ခ့ၣ်အဲးစံၣ် – KIC News

လါဖ့ၤဘြူၤအါရံၤ ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲကၠၤအ့စ့ၣ်ကၠံကီၢ်ဆၣ် တကုၢ်ခံသ၀ီကပၤ တၢ်ခးလိာ်သးကဲထီၣ်လၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ဖဲအပူၤကွံာ်လါဖ့ၤဘြူၤအါရံၤ ၉ သီအနံၤန့ၣ် ပယီၤသုးကိးထံၣ်သ၀ီဖိဒီးတဲပျံၤလၢ တၢ်ဒုးမ့ဟဲကဲထီၣ်ကဒီးန့ၣ်ကဒွဲၣ်အူအီၣ်ကွံာ်သ၀ီဒီတဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် တကုၢ်ခံသ၀ီကပၤ တၢ်ခးလိာ်သးကဲထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢစုတီၤအဖီလာ် KNLA(သုးက့ ၆)ႇသုးရ့ၣ် (၁၇)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ပယီၤသုးတဖၣ်ကိးထံၣ်သ၀ီၦၤဘၣ်မူဘၣ်ဒါဒီးတဲပျံၤတဲဖုး၀ဲအဂ့ၢ်န့ၣ် ၦၤလၢအဘူးဒီးတကုၢ်ခံသ၀ီဖိတဖၣ်စံး၀ဲန့ၣ်လီၤႉ “တဲ၀ဲလၢခ့ၣ်အဲၣ်ယူၣ်မ့ဆဲးခးအ၀ဲသ့ၣ်န့ၣ်တဒွဲၣ်အူအီၣ်ကွံာ်တကုၢ်ခံသ၀ီဒီတဖျၢၣ်လီၤႉ ကမၤ၀ဲနးဒိၣ်န့ၢ်ဒံးအ၀ဲအံၤလီၤႉ သ၀ီဖိတဖၣ်ပျံၤတၢ်အဃိအိၣ်၀ဲအဘူၣ်လၢၤဘၣ်ဟးစံၣ်ပလဲာ်သးလီၤႉ အ၀ဲသ့ၣ်မ့ဆဲးအိၣ်ဒံးလၢသ၀ီပူၤဒုမၤအီၣ်တၢ်တဘူၣ်နီတမံၤလၢၤဘၣ်ႉ အဲၣ်ဒိးတဲယဲလၢမၤစၢၤဘၣ်တကုၢ်ခံသ၀ီစ့ၢ်မီၤနီၤ”အဂ့ၢ်န့ၣ် ၦၤလၢအသ့ၣ်ညါလိာ်သးဒီးတကုၢ်ခံသ၀ီဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲတကုၢ်ခံသ၀ီကပၤတၢ်ခးလိာ်သးကဲထီၣ်လၢ KNLA သုးရ့ၣ်(၁၇)ဒီးပယီၤသုး(ခလရ-၄၃၂)သုးရ့ၣ်အဘၢၣ်စၢၤ ဘျီ၀ဲန့ၣ်အပူၤ ပယီၤသုးတကပၤသံ၀ဲ(၇)ဂၤႇဘၣ်ဒိ၀ဲ(၃)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ တၢ်ခးလိာ်သးကဲထီၣ်ဘျီ၀ဲန့ၣ်အပူၤခီဖျိပယီၤသုးခးလီၤ၀ဲကျိဖးဒိၣ်အဃိ တကုၢ်ခံသ၀ီဖိအကျီၢ်သံကွံာ်၀ဲ(၁)ဒုဒီး ပယီၤသုးဖီၣ်က့ၤကိး၀ဲသ၀ီဖိအိၣ်၀ဲတနီၤအဂ့ၢ်န့ၣ် ၦၤလၢအဘူးဒီးတကုၢ်ခံသ၀ီဖိတဖၣ်စံး၀ဲန့ၣ်လီၤႉ ကတီၢ်အံၤခီဖျိပယီၤသုး(ခလရ-၄၃၂)သုးရ့ၣ်လၢအနီၣ်ဂံၢ်ကအိၣ်၀ဲအဂၤ(၆၀)ဃၣ်ဃၣ်အံၤ နုာ်လီၤအိၣ်ခူသူၣ်ဆီလီၤသးလၢတကုၢ်ခံသ၀ီပူၤအဃိ သ၀ီဖိတဖၣ်ဘၣ်ဟးထီၣ်က့ၤလီၤလၢတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ

လါဖ့ၤဘြူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ်အပူၤခီဖျိဂာ်သိအၦ့ၤထီၣ်ဒီးၦၤလဲၤတၢ်ဖိလၢအလ့ၢ်ထီၣ်လ့ၢ်လိၤဆူမၠၣ်၀တံၣ်ကီၢ်ဆၢတဖၣ်လီၤစှၤ၀ဲအဃိ ၦၤနီအီၣ်သိလ့ၣ်ဖိလၢအစိာ်တီၣ်ဆှၢၦၤလဲၤတၢ်ဖိသ့ၣ်တဖၣ်အံၤစ့ၢ်ကီးထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံဂာ်သိအၦ့ၤဒိၣ်ထီၣ်တကးဒံးဘၣ်အမဲာ်ညါ ခီဖျိၦၤလဲၤတၢ်ဖိလၢကလဲၤဆူမၠၣ်၀တံၣ်တကပၤလီၤစှၤ၀ဲအဃိ ၦၤနီအီၣ်သိလ့ၣ်ဖိတနီၤဘၣ်ဆိကတီၢ်ကွံာ်၀ဲတၢ်ဖံးတၢ်မၤအသိး တနီၤန့ၣ်ၦၤလဲၤတၢ်ဖိတအိၣ်ဘၣ်ဘၣ်ဆၣ် နီအီၣ်ဒံးသိလ့ၣ်လၢတၢ်ကီတၢ်ခဲအပူၤအဂ့ၢ်န့ၣ် ၦၤနီအီၣ်သိလ့ၣ်ဖိတဖၣ်စံး၀ဲန့ၣ်လီၤႉ ၦၤနီအီၣ်သိလ့ၣ်လၢဖၣ်အၣ်-မၠၣ်၀တံၣ်တဂၤစံး၀ဲလၢ “ခဲအံၤဟးနီအီၣ်သိလ့ၣ််တဘၣ်ဂီၢ်ဒ်သိးလၢညါလၢၤဘၣ်ႉဂာ်သိအၦ့ၤထီၣ်အဃိ ဟံၣ်ဖိဃီဖိတၢ်လုၢ်အီၣ်နီၢ်ခိသးသမူအမဲာ်ညါန့ၣ် လၢကန့ၢ်ဘၣ်ကါသိၦ့ၤအဂီၢ်န့ၣ်ဘၣ်ဃုနးတချုးလီၤႉ မ့ဟးထီၣ်တဘျီန့ၣ်ကါသိၦ့ၤႇတြဲၤၦ့ၤႇအီၣ်ၦ့ၤန့ၣ် တနံၤန့ၣ်အိၣ်တ့ၢ်တကလးခံကလးကၠးမီၤနီၤႉ ဘၣ်နံၤနံၤတအိၣ်တ့ၢ်နီတကၠးဘၣ်နါက့အိၣ်လီၤႉ ဂာ်သိအၦ့ၤထီၣ်ဘၣ်ဆၣ်ဟံအါထီၣ်ၦၤလဲၤတၢ်ဖိကါလဲတသ့ဘၣ်ႉ လၢတၢ်တညီဘၣ်အဘၢၣ်စၢၤအံၤကအီၣ်ဘၣ်အီဘၣ်အဂီၢ်ဘၣ်ဃုအီၣ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တချုးလၢသုးဟံးန့ၢ်တၢ်စိတၢ်ကမီၤဒံးဘၣ်အခါန့ၣ် ဂာ်သိ(၉၂)တလံးထၢၣ်န့ၣ်အၦ့ၤအိၣ်၀ဲ(၅၀၀)ကၠးခိၣ်ဃၢၤႇ(၉၅)တလံးထၢၣ်န့ၣ်(၆၀၀)ကၠးခိၣ်ဃၢၤဒီး ခဲအံၤဂာ်သိ(၉၂)တလံးထၢၣ်န့ၣ်(၁၆၀၀)ကၠးခိၣ်ဃၢၤႇမ့မ့ၢ်(၉၅)တလံးထၢၣ်န့ၣ်အၦ့ၤအိၣ်၀ဲ(၁၇၀၀)ခိၣ်ဃၢၤန့ၣ်လီၤႉ ညီနုၢ်န့ၣ်လၢဖၣ်အၣ်-မၠၣ်၀တံၣ်အဘၢၣ်စၢၤန့ၣ်တြဲၤလၢဘၣ်ဟ့ၣ်အၦ့ၤန့ၣ်အိၣ်၀ဲ(၄)ခါဒီး မ့မ့ၢ်ဟံၣ်ဖိဃီဖိသိလ့ၣ်န့ၣ်ဘၣ်ဟ့ၣ်၀ဲ(၅၀၀)ကၠးအိၣ်၀ဲအသိး တြဲၤလၢဘၣ်ဟ့ၣ်(၁၅၀၀)ကၠးစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိအအိၣ်န့ၣ်လီၤႉ အပူၤကွံာ်ဖၣ်အၣ်-မၠၣ်၀တံၣ်န့ၣ် တၢ်ပာ်ပနီၣ်ဃ့ၦၤလဲၤက့ၤတၢ်ဖိကါလဲ(၁၀၀၀၀)ကၠးဒီး မ့မ့ၢ်ခဲအံၤတၢ်ဃ့အါထီၣ်၀ဲကါလဲတုၤလၢ(၁၅၀၀၀)ကၠးလံအမဲာ်ညါ ဘၣ်တနံၤနံၤဆှၢဘၣ်၀ဲၦၤလဲၤတၢ်ဖိ ခံဂၤလီၤအဃိအထိးနါ(အမၠး)တအိၣ်၀ဲဘၣ်အဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ ၦၤနီသိလ့ၣ်ဖိလၢအဂၤတဂၤစ့ၢ်ကီးစံး၀ဲလၢ“ကတီၢ်အံၤကဆီတလဲတၢ်မၤလၢအဂၤစ့ၢ်ကီးတအိၣ်ဘၣ်ႉ လၢတၢ်လုၢ်အီၣ်နီၢ်ခိသးသမူအဂီၢ်န့ၣ်ဖံးမၤဃာ်တၢ်မၤတဖၣ်အံၤလီၤႉ ၦၤလဲၤတၢ်ဖိတနီၤခီဖျိပဆှၢညီနုၢ်အီၤလံအဃိ ပကဘၣ်လဲၤဆှၢအ၀ဲသ့ၣ်လီၤႉ တၢ်သ့ၣ်တဖၣ်အံၤၦၤနီသိလ့ၣ်ဖိသဂၢၢ်ဘၣ်၀ဲကိးဂၤဒဲးလီၤႉခဲအံၤဘၣ်ပျံၤစ့ၢ်ကီးလၢတၢ်ဒုးကကဲထီၣ်လၢကျဲပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲ(၂၀၂၀)နံၣ် ခီဖျိခိ၀ံၣ်တၢ်ဆါဘၣ်ကူဘၣ်ဂာ်ရၤလီၤသးအဃိ ကီၢ်ကၠီၣ်တဲၣ်-ကီၢ်ပယီၤကီၢ်ဆၢတြဲၤတဖၣ်တၢ်ကးတံၢ်ဃာ်၀ဲဒၣ်န့ၣ်လီၤႉဒ်န့ၣ်အသိးခီဖျိတကီၢ်ခါထံရူၢ်ကီၢ်သဲးဒီးဒုးယၤဂ့ၢ်၀ီတၢ်အိၣ်သးတဖၣ်အဃိၦၤလဲၤထီၣ်က့ၤလီၤစှၤလီၤ၀ဲအမဲာ်ညါ...

