လါဖ့ၤဘြူၤအါရံၤ ၁ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတၢ်မၤခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(၁၂)ဘျီတဘျီခီကရဲးတၢ်အိၣ််အပူၤ တၢ်ဃုထၢပာ်ထီၣ်က့ၤကီၢ်ရ့ၣ်နဲၣ်ရွဲၣ်ပဒိၣ်စီၤစိမၠ့ၣ်လၢကီၢ်ရ့ၣ်ခိၣ်န့ၣ်လီၤႉ
ဖဲလါယနူၤအါရံၤ ၂၄ သီ တုၤလၢ ၃၀ သီအနံၤ တၢ်မၤ၀ဲ(၁၂)ဘျီတဘျီဒူသထူၣ်ကီၢ်ရ့ၣ်ခီကရဲးတၢ်အိၣ်ဖှိၣ်ဖဲဘံလ့ကီၢ်ဆၣ် လၢၢ်ကတၢၢ်သ၀ီအပူၤဒီး ကီၢ်ဆၣ်(၄)ဘ့ၣ်ဒီးဟီၣ်က၀ီၤလီၤဆီတဘ့ၣ်အခၢၣ်စးႇၦၤဟဲဃုသ့ၣ်ညါတၢ်တဖၣ် ပာ်ဖှိၣ်ခဲလၢာ်ၦၤဟဲထီၣ်၀ဲအဂၤ(၁၀၀)ဘျဲၣ်န့ၣ်လီၤႉ
ခီကရဲးတၢ်အိၣ်ဖှိၣ်ဘျီ၀ဲအံၤအပူၤတၢ်ဃုထၢထီၣ်ကီၢ်ရ့ၣ်ခိၣ်လၢပဒိၣ်စီၤစိမၠ့ၣ်ႇကီၢ်ရ့ၣ်ခိၣ်(၂)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ႇနဲၣ်ရွဲၣ် ပဒိၣ်စီၤအ့နဲၤႇနဲၣ်ရွဲၣ်သဃဲၤ ပဒိၣ်စီၤကီၢ်သဘျ့ဒီး ကီၢ်ရ့ၣ်စံၣ်ညီၣ်ကွီၢ်ခိၣ်ကျၢၢ် အပူၤကွံာ်ပဒိၣ်စီၤဘယ့ၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ရ့ၣ်ကညီပိာ်မုၣ်ကရၢ(KWO)ကရၢခိၣ် နီၢ်အဲၣ်ကမျၢၢ်တီ လၢအဟဲထီၣ်ကီၢ်ရ့ၣ်တၢ်ဃုထၢတဂၤစံး၀ဲလၢ“ၦၤလၢပဃုထၢထီၣ်တဘျီညါအံၤပနာ်လၢအမၤ၀ဲကန့ၢ်လီၤႉ ဘၣ်မနုၤအဃိလဲၣ်န့ၣ်အါဒၣ်တက့ၢ်န့ၣ်အသးတၦၢ်အါအါဒံးဘၣ်ဖံးမၤကဲလီၤႉ ထံရူၢ်ကီၢ်သဲးတၢ်အိၣ်သးခဲအံၤ ပဆၢမုၢ်လၢ်လၢအ၀ဲသ့ၣ်ကမၤ၀ဲလၢအဂ့ၤကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ကီၢ်ရ့ၣ်ခီကရဲးတၢ်အိၣ်ဖှိၣ်လၢဘၣ်တၢ်မၤအီၤ(၇)သီအတီၢ်ပူၤအံၤ တၢ်ပာ်ဖျါထီၣ်သမံသမိးက့ၤအပူၤကွံာ်(၄)နံၣ်တၢ်ဖံးတၢ်မၤတဖၣ်ႇတကီၢ်ခါထံရူၢ်ကီၢ်သဲးတၢ်အိၣ်သးအံၤ ကီၢ်ရ့ၣ်ပူၤတၢ်ကီတၢ်ခဲလၢဘၣ်သဂၢၢ်၀ဲတဖၣ်ဒီးတၢ်တၢၣ်ပီၣ်တဲသကိးခါဆူညါတၢ်မၤရဲၣ်ကျဲၤတဖၣ်တကဒံးဘၣ်အမဲာ်ညါ တၢ်ဃုထၢထီၣ်၀ဲၤကျိၤဘၣ်ထွဲၦၤဘၣ်မူဘၣ်ဒါတဖၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်အံၤကီၢ်ဆၣ်အိၣ်၀ဲ(၄)ဘ့ၣ်လၢအမ့ၢ် သထူၣ်ကီၢ်ဆၣ်ႇဘံလ့ကီၢ်ဆၣ်ႇကၠဲၣ်ထိၤကီၢ်ဆၣ်ဒီးဖၣ်အၣ်ကီၢ်ဆၣ်အမဲာ်ညါ ပၣ်ဃုာ်ဒီးမီၣ်စကိၣ်ဟီၣ်က၀ီၤလီၤဆီတခါန့ၣ်လီၤႉ...
လါဖ့ၤဘြူၤအါရံၤ ၁ သီႇ ၂၀၂၂ နံၣ်ႇ ခ့ၣ်အဲးစံၣ်
ဒ်သိးကလုာ်ဒိၣ်စိသနူဒီးမီၤစိရိၤသနူကကတၢၢ်ကွံာ်အဂီၢ် ကဒုးဖျိးထီၣ်သကိးအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နဲၣ်ရွဲၣ် ပဒိၣ်စီၤလ့စတၣ် ဆီၣ်တခူစံးလီၤ၀ဲဖဲမဟါ(လါယနူၤအါရံၤ ၃၁)သီ တၢ်မၤလၤကပီၤကညီတၢ်ပၢၢ်ဆၢမုၢ်နံၤၦဲၤထီၣ်(၇၃)၀ီတ၀ီဖဲဒူပျာ်ယာ်ကီၢ်ရ့ၣ်ကိၤဒူခွဲသ၀ီပူၤန့ၣ်လီၤႉ
ပဒိၣ်စီၤလ့စတၣ်စ့း၀ဲလၢ“ထံကီၢ်ဒီတဘ့ၣ်ဘၣ်တၢ်ဆီၣ်တံၢ်မၤနၢၤဘၣ်တၢ်မၤသံမၤ၀ီအီၤလီၤႉ ဒ်သိးပကပူၤဖျဲးထီၣ်လၢတၢ်ပၢဆှၢအဖီလာ်အံၤအဂီၢ် ထံဖိကီၢ်ဖိကမျၢၢ်ခဲလၢာ်ကပာ်ဖှိၣ်ထီၣ်သးဒီး ကဒုးဖျိးထီၣ်ကွံာ်ကလုာ်ဒိၣ်စိသနူဒီးမီၤစိရိၤသနူဒ်သိးကကတၢၢ်ကွံာ်အဂီၢ်လိၣ်၀ဲလီၤ”အဂ့ၢ်န့ၣ် စံးလီၤ၀ဲဖဲမူးတၢ်ရဲၣ်တၢ်ကျဲၤအပူၤန့ၣ်လီၤႉ
အစိၤဘၣ်အစိၤပဘၣ်လဲၤခီဖျိဘၣ်အိၣ်လၢတၢ်ပၢဆှၢအဖီလာ်လၢအတအိၣ်ဒီးတၢ်သဘျ့ႇတၢ်ဂၢၢ်တၢ်ကျၢၤအံၤဘၣ်ဒီး ဒ်သိးပကပူၤဖျဲးထီၣ်လၢတၢ်ပၢဆှၢသနူလၢအကမၣ်အံၤအဖီလာ်အဂီၢ် ထံဖိကီၢ်ဖိကမျၢၢ်ခဲလၢာ်ကပၢၢ်ဆၢသကိး ကယဲၢ်မ့ၢ်မီၤစိရိၤသနူခဲလၢာ်အဂ့ၢ်န့ၣ် ပဒိၣ်စီၤလ့စတၣ် ဆီၣ်တခူစံးအါထီၣ်၀ဲန့ၣ်လီၤႉ
ဖဲမဟါတၢ်မၤလၤကပီၤကညီတၢ်ပၢၢ်ဆၢမုၢ်နံၤၦဲၤထီၣ်(၇၃)၀ီတ၀ီမူးတၢ်ရဲၣ်တၢ်ကျဲၤအပူၤ ကီၢ်ရ့ၣ်ခိၣ်နၢ်ဃုာ်ဒီး၀ီၢ်ရ့ၣ်ႇနိၣ်တကီႇကီးတရံးဒီးကၠိၤဒိကီၢ်ဆၣ်လီၢ်က၀ီၤဖိတဖၣ်ဟဲထီၣ်၀ဲဒီး တၢ်ဖးဖျါထီၣ်တၢ်ပၢၢ်ဆၢမုၢ်နံၤအလံာ်ဟ့ၣ်ယုၢ်ႇတၢ်ရှဲပၠးဘၣ်ဃးကညီတၢ်ပၢၢ်ဆၢမုၢ်နံၤဟဲကဲထီၣ်သးအတၢ်စံၣ်စိၤတဲစိၤအဂ့ၢ်သ့ၣ်တဖၣ်န့ၣ်လီၤႉ
ဖဲ(၁၉၄၉)နံၣ်ႇ လါယနူၤအါရံၤ ၃၁ သီအနံၤ တၢ်ထီၣ်ဒုးကွံာ်၀့ၢ်တကူၣ်ႇအလိၣ်ႇဆါခၠီႇနိၣ်တၢ်မျၢ်(အ့စ့ၣ်) (KNU)၀ဲၤလီၢ်ခိၣ်သ့ၣ်တၢ်လီၢ်တနံၤန့ၣ် တၢ်ပာ်ပနီၣ်က့ၤအီၤလၢကညီတၢ်ပၢၢ်ဆၢမုၢ်နံၤဒီး ကိးနံၣ်ဒဲးဘၣ်တၢ်မၤလၤကပီၤအီၤလၢကညီကလုာ်အိၣ်ဆိးတၢ်လီၢ်တဖၣ်အပူၤန့ၣ်လီၤႉ
မုၢ်လၢ်တၢ်ဂ့ၤႇ အိၣ်ကတီၤ
၁.ကမျၢၢ်ႇ သိၣ်ဒူဒီးခိၣ်နၢ်
တၢ်ဆၢဂ့ၤအါထုကဖၣ်
အဲၣ်ကလု၁်သုးမုၢ်သံၣ်ဘိ
ဃူဖိးပှိၤပှီၢ် ဒ်ပံၢ်ချိ
၂.ၦၤကမျၢၢ်ဒူသဝီဖိ
အၢနးကီခဲဘၣ်ခီဖျိ
တံၤသဟီၣ်ဒီးပ၁်ဆူၣ်သး
မုၢ်လီၤနု၁်လါစံၣ်ထီၣ်မး
၃.လီၢ်ယံၤလီၢ်ဘူးကညီဖိ
ပမ့ၢ်ဃူးဖိ ပဒိၣ်စိ
ကီၢ်ပူၤႇ ကီၢ်ချၢပကညီ
တီလိၤႇ ပှိၤပှီၢ် ပထီၣ်ဖီ
၄.ထံတလီၤစီၤမ့ၢ်ပ၁်ဖှိၣ်
ဟ့ၣ်မၤစၢၤဆူၦၤလၢလိၣ်
...
လါယနူၤအါရံၤ ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်
ပယီၤသုးတြိၤ(၄၄)စုဒုၣ်တီၤအဖီလာ်သုးရ့ၣ်လၢအနုာ်လီၤဟံးန့ၢ်အလီၢ်အကျဲလၢလ့က့ၣ်ကိာ်ဟီၣ်က၀ီၤ ဖလူဖးဒိၣ်ႇဖလူဖိသ၀ီအပူၤတနီၤဟးထီၣ်က့ၤ၀ဲလံဘၣ်ဆၣ် မ့မ့ၢ်သုးတြိၤ(၂၂)စုဒုၣ်တီၤအဖီလာ်သုးႇ ကီၢ်ခီသုး၀ဲၤလီၢ်ခိၣ်သ့ၣ်စုဒုၣ်တီၤအဖီလာ်သုးႇဟီၣ်က၀ီၤသုးခိးကီၢ်ဆၢ(BGF)တဖၣ်ဆီလီၤသးအိၣ်ဒံး၀ဲဖဲသီခါဖၠၣ်ႇကသံၣ်ဒၢးႇကၠိဒီးလီၢ်က၀ီၤဖိအဟံၣ်လၢအိၣ်ဘူးကျဲကပၤတဖၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
“သုးတြိၤ(၄၄)ပယီၤသုးလၢအိၣ်မိၣ်ကီၣ်စဲၣ်တဖၣ် ဖဲတနံၤအံၤဂီၤခီန့ၣ်တွံၢ်ထီၣ်၀ဲသ၀ီပူၤကါတီၣ်သ့ၣ်ႇ ကါတီၣ်ဘုခ့ဒီးက့ၤကဒါ၀ဲဆူမၠၣ်၀တံၣ်(၂၇၅)တကပၤလီၤႉ သုးဂံၢ်ဘါကအိၣ်အဂၤ(၁၀၀)ဘျဲၣ်ႇ ပထံၣ်လၢတီၣ်ထီၣ်ဃုာ်ဒီးလီၢ်က၀ီၤဖိအတၢ်ဖိတၢ်လံၤလၢအ၀ဲသ့ၣ်ဟံဃာ်၀ဲတဖၣ်န့ၣ်လီၤႉ အပူၤကွံာ်န့ၣ်ခီဖျိပယီၤသုးကျိၤတဖၣ်ဟဲနုာ်လီၤအိၣ်၀ဲလၢဖလူဖးဒိၣ်တၢ်ဟ့ၣ်ကသံၣ်ဒၢးႇကၠိဒီးသ၀ီပူၤဟံၣ်တဖၣ်အဃိ ၦၤဃ့ၢ်မှံဟးဖျိးတဖၣ်ဟဲက့ၤအိၣ်၀ဲတဘူၣ်ဘၣ်”အဂ့ၢ်န့ၣ် ၦၤဃ့ၢ်မှံဟးဖျိးလၢအဟဲက့ၤအိၣ်လၢသ၀ီပူၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ် ၁၅ သီအနံၤ ခီဖျိတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤအဃိ ၦၤဃ့ၢ်မှံဟးဖျိးတဖၣ်လၢအမ့ၢ်မီထိၣ်သလ့ႇမ့လဲၣ်ပၤႇအ့ၤကၠ့မၠဲၤသ၀ီတကပၤန့ၣ် ၦၤဟဲက့ၤအိၣ်လၢသ၀ီပူၤအိၣ်၀ဲတနီၤလံဘၣ်ဆၣ် လၢတၢ်အီၣ်တၢ်အီအဂီၢ် မၠၣ်၀တံၣ်၀့ၢ်တကပၤဟဲမၤစၢၤဆီၣ်ထွဲဒုးအီၣ်၀ဲလီၤအဂ့ၢ်န့ၣ် ၦၤဃ့ၢ်မှံဟးဖျိးလၢအက့ၤအိၣ်သ၀ီပူၤတဖၣ်စံး၀ဲန့ၣ်လီၤႉ
ဒ်န့ၣ်အသိးလ့က့ၣ်ကိာ်ႇဖလူဖးဒိၣ်ႇဖလူဖိႇပဟံၣ်ကျီးႇထံမဲး၀ါခံႇယသ့ၣ်ကူၤသ၀ီၦၤဃ့ၢ်မှံဟးဖျိးတဖၣ်စ့ၢ်ကီး ဘၣ်အိၣ်ကဒုဒံးအသးဖဲသူမှဲကျိကၢၢ်နံၤႇလ့က့ၣ်ကိာ်သးၦၢ်အိးထီၣ်ဃာ်ၦၤလီၢ်အိၣ်ကဒုအလီၢ်ႇကၠီးခဲးသ၀ီႇဆိၣ်စံမၠဲၣ်သ၀ီပူၤအဂၤ(၃၀၀၀)ဘျဲၣ်ဒံးအဂ့ၢ်န့ၣ် ၦၤလၢအမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
ဖဲစှၤသီအတီၢ်ပူၤလ့က့ၣ်ကိာ်ဟီၣ်က၀ီၤအပူၤ တၢ်လီၢ်လၢပယီၤသုးမီၤစိရိၤအိၣ်အလီၢ်သ့ၣ်တဖၣ် ခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤခးစဲးပြဲး၀ဲကိးမုၢ်နံၤဒဲးအဃိ လ့က့ၣ်ကိာ်ဟီၣ်က၀ီၤကမျၢၢ်တဖၣ််က့ၤအိၣ်လၢအဒူသ၀ီပူၤတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လါယနူၤအါရံၤ ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤအံၤလါယနူၤအါရံၤ ၃၁ သီ ဂီၤခီ ၁ နၣ်ရံၣ်ဃၣ်ဃၣ်အဆၢကတီၢ် ပယီၤသုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် သုးက့(၅) သ့ၣ်ကီၤထၣ်တၢ်လီၢ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ
သ့ၣ်ကီၤထၣ်တၢ်လီၢ်လၢပယီၤသုးမီၤစိရိၤအကဘီယူၤဟဲကွံာ်လီၤ၀ဲမ့ၣ်ပိၢ်(၂)ဖျၢၣ်အံၤ တမ့ၢ်တၢ်လီၢ်လၢကမျၢၢ်သ့ၣ်တဖၣ်အိၣ်၀ဲဘၣ်အဃိ တၢ်ဘၣ်ဒိဘၣ်ထံးတအိၣ်ဒၣ်ဘၣ်ဆၣ် လံာ်ရိဒၢးဃုာ်ဒီးတၢ်သူၣ်ထီၣ်ဟးဂီၤ၀ဲအါအါဂီၢ်ဂီၢ်အဂ့ၢ်န့ၣ် လီၢ်က၀ီၤဖိလၢအဘူးဒီးခ့ၣ်အဲၣ်ယူၣ်တဂၤစံး၀ဲန့ၣ်လီၤႉ
“ဖဲ ၁ နၣ်ရံၣ်အခါန့ၣ်ဟဲကွံာ်လီၤ၀ဲမ့ၣ်ပိၢ်ႇတၢ်လီၢ်ဖဲန့ၣ်ခီဖျိၦၤတအိၣ်နီတဂၤဘၣ်အဃိၦၤဘၣ်ဒိဘၣ်ထံးတအိၣ်ဘၣ်ႉ တၢ်လီၢ်တခါန့ၣ်မ့ၢ်၀ဲၦၤမၤတၢ်အိၣ်ဖှိၣ်အလီၢ်အဃိ အိၣ်ထဲတၢ်သူၣ်ထီၣ်တဖၣ်လီၤႉ အပူၤကွံာ်လၢညါတဘျီဟဲကွံာ်လီၤ၀ဲအခါတၢ်သူၣ်ထီၣ်လၢအဟးဂီၤသ့ၣ်တဖၣ်တၢ်က့ၤသူၣ်ထီၣ်က့ၤ၀ဲဒီး ဟဲကွံာ်လီၤကဒီး၀ဲမ့ၣ်ပိၢ်ခဲအံၤလီၤ”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ
သ့ၣ်ကီၤထၣ်တၢ်လီၢ်အံၤ ဖဲအပူၤကွံာ် ၂၀၂၁ နံၣ် လါမးရှး(၂၈)သီအခါစ့ၢ်ကီး ပယီၤသုးမီၤစိရိၤအသုးကဘီယူၤဟဲကွံာ်လီၤ၀ဲမ့ၣ်ပိၢ်ဒီး ဖဲန့ၣ်တၢ်သူၣ်ထီၣ်တနီၤဟးဂီၤ၀ဲစ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါဖဲမဟါလါယနူၤအါရံၤ ၃၀ သီ မုၢ်နၤခီအဆၢကတီၢ်စ့ၢ်ကီး ခီဖျိမဲၢ်ခါထၣ်ပယီၤသုး...
လါယနူၤအါရံၤ ၃၁ သီႇ ၂၀၂၂ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဒ်သိးသုးမီၤစိရိၤအတၢ်ပၢတၢ်ပြးလဲၤတရံးသးသုတသ့လၢၤတဂ့ၤအဂီၢ် ဖၣ်ပူၣ်၀့ၢ်ပူၤ၀ဲၤကျိၤဘၣ်ထွဲတခါစုာ်စုာ်လၢအလီၤဘၣ်မူဒါဖံးမၤတၢ်လၢသုးမီၤစိရိၤစုတီၤအဖီလာ်ခဲလၢာ် ကဟးထီၣ်ကွံာ်၀ဲလၢအသီတဆံအတီၢ်ပူၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၅)သုး၀ဲၤလီၢ်ခိၣ်သ့ၣ် ထုးထီၣ်ဟ့ၣ်ပလီၢ်၀ဲဖဲလါယနူၤအါရံၤ ၂၉ သီအနံၤန့ၣ်လီၤႉ
ဖၣ်ပူၣ်၀့ၢ်ပူၤဂံၢ်ခီၣ်ထံး၀ဲၤကျိၤတဖၣ်လၢအလီၤဘၣ်မူဒါဖံးမၤတၢ်လၢပယီၤသုးမီၤစိရိၤအစုတီၤအဖီလာ်ခဲလၢာ် တၢ်ကဟ့ၣ်ဒုက့ၤႇဒုးဟးထီၣ်အ၀ဲသ့ၣ်လၢထံကျဲတကပၤလၢကက့ၤဆူအတၢ်လီၢ်တၢ်ကျဲစးထီၣ်ဖဲလါဖ့ၤဘြူၤအါရံၤ(၁)သီတုၤလၢ(၁၀)သီအနံၤတစုအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါမ့မ့ၢ်ဖၣ်ပူၣ်၀့ၢ်ပူၤၦၤမၤတၢ်ဖိတဖၣ်န့ၣ် ကဘၣ်ဟးဆှဲးမၤတၢ်လၢသုးမီၤစိရိၤစုဒုၣ်တီၤအဖီလာ်အသိး ဘၣ်ဃးဒီးတၢ်ဟ့ၣ်ဒုးသ့ၣ်ညါတဖၣ်အံၤတၢ်မ့တလူၤပိာ်မၤထွဲအီၤဒီးမ့ဆဲးမၤဒံး၀ဲဒၣ်န့ၣ် တၢ်ကဟံးန့ၢ်အရ့တုၤလီၤတီၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
တကီၢ်ခါခဲအံၤကီၢ်ပယီၤအပူၤပယီၤသုးမီၤစိရိၤအတၢ်ဖံးတၢ်မၤတဖၣ်အဖီခိၣ် ထံကီၢ်ဒီတဘ့ၣ်အပူၤထံဖိကီၢ်ဖိကမျၢၢ်တဖၣ်ထီဒါဒီးပၢၢ်ဆၢ၀ဲအကျိၤအကျဲအကလုာ်ကလုာ်အံၤဟီၣ်ခိၣ်ဒီတဘ့ၣ်သ့ၣ်ညါ၀ဲအသိး ဒ်သိး KNU/KNLA(သုးက့ ၅)ဟီၣ်က၀ီၤအပူၤ ပယီၤသုးမီၤစိရိၤအတၢ်ပၢတၢ်ပြးလဲၤတရံးသးသုတန့ၢ်တဂ့ၤအဂီၢ် ဘၣ်ထုးထီၣ်ဟ့ၣ်ပလီၢ်၀ဲဒ်အံၤလီၤအဂ့ၢ်န့ၣ် စံး၀ဲန့ၣ်လီၤႉ
ခီဖျိပယီၤသုးကလၢၤလၢအအိၣ်ဖဲခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်အပူၤတဖၣ်တၢ်လဲၤဆှၢန့ၢ်အ၀ဲသ့ၣ်တၢ်အီၣ်တၢ်အီလၢသိလ့ၣ်ဒီးခီၣ်တန့ၢ်လၢၤဘၣ်အဃိ ပယီၤသုးမီၤစိရိၤအံၤသူ၀ဲဒၣ်ကဘီယူၤဒီးဟဲဆှၢ၀ဲတၢ်အီၣ်(၄)ဘျီဆူခ့ၣ်အဲၣ်ယူၣ်ဘုသိၣ်ကီၢ်ဆၣ်ပူၤပယီၤသုးခီပိၣ်သုးကလၢၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါန့ၣ်လီၤႉ
ဖဲအပူၤကွံာ်လါယနူၤအါရံၤ ၂၇ သီအနံၤစ့ၢ်ကီး ခီဖျိပယီၤသုးမီၤစိရိၤအၦၤလၢအအိၣ်ဖဲဖၣ်ပူၣ်၀့ၢ်သ၀ီမုၢ်နုာ်သီခါဖၠၣ်ကရၢၢ်ပူၤအံၤတဖၣ် ခးလီၤကျိဖးဒိၣ်ဆူသ၀ီပူၤအဃိ လီၢ်က၀ီၤသ၀ီဖိသံ၀ဲ(၃)ဂၤႇဟံၣ်ဟးဂီၤ၀ဲ(၂)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ
လါယနူၤအါရံၤ ၃၀ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲမဟါခီဖျိသုးခိးကီၢ်ဆၢ(BGF)ခးလီၤကျိဖးဒိၣ်ဆူခ့ၣ်အဲၣ်ယူၣ်(သုးက့ ၅)ထံသဘျုၣ်ထၣ်ကရူၢ် ထံလီၤသံးထၣ်သ၀ီပူၤအဃိ လီၢ်က၀ီၤသ၀ီဖိသံ၀ဲ(၂)ဂၤဒီးဘၣ်ဒိ၀ဲ(၅)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤလါယနူၤအါရံၤ ၃၀ သီအနံၤန့ၣ်လီၤႉ
ဒ်ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး ဖဲမဟါလါယနူၤအါရံၤ ၂၉ သီ ဟါခီ ၆ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးစုဒုၣ်တီၤအဖီလာ်သုးခိးကီၢ်ဆၢ(BGF-၁၀၁၃)လၢအအိၣ်ဆီလီၤသးဖဲကစၢၢ်သၢဖျၢၣ် သုးရ့ၣ်ခိၣ်(၂)ကၠီၣ်၀့ မၢအၦၤခးလီၤကျိဖးဒိၣ်(၆)ဖျၢၣ်ဆူ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် ထံသဘျုၣ်ထၣ်ကရူၢ် ထံလီၤသံးထၣ်သ၀ီပူၤအဃိ ဘၣ်သံ၀ဲဒၣ်ဖိသၣ်အိၣ်ဖျဲၣ်ထီၣ်သီ(၃)လါတဂၤႇပိာ်မုၣ်ဖိ(၁)ဒီးဘၣ်ဒိစ့ၢ်ကီး(၅)ဂၤန့ၣ်လီၤႉ
လီၢ်က၀ီၤသ၀ီဖိလၢအသံတဖၣ်မ့ၢ်၀ဲနီၢ်ဘျုးဂ့ၤဆၢအိၣ်ဖျဲၣ်ထီၣ်န့ၢ်ထဲ(၃)လါႇနီၢ်ကိလၣ်(၂၀)နံၣ်ဒီး ၦၤလၢအဘၣ်ဒိဘၣ်ထံးတဖၣ်မ့ၢ်၀ဲနီၢ်ဂ့ၤဆှံ(၁၅)နံၣ်ႇနီၢ်မံးသ့(၃၀)နံၣ်ႇစီၤကၠီၣ်မၠး(၅၀)နံၣ်ႇနီၢ်ဘၢၣ်(၆၅)ဒီးစီၤမီၣ်မၠး(၄၃)နံၣ်အဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ
ဘၣ်ထွဲဒီးတၢ်ကဲထီၣ်သးအံၤလီၢ်က၀ီၤသ၀ီဖိတဂၤစံး၀ဲလၢ“ကျိဖးဒိၣ်လီၤတဲာ်တီတီယဟံၣ်ဂီၤထံးလီၤႉ အ၀ဲသ့ၣ်အိၣ်ခးလီၤဆိတၢ်လၢကျဲမုၢ်ခိၣ်ႇလီၤတဲာ်၀ဲလၢဖျၢၣ်ထူကွ့အဃၢၤလီၤႉ ကျိလီၤတဲာ်ဘၣ်ၦၤဟံၣ်တဖျၢၣ်န့ၣ်မ့ၢ်၀ဲဟံၣ်ဖိဃီဖိခဲလၢာ်လီၤႉ ၦၤကလဲၤခူၣ်လီၤဘါဘၢအ၀ဲသ့ၣ်တနံၤညါအံၤလီၤ” အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါခီဖျိ(BGF)ခးလီၤကျိဖးဒိၣ်အဃိ လီၢ်က၀ီၤသ၀ီဖိအမဲၢ်တဲးလဲးဘၣ်ဒိ(၉)ဒု,ထိး(၂)ဒုဒီးဟံၣ်ဟးဂီၤ၀ဲ(၄)ဖျၢၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံးဘၣ်ခ့ၣ်အဲၣ်ယူၣ်မုၢ်တြီၢ်တၢ်ကစီၣ်န့ၣ်လီၤႉ
တကီၢ်ခါခဲအံၤအံၤလီၢ်သ၀ီၤသ၀ီဖိလၢအဘၣ်ဒိဘၣ်ထံးသ့ၣ်တဖၣ်ဘၣ်တၢ်ဆှၢအ၀ဲသ့ၣ်ဆူတၢ်ပူၤဖျဲးအလီၢ်ဒီး ကီၢ်သလ့ၤဆူၣ်ချ့၀ဲၤကျိၤၦၤဘၣ်မူဘၣ်ဒါတဖၣ်ကွၢ်ထွဲကဟုကယာ်အ၀ဲသ့ၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၂၇...
လါယနူၤအါရံၤ ၂၉ သီႇ ၂၀၂၂ နံၣ်ႇ ခ့ၣ်အဲးစံၣ်
တၢ်မၤခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ဂ့ၢ်ဂီၢ်အူတၢ်အိၣ်ဖှိၣ်အပူၤ ကီၢ်ရ့ၣ်ခိၣ်ပဒိၣ်စီၤစွ့ၤမီဃ့အိၣ်ဘှံးလၢမူဒါပူၤအဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးကီၢ်ရ့ၣ်ၦၤဘၣ်မူဘၣ်ဒါအအိၣ်န့ၣ်လီၤႉ
ဖဲလါယနူၤအါရံၤ ၂၇ သီအနံၤ တၢ်မၤ၀ဲခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်ဂ့ၢ်ဂီၢ်အူတၢ်အိၣ်ဖှိၣ်အပူၤ ပဒိၣ်စီၤစွ့ၤမီတီၣ်ထီၣ်ဃ့အခွဲးလၢအကအိၣ်ဘှံးလၢမူဒါပူၤဒီး တကီၢ်ခါခဲအံၤအမူဒါသးနံၣ်တလၢာ်ဒံး၀ဲဘၣ်ဆၣ် တၢ်ပျဲဒုးအိၣ်ဘှံးအီၤတုၤလၢကီၢ်ရ့ၣ်ခီကရဲးတၢ်အိၣ်ဖှိၣ်လၢတၢ်ကမၤ၀ဲအံၤတစုအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ရ့ၣ်ၦၤဘၣ်မူဘၣ်ဒါတဂၤစံး၀ဲ“စးထီၣ်ခဲအံၤန့ၣ်စးထီၣ်အိၣ်ဘှံးလံမီၤနီၤႉ စးထီၣ်အိၣ်ဘှံးခဲအံၤန့ၣ် လ့ၤတက့ၤတမၤ၀ဲလၢၤဘၣ်ႇတမၤ၀ဲလၢၤဘၣ်ရှဲရှဲလီၤဒ်န့ၣ်မီၤနီၤႉ ကအိၣ်ဘှံး၀ဲတုၤလၢအမူဒါနံၣ်ၦဲၤတစုလီၤႉ မ့၀ံၤအ၀ဲကကိးခီကရဲးတၢ်အိၣ်ဖှိၣ်ဒီးကဟ့ၣ်လီၤက့ၤမူဒါဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအိၣ်ပာ်အသိးန့ၣ် လီၢ်ခၢၣ်သးဒီးကီၢ်ရ့ၣ်အပတီၢ်ခိၣ်နၢ်မူဒါအံၤ အသးနံၣ်အိၣ်၀ဲ(၄)နံၣ်န့ၣ်လီၤႉ ကီၢ်ရ့ၣ်ခိၣ်စီၤစွ့ၤမီကဟံတၢ်အိၣ်ဘှံးတုၤလၢအမူဒါနံၣ်လၢာ်တစုဒီး တကီၢ်ခါခဲအံၤ ကီၢ်ရ့ၣ်ခိၣ်ဟ့ၣ်လီၤက့ၤမူဒါဆူသုးက့(၆)သုးက့ခိၣ်အအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လါယနူၤအါရံၤ ၂၈ သီႇ ၂၀၂၂ နံၣ်ႇ ခ့ၣ်အဲးစံၣ်
တကီၢ်ခါသုးမီၤစိရိၤတၢ်ပၢၢ်ဆၢ(နွ့ၤအူတီၤလၤယ့)အံၤ တမ့ၢ်၀ဲလၢၦၤတဒူၣ်တထၢဖိအတၢ်ဘၣ်ဘျုးဘၣ်ဖှိၣ်အဂီၢ်ဘၣ်အဂ့ၢ်န့ၣ် ဒီကလုာ်ဃူဖိး(NUG)ပဒိၣ် ကီၢ်စၢဖှိိၣ်ကိတိာ်ခိၣ်ကျၢၢ် မါ၀့ခဲၤသါ စံးလီၤ၀ဲဒၣ်ဖဲမဟါလါယနူၤအါရံၤ ၂၇ သီ တၢ်မၤ၀ဲကမျၢၢ်တၢ်ကူၣ်လိာ်အိၣ်သကိးမူးတၢ်ရဲၣ်တၢ်ကျဲၤအပူၤန့ၣ်လီၤႉ
ဖဲမဟါအနံၤဒီကလုာ်ဃူဖိးၦၤဟ့ၣ်ကူၣ်တၢ်ကီၣ်ကး(NUCC)တီခိၣ်ရိၣ်မဲမၤ၀ဲတၢ်အိးထီၣ် ကမျၢၢ်တၢ်ကူၣ်လိာ်အိၣ်သကိးမူးတၢ်ရဲၣ်တၢ်ကျဲၤအပူၤ ကီၢ်စၢဖှိၣ်ကိတိာ်ခိၣ်ကျၢၢ် မါ၀့ခဲၤသါ စံးလီၤ၀ဲဒ်အံၤန့ၣ်လီၤႉ
အ၀ဲစံး၀ဲလၢ“တကီၢ်ခါ (နွ့ၤအူတီၤလၤယ့)အံၤမ့ၢ်၀ဲဒၣ်ကမျၢၢ်တၢ်ပၢၢ်ဆၢလီၤႉ တမ့ၢ်တၢ်ပၢၢ်ဆၢလၢပကမၤန့ၢ်ၦၤတဒူၣ်ႇၦၤတကရူၢ်အတၢ်ဘၣ်ဘျုးဘၣ်ဖှိၣ်အဂီၢ်ဘၣ်ႉ တမ့ၢ်စ့ၢ်ကီးတၢ်ပၢၢ်ဆၢလၢၦၤတဒူၣ်ႇၦၤတကရူၢ်မၢလီၤ၀ဲဘၣ်ႉ ထံဖိကီၢ်ဖိကမျၢၢ်ခဲလၢာ်အတၢ်ဘၣ်ဘျုးဘၣ်ဖှိၣ်အဂီၢ် မ့ၢ်တၢ်ပၢၢ်ဆၢလၢထံဖိကီၢ်ဖိကမျၢၢ်ကစၢ်ဒၣ်၀ဲပာ်ဖှိၣ်တီခိၣ်ရိၣ်မဲမၤ၀ဲန့ၣ်လီၤ”အဂ့ၢ်န့ၣ် စံးလီၤ၀ဲန့ၣ်လီၤႉ
လၢန့ၣ်အမဲာ်ညါတကီၢ်ခါ (နွ့ၤအူတီၤလၤယ့)အတီၢ်ပူၤ ဒ်ထံရူၢ်ကီၢ်သဲးတၢ်အိၣ်သးအသိး ဒီကလုာ်ဃူဖိးၦၤဟ့ၣ်ကူၣ်တၢ်ကီၣ်ကးတဖၣ်ကကွဲးလီၤ၀ဲဖဲၣ်ဒရဲၣ်ဒံၣ်မိၣ်ခြ့ၣ်စံၣ်တၢ်အၢၣ်လီၤအီလီၤတကးဒံးဘၣ်အမဲာ်ညါ တၢ်ပၢၢ်ဆၢကရူၢ်ပာ်ဖှိၣ်တဖၣ်အဘၢၣ်စၢၤ ဒ်ထံရူၢ်ကီၢ်သဲးတၢ်အရ့ဒိၣ်အသိး ကပာ်ဖှိၣ်မၤသကိးတၢ်အိၣ်၀ဲအဂ့ၢ်န့ၣ် ကီၢ်စၢဖှိၣ်ကိတိာ်ခိၣ်ကျၢၢ် မါ၀့ခဲၤသါ စံးအါထီၣ်၀ဲန့ၣ်လီၤႉ
လါယနူၤအါရံၤ ၂၇ သီ တုၤလၢ ၃၀ သီအနံၤ ကမျၢၢ်တၢ်ကူၣ်လိာ်အိၣ်သကိးလၢတၢ်မၤ၀ဲအဆိကတၢၢ်တဘျီအံၤ...
လါယနူၤအါရံၤ ၂၈ သီႇ ၂၀၂၂ နံၣ်ႇ ခၣ်အဲးစံၣ်
ဖဲစှၤသီအတီၢ်ပူၤခီဖျိပယီၤသုးမီၤစိရိၤနုာ်လီၤဟူးဂဲၤမၤ၀ဲဒုးယၤတၢ်ရဲၣ်တၢ်ကျဲၤလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ပူၤအဃိ လီၢ်က၀ီၤဖိလၢအကလးဘၣ်ဟးစံၣ်ပလဲာ်သးတကးဒံးဘၣ်အမဲာ်ညါ ကၠိလၢကီၢ်သူလ့ၤကူၣ်သ့၀ဲၤကျိၤအိးထီၣ်ဃာ်၀ဲတနီၤဘၣ်တၢ်ကးတံၢ်ဃာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီးတရံးကီၢ်ဆၣ်အပူၤ တကီၢ်ခါခဲအံၤခီဖျိပယီၤသုးမီၤစိရိၤဟဲနုာ်လီၤတလၢဟီၣ်က၀ီၤတၢ်ပာ်ပနီၣ်အလီၢ်ဒီး မၤ၀ဲတၢ်ထီၣ်ဒုးအဃိ သ၀ီ(၂၇)ဖျၢၣ်လီၢ်က၀ီၤဖိ(၂၀ႇ၀၀၀)ဃၣ်ဃၣ်ဘၣ်ဟးစံၣ်ပလဲာ်သးဒီး ကၠိလၢအိၣ်ကီၢ်သူလ့ၤကူၣ်သ့ဆဲးလၤ၀ဲၤကျိၤ(KECD)တၢ်ပၢအဖီလာ်တနီၤဘၣ်တၢ်ကးတံၢ်ဃာ်၀ဲအမဲာ်ညါ ကၠိလၢအဂၤတဖၣ်စ့ၢ်ကီးဘၣ်တၢ်ဒိးစဲးဆိအီၤအဂ့ၢ်န့ၣ် ဟီၣ်က၀ီၤကူၣ်သ့မူဒါခိၣ်စံး၀ဲအသိး သ့ၣ်ညါဘၣ်န့ၣ်လီၤႉ
ပူယ့တီၤထီကၠိ ကၠိခိၣ်သရၣ်စီၤဂ့ၤဒိၣ်စံး၀ဲလၢ“ပစးထီၣ်ပံးကၠိန့ၣ်ခီဖျိလၢဒုၣ်ဒါဟဲဘူးထီၣ်အဃိလီၤႉ မ့၀ံၤဟဲထီၣ်လၢကျဲန့ၣ်ၦၤအိၣ်ခိးခး၀ဲႉ ပကွၢ်က့ၤလၢပကၠိန့ၣ်ကၠိဖိန့ၣ်အိၣ်ဒီးလီၢ်ယံၤအိၣ်အဃိန့ၣ် တနီၤမိပါခီဒုဆှၢဖိခီသးတနၢၤစ့ၢ်ဘၣ်လီၤႉ ဒီးမ့၀ံၤကူၣ်သ့ခိၣ်ဆဲးထီၣ်လီတဲစိမၢပပံးဃာ်ကၠိတနွံဒီး တၢ်အိၣ်သးမ့ဂ့ၤထီၣ်မးကက့ၤအိးထီၣ်ကဒါက့ၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိဟီၣ်က၀ီၤပူၤတၢ်အိၣ်သးတဂၢၢ်တကျၢၤဘၣ်အဃိ တကီၢ်ခါခဲအံၤလၢခ့ၣ်အဲၣ်ယူၣ် ကီးတရံးကီၢ်ဆၣ်ပူၤ တၢ်ကးတံၢ်ဃာ်၀ဲကၠိခဲလၢာ်အိၣ်အဖျၢၣ်(၁၀)ဘျဲၣ်လံအသိး ကၠိလၢအဂၤတဖၣ်တၢ်အိးထီၣ်ဒံး၀ဲဘၣ်ဆၣ် ဘၣ်ထီၣ်ကၠိလၢတၢ်ပျံၤတၢ်ဖုးအပူၤလီၤအဂ့ၢ်န့ၣ် ကီးတရံးကီၢ်ဆၣ် ကီၢ်သူလ့ၤကူၣ်သ့ဆဲးလၤ၀ဲၤကျိၤ နဲၣ်ရွဲၣ်သဃဲၤ စီၤဟဲခုၣ် စံးဘၣ်ခ့ၣ်အဲးစံၣ်န့ၣ်လီၤႉ
အ၀ဲစံး၀ဲလၢ“ကၠိတနီၤန့ၣ်အိၣ်ဘူးဒီးပယီၤဟဲထီၣ်အဃိ ဆဲးအိးထီၣ်တသ့လၢၤဘၣ်အိၣ်လီၤႉ တနီၤန့ၣ်တဲ၀ဲလၢကဒုးဒိးစဲး၀ဲလၢအဆိအချ့လီၤႉ ကၠိတနီၤဒိးစဲး၀ံၤစ့ၢ်ကီးအိၣ်မီၤနီၤႉ ဒိးစဲး၀ံၤနါက့တၢ်အိၣ်သးမ့ဟဲက့ၤဂ့ၤထီၣ်န့ၣ်ကက့ၤအိးထီၣ်ကဒါ၀ဲလီၤႉ...