ခ့ၣ်အဲးစံၣ် – KIC News

လါယနူၤအါရံၤ ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါယနူၤအါရံၤ ၂၆ သီအနံၤ ပယီၤသုးမီၤစိရိၤခီၣ်ချ့သုးရ့ၣ်(ခမရ-၆၄၂)လၢအအိၣ်ဖဲဖၣ်ပူၣ်၀့ၢ် အၦၤတဂၤဟဲက့ၤဟ့ၣ်လီၤအသးဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ (သုးက့- ၅)မုၢ်တြီၢ်ကီၢ်ရ့ၣ်အအိၣ်ဃုာ်ဒီးတၢ်စုက၀ဲၤလၢလၢၦဲၤၦဲၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲမဟါအနံၤန့ၣ်လီၤႉ ပယီၤသုးမီၤစိရိၤ(ခမရ-၆၄၂)သုးရ့ၣ်လၢအအိၣ်ဆီလီၤသးဖဲတီအူဟီၣ်က၀ီၤ အသုးဖိမီၣ်မၠိလွ့ၤ(၂၃)နံၣ် ကစၢ်နီၣ်ဂံၢ်(တ-၅၄၈၁၂၈)အံၤ ခီဖျိတအဲၣ်ဒိး၀ဲဒၣ်ခိၣ်နၢ်လၢတၢ်ဖီခိၣ်အတၢ်ဖံးတၢ်မၤတဖၣ်ဘၣ်အဃိ ဘၣ်စံၣ်ဖျိးထီၣ်၀ဲဒ်အံၤလီၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲတၢ်ဂီၤမူအပူၤစံး၀ဲန့ၣ်လီၤႉ သုးဖိမီၣ်မၠိလွ့ၤစံး၀ဲလၢ“စံၣ်ဖျိးထီၣ်တၢ်ဂ့ၢ်တၢ်ကျိၤခီန့ၣ် ခီဖျိမၢ၀ဲၦၤသုးဖိလၢတၢ်ဖီလာ်တဖၣ်ဖဲကတိလီၤႉ မ့၀ံၤဒုးအီၣ်၀ဲဘျဲဘျဲတဘျဲဘျဲလီၤႉ ထံနါက့ဒုးအီ၀ဲလၢစက့လီၤႉ ဒုးအီၣ်မ့ၤန့ၣ်သိတပၣ်ဘၣ်ႇအ၀ဲသ့ၣ်မၢၦၤသုးဖိလၢတၢ်ဖီလာ်တဖၣ်ဒီးတၢ်မ့တဘၣ်အ၀ဲသ့ၣ်သူၣ်သးဘၣ်န့ၣ်ဒဲ၀ဲပမဲာ်သၣ်ႇခးပုာ်ၦၤလီၤႉ မ့၀ံၤထိ၀ဲဒၣ်ဒီးအစုခိၣ်သၣ်ႇဒဲ၀ဲဒၣ်ပမဲာ်သၣ်လီၤႉ မ့၀ံၤအ၀ဲသ့ၣ်ကဒဲကဒဲမ့တဘၣ်ဂီၢ်လိာ်သးဘၣ်န့ၣ် ဆိၣ်၀ဲထု၀ဲသုးဖိလၢအိၣ်တၢ်ဖီလာ်တဖၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါသုးဖိလၢအိၣ်တၢ်ဖီလာ်သ့ၣ်တဖၣ်တအီၣ်ဘၣ်ဘျဲဘျဲဘၣ်ဆၣ် မ့မ့ၢ်လၢသုးခိၣ်သုးနၢ်တဖၣ်န့ၣ်အီၣ်ဘၣ်၀ဲဘျဲဘျဲလီၤအဂ့ၢ်န့ၣ် သုးဖိမီၣ်မၠိလွ့ၤ စံးအါထီၣ်၀ဲန့ၣ်လီၤႉ စးထီၣ်လၢ(၂၀၂၁)နံၣ် လါဖ့ၤဘြူၤအါရံၤ ၁ သီ သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ ပယီၤသုးမီၤစိရိၤအၦၤဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်(သုးက့ ၅)ဟဲအါထီၣ်၀ဲအသိး စးထီၣ်လၢ(၂၀၂၁)နံၣ် တုၤလၢတနံၣ်အံၤလါယနူၤအါရံၤ ၂၆...

လါယနူၤအါရံၤ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် ဒ်သိးသဲစးဂ့ၢ်၀ီအဂံၢ်ကဆူၣ်ထီၣ်တုၤလီၤတီၤလီၤအဂီၢ် ဖဲမဟါလါယနူၤအါရံၤ ၂၅ သီအနံၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သဲစး၀ဲၤကျိၤစုတီၤအဖီလာ် ကညီတၢ်ဆီၣ်ထွဲမၤစၢၤသဲစး၀ဲၤလီၢ်(KLAC)ဒီးကညီဂံၢ်ခီၣ်ထံးတၢ်ကရၢကရိတဖၣ် မၤ၀ဲတၢ်တၢၣ်ပီၣ်တဲသကိးတၢ်ရဲၣ်တၢ်ကျဲၤတခါဒီး ကပာ်ဖှိၣ်မၤသကိး၀ဲတၢ်န့ၣ်လီၤႉ ထံဖိကီၢ်ဖိကမျၢၢ်တဖၣ်ဖဲအကွၢ်ဆၢၣ်မဲာ်ဒီးသဲစးဂ့ၢ်၀ီတၢ်ကီတၢ်ခဲႇတၢ်တၤတၢ်အဆၢကတီၢ် ဒ်သိးကပာ်ဖှိၣ်ဃဲၣ်လီၤဘှါရှဲသကိး၀ဲအဂီၢ် တၢ်တၢၣ်ပီၣ်ဃုသကိး၀ဲအစၢဒီး တၢ်ပာ်လီၤ၀ဲခါဆူညါတၢ်ရဲၣ်တၢ်ကျဲၤတဖၣ်အဂ့ၢ်န့ၣ် (KLAC)နဲၣ်ရွဲၣ် နီၢ်လွဲထူစ့ စံးဘၣ်ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်ဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤခီဖျိထံရူၢ်ကီၢ်သဲးဒီးတၢ်ဘံၣ်တၢ်ဘၢတၢ်အိၣ်သးအဃိ ဒ်သိးတၢ်ကဟ့ၣ်၀ဲသဲစးဂ့ၢ်၀ီတၢ်သ့ၣ်ညါနၢ်ပၢၢ်အဂီၢ် တၢ်ကီတၢ်ခဲအိၣ်၀ဲဒၣ်အါမးလီၤႉ ဒ်သိးကမျၢၢ်တဖၣ်အတၢ်နာ်အီၣ်သဲစးဂ့ၢ်၀ီအံၤအဂီၢ်န့ၣ် အရ့ဒိၣ်၀ဲဒၣ်လီၤႉ တၢ်အဃိန့ၣ်ကဟ့ၣ်ခီဟ့ၣ်နီၤလီၤ၀ဲကမျၢၢ်ဘၣ်ဃးဒီးကီၢ်သူလ့ၤတၢ်ဘျၢသဲစးတၢ်သိၣ်လိႇတၢ်တၢၣ်ပီၣ်တဲသကိးဘၣ်ဃးသဲစးႇတၢ်ဂ့ၢ်တၢ်ကျိၤဘၣ်ဃးသဲစးတဖၣ်လီၤ”အဂ့ၢ်န့ၣ် စံး၀ဲန့ၣ်လီၤႉ တၢ်တၢၣ်ပီၣ်တဲသကိးလၢအဘၣ်တၢ်မၤ၀ဲတသီအတီၢ်ပူၤအံၤ ကညီသးစၢ်ကရၢႇပိာ်မုၣ်ကရၢႇၦၤဂ့ၢ်၀ီခွဲးယာ်ကရူၢ်ႇတၢ်အိၣ်ဆူၣ်အိၣ်ချ့ကရူၢ်ႇသဲစးဂ့ၢ်၀ီဒီးတၢ်ကူၣ်ဘၣ်ကူၣ်သ့ဂ့ၢ်၀ီ ဂံၢ်ခီၣ်ထံးတၢ်ကရၢကရိ(၇)ဒူၣ်လၢအအိၣ်ဖဲကီၢ်ဆၢအံၤတဖၣ်ဟဲထီၣ်တၢၣ်ပီၣ်တဲသကိး၀ဲဒၣ်ဒီး တၢၣ်ပီၣ်တဲသကိး၀ဲခါဆူညါတၢ်ရဲၣ်တၢ်ကျဲၤအခါ(၁၀)န့ၣ်လီၤႉ တၢ်ပာ်လီၤတၢ်မၤရဲၣ်ကျဲၤခါဆူညါတဖၣ်လၢအမ့ၢ် ဂံၢ်ခီၣ်ထံးတၢ်ကရၢကရိတဖၣ်ကနုာ်လီၤဃိ ထံသ့ၣ်ညါတၢ်လၢကမျၢၢ်အအိၣ်ဒီးကဟ့ၣ်၀ဲသဲစးတၢ်သိၣ်လိႇကီၢ်ရ့ၣ်တဘ့ၣ်စုာ်စုာ်ကပာ်လီၤ၀ဲ(focal person)တၢ်ဟ့ၣ်ကူၣ်ဟ့ၣ်ဖးဘၣ်ဃးသဲစးဂ့ၢ်၀ီတဖၣ်ႇ ကစိာ်ကဖီထီၣ်တၢ်တိစၢၤမၤစၢၤကမျၢၢ်သဲစးကရူၢ်(CLV)အသနၢၣ်အဂီၢ်ဒီး ကပာ်ဖှိၣ်ဒုးအိၣ်ထီၣ်သကိး၀ဲတၢ်မၤရဲၣ်ကျဲၤဘၣ်ဃးသဲစးဂ့ၢ်၀ီတဖၣ်အံၤန့ၣ်လီၤႉ လၢန့ၣ်အမဲာ်ညါတကီၢ်ခါထံရူၢ်ကီၢ်သဲးတၢ်သဘံၣ်သဘုၣ်အတီၢ်ပူၤ ဒ်တၢ်အိၣ်သးတခါအသိးမ့ၢ်ဂ့ၤႇ တၢ်ဘျၢသဲစးဒီးသဲစးဂ့ၢ်၀ီသနူတၢ်ဆီတလဲမ့ၢ်ဟဲအိၣ်ထီၣ်န့ၣ် ကဒုးသ့ၣ်ညါ၀ဲကမျၢၢ်တကတီၢ်ဃီအသိး ကဟ့ၣ်ကူၣ်ဟ့ၣ်ဖးကမျၢၢ်လၢသဲစးဂ့ၢ်၀ီဒီး ၦၤလၢအလိၣ်ဘၣ်၀ဲသဲစးတၢ်ဟ့ၣ်ကူၣ်ဟ့ၣ်ဖးသ့ၣ်တဖၣ်န့ၣ်...

လါယနူၤအါရံၤ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိတၢ်ဒုးကဲထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤကိးမုၢ်နံၤဒဲးအဃိ လီၢ်က၀ီၤကမျၢၢ်လၢအအိၣ်ဘူးဒီးတၢ်ဒုးဟီၣ်က၀ီၤတဖၣ်တုၤလၢခဲအံၤတစုက့ၤအိၣ်ဆိးလၢအဒူသ၀ီပူၤတဘူၣ်ဒံး ၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲဖဲတနံၤအံၤလါယနူၤအါရံၤ ၂၆ သီအနံၤန့ၣ်လီၤႉ ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးန့ၣ် ခီဖျိပယီၤသုးမီၤစိရိၤဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် နုာ်လီၤဟူးဂဲၤ၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤတပယူာ်ဃီအဃိ တၢ်ဒုးကဲထီၣ်၀ဲဒီးကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တဖၣ်ကိးမုၢ်နံၤဒဲးညါန့ၣ်လီၤႉ ခ့ၣ်အဲၣ်ယူၣ်တၢ်ပၢဟီၣ်တဖၣ်အပူၤစးထီၣ်ဖဲလါယနူၤအါရံၤ ၁၅ သီ တုၤလၢ ၂၅ သီအနံၤ လၢ(၁၀)သီအတီၢ်ပူၤ တၢ်ဘၣ်သဂၢၢ်ခးလိာ်သးကဲထီၣ်၀ဲ(၁၀၅)ဘျီဒီး ဖဲန့ၣ်ပယီၤသုးမီၤစိရိၤအၦၤသံ၀ဲ(၁၅၀)ဂၤႇဘၣ်ဒိ(၁၁၅)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးမီၤစိရိၤအသုးႇသုးခိးကီၢ်ဆၢ(BGF)တဖၣ် ခးလီၤကျိဖးဒိၣ်ဆူကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲအံၤခဲအံၤအဃိ လၢ(၁၀)သီအတီၢ်ပူၤကမျၢၢ်သံ၀ဲ(၃)ဂၤႇ ဘၣ်ဒိ၀ဲ(၄)ဂၤန့ၣ်လီၤႉ တကးဒံးဘၣ်ခီဖျိအ၀ဲသ့ၣ်မၢဆူၣ်၀ဲလီၢ်က၀ီၤကမျၢၢ် လၢကတီၣ်န့ၢ်အ၀ဲသ့ၣ်သုးတၢ်အီၣ်တၢ်အီတဖၣ်အဃိ ကမျၢၢ်သ့ၣ်တဖၣ်ပျံၤဘၣ်တၢ်ဒီးဘၣ်တီဆှၢန့ၢ်အ၀ဲသ့ၣ်တၢ်အီၣ်တၢ်အီတဖၣ်လီၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ဆၢကတီၢ်ခဲအံၤဘၣ်လၢသူၣ်ဘီၣ်သးစၢ်ဖိဒံဖိသၣ်တဖၣ်ကဘၣ်ထီၣ်ကၠိအဆၢကတီၢ်ဘၣ်ဆၣ် ခီဖျိပယီၤသုးမီၤစိရိၤမၤ၀ဲဒုးယၤဂ့ၢ်၀ီတၢ်ရဲၣ်တၢ်ကျဲၤအဃိ ဖိဒံဖိသၣ်သ့ၣ်တဖၣ်တထီၣ်ဘၣ်ကၠိဘၣ်ဒီးဘၣ်ဟးစံၣ်အိၣ်၀ဲလၢၦၢ်ပူၤအဂ့ၢ်န့ၣ် ပာ်ဖျါဃာ်၀ဲန့ၣ်လီၤႉ လီၢ်က၀ီၤကမျၢၢ်လၢအဘၣ်စံၣ်တဖၣ်အကျါလီၤဆီဒၣ်တၢ်သူၣ်က့သးၦၢ်ႇဖိဒံဖိသၣ်သ့ၣ်တဖၣ်ဘၣ်ကွၢ်ဆၢၣ်မဲာ်၀ဲဒီးတၢ်ကီတၢ်ခဲတၢ်နးတၢ်ဖှီၣ်ဒိၣ်ကတၢၢ်လီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤစံးအါထီၣ်၀ဲန့ၣ်လီၤႉ ခီဖျိတၢ်ဒုးကဲထီၣ်ကိးမုၢ်နံၤဒဲးအဃိ(သုးက့ ၁)ဒူသထူၣ်ကီၢ်ရ့ၣ်ႇ(သုးက့ ၃)ချၢၣ်လွံၢ်ထူၣ်ကီၢ်ရ့ၣ်ႇ(သုးက့ ၄)ဘျံးဒ၀ဲၢ်ကီၢ်ရ့ၣ်ႇ(သုးက့...

လါယနူၤအါရံၤ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိအယီၤသုးမီၤစိရိၤအသုးနုာ်လီၤဟူးဂဲၤလၢကီးတရံး၀့ၢ်ကလံၤထံးသ၀ီတဖၣ်အပူၤအဃိ လီၢ်က၀ီၤဒူဖိသ၀ီဖိလၢအကထိဘၣ်ပာ်တ့ၢ်ကွံာ်တၢ်လုၢ်အီၣ်နီၢ်ခိသးသမူတၢ်ဖံးတၢ်မၤတဖၣ်ဒီး ဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤဖိလၢအအိၣ်ဖဲကီးတရံးကလံၤထံးသ့ၣ်တဖၣ် ဆၢကတီၢ်ခဲအံၤတၢ်ဆၢကတီၢ်ဘၣ်လၢကဘၣ်ကူးက့ၤ၀ဲအဘုႇသဘ့ဟီၣ်လာ်(ပဲ),ဘုခ့ဒီးနံၣ်သိသ့ၣ်တဖၣ်လံဘၣ်ဆၣ် အ၀ဲသ့ၣ်ဘၣ်ပာ်တ့ၢ်ကွံာ်အတၢ်သူၣ်တၢ်ဖျးတဖၣ်ခဲလၢာ်တကးဒံးဘၣ် ဘၣ်တ့ၢ်ကွံာ်ဆၣ်ဖိကီၢ်ဖိလၢအဘုၣ်ဃာ်၀ဲလၢဟံၣ်သ့ၣ်တဖၣ်ဒီးဘၣ်ဟးစံၣ်ပလဲာ်သးအဂ့ၢ်န့ၣ် အီဖးဖးဒိၣ်ကရူၢ်လီၢ်က၀ီၤဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“ၦၤတနီၤန့ၣ်အဘုဘီထီၣ်လံႇဘၣ်ကူး၀ဲအဆၢကတီၢ်ဘၣ်လံ ကူးတချုးဒံးဘၣ်ႉ ၦၤလၢအသူၣ်ပဲတနီၤန့ၣ်စ့ၢ်ကီးတထဲးဘၣ်ဒံးပဲဒံးဘၣ်ႉ မ့၀ံၤကျီၢ်ႇမဲးတဲးလဲးသ့ၣ်တဖၣ်စ့ၢ်ကီး ဖဲအကစၢ်တအိၣ်ဘၣ်အခါဘၣ်ယိၣ်လၢကလီၤဒိဒီးတၢ်အီၣ်ဘၣ်ပျၢ်လီၤကွံာ်၀ဲခဲလၢာ်အဃိ အ၀ဲသ့ၣ်နုာ်လီၤလၢတၢ်သူၣ်တၢ်ဖျးကရၢၢ်ပူၤဒီးမၤဟးဂီၤ၀ဲတၢ်ခဲလၢာ်လီၤမီၤနီၤႉ လၢကက့ၤကွၢ်တၢ်သူၣ်တၢ်ဖျးကျီးအဂီၢ်စ့ၢ်ကီးဘၣ်ယိၣ်လၢတၢ်ကဖီၣ်ပီၣ်တၣ်အဃိ ၦၤက့ၤတဘူၣ်နီတဂၤဘၣ်ႉ တၢ်သ့ၣ်တဖၣ်န့ၣ်ဆှူကွံာ်ခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲလါယနူၤအါရံၤ ၆ သီတုၤလၢအခဲအံၤန့ၣ် ခီဖျိပယီၤသုးမီၤစိရိၤအသုးဟဲနုာ်လီၤလၢကီးတရံးကလံၤထံးတကပၤအဃိ ကီးနွဲၢ်သ၀ီႇမီမးႇအီဖးဖးဒိၣ်ႇစဲၣ်ကၣ်၀ဲးႇအကၠူၣ်ႇယွၤတါရှ့ၤဒီးသိစဲၤသိဆူၣ်သ၀ီကရူၢ် သ၀ီပာ်ဖှိၣ်(၂၇)ဖျၢၣ် လီၢ်က၀ီၤဖိတကလးဘျဲၣ်ဘၣ်ဟးစံၣ်ပလဲာ်အသးဒီး တနီၤန့ၣ်လဲၤအိၣ်၀ဲလၢအဘူးတံၢ်အဟံၣ်လၢတၢ်လီၢ်အဂၤအိၣ်စ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးမီၤစိရိၤအသုးလၢအနုာ်လီၤဟူးဂဲၤတလၢ၀ဲခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်ဟီၣ်က၀ီၤတၢ်ပာ်ပနီၣ်အလီၢ်တဖၣ်အံၤ တကီၢ်ခါခဲအံၤအ၀ဲသ့ၣ်အိၣ်ဆီလီၤအသးဖဲကမဲၤကိသီခါဖၠၣ်ကရၢၢ်ပူၤဒီးအီဖးဖိသ၀ီပူၤၦၤဟံၣ်တဖၣ်ဒီး ဖီၣ်အီၣ်ဟုၣ်၀ဲဟံၣ်ကစၢ်အဆီႇထိၣ်ဒ့ၣ်တဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ပယီၤသုးမီၤစိရိၤအသုးတဖၣ်အံၤ လၢမုၢ်ဆါခီန့ၣ်တမၤ၀ဲသုးတၢ်ဟူးတၢ်ဂဲၤဘၣ်ဆၣ်သနါက့ ဟူးဂဲၤအါ၀ဲလၢမုၢ်နၤခီအဆၢကတီၢ်အဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ် ကီးတရံးကီၢ်ဆၣ် ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ “ခဲအံၤအ၀ဲသ့ၣ်ဟဲထီၣ်တုၤလၢအီဖးဖးဒိၣ်လံႉ ဟဲနုာ်လီၤလၢမနုၤအဃိလဲၣ်န့ၣ်တသ့ၣ်ညါဘၣ်ႉ...

လါယနူၤအါရံၤ ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ (သုးက့ ၅)မုၢ်တြီၢ်ကီၢ်ရ့ၣ်ဟီၣ်က၀ီၤအပူၤ ဖဲလါယနူၤအါရံၤ ၂၂ သီ တသီအတီၢ်ပူၤတၢ်ဒုးကဲထီၣ်၀ဲ(၆)ဘျီဒီး ဖဲန့ၣ်ပယီၤသုးမီၤစိရိၤအၦၤသံခဲလၢာ်(၈)ဂၤႇဘၣ်ဒိ(၇)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါယနူၤအါရံၤ ၂၄ သီအနံၤန့ၣ်လီၤႉ ဒ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိးန့ၣ် ဖဲလါယနူၤအါရံၤ ၂၂ သီႇ ဂီၤခီ ၂ နၣ်ရံၣ်ဃၣ်ဃၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA သုးရ့ၣ်(၁၀၂)သုးပာ်ဖှိၣ်တဖၣ်နုာ်လီၤခး၀ဲသုးခိးကီၢ်ဆၢ(BGF)ဖဲဃီ၀ါထၣ်တိၤဒီး ဖဲန့ၣ်ပယီၤသုးသံ၀ဲ(၂)ဂၤႇဘၣ်ဒိ(၂)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ တကတီၢ်ဃီဖဲဂီၤခီ ၆း၃၀ အဆၢကတီၢ်စ့ၢ်ကီး (KNLA) သုးရ့ၣ်(၁၅)ဒီးသုးဒ့(၂)အၦၤတဖၣ်ပာ်ဖှိၣ်ထီၣ်သးဒီး နုာ်လီၤခး၀ဲပယီၤသုးမီၤစိရိၤလၢအအိၣ်ဖဲဖၣ်ပူၣ်ဟီၣ်က၀ီၤ ထူၣ်မီဒၢတိၤမဲၢ်ခံဒီး ဖဲန့ၣ်ပယီၤသုးအၦၤသံ၀ဲ(၁)ဂၤန့ၣ်လီၤႉ တနံၤဃီ၀ဲန့ၣ်ဖဲဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ် နုာ်လီၤခးကဒီးပယီၤသုးမီၤစိရိၤလၢအအိၣ်ဖဲကၠူၣ်လူၢ်သုးကလၢၤတဘျီဒီး ဖဲန့ၣ်ပယီၤသုးမီၤစိရိၤအၦၤသံ(၁)ဂၤႇဘၣ်ဒိ၀ဲ(၄)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါနုာ်လီၤခးကဒီး၀ဲပယီၤသုးမီၤစိရိၤလၢအအိၣ်ဖဲပကၠီၤဖီလူၢ် လၢၢ်မုၢ်ပျီဟီၣ်က၀ီၤတဘျီႇ...

လါယနူၤအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးမီၤစိရိၤအသုးကလၢၤလၢအအိၣ်ဆီလီၤသးဖဲကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် လ့နၢ်ထိး(တီၣ်စိ)သ၀ီပူၤတဖၣ်အံၤ ခီဖျိခးပိၢ်ထီၣ်ကျိကိးမုၢ်နၤဒဲးအဃိ သ၀ီဖိတဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီးဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ လ့နၢ်ထိး(တီၣ်စိ)သုးကလၢၤအံၤမ့ၢ်၀ဲဒၣ်ပယီၤသုးခီၣ်သုးရ့ၣ်(ခလရ-၂၈၃)အိၣ်ဆီလီၤသးဒီး ဖဲဟါခီ(၇)နၣ်ရံၣ်ဃၣ်ဃၣ်အဆၢကတီၢ်န့ၣ်ခီဖျိခးတပျုာ်တပျီာ်ကျိအဃိ သ၀ီဖိတဖၣ်အါဒၣ်တက့ၢ်န့ၣ်အိၣ်လၢဟံၣ်တဘူၣ်လၢၤဘၣ်ဒီး ပာ်တ့ၢ်ကွံာ်အဟံၣ်အဃီဘၣ်ဟးစံၣ်ပလဲာ်သးအဂ့ၢ်န့ၣ် လီၢ်က၀ီၤသ၀ီဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ “မတၤတဂၤမးတဟဲခးအ၀ဲသ့ၣ်ဘၣ် ဘၣ်ဆၣ်အိၣ်ခးပိၢ်ထီၣ်ကျိလၢအသုးကလၢၤကိးမုၢ်နၤဒဲးလီၤႉ ၦၤအိၣ်တဘူၣ်နီတဂၤလၢၤဘၣ်ႉ ခးလီၤတၢ်လၢသ၀ီပူၤအဃိၦၤပျံၤတၢ်မီၤနီၤႉ အ၀ဲသ့ၣ်အိၣ်အဃိၦၤဖံးအီၣ်မၤအီၣ်တၢ်တညီဘၣ်ႉ လဲၤလၢကျီးပူၤတဘူၣ်လၢၤဘၣ်ႉ ခဲအံၤဘၣ်ဟးစံၣ်ပလဲာ်သးလီၤ”အဂ့ၢ်န့ၣ် သ၀ီဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ လ့နၢ်ထိး(တီၣ်စိ)ယီၤသုးကလၢၤလၢအအိၣ်ဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ၀ီၢ်ရီကီၢ်ဆၣ်တၢ်ပၢဟီၣ်က၀ီၤအပူၤအံၤ ခးလီၤကျိဖးဒိၣ်ကျိဖိတဖၣ်ဆူဒူသ၀ီအပူၤအိၣ်၀ဲတလီၢ်လီၢ်အသိး ၦၤဟးထီၣ်က့ၤလီၤလၢအသုးကလၢၤမဲာ်ညါတဖၣ်ဖီၣ်သမံသမိးတီၢ်၀ဲစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ ဖဲအပူၤကွံာ် ၂၀၂၁ နံၣ် လါအီးကထိဘၢၣ်အခါ ခီဖျိပယီၤသုးမီၤစိရိၤအသုးဟဲထီၣ်တလၢ၀ဲဟီၣ်က၀ီၤတၢ်ပာ်ပနီၣ်လီၢ်အဃိ တၢ်ခးလိာ်သးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(ု္ဒူဗ)၀ံၤအလီၢ်ခံ သုးခိးကီၢ်ဆၢ(BGF)ဒီးပယီၤသုးမီၤစိရိၤတဖၣ်ပာ်ဖှိၣ်ထီၣ်အသးဒီးအိၣ်ဆီလီၤအသး၀ဲဖဲ သရိာ်၀ါ-ဃိၣ်သၢဖျၢၣ်ကျဲဒီတကျိၤအဃိ သ၀ီလၢအအိၣ်ဘူးဖဲန့ၣ်သ့ၣ်တဖၣ်ဘၣ်ဟးစံၣ်အိၣ်ခူသူၣ်ဟးပလဲာ်သးအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ

လါယနူၤအါရံၤ ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တၢ်ဒီသဒၢ၀ဲၤကျိၤဆိကတီၢ်ကွံာ်အ၀ဲသ့ၣ်စုဒုၣ်တီၤအဖီလာ် ကညီဒီကလုာ်ဂၢၤသးကရၢ(KNDO)ဂၢၤသးခိၣ်ကျၢၢ် သုးခိၣ်ကျၢၢ်ဖိ စီၤနၢၤဒါမၠးဒီး သုးခိၣ်စီၤဘး၀ါတဖၣ်လၢမူဒါဒီးလီၢ်လးအံၤအဖီခိၣ် တတူၢ်လိာ်၀ဲဘၣ်အဂ့ၢ်န့ၣ် သုးခိၣ်ကျၢၢ်ဖိစီၤနၢၤဒါမၠးထုးထီၣ်ပာ်ဖျါ၀ဲလံာ်ဖဲလါယနူၤအါရံၤ ၂၁ သီအနံၤန့ၣ်လီၤႉ ဘၣ်ဃးဒီးတၢ်မၤသံၦၤ(၂၅)ဂၤ ဖဲမၠၣ်၀တံၣ် ၀ီၤလ့ၤဟီၣ်က၀ီၤပူၤအံၤအဖီခိၣ် ဖဲလါယနူၤအါရံၤ(၁၇)သီအနံၤ ခ့ၣ်အဲၣ်ယူၣ်တၢ်ဒီသဒၢ၀ဲၤကျိၤထုးထီၣ်လံာ်တၢ်ကလုၢ်လၢဆိကတီၢ်ကွံာ်ၦၤဘၣ်မူဘၣ်ဒါခံဂၤအမူဒါဒီးလီၢ်လး အံၤအဖီခိၣ် သုးခိၣ်ကျၢၢ်ဖိစီၤနၢၤဒါမၠးက့ၤထုးထီၣ်ပာ်ဖျါကဒါ၀ဲလံာ်အံၤန့ၣ်လီၤႉ လံာ်တၢ်ကလုၢ်တဘ့ၣ်အံၤအဖီခိၣ်မ့ၢ်တၢ်လၢအမၤကမၣ်တၢ်ဖးဒိၣ်ညါအသိး တူၢ်လိာ်အီၤတသ့လ့ၤတက့ၤဘၣ်အမဲာ်ညါ ခိၣ်နၢ်လၢအလဲၤတၢ်တဘၣ်ကျဲဒီးမၤန့ၢ်ဒုၣ်ဒါပယီၤအတၢ်မၤဒီးဟ့ၣ်ဂံၢ်ဟ့ၣ်ဘါပယီၤသုးမီၤစိရိၤတဖၣ်အံၤ ကဘၣ်ထီဒါအီၤတဲာ်တဲာ်ဖျုဖျုလီၤအဂ့ၢ်န့ၣ် သုးခိၣ်ကျၢၢ်ဖိစီၤနၢၤဒါမၠးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဘၣ်ဃးဒီးတၢ်မၤသံပယီၤသုးမီၤစိရိၤအၦၤ(၂၅)ဂၤအဂ့ၢ်န့ၣ် ပျဲလီၤအၦၤသမံသမိးတၢ်ဒီးတဲပၠးအ၀ဲသ့ၣ်ဘၣ်ဃးတၢ်ဂ့ၢ်ကဲထီၣ်သးခဲလၢာ်ခဲဆ့လံအဂ့ၢ်န့ၣ် လံာ်တၢ်ပာ်ဖျါအပူၤသုးခိၣ်ကျၢၢ်ဖိစီၤနၢၤဒါမၠးစံး၀ဲန့ၣ်လီၤႉ “အ၀ဲသ့ၣ်ကိးထံၣ်ယၤဒီးသုးခိၣ်ဘး၀ါလၢလ့၀ါဘၣ်ဆၣ်ယတဲအီၤလၢတၢ်ဘံၣ်တၢ်ဘၢလၢပဂီၢ်တဂ့ၤအဃိ ပလဲၤတညီဘၣ်ႉ ယတဲအ၀ဲသ့ၣ်မ့မ့ၢ်လၢ(သုးက့ ၅)ပကလဲၤႉ တချုးလၢပဒိၣ်ရီကၠၢၢ်ခ့ၣ် ထုးထီၣ်ရၤလီၤလံာ်အံၤဘၣ်န့ၣ် ယထံၣ်လိာ်သးဒီးပဒိၣ်တၤဒိၣ်မူႇပဒိၣ်ရီကၠၢၢ်ဒီးပဒိၣ်ကွဲၤထူ၀့ဒံးလီၤႉ ဘၣ်ဆၣ်တမၤ၀ံၤမၤတဲာ်တၢ်နီတမံၤဘၣ်”အဂ့ၢ်န့ၣ် အလံာ်တၢ်ပာ်ဖျါအပူၤစံး၀ဲန့ၣ်လီၤႉ ဘၣ်ဃးၦၤဘၣ်မူဘၣ်ဒါကိးထံၣ်၀ဲတၢ်ဂ့ၢ်အံၤ ခ့ၣ်အဲၣ်ယူၣ်ကရူၢ်ကရၢအပူၤတဖၣ်စံး၀ဲလၢ သုးခိၣ်ကျၢၢ်ဖိစီၤနၢၤဒါမၠးလဲၤထံၣ်လိာ်ထိၣ်ဃူထိၣ်ဖိး၀ဲတအိၣ်ဘၣ်အဂ့ၢ်အံၤန့ၣ် ခ့ၣ်အဲးစံၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ သုးခိၣ်ကျၢၢ်ဖိစီၤနၢၤဒါမၠးစံး၀ဲလၢ...

လါယနူၤအါရံၤ ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤ တကီၢ်ခါခဲအံၤၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲ(၅၀ႇ၀၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ဘိးဘၣ်ရၤလီၤ၀ဲဖဲတနံၤအံၤလါယနူၤအါရံၤ ၁၉ သီအနံၤန့ၣ်လီၤႉ ၦၤဃ့ၢ်မှံဟးဖျိးသ့ၣ်တဖၣ်အံၤ ခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်ဒီးခးလီၤနါစိၤကျိဖးဒိၣ်တဖၣ်အဃိ မ့ၢ်ၦၤသ့ၣ်တဖၣ်လၢအဃ့ၢ်ထီၣ်၀ဲလၢတကီၢ်ခါခဲအံၤသ့ၣ်တဖၣ်ဒီး ကီၢ်သူလ့ၤတၢ်ပၢဟီၣ်က၀ီၤပူၤ လီၢ်က၀ီၤကမျၢၢ်တကလီၢ်ဘျဲၣ်စ့ၢ်ကီး ဘၣ်အိၣ်၀ဲလၢတၢ်ပျံၤတၢ်ဖုးတၢ်ဘၣ်ယိၣ်ပူၤအဂ့ၢ်န့ၣ် ခ့ၣ်အဲၣ်ယူၣ်လံာ် တၢ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤႉ ၦၤဃ့ၢ်မှံဟးဖျိးလၢအဟဲအါထီၣ်အံၤမ့ၢ်၀ဲ(သုးက့ ၆)ဒူပျာ်ယာ်ကီၢ်ရ့ၣ်ဒီး(သုးက့ ၅)မုၢ်တြီၢ် ကီၢ်ရ့ၣ်တဖၣ်အါကတၢၢ်လီၤအသိး လၢ(သုးက့ ၁)ဒူသထူၣ်ကီၢ်ရ့ၣ်ႇ(သုးက့ ၃)ချၢၣ်လွံၢ်ထူၣ်ကီၢ်ရ့ၣ်ႇ(သုးက့ ၄)ဘျံးဒ၀ဲၢ်ကီၢ်ရ့ၣ်တဖၣ်အပူၤစ့ၢ်ကီး ၦၤဃ့ၢ်မှံဟးဖျိးအိၣ်လၢအကထိညါအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ဘၣ်ထွဲဒီးၦၤဃ့ၢ်မှံဟးဖျိးတၢ်အိၣ်သးအံၤ ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနဒၣ်ဆူ စံး၀ဲလၢ“ၦၤဃ့ၢ်မှံဟးဖျိးအနီၣ်ဂံၢ်လၢခ့ၣ်အဲၣ်ယူၣ်တီၣ်ထီၣ်၀ဲခဲအံၤသ့ၣ်တဖၣ်န့ၣ် မ့ၢ်၀ဲဒၣ်ၦၤစံၣ်မှံဟးဖျိးလၢတကီၢ်ခါခဲအံၤအနီၣ်ဂံၢ်မီၤနီၤႉ တပၣ်ဃုာ်အပူၤကွံာ်လါအ့ဖြ့ၣ်အနီၣ်ဂံၢ်ဒံးဘၣ်ႉ မ့ပာ်ဖှိၣ်ဃုာ်ဒီးၦၤစံၣ်အနီၣ်ဂံၢ်လၢညါတဖၣ်ဒု ထဲ(သုးက့ ၅)တဘ့ၣ်အပူၤန့ၣ် ၦၤဃ့ၢ်မှံဟးဖျိးအိၣ်လၢ(၅)ကလးဘျဲၣ်ညါလီၤႉ မ့ပာ်ဖှိၣ်ကီၢ်ရ့ၣ်ခဲလၢာ်ဒုကအိၣ်တကလီၢ်ဆူဖီခိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါ ခ့ၣ်အဲၣ်ယူၣ်တၢ်ပၢဟီၣ်က၀ီၤပူၤၦၤဃ့ၢ်မှံဟးဖျိးတနီၤန့ၣ် လဲၤဃ့ၢ်အိၣ်ကဒုသးလၢအဘူးတံၢ်အဟံၣ်အိၣ်၀ဲအသိး...

လါယနူၤအါရံၤ ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤအဃိလီၢ်က၀ီၤကမျၢၢ်လၢအလဲၤဃ့ၢ်အိၣ်လၢကီၢ်ကၠီၣ်တဲၣ်ပူၤသ့ၣ်တဖၣ် ပယီၤသုးမီၤစိရိၤတဲ၀ဲလၢက့ၤအိၣ်လၢကစၢ်လီၢ်ကျဲသ့လံအဖီခိၣ်အံၤ ဘၣ်ယိၣ်၀ဲလၢတၢ်ကက့ၤဆှၢဆူၣ်အ၀ဲသ့ၣ်အဂ့ၢ်န့ၣ် ၦၤဃ့ၢ်မှံဟးဖျိးလၢအအိၣ်ကီၢ်ကၠီၣ်တဲၣ်တကပၤစံး၀ဲန့ၣ်လီၤႉ ပယီၤသုးမီၤစိရိၤဘိးဘၣ်ရၤလီၤ၀ဲလၢဖီၣ်ဂၢၢ်ဃာ်လ့က့ၣ်ကိာ်ဟီၣ်က၀ီၤန့ၢ်လံအသိး ၦၤဃ့ၢ်မှံဟးဖျိးတဖၣ်ကက့ၤဆူအတၢ်အိၣ်တၢ်ဆိးလီၢ်ကျဲကသ့အဂီၢ် တၢ်ကစီၣ်ဟူထီၣ်လၢကီၢ်ကၠီၣ်တဲၣ်-ကီၢ်ပယီၤခံကပၤၦၤဘၣ်မူဘၣ်ဒါတဖၣ်တဲသကိးတၢ်အိၣ်အဖီခိၣ်အံၤ တၢ်ဘၣ်ယိၣ်ဘၣ်ဘှီဟဲအိၣ်ထီၣ်၀ဲဒ်အံၤလီၤအဂ့ၢ်န့ၣ် ၦၤဃ့ၢ်မှံဟးဖျိးလၢအိၣ်ကီၢ်ကၠီၣ်တဲၣ်ပူတဂၤစံး၀ဲန့ၣ်လီၤႉ “ဖဲမဟါန့ၣ်ကၠီၣ်တဲၣ်ၦၤဘၣ်မူူဘၣ်ဒါတဖၣ်ဟဲတဲ၀ဲဒီး(speaker)လီၤ တဲ၀ဲလၢက့ၤလၢကီၢ်ပယီၤတကပၤသ့လံမီၤနီၤႉ ၦၤဃ့ၢ်မှံဟးဖျိးတဖၣ်တဲဆၢ၀ဲလၢက့ၤတဘူၣ်ဘၣ်အဃိ တဲ၀ဲလၢမၠၣ်၀တံၣ်ပယီၤသုးမီၤစိရိၤပၢပြးတကပၤကရဲၣ်ကျဲၤ၀ဲဒီး လၢမၠၣ်၀တံၣ်ကၠီၣ်လိကၠံတၢ်လီၢ်န့ၣ်ကက့ၤဆှၢ၀ဲတနံၤတကယၤႇကပာ်၀ဲဖဲန့ၣ်တနွံလီၤႉ ကသမံသမိး၀ဲမ့၀ံၤ သ၀ီသးၦၢ်မ့ဟဲကိးမးကအးလီၤက့ၤ၀ဲအဃိ ပ၀ဲဒၣ်ဒုပက့ၤလၢတၢ်ရဲၣ်တၢ်ကျဲၤ၀ဲန့ၣ်တဘူၣ်ဘၣ်ႉ ၦၤအါဒၣ်တက့ၢ်န့ၣ်ပျံၤ၀ဲလၢတၢ်ကဖီၣ်ႇသမံသမိးအီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ် ၁၅ သီအနံၤ ခီဖျိတၢ်ဒုးကဲထီၣ်လၢလ့က့ၣ်ကိာ်ဟီၣ်က၀ီၤပူၤအဃိ လီၢ်က၀ီၤၦၤဃ့ၢ်မှံဟးဖျိးဘၣ်လဲၤဃ့ၢ်အိၣ်လၢကီၢ်ကၠီၣ်တဲၣ်ပူၤအဂၤ(၈၀၀၀)ဃၣ်ဃၣ်အကျါ လၢသုးခိးကီၢ်ဆၢ(BGF)သုးခိၣ်ဖိစီၤမိၣ်သိၤတၢ်ရဲၣ်တၢ်ကျဲၤအဃိက့ၤ၀ဲဒၣ်ဆူအဒူသ၀ီအိၣ်အဂၤ(၅၀၀)ဘျဲၣ်န့ၣ်လီၤႉ ဒ်န့ၣ်အသိးလ့က့ၣ်ကိာ်၀့ၢ်သီဟီၣ်က၀ီၤဖိဃုာ်ဒီးယသ့ၣ်ကူၤႇဖလူဖးဒိၣ်ႇဖလူဖိႇထံမဲး၀ါခံဒီးပဟံၣ်ကျီးသ၀ီဖိသ့ၣ်တဖၣ်စ့ၢ်ကီး ပယီၤသုးမီၤစိရိၤၦၤဘၣ်မူဘၣ်ဒါတဖၣ်ဟဲဆဲးကျိးတဲ၀ဲလၢက့ၤအိၣ်လၢကစၢ်လီၢ်ကျဲသ့လံအိၣ်၀ဲအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဘၣ်ဆၣ်ခီဖျိပယီၤသုးမီၤစိရိၤနုာ်လီၤအိၣ်ဆိးလၢလ့က့ၣ်ကိာ်၀့ၢ်သီက၀ီၤဒ့ပူၤဒီးဒူသ၀ီတဖၣ်အပူၤဒံးအဃိ ကက့ၤလၢကစၢ်လီၢ်ကျဲအဂီၢ်တသ့ဒံး၀ဲဘၣ်အဂ့ၢ်န့ၣ် လ့က့ၣ်ကိာ်လီၢ်က၀ီၤကညီသးစၢ်ၦာ်ဘျးစဲလၢအမၤစၢၤၦၤဃ့ၢ်မှံဟးဖျိးတဂၤစံး၀ဲန့ၣ်လီၤႉ “လ့က့ၣ်ကိာ်န့ၣ်ဟးဂီၤလၢာ်လံႉပယီၤသုးမီၤစိရိၤတဖၣ်အိၣ်လၢပၢပြး၀ဲၤဒၢးႇကၠိႇလံာ်ရိဒၢးဒီးၦၤဟံၣ်ၦၤဃီပူၤအိၣ်၀ဲလီၤႉ ကျိဖးဒိၣ်အချံလီၤတဲာ်တပိၢ်ဖးထီၣ်ဒံးဘၣ်စ့ၢ်ကီးအိၣ်လီၤႉ တၢ်ဒိးလီၤဃာ်မ့ၣ်ပိၢ်အိၣ်တအိၣ်န့ၣ်မတၤတဂၤမးအုၣ်ခီၣ်သးတဘူၣ်ဘၣ်”အဂ့ၢ်န့ၣ် သးစၢ်တဖၣ်စံး၀ဲန့ၣ်လီၤႉ ဒ်န့ၣ်အသိးဖဲမဟါလါယနူၤအါရံၤ...

လါယနူၤအါရံၤ ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်မၤ၀ဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ခီကရဲးတၢ်အိၣ်ဖှိၣ်(၁၉)ဘျီတဘျီအပူၤ ကီၢ်ရ့ၣ်ခိၣ်အလီၢ်တၢ်ဃုထၢထီၣ်က့ၤ၀ဲလၢတၢ်ရ့လိာ်မုာ်လိာ်၀ဲၤဒၢးခိၣ်ႇလၢအမ့ၢ်စ့ၢ်ကီးကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤဖျိးစိ၀့အဂ့ၢ်န့ၣ် သ့ၣ်ညါဘၣ်န့ၣ်လီၤႉ (၁၉)ဘျီတဘျီခီကရဲးတၢ်အိၣ်ဖှိၣ်အံၤဘၣ်တၢ်မၤအီၤဖဲဘျံးဒ၀ဲၢ်ကီၢ်ရ့ၣ် ၀ဲၤလီၢ်ခိၣ်သ့ၣ် အမျၢ်ထၣ် စးထီၣ်လၢလါယနူၤအါရံၤ ၁၁ သီ တုၤလၢ ၁၅ သီအနံၤဒီး ကီၢ်ဆၣ်(၄)ဘ့ၣ်ပူၤခၢၣ်စးတဖၣ်ဒီးဟီၣ်က၀ီၤလီၤဆီ(၂)ဘ့ၣ်ခၢၣ်စးတဖၣ် ပာ်ဖှိၣ်ခဲလၢာ်(၉၃)ဂၤဟဲထီၣ်၀ဲဒၣ်တၢ်အိိၣ်ဖှိၣ်အံၤန့ၣ်လီၤႉ ခီကရဲးတၢ်အိၣ်ဖှိၣ်အပူၤတၢ်ဃုထၢတီၣ်ထီၣ်ကီၢ်ရ့ၣ်ခိၣ်လၢပဒိၣ်စီၤဖျိးစိ၀့ႇကီၢ်ရ့ၣ်ခိၣ်(၂)သုးခိၣ်ကျၢၢ်စီၤမုၢ်လၢ်ႇ နဲၣ်ရွဲၣ်ပဒိၣ်စီၤအဲၣ်နၤႇ နဲၣ်ရွဲၣ်သဃဲၤ ပဒိၣ်စီၤဘိၤဘိခ့ၣ်မီၣ်အမဲာ်ညါ စံၣ်ညီၣ်ကွီၢ်ခိၣ် ပဒိၣ်စီၤသူယဲၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်ဃုထၢထီၣ်က့ၤဘျံးဒ၀ဲၢ်ကီၢ်ရ့ၣ်ကမံးတံာ်ဖိအံၤ ခ့ၣ်အဲၣ်ယူၣ်လီၢ်ခၢၣ်သးကမံးတံာ်ပဒိၣ်စီၤသမ့ၤထိစံး၀ဲလၢ“ကီၢ်ရ့ၣ်ခိၣ်လၢအဟဲထီၣ်ခဲအံၤတဖၣ်ဖၠဲး၀ဲလီၤႉ မ့၀ံၤဘျီန့ၣ်အတၢ်အိၣ်ဆူၣ်အိၣ်ချ့စ့ၢ်ကီးဂ့ၤႇအပူၤကွံာ်အ၀ဲသ့ၣ်ဟံမူဒါလၢတၢ်ရ့လိာ်မုာ်လိာ်၀ဲၤဒၢးအဃိ လၢတၢ်ရ့လိာ်မုာ်လိာ်တကပၤနါက့ဖၠဲးလီၤႉ နဲၣ်ရွဲၣ်နါက့စ့ၢ်ကီးဖၠဲးႇမၤ၀ဲန့ၢ်လီၤႉ နဲၣ်ရွဲၢ်သဃဲၤနါက့လၢၦၤသ့တၢ်ကူၣ်ဘၣ်ကူၣ်သ့အကျါန့ၣ်ပၣ်ဃုာ်စ့ၢ်ကီး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဘျံးဒ၀ဲၢ်ကီၢ်ရ့ၣ်ခီကရဲးတၢ်အိၣ်ဖှိၣ်လၢတၢ်မၤအီၤယံၤ(၅)သီအတီၢ်ပူၤအံၤ တၢ်ဃုထၢထီၣ်စ့ၢ်ကီးကီၢ်ရ့ၣ်ပူၤ၀ဲၤကျိၤလၢအဘၣ်ထွဲတဖၣ်အမဲာ်ညါ တၢ်ကွဲးလီၤပာ်လီၤစ့ၢ်ကီးခါဆူညါတၢ်မၤရဲၣ်ကျဲၤလၢကီၢ်ရ့ၣ်ကဖံးမၤ၀ဲသ့ၣ်တဖၣ််အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်ခ့ၣ်အဲၣ်ယူၣ်တၢ်သူၣ်ထီၣ်ဆီလီၤအသိးန့ၣ် လီၢ်ခၢၣ်သးအပတီၢ်ႇကီၢ်ရ့ၣ်အပတီၢ်ခီကရဲးဒီး တၢ်ဃုထၢကီၢ်ရ့ၣ်ပၢဆှၢကမံးတံာ်အံၤ ဘၣ်တၢ်မၤအီၤ(၄)နံၣ်တဘျီန့ၣ်လီၤႉ လၢန့ၣ်အမဲာ်ညါကီၢ်ရ့ၣ်အပတီၢ်ခီကရဲးဒီးတၢ်ဃုထၢအံၤ...