၣ် KPDF ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါလံာ်တၢ်ပာ်ဖျါအပူၤ ကလုာ်ဒူၣ်ကမျၢၢ်ထံဖိကီၢ်ဖိခဲလၢာ်ကပာ်ဖှိၣ်မၤသကိးတၢ်ဒီး ကဟ့ၣ်ဟီၣ်က၀ီၤကလုာ်ဒူၣ်ကမျၢၢ်တၢ်ဘံၣ်တၢ်ဘၢကန့ၢ်အဂီၢ်ဒီးကကဲထီၣ်တၢ်တိစၢၤမၤစၢၤလၢ(Federal Army)ကဟဲအိၣ်ဖျါထီၣ်အဂီၢ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ဘၣ်ထွဲဒီးတၢ်ဒုးအိၣ်ထီၣ်ကညီကမျၢၢ်သုး(KPDF)လၢလၢၢ်မုၢ်လါကီၢ်ဆၣ်အပူၤအံၤ...

လါဖ့ၤဘြူအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ဒူသ၀ီလၢအအိၣ်ဖဲကီးတရံးကီၢ်ဆၣ်ကလံၤထံးသ့ၣ်တဖၣ် ခီဖျိတၢ်ဒုးတၢ်ယၤအဃိ ၦၤလၢအဘၣ်ဃ့ၢ်သ့ၣ်တဖၣ်တထဲးဆါဘၣ်ဒံးသဘ့ဟီၣ်လာ်(မၠ့ၤပဲ)ဘၣ်အဃိ ဘၣ်တူၢ်ဆှူဆါကွံာ်၀ဲအသဘ့ဟီၣ်လာ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ အီးဖးဖးဒိၣ်သ၀ီ ၦၤလၢအမၤအီၣ်သဘ့ဟီၣ်လာ်တဂၤစံး၀ဲ“သဘ့ဟီၣ်လာ်ဒုထဲး၀ံၤလံႇလၢမုၢ်ဆါခီန့ၣ်ဟဲက့ၤထဲး သဘ့ဟီၣ်လာ်ဒီးမ့မ့ၢ်မုၢ်နၤခီန့ၣ်ဘၣ်ဟးစံၣ်မံလီၤႉပထဲးကရီႇမၤလီၤဆှူကရီဒ်န့ၣ်မီၤနီၤႉၦၤတနီၤန့ၣ်တလိလီၤ၀ဲ လၢမုၢ်လၢၤဘၣ်ႉမၤလီၤဆှူ၀ဲတဘျီဃီဒီးဆါကွံာ်၀ဲလီၤႉလၢညါခါန့ၣ်ပတူၢ်နးသးဒီးပမၤဃ့သဘ့ဟီၣ်လး၀ံၤမးပဆါအီၤန့ၣ်အၦ့ၤဂ့ၤ၀ဲမီၤနီၤႉ ခဲအံၤၦၤတနီၤန့ၣ်ထဲး၀ံၤတဘျီဃီန့ၣ်ဆါကွံာ်၀ဲလီၤႉ ခီဖျိလၢဘၣ်ဟးစံၣ်အဃိပတူၢ်ဆှူဆါကွံာ်အီၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဟီၣ်က၀ီၤဖဲန့ၣ်တဖၣ်အပူၤပယီၤသုးကျိၤနုာ်လီၤဆီလီၤသးတကးဒံးဘၣ်အမဲာ်ညါ ခီဖျိခးလီၤစ့ၢ်ကီးကျိဖးဒိၣ်ဆူဒူသ၀ီပူၤတလီၢ်လီၢ်အဃိ ၦၤသူၣ်အီၣ်သဘ့ဟီၣ်လာ်ဖိလၢအဘၣ်ဟးစံၣ်သ့ၣ်တဖၣ်အံၤ လၢကက့ၤထဲး၀ဲသဘ့ဟီၣ်လာ်အံၤအဂီၢ်တၢ်ကီတၢ်ခဲအိၣ်၀ဲအမဲာ်ညါ လၢကဆါသဘ့ဟီၣ်လာ်အဂီၢ်စ့ၢ်ကီးၦၤဟဲၦ့ၤတၢ်ဖိလီၤစှၤ၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ သဘ့ဟီၣ်လာ်အဃ့ပၣ်ဒီးအဘ့ၣ်လၢအဟးထီၣ်ဖဲကီးတရံးကလံၤထံးသ့ၣ်တဖၣ် အပူၤကွံာ်လၢညါတနာ်န့ၣ်အၦ့ၤအိၣ်၀ဲ(၁၃ႇ၀၀၀)ကၠးဒီး မ့မ့ၢ်တနံၣ်အံၤအၦ့ၤအိၣ်၀ဲတုၤလၢ(၁၅ႇ၅၀၀)ကၠးဘၣ်ဆၣ် ခီဖျိတၢ်ဒုးကဲထီၣ်အဃိၦၤဟဲၦ့ၤတၢ်ဖိလၢလီၢ်က၀ီၤပူၤစှၤလီၤ၀ဲဒၣ်န့ၣ်လီၤႉ ၦၤၦ့ၤဆါသလ့ဟီၣ်လာ်ဖိတဂၤစံး၀ဲလၢ“ၦၤအဲၣ်ဒိးဆါသဘ့ဟီၣ်လာ်န့ၣ်အိၣ်ဒီဒူၣ်ညါႉပၦ့ၤ၀ံၤပက့ၤဆှၢကဒါလၢကီၢ်ကၠီၣ်တဲၣ်တကပၤလီၤႉ ပလဲၤၦ့ၤတုၤထဲလၢကျ့းသ၀ီလီၢ်က၀ီၤကပိၤကပၤတ၀ာ်လီၤႉ လၢညါခါန့ၣ်ပလဲၤၦ့ၤတုၤလၢသိစဲၤသိစူၣ်ညါႉ လီၢ်ခံခီဖျိတၢ်ဒုးတၢ်ယၤတၢ်အိၣ်သးတဂ့ၤလၢၤဘၣ်အဃိ လၢန့ၣ်တကပၤန့ၣ်ပတလဲၤၦ့ၤဘၣ်လၢၤဘၣ်ႉ ၦၤအိၣ်ဖဲန့ၣ်သ့ၣ်တဖၣ်နါက့ခီဖျိတၢ်ဒုးကဲထီၣ်အဃိ ကလဲၤဆှၢ၀ဲလၢ၀့ၢ်ပူၤစ့ၢ်ကီးအဂီၢ်တဘၣ်ဂီၢ်၀ဲဘၣ်ႉ ၦၤတဲ၀ဲလၢၦၤၦ့ၤတၢ်ဖိတအိၣ်ဘၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လီၢ်က၀ီၤဖိတနီၤလၢအအိၣ်ဖဲကီးတရံးကလံၤထံးသ့ၣ်တဖၣ် စးထီၣ်ဖဲ(၂၀၂၂)လါယနူၤအါရံၤန့ၣ် ခီဖျိတၢ်ဒုးကဲထီၣ်အဃိအ၀ဲသ့ၣ်ဘၣ်ဃ့ၢ်မှံဟးဖျိး၀ဲဒီး ဖဲအ၀ဲသ့ၣ်ဟးဃ့ၢ်အကတီၢ်ခီဖျိတၢ်ဆၢကတီၢ်တဘၣ်ဒံးလၢကဘၣ်ထဲးသဘ့ဟီၣ်လာ်ဒံးဘၣ်အဖီခိၣ် သဘ့ဟီၣ်လာ်တနီၤခီဖျိအကစၢ်တအိၣ်ဘၣ်အဃိကျီၢ်ႇပနၢ်ႇမဲးတဲးလဲးနုာ်လီၤမၤဟးဂီၤတၢ်လၢကရၢၢ်ပူၤကဲထီၣ်သးအိၣ်၀ဲန့ၣ်လီၤႉ ကမဲၢ်ကိသ၀ီႇအီးဖးဖိႇကီးနွဲၢ်ႇယွၤသ့ၣ်ႇယွၤသ့ၣ်ကိႇအီကြီဒီးသ၀ီလၢအိၣ်ဘူးဖဲန့ၣ်လီၢ်က၀ီၤကမျၢၢ်သ့ၣ်တဖၣ် လ့ၤတက့ၤက့ၤအိၣ်လၢအဟံၣ်တဘူၣ်ဒံး၀ဲဘၣ်အသိး သ၀ီဖိတနီၤဟဲက့ၤ၀ဲလၢမုၢ်ဆါခီဒီးမုၢ်နၤခီန့ၣ်ဘၣ်ဟးစံၣ်မံဒံး၀ဲအဂ့ၢ်န့ၣ်...

လါဖ့ၤဘြူၤအါရံၤ ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါဒံၣ်စ့ဘၢၣ်ခီဖျိတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤအဃိ ၦၤလီၢ်အိၣ်ကဒုဖိလၢအအိၣ်ဒံးဖဲသူမှဲကျိကၢၢ်နံၤသ့ၣ်တဖၣ်အဂီၢ်လိၣ်ဘၣ်ဒံး၀ဲတၢ်ခိၣ်ဒုးဒီးတၢ်အိၣ်တၢ်ဆိးလီၢ်ကျဲတၢ်ဖိတၢ်လံၤတဖၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ ဖဲအပူၤကွံာ်စှၤသီအခါခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ ကမျၢၢ်ၦၤလီၢ်အိၣ်ကဒုဖိတဖၣ်အဒဲခိၣ်ဒုးတကူတလၢ၀ဲဘၣ်တကးဒံးဘၣ်အမဲာ်ညါ ခီဖျိအဒဲခိၣ်ဒုးလီၢ်လံၤဟးဂူာ်ဟးဂီၤအိၣ်ထီၣ်၀ဲအဖီခိၣ် ကတီၢ်အံၤလိၣ်ဘၣ်ဒံး၀ဲတၢ်မၤစၢၤတဖၣ်အဂ့ၢ်န့ၣ် တီနီၢ်မုၢ်ထီၣ်ဂ့ၢ်ဂီၢ်အူတၢ်တိစၢၤမၤစၢၤၦၤဃ့ၢ်မှံဟးဖျိးကမံးတံာ် စီၤအဲၣ်ဃူ စံး၀ဲဒ်အံၤန့ၣ်လီၤႉ “ဖဲစှၤသီအတီၢ်ပူၤအံၤခီဖျိတၢ်စူၤကလံၤဟဲအဃိလၢၦၤလီၢ်အိၣ်ကဒုဖိကအိၣ်ကဒု၀ဲအဂီၢ် တၢ်ခိၣ်ဒုးလၢညါတဖၣ်နါက့အသီအါထီၣ်ကျၣ်ဟးဂီၤ၀ဲအဃိတၢ်ကဘှီဂ့ၤထီၣ်အီၤအဂီၢ် တၢ်ခိၣ်ဒုးအဂီၢ်မ့ၢ်ဂ့ၤႇတၢ်အိၣ်တၢ်ဆိးလီၢ်အဂီၢ်မ့ၢ်ဂ့ၤလိၣ်ဘၣ်ဒံး၀ဲတၢ်မၤစၢၤတဖၣ်လီၤႉ တၢ်အိၣ်ဆူၣ်အိၣ်ချ့အဂီၢ်မ့ၢ်ဂ့ၤႇတၢ်အီၣ်တၢ်အီအဂီၢ်မ့ၢ်ဂ့ၤတၢ်လိၣ်ဘၣ်သ့ၣ်တဖၣ်အိၣ်ဒံး၀ဲအကပၤကပၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါကမျၢၢ်ၦၤလီၢ်အိၣ်ကဒုဖိလၢအအိၣ်ဖဲသူမှဲကျိကၢၢ်နံၤသ့ၣ်တဖၣ်အနီၣ်ဂံၢ်ကအိၣ်၀ဲ(၅၀၀၀)ဘျဲၣ်ဒီး ဖဲန့ၣ်အကျါပၣ်ဃုာ်၀ဲဒီးၦၤသူၣ်က့သးၦၢ်ဒီးဖိဒံဖိသၣ်ႇပိာ်မုၣ်ပိာ်မၢၤတဖၣ်အါအါဂီၢ်ဂီၢ်အဃိ ၦၤသ့ၣ်တဖၣ်အံၤတူၢ်ဘၣ်တၢ်နးဒိၣ်န့ၢ်ၦၤအဂၤသ့ၣ်တဖၣ်ဒံးအဂ့ၢ်န့ၣ်အဂ့ၢ်န့ၣ် စီၤအဲၣ်ဃူစံးအါထီၣ်၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်စှၤသီအခါတၢ်ဒုးကဲထီၣ်ကဒါ၀ဲဒီးဖဲန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်မၤန့ၢ်က့ၤ၀ဲပယီၤသုးဒီးသုးခိးကီၢ်ဆၢ(BGF)အကျိဖးဒိၣ်လူၢ်အဖီခိၣ် ပယီၤသုးကဘီယူၤဟဲတ့ၢ်လီၤ၀ဲမ့ၣ်ပိၢ်ဒံးန့ၣ်လီၤႉ ပယီၤသုးကဘီယူၤဟဲတ့ၢ်လီၤမ့ၣ်ပိၢ်အကတီၢ် ဘၣ်ဒိ၀ဲလီၢ်က၀ီၤသးၦၢ်တဂၤအသိး တၢ်ဘူၣ်တၢ်ဘါတၢ်သူၣ်ထီၣ်ႇဟံၣ်ဃီဟးဂူာ်ဟးဂီၤ၀ဲတနီၤဒီးလီၢ်က၀ီၤကမျၢၢ်ဘၣ်ဃ့ၢ်ပူၤဖျဲးကဒီးသးအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးအအိၣ်န့ၣ်လီၤႉ ဖဲအပူၤကွံာ်ခံသီအခါစ့ၢ်ကီးခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ ၦၤလီၢ်အိၣ်ကဒုဖိတနီၤခီဖျိအ၀ဲသ့ၣ်ဒဲခိၣ်ဒုးတဘံၣ်တဘၢဘၣ်အဃိ တၢ်အိၣ်တၢ်ဆိးလီၢ်တနီၤဟးဂီၤကွံာ်၀ဲဒီး ထံစ့ၢ်ကီးနုာ်လီၤလၢဒဲပူၤကဲထီၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါဖ့ၤဘြူၤအါရံၤ ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါဖ့ၤဘြူၤအါရံၤ ၂၀ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကီးတရံး၀့ၢ်ကလံၤထံး ကမဲၢ်ကိသ၀ီတကပၤအဃိ လီၢ်က၀ီၤသ၀ီဖိတဖၣ်ဘၣ်ဟးစံၣ်ပလဲာ်သးလၢမုၢ်နၤခီဒီး ခီဖျိကျိဖးဒိၣ်လီၤတဲာ်ပိၢ်ဖးထီၣ်အဃိဟံၣ်ဃီဟးဂူာ်ဟးဂီၤကွံာ်၀ဲတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၁၇ သီအနံၤ တၢ်ခးလိာ်သးကဲထီၣ်၀ဲဒၣ်လၢကညီဒီကလုုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၆)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ဖဲမဟါလါဖ့ၤဘြူၤအါရံၤ ၂၀ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်တစှၤန့ၢ်အထံၣ်(၂၀)ဆူကမဲၢ်ကိသ၀ီတကပၤလၢတၢ်ဂ့ၢ်တအိၣ်နီတမံၤဘၣ်အဃိ လီၢ်က၀ီၤဖိတဖၣ်ဘၣ်ဟးစံၣ်ပလဲာ်သးလၢမုၢ်နၤခီဒီး ခီဖျိကျိဖးဒိၣ်အချံလီၤတဲာ်ပိၢ်ဖးထီၣ်အဃိ ဟံၣ်ဃီဟးဂူာ်ဟးဂီၤ၀ဲတနီၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ဖဲမဟါ ၈ နၣ်ရံၣ်ဃၣ်ဃၣ်န့ၣ်ခးလီၤ၀ဲကျိဖးဒိၣ်လၢကီးတရံး၀့ၢ်တကပၤလီၤႉ လၢသ၀ီပူၤန့ၣ်တၢ်ဒုးတကဲထီၣ်ဘၣ် ခီဖျိပယီၤသုးအိၣ်ဒံး၀ဲဖဲသ၀ီဃၢၤဒံးအဃိ လဲၤစံၣ်လၢသ၀ီချၢတဘူၣ်ဘၣ်ႉ ဘၣ်ဟးစံၣ်မံလၢသ၀ီပူၤလီၤႉ တဂီၤညါအံၤသ၀ီဖိအဟံၣ်အဃီဟးဂီၤ၀ဲအိၣ်တနီၤလီၤ”အဂ့ၢ်န့ၣ် ကမဲၤကိသ၀ီဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဒ်တကီၢ်ခါတၢ်သးခဲအံၤအသိးန့ၣ်လီၢ်က၀ီၤသ၀ီဖိတဖၣ်ဘၣ်ဟးစံၣ်မံ၀ဲလၢမုၢ်နၤခီဒီး မ့မ့ၢ်မုၢ်ဆါခီန့ၣ်ဘၣ်လဲၤဖံးလဲၤမၤ၀ဲလၢတၢ်အိၣ်သးအဖီခိၣ်လီၤအဂ့ၢ်န့ၣ် ကမဲးကိသ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တၢ်ဒုးကဲထီၣ်လၢကီးတရံးကလံၤထံးလီၢ်က၀ီၤပူၤအခါ ခီဖျိပယီၤသုးခးလီၤကျိဖးဒိၣ်ဒီးဟဲခးလီၤတၢ်ဒီးကဘီယူၤအဃိ လီၢ်က၀ီၤသ၀ီဖိတဖၣ်ဘၣ်ဒိဘၣ်ထံးသံတစှၤန့ၢ်ဒံး(၅)ဂၤဘၣ်ဒီးလီၢ်က၀ီၤဖိ(၂၀၀၀)ဘျဲၣ်တက့ၤဘၣ်ဒံးလၢအဟံၣ်အဃီဘၣ်ဟးစံၣ်ပလဲာ်သးအဖၢမုၢ်ဒံးအဂ့ၢ်န့ၣ်...