လါဖ့ၤဘြူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆) လ့က့ၣ်ကိာ်ဒီးကီးတရံးဟီၣ်က၀ီၤတဖၣ်အပူၤ တုၤလၢခဲအံၤတစုခီဖျိပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်ဒံး၀ဲအဃိ ၦၤဃ့ၢ်မှံဟးဖျိးတဖၣ်က့ၤအိၣ်လၢအဒူသ၀ီတဘူၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ခီဖျိတၢ်ခးလိာ်သးကဲထီၣ်ဒံးအဃိ ၦၤဃ့ၢ်မှံဟးဖျိးတဖၣ်ကက့ၤအိၣ်လၢလ့က့ၣ်ကိာ်ဟီၣ်က၀ီၤအဒူသ၀ီပူၤအဂီၢ်က့ၤ၀ဲတဘူၣ်ဒံးဘၣ်အသိး လၢကီးတရံးတကပၤန့ၣ်သ၀ီဖိတနီၤက့ၤအိၣ်လၢအဒူသ၀ီန့ၣ် ထံၣ်၀ဲလၢပယီၤသုးတဖၣ်မၤဟးဂီၤအဟံၣ်ဟံးန့ၢ်၀ဲတၢ်ဖိတၢ်လံၤတဖၣ်အဃိ သဂၢၢ်ဘၣ်၀ဲဒီးတၢ်အိၣ်တၢ်ဆိးတၢ်ကီတၢ်ခဲသ့ၣ်တဖၣ်အဂ့ၢ်န့ၣ် လီၢ်က၀ီၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ “မ့မ့ၢ်လၢလ့က့ၣ်ကိာ်တကပၤန့ၣ်ၦၤဃ့ၢ်မှံဟးဖျိးတဖၣ်က့ၤတဘူၣ်ဒံးဘၣ်ႉ ဖဲအပူၤကွံာ်ခံသီန့ၣ်ကျိဖးဒိၣ်လူၢ်အံၤခးလီၤနါစိၤကျိဖးဒိၣ်တစှၤန့ၢ်အထံၣ်(၁၀)ဘၣ််ႉလၢက၀ီၤဒ့(၃)ယ့ၤစဲၣ်ကိၤတကပၤန့ၣ်စ့ၢ်ကီးခးလီၤ၀ဲဒီးကျိဖိလီၤႉ တမ့ၢ်လၢတၢ်ဒုးကဲထီၣ်ဘၣ်ႇအ၀ဲသ့ၣ်ခးလီၤတၢ်လၢက၀ီၤဒ့ပူၤလီၤႉ မ့မ့ၢ်(KNLA)တကပၤန့ၣ်ခးတၢ်တအိၣ်ဘၣ်”အဂ့ၢ်န့ၣ် လ့က့ၣ်ကိာ်ၦၤဃ့ၢ်မှံဟးဖျိးတဂၤစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲလါဖ့ၤဘြူၤအါရံၤ ၉ သီ ဂီၤခီအဆၢကတီၢ် လၢကီးတရံး-ကၠဲၣ်ဒိၤကျဲမုၢ် ကၠၤအ့-တကံၤသ၀ီကျဲတကပၤန့ၣ် ခီဖျိပယီၤသုးဟဲထီၣ်တလၢတၢ်လီၢ်အဃိခံခီခံကပၤတၢ်ခးလိာ်သးကဲထီၣ်ဒီး ဖဲန့ၣ်ခီဖျိပယီၤသုးခးကျိဖးဒိၣ်အဃိ လီၢ်က၀ီၤဖိအဟံၣ်ဟးဂီၤကွံာ်တဖျၢၣ်ဒီးဆၣ်ဖိကီၢ်ဖိလၢတၢ်ဘုၣ်ဃာ်၀ဲလၢဟံၣ်တဖၣ်သံဘၣ်ဒိဘၣ်ထံးအိၣ်၀ဲဒၣ်န့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံခီဖျိပယီၤသုးတဖၣ်မၤအါထီၣ်အနီၣ်ဂံၢ်ဟဲတုၤ၀ဲအဃိ လီၢ်က၀ီၤဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါယနူၤအါရံၤအတီၢ်ပူၤ ခီဖျိတၢ်ဒုးကဲထီၣ်လၢမၠိၣ်ဟီသ၀ီႇအီးဖးဖးဒိၣ်သ၀ီတကပၤအဃိ လီၢ်က၀ီၤဖိလၢအဘၣ်ဃ့ၢ်မှံဟးဖျိးတဖၣ်အံၤကက့ၤအိၣ်လၢအဒူသ၀ီပူၤက့ၤ၀ဲအကတီၢ် ထံၣ်၀ဲလၢပယီၤသုးနုာ်လီၤမၤဟးဂီၤအဟံၣ်အဃီဟံန့ၢ်အ၀ဲသ့ၣ်တၢ်ဖိတၢ်လံၤတဖၣ်အဃိ လၢကဘၣ်အီၣ်ဘၣ်အီအဂီၢ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် မၠိၣ်ဟီသ၀ီဖိလၢအက့ၤအိၣ်လၢသ၀ီပူၤတဖၣ်စံး၀ဲန့ၣ်လီၤႉ “လၢကီးတရံးတကပၤန့ၣ်ပယီၤသုးအိၣ်၀ဲဖဲဖၤခါကိသ၀ီတကပၤန့ၣ်လီၤႉ မ့၀ံၤဖဲနံၣ်ထီၣ်သီပျီဒီးယ့ၤလဲၤကိတကပၤန့ၣ်ကျိဖးဒိၣ်ကရူၢ်တဖၣ်အိၣ်ဖဲန့ၣ်အဖၢမုၢ်ဒံးလီၤႉ...

လါဖ့ၤဘြူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် မ်ပကဖီၣ်လိာ်သကိးစုဒီးၦၤကိးကလုာ်ဒဲးဒီးတၢ်ကရၢကရိကိးဖုဒဲးလၢတၢ်ဂဲၤလိာ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်အဂ့ၢ်န့ၣ် ဖဲတနံၤအံၤလါဖ့ၤဘြူၤအါရံၤ ၁၁ သီ လၢအလီၤဘၣ်၀ဲ(၇၄)၀ီတ၀ီကညီဒီကလုာ်မုၢ်နံၤအပူၤ ကညီဒီကလုာ်စၢဖှိၣ်ကရၢ-KNU ကရၢခိၣ် သုးခိၣ်ကျၢၢ်စိ စီၤမူးတူစ့ဖိဟ့ၣ်ဂံၢ်ဟ့ၣ်ဘါ၀ဲန့ၣ်လီၤႉ ပကဖီၣ်လိာ်သကိးပစုဒီးၦၤကိးကလုာ်ဒဲးဒီးတၢ်ကရၢကရိကိးဖုဒဲးလၢတၢ်ဂဲၤလိာ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်လၢထံဖိကီၢ်ဖိခဲလၢာ်မုၢ်လၢ်ဆၢထံၣ်တ့ၢ်၀ဲလၢၦၤကိးကလုာ်ဒဲးဒီးတၢ်ဘူၣ်တၢ်ဘါခဲလၢာ်ကအိၣ်၀ဲဒီးခွဲးယာ်တၢ်ထဲသိးတုၤသိးႇခွဲးယာ်တၢ်သဘျ့ဒီးတၢ်စံၣ်ညီၣ်ပၢလီၤသးအလၢအၦဲၤအဂ့ၢ်န့ၣ် လံာ်ဟ့ၣ်ယုၢ်လၢကညီဒီကလုာ်မုၢ်နံၤအဂီၢ်အပူၤ စံး၀ဲန့ၣ်လီၤႉ ဒ်န့ၣ်အသိးမ်ပကဟံးဃာ်ဒီးပာ်ဖျါထီၣ်ပၦၤကလုာ်ကညီဖိအတၢ်စံၣ်စိၤတဲစိၤႇကလုာ်အက့ၢ်အဂီၤႇအသူးသ့ၣ်လၤကပီၤဒီးပတၢ်မ့ၢ်တၢ်နီၢ်နီၢ်တဖၣ်ဃူဃူဖိးဖိးဒ်လၢ(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤအသိးန့ၣ်ဒီး ပကဂဲၤလိာ်သကိးပ၀ဲလၢၦၤကလုာ်အတၢ်ခွဲးတၢ်ယာ်ႇတၢ်ထဲသိးတုၤသိးဒီးတၢ်စံၣ်ညီၣ်ပၢလီၤသးခွဲးယာ်လၢတၢ်ဃူတၢ်ဖိးအပူၤအဂ့ၢ်န့ၣ် ဟ့ၣ်ဂံၢ်ဟ့ၣ်ဘါအါထီၣ်၀ဲကညီဖိတဖၣ်န့ၣ်လီၤႉ ဖဲ(၁၉၄၈)နံၣ် လါဖ့ၤဘြူၤအါရံၤ ၅ သီအနံၤ တၢ်ကရၢကရိထီၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ၀ံၤအလီၢ်ခံ ကညီကမျၢၢ်(၄)ကလီၢ်ဘျဲၣ်လဲၤပာ်ဖျါထီၣ်၀ဲကညီဒီကလုာ်အတၢ်ပညိၣ်ကွၢ်စိခီဖျိတၢ်ကိးသတြီ(၄)ထံၣ်လၢအမ့ၢ်၀ဲဟ့ၣ်ကညီကီၢ်တဘျီဃီႇပညီတဘးပယီၤတဘးဒုးနဲၣ်ခဲအံၤႇထံလီၢ်ကီၢ်ပူၤတၢ်ဒုးတၢ်ယၤပတသးလီဘၣ်ဒီးကလုာ်တၢ်သဘံၣ်သဘုၣ်ပတသးလီဘၣ်သ့ၣ်တဖၣ်န့ၣ်လီၤႉ လၢန့ၣ်အမဲာ်ညါတၢ်ပာ်ဒ့ၣ်ပာ်ကမၣ်လိာ််သးကဒဲကဒဲန့ၣ်တမ့ၢ်တၢ်မၤထီၣ်မၤထီလိာ်ပသးဘၣ်ဒီးတၢ်မၤလၢၦဲၤကညီကလုာ်အတၢ်မိၣ်န့ၢ်သးလီနီၢ်နီၢ်န့ၣ်ပၦၤကလုာ်ကညီဖိတဖၣ်ပကဘၣ်ကွဲးသကိးပတၢ်စံၣ်စိၤတဲစိၤလီၤအဂ့ၢ်န့ၣ် ခ့ၣ်အဲၣ်ယူၣ်ကရၢခိၣ်ဟ့ၣ်ဂံၢ်ဟ့ၣ်ဘါအါထီၣ်၀ဲန့ၣ်လီၤႉ ဖဲ(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤန့ၣ် ခ့ၣ်အဲၣ်ယူၣ်တီခိၣ်ရိၣ်မဲ ကညီကလုာ်လၢအအိၣ်ဖဲထံထၣ်စွ့ဟီၣ်က၀ီၤဒီးကစၢၢၢ်ခိၣ်ကလိကျါကညီကမျၢၢ်(၄)ကလီၢ်ဘျဲၣ် လဲၤပာ်ဖျါဃ့ထီၣ်၀ဲကညီဒီကလုာ်အတၢ်ပညိၣ်ကွၢ်လၢတၢ်ကိးသတြီ(၄)ထံၣ်န့ၣ်လီၤႉ ဖဲ(၁၉၅၃)နံၣ် လါနိၣ်၀့ဘၢၣ် ၂၃ သီ တုၤလၢ ၂၅ သီအနံၤ...

လါဖ့ၤဘြူၤအါရံၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ်အပူၤ စးထီၣ်ဖဲ(၂၀၂၂)ထီၣ်သီန့ၣ်တၢ်ဟးထၢ၀ဲ(Non-CDM)ၦၤမၤတၢ်ဖိဒီးအဖိအမါလၢအမၤဒံးတၢ်လၢပယီၤသုးမီၤစိရိၤအစုတီၤအဖီလာ်တဖၣ်လၢကထီၣ်၀ဲဂံၢ်ခီၣ်ထံးသုးတၢ်သိၣ်လိအဂီၢ်အဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးၦၤမၤတၢ်ဖိတဖၣ်အအိၣ်န့ၣ်လီၤႉ “စးထီၣ်ဖဲ(၂၀၂၂)ထီၣ်သီန့ၣ်တၢ်စးထီၣ်ထၢ(Non-CDM)ၦၤမၤတၢ်ဖိဒီးၦၤမၤတၢ်ဖိအဖိအမါသ့ၣ်တဖၣ်အစရီလံလီၤႉၦၤမၤတၢ်ဖိတနီၤန့ၣ်တအဲၣ်ဒိး၀ဲဘၣ်ႉအ၀ဲသ့ၣ်ထၢစရီအဖၢမုၢ်လီၤႉလၢမနုၤအဂီၢ်လဲၣ်န့ၣ်တသ့ၣ်ညါဒံးဘၣ်ႉပသ့ၣ်ညါဃာ်လၢကဘၣ်ထီၣ်ဂံၢ်ခီၣ်ထံးသုးတၢ်သိၣ်လိလီၤ”အဂ့ၢ်န့ၣ် ၦၤလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ ၀ဲၤကျိၤၦၤမၤတၢ်ဖိလၢတၢ်ထၢပာ်ဖှိၣ်ဃာ်အမံၤစရီခဲအံၤသ့ၣ်တဖၣ်န့ၣ်မ့ၢ်၀ဲဒၣ် ထံလီၢ်ကီၢ်ပူၤကိတိာ်အဖီလာ် တၢ်တီခိၣ်ရိၣ်မဲဃိာ်၀ဲၤကျိၤႇတၢ်မၤသံမ့ၣ်အူ၀ဲၤကျိၤႇပၢပြး၀ဲၤကျိၤႇပၢၤကီၢ်သုး၀ဲၤကျိၤဒီးတၢ်ဃိထံသမံသမိးလီၤဆီ(စစစ)၀ဲၤကျိၤသ့ၣ်တဖၣ်လီၤဘၣ်ဆၣ် တၢ်ပာ်ဂၢၢ်ပာ်ကျၢၤအီၤလီၤလီၤဆီဆီတအိၣ်ဒံး၀ဲဘၣ်န့ၣ်လီၤႉ ၦၤမၤတၢ်ဖိလၢအသ့ၣ်ညါတၢ်အိၣ်သးအံၤတဂၤစံး၀ဲလၢ“ကဟ့ၣ်ထီၣ်၀ဲထဲပၢၤကီၢ်သုးႇသုးႇဂံၢ်ခီၣ်ထံးတၢ်သိတဖၣ်လီၤႉကဘၣ်ဃဲၣ်လီၤကျိဒ်န့ၣ်လီၤႉအပူၤကွံာ်နါက့ပထံၣ်ဘၣ်လၢတၢ်ဟ့ၣ်၀ဲသုးလၢအိၣ်ဘှံးလၢတၢ်မၤပူၤတဖၣ်ႇဂၢၤကီၢ်သုးတဖၣ်လၢတၢ်ထီထီၣ်ကျိတၢ်သိၣ်လိန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ကတီၢ်အံၤရဲၣ်ကျဲၤ၀ဲဒ်သိးကထၢနုာ်လီၤမံၤစရီလၢတၢ်ကထီၣ်ဂံၢ်ခီၣ်ထံးသုးတၢ်သိၣ်လိအဂီၢ်လီၤဒီး လၢခံန့ၣ်ဒ်သိးၦၤမၤတၢ်ဖိလၢအမၤဒံးတၢ်တဖၣ်အမံၤကပၣ်ဃုာ်လၢစရီပူၤအဂီၢ်ဒီး ခီဖျိလၢတၢ်ဘံၣ်တၢ်ဘၢအဂီၢ်ဂံၢ်ဘါတကူတလၢလၢၤဘၣ်အဃိ ကဘၣ်ထီၣ်ဂံၢ်ခီၣ်ထံးတၢ်သိၣ်လိအံၤလီၤအဂ့ၢ်န့ၣ် တၢ်တယးကွၢ်စံး၀ဲန့ၣ်လီၤႉ ဖဲအပူၤကွံာ်(၂၀၂၁)နံၣ်အတီၢ်ပူၤစ့ၢ်ကီး ၦၤမၤတၢ်ဖိအဖိအမါသ့ၣ်တဖၣ်ဘၣ်ထီၣ်၀ဲဂံၢ်ခီၣ်ထံးသုးတၢ်သိၣ်လိစ့ၢ်ကီးအိၣ်၀ဲအဂ့ၢ်န့ၣ် ၦၤမၤတၢ်ဖိလၢအသ့ၣ်ညါတ့ၢ်ဃာ်တၢ်အိၣ်သးတဂၤစံး၀ဲအသိး သ့ၣ်ညါဘၣ်န့ၣ်လီၤႉ

လါဖ့ၤဘြူၤအါရံၤ ၁၀ သီ, ၂၀၂၂ နံၣ်, ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ခီဖျိတကံၤသ၀ီဖိအတီၤတဆံကၠိဖိတဂၤယီၢ်ဘၣ်ပယီၤသုးအမ့ၣ်အဃိ ဘၣ်ဒိဘၣ်ထံး၀ဲနးနးဒီးဘၣ်ဒီၣ်တဲာ်ကွံာ်၀ဲအခီၣ်တခီအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ အတီၤတဆံကၠိဖိမီၤသီၣ်ကၠၤ(၁၆)နံၣ်လၢအအိၣ်ဖဲတကံၤသ၀ီႇတီၤထီကၠိအံၤ ဖဲလါဖ့ၤဘြူၤအါရံၤ ၅ သီအနံၤ လဲၤခီတဲာ်တၢ်လီၢ်ပျီဖဲ၀ၤပိကိသ၀ီကပၤဒီးဆဲးကဲးအဆၢကတီၢ် ယီၢ်ဘၣ်၀ဲမ့ၣ်ပိၢ်လၢပယီၤသုးခီၣ်ချ့သုးရ့ၣ်(ခလရ-၂၈၄)ဒိးလီၤဃာ်၀ဲအံၤအဂ့ၢ်န့ၣ် သ့ၣ်ညါဘၣ်လၢအဘူးအတံၢ်အအိၣ်န့ၣ်လီၤႉ “ကလဲၤဒူၣ်ထီၣ်ကရၢၢ်အဂီၢ်ဖဲလဲၤဒိးဆဲးကဲးလၢကျဲအခါန့ၣ် ဆံၣ်လီၤမၤရှဲ၀ဲသ့ၣ်ဒ့၀ၣ်ဒ့လၢကျဲပူၤဒီးဖဲန့ၣ်ယီၢ်ဘၣ်၀ဲမ့ၣ်ပိၢ်လီၤႉ ဒ်သိးသ၀ီဖိသ့ၣ်တဖၣ်လဲၤဘၣ်က့ၤဘၣ်၀ဲကညီအဂီၢ် ၦၤဘၢၣ်ဖျိ၀ဲဆဲးကဲးကျဲမီၤနီၤႉ ကျဲအံၤၦၤအါဂၤလ့ၢ်လိၤလ့ၢ်ထီၣ်ထီဘိလီၤႉ မ့ၣ်ပိၢ်အံၤမ့ၢ်၀ဲဒၣ်(ခလရ-၂၄၈)ဒိးလီၤဃာ်၀ဲလီၤႉ ခဲအံၤဖိသၣ်န့ၣ်အိၣ်လၢတၢ်ဆါဟံၣ်အခီၣ်ဘၣ်ဒီၣ်တဲာ်ကွံာ်တခီလီၤ”အဂ့ၢ်န့ၣ် တကံၤသ၀ီဖိလၢတအဲၣ်ဒိးတဲဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ တၢ်မ့ကလဲၤဆူကၠၤအ့စ့ၣ်ကၠံဒီးကျီးကရၢၢ်အလီၢ်န့ၣ် ဖဲ၀ၤပိကိသ၀ီဒီးပယီၤသုးခီၣ်ချ့သုးရ့ၣ်(ခလရ-၂၈၄)သုးရ့ၣ်အဘၢၣ်စၢၤန့ၣ်အိၣ်ဒီးတၢ်ဒုးအီၣ်ကျီၢ်ဆၣ်လီၢ်တၢ်လီၢ်ပျီအံၤ လီၢ်က၀ီၤဖိတဖၣ်ဟးထီၣ်ဟးလီၤ၀ဲကိးမုၢ်နံၤဒဲးဒီး ခီဖျိပယီၤသုးအံၤၦၤဟးထီၣ်ဟးလီၤလၢအသုးကလၢၤကပၤတအဲၣ်ဒိး၀ဲဘၣ်အဃိ ဒိးလီၤဃာ်၀ဲမ့ၣ်ပိၢ်လၢၦၤလ့ၢ်လိၤဟးထီၣ်ကျဲပူၤအံၤလီၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ ခီဖျိပယီၤသုးခီၣ်ချ့သုးရ့ၣ်(ခလရ-၂၈၄)လၢအအိၣ်ဆီလီၤသးဖဲကၠၤအ့စ့ၣ်ကၠံကီၢ်ဆၣ်ႇ၀ၤပိကိသ၀ီကပၤအံၤ အိၣ်ဆိးဟူးဂဲၤ၀ဲဒၣ်လၢသ၀ီဖိတဖၣ်အရီဘၢၣ်ကျီးအ့ရယၢ်ပူၤအဃိ လီၢ်က၀ီၤဖိတဖၣ်ဘၣ်ပာ်တ့ၢ်ကွံာ်အရီဘၢၣ်ကျီးအံၤန့ၣ်လီၤႉ ဒ်န့ၣ်အသိးခီဖျိပယီၤသုးဒိးလီၤဃာ်မ့ၣ်ပိၢ်လၢကျဲပူၤလၢၦၤအါဂၤလ့ၢ်လိၤလ့ၢ်ထီၣ်၀ဲအံၤအဖီခိၣ် လီၢ်က၀ီၤဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးန့ၣ်လီၤႉ

လါဖ့ၤဘြူၤအါရံၤ ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါယနူၤအါရံၤ ၂၉ သီအနံၤ ကညီဒီကလုာ်စၢဖှိၣ်ကရၢ(KNU)မုၢ်တြီၢ်ကီၢ်ရ့ၣ်(သုးက့ ၅)ထုးထီၣ်လံာ်ဒီးဟ့ၣ်ပလီၢ်၀ဲလၢ ပယီၤသုးမီၤစိရိၤအစုတီၤဖီလာ်၀ဲၤကျိၤၦၤမၤတၢ်ဖိလၢအအိၣ်ဖဲမုၢ်တြီၢ်ကီၢ်ရ့ၣ် ဖၣ်ပူၣ်၀့ၢ်ပူၤတဖၣ်ကဟးထီၣ်ကွံာ်လၢတၢ်ပာ်ပနီၣ်မုၢ်နံၤမုၢ်သီအတီၢ်ပူၤ၀ံၤအလီၢ်ခံ ကတီၢ်အံၤ၀ဲၤကျိၤၦၤမၤတၢ်ဖိဟးထီၣ်ကွံာ်ခဲလၢာ်အဂၤ(၁၀၀)ဘျဲၣ်လံအဂ့ၢ်န့ၣ် ခ့ၣ်အဲၣ်ယူၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ စးထီၣ်လၢခ့ၣ်အဲၣ်ယူၣ်ထုးထီၣ်ဟ့ၣ်ပလီၢ်၀ဲလၢတလါအံၤလါဖ့ၤဘြူၤအါရံၤ ၁ သီတုၤလၢ ၁၀ သီအနံၤ ၀ဲၤကျိၤၦၤမၤတၢ်ဖိလၢအမၤတၢ်လၢသုးမီၤစိရိၤအစုတီၤအဖီလာ်တဖၣ်ကဟးထီၣ်ကွံာ်လၢ၀့ၢ်ပူၤဒီး မ့မ့ၢ်ဖၣ်ပူၣ်၀့ၢ်ၦၤမၤတၢ်ဖိတဖၣ်ကဘၣ်ဟးဆှဲးသုးမီၤစိရိၤအတၢ်ဖံးတၢ်မၤပူၤ၀ံၤအလီၢ်ခံ ၀ဲၤကျိၤၦၤမၤတၢ်ဖိတဖၣ်ဘၣ်ဟးထီၣ်ကွံာ်၀ဲဒ်အံၤလီၤအဂ့ၢ်န့ၣ် (သုးက့ ၅)ဒုးယၤခိၣ် သုးခိၣ်ဒိၣ်စိ စီၤထူကဆှီ စံး၀ဲဒ်အံၤန့ၣ်လီၤႉ “ဒ်ပဒိးန့ၢ်ဘၣ်စရီအသိးန့ၣ် ၦၤဟးထီၣ်တဖၣ်န့ၣ်အကျါပိာ်မုၣ်ပၣ်၀ဲ(၇၂)ဂၤႇပိာ်ခွါ(၆၂)ဂၤ ခဲလၢာ်န့ၣ်(၁၃၄)ဂၤလီၤ”အဂ့ၢ်န့ၣ် ဒုးယၤခိၣ် သုးခိၣ်ဒိၣ်စိ စီၤထူကဆှီစံးဘၣ်ခ့ၣ်အဲးစံၣ်န့ၣ်လီၤႉ ဖၣ်ပူၤ၀့ၢ်ပူၤ၀ဲၤကျိၤၦၤမၤတၢ်ဖိလၢအဟးထီၣ်တဖၣ်န့ၣ်မ့ၢ်၀ဲကူၣ်သ့၀ဲၤကျိၤႇစံာ်ၦဲၤသူၣ်ဖျး၀ဲၤကျိၤႇဘုၣ်ဖီၣ်မၤညၣ်၀ဲၤကျိၤသဲစး၀ဲၤကျိၤႇတၢ်ဆဲးကျိး၀ဲၤကျိၤႇတၢ်စဲးစ့စရီ၀ဲၤကျိၤၦၤမၤတၢ်ဖိတဖၣ်ဒီး ဒ်သိးအ၀ဲသ့ၣ်ကဟးထီၣ်ဘၣ်အဂီၢ်(ခ့ၣ်အဲၣ်ယူၣ်)တကပၤဟ့ၣ်၀ဲတၢ်မၤစၢၤတဖၣ်အဂ့ၢ်န့ၣ် သုးခိၣ်ဒိၣ်စိ စီၤထူကဆှီစံးအါထီၣ်၀ဲန့ၣ်လီၤႉ တကီၢ်ခါခဲအံၤစ့ၢ်ကီးပယီၤသုးမီၤစိရိၤအံၤကအိးထီၣ်တၢ်ဒုးမဲာ်သၣ်အဂီၢ် အ၀ဲသ့ၣ်ဒုးယၤခိၣ်အနီၢ်ကစၢ်ဒၣ်၀ဲတီခိၣ်ရိၣ်မဲနီၤဖးလီၤ၀ဲသုးကျိၤဖးဒိၣ်ခံကျိၤဒီး လဲၤထီၣ်၀ဲဆူဖၣ်ပူၣ်မုၢ်ထီၣ်မဲးခုၣ်ထၣ်ဟီၣ်က၀ီၤတကျိၤဒီးလၢမုၢ်နုာ်ဘျၢၣ်ပၢၤဟီၣ်က၀ီၤတကျိၤန့ၣ်လီၤႉ တကးဒံးဘၣ်ခးပိၢ်ထီၣ်ကျိဖးဒိၣ်ႇကျိဖိတဖၣ်ကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တကပၤစံး၀ဲန့ၣ်လီၤႉ တကီၢ်ခါခဲအံၤပယီၤသုးမီၤစိရိၤအၦၤနုာ်လီၤဟူးဂဲၤလၢခ့ၣ်အဲၣ်ယူၣ်(သုးက့...

လါဖ့ၤဘြူၤအါရံၤ ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ဃိၣ်သၢဖျၢၣ်၀့ၢ်ပူၤ ခီဖျိဖိသၣ်သ့ၣ်တဖၣ်အီၣ်ဘၣ်၀ဲ(ဟီၣ်ဒီၤ) လၢကီၢ်ကၠီၣ်တဲၣ်ထုးထီၣ်၀ဲအံၤအဃိ ဖိသၣ်သံ၀ဲ(၁)ဂၤဒီး ဘၣ်ဆှၢလၢဂ့ၢ်ဂီၢ်အူတၢ်ဆါဟံၣ်(၁၅)ဂၤအဂ့ၢ်န့ၣ် သ့ၣ်ညါဘၣ်လၢၦၤဂ့ၢ်၀ီတၢ်တိစၢၤမၤစၢၤကရူၢ်အအိၣ်န့ၣ်လီၤႉ တၢ်ညၣ်ဘိ(ဟီၣ်ဒီၤ)လၢအအိၣ်ဒီးခီဘွါဂီၤအံၤတဖၣ် တၢ်ဟဲဟ့ၣ်နီၤလီၤ၀ဲလၢဃိၣ်သၢဖျၢၣ်၀့ၢ်(က၀ီၤဒ့ ၁)ဒီးသဘၤ၀ၣ်သ၀ီအကတီၢ် ဖိသၣ်သ့ၣ်တဖၣ်အီၣ်၀ဲ၀ံၤတူၢ်ဘၣ်၀ဲလၢအမဲာ်မူၤႇအဟၢဖၢဆါဒီး အကသါဃံးထီၣ်၀ဲအဃိ ဘၣ်တၢ်ဆှၢကူဆါယါဘျါအ၀ဲသ့ၣ်လၢဃိၣ်သၢဖျၢၣ်၀့ၢ်ဂ့ၢ်ဂီၢ်အူတၢ်ဆါဟံၣ်အဂ့ၢ်န့ၣ် တၢ်တိစၢၤမၤစၢၤကရူၢ်ဖိတဂၤ စံးဘၣ်ခ့ၣ်အဲးစံၣ်န့ၣ်လီၤႉ ကၠၤအ့စ့ၣ်ကၠံကီၢ်ဆၣ် ၦၤဂ့ၢ်၀ီတၢ်တိစၢၤမၤစၢၤကရူၢ်ဖိတဂၤစံး၀ဲလၢ“ဖဲမဟါန့ၣ်ခီဖျိလၢဖိသၣ်(၈)ဂၤအီၣ်ဘၣ်၀ဲ တၢ်ညၣ်ဘိ(ဟီၣ်ဒီၤ)အဃိတၢ်ဆှၢအ၀ဲသ့ၣ်ဆူတၢ်ဆါဟံၣ်လီၤႉ တနံၤအံၤ(၆)ဂၤအကျါတဂၤန့ၣ်သံ၀ဲလၢကျဲပူၤန့ၣ်လီၤႉ ခိၣ်မူၤႇဘှီးႇအထးခိၣ်ထီၣ်လုး၀ဲလီၤႉ ဘၣ်ဟ့ၣ်ဒုးနၢ (အီၣ်ကစံၣ်ကၠ့ၣ်)ကိးဂၤဒဲးလီၤႉ တၢ်ညၣ်ဘိ(ဟီၣ်ဒီၤ)တဖၣ်မ့ၢ်တၢ်ဟ့ၣ်နီၤလီၤ၀ဲဖဲလဲၣ်န့ၣ်တသ့ၣ်ညါဒံးဘၣ်ႉ ၦၤနီၢ်ဒိၣ်လၢအအီၣ်ဘၣ်၀ဲသ့ၣ်တဖၣ်န့ၣ်တတူၢ်ဘၣ်၀ဲတၢ်နီတမံၤဘၣ်ဘၣ်ဆၣ် မ့မ့ၢ်လၢဖိသၣ်တဖၣ်တၢ်အီၣ်အစုၣ်ထီၣ်ခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤလါဖ့ၤဘြူၤအါရံၤ ၉ သီအနံၤန့ၣ်လီၤႉ ဖဲအပူၤကွံာ်လါဖ့ၤဘြူၤအါရံၤ ၇ သီအနံၤ တၢ်ညၣ်ဘိ(ဟီၣ်ဒီၤ)တကလုာ်အံၤ ကီၢ်ကၠီၣ်တဲၣ်ပဒိၣ်တဖၣ်ဘိးဘၣ်ရၤလီၤဒုးသ့ၣ်ညါ၀ဲလၢတၢ်တကြၢးအီၣ်၀ဲဘၣ်ဒီး မ့ၢ်တၢ်ဆှၢနုာ်လီၤဆူကီၢ်ပယီၤပူၤတကပၤဒ်လဲၣ်အဂ့ၢ်န့ၣ်တၢ်တသ့ၣ်ညါအီၤဒံးဘၣ် ဘၣ်ဆၣ်တၢ်ညၣ်ဘိ(ဟီၣ်ဒီၤ)အံၤကရၤလီၤအသးလၢဒူသ၀ီအပူၤလံအဂ့ၢ်န့ၣ် ၦၤဂ့ၢ်၀ီတၢ်တိစၢၤမၤစၢၤကရူၢ်...

လါဖ့ၤဘြူၤအါရံၤ ၉ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤဂီၤခီအဆၢကတီၢ် လၢဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ ခီဖျိပယီၤသုးမီၤစိရိဟဲထီၣ်တလၢ ကၠၤအ့-တကုၢ်ခံကျဲမုၢ်အဃိ တၢ်ခးလိာ်သးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ ဖဲတနံၤအံၤတချုးမုၢ်၀ါထီၣ်ဒံးဘၣ်အဆၢကတီၢ် ပယီၤသုးမီၤစိရိၤဟဲနုာ်လီၤ၀ဲလၢ(KNLA)သုးရ့ၣ်(၁၇)ဟီၣ်က၀ီၤပူၤအါအါဂီၢ်ဂီၢ်ဒီး တၢ်ဘၣ်သဂၢၢ်ခးလိာ်သးကဲထီၣ်၀ဲဒၣ်ဒီး KNLA သုးရ့ၣ်(၁၇)စုဒုၣ်တီၤအဖီလာ်သုးဒ့(၂)တဖၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲဒ်အံၤန့ၣ်လီၤႉ “တၢ်ကဲထီၣ်သးန့ၣ်ဖဲတဂီၤညါအံၤဖဲကၠၤအ့-တကုၢ်ခံအဘၢၣ်စၢၤလီၤႉ ပနၢ်ဟူလၢတၢ်သံတၢ်ဘၣ်ဒိဘၣ်ထံးအိၣ်လီၤႉ ဘၣ်ဆၣ်တဒိးန့ၢ်ဘၣ်တၢ်ကစီၣ်လီၤတံၢ်လီၤဆဲးဒံးဘၣ်”အဂ့ၢ်န့ၣ် လီၢ်က၀ီၤတၢ်ကစီၣ်လၢအိၣ်ဖဲလီၢ်က၀ီၤဖဲန့ၣ်အပူၤ စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါခီဖျိကျိဖးဒိၣ်သုးလၢအအိၣ်ဖဲကၠၤအ့အံၤခးလီၤကျိဖးဒိၣ်(၃)ဖျၢၣ်အဃိ လီၢ်က၀ီၤဖိအဟံၣ်ဟးဂီၤ၀ဲတဖျၢၣ်ဒီးဆၣ်ဖိကီၢ်ဖိတနီၤဘၣ်ဒိဘၣ်ထံး၀ဲအဂ့ၢ်န့ၣ် လီၢ်က၀ီၤတၢ်ကစီၣ်ဖဲန့ၣ်စံးအါထီၣ်၀ဲန့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးမီၤစိရိၤအသုးသိလ့ၣ်တဖၣ်ဟဲတုၤ၀ဲဖဲတၢ်ခးလိာ်သးကဲထီၣ်အလီၢ်န့ၣ်ဒီး ခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်ဘၣ်ဟးစံၣ်ပလဲာ်သးအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ တၢ်ဒုးကဲထီၣ်အံၤကအိၣ်၀ဲလၢအမံးနံးအတီၢ်ပူၤလီၤဒီး တၢ်ခးလီၤကျိဖးဒိၣ်၀ံၤအလီၢ်ခံခံခီခံကပၤတၢ်ခးလိာ်သးပတုာ်ကွံာ်၀ဲဒီး လၢပယီၤသုးမီၤစိရိၤတကပၤမ့ၢ် သုးရ့ၣ်မနုၤလဲၣ်န့ၣ် တုၤခဲအံၤတၢ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ တၢ်ဒုးကဲထီၣ်၀ံၤအလီၢ်ခံခီဖျိတၢ်ထံၣ်၀ဲလၢပယီၤသုးမီၤစိရိၤအံၤသူ၀ဲသိၣ်လ့ၣ်လၢအတီၣ်ၦၤဆါတဖၣ်အဃိ တၢ်သံတၢ်ဘၣ်ဒိဘၣ်ထံးအိၣ်၀ဲသ့အဂ့ၢ်န့ၣ် လီၢ်က၀ီၤဖိတဖၣ်တယးကွၢ်စံး၀ဲဒၣ်န့ၣ်လီၤႉ

လါဖ့ၤဘြူၤအါရံၤ ၉ သီႇ ၂၀၂၂ နံၣ်ႇ ခ့ၣ်အဲးစံၣ် ကီၢ်စၢဖှိၣ်မုၢ်နံၤလၢပယီၤသုးမီၤစိရိၤကတီခိၣ်ရိၣ်မဲမၤ၀ဲတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအပူၤအံၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီး(KNU/KNLA-PC)ကညီတၢ်မုာ်တၢ်ခုၣ်ကီၣ်ကးကရၢလၢအဆဲးလီၤ(NCA)တဖၣ်ကလဲၤထီၣ်၀ဲအဂ့ၢ်န့ၣ် ကရၢခိၣ်နၢ်ဘၣ်ထွဲတဖၣ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ ကီၢ်ပယီၤကီၢ်စၢဖှိၣ်မုၢ်နံၤတၢ်ရဲၣ်တၢ်ကျဲၤအဂီၢ် ဖဲအပူၤကွံာ်လါဖ့ၤဘြူၤအါရံၤ ၆ သီအနံၤ ပယီၤသုးမီၤစိရိၤကွဲမုာ်၀ဲ(EAOs)ကလုာ်ဒူၣ်ဖီၣ်စုက၀ဲၤတၢ်ပၢၢ်ဆၢကရူၢ်ကရၢသ့ၣ်တဖၣ် လၢဟဲထီၣ်တၢၣ်ပီၣ်တဲသကိး၀ဲတစိၤသးတၢ်မုာ်တၢ်ခုၣ်အံၤန့ၣ်လီၤႉ လါဖ့ၤဘြူၤအါရံၤ ၁၂ သီအနံၤ ကီၢ်စၢဖှိၣ်မုၢ်နံၤၦဲၤထီၣ်(၇၅)၀ီတ၀ီတၢ်တၢၣ်ပီၣ်တဲသကိးလၢတၢ်ကမၤ၀ဲအံၤ ဘၣ်ထွဲဒီးပယီၤသုးမီၤစိရိၤကွဲမုာ်၀ဲကရူၢ်လၢအဆဲးလီၤထံကီၢ်တၢ်ပတုာ်တၢ်ခး(NCA)တဖၣ်ဒီး ကလုာ်ဒူၣ်ဖီၣ်စုက၀ဲၤကရူၢ်လၢအတဆဲးလီၤဘၣ်ဒံး(NCA)သ့ၣ်တဖၣ်လၢကဟဲထီၣ်၀ဲတၢ်တၢၣ်ပီၣ်တဲသကိးတစိၤသးတၢ်မုာ်တၢ်ခုၣ်အံၤအဖီခိၣ်န့ၣ် (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤစတံစံး၀ဲဒ်အံၤန့ၣ်လီၤႉ “ယတလဲၤလၢယနီၢ်ကစၢ်ဘၣ်ႉ ပကပျၢ်လီၤပၦၤခၢၣ်စးဖဲအံၤတဂၤလီၤ”အဂ့ၢ်န့ၣ် သုးခိၣ်ကျၢၢ်စိ စီၤစတံ စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဆၣ်ပယီၤသုးမီၤစိရိၤကွဲမုာ်၀ဲအဖီခိၣ်အံၤ ဃုထၢပျၢ်လီၤအ၀ဲသ့ၣ်ၦၤလၢကလဲၤထီၣ်၀ဲအိၣ်ဘၣ်ဆၣ် တုၤလၢခဲအံၤတဃုထၢဘၣ်၀ဲဒံးဘၣ်ဒီးကလဲၤ၀ဲလၢတၢ်လဲၤထီၣ်၀ဲမူးတၢ်ရဲၣ်တၢ်ကျဲၤလီၤဒီး တဘၣ်ထွဲလိာ်သးဒီးတၢ်တၢၣ်ပီၣ်ထံရူၢ်ကီၢ်သဲးဘၣ်အဂ့ၢ်န့ၣ် (DKBA)ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ လၢန့ၣ်အမဲာ်ညါတၢ်မၤအကျဲလၢထံကီၢ်အကဟံးထီၣ်ဖီၣ်ထီၣ်မၤ၀ဲခါဆူညါသ့ၣ်တဖၣ်အကျါ ဒီကလုာ်ဂ့ၢ်၀ီတၢ်မၤအကျဲႇထံရူၢ်ကီၢ်သဲးတၢ်မၤအကျဲႇတၢ်မုာ်တၢ်ခုၣ်ဒီးတၢ်စိကမီၤၦဲၤတုာ်ကအိၣ်ဂၢၢ်ဆိးကျၢၤတၢ်မၤအကျဲတဖၣ် စးထီၣ်တနံၣ်ညါအံၤကစးထီၣ်၀ဲခီၣ်ခါအသီလၢတၢ်မုာ်တၢ်ခုၣ်အဂီၢ်အဂ့ၢ်န့ၣ် ပယီၤသုးမီၤစိရိၤတၢ်မုာ်တၢ်ခုၣ်လံာ်ကွဲမုာ်အပူၤ ပာ်ဖျါဃာ်၀ဲန့ၣ်လီၤႉ ပယီၤသုးမီၤစိရိၤကွဲမုာ်ကလုာ်ဒူၣ်ဖီၣ်စုက၀ဲၤတၢ်ကရၢကရိဒီးကမၤ၀ဲတၢ်တၢၣ်ပီၣ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအံၤဘၣ်ဆၣ် အ၀ဲသ့ၣ်တကပၤကလဲၤထီၣ်၀ဲထဲလၢမူးတၢ်ရဲၣ်တၢ်ကျဲၤလီၤအဂ့ၢ်န့ၣ် (KNU/KNLA-PC)တကပၤ စံး၀ဲဒ်အံၤန့ၣ်လီၤႉ (KNU/KNLA-PC)ကညီတၢ်မုာ်တၢ်ခုၣ်ကီၣ်ကးနဲၣ်ရွဲၣ် သုးခိၣ်ဒိၣ်စိ စီၤကၠီၤညိၣ် စံး၀ဲလၢ“ဘၣ်ဃးဒီးလၢတၢ်လဲၤတၢ်က့ၤဘျီညါအံၤ